Lëvizja VETËVENDOSJE! përkrah kërkesat e grevistëve në QKUK

Të hëhën, me 25 qershor, shefi i Grupit parlamentar të Lëvizjes VETËVENDOSJE!, Visar Ymeri, bashkë me drejtuesin e Sekretariatit për Marrëdhënie me Jashtë, Xhelal Sveçlën, u takuan me përfaqësuesit e Sindikatës së punëtorëve të higjienës të QKUK-së.

Në këtë takim u diskutua për kërkesat që i kanë parashtruar punëtorët e higjienës, drejtorit të QKUK-së, pasojë e mospërmbushjes të të cilave, këta punëtorë janë në grevë qe disa ditë.

Ata po kërkojnë përmirësim të kushteve të punës, dhe respektimin e të drejtave të punëtorëve. Ata po kërkojnë rritje të pagave, në përputhje me punët që kryejnë, si gjatë ditëve të javës, ashtu edhe për punët gjatë festave e vikendeve. Ata po vazhdojnë të kërkojnë pagesën e shujtës prej 44 eurove, gjë që e kanë kërkuar edhe vitin e kaluar.

Përfaqsuesit e Lëvizjes VETËVENDOSJE! treguan mirëkuptim për gjendjen në të cilën gjenden punëtorët higjienik të QKUK-së, duke i vlerësuar kërkesat si të drejta dhe të arsyeshme.

Andaj Lëvizja VETËVENDOSJE! përkrah pa rezervë grevën e punëtorëve higjienik të QKUK-së, deri në plotësim të plotë dhe pa kusht të kërkesave të tyre.

Lëvizja VETËVENDOSJE!