Në Krushë të Vogël, para 23 vitesh, forcat serbe ndanë gjakftohtësisht familjet, ndalën burrat dhe djemtë dhe i dëbuan nga fshati të gjitha gratë dhe fëmijët. Në këtë masakër u vranë 112 shqiptarë, 70% të burrave dhe djemve të fshatit të moshës nga 13 deri në 77 vjeç, u zhdukën. Nga kjo masakër 82 gra humbën bashkëshortët e tyre e 145 fëmijë mbetën pa baballarë. Ndërsa nga 145 shtëpi banimi, vetëm 8 i shpëtuan djegies dhe shkatërrimit nga aksioni serb.

Ndërkaq sot pas 23 vitesh janë rivarrosur mbetjet mortore të shtatë viktimave të luftës, që ishin vrarë e zhdukur nga forcat e armatosura serbe në këtë masakër, më 26 mars 1999.

‘’Historia e shtetit tonë nuk mund të shkruhet pa Krushën e Vogël e Krushën e Madhe. Nuk mund të shkruhet pa adresimin e dhimbjeve e tmerrit të përjetuar. Dëmeve e vuajtjeve të shkaktuara. Historia jonë është e shkruar me mbi 400 masakra të kryera gjatë viteve 1998 dhe 1999 në Kosovë. Kjo histori nuk mund të rishkruhet e as të harrohet. Asnjëherë të ndryshohet, tha Kryeministri Kurti.

Në ceremoninë e varrimit mori pjesë Kryeministri i Republikës së Kosovës, Albin Kurti, së bashku me Kryetarin e Kuvendit të Republikës së Kosovës, Glauk Konjufca, Nënkryetaren e Kuvendit, Saranda Bogujevci, Ministren e Drejtësisë, Albulena Haxhiu dhe Kryetarin e Komisionit Qeveritar për Personat e Zhdukur, gjatë luftës, Andin Hoti.

Masakra e Krushës së Madhe që e kujtojmë me 26 mars, pak ditë pas fillimit të bombardimit të NATO-s, ku u vranë 241 qytetarë civilë të këtij fshatit është shembull konkret i krimit dhe gjenocidit të kryer nga Serbia.

”Na e kërkon këtë rivendosje të drejtësisë çdo familje e Krushës, çdo familje e Kosovës, por mbi të gjitha vërtetësia dhe qëndrueshmëria jonë si shtet e si popull. Natyrisht që simbolin e Krushës ne e kemi edhe më të lartë e më të ndritur. Një prej të zhdukurve me dhunë të Krushës është një nga njerëzit më të mençur që ka kaluar në gjuhën shqipe e në trojet shqiptare: Ukshin Hoti. Është e lartë dhe e vështirë t’i rikthesh Krushës së Madhe drejtësinë për Ukshin Hotin. Është e vështirë drejtësia për të zhdukurin. Është e vështirë drejtësia për cenimin në inteligjencë të një populli”, tha Kryeministri Kurti në 23 vjetorin e Masakrës së Krushës së Madhe.

Qeveria e Kosovës krahas përgatitjes së padisë për gjenocid ka themeluar edhe Institutin për krimet e kryera gjatë luftës në Kosovë jo vetëm për t’i evidentuar ato, por për të sjellë drejtësi për mijëra viktima që u vranë padrejtësisht në vendin e tyre.

Mikja e pazëvendësueshme e atyre që luftuan për liri dhe dinjitet njerëzor, znj. Madeleine Albright, do të kujtohet përherë si gruaja që deri në frymën e saj të fundit u rreshtua me popujt e angazhuar për paqe, liri, dhe barazi.

Si Kosovë, si institucione, përfaqësues, e shoqëri, do e kujtojmë dhe nderojmë përherë si kontributin e saj për çlirimin dhe pavarësimin e Kosovës ashtu edhe mbështetjen e pakursyer të saj për zhvillimin dhe integrimin e vendit tonë.

Madeleine Albright u nda nga kjo botë duke lavdëruar luftën e grave nga Kabuli deri në Kiev, duke theksuar që mendja dhe zemra e saj është me të gjithë ata që luftojnë për një botë të lirë e demokratike, për një botë ku ka barazi e prosperitet për të gjithë.

Projekti “Solar4Kosova” do të kushtojë 64 milionë euro dhe do të financohet nga Republika Federale e Gjermanisë dhe Banka Evropiane për Rindërtim dhe Zhvillim.

Ky projekt do të shtojë kapacitetet për rreth 70MW në sistemin e ngrohjes në Prishtinë.

Do të sigurojë kyçjen në rrjetin e ngrohjes qendrore për 12.000 familje apo 60.000 banorë;

Do të ndërtohen kolektorë diellorë prej përafërsisht 69.000 m2;

Do të reduktojë kërkesën për energji elektrike për qëllime të ngrohjes;

Do të reduktojë emitimin e dioksidit të karbonit për 40.000t në vit; si dhe

Do të kontribuojë në diversifikim të miksit të gjenerimit të energjisë së Korporatës Energjetike të Kosovës (KEK) përmes komponentës së fuqisë fotovoltaike.

Sot Nënkryetarja e Lëvizjes VETËVENDOSJE! njëkohësisht dhe kryetarja e Komisionit për Shëndetësi dhe Mirëqenie Sociale, dr. Fatmire Kollçaku  së bashku me dhe Drejtuesen e grupit të Grave deputete Tinka Kurti morën pjesë në tryezën e organizuar nga Forumi Ekonomik i Grave, Friedrich Erbet Shtiftung dhe Iniciativa për Stabilitet ne Kosovë në diskutimin publik për Lejen e lehonisë dhe Lejen prindërore. 

Nga organizatoret dhe pjesëmarrëset u paraqitën disa propozime si model për ta adresuar këtë çështje në ligjin e ri që do të përgatitet.

Lëvizja VETËVENDOSJE! e ka pasur dhe ka prioritet të lartë çështjen e legjislacionit të punës dhe veçanërisht zonat ku rregullohet të drejtat e prindërve për rritjen e fëmijëve dhe kujdesin ndaj tyre krahas vijimit të punës. 

Jemi të vetëdijshëm që edhe hartimi i legjislacionit të ri por mbi të gjitha zbatimi i ndershëm dhe i drejtë i tij ka për të pasur tepër shumë pengesa e vështirësi të cilat nuk janë vetëm të natyrës ekonomike apo të burimeve njerëzore, kryesisht në sektorin privat, por edhe të një botëkuptimi të ri për marrëdhëniet e punës dhe të drejtave themelore të lidhura me to.

Të dhënat e dekadës së fundit për çështjen e punësimit të grave dhe veçanërisht të ndërprerjes së marrëdhënies së punës e daljes plotësisht nga marrëdhëniet e punës për shkak të pushimit të lehonisë janë tejet shqetësuese. 

Në këtë drejtim qoftë në Kuvendin e Republikës së Kosovës, e në komisionet që i drejtojmë, qoftë në nivel të qeverisjes qendrore e lokale ne do t’i dëgjojmë të gjitha llojet e propozimeve që vijnë nga grupe shoqërore e organizata ngase  synimi ynë është ta transformojmë rrënjësisht këtë gjendje. 

Dhe kemi bindjen që do ta bëjmë. 

23 mars 2022 

Lëvizja VETËVENDOSJE! 

Sot bëhen 1 vit nga votimi i Qeverisë Kurti II. Menaxhimi i suksesshëm i pandemisë dhe dëmeve të saj, rritja e pashembullt ekonomike, investimet në ekonomi dhe siguri, luftimi i krimit dhe korrupsionit, fillimi i procesit të Vetingut bashkë me atë të konfiskimit të pasurisë dhe kujdesi ndaj atyre që kanë më së shumti nevojë, janë vetëm disa prej arritjeve krahas shumë punëve që janë bërë përgjatë një viti qeverisje. Shumë zotime janë realizuar e për shumë rezultate që i dëshirojmë dhe na duhen tashmë është shtruar rruga që na shpien atje.

• Ndalja e gjakderdhjes financiare

150 milionë euro të kursyera nga anulimi i kontratave të dëmshme.

Shkurtimet e shpenzimeve qeveritare.

Stabiliteti institucional

Zgjedhje demokratike.

Shumicë solide.

Asnjë keqpërdorim i parasë publike.

Kosova e para në rajon për sundim të ligjit sipas “World Justice Project”.

• Luftimi i krimit dhe korrupsionit

550 operacione, 1102 bastisje, 54 grupe kriminale.

Konfiskim i 1 mijë 192 kg drogë.

Mbyllje e rrugëve të kontrabandës në veri.

Arrestim i fajdexhinjve.

Arrestim i policëve për ryshfet.

Themelimi i bazës së Policisë në Bërnjak.

Kapja e keqpërdorimit me derivate prej 600 mijë eurosh.

• Investimi në ndërmarrje publike

Themelimi i Fondit Sovran.

40 milionë për Telekomin dhe Trepçën.

Fillon punën NSH “Brezovica”.

Investimi në siguri

100 milionë euro për FSK.

Modernizimi i ushtrisë.

Fondi i Sigurisë.

• Ringjallja e Ekonomisë

7.9% rritje të GDP-së.

Aktiviteti ekonomik +15%

Eksportet +66%

Të hyrat buxhetore +30%

40 milionë për prodhuesit vendor.

20 milionë për skemën e punësimit.

Mbi 1.1 miliardë euro të hyrat nga dogana.

Mbi 600 milionë të hyra të reja në ATK.

Koncept Dokumenti për energji të ripërtishme.

Subvencionim i kredive.

Letrat me vlerë “Bono të Diasporës”.

10 milionë në rezervat shtetërore.

Pakoja e ringjalljes ekonomike.

• Mbështetje direkte për qytetarët

Kujdes shtetëror për pensionistët dhe familjet me asistencë sociale.

Nuk ka më pensione nën 100 euro.

142,237 fëmijë përfitues të shtesave.

11,646 nëna lehona përfituese të shtesave.

45 milionë euro shtesa për nënat lehona.

35 milionë euro për skemat sociale dhe pensionale.

• Vaksinimi

2 milionë vaksina Pfizer dhe Astrazeneca.

Vaksinimi i më shumë se 60% të popullsisë.

24 milionë euro për barnat esenciale.

• Veting dhe konfiskim i pasurisë.

Miratimi i koncept dokumentit për Vetingun dhe fillimi i këtij procesi.

Kalimi i ligjit për konfiskimin e pasurisë së pajustifikueshme.

Miratimi i Projektligjit për Gjykatën Komerciale.

• Ristrukturim dhe restaurim në Kulturë

Reformë në teatër, balet, Bibliotekë dhe Arkivë Shtetërore.

Kërkesë zyrtare Serbisë për rikthimin e artefakteve.

Projekti për kompleksin memorial “Adem Jashari”.

Dyfishim i fondit për ndërhyrje emergjente në objektet e trashëgimisë kulturore.

• Infrastrukturë zhvillimore

Heqja e homologimit.

Kartoni i gjelbër për mërgatën.

Rruga Prishtinë-Tetovë.

Hekurudha Prishtinë-Durrës.

Nënshkrimi i Projektit për banim të përballueshëm.

• Politikë me integritet dhe dinjitet

Përfaqësim i dinjitetshëm.

Qasje reciproke me Serbinë .

Thellim i aleancave dhe partneriteteve.

• Për rininë e edukuar dhe profesionale

Arsimi publik falas për të gjithë.

100 mijë euro për studentët në universitete elitare.

1000 bursa për vajza që studiojnë shkenca ekzakte.

Mbi 100 asistentë në shkolla për fëmijë me aftësi të kufizuara.

Kosova merr statusin e vendit të asociuar në programin “Horizon Europe” me të drejta të plota.

• Për gratë me punë e barazi

Barazi gjinore nga lart poshtë në secilin institucion e bord.

Subvencionim i kredisë për biznese prodhuesve që udhëhiqen nga gratë.

Bursa shtetërore për shkollim të lartë.

Miratimi i strategjisë kombëtare për mbrojtjen nga dhuna në familje dhe dhuna ndaj grave.

• Për bujqit në prodhim

Subvencione direkte në bujqësi.

216% rritje të mbështetjes për bujqit.

70 milionë euro për fermerë.

Nisur nga vendimi i Këshillit të Përgjithshëm, organit më të lartë, Lëvizja VETËVENDOSJE! ka shpallur zgjedhjet e brendshme të përgjithshme. Nga 15 marsi, secili anëtar i Lëvizjes do të ketë të drejtë për të votuar e për t’u kandiduar.

Lëvizja VETËVENDOSJE! është organizata me mbështetjen më të madhe në vend, çka duhet të reflektohet në struktura edhe më të fuqishme, e të cilat do të vijnë si rezultat i zgjedhjeve që do të jenë të drejtpërdrejta, të lira e demokratike. Në 30 qendra të Lëvizjes në Kosovë, anëtarët e Lëvizjes do të kenë mundësi që përmes parimit “një anëtar, një votë” të zgjedhin kryesitë e kryetarët e pikave nëpër lagje e fshatra, të propozojnë kandidatët që vlerësojnë më së shumti apo edhe të vetpropozohen.

Të gjithë anëtarët do të kontaktohen për të marrë pjesë në zgjedhje, kurse ju që mbështetni Lëvizjen, por nuk jeni anëtarësuar ende, vizitoni zyret e Lëvizjes VETËVENDOSJE në komunën tuaj dhe anëtarësohuni që të bëheni pjesë e këtij procesi demokratik.

Lëvizja fton të gjithë anëtarët që të bashkohen në këtë proces zgjedhor.

Sot, me 8 mars, Kryeministri i Kosovës bashkë me ministre të kabinetit qeveritar, deputete të Republikës së Kosovës dhe zyrtarë të Sekretariatit të Përgjithshëm e Qendra e Lëvizjes VETËVENDOSJE! në Prishtinë bënë homazhe te Memoriali Heroinat në nderim të jetës, veprës dhe sakrificës së shumë grave të Kosovës gjatë luftës së fundit 1998-99 kundër shtetit okupator, Serbisë.

Te ky memorial që i është kushtuar grave heroina për sakrificën dhe kontributin e tyre gjatë luftës së popullit tonë për liri është vend ku nuk përkujtojmë vetëm sakrificën për liri e çlirim nga pushtuesi, por edhe domosdoshmërinë e barazisë shoqërore. Barazia është liria e vërtetë.

Padrejtësitë ndaj grave dhe vajzave vazhdojnë të jenë evidente në shoqërinë tonë çka e bën edhe më të nevojshëm angazhimin e secilës e secilit prej nesh punën e parreshtur për drejtësi, barazi, për të gjitha gratë, pa dallim.

Sekretariati i Gruas Aktiviste

Lëvizja VETËVENDOSJE!

Më 8 mars aktiviste e aktivistë të Kolektivit “Marshojmë s’festojmë” kanë organizuar një marsh protestues, që do të ketë tri pikëtakime kryesore, në orën 10:00 Pallati i Drejtësisë, 11:00 te rrethi i Flamurit dhe 12:00 te sheshi “Zahir Pajaziti”.

Lëvizja VETËVENDOSJE! do të jetë në mbështetje të plotë të marshit dhe nesër do të jemi në shesh sepse mendojmë që për gratë e burrat në shoqërinë tonë duhet të ketë barazi të të drejtave politike, ekonomike e shoqërore. Prandaj është detyrë jona qytetare të dalim në marshim përkrah aktivisteve e aktivisteve të shoqërisë civile.

Mendësia patriarkale mban gjallë vrasjen e grave, femicidin, fenomen kriminal që duhet luftuar nga gjithë pjesët e shoqërisë sonë. Prandaj edhe marshimi nën thirrjen “Marshojmë kundër vrasjes së grave” duhet të na bashkojë të gjithëve si shoqëri e si institucione për drejtësi e barazi gjinore e shoqërore.

Tashmë është dëshmuar se organizimi shoqëror për të jetësuar synimet tona për barazi e drejtësi është e vetmja alternativë. Andaj si çdo ditë edhe në ditën ndërkombëtare të grave ne jemi në solidaritet të plotë me secilin organizim që kryefjalë e ka solidaritetin gjinor sepse jemi të ndërgjegjshëm që solidariteti gjinor është shpresa e vetme nëpërmjet së cilës arrihet te barazia, edhe gjinore.

Ne i bëjmë thirrje anëtarësisë sonë dhe të gjithë qytetarëve pa dallim, jo vetëm ne Prishtinë por, kudo ku marshohet edhe në qytetet tjera të bashkohen kundër patriarkatit që vret, e për barazi.

Këshilli i Përgjithshëm i Lëvizjes VETËVENDOSJE! mbajti mbledhjen e XLVI në të cilën u diskutuan shumë çështje politike e organizative.

Në pjesën e parë të mbledhjes, anëtarëve të Këshillit iu drejtua Kryeministri, njëherazi Kryetari i Lëvizjes VETËVENDOSJE!, Albin Kurti, duke kujtuar në fillim të fjalës së tij muajin mars si muaj të lavdishëm të historisë e të çlirimit tonë.

“Sot është 5 marsi dhe në dy ditët në vijim po ashtu do shënohen ditët e Epopesë së Ushtrisë Çlirimtare të Kosovës. Populli ynë ndër shekuj ka pasë lëvizje çlirimtare, e tillë ishte edhe UÇK-ja që kulmoi me heroizmin e pashembullt të Familjes Jashari”, tha ai.

“Këto ditë i kujtojmë për të mos harruar kurrë barbarinë e okupatorit serb mbi popullin e Kosovës dhe heroizmin e shqiptarëve për të rezistuar dhe luftuar për mbrojtjen e atdheut. Më shumë se kujtdo tjetër, lirinë që gëzojmë sot ua kemi borxh dëshmorëve të luftës. I përjetshëm qoftë kujtimi ynë për ta dhe e përhershme qoftë puna jonë në realizimin e amanetit të tyre”, tha Kurti.

Kryeministri foli edhe për agresionin e Rusisë ndaj Ukrainës, pozitën në të cilën gjendet Republika e Kosovës, dhe për pozicionimin e vendit tonë krahas shteteve aleate duke dënuar agresionin dhe duke vënë sanksione ndaj Rusisë.

“Dënojmë ashpër edhe mos-dënimin e agresionit rus dhe mos vënien e sanksioneve nga Serbia e cila kësisoj po i bashkangjitet Bjellorusisë. Nëse deri dje, disa besonin se duke i ledhatuar autokratët zbuten ca e ndoshta bëhen demokratë, tashmë duhet ta kenë marrë mësimin. Derisa Serbia nuk pranon të nënshkruaj deklaratë mos-sulmimi e paqeje me Kosovën, dhe nuk distancohet nga agresioni rus për pushtimin e Ukrainës, dhe në të njëjtën kohë nuk i bashkohet demokracive të tjera në sanksionimin e Rusisë, ajo përbën kërcënim direkt për rajonin, për paqen dhe sigurinë tonë afatgjate e të përbashkët”, shtoi Kurti.

Sa i përket çështjeve organizative, ai i njoftoi anëtarët e Këshillit të Përgjithshëm që në përputhje me vendimin paraprak të organit më të lartë të Lëvizjes VETËVENDOSJE!, shumë shpejt do të futemi në zgjedhjet e brendshme dhe në këtë drejtim në secilën qendër të Kosovës tashmë janë caktuar koordinatorët e qendrave, ndërsa në mërgatë janë caktuar koordinatorë në 10 nga gjithsej 13 qendra. Grupe punuese deri tani janë caktuar 22 sosh, dhe së shpejti do të plotësohen edhe grupet punuese të mbetura.

Këshilli i Përgjithshëm vazhdoi punimet duke diskutuar e votuar propozim-rregulloret për dy organet e reja të LV-së, si: Gratë për VETËVENDOSJE! dhe Rinia për VETËVENDOSJE!, organe këto të cilat po ashtu do të jenë pjesë e zgjedhjeve të brendshme.

Në kuadër të kësaj mbledhje u raportua edhe mbi raportet e punës për vitin 2021, për sekretariatet e Lëvizjes VETËVENDOSJE!.

Fjalimi i plotë i Kryeministrit, Albin Kurti, mbajtur në ceremoninë e rreshtimit të njësive ushtarake të FSK-së, për 24 vjetorin e Epopesë së UÇK-së

Politika për ne është angazhimi më i lartë dhe shprehja e sjelljes më publike e më të ndershme. Ajo është aftësia për të parashikuar kompleksitetin gjeopolitik rajonal dhe botëror, por edhe aftësia e projektimit kombëtar. Duhet t’i kthehemi në mënyrë të vazhdueshme përkufizimit të politikës si aktiviteti më publik, më patriotik dhe më i gjithanshëm i njeriut. Me sjelljen tonë politike ne mund të bëjmë në mënyrë të mbarë vlerësimin e inteligjencës dhe mirësinë e trashëgimisë, si një e tashme e cila merr përgjegjësi për të shkuarën e afërt dhe të largët.

Politika, me karakter publik, demokratik dhe universal nuk na lë të jetojmë një të ardhme që mohon arritjet e të shkuarës, dhe as që e redukton të tashmen në gjendje të shkuara, të afërta apo të largëta. Vetia publike e veprimtarisë sonë nuk duhet të na braktisë e nuk duhet të na lejojë të humbim udhën e integrimeve të drejta, ajo duhet të mbajë gjallë direktivën e qartë: nuk duhet të ndërtojmë paqe të korruptuara, dhe as t’i lejojmë korrupsionit të funksionojë në paqe. Ne mendojmë e perceptojmë sipas këtyre direktivave dhe konstatojmë se nuk kemi gabuar.

Ne kemi ndjekur projektin më të natyrshëm që rezulton nga historia: vullnetin dhe dëshminë më rrënjësore të vullnetit – dëshmorin. Ne nuk kemi trima pushtimi, por dëshmorë çlirimi. Në ditët dhe javët që po kalojmë, ky mesazh është më i nevojshëm se kurrë. Cilido individ apo shtet që ndjek porosinë e dëshmorit çlirimtar nuk ia huq subjektivitetit të lirisë, dhe as universalitetit të drejtësisë.

Ne synuam integritet territorial, jo për hir të mbylljes sonë por për hir të paqes së drejtë. Shumë shpejt aktualiteti na vërtetoi se qëndrimi ynë ishte i saktë dhe i drejtë. Ne synuam përgjatë viteve dialog me parime, dhe shumë shpejt aktualiteti kontinental po na vërteton se ngutia për dialog pa parime është e tillë që bëhet për pazare. Kombet nuk janë monedhë e as mall në duar të shteteve dhe përfaqësuesve të tyre të lartë, veç në mos po flasim për Serbi, Rusi e Bjellorusi. Ne duam paqe afatgjatë, andaj edhe nuk ngutemi e nuk vendosim data përfundimtare. Një dialog i imponuar e pa parime është një konflikt i ardhshëm me pazare.

Të nderuar të pranishëm,

Datat na duhen, por në zhvillimin e brendshëm. Progresi njerëzor, shoqëror dhe ekonomik kërkon data, afate dhe shpejtësi. Së jashtmi kompleksiteti ka shumë faktorë e aktorë, andaj kërkon veprim të pjekur e maturi, kërkon kohë.

Së brendshmi, na duhet sinqeritet dhe së jashtmi, reciprocitet.

Së brendshmi është emergjent veprimi i unifikuar, së jashtmi veprimi strategjik dhe i koordinuar.

Së brendshmi na duhet uniteti dhe së jashtmi aleanca.

Së brendshmi duhet të shtojmë fuqinë shoqërore, së jashtmi subjektivitetin shtetëror. Ne e kemi deklaruar gjithnjë se jemi për subjektivitet shtetëror e jo për subjektivizëm pushteti.

Vullnet dhe subjektivitet. Kjo është porosia e dëshmorëve çlirimtarë. Kjo është porosia e flijimit sublim të Jasharajve. Me vullnetin e tyre, ata na dëshmuan se vullneti e sjell subjektivitetin, se subjektiviteti e shpreh vullnetin. UÇK-ja e çliroi Kosovën. Në jemi të qartë për këtë pikë. Një komb e mban të çliruar vullneti, aleancat i ndërton subjektiviteti.

Këto ditë të planetit kur jemi dëshmitarë të pushtimit të Ukrainës na e sjellin edhe më të qartë rëndësinë dhe vlerën epopenë e UÇK-së. Nëse Ukraina nuk do të rezistonte, edhe uniteti i drejtë perëndimor nuk do të ishte i mundur. Vullneti ukrainas do ta bëjë të mundur progresivisht kthjelltësinë e shprehjes botërore. Pra, vullneti i Ukrainës do të përcaktojë njëjësinë e subjektivitetit të saj sovran me subjektivitetin demokratik perëndimor. Njësimi i vullnetit të Ukrainës me subjektivitetin e saj do ta rrisë mbështetjen botërore dhe qartësinë e kësaj mbështetje, duke i dhënë botës një drejtësi më të pjekur e afatgjatë. Luftërat çlirimtare të popujve të pushtuar e kanë pjekur gjithnjë mendimin e njerëzimit. Kështu ishte edhe në vendin tonë në kohën e luftës cclirimtare të viteve 1998-1999.

Eh pra, sot Ukraina mund ta kuptojë Kosovën dhe epopenë e luftës së saj. Populli i Kosovës, pa shtet e pa ushtri, gjeti vullnetin për me ndërtu një ushtri çlirimtare. Sigurisht me një çmim historik: jo vetëm dy vite luftë, por me rezistencën shekullore, me pushtim e me burgosje, me protesta e me rezistencë ilegale. Ne i dhamë shembujt më shpjegues një bote të tërë, që nga viktima civile foshnje e gra, deri te familja dëshmore, deri te farefisi dëshmor. Të gjithë gamën e vullnetit ne ia shpallëm njerëzimit demokratik.

Ne urojmë që shpirti ynë të jetë i atillë që të jehojë gjithku në botë, e që Ukraina mos të jetë as Bosnje e as Kosovë, të mos ketë 600 shekuj burg politik si` pati për shqiptarët, të mos ketë as spastrimin etnik e as të zhdukur me dhunë, as përdhunimet seksuale e as masakrat e panumërta. Sakrifica jonë e kishte njoftuar botën demokratike mbi rreziqet e mbetura në Lindjen e padepërtuar nga demokracia dhe të drejtat e njeriut.

Të nderuar miq, ne e dimë mirë se duhet menduar thellë për me pa larg. Ne mendojmë thellë sepse dëshmorët i kemi afër. Ne mendojmë së afërmi sublimen. Kosova i dhuroi botës aktin më të pashembullt – flijimin e të gjitha moshave për lirinë – familjen Jashari. Sa më shumë vonohet veprimi i shoqërisë politike, aq më shumë civili bëhet ushtar e dëshmorë sepse detyrohet. Dhe dëshmia do të na bërtasë më pas nga numri i varreve, nga emrat e grave dhe moshat e fëmijëve të gdhendur në mermer.

Dëshmori është vullneti sublim. Sa më shumë që e mendojmë sakrificën e tyre, aq më e sigurtë është drejtësia e paqes së ardhshme, aq më i pamundshëm është rreziku për njerëzimin.

Në kohën e rezistencës së një shekulli ne i kemi studjuar aleancat, i kemi njohur e i kemi shquar. Bota sot po shkon drejt segmentit luftë e ftohtë – luftë bërthamore. Aleanca e studiuar dhe efektive është e vetmja mundësi që të mos kenë mundësi subjektivizmat e shteteve autokrate dhe diktaturat despotike të pushteteve mbi popujt e tyre. Nuk mund të bëhet tregti me dikë që nuk ndan vlera të njëjtat.

Në aleancat tona ne nuk flasim me emra abstraktë e të përgjithshëm. Ne flasim me emra shtetesh. Edhe kur mendojmë BE-në, ne mendojmë para së gjithash shtetet më të përparuar e më themelues të idesë së saj. Paqja ndërtohet nga shtete e popuj, siç edhe pushtimi që kryhet nga shtete dhe heshtja ose bashkëpunimi i popujve të tyre. Nëse Evropën e përcaktojnë shtetet që e mbrojnë më shumë idenë e saj, atëherë Evropa do të jetë afër idealit të saj. Evropa afër idealit të saj, do të jetë ajo që do të ndjejë se shqiptarët kanë qenë gjithnjë të sigurtë në zgjedhjen e tyre evropiane. Një bashkësi evropiane e fuqishme sa e drejtë, do ta kuptojë se Ballkani ka qenë jo çështje e ngutshme e popujve të saj, por e vet Evropës. Harmonia në Ballkan nuk është e vetvetishme nëse nuk është pjesë e ngutshme e projektit të Evropës. Nuk na lipsen luftërat për të kuptuar subjektivizmin e botës serbe dhe të botës ruse. Shqiptarët janë aleatët e Evropës, kanë qenë dhe do të jenë aleatët e demokracisë. Sa më shumë BE-ja i mbante larg vetes, aq më shumë funksionimi ynë shtetëror dëmtohej në nivelin e saj të brendshëm demokratik.

Sot, koha e neutralitetit mori fund. Neutraliteti nuk bën pjesë në politikë, por vetëm në diplomacinë pa politikë e pa parime. Ndaj ne nuk ngutemi. Në çdo akt tonin diplomatik ne synojmë të vendosim sa më shumë përgjegjësi të politikës dhe publikes. Institucionet e Evropës duhet të nguten. Ne duhet të integrohemi në vetvete demokratikisht, dhe kjo kushtëzohet e lehtësohet në masën dhe shpejtësinë me të cilën na integron Bashkimi Evropian. Një popull që ka epope çlirimtarësh, nuk do të duhej të kishte epope refugjatësh, por vetëm epope integrimesh.

Ne i qëndrojmë njoftimeve e deklarimeve që kemi bërë, natyrisht me mundësinë tonë e në masën që mund të dëgjohemi. Evropës i duhet të integrojë luftën çlirimtare të Kosovës dhe jo varrezat masive që fshehin masakrat e ushtrisë serbe në trupin e shtetit serb. Nuk ka neutralitet kur bëhet fjalë për ndjenjën e lirisë. Nuk ka simetri mes pushtimit dhe lirisë. Sa më shumë tolerohet në simetrinë e gabuar, aq më shumë bashkësitë demokratike bien në faj, aq më të pakthyeshme bëhen pasojat. Aq më shumë pjesët e sëmura prej shovinizmit do të gjejnë mjedis të favorshëm. Rusia don të shkojë përpara drejt të shkuarës, ndërsa presidenti i saj drejt kohës së carëve. Serbia do të flasë për djepin e saj në Kosovë dhe Rusia për djepin e saj në Ukrainë. Të dyja do të kenë frikë instiktive për BE-në dhe NATO-n. Dorëlëshimi i gjatë i simetrisë së gabuar mes pushtimit dhe lirisë, mes shoqërive demokratike dhe shteteve autokratikë do të sjellë bipolaritetin e luftës së ftohtë. Nuk duhet të ngutej Kosova e të dilte kundër dëshmorëve të saj, por duhet të ngutet Evropa e të zgjidhte dëshminë e çlirimtarëve të popujve të saj të shtypur. Kjo është rëndësia e madhe dhe themelore e dëshmorëve tanë. Ajo na mëson mbi vullnetin tonë dhe shijen e vërtetë të demokracisë perëndimore.

Lavdi kryekomandantit të UÇK-së, Adem Jashari,

Lavdi familjes legjendare Jashari,

Lavdi gjithë dëshmorëve e martirëve të kombit!

Të lindur më 26 shkurt, me një gjysmëshekulli në mes, Adem Demaçi, sot do të mbushte 86 vjeç, kurse Astrit Dehari 32. Në vizitë te familjet e tyre përveç ngrohtësisë mikpritëse, jeton i gjallë kujtimi për veprën e tyre.

Kryeministri, Albin Kurti, me nënkryetaren e Kuvendit, Saranda Bogujevci, deputetët, Hydajet Hyseni e Salih Zyba, dhe bashkë me Arben Vitinë, vizituan sot familjet Demaçi e Dehari.

I riu dhe i moshuari. Energjia dhe historia. Baca Adem e Astriti janë shembulli për rininë. Shkolla dhe atdheu duhen njëjtë. E, ne sot, me mburrje, i kujtojmë të dy nëpërmjet librave e jetës aktive të tyre.

VETËVENDOSJE Movement! shows solidarity with the Ukrainian people who are resisting the invading Russian forces.

The military aggression ordered by Putin is condemned not only by us, but by the entire public opinion and institutional public in Kosovo, as well as by the Albanian nation in general. We, ourselves have experienced the aggression of Serbia in the ’90s, so we can empathize on the pain and suffering that the citizens of Ukraine are now going through.

We support freedom and peace for Ukraine, fully back the resistance of the Ukrainian people, cherish every Russian citizen who opposes the occupation while we are in full coordination with our allies who are following the issue with concern and attention. These are the attitudes of the Movement in this difficult day for the whole world.

Lëvizja VETËVENDOSJE! solidarizohet me popullin ukrainas që po reziston kundër forcave pushtuese ruse.

Agresionin ushtarak që urdhëroi Putini nuk e dënojmë vetëm ne, por i gjithë opinioni publik e institucional në Kosovë, ashtu si edhe kombi shqiptar në përgjithësi. Ne e kemi provuar agresionin e Serbisë në vitet ‘90, prandaj e dimë dhimbjen e vuajtjen që po përjetojnë tash qytetarët e Ukrainës.

Liri e paqe për Ukrainën, mbështetje për qëndresën e popullit ukrainas, përkrahje për çdo qytetar rus që i kundërvihet pushtimit, dhe bashkërendim i plotë me aleatët tanë që po e ndjekin me shqetësim e vëmendje çështjen. Këto janë qëndrimet e Lëvizjes në këtë ditë të vështirë për krejt botën.

Fjala e plotë e Kryeministri Albin Kurti sot në Kuvend, ku foli për agresionin rus në Ukrainë, dhe për projektligjin për Byronë e Konfiskimit të Pasurisë që do të votohet sot në Kuvend.

I nderuari Kryetar i Kuvendit, z. Glauk Konjufca,

Të nderuar deputetë,

I nderuar kabinet qeveritar,

Qytetarë të dashur,

Sot është një ditë tronditëse dhe tragjike për Evropën dhe jo vetëm. Sot, i gjithë kontinenti ynë por edhe më gjerë, janë zgjuar me lajmin e trishtë të invazionit rus në Ukrainë që paraqet agresionin më të madh ushtarak që pas përfundimit të Luftës së Dytë Botërore.

Qeveria e Republikës së Kosovës është e bashkërenduar dhe duke bashkëpunuar me Bashkimin Evropian, NATO-n, Shtetet e Bashkuara të Amerikës dhe me Mbretërinë e Bashkuar në mënyrë që të jemi bashkë për paqe, siguri, për mbrojtje të demokracisë dhe lirisë.

Duke qenë të brengosur me ndikimin që mund të ketë kjo luftë e re, shumë e madhe, me pasoja tashmë tragjike edhe në rajonin tonë e posaçërisht në Republikën e Kosovës, mbrëmë kemi mbajtur një mbledhje të Këshillit të Sigurisë ku me disa prej ministrave dhe me drejtues të institucioneve tona të sigurisë kemi vlerësuar, analizuar, dhe diskutuar për situatën aktuale dhe për masat që duhet t’i ndërmarrim në mënyrë që orientimi ynë evropian dhe euro-atlantik të jetë në nivelin, në cilësinë, në intensitetin më të lartë të mundshëm.

Të nderuar deputetë të Kuvendit të Republikës,

Qeverisjen tonë e kemi filluar me miratimin e Koncept Dokumentit për Konfiskimin e Pasurisë së Pajustifikueshme, ndërsa vitin 2021 e kemi përfunduar me Projektligjin për Byronë Shtetërore, i cili është sjellë në Kuvendin e Republikës së Kosovës, për ta marrë miratimin tuaj sot.

Ka vite që kemi theksuar e jemi pajtuar të gjithë se korrupsioni në vendin tonë ka qenë i lartë dhe i koncentruar te zyrtarë të lartë të qeverisë dhe jo vetëm, se një pjesë e ngushtë e shoqërisë është pasuruar në kurriz të shumicës përmes keqpërdorimit të taksave, shpërdorimit dhe ikjes nga drejtësia.

Në Kosovë, për më shumë se dy dekada, në masë të madhe ka sunduar paligjshmëria. Herë zbrazëtirat ligjore e herë jo efikasiteti i organeve të drejtësisë, kanë lënë mundësi për rritje të kriminalitetit dhe kanë krijuar kulturë të pandëshkueshmërisë. Rrjedhimisht, ata që kanë pasur qasje në buxhetin e shtetit, janë pasuruar duke keqpërdorur taksat e qytetarëve.

Projektligji për Byronë Shtetërore për verifikimin dhe Konfiskimin e Pasurisë së Pajustifikueshme, do t’i heqë pengesat për konfiskim të pasurisë së pajustifikueshme.

Kjo Byro do të jetë në funksion të luftës kundër krimit të organizuar dhe korrupsionit, nëpërmjet konfiskimit të pasurisë së pajustifikueshme.

Nëpërmjet këtij projektligj, në vendin tonë nuk do të dominojë më parulla: “Rroga e vogël, fitimi i madh!”.

Hartimi i këtij Projektligji është bërë në bashkëpunim me ekspertë dhe njohës ndërkombëtarë të fushës, krahas përfaqësuesve të duhur institucional, ekspertëve të pavarur dhe shoqërisë civile. Në hartim janë përfshirë madje edhe gjykatës dhe prokurorë, të cilët drejtpërsëdrejti interpretojnë dhe zbatojnë ligjet.

Projektligji është shumë i qartë dhe nuk cenon pavarësinë e pushteteve. Byroja si një agjenci shtetërore e themeluar me Ligj nga Kuvendi, është e pavarur në verifikimin e pasurisë së zyrtarëve publik dhe të ekspozuarve politikë. Pala të cilit i verifikohet pasuria në çdo kohë mund të argumentojë para gjykatës se pasurinë e ka fituar në mënyrë të ligjshme.

Konfiskimi i pasurisë së pajustifikueshme do të bëhet vetëm nga gjykata. Gjykata garanton procedura profesionale dhe respektim të të drejtave të palëve në procedurë, të cilat i njeh Kushtetuta dhe ligjet tjera në fuqi.

Ky ligj pra përcakton kthimin e pasurisë tek pronari legjitim dhe juridik, që është Republika e Kosovës.

Të nderuar deputetë,

Qytetarët tanë të ndershëm e të përgjegjshëm, meritojnë një shtet të drejtë dhe të barabartë.

Miratimi i këtij projektligji na hap udhë për të vepruar në pajtim me zotimet e dhëna para qytetarëve e në përputhje me praktikat më të mira, për të ndërtuar një shtet të së drejtës me mundësi dhe shanse të barabarta për të gjithë qytetarët e Republikës.

Andaj, ju ftoj që ta mbështesni me votën tuaj.

Ju falemnderit

Pas vendimit në mbledhjen e fundit të Këshillit të Përgjithshëm për fillimin e zgjedhjeve të brendshme të Lëvizjes VETËVENDOSJE!, kryesia e Lëvizjes, së bashku me qendrat, ka emëruar koordinatorët e rinj më të cilët sot u mbajt mbledhja e parë.

Në mbledhje morën pjesë Kryeministri, njëherazi, Kryetari i Lëvizjes VETËVENDOSJE!, Albin Kurti, Sekretarja Organizative, Vlora Haxhimehmedit, dhe Koordinatori për Qendra, Valon Hoti.

Në hapje të mbledhjes, Kryetari Albin Kurti uroi koordinatorët e rinj për detyrën e marrë, duke theksuar rëndësinë që ata kanë në udhëheqjen e procesit të brendshëm zgjedhor në këtë fazë të re ku organizata ka një mbështetje kaq të madhe popullore. Viti 2022 nuk do të jetë vit i zgjedhjeve parlamentare e lokale, por vit i zgjedhjeve brenda Lëvizjes sonë, tha Kurti.

Në fund të fjalës, Kryetari Kurti njoftoi mbi punët dhe të arriturat e qeverisë me theks të veçantë ndryshimin për të mirë të të gjithë parametrave ekonomik, luftën ndaj krimit e korrupsionit dhe procesin e suksesshëm të vaksinimit ku prej zero vaksinave në fillim të mandatit sot pas njëmbëdhjetë muajsh jemi liderë në rajon.

Në pjesën e dytë të mbledhjes u diskutuan detyrat kryesore të Koordinatorit dhe të Grupit Punues, ku Koordinatorët e rinj do të jenë bartës të këtij procesi të brendshëm zgjedhor.

U diskutua po ashtu itinerari i mbajtjes së zgjedhjeve të brendshme sipas dinamikës së përcaktuar nga vendimi i fundit të Këshillit të Përgjithshëm.

Krahas procedurave të parapara me statutin e Lëvizjes VETËVENDOSJE!, këto zgjedhje, për dallim nga zgjedhjet e tjera të mbajtura përbrenda VV-së, do të sjellin në jetë edhe dy organe tashmë statutore, atë të Gruas për VETËVENDOSJE! dhe Rinisë për VETËVENDOSJE!.

Lëvizja VETËVENDOSJE!, duke i uruar punë të mbarë koordinatorëve dhe grupeve punuese nëpër secilën qendër, fton anëtarësinë dhe qytetarët të angazhohen gjatë këtij procesi të brendshëm zgjedhor në mënyrë që mbështetjes së madhe për subjektin tonë t’ia shtojnë edhe angazhimin përbrenda organeve të saj. Lëvizja jonë, Lëvizja e qytetarëve të Republikës do të mbetet përherë infrastrukturë e popullit përmes së cilës do të çojmë përpara ndryshimet e nevojshme për vendin, ato për të cilat angazhohemi pareshtur.

E nderuara Presidente e Republikës,

Kryetar i Kuvendit,

Deputetë të popullit,

Kabinet i qeverisë,

Familje të dëshmorëve,

Veteranë të luftës,

Shkëlqesi ambasadorë,

Qytetarë të Kosovës,

Zonja dhe zotërinj,

Sot është ditë feste për të gjithë neve. Është ditë ku për disa çaste lëmë mënjanë dallimet tona të përditshme për ta shënuar këtë moment arritje që në shumë aspekte përbënë arritjen e gjeneratave të shqiptarëve ndër shekuj.

Shpallja e pavarësisë ishte padyshim rezultat i luftës tonë çlirimtare, kauzës tonë të drejtë për vetëvendosje dhe solidarizim i botës demokratike.

Historia na mëson se e kaluara jonë është ajo mes të drejtës dhe sakrificës së vazhdueshme për të jetuar të lirë në trojet tona dhe përballjes me synimet e të tjerëve për të na dëbuar e për të pushtuar këto troje. E përkundër gjithë atyre luftërave e padrejtësive, populli ynë asnjëherë nuk u shndërrua në popull sundues e pushtues. Në fakt, populli ynë është ndër popujt e rrallë paqedashës në botë, të cilët janë pushtuar shpesh, kanë luftuar vazhdimisht kundër okupatorëve, por kurrë nuk kemi pushtuar popuj tjerë. Andaj edhe nuk është çudi që përkundër që jemi shteti më i ri në Evropë, ne kontribuojmë shumë për paqen dhe demokracinë.

Sot, përveçse festojmë këtë datë historike, ne nderojmë e falënderojmë ata që kontribuuan për këtë ditë. E në radhë të parë janë dëshmorët tanë të cilët dhanë gjithçka për të ardhmen tonë; është Shqipëria dhe mbarë kombi ynë; janë figurat historike sikurse Hasan Prishtina e Isa Boletini, Azem Bejta e Shotë Galica, Shaban Polluzha e Tahir Meha, Adem Demaçi, Fehmi Agani e Ibrahim Rugova, dhe familja Jashari e kryekomandanti Adem Jashari. Janë edhe qindra gra dhe burra, ish aktivistë politikë, ish studentë e qytetarë, deri tek ushtarët e Ushtrisë Çlirimtare të Kosovës, secili në kapacitetet e role e tyre që dhanë maksimumin që sot të gëzojmë këtë ditë. Historia e Kosovës do të njeh vuajtjet, sakrificën dhe kontributin e secilit.

E pikërisht në këtë ditë, është e përshtatshme që të reflektojmë për rrugëtimin tonë, të bëjmë një bilanc se ku ndodhemi si shoqëri dhe si popull, sfidat që kemi përpara dhe e ardhmja që na pret.

Muajin që vjen bëhen plotë dy vite të përballjes me pandeminë COVID-19. Marrë nga çdo aspekt, kjo pandemi ka ndikuar në jetën e secilit nga ne. Në këtë betejë kemi humbur njerëz të dashur e të afërt, teksa shumë prej nesh jemi prekur nga virusi. Fëmijët kanë humbur kohën e çmueshme pranë bankave shkollore e prindërve u janë shtuar presionet mes punës e familjes. Punëtorët shëndetësor kanë vënë jetët në rrezik, bizneset kanë pësuar humbje, e ne së bashku kemi ndjerë peshën e kufizimeve larg të afërmve dhe të shoqërisë.

Përtej pasojave direkte në shëndetin tonë, pandemia solli edhe kriza të tjera në ekonominë tonë. Ajo që tashmë është bërë e ditur është se në një botë të ndërlidhur si kurrë më parë, krizat nuk janë më asnjëherë lokale. Pas një pauze relativisht të gjatë, hapja e menjëhershme e ekonomive bëri që kërkesat e hovshme për konsum global të tejkalonin aftësinë për prodhim e shpërndarje. Kjo shkaktoi rritjen e çmimeve në shumë sektorë, e sidomos në atë të energjisë, çka rëndoi edhe më shumë krizën fillestare.

S’ka dyshim se krizat të cilat kanë përcjellë vendin tonë që nga fillimi, kanë testuar aftësitë dhe shkathtësinë tonë për të vepruar në ambient të paparashikuar me mjete e mundësi të kufizuara. Kriza me pandeminë pastaj edhe me energjinë kanë prekur secilin shtet duke dëmtuar rëndë strukturën e shoqërisë, por edhe nxorën në pah mungesën e planifikimit tonë afatgjatë e të investimeve strategjike. Prandaj është mëse e nevojshme që në tema kapitale që definojnë të ardhmen e gjeneratave që vijnë, të gjejmë konsensusin shoqërorë dhe gjuhën e mirëkuptimit me njëri-tjetrin.

Krizat kanë prekur të gjithë qytetarët. Unë e ndjej peshën që ato kanë shtuar te secili qytetar sepse i di kushtet në të cilat jetojnë shumica e qytetarëve të Kosovës. I kam takuar e kam biseduar me ta, i njoh brengat e tyre. Shumica jetojnë nga muaji në muaj me paga të ulëta e pa kursime, e të shumtë nga ta jetojnë me dërgesa nga diaspora, me ushqim të dobët e me shëndet të rrezikuar. Në fakt ishte pikërisht kjo gjendje e rëndë e qytetarëve dhe humbja e besimit në drejtësi e barazi ajo që solli ndryshimin e madh një vit më parë.

Ajo që mund të themi sot është se në këtë shumësi krizash të trashëguara e të papritura, kemi naviguar mirë në këto stuhi me politika të cilat kur krahasohen me rajonin tregojnë se ne kemi ruajtur me sukses edhe jetët e qytetarëve edhe shëndetin e ekonomisë. Krahasuar me rajonin, Kosova ka numrat më të ulët të vdekjeve, numrat më të lartë të vaksinimit dhe ka shënuar përmirësimin më të mirë të indikatorëve ekonomik. Tashmë kemi administruar mbi 1.8 milionë vaksina, ku janë vaksinuar me dy doza mbi 60% e popullsisë mbi moshën 16 vjeçare, kurse vitin 2021 e mbyllëm me një rritje ekonomike prej 9,9%, me rritje prej 2/3 e eksporteve, 1/3 të të hyrave buxhetore e mbi 50% rritje të investimeve të huaja, shifra këto që ishin më të lartat që nga shpallja e pavarësisë.

Për ta zbutur krizën me pandeminë, brenda 100 ditëshit tonë të parë, qeveria ndau mbi 20 milion EURO për policinë, personelin shëndetësorë, pensionistët, personat në asistencë sociale, e për punëtorët dhe bizneset, kurse për të zbutur krizën me energjinë ndamë 20 milion EURO me zotimin që deri në 100 milion të tjera gjatë këtij viti, për të mbrojtur ata që janë më dobët ekonomikisht.

Në përputhje me zotimin për ndërtimin e shtetit social, vitin që shkoi filluam për herë të parë me ndarjen e shtesave për nënat lehona, me shtesat për fëmijë, si dhe bëmë edukimin falas në të gjitha nivelet.

Falë punës së mirë, të përbashkët, në luftën kundër korrupsionit dhe krimit, Kosova është renditur e para në rajon në indeksin e drejtësisë në botë, dhe u ngrit për 17 vende në luftimin e korrupsionit në indeksin e Transparency International.

Në rrafshin ndërkombëtar, kemi thelluar bashkëpunimin dhe bashkërendimin me partnerët, aleatët, dhe miqtë tanë, duke forcuar sigurinë për qytetarët, duke afirmuar sovranitetin shtetërorë, dhe duke mbrojtur integritetin territorial të Republikës sonë.

Po investojmë më shumë se kurrë në ushtrinë e Kosovës, dhe vitin që shkoi Kosova ishte pjesëmarrëse në mesin e 27 shteteve dhe nikoqire në mesin e 16 shteteve, me 330 ushtarë në ushtrime ushtarake të kryesuara nga Shtetet e Bashkuara të Amerikës “Defender Europe 21”. E po ashtu ushtria jonë bashkë-zbarkoi në Kuvajt, krahas ushtrisë së ShBA-ve në misionin e saj të parë paqeruajtës në botë.

Kemi realizuar numër rekord vizitash jashtë dhe brenda vendit dhe kemi ridefinuar dialogun në Bruksel, si dialog mes dy shteteve të barabarta, të përqendruar në njohje reciproke. Së bashku me këtë kuvend miratuam një rezolutë për mos lejimin e shkeljes së sovranitetit nga ana e Serbisë ndaj synimit të saj për mbajtjen e referendumit kushtetues ku kemi ndryshuar praktikën e dëmshme të deritashme e cila ishte në shkelje të rendit kushtetues dhe sovranitetit të Republikës. Politika jonë rajonale dhe e jashtme është ajo e fqinjësisë së mirë, bazuar në reciprocitet e në vlerat themelore të demokracisë. Kjo politikë është në harmoni të plotë me politikën e Shteteve të Bashkuara të Amerikës, të Bashkimit Evropian, për zhvillim të demokracisë dhe luftim të korrupsionit.

Pra, në vitin e 14-të po hyjmë me shifra të larta të rritjes ekonomike, shifra të luftimit të krimit e korrupsionit dhe me standarde të larta të qeverisjes demokratike që duhet ta bëjë krenar secilin prej nesh.

Këtë vit do të miratojmë strategjinë e re të energjisë 2022 – 2030, me të cilën së bashku do të zgjidhim për dekadat që vijnë problemin e energjisë. Me buxhetin e ri kemi ndarë 40 milion euro për prodhuesit vendor; 40 milionë euro për ringritjen e ndërmarrjeve publike, e mbi 700 milionë euro për sigurinë, infrastrukturën, arsimin, shëndetësinë e kulturën.

Qytetarët e kuptojnë dhe ndjejnë se ndryshimi po ndodhë çdo ditë dhe ata janë të vetëdijshëm se dëmet e mëhershme nuk përmirësohen për një dit e as për një vit.

Të nderuar deputetë e të dashur qytetarë, derisa qeveria përmbushë përgjegjësitë e saj, ka diçka që qeveria e vetme nuk mund ta bëjë, e ajo është përsosmëria e demokracisë sonë. Ndërtimi i demokracisë kërkon qytetari aktive e të mirëinformuar dhe kërkon që secili qytetar e secili institucion të bëjë punën me qëllimet më të mira.

Qeveria duhet të bëjë punën e saj, por po kështu duhet edhe drejtësia, edhe shoqëria civile, edhe mediat e aktivistët. Secili duhet të kontribuojë në ndërtimin e shtetit që duam.

Është përgjegjësi e qeverisë të krijojë politika që parandalojnë dhe luftojnë krimin e korrupsionin, por kur ai ndodhë është përgjegjësi e drejtësisë që të dënojë kriminelët dhe të korruptuarit.

Është detyrë e qeverisë që punët t’i bëjë në dritën e diellit e të rrisë transparencën, por qeveria e vetme nuk mund të mbrojë demokracinë nga dezinformatat. Kjo është detyrë e secilit.

Njëjtë siç korrupsioni në institucione publike rrënon besimin e qytetarëve në demokraci e në qeveri, dezinformatat rrënojnë besimin në media të lira e të pavarura, e një demokraci pa media të lira e të pavarura është çdoherë rrezik.

Në fakt, dezinformatat janë kërcënim direkt ndaj demokracisë sepse ato keqinterpretojnë të vërtetën dhe shtrembërojnë realitetin.

Shpeshherë këto dezinformata vijnë nga shërbime të huaja të jashtme, e aktorë dashakëqij të cilët synojnë destabilizimin e vendit dhe dobësimin e shtetit dhe demokracisë tonë, andaj duhet të jemi të vëmendshëm, shumë të vëmendshëm që të gjithë.

Ne jemi shtet demokratik. Kushtetuta jonë mbron lirinë e shprehjes e fjalën e lirë, njëjtë siç mbron lirinë dhe të drejtën e tubimit e të protestës. Si Kryeministër i vendit e kuptoj dhe pranoj që njerëzit do të thonë lloj lloj gjërash çdo ditë për mua, dhe unë do të mbroj të drejtën e tyre për ta bërë këtë, sepse lufta jonë për liri nuk ishte luftë vetëm për t’u çliruar nga okupimi por për të jetuar të lirë. Pra, kemi luftuar që të mbrohet e drejta e secilit për të shpreh qëndrimet e saj e të tij edhe kur nuk pajtohemi me to, veçanërisht kur nuk pajtohemi.

E megjithatë, për të ecur përpara na duhet një mendim praktik – jo vetëm kritik. Duhet të pajtohemi e të gjejmë konsensus për gjërat më bazike. Pra, unitet i cili nuk e pamundëson kritikën dhe kritikë që nuk kalëron mbi unitetin. Jeta është praktike edhe në kushte kritike. Qeverisja po ashtu. Bashkë ja dalim sepse jemi bashkë për secilin që është.

Të dashur qytetarë,

në këtë vit të 14 të pavarësisë sonë, le të zotohemi se në veprimet tona do të udhëheqemi nga amaneti i dëshmorëve e nga ëndrrat e fëmijëve, se do të udhëheqemi nga arritjet e Majlinda Kelmendit, Nora Gjakovës e Distria Krasniqit; nga sukseset e kinematografisë e të sportistëve e të artistëve tanë. Se do të ruajmë e do të shtojmë kontributin e punëtorëve, të bujqve, mjekëve, arsimtarëve, policëve, e ushtarëve.

Gëzuar Dita e Pavarësisë të gjithëve.

Ju faleminderit.

Në 15 vjetorin e protestës së 10 shkurtit 2007, pas kërkesës së deputetëve të Republikës së Kosovës dhe rekomandimit të Komisionit për dhënien e dekoratave, presidentja, Vjosa Osmani, akordoi Medaljen Presidenciale të Meritave, me motivacion për guxim dhe aktivizëm qytetar për kontributin e dhënë nga Arben Xheladini dhe Mon Balaj.

Në këtë ngjarje ku i pranishëm ishte edhe kryeministri, Albin Kurti, bashkë me familjarët e Arben Xheladinit dhe Mon Balajt, presidentja znj. Osmani tha se institucionet e Republikës së Kosovës respektojnë dhe nderojnë kontributin e Monit dhe Arbenit për Kosovën shtet të pavarur e sovran, si dhe njëkohësisht nuk zmbrapsen nga kërkesa e vazhdueshme për t’u vënë drejtësi mbi rastin.

Shqiptarët e çdo brezi janë takuar në këtë shesh me historinë. Shqiptarët e çdo brezi do të rivijnë përsëri në këtë shesh e do të përkujtojnë të rënët për drejtësinë shqiptare. Në vitin 68, në vitin 81, në vitin 91, në vitet 97, 98 e 99, në vitin 2007, për me mbërrit në të tashmen tonë, ne kishim thënë gjithnjë se drejtësia nuk importohet, por është virtyt i imagjinatës sonë. Me këtë imagjinatë e me këtë besim ne dolëm me mijëra në shesh. Po atë ditë ne deklaruam se është virtyt i demokracisë kjo dalje në shesh. Dhe policia arbitrare e UNMIK-ut na u përgjigj. Ajo donte të na mësonte një shtetim pa demokraci. Ne ishim qytetarë të dorës së dytë, e për qytetarët e dorës së dytë nuk ka Kuvend, por polici. Nuk ka gjykim, por hetim. Mijëra ishim bashkë në shesh atë ditë dhe me qindra mijëra në vatrat tona me shpirtin e Republikës. Baca Adem, me 28 vitet e burgut në shpinë, deklaronte drejtësinë para pothuaj 28 vjeçarit Mon Balaj. Ndërsa Arben Xheladinit po i mbusheshin po aq vite prej pjekurimit të parë në protesta, prej atëherë kur ai shpinte bukën në barrikadat e studentëve të vitit 81. Kështu është thurur gjithnjë historia jonë: vitet e burgut të dikujt përcaktojnë moshën e pjekurimit dhe përjetësimit të dikujt tjetër.”

“Prandaj, të gjithë ne pa dallim, ne dhe ngjarja jonë e 10 shkurtit bashkë me ne, jemi të përfaqësuar nga këta dy emra: Arben Xheladini dhe Mon Balaj. Përmes ngjarjes sonë dhe emrave të tyre ne do të takohemi me nipat e fëmijët tanë në të ardhmen, ashtu siç e kemi bërë historikisht. 10 shkurti ishte ngjarja e Republikës. Pra kur mblidhemi këtu, mblidhemi edhe në emër të të gjithë atyre që janë mbledhur para nesh në këtë shesh, por edhe për të treguar se ç’mësoi dija e Republikës atë ditë. Mblidhemi për të dëshmuar se kemi qenë si popull gjithnjë të pjekur e të vetëdijshëm deri në flijim për plotninë e drejtësisë.”

– pjesë e shkëputur nga fjala e Kryeministrit, Albin Kurti, mbajtur sot pranë pllakës përkujtimore që sot tregon 15 vjetorin e vrasjes së Arben Xheladinit dhe Mon Balajt nga policia e UNMIK-ut.

Bashkë me Kryeministrin, në sheshin qendror e pranë pllakës përkujtimore përplot me lule të freskëta sot, i pranishëm ishte edhe Kryetari i Kuvendit, Glauk Konjufca, ministrat e qeverisë, deputetët, familjarët, aktivistët dhe shokët e shoqet e Monit dhe Arbenit.

Në 15 vjetorin e vrasjes së Arben Xheladinit dhe Mon Balajt, një delegacion i prirë nga Kryeministri, Albin Kurti, Kryetari i Kuvendit, Glauk Konjufca, së bashku me familjarë, aktivistë të Lëvizjes, shokë e shoqe të Arbenit e Monit, bënë homazhe së pari në Besianë te varri i Mon Balajt, e më pas te ai i Arben Xheladinit në Prishtinë.

Moni edhe Arbeni ishin dy prej protestuesve që u vranë në protestën e 10 shkurtit 2007 nga njësiti rumun i policisë së UNMIK-ut. Ata, bashkë me mijëra të tjerë atë ditë, me kërkesën për liri e vetëvendosje, për sovranitet e pavarësi të plotë për Kosovën, po marshonin drejt sheshit “Skënderbeu” ku policia e UNMIK-ut kishte bllokuar rrugën për të shtirë më pas me plumba gome në drejtim të protestuesve që lanë dy të vdekur, e mbi 80 protestues të tjerë të plagosur.

Rënia e Arbenit dhe Monit e shkroi për herë të parë fjalën pavarësi në dokumentin propozues për zgjidhjen e statusit të Kosovës, dhe një vit pas kësaj proteste, Kosova e shpalli pavarësinë.

Kujtimi ynë për Arbenin dhe Monin është i pashlyeshëm kurse lavdia e tyre e përjetshme.

Në përputhje me vendimin e Këshillit të Përgjithshëm për rinisjen e procesit të brendshëm zgjedhor, dje dhe pardje, Kryesia e Lëvizjes VETËVENDOSJE! ka mbjatur mbledhje ku ka shqyrtuar propozimet nga qendrat (degët) me ç’rast ka emëruar koordinatorët e rinj për 33 nga 43 qendrat tona, ndërkohë pjesa e mbetur pritet të emërohet ditëve në vijim.

Ky vit do të jetë i zgjedhjeve të brendshme e koordinatorët e përzgjedhur do të kenë përgjegjësinë që së bashku me grupet punuese të udhëheqin dhe sigurojnë proces të drejtë zgjedhor dhe me gjithëpërfshirje prej nga do të zgjedhen organet e reja të Lëvizjes VETËVENDOSJE! ashtu siç parashihet me statutin tonë.

Më poshtë janë të listuar emrat e koordinatorëve të rinj sipas qendrave (degëve) tona:

· Qendra në Artanë: Abdyl Gashi
· Qendra në Dardanë: Donjeta Ismajli
· Qendra në Deçan: Faton Selmanaj
· Qendra në Drenas: Egzona Tërdevci
· Qendra në Ferizaj: Fatbardha Zogaj
· Qendra në Fushë Kosovë: Shpend Bardiqi
· Qendra në Gjakovë: Arbërie Nagavci
· Qendra në Gjilan: Alban Hyseni
· Qendra në Han të Elezit: Mirsad Shkreta
· Qendra në Junik: Lavdim Gaxherri
· Qendra në Kaçanik: Jeton Raka
· Qendra në Kastriot: Halil Thaqi
· Qendra në Lipjan: Adnan Rrustemi
· Qendra në Mitrovicë: Armend Muja
· Qendra në Malishevë: Jetmire Vrenezi
· Qendra në Pejë: Taulant Kelmendi
· Qendra në Prishtinë: Arben Vitia
· Qendra në Prizren: Artan Abrashi
· Qendra në Rahovec: Visar Korenica
· Qendra në Skënderaj: Hysni Mehani
· Qendra në Sharr: Erzen Krasniqi
· Qendra në Shtërpcë: Shpejtim Arifi
· Qendra në Shtime: Qemajl Aliu
· Qendra në Therandë: Salih Zyba
· Qendra në Viti: Arsim Ademi

Qendrat në mërgatë:

· Qendra në Angli: Vlora Pireva
· Qendra në Australi: Sali Rexhepi
· Qendra në Danimarkë: Bernarda Begu Radoncic
· Qendra në Finlandë: Bujar Hajdini
· Qendra në Benelux: Ilir Morina
· Qendra në Itali: Erald Korra
· Qendra në ShBA: Mimoza Hoti Prestreshi.