LV mbështet marshin protestues për 8 MARS
Lëvizja VETËVENDOSJE! mbështet marshin protestues të organizuar nga aktiviste e aktivistë të kolektivit ‘MARShojmë s’ Festojmë’ dhe fton anëtarësinë e saj t’i bashkohet këtij marshi të premten nga ora 12:00 në sheshi ‘Zahir Pajaziti.’
Angazhimi i aktivistëve dhe organizatave që merren me të drejtat e grave, për më shumë barazi shoqërore muajve të kaluar, ka dëshmuar se bashkarisht jo vetëm se mund t’i qëndrojmë dhimbjes, por edhe ta bëjmë atë të pajustifikueshme, e të pashpjegueshme nga cilado anë e pushtetit. Ka dëshmuar se po u organizuam bashkë, do të lëkundet hierarkia e çdo pushteti që mban përgjegjësi për dhunimin e jëtës në këtë vend.
Të marshojmë edhe më shumë, edhe më zëshëm këtë 8 mars. Vetëm një angazhim i përbashkët mund ta përpunojë përvojën e barazisë dhe drejtësisë drejt një drite të re. Vetëm me një ritëm të tillë të MARShit hapim radhët për gjithë ato të reja e të rinj, të moshuara e të moshuar që kërkojnë barazi më të plotë, e jete më të drejtë në këtë vend.
