Takim me banorë të fshatit Gërnçar
Kryetari i Lëvizjes VETËVENDOSJE!, Albin Kurti, i shoqëruar nga disa nga drejtorët e Komunës së Prizrenit, Levent Kasëmi, drejtor i shërbimeve publike, Refik Shaqiri, drejtor i kadastrit (boshnjak, partia NDS), Visar Shehu, drejtor i shëndetësisë, Islam Thaçi, drejtor i inspeksionit, Krenare Koqi, shefe e kabineti të kryetarit, Artan Abrashi kryesues i asamblesë komunale vizituan fshatin Gërnçar të kësaj komune, fshat ky i banuar me pjesëtarë të komunitetit boshnjak.
Në takim me ta, kryetari Kurti foli mbi situatën e përgjithshme në Kosovë, të cilën e vlerësoi të rëndë për të gjithë qytetarët e vendit. Fajtor për këtë është modeli ekonomik i gabuar, i koncentruar vetëm në tregti e import dhe administratë të fryrë, duke lënë anash prodhimin, duke i privatizuar ndërmarrjet dhe duke i lënë punëtorët pa të drejta.
Ai i përmendi tri shtylla mbi të cilat sipas programit të Lëvizjes VETËVENDOSJE! duhet të ndërtohet shteti funksional: shtetin zhvillimor të bazuar në prodhimtari, shtetin e së drejtës me barazi ligjore për qytetarët dhe luftim të pakomromis të korrupsionit, dhe, shtetin social, i cili do të të ofronte mbrojtje për qytetarët, para së gjithash për ata në nevojë.
Nga ana e tyre, drejtorët e Komunës së Prizrenit i njoftuan të pranishmit me projektet e realizuara dhe të planifikuara komunale nga të cilat do të përfitojë ky fshat. Projekti i rrjetit të ujësjellësit të fshatit, shkolla fillore si dhe Qendra e Mjekësisë Familjare, priten të përfundojnë vitin tjetër.
