Thellohet bashkëpunimi me Fondacionin “Westminster”
Në selinë e Lëvizjes VETËVENDOSJE! në Prishtinë u organizua një prezantim mbi sfidat e partive politike në shekullin XXI dhe praktikat më të mira ndërkombëtare. Prezantimin e mbajti z. Iain Gill, konsulent i “Westminster Foundation for Democracy” (Fondacioni Westminster për Demokraci). Z. Gill ka një përvojë të gjerë bashkëpunimi si konsulent me mbi 200 parti politike në Evropë, ShBA, etj. Prezantimi u zhvillua në kuadër të projektit të bashkëpunimit mes Lëvizjes VETËVENDOSJE! dhe Fondacionit Westminster për Demokraci (WFD), që funksionon si një agjenci e pavarur publike në Mbretërinë e Bashkuar (MB) e cila punon me partitë politike brenda dhe jashtë MB-së në mbështetje të demokracisë.
Në këtë prezantim morën pjesë deputetë, anëtarë kryesie, asambleistë komunalë, dhe aktivistë të Lëvizjes VETËVENDOSJE!. Ata u përfshinë në një bashkëbisedim në lidhje me parimet e subjekteve politike, angazhimin e grupeve të papërfaqësuara, strategjitë e komunikimit dhe mesazhet politike. Projekti do të vazhdojë me hapa të tjerë në të ardhmen që janë në përputhje me parimet demokratike të Lëvizjes VETËVENDOSJE! dhe të WFD-së.
