Grupi Parlamentar i VETËVENDOSJE!-s bën homazhe në nderim të znj. Madeleine Albright

Mikja e pazëvendësueshme e atyre që luftuan për liri dhe dinjitet njerëzor, znj. Madeleine Albright, do të kujtohet përherë si gruaja që deri në frymën e saj të fundit u rreshtua me popujt e angazhuar për paqe, liri, dhe barazi.

Si Kosovë, si institucione, përfaqësues, e shoqëri, do e kujtojmë dhe nderojmë përherë si kontributin e saj për çlirimin dhe pavarësimin e Kosovës ashtu edhe mbështetjen e pakursyer të saj për zhvillimin dhe integrimin e vendit tonë.

Madeleine Albright u nda nga kjo botë duke lavdëruar luftën e grave nga Kabuli deri në Kiev, duke theksuar që mendja dhe zemra e saj është me të gjithë ata që luftojnë për një botë të lirë e demokratike, për një botë ku ka barazi e prosperitet për të gjithë.