Shefi i GP, Rexhep Selimi shpalosi në Kuvendin e Kosovës projekt rezolutën e propozuar nga LV për dialogun me Serbinë.

Shefi i GP, Rexhep Selimi shpalosi sot në Kuvendin e Kosovës projekt rezolutën e propozuar nga Lëvizja VETËVENDOSJE! për dialogun me Serbinë. Ajo ka katër pika, të cilat mund t’i lexoni më poshtë. Në replikën e tij me deputetët e pozitës, ai tha se Kuvendi nuk duhet të zëvendësohet me ide të tilla si ajo e ‘forumit të liderëve’ dhe se nëse nuk pajtohen këta deputet për tri pikat e para, atëherë le të shkojmë drejt te pika 4 që hapë rrugë për procesin e zgjedhjeve të lira dhe demokratike.

Pika 1: Kuvendi i Kosovës rithekson se karakteri unitar i Republikës së Kosovës është i paprekshëm dhe i pacenueshëm;

Pika 2: Duke marrë parasysh faktet e konfirmuara lidhur me temën e trajtuar gjatë dialogimit të deritanishëm, atë të shkëmbimit të territoreve që janë në kundërshtim me obligimin Kushtetues për ruajtjen e Integritetit dhe Sovranitetit të Kosovës, Kuvendi i Kosovës kërkon nga institucionet përgjegjëse që në temën e dialogut mes Kosovës dhe Serbisë, në asnjë rrethanë e as nivel e format nuk mund të jenë çështje që lidhen me sovranitetin e vendit apo integritetin territorial, apo që synojnë krijimin e ndonjë pushtetit të tretë administrative;

Pika 3: Kuvendi i Kosovës para çdo takimi në kuadër të dialogut me Serbinë duhet të miratojë platformën për dialog, që do të përfshijë parimet bazë në bazë të të cilave e do të zhvillohet dialogu dhe do të votohet me 2/3 e votave të deputetëve;

Pika 4: Kuvendi i Kosovës kërkon hapjen e rrugës për një proces zgjedhor të lirë e demokratik nga i cili do të dilte qeveri legjitime e do të kishte legjitimitetin e përfaqësimit të vendit në dialog me Serbinë”.