Link:
https://www.facebook.com/vetevendosje/videos/945002286232893

I nderuar Kryetar i Parlamentit,

E nderuara Nën-kryetare,

Kabinet qeveritar, deputetë dhe qytetarë të dashur,

Demokracia jonë është përfaqësuese, që do të thotë se qytetarët zgjedhin përfaqësuesit e tyre në parlament për të krijuar qeverinë dhe institucionet tjera. Si kurrë më parë, pas zgjedhjeve të 14 shkurtit, vullneti i shumicës së popullit reflektohet në institucionet tona udhëheqëse.

Sot kemi shumicë parlamentare, qeveri, presidente dhe institucione të cilat janë në harmoni jo vetëm me shumicën e numrave në parlament por edhe me shumicën e vullnetit të popullit jashtë parlamentit.

Populli jonë ka qenë çdoherë i organizuar dhe ka besuar te fuqia e tij si shumicë kundrejt diktaturave, shtypjes dhe okupimit nga armiqtë e huaj por edhe kundrejt abuzuesve e keqpërdoruesve të brendshëm.

Zgjedhjet e 14 shkurtit ishin riafirmim i vitalitetit tonë si shoqëri dhe si popull. Ishin konfirmim i besimit në vlerat më bazike të punës dhe të dijes, mirësjelljes dhe përuljes, ndershmërisë dhe sinqeritetit. Besimi se fitimi vjen nga puna e ndershme dhe se pushteti nuk është i rezervuar për të pasurit apo të korruptuarit, por për secilin që angazhohet me dije e me integritet, me punë dhe përkushtim, me sakrificë dhe atdhedashuri. E më në fund, këto virtyte në popull u takuan me një qeveri që përfaqëson pikërisht këto vlera.

Sot duhet ta festojmë këtë standard që e kemi arritur së bashku dhe kjo duhet të na frymëzojë për demokracinë tonë të re e cila duhet të rritet e të fuqizohet tash me reforma të thella e me punë të mëdha, në mënyrë që fëmijët dhe të rinjtë dhe i gjithë populli që na shohin sot të mund të ëndërrojnë pak më shumë dhe të vendosin standarde më të larta.

Prandaj edhe jam këtu para jush sot. Të flas jo vetëm me burrat dhe gratë në këtë sallë por të flas direkt me gratë dhe burrat që me votën e tyre na sollën të gjithëve këtu.

Jam i vetëdijshëm se për shumë qytetarë që po na shohin sot, pyetjet kryesore që kanë është se kur do të shohin rezultate konkrete në drejtësi dhe në punësim, por edhe se kur do të çlirohemi më në fund nga ankthi i pandemisë dhe të kthehemi në normalitet.

Këto pyetje janë të drejta dhe sot do të mundohem të jem sa më i thjeshtë dhe sa më i qartë.

Sot janë bërë 55 ditë nga marrja e detyrës së qeverisë sonë.

Në këto 55 ditë kemi bërë shumë punë të cilat do të hedhin bazat drejt zhvillimit dhe progresit për katër vitet e ardhshme.

Siç e kemi thënë edhe në program, prioriteti më urgjent është menaxhimi i pandemisë. Me marrjen e mandatit ne kemi hartuar pa humbur kohë një plan i cili synonte që së pari të ndalte trendin e rrezikshëm që e trashëguam të rritjes së infektimeve dhe të vdekjeve, dhe pastaj të kthenim mbrapsht këtë trend me synim eliminimin e vdekjeve si pasojë e COVID-19.

Pas 41 ditësh të hyrjes në fuqi të masave të reja, unë mund të raportoj këtu se këto masa ishin efektive dhe të suksesshme. Edhe falë këtyre masave sot kemi një situatë krejt tjetër. Në dy javë para hyrjes në fuqi të masave të reja, nga 23 mars deri më 5 prill në total kishim 10 mijë e 939 raste të reja me një mesatare ditore prej 781 raste në ditë, ndërsa në dy javët e fundit, nga 2 deri në 15 maj kemi 1 mijë e 379 raste të reja dhe një mesatare prej 98 rasteve në ditë, pra një ulje prej 87.4% të numrit të rasteve, që do të thotë se qeverisja e mirë funksionon.

Paralelisht me marrjen dhe zbatimin e masave të reja, kemi punuar pa u ndalur që të sigurojmë sa më shumë e sa më shpejtë vaksina dhe të përgatisim administrimin e tyre në mënyrë që të kemi një proces të rrjedhshëm dhe të pandalshëm të vaksinimit. Edhe në këtë drejtim siç e dini trashëguam një situatë ku muajt kritik për sigurimin e vaksinave kishin kaluar pa plan konkret dhe kur ne erdhëm në detyrë nuk gjetëm asnjë vaksinë dhe asnjë kontratë për sigurimin e tyre.

Në këto 55 ditë kemi arritur të sigurojmë 74 mijë e 100 vaksina ndërsa deri në fund të këtij muaji do të kemi edhe 142 mijë e 530 vaksina tjera që gjithsej arrijnë në 216 mijë e 630 vaksina. Me këto dhe me pritjet që kemi për muajin qershor, jemi në rrugë të mirë për të garantuar imunizimin e 60% të popullsisë në grup moshën e atyre që duhet vaksinuar deri në fundin e vitit 2021.

Natyrisht se kjo situatë e lehtësuar me COVID-in nuk është rezultat vetëm i qeverisë, por edhe i bashkëpunimit të bizneseve dhe qytetarëve, bashkëpunim i cili duhet të vazhdojë në mënyrë që të ruajmë jetën e secilit.

Pra, të jeni të sigurt se qeveria është në krye të detyrës për të menaxhuar me pandeminë dhe për të siguruar vaksinat dhe se po e trajton me seriozitetin e duhur pa e neglizhuar dhe injoruar siç është bërë më përpara.

Por, kjo është vetëm një pjesë e punës në këto 55 ditë.

Arsyeja se përse jemi mbledhur sot është për të shpalosur e debatuar programin katër vjeçar të qeverisë, i cili nëse pyeteni ju është i vonuar por nëse pyeten administrata dhe ministrisë, koha nuk ishte e mjaftueshme.

E vërteta është se programi i qeverisë për katër vite duhet të marrë kohën e nevojshme për të vendosur objektivat e arritshme dhe të matshme e të cilat janë në përputhje me pritjet e qytetarëve. Qytetarët duan punë dhe drejtësi dhe duan një program i cili përputhet me nevojat e të drejtat e tyre.

Sot kemi një program të tillë. Programi që keni para jush është reflektim i premtimeve jo vetëm të fushatës elektorale por i premtimeve ndaj së ardhmes. Është më shumë se numra dhe shkronja dhe më shumë se kursime dhe shpenzime sepse është projektim i modelit të shoqërisë që duam të ndërtojmë së bashku.

Është ajo për të cilën kemi folur tashmë një kohë të gjatë. Ndërtimin e një shoqërie ku secili fiton pjesën që meriton dhe paguan detyrimin që i takon, një shoqërie ku askush nuk mbetet mbrapa dhe secili arrin të realizojë potencialin e dhënë nga zoti a natyra.

Ne duam të ndërtojmë një shoqëri të barabartë dhe me mundësi të barabarta që kujdeset për më të dobëtit dhe ata që fitojnë më së paku prandaj edhe kemi zhvilluar një program që rritë pagën minimale dhe e ngrit pragun e pagës që nuk tatohet – sepse, në Kosovë askush që punon 8 orë në ditë nuk duhet të marrë më pak se 10 euro në ditë dhe askush nuk duhet të tatohet për mbijetesë.

Një shoqëri që investon në arsim që të fitojë të ardhmen përmes edukimit të fëmijëve dhe të rinjve tanë që të jenë të gatshëm të konkurrojnë në tregun global është preokupim kryesorë i yni.

Prandaj do të investojmë në shkolla dhe çerdhe publike me kujdes dhe edukim cilësor dhe shujta falas. Përmes investimeve ne 160 çerdhe dhe në adaptimin e hapësirave në institucione shkollore, përfshirja në edukimin e fëmijërisë së hershme rritet nga 7% në 24% për fëmijët e moshës 0-5 vjeç dhe nga 38% në 64% për fëmijët e moshës 3-6 vjeç. Kur kësaj i shtohet rritja e kapaciteteve në sektorin privat, atëherë mund të pritet rritje edhe më e madhe e pjesëmarrjes.

Në Kosovë për të marrë edukimin e duhur nuk duhet të ketë rëndësi se sa fitojnë dhe ku punojnë prindërit, por kush është mësuesi. Andaj dinjitetin e diturinë në shkollat tona do t’i kthejmë duke rikthyer vëmendjen te mësuesi.

Do të punësojmë 400 pedagogë, psikologë dhe punëtorë social në kuadër të konsolidimit të shërbimit psiko-pedagogjik në shkolla.

Do të bëjmë 500 vlerësimeve te jashtme te shkollave për të siguruar vlerësim të drejtë dhe cilësor.

Do të trajnojmë 5 mijë mësimdhënës brenda çdo viti dhe do të licencojmë 9 mijë mësimdhënës në bazë të vlerësimit të performancës në mënyrë që të sigurohemi se fëmijët tanë marrin edukimin që meritojnë. Do të investojmë në biblioteka dhe do të ofrojmë bursa për studentët, sidomos për vajzat 1 mijë bursa studentore me përparësi ato që zgjedhin të studiojnë shkencë, teknologji e inxhinieri sepse vendi ynë është i vogël por kemi dëshmuar se kemi potencial të madh kur ekzistojnë mundësitë e barabarta.

Ne jemi për arsim publik falas. Në institucionet publike do të hiqen tarifat për pagesën e semestrit dhe do të bëjmë organizimin e punës praktike për studentë në institucionet publike dhe private.

Për herë të parë do të kemi një program i cili shkollat i sheh si vend i dijes për fëmijët e rininë ku pasurohet shoqëria e fiton shteti jo si tender ku pasurohet individi apo familjarët.

Do të investojmë në shëndetësi.

Sistemi ynë shëndetësor është i dobët dhe i pa zhvilluar. Për shumë kohë spitalet e qendrat tona shëndetësore janë parë si vendtakim me mjekun vetëm sa për të marrë recetën për t’u drejtuar në klinikë private apo për të blerë barna në barnatoret afër. Kjo qasje ka bërë që të mungojnë investimet kritike në shëndetin publik dhe të bjerë besimi në shëndetësinë publike.

Pa marrë parasysh me sa përgjegjësi jetojmë jetët tona, sa shëndetshëm ushqehemi apo sa sportiv jemi, kohë të vështira e fati i keq apo një sëmundje e papritur mund ta godasë çdo njërin nga ne. Prandaj edhe duhet të kemi sigurime shëndetësore të cilat mundësojnë që askush të mos bankrotojë pse sëmuret apo të vdes në mungesë të kujdesit shëndetësor dhe të ilaçeve.

Me këtë program do ta reformojmë sistemin shëndetësor.

Do të rrisim inspektimin dhe monitorimin duke rekrutuar 30 inspektorë shëndetësorë dhe farmaceutikë dhe do të mbajmë premtimin për një mjek familjar për 2,000 banorë.

Do të investojmë në barazi, mbrojtje dhe mundësi të barabarta.

Progresi jonë shoqëror duhet të matet jo me jetesën që bëjnë ata që fitojnë më së shumti por me jetesën dhe mundësitë që kanë ata që fitojnë më pak, ata që fitojnë më së paku. Tashmë kemi një program që hedh hapat e parë drejt krijimit të një shoqërie më të barabartë, siç është skema për punësim të garantuar për të rinjtë ku do të paguajmë pagën minimale për 1 vit për secilin të ri që punësohet për herë të parë.

Do të kemi masat aktive për punësimin e grave dhe përmirësimin e likuiditetit për bizneset në pronësi dhe udhëheqje të grave, si dhe masat për nxitjen e vet-punësimit të grave të reja nga zonat rurale ku do të kemi 40 ndërmarrje të udhëhequra nga gratë.

Do të fillojmë zbatimin e programit të shtesave për fëmijët. Fëmijët nën moshën 2 vjeçare do të përfitojnë shtesa mujore në vlerë prej 20 eurove në muaj, ndërsa fëmijët nën moshën 16 vjeçare, do të përfitojnë shtesa mujore në vlerë prej 10 euro në muaj. Do të ndryshojmë pushimin e lehonisë dhe atë prindëror, në atë mënyrë që të dy prindërit ta kenë këtë mundësi. Për nënat e papuna, do të paguajmë pagën minimale prej 250 euro, për 6 muajt e pushimit të lehonisë.

Për të moshuarit që presin ndihmën tonë do t’i ndërtojmë edhe 5 shtëpi të tjera me shërbime të përkujdesjes për ta. Kurse nëpërmjet programit “120×120” dhe “150×150” sidomos për çiftet e reja do të përfitohen banesa me këste mujore prej vetëm 120 respektivisht 150 eurove në muaj, për një periudhë kohore prej jo më shumë se 120 muaj, përkatësisht 150 muaj.

Me skemat për punësim të garantuar sezonal për familjet në ndihmë sociale; me shtesat për fëmijët; me mbështetje për lehonat dhe me banimin e përballueshëm të cilat do të realizohen me këtë program qeverisës do ta nxjerrim shoqërinë nga varfëria dhe do të sjellim më shumë barazi shoqërore dhe gjinore, sepse barazia gjinore nuk mund të jetë vetëm slogan për të fituar votat por program për të ndryshuar vendin.

Do të investojmë në ekonomi që hapë vende të reja të punës.

Unë besoj se reforma ekonomike duhet të zgjerojë klasën e mesme, të nxisë rritjen ekonomike dhe të sigurojë jetesë të dinjitetshme për të gjithë. Për të dalë nga një sistem ekonomik i cili është i orientuar në import dhe i varur nga punësimi publik duhet të investojmë në edukim, trajnim, teknologji, energji dhe infrastrukturë të cilat krijojnë vende të reja të punës dhe nxisin prodhimtarinë. Por për të gjitha këto janë të nevojshme dy reforma thelbësore: reforma e prokurimit publik dhe reforma e administratës publike.

Rritja e prodhimit kërkon energji të qëndrueshme dhe të pandërprere e cila ndjekë hovin e zhvillimit ekonomik. Pjesë të TC ‘Kosova A’ do të dekomisionohen kurse investimet në TC ‘Kosova B’ do të bëhen asisoj që të mos rrezikohet siguria e furnizimit me energji elektrike gjatë tranzicionit. Ndotja që prodhohet nga përdorimi i linjitit mund të reduktohet me teknologji të re e cila na lejon të përmbushim kërkesat e energjisë derisa gradualisht diversifikojmë burimet e energjisë, rrisim efiçensën dhe shtojmë energjinë e ripërtrishme.

Përmes krijimit të instrumenteve për investim, do të sigurohemi që kapitali i mërgatës sonë të kanalizohet në investime që krijojnë vende pune. Prandaj, duke filluar nga viti i parë, do të emetohen bono thesare të dedikuara për mërgatën.

Pasuria jonë do të mbrohet përmes krijimit të Fondit Sovran, i cili do t’i marrë nën pronësi asetet strategjike të Republikës së Kosovës, për t’i valorizuar ato, për të mundësuar investime nga jashtë dhe qasje në tregje të huaja të kapitalit, dhe sidomos sjellje të investimeve për zhvillim dhe rritje të vlerës së Trepçës, KEK-ut, Telekomit dhe Postës.

Me Grantin e Katërt për Komuna do të financojmë projekte infrastrukturore të cilat jo vetëm që gjenerojnë vende të reja të punës por edhe ndërtojmë infrastrukturën kritike për ringjalljen dhe urbanizimin e komunave.

Në kuadër të mbështetjes së bizneseve, gjithashtu do ta themelojmë edhe Bankën Zhvillimore të Kosovës. Banka Zhvillimore do të jetë mekanizëm për mbështetjen e sektorit privat dhe promovimin e investimeve. Ajo do të jetë komponenti kreditues, që do të financohet nga paratë publike dhe shitja e letrave të borxhit, duke investuar në degë të caktuara të industrisë, që krijojnë vende pune dhe përmirësojnë bilancin tregtar.

Do të themelojmë Fondin për Ndërmarrësit e Rinj dhe do të alokojmë 2000 grante në vit për ndërmarrjet e të rinjve sepse nuk ka asnjë arsye se përse shpikjet e reja të mos ndodhin në Kosovë. E kur jemi tek rinia dhe sfidat e vazhdueshme me të cilat ajo ballafaqohet, diçka që gjithnjë ka munguar është bashkëpunimi ndër-institucional të cilat qeveria i adreson me hulumtime dhe politika horizontale në mënyrë që askush të mos mbetet mbrapa sepse të rinjtë nga Hani i Elezit me të rinjtë e Prizrenit janë të barabartë dhe duhet të kenë mundësitë e barabarta për zhvillim. Qeverisja e mirë për të rinjtë është ndër-sektoriale, ajo përfshin së paku arsimin, ekonominë, punësimin, shëndetin, sigurinë e drejtësinë. Gjatë qeverisjes sonë kjo do të rregullohet me draftimin e strategjisë kombëtare për rininë brenda së cilës janë të përfshira të gjitha ministritë dhe institucionet qendrore për hartimin, zbatimin dhe monitorimin e saj.

Agjencinë Kosovare për Privatizim do ta shuajmë dhe do ta transferojmë në agjenci brenda qeverisë e do të krijojmë Agjencinë Zhvillimore për udhëheqjen e politikave zhvillimore ndërmjet ministrive dhe agjencive të pavarura.

E për numrin e madh të agjencive ekzekutive e mbikëqyrëse do ta përfundojmë procesin e racionalizimit i cili do të reduktojë numrin e madh dhe të panevojshëm të agjencive me mandate të përziera dhe funksione të dyfishta. E pikërisht për shkak të mandateve të përziera dhe funksioneve të dyfishta puna nuk kryhet dy here por nuk kryhet fare. Kjo reformë e racionalizimit do të forcoj ekzekutivin si rregullator, do të fuqizojë Kuvendin si mbikëqyrës dhe do të rrisë efektivitetin dhe llogaridhënien e agjencive.

Politika jonë fiskale do të reformohet dhe ekonomia do të formalizohet.

Këtë do ta bëjmë nëpërmjet zbatimit të politikave të reja, që përfshijnë analiza të sistemit tatimor, rishikimin e formatit të tatimit për bizneset e vogla dhe të mesme, ndryshimin e formës së deklarimit të tatimit në të ardhura personale dhe vendosjen e obligimit për deklarimin vjetor të tatimit në të ardhura personale. Kjo do të ndihmojë që të kemi më shumë transparencë dhe më shumë përgjegjësi në shfrytëzimin e financave publike.

Me qëllim të luftimit të ekonomisë joformale, do të fuqizojmë kapacitetet e inspektorëve tatimorë, aftësitë hetimore dhe të inteligjencës dhe koordinimin më të mirë ndërmjet institucioneve përgjegjëse për parandalimin dhe ndalimin e punës së padeklaruar.

E krahas disiplinës së shtuar fiskale dhe formalizimit të ekonomisë, do të mbrojmë të drejtat e punëtoreve dhe do të përmirësojmë kushtet e tyre të punës duke shumëfishuar numrin e inspektorëve sepse zhvillimi ekonomik duhet të rrisë mirëqenien dhe mundësitë për të gjithë pa shfrytëzuar e shkelur punëtorët dhe të drejtat e tyre. Rritja ekonomike bëhet zhvillim ekonomik e më tutje progres socio-ekonomik atëherë kur zhvillimin ekonomik e shoqërojmë me drejtësi sociale.

Bujqësia do të marrë vëmendjen që i takon.

Kosova është vend me potencial të madh të prodhimit të ushqimit dhe ky potencial duhet të shfrytëzohet jo vetëm për të prodhuar për nevojat e brendshme por edhe për të eksportuar aty ku kemi përparësi krahasuese. Shteti do të mbrojë prodhuesit vendor përmes sigurimit të çmimeve minimale për produktet strategjike, grante dhe subvencione dhe investime infrastrukturore të cilat ndihmojnë që bujqësia të kthehet në sektor profitabil që siguron jetë të dinjitetshme për bujqit.

Projektet infrastrukturore të lëna në gjysmë do t’i përfundojmë kurse ato të reja do t’i fillojmë. Do të përfundojmë ndërtimin e segmentit të autostradës Besi-Merdare dhe autostradës Prishtinë-Gjilan, zgjerimin e rrjetit ekzistues rrugor Prishtinë-Mitrovicë dhe autoudhën Kijev-Zahaq. Do të zbatojmë projektet e reja sikurse ndërtimi i unazës së jashtme të Prishtinës, zgjerimi i rrugëve nacionale Istog-Pejë-Deçan-Gjakovë-Prizren, përfshirë rrugët qarkore, rehabilitimin e rrugëve kombëtare Qafë Duhël-Shtime-Ferizaj, që lidhet me autostradën Prishtinë-Shkup, si dhe ndërtimi i rrugëve kufitare Deçan-Plavë, Prizren-Tetovë dhe Gjilan-Kumanovë.

Kultura dhe sporti do të zhvillohen dhe mbështetën.

Aty ku ka dështuar politika dhe diplomacia ka pasur sukses arti dhe sporti. Ajo që ne jemi dhe kemi si shoqëri, më së miri është përfaqësuar nga sportistët dhe artistët tanë. Imagjinoni sikur ne të punonim sa ata! Potenciali i tyre kërkon vëmendjen e shtetit për të krijuar kushtet për zhvillim sepse suksesi i tyre është suksesi i shtetit tonë. Kosova mund të bëhet vendi që pret gara e kampionate, festivale e koncerte te cilat e vendosin vendin tonë ne hartën e botës, dhe njëkohësisht sjellin rritje ekonomike për gjithë shoqërinë kosovare.

Zgjerimi i hapësirave kulturore, ndërtimi i Teatrit të Operës dhe Baletit, Teatrit të ri Kombëtar, Muzeut të Artit Bashkëkohor dhe Rrjetit të kinemave të Kosovës janë disa nga veprimet konkrete të cilat ne synojmë, e të cilat do të kthejnë vëmendjen kah arti dhe artistët.

Do të përmirësojmë infrastrukturën sportive dhe investojmë në sportin elitar që Kosova të rezultojë sa më lart në arenën ndërkombëtare.

Drejtësia

Për të gjithë ata që tash e dy dekada presin për drejtësi, më në fund kemi një qeveri dhe program qeverisës që drejtësinë e ka vendosur prioritetin kryesor.

Krijimi i një shoqërie me të drejta dhe mundësi të barabarta kërkon një sistem të drejtë, të paanshëm dhe efektiv. Kërkon gjykatës me kompetencë dhe ekselencë si dhe prokurorë të dijshëm dhe të ndershëm dhe energjikë të cilët garantojnë se secili qytetar, pa marrë parasysh sa fiton e nga vjen, i mbrohen të drejtat e garantuara me kushtetutën dhe ligjet tona.

Vetingu për gjykatës e prokurorë dhe nivele të larta të sigurisë; finalizimi i hartimit të Kodit të Procedurës Penale; hetimi dhe konfiskimi i pasurisë së paligjshme e të pajustifikueshme dhe formimi i Gjykatës Komerciale, Administrative dhe asaj të Punës, do të jenë disa nga veprimet konkrete të cilat do të sjellin shtetin e së drejtës.

E për drejtësinë e vonuar ndaj krimeve të Serbisë në Kosovë gjatë vitit 1998-1999 më në fund do themelojmë institutin për krimet e kryera gjatë luftës në Kosovë dhe do të ngirsim padi për gjenocidin e Serbisë në Kosovë, në Gjykatën Ndërkombëtare të Drejtësisë.

Politika e jashtme dhe Dialogu

Politika jonë e jashtme është po ashtu shtyllë e rëndësishme e subjektivitetin tonë ndërkombëtarë por shtetndërtimit tonë demokratik. Ajo duhet të na mbrojë nga armiqtë dhe të na thellojë bashkëpunimin me miqtë tanë, prandaj edhe orientimet tona janë të qarta për integrim në NATO dhe Bashkimin Evropian.

Aleanca me Shtetet e Bashkuara të Amerikës do të thellohet mbi bazën e vlerave të përbashkëta dhe Forca jonë e Sigurisë do të vazhdojë të forcojë kapacitetet për t’u bërë forcë e denjë për ruajtjen e sigurisë dhe mbrojtjen e tërësisë territoriale.

Anëtarësimi në BE mbetet prioritet i cili nuk duhet të zëvendësohet por edhe proces i cili nuk duhet të ngadalësohet.

Zgjidhja e çështjeve të hapura me Serbinë duhet të bëhet përmes dialogut parimor. Kosova e pranon dialogun me Serbinë si palë e barabartë për të zgjidhur çështjet e pazgjidhura, sikurse zbardhja e fatit të personave të pagjetur, të zhdukur me dhunë, borxhet dhe dëmet e luftës, reparacionet dhe suksesioni.

Kosova nuk pranon dhe nuk do të marrë pjesë në asnjë tryezë ku trajtohet si temë e dialogut dhe jo si palë.

Të nderuar deputetë,

Unë pres që ne të bashkohemi rreth qëllimeve të përbashkëta. Kjo nuk është thirrje për të mos bërë opozitën apo thirrje për të ulur kritikën. E kundërta, qeveria është e interesuar për debat konstruktiv me opozitën, për shkëmbim të mendimeve dhe ideve dhe argumente rreth fakteve të përbashkëta të cilat përmirësojnë jetën e qytetarëve dhe zhvillojnë demokracinë.

Por le të synojmë të bashkohemi karshi temave në të cilat mund të gjejmë konsensus e për të cilat mospajtimi bën dëm të madh. Në fjalimin tim inaugurues pata tëhnë se për çështje kapitale do të kërkojmë koordinim dhe bashkërendim me opozitën, prandaj më lejoni ta përsëris edhe njëherë se cilat janë këto pesë tema.

– Politika e jashtme dhe dialogu me Serbinë.

Ne mund të mos pajtohemi për shumë çështje por le të provojmë të pajtohemi karshi politikës ndaj Serbisë. Në secilën ditë të javës e në secilën orë të ditës unë jam i gatshëm të takohem me cilindo lider të opozitës i cili nuk pajtohet me parimet e qëndrimet tona për dialogun dhe ka propozime tjera se si ta mbrojmë më mirë interesin e Republikës. Por, mos harroni se ju që keni qenë në opozitë, më falni në pushtet paskët qenë, në këto dy dekada që lëmë pas keni bërë tashmë një trashëgimi që na ka ngelur neve. Pjesa më e madhe e punës dhe energjisë time në dialog është në zhbërjen e dëmit që keni shkaktuar ju. Marrëveshjen për Asociacionin, Marrëveshja për Fusnotën, Marrëveshjet për Gjykatat e Universitetin paralel në Veri të Mitrovicës, hapjen e çështjes së statusit, krijimin e diskursit për shkëmbime territoriale e marrëveshje të tjera të dëmshme ju na i latë trashëgim.

Nëse i keni rënë pishman për këto marrëveshje, e me sa ju kam dëgjuar shpresoj që po, atëherë ejani të punojmë së bashku që t’i përmirësojmë. Tash kemi qeveri e cila jo vetëm që nuk do të sjellë marrëveshje të dëmshme por është e angazhuar që të zhbëjë edhe dëmet që keni shkaktuar ju. Po të kishim një qeveri të tillë sa ne ishim në opozitë do të bashkëpunonim në secilin hap.

Por më lejoni ta përsëris edhe njëherë. Karshi Serbisë duhet të jemi të bashkuar në parim e qëndrim. Te projektet dhe ndjekja e politikave të cilat e dëmtojnë sovranitetin dhe interesin e republikës unë jam kundërshtari i parë, dhe këtë e kam dëshmuar tashmë qëmoti.

Temat tjera për të cilat kërkojmë debat shterues drejt konsensusit janë:

– Reforma në Arsim

– Siguria nacionale dhe mbrojtja

– Fondi për Sigurimet Shëndetësore dhe

– Politika energjetike.

Këto janë reforma të cilat prekin gjeneratat që vijnë dhe duhet të ndërtojmë konsensus në mënyrë që veprimet të jenë afatgjata sepse vetëm një konsistencë në veprime mund të jep frytet e nevojshme të qëndrueshme

Por përtej programit 4 vjeçar ju ftoj të bashkëpunojmë në një strategji për të ardhmen. Një strategji që shkon përtej 3 viteve të Kornizës Afatmesme të Shpenzimeve, apo 5 viteve të Strategjisë Kombëtare për Zhvillim me një shikim kah e ardhmja. Le ta quajmë Kosova 2030 apo edhe Kosova 2040 por le ta kemi sepse e ardhmja e vendit tonë varet nga veprimet që i bëjmë sot por edhe mendimet e planet afatgjate. Besoj të gjithë pajtohemi se s’ka rëndësi kush është në pushtet e në opozitë kur është në pyetje e ardhmja prosperuese e vendit, e popullit, e sidomos e rinisë dhe fëmijëve. Le të planifikojmë më gjatë, sidomos në këto çështje kapitale për vendin.

Unë besoj se nëse bashkojmë mendjet mund të jemi të suksesshëm jo vetëm në xhudo dhe muzikë por edhe në shkencë, teknologji dhe fusha tjera.

Këtë shans e kemi tash dhe qeveria jonë sot është e përkushtuar për ide dhe plane të mëdha sepse ne besojmë në potencialin e popullit tonë.

Pra, ky është programi dhe kjo është qasja jonë ndaj të ardhmes. Natyrisht, ky program nuk është i shkruar në gur dhe presim çdo sugjerim dhe çdo kritikë për ta përmirësuar, për ta avancuar.

Tani para se të fillojë debati e ta thonë edhe ministrat pjesën e tyre përkatëse, dëshiroj t’ua bëjë me nga një fjali profilin secilit prej tyre:

Këtë pjesën poshtë e ka propozuar Luani:

Tani para se zëvendëskryeministrat dhe ministrat t’i prezantojnë pjesët e tyre, dëshiroj t’ua bëj një profil-një-fjali atyre veç e veç:

1) ZvKM1 Besnik Bislimi: Zhvillim i qëndrueshëm, Integrim Evropian dhe Dialog të mirëfilltë.

2) ZvKM2 Donika Gërvalla: Forcim i subjektivitetit ndërkombëtar të Republikës së Kosovës.

3) ZvKM3 Emilija Rexhepi: Një shoqëri e përbashkët që ofron mundësi për të gjithë qytetarët dhe të gjitha pakicat.

4) Ministri i MFPT Hekuran Murati: Sistem i qëndrueshëm i financave publike që mundëson zhvillim ekonomik dhe mirëqenie më të mirë për të gjithë qytetarët.

5) Ministrja e MD Albulena Haxhiu: Drejtësi e pavarur dhe e paanshme.

6) Ministri i MM Armend Mehaj: Forcë e gatshme për mbrojtjen e vendit dhe kontribuese në paqe.

7) Ministri i MPB Xhelal Sveçla: Vend i sigurt dhe shërbime efikase për qytetarin.

8 ) Ministri i MSH Arben Vitia: Popullatë e shëndetshme.

9) Ministrja e MASHTI Arbërie Nagavci: Për shoqëri konkurrente dhe bashkëpunuese e dijes.

10) Ministri i MKRS Hajrulla Çeku: Rinia, kultura e sporti motor i zhvillimit të qëndrueshëm.

11) Ministri i MAPL Elbert Krasniqi: Qeverisje lokale e qëndrueshme.

12) Ministri i MPHI Liburn Aliu: Zhvillim i qëndrueshëm në harmoni me mjedisin e pastër dhe mobilitetin.

13) Ministri i MBPZHR Faton Peci: Zhvillim bujqësor që përmirëson jetën rurale dhe bilansin tregtar.

14) Ministrja e MINT Rozeta Hajdari: Ndërmarrje konkurruese.

15) Ministrja e ME Artane Rizvanolli: Zhvillim ekonomik i qëndrueshëm përmes energjisë së pastër dhe të përballueshme dhe qeverisjes së mirë të ndërmarrjeve publike.

16) Ministri i MZHR Fikrim Damka: Zhvillim i balancuar dhe i qëndrueshëm rajonal.

17) Ministri për MKK Goran Rakic (njejtë si ZvKM Rexhepi): Një shoqëri multietnike që ofron mundësi për të gjithë.

Të nderuar deputet, pas këtij programi qeveritar secili funksion formal i ministrave e merr këtë epitet përmbajtësor.

Me këtë rast ekipi i kabinetit tonë qeverisës është një ekip i cili do t’i afirmojmë tri vlera themelore që pikë së pari ne i kultivojmë brenda vetes, e ato janë: Kompetenca profesionale, Ndershmëria qytetare dhe Disiplina organizative.

Kompetencë profesionale në kundërshtim me amatorizmin dhe diletantizmin.

Ndershmëri qytetare në kundërshtim me nepotizmin dhe interesat individuale e grupore.

Dhe, Disiplinë Organizative në kundërshtim me kaosin që e kemi gjetur gjithandej ministrive.

Prandaj, me këto tri vlera themelore të kabinetit tonë qeveritarë ne do të qeverisim drejt dhe mirë jo për vete por për popullin, përfshirë edhe juve.

Dhe disiplinë organizative karshi kabinetit

Sot, në Ditën Ndërkombëtare të Personave të Zhdukur, një delegacion i Lëvizjes VETËVENDOSJE! i përbërë prej deputetëve dhe aktivistëve tanë, bëri homazhe në Kompleksin Memorial në Mejë të Gjakovës, ku po në këtë datë, 22 vite më parë, u vranë 376 civil të paarmatosur, trupat e të cilëve një pjesë janë gjetur nëpër varreza masive nëpër Kosovë, kurse të tjerët ka informacion se janë ende diku nëpër Serbi.

Serbia vazhdon të mos jap llogari për gjenocidin e kryer në Kosovë, dhe vazhdon të mos jap informacion për personat e vrarë e të varrosur në Kosovë, të zhvarrosur në Kosovë e të varrosur prapë në Serbi, duke zvarritur si kërkesat e organizatave humanitare ashtu edhe ato të familjarëve që ende kanë plagë të hapura në mungesë të më të dashurve të tyre.

Në këtë ditë, 22 vjet pas masakrës së Mejës, ne po ashtu kujtojmë luftën dhe përpjekjen tonë për çlirim përmes heronjve, dëshmorëve dhe martirëve tanë, sakrifica e të cilëve vazhdon të na mbajë krenarë. Jemi duke bërë çmos për t’i ndërtuar mekanizmat ligjorë dhe institucional që bëjnë hetimin, ndjekjen dhe ndëshkimin e krimeve të kryera nga Serbia në Kosovë. Nuk mund të ketë paqe e rehati në zemrat e familjeve që kanë humbur më të dashurit e tyre, dhe as te qytetarët në përgjithësi, pa u zbardhur fati i të pagjeturve, dhe pa u dënuar kriminelët që kryen krime.

Dje u mbajt mbledhja e Qendrave të Lëvizjes VETËVENDOSJE!, në të cilën mori pjesë Kryeministri i Republikës së Kosovës, njëherit Kryetari i Lëvizjes, Albin Kurti, Sekretarja Organizative, Vlora Haxhimehmedi, Koordinatori i Qendrave në Kosovë, Valon Hoti dhe Koordinatorja e Qendrave në Mërgatë, Lirika Komoni.

Në këtë mbledhje Kryetari Kurti njoftoi përfaqësuesit e Qendrave të Lëvizjes me rrjedhën e kompletimit të formimit të institucioneve shtetërore në këtë fazë dhe masat e nevojshme e të menjëhershme të ndërmarra për parandalimin e përhapjes së mëtejme të virusit COVID 19, fokusin e qeverisjes tonë për rimëkëmbjen ekonomike të nevojshme në këtë kohë krize ekonomike, si dhe zgjedhjet e ardhshme lokale të cilat na presin në vjeshtën e këtij viti.

U diskutua po ashtu edhe për ecurinë e zgjedhjeve të 14 shkurtit, për fitoren plebishitare të Lëvizjes VETËVENDOSJE!, si dhe u vlerësua kontributi i jashtëzakonshëm i shtabeve lokale në Qendrat tona gjithandej Kosovës por dhe në Qendrat tona në Mërgatë për arritjen e këtij rezultati. Në këtë takim virtual u theksua domosdoshmëria e ndryshimit të ligjit për zgjedhje, ndryshim ky i cili do ua mundësonte qytetarëve tanë të cilët jetojnë jashtë vendit votimin në ambasada e konsulata. Kjo veçanarisht marrë parasyshë pengesat e mëdha të cilat po ua pamundësojnë shumë qytetarëve realizimin e një të drejte themeltare demokratike, atë të votimit.

Ndryshimit të madh që ndodhi përmes referendumit gjithpopullor në nivelin nacional, në vjeshtën e këtij viti do t’i bashkërendohet edhe fitorja masive në komunat e Republikës së Kosovës. Një gjë e tillë, përveçse e nevojshme, është edhe e domosdoshme për t’u kompletuar ndryshimi i gjithmbarshëm.

Kryeministri i Republikës së Kosovës njëherit edhe Kryetari i LV-së, Albin Kurti i shoqëruar nga ministra të kabinetit të tij, së bashku me Presidenten Vjosa Osmani e Kryeparlamentarin Glauk Konjufca bënë homazhe në nderim e rikujtim të betejës së Kosharës.

Beteja e Kosharës e shtyu kufirin andej nga e kërkonte drejtësia e mohuar. Ajo konfirmoi betimin e ushtarëve çlirimtarë për bashkimin. Ajo rivendosi kahjen e natyrshme të tërësisë territoriale të shqiptarëve. Ajo vërtetoi njësinë historike të popullit të një gjuhe. Ajo shpalli hapur edhe një herë tjetër drejtësinë e nëpërkëmbur të një populli.

Bashkimi i vendosur i shqiptarëve, në një betejë të lavdishme, e ktheu përmbys statuskuon. Lufta e UÇK-së ishte angazhimi i lavdishëm për korrigjimin e padrejtësisë shekullore. Ajo ishte përpjekje pavarësisht gjeopolitikës, për të cilën duhej trimëria deri në flijim e Agim Ramadanit dhe ushtarëve të tjerë.

Njohja e betejave tona, e sidomos e betejës së Kosharës do t’i mësoj të rinjtë nëpër shkolla se mendimi shkon bashkë me guximin. As guxim pa mendim, e as mendim pa guxim.

Sot, në Ditën Botërore të Sindromës Down, kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me ushtruesen e detyrës së presidentes, znj. Vjosa Osmani, deputetet e legjislaturës së re, znj. Arbërie Nagavci e znj. Jeta Statovci, dhe aktivisten politike që për shumë vite është angazhuar në përmirësimin e jetës së grupeve të cenueshme të shoqërisë, themeluesen e shoqatës Down Syndrome Kosova, znj. Leonora Bajraktari-Shabani, vizituan qendrën e Down Syndrome Kosova, ku u pritën nga drejtoresha Ekzekutive, znj. Sebahate Beqiri, anëtarët e bordit, stafi i DSK-së dhe prindërit e fëmijëve me sindromën down.

Bashkëbisedimit në këtë takim i parapriu një prezantim i qendrës nga drejtoresha, znj. Beqiri, ku z. Kurti dhe znj. Osmani patën rastin ta shohin ambientin, dhomat e terapisë dhe të njoftohen me disa fëmijë që angazhohen në ambientet e DSK. Znj. Beqiri po ashtu na informoi me programet e kësaj qendre, punëtoritë, dhe aktivitetet tjera që zhvillohen për t’i fuqizuar personat me sindromën down. Ajo tha se nga institucionet e reja pret përkrahje dhe mbështetje në punën e tyre për shkak se mirëqenia e personave me sindromën down është detyrë dhe përgjegjësi e të gjithë neve. Z. Kurti e falënderoi znj. Beqiri për prezantimin e qendrës dhe punës që zhvillohet aty. Duke kujtuar që edhe përmes zotimit për t’u kujdesur e për të ndihmuar sidomos ata që kanë më së shumti nevojë qeverisja e re ka marrë një mandat kaq të fuqishëm, ai theksoi se do të punojmë për t’i fuqizuar sa më shumë personat me sindromën down dhe prindërit e tyre. Ne angazhohemi që të gjithë qytetarët e Kosovës, pavarësisht sfidave dhe nevojave që ata mund të kenë, ta zhvillojnë një jetë të dinjitetshme në vendin tonë, dhe në këtë drejtim do të shërbejmë e do të jemi bashkëpunëtorët e parë, tha ai.

Kandidati për kryeministër të Kosovës, z.Albin Kurti dhe kandidatja për presidente, znj.Vjosa Osmani, sot kanë përfunduar ciklin e takimeve me subjektet politike që kanë fituar ulëse në Legjislaturën VIII të Kuvendit të Kosovës.

Takimet kanë nisur në fillim të javës me kryetarë dhe përfaqësues të partive politike: PDK, LDK, AAK, KDTP, NDS, IRDK, VAKAT, PAI, SDU, LPRK, Lista Serbe, JGP dhe Romani Iniciativa.

Me të gjitha palët, takimet janë zhvilluar në frymë konstruktive. Përgjatë këtyre takimeve, z.Kurti dhe znj. Osmani i kanë informuar subjektet politike për përgatitjet dhe ecurinë e krijimit të institucioneve të reja, të dala nga zgjedhjet e 14 shkurtit.

Në këtë kontekst, të dy kandidatët u kanë ofruar subjekteve politike bashkëpunim për çështje të interesit nacional.Ata kanë kërkuar konstruktivitet të subjekteve politike deri nëpërmjet prezencës në të tri seancat e zgjedhjes në të tri institucionet kryesore të shteti.

Në përmbyllje të takimeve, z.Kurti dhe znj.Osmani kanë shfaqur optimizmin që ky proces të përmbyllet me sukses dhe në përputhje me vullnetin qytetar të shprehur në zgjedhjet e 14 shkurtit.

Ambasadoren e Luksemburgut në Kosovë, znj. Natacha Gomes, e priti sot në takim kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me deputetin e legjislaturës së re, Arben Vitia.

Znj. Gomes e uroi kryetarin Kurti për fitoren në zgjedhje, dhe duke i uruar sukses të mëtejmë në punën e tij, shprehu interesimin e saj për përgatitjet që janë duke u bërë për formimin e institucioneve të reja, dhe për prioritetet e qeverisjes tonë. Kryeministri në ardhje, z. Kurti e falënderoi për urimin dhe vizitën. Ai theksoi se detyra e parë e ekzekutivit do të jetë menaxhimi me pandeminë, përkatësisht sigurimi sa më i shpejtë dhe në sasi sa më të madhe i vaksinës kundër Covid-19, për të cilën ripërsëriti që Kosova llogaritë në shtetet mike për ndihmë në atë drejtim. Tutje, si prioritet, z. Kurti shtroi çështjen e punësimit dhe drejtësisë, me luftimin e krimit dhe korrupsionit në qendër, duke nënvizuar që progresi në këto fusha është i domosdoshëm për një shtet të qëndrueshëm dhe funksional. Në fund të këtij takimi, me ambasadoren znj. Gomes, u pajtuam që me t’u konsoliduar qeveria e re, të aranzhojmë takime mes përfaqësuesve të lartë të vendeve tona, për bashkëpunim të mëtejmë e thellim të marrëdhënieve tona bilaterale.91,233People Reached3,984Engagements

Kryetarin e Alternativës Demokratike Shqiptare në Preshevë, z. Armend Aliu, të shoqëruar nga koordinatori, z. Halit Ramadani, dhe anëtarja e forumit të gruas brenda kësaj partie, znj. Hyljae Ibrahimi-Kadriu, i priti sot në takim, ish-nënkryetarja e Kuvendit të Kosovës, Arbërie Nagavci, dhe ish-ministrja e MEPTINIS, Rozeta Hajdari, të dyja tani deputete në legjislaturën e re.

Në këtë takim miqësor, z. Aliu dhe përfaqësuesit e tjerë na uruan për fitoren në zgjedhje dhe na dëshiruan sukses të mëtejmë në punën drejt formimit të institucioneve të reja. Duke kujtuar dhe vlerësuar ndihmën prej 500 mijë euro që Qeveria Kurti 1 pati ndarë për Preshevën, kryetari Aliu tha se pritjet janë të mëdha që bashkëpunimi me qeverinë e re të shtohet e zgjerohet edhe më tutje. Kosova përveçse ta ngris zërin për të drejtat e shqiptarëve në Luginën e Preshevës, duhet të ketë rol aktiv edhe në shtrimin e bashkëpunimit për çështje që rregullojnë dhe përparojnë jetën e qytetarëve shqiptarë në atë pjesë. Ata shprehën bindjen e thellë se angazhimi duhet të jetë i fokusuar në nivel ekspertësh që do të trajtonin çështje konkretet që prekin jetën praktike të qytetarëve të Luginës. Ne kemi vullnetin politik dhe dijen e profesionalizmin për të harmonizuar punën e përbashkët drejt përmirësimit të jetës së qytetarëve atje, ishte përshtypja e dy palëve në këtë takim.

Në fund, znj. Nagavci dhe znj. Hajdari, e siguruan z. Aliu që Qeveria Kurti 2 do të vazhdojë të jetë zë dhe dorë ndihme e bashkëpunimi për shqiptarët e Luginës si në rrafshin e të drejtave, ashtu edhe në atë të zhvillimit dhe progresit socio-ekonomik të tyre.

Shefin e Misionit të Komitetit Ndërkombëtar të Kryqit të Kuq në Kosovë, z. Agim Gashi, të shoqëruar nga menaxherja për komunikim e kësaj organizate, znj. Albiona Salihu, i priti sot në takim kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me deputeten e legjislaturës së re, Saranda Bogujevcin, dhe ish-këshilltaren për çështje juridike, Furtuna Sheremeti.

Z. Gashi e uroi kryetarin Kurti për fitoren në zgjedhje, dhe i dëshiroi sukses në punën e mëtejme drejt konsolidimit të qeverisë. Duke kujtuar bashkëpunimin e shkëlqyer me Qeverinë Kurti 1, ku siç u shpreh ai, si rrallëherë dyert ishin të hapura për organizatën e Kryqit të Kuq, ai tha se pret që edhe në këtë mandat ky bashkëpunim t’iu përgjigjet me po atë ritëm kërkesave që vijnë nga qytetarët e komunitetet me të cilat Kryqi i Kuq punon. Kryetari Kurti i falënderoi për vizitën dhe për urimin, si dhe ndau bindjen që me qeverinë e re që do të formohet shumë shpejtë, do të vazhdojë ky bashkëpunim i mirë dhe i frytshëm me Kryqin e Kuq. Tutje, temë qendrore në këtë takim ishte çështja e të pagjeturve, ku z. Gashi na njoftoi mbi marrëveshjen e bashkëpunimit me Komisionin Qeveritar për Persona të Zhdukur, për shkëmbimin e të dhënave sa i përket kësaj kategorie dhe për ecurinë e grupit punues që merret me çështjen e të pagjeturve. Kryeministri në ardhje, z. Kurti tha se në raport dhe dialog me Serbinë çështja e të pagjeturve nuk e ka marrë vëmendjen e duhur. Ai theksoi se me qeverinë e re kjo do të ndryshojë dhe se dialogu do të jetë i përgatitur mirë e parimor. Në fund, palët u dakorduan ta thellojnë bashkëpunimin me t’u formuar qeveria e re.

Sot, Kryetari i Lëvizjes VETËVENDOSJE!, Albin Kurti, së bashku me Sekretarin për Marrëdhënie me Jashtë, Kreshnik Ahmeti, priti në takim drejtorin e Institutit Friedrich Ebert (FES) për Kosovë, Z. René Schlee, dhe drejtoren e FES për Maqedoninë e Veriut, Znj. Eva Ellereit.

Schlee dhe Ellereit uruan Lëvizjen VETËVENDOSJE! për fitoren plebishitare në zgjedhjet e parakohshme të 14 shkurtit. Me drejtuesit e FES u bisedua për hapat e ardhshëm drejt formimit të shpejtë të institucioneve të reja të Republikës së Kosovës.

FES është një partner i shkëlqyer jo vetëm i Lëvizjes VETËVENDOSJE!, por edhe i institucioneve të vendit. Schlee dhe Ellereit shprehën gatishmërinë e tyre që të vazhdojnë ndihmën për institucionet e ndryshme të Republikës së Kosovës dhe këtë ndihmë ta thellojnë dhe zgjerojnë edhe më tutje përgjatë mandatit tonë, veçanërisht në dimensionin e zhvillimit të politikave zhvillimore socio-ekonomike.

Drejtuesve të FES, Kurti dhe Ahmeti ua shprehën vullnetin e Lëvizjes VETËVENDOSJE! që ta vazhdojmë dhe avancojmë edhe më tutje bashkëpunimin tonë.

Ambasadorja e Finlandës në Kosovë, znj. Pia Stjernvall, e shoqëruar nga këshilltarja znj. Maria Palmu, vizitoi sot zyret tona për t’ia uruar kryetarit, njëherit kryeministrit në ardhje, Albin Kurtit, fitoren në këto zgjedhje dhe për të kuptuar më shumë për qeverisjen e re.

Kryetari Kurti, bashkë me deputeten, Arbërie Nagavci dhe asistenten ekzekutive Valë Gjonbalaj, e falënderoi ambasadoren znj. Stjernvall për vizitën dhe urimin. Kryetari Kurti tha se qeveria e Lëvizjes VETËVENDOSJE! do të punojë për të përmirësuar cilësinë e jetës së qytetarëve tanë duke prioritizuar drejtësinë e duke e lidhur arsimin me punësimin e të rinjve, që kësisoj Kosova të bëhet vend me perspektivë ku mund të jetohet mirë e jo prej ku iket nga dëshprimi. Kurse përbrenda temës së marrëdhënies qeveri-kuvend, ai theksoi se përkushtimi për një bashkëpunim sa më cilësor mes këtyre dy institucioneve do të jetë në qendër të qeverisjes tonë të re.

Në fund, të dyja palët ndanë bindjen që me konsolidimin e qeverisë së re do t’i thellojnë marrëdhëniet bilaterale mes dy shteteve tona.

Përfaqësuesin special të Norvegjisë për Ballkanin Perëndimor, z. Arne Sannes Bjørnstad, dhe ambasadorin norvegjez, z. Jens Erik Grøndahl, i priti sot në takim, kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me deputetin e legjislaturës së re, Glauk Konjufca, dhe asistenten ekzekutive, Valë Gjonbalaj.

Përfaqësuesi special, z. Bjørnstad dhe ambasadori, z. Grøndahl, e uruan kryetarin Kurti për mbarëvajtjen e procesit zgjedhor dhe për fitoren në këto zgjedhje. Ata po ashtu i dëshiruan sukses kryeministrit në ardhje, z. Kurti në punën e tij drejt formimit të institucioneve të reja. Kryetari Kurti i falënderoi për urimin dhe tha se është duke u përkushtuar që qeveria e re të konsolidohet pa ndonjë vonesë. Ai theksoi që detyra e parë dhe urgjente e qeverisë së re do të jetë sigurimi i vaksinës kundër Covid-19. Për këtë, të dyja palët ndanë bindjen që shtetet mike duhet ta ndihmojnë Kosovën për ta siguruar atë në sasi sa më të madhe dhe sa më shpejtë. Çështje tjera që u diskutuan krahas menaxhimit me pandeminë dhe prioriteteve të tjera të qeverisë së re, ishin dialogu me Serbinë dhe raportet ndërfqinjësore. Kryetari Kurti përsëriti qëndrimin tonë që ky proces të përgatitët mirë dhe të jetë parimor e me qytetarët si përfitues. Në fund, të dyja palët shprehën vullnetin për ta zgjeruar bashkëpunim në çështje që kanë të bëjnë me zhvillimin ekonomik dhe për t’i thelluar marrëdhëniet bilaterale mes dy vendeve tona.

Jasharajt e deshën pakrahasimisht më shumë vendin tonë sesa veten e tyre. Dashuria, kujdesi e përgjegjësia institucionale ndaj tyre, janë mënyra më e sigurtë që edhe ne ta duam vendin tonë, tha kryeministri në ardhje, Albin Kurti, i cili bashkë me presidenten, Vjosa Osmani, dhe një delegacion të deputetëve, aktivistëve dhe veprimtarëve bëri sot homazhe në Prekaz, në kujtim të ditëve heroike të 5, 6, 7 marsit, që shënojnë edhe fillimin e Epopesë së UÇK-së.

“3 breza, gjithsej 59 vetë, para 23 vjetëve, u flijuan në Prekazin historik për lirinë e Kosovës. Baca Shaban dhe nëna Zahide nga 74 vjeç, daja Osman 54 vjeç, deri te Kushtrimi 13 vjeç, Igballja 11 vjeç, e Blerina vajza e Hamzës 7 vjeç, u sakrifikuan për çlirim, për pavarësinë, për bashkim. Gjysma përafërsisht ishin burra, por gjysma ishin gra dhe fëmijë. Hamza luftoi bashkë me gruan e tij Feridën, Ademi bashkë me gruan e tij Adilën, e bashkëshortja e bacës Rifat, Zarifja, u vra bashkë me vajzat e saj Hidajeten, Valdeten, e Igballen, e me djalin Igballin. Për këtë sulm shtetëror të Serbisë ndaj familjes legjendare Jasharaj, askush nuk është gjykuar, dhe nuk ka pasur asnjë gjykim për këtë krim të Serbisë që dikush të dënohet. Drejtësia është vonuar sepse ajo as nuk ka filluar, prandaj ne duhet të angazhohemi si institucione e si shtet që kjo të ndryshojë. Për hirë të Republikës së Kosovës, për hirë të pasardhësve të Jasharajve, për hirë të së ardhmes të popullit edhe të kombit tonë në përgjithësi. Ne sot me nderim të përjetshëm, përulemi para jetës, veprës, e rënies së Jasharajve, kryekomandantit, Adem Jashari, të cilët e deshën pakrahasimisht më shumë vendin tonë sesa veten e tyre. Dashuria ndaj Jasharajvje, kujdesi e përgjegjësia institucionale ndaj tyre, janë mënyra më e sigurtë që edhe ne ta duam vendin tonë.”

Sot, kryeministri në ardhje, Albin Kurti, bashkë me deputetin e legjislaturës së re, Xhelal Sveçla, deputetin e IRDK-së që njëherit ka qenë edhe anëtarë i grupit ndërparlamentar për miqësi me Kroacinë, Elbert Krasniqi, dhe asistenten ekzekutive, Valë Gjonbalaj, priti në takim ambasadoren e Kroacisë në Kosovë, znj. Danijela Barišić, të shoqëruar nga sekretari i parë i kësaj ambasade, z. Mladen Delivuk.

Ambasadorja, znj. Barišić e uroi kryetarin Kurti për fitoren në këto zgjedhje dhe i dëshiroi sukses të mëtejmë në punën e tij drejt formimit të institucioneve të reja në vend. Ajo ritheksoi përkrahjen e shtetit kroat për Kosovën dhe rrugëtimin e saj drejt anëtarësimit në institucione ndërkombëtare. Kryeministri në ardhje, Albin Kurti, e falënderoi për urimin dhe ndau vlerësimin e lartë për marrëdhëniet politike e diplomatike midis dy shteteve tona duke potencuar se ato vetëm sa do të thellohen edhe më tutje me qeverinë e re. Ai po ashtu e njoftoi ambasadoren znj. Barišić me disa prej prioriteteve kyçe që i kanë dhënë Lëvizjes VETËVENDOSJE! mandat të fuqishëm në këto zgjedhje, e që janë punësimi, drejtësia dhe luftimi i krimit të organizuar dhe korrupsionit të lartë. Progresi në këto fusha është parakusht për një shtet stabil dhe funksional, theksoi Kurti. Në fund, të dy ndanë bindjen që marrëdhëniet e mira bilaterale mes dy shteteve tona do të rriten e zgjerohen edhe më tej në të ardhmen.

Ambasadorin e Japonisë në Kosovë, z. Ogasawara Mitsunori, të shoqëruar nga sekretarja e dytë, znj. Kurimoto Kay, dhe këshilltari, Arbër Myftari, i priti sot në takim kryetari i Lëvizjes VETËVENDOSJE!, njëherazi, kryeministri në ardhje, Albin Kurti, bashkë me deputeten dhe kryetaren e grupit ndërparlamentar për miqësi me Japoninë në legjislaturën e kaluar, Mimoza Kusari-Lila, deputetin Artan Abrashi, që ishte pjesë e këtij grupi për miqësi, dhe asistenten ekzekutive, Valë Gjonbalaj.

Z. Mitsunori e uroi kryetarin Kurti për mbarëvajtjen e procesit zgjedhor, dhe për fitoren e arritur në këto zgjedhje. Ai tha se pret që me formimin e institucioneve të reja të vazhdojë bashkëpunimi për thellimin e partneritetit dhe miqësisë mes dy vendeve tona. Kryeministri në ardhje, z. Kurti e falënderoi për urimin, dhe duke ndarë të njëjtën bindje për marrëdhëniet bilaterale mes dy shteteve tona, e njoftoi ambasadorin edhe me disa prej prioriteteve të qeverisjes tonë. Krahas përballjes me pandeminë, punësimit dhe drejtësisë, qeveria e re është e përcaktuar t’i mbështesë të rinjtë në fushën e inovacionit dhe teknologjisë. Deri më tani me një mbështetje të vogël, e në pjesën më të madhe të munguar nga shteti, rinia jonë ka demonstruar një talent të lartë e të çmueshëm në ndërmarrësi dhe teknologji. Ne jemi të interesuar që ata të kenë sa më shumë hapësirë e mundësi. Të dy palët shprehën gatishmërinë për bashkëpunim të shtuar ekonomik e kulturor midis dy shteteve tona.

Ambasadoren e Francës në Kosovë, znj. Marie-Christine Butel, të shoqëruar nga këshilltari i parë, z. Cyprien François, e priti dje në takim kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me kandidaten për deputete, Saranda Bogujevci dhe asistenten ekzekutive, Valë Gjonbalaj.

Znj. Christine Butel e uroi kryetarin Kurti për fitoren në këto zgjedhje dhe shprehu dëshirën e saj që numërimi i votave dhe certifikimi i rezultatit zgjedhor të bëhet pa ndonjë vonesë në mënyrë që t’i hapet rrugë formimit të institucioneve të reja.

Kryeministri në ardhje, z. Kurti e falënderoi për urimin dhe vizitën, dhe duke ndarë bindjen që qeveria e re do të konsolidohet shumë shpejtë, e njoftoi atë edhe me disa prej prioriteteve të saj që lidhen me shtetndërtimin demokratik dhe zhvillimin socio-ekonomik në vend.Kryeministri në ardhje, z. Kurti foli edhe për sjelljen e qeverisë së re karshi opozitës në Kuvendin e Kosovës, duke theksuar nivelin më të lartë të përgjegjësisë dhe frymën më të shtruar të bashkëpunimit për çështje që janë në interes të zhvillimit, sigurisë dhe progresit tonë si shoqëri e si shtet. Në këtë takim u fol edhe për dialogun me Serbinë, ku z. Kurti kujtoi që dialogu duhet të jetë i përgatitur mirë dhe parimor. Në fund, të dy u dakorduan që me formimin e institucioneve të reja t’i thellojnë e zhvillojnë tutje marrëdhëniet e mira bilaterale mes dy vendeve tona.

Kryetari i Lëvizjes VETËVENDOSJE! dhe kryeministri në ardhje, Albin Kurti, priti mbrëmë në takim Përfaqësuesin Special të Bashkimit Evropian për Dialogun Kosovë-Serbi dhe çështjet e tjera të Ballkanit Perëndimor, z. Miroslav Lajčák në kuadër të vizitës disa ditore të këtij të fundit në Republikën e Kosovës.

Kryetari Kurti pranoi urimet e z. Lajčák për rezultatet e zgjedhjeve të 14 shkurtit, teksa e falenderoi atë për vizitën në Kosovë. Në fillim të takimit ata folën për zgjedhjet e fundit, mbarëvajtjen e tyre dhe çka nënkuptojnë ato për vendin dhe qytetarët, si dhe për domosdoshmërinë e formimit sa më të shpejtë të institucioneve të reja. Kryeministri në ardhje Kurti e njoftoi z. Lajčák për prioritetet e Qeverisë së tij e të cilat burojnë nga nevojat sa evidente aq edhe të shprehura hapur nga qytetarët e Kosovës.

Në lidhje me dialogun me Serbinë, z. Kurti tha se ai është një proces i rëndësishëm që nuk do të neglizhohet. Porse duke qenë i tillë ai duhet të jetë i përgatitur mirë dhe me një qasje të re. Duhet të jetë transformues duke qenë i bazuar në parime e vlera, për dallim nga ai transaksional i bazuar në interesa momentale. Së dyti, të ketë karakter trans-atlantik në kuptim të bashkërendimit në mes të Bashkimit Evropian dhe Shteteve të Bashkuara të Amerikës por edhe të integrimeve perëndimore për të dy palët. Së treti, të jetë demokratik e transparent, në shërbim të popujve e qytetarëve dhe jo të qeverive aktuale apo politikanëve të veçantë.

Në fund, të dy u dakorduan të mbeten në kontakt të rregullt dhe të vazhdojnë bashkëpunimin pas formimit të qeverisë së re.

Sot, Kryeministri në ardhje, Albin Kurti, bashkë me kandidaten për deputete, Fitore Pacolli dhe asistenten ekzekutive, Valë Gjonbalaj, në zyret e Lëvizjes priti Ambasadorin e Turqisë, z. Çağri Sakar, dhe sekretaren e dytë të ambasadës, znj. Dilara Köseoğlu.

Ambasadori uroi Kryetarin Kurti për rezultatin e zgjedhjeve duke theksuar se ai dhe Turqia janë të interesuar të thellojnë bashkëpunimin me qeverinë në ardhje. Kryetari Kurti e falendëroi Ambasadorin për vizitën, si dhe për letrën e urimit nga Presidenti i Turqisë, Recep Tayyip Erdoğan.

Kryeministri në ardhje, Kurti e informoi Ambasadorin për prioritetet e qeverisë së tij dhe potencoi se në raport me Turqinë do të fokusohemi në shtimin e marrëdhënieve tona bilaterale, posaçërisht në fushën e zhvillimit ekonomik.

Sa i përket çështjes rreth vendosjes së Ambasadës së Republikës së Kosovës në Jerusalem, Kurti tha se njohja dhe vendosja e marrëdhënieve diplomatike me shtetin e Izraelit është shumë e rëndësishme për Kosovën, dhe mundësi e mirë për zhvillim, ndërsa rreth vendit se ku do të vendoset ambasada është një çështje që do të shqyrtohet duke parë edhe dokumentacionin e qeverisë në ikje.

Në fund, të dy u dakorduan që porsa të formohen institucionet e reja të legjislaturës së tetë do të vazhdojmë bashkëpunimin në mes të dy vendeve tona mike.

Nga mediat u njoftuam se Gjykata Themelore në Prishtinë paska aprovuar kërkesën e Prokurorisë Speciale për të revokuar fletarrestin për një nga eksponentët kryesor të krimit të organizuar, Milan Radojçiqin.

Kujtojmë se Milan Radojçiqi, të cilit Gjykata ia hoqi fletarrestin, për gjithë këto vite sfidon ligjin, por edhe sovranitetin e integritetin e Republikës së Kosovës. Me veprimtarinë e tij kriminale, sidomos në veri të vendit, ai ka qenë gjithnjë pengesë e jetës normale duke terrorizuar të gjithë qytetarët e të gjitha komuniteteve pa dallim. Po ashtu Milan Radojçiqi sipas prokurorisë ishte ndër të dyshuarit kryesorë për vrasjen e politikanit serb të Kosovës Oliver Ivanoviqit, për çka ka qenë ndër të tjera në kërkim nga organet e sigurisë.

Ky vendim i Gjykatës, i mbajtur heshtur, larg opinionit publik, përveç skandalit, përbën dhe rrezik e të panjohura. Si mund dikujt që i është përgatitur fletarresti për dyshime si i përfshirë në krim të rëndë t’i revokohet ai? Kush është Prokurori i Prokurorisë Speciale i cili paska kërkuar nga departamenti special pa asnjë argumentim të qëndrueshëm që të revokohet urdhërarresti për një ndër kriminelët më të mëdhenj të pasluftës?

Kushdo këtë veprim të papritur e sheh me dyshim dhe si larje të borxheve të mëhershme apo kusht për aleancat e reja të nëntokës e parapolitikës.

Prokuroria speciale dhe Gjykata themelore duhet t’i shpjegojnë publikut të Kosovës se pse nuk u dashka arrestuar më një kriminel.

Po ashtu i bëjmë thirrje Këshillit Prokurorial dhe atij Gjyqësor të veprojnë. Rasti në fjalë është skaji i pasigurisë që mundet të shkaktojë për rendin publik ata që duhet ta mbrojnë atë.

I bëjmë thirrje po ashtu organeve të sigurisë dhe atyre ligjzbatuese të jenë vigjilente përballë kësaj ngjarje.

Institucionet e drejtësisë duhet të përgjigjen se pse në vend se të ndjekin kriminelët paskan hequr dorë nga përndjekja. Këto bashkëpunime me krimin e organizuar tash në kohën e ndërrimit të qeverisë janë tërësisht të papranueshme dhe duhet të hetohen.

Si qeverisje e ardhshme jemi të përcaktuar qartë në funksion të sundimit të ligjit e triumfit të së drejtës. Por kjo gjë siç po dëshmohet nuk mund të arrihet me gjykatës e prokurorë që kanë shumë borxhe ndaj politikës apo ndaj krimit të organizuar. Andaj na duhet vetingu në gjyqësi e prokurori, na duhen profesionistë patriotë që i shërbejnë ligjit e vendit e jo burokratë në shërbim të krimit. As atij vendor e as atij rajonal.

Ambasadorin e Mbretërisë së Bashkuar në Kosovë, z. Nicholas Abbott, të shoqëruar nga sekretari i dytë politik, z. Richard Le Vay, e priti sot në takim kryetari i Lëvizjes VETËVENDOSJE!, njëherazi kryeministri në ardhje, Albin Kurti, bashkë me kandidatin për deputet, Arben Vitia dhe asistenten ekzekutive, Valë Gjonbalaj.

Ambasadori z. Abbott e uroi kryetarin Kurti për fitoren në këto zgjedhje dhe i dëshiroi sukses në angazhimin e mëtejmë drejt formimit të institucioneve të reja. Kryetari Kurti e falënderoi për urimin, dhe duke ndarë bindjen se qeveria e re do të konsolidohet shpejt, e njoftoi atë me disa prej prioriteteve të saj. Punësimi, drejtësia, pandemia me të cilën po përballemi dhe sigurimi i vaksinës për qytetarët tanë janë çështje kyçe tha Kurti. Ai foli edhe për një bashkëpunimin më të përgjegjshëm e cilësor mes qeverisë së re dhe opozitës në Kuvendin e Kosovës, si dhe për dialogun me Serbinë për të cilin përsëriti që nuk duhet të ngutemi duke premtuar me afate kohore dhe se dialogu duhet të jetë i përgatitur mirë e marrëveshja e qëndrueshme. Në fund, të dy u dakorduan për bashkëpunim në projekte konkrete që do të ndihmonin si shtetndërtimin demokratik e zhvillimin ekonomik të vendit tonë, ashtu edhe thellimin e marrëdhënieve bilaterale midis dy vendeve tona në të ardhmen.

Kandidati për kryeministër, Albin Kurti, bashkë me kandidatin për deputet, Hajrulla Çeku dhe asistenten ekzekutive, Valë Gjonbalaj, sot në zyret e Lëvizjes pritën znj. Ulrika Richardson, koordinatore për Zhvillim e Agjencive të Kombeve të Bashkuara, dhe z. Lorik Pustina, udhëheqës i ekipit të Zyrës së Koordinatores. Znj. Richardson fillimisht uroi kryetarin Kurti për rezultatin e zgjedhjeve, duke shprehur edhe gatishmërinë për bashkëpunim në realizimin e reformave ekonomike dhe sociale. Kryetari Kurti e falënderoi për vizitën e urimin dhe konfirmoi vullnetin që si qeveri në ardhje të punojë ngushtë me institucionet e asistencës zhvillimore.

Pjesëmarrësit në takim u dakorduan që lufta kundër korrupsionit për të krijuar mundësi të barabarta për të gjithë dhe zhvillimi ekonomik që ka në bazë kohezionin social janë veprime të domosdoshme drejt një shoqërie demokratike ku mbizotëron mirëqenia dhe prosperiteti. Ndër temat me interes të veçantë ishte edhe reforma në fushën e arsimit, si njëra ndër shtyllat kryesore të zhvillimit të vendit. Marrë parasysh situatën pandemike, pjesëmarrësit konfirmuan bindjen që prioritet me rëndësi të veçantë gjatë këtij viti është beteja kundër Covid-19 dhe mbrojtja e shëndetit publik në Kosovë.