Sot, në Qendrën tonë në Podujevë i uruam mirëseardhje mbi 50 grave e vajzave anëtare të reja të Lëvizjes sonë.

Gratë dhe vajzat jo vetëm në shoqëri, por edhe brenda Lëvizjes VETËVENDOSJE! vazhdojnë të jenë forca kyçe shtytëse drejt politikave tona të barazisë e ndryshimeve progresive në shoqërinë tonë. Politikat e drejta në qeverisje dhe hapësira e duhur në subjektin tonë ka bërë që gratë dhe vajzat të na bashkohen në vazhdimësi.

Së bashku do të fuqizohemi edhe më shumë!

Një delegacion i Lëvizjes VETËVENDOSJE! i përbërë nga, Zv.ministrja e Ministrisë së Punëve të Jashtme dhe Diasporës, Liza Gashi, anëtarja e Sekretariatit për Marrëdhënie Ndërkombëtare, Anila Vrajolli si dhe Sebastien Gricourt morën pjesë në Këshillin e Internacionales Socialiste, i cili u mbajt në Madrid të Spanjës.

Mbledhja e Këshillit ishte e përqendruar kryesisht në punimet për ndryshimet statutore të organizatës si dhe diskutimet edhe për tema të ndryshme me interes të veçantë për vendet respektive. Në këtë drejtim Zv.ministrja Liza Gashi prezantoi para të pranishmëve arritjet dhe progresin e Republikës së Kosovës gjatë mandatit qeverisës të Lëvizjes sonë.

Përgjatë punimeve të Këshillit delegacioni ynë zhvilloi takime të shumta nga të cilat theksojmë atë me Kryeministrin e Spanjës, Pedro Sanchez, Sekretaren për Marrëdhënie Ndërkombëtare të PSOE, Hana Jalloul, Kryetarin e YES, Enric Lopez, Sekretarin e IUSY, Bruno Gonçalves, nga Forumi Euroatlantik, David Balsa si dhe delegacione të ndryshme të shumë shteteve pjesëmarrëse nga rajoni e bota.

Kryetarja e Gratë për VETËVENDOSJE!, ministrja, Albulena Haxhiu, bashkë me Nënkryetaren e Lëvizjes VETËVENDOSJE!, Mrika Limani Myrtaj, Nënkryetaren e Kuvendit, Saranda Bogujevci, deputete dhe anëtare të kryesisë së GVV-së, pritën sot në takim një delegacion të përbërë nga përfaqësueset e forumeve të grave nga partitë politike shqiptare në Maqedoninë e Veriut.

Në këtë takim të përzemërt e njoftues, u fol për angazhimin politik të grave, sfidat sidomos në nivel organizativ që kanë të bëjnë me rritjen e numrit të vajzave dhe grave në politikë, për rëndësinë e shtyrjes përpara të politikave feministe, si dhe për mundësitë e një organizimi të përbashkët rajonal mes grave shqiptare në të ardhmen.

Duke u ofruar gjithë përvojën që kemi në çështje organizative dhe duke ndarë bashkërisht me to dëshirën për shtimin e bashkëpunimit në të ardhmen, u uruam sukses në angazhimin e tyre të mëtejmë politik.

Kryetarja e Grave për VETËVENDOSJE!, ministrja e Drejtësisë, Albulena Haxhiu, bashkë me Nënkryetaren e Kuvendit, njëherazi anëtaren e kryesisë së Lëvizjes VETËVENDOSJE!, Saranda Bogujevci, morën pjesë në Kongresin e Internacionales Socialiste të Grave, që u mbajt këtë javë ne 21 dhe 22 shkurt në Madrid të Spanjës.

Kongresi i Internacionales Socialiste të Grave, u hap nga Janet Camillo, kryetare e Internacionales Socialiste të Grave dhe u përcjell me një fjalë mirëseardhje nga ministrja për Barazi, Ana Rodondo.

Temë kryesore e këtij Kongresi ishte e tashmja dhe e ardhmja e feminizmit socialist. Promovimi i barazisë gjinore, të drejtat e grave, luftimi ndaj secilit diskriminim, parandalimi dhe adresimi i dhunës në familje përfshirë atë digjitale, femicidi, pasojat që sjellë lufta apo konflikti në veçanti tek vajzat dhe gratë, ishin disa nga temat që u diskutuan përgjatë dy ditëve të Kongresit.

Rëndësi iu dha ndarjes së përvojave politike dhe organizative, rritjes së angazhimit politik dhe kuptimit që si gra socialiste duhet t’iu shërbejmë grave më të papërfaqësuara.

Në këtë Kongres po ashtu u theksua se solidariteti mes grave në nivel kombëtar dhe ndërkombëtarë është jetik për secilën dhe se vetëm të bashkuara mund t’i arrimë qëllimet tona.

Ky Kongres ishte një mundësi shumë e mirë që të dëgjojmë për përvojat e secilit vend dhe t’i bashkërendojmë politikat feministe. Kjo do të na ndihmoj shumë neve si organizim i ri, si GVV.

Në Nivelin Teorik, së bashku me nënkryetaren Mrika Limani Myrtaj, biseduam për historinë e kolonializmit dhe u përqendruam në konjuktura specifike të historisë gjatë së cilave kanë buruar nuancat specifike të kolonializmit ekstraktiv ekonomik, e që më vonë pasuan me hegjemoni politike e kulturore. Në këtë kuptim, diskutimi rrodhi natyrshëm në zhvillimin e lëvizjeve anti-koloniale dhe ndikimin e tyre në historinë globale dhe vendore.

Në Nivelin Politiko-Organizativ, me zëvendësministren Liza Gashi, mbajtëm ligjëratën e fundit për këtë cikël. Zëvendësministrja Liza Gashi foli për rolin historik të mërgatës ndër vite. Ajo paraqiti historikun e valëve të emigrimit nga Kosova, të popullit shqiptar prej viteve 1960 deri në aktualitet. Po ashtu, zonja Gashi na foli për nismat e qeverisë, reformat në MJPD, angazhimin e anëtarëve të diasporës shqiptarë në jetën politike, etj. Mërgata ka pasur dhe vazhdon të ketë rol shumë të rëndësishëm në jetën shoqërore e politike të Kosovës.

Kryeministri, Albin Kurti, bashkë me Kryetarin e Kuvendit, Glauk Konjufca, Kryetarin e Podujevës, Shpejtim Bulliqi, familjarë e miq të Monit dhe Arbenit, ministra, deputetë, anëtarë kryesie dhe aktivistë të Lëvizjes, pas pllakës përkujtimore në sheshin Nënë Tereza vazhduan me homazhe te varri i Arben Xheladinit në Prishtinë dhe te ai i Mon Balajt në Podujevë.

Me 10 shkurt 2007, Arben Xheladini dhe Mon Balaj përkrah mijëra demonstruesve të tjerë që po kundërshtonin në formë të marshimit paqësor padrejtësitë e Pakos së Ahtisaarit, u qëlluan nga policia rumune e UNMIK-ut. Arben Xheladini dhe Mon Balaj u vranë kurse 80 demonstrues të tjerë u plagosën rëndë e lehtë. I ndjeri Hysni Hyseni Doda pat humbur syrin, Mustafë Nerjova e ka ende sot një pjesë plastike në kafkën e kokës kurse Zenel Zeneli e mbanë plumbin akoma afër zemrës sepse nuk do të arrinte t’i mbijetonte operacionit kirurgjik.

10 shkurti ishte ngjarja e Republikës. Në histori, kjo datë, veprimet e Mon Balajt e Arben Xheladinit, si dhe të gjithë atyre që ndoqën rrugën e tyre të guximshme do të mbeten si dëshmi e vullnetit të pandërprerë e të pandalshëm të popullit tonë për liri dhe drejtësi.

Nuk do të ndalemi së kërkuari drejtësi për Monin dhe Arbenin. Drejtësia për ta dhe liria e vetëvendosja e popullit të Kosovës janë të lidhura bashkë në këtë shekull.

Kujtimi ynë për Arbenin dhe Monin është i pashlyeshëm kurse lavdia e tyre e përjetshme.

Lavdi jetës dhe veprës së Mon Balajt dhe Arben Xheladinit.

Në 17 vjetorin e vrasjes së Arben Xheladinit dhe Mon Balajt, Kryeministri, Albin Kurti, bashkë me Kryetarin e Kuvendit, Glauk Konjufca, Nënkryetaren e Kuvendit, Saranda Bogujevci, familjarë e miq të Monit dhe Arbenit, ministra të kabinetit, deputetë, anëtarë të kryesisë dhe aktivistë të Lëvizjes VETËVENDOSJE!, bënë sot homazhe te Pllaka Përkujtimore e dëshmorëve Arben Xheladini dhe Mon Balaj, në sheshin Nëna Terezë në Prishtinë.

Kryeministri, Albin Kurti, në prononcimin e tij për media kujtoi ngjarjen e 10 shkurtit, padrejtësitë që solli Pakoja e Ahtisarit, mobilizimin që u bë për ta kundërshtuar atë, dhe faktin e rëndësishëm që togfjalëshi pavarësi e mbikëqyrur për herë të parë përmendet pas 10 shkurtit.

“Sot, me 10 shkurt, ne i përkujtojmë me mall e dhimbje, por edhe me krenari Mon Balajn dhe Arben Xheladinin, dy aktivistë të Lëvizjes VETËVENDOSJE! të cilët u vranë para 17 vjetëve nga policia ndërkombëtare e UNMIK-ut. 232 plumba gome me afat të skaduar dhe të keqpërdorura jashtë protokolleve të Kombeve të Bashkuara u hodhën mbi gjokset dhe kokat e protestuesve paqësor atë ditë të 10 shkurtit 2007”, tha Kryeministri Kurti.

“Me 2 shkurt të vitit 2007, në Kosovë pat zbritur pakoja e Ahtisaarit e cila u kundërshtua dhe u kritikua nga Lëvizja jonë VETËVENDOSJE! meqenëse parashihte shumë koncesione monoetnike në vendin tonë. Ne atë botë kundërshtuam ulëset e garantuara e të rezervuara në Kuvendin e Kosovës me të drejtë vetoje për pakicën serbe. Kundërshtuam eksterritorialitetin mbi baza fetare, decentralizimin mbi baza etnike. Kundërshtuam pjesëmarrjen e Kosovës në borxhin e jashtëm të Serbisë. Kundërshtuam shuarjen e trupave mbrojtëse të Kosovës, dhe kundërshtuam gjithashtu vazhdimin e sundimit ndërkombëtar me fuqi ekzekutive mbi neve, e pa llogaridhënie ndaj neve.”

“Ajo ishte një protestë paqësore, u patëm grumbulluar te rruga “Perandori Justinian” në qytezën Pejton, nëpër sheshin “Nëna Terezë” për të shkuar tek përmendorja e Skënderbeut, mirëpo këtu marshimi ynë paqësor u ndal përgjysmë prej forcave të shumta policore të cilat ajrin e sheshit e mbushën me gaz lotsjellës, ndërkaq rrugën kryesore të kryeqytetit e përgjakën me gjakun e Mon Balajt, Arben Xheladinit por edhe 80 protestuesve të tjerë të cilët u plagosën e u lënduan rëndë apo lehtë.”

“Pra 8 ditë para asaj proteste pat zbritur pakoja e Ahtisaarit me koncesionet e saj, ndërkaq rreth dy javë pas asaj proteste, ish presidenti finlandez dhe emisari i posaqëm atë botë, Marti Ahtisaari, raportet e tij për Kosovën, dokumentet e tij që ia dërgon sekretarit të përgjithshëm aso kohe Kofi Annan të Kombeve të Bashkuara, ia bashkëngjet edhe një letër shtesë qysh në fillim, në të cilën thuhet; pavarësi e mbikëqyrur për Kosovën. Për herë të parë togfjalëshi pavarësi e mbikëqyrur përdoret aty rreth dy javë pas protestës së 10 shkurtit 2007.”

“Ato forca policore e ushtarake ndërkombëtare, e keqpërdorën imunitetin diplomatik, mirëpo për krimet që kanë bërë, as sot as nesër, askush askund, nuk duhet të ketë imunitet nga drejtësia”, tha Kurti.

Kryetari i Kuvendit, Glauk Konjufca, tha se Arben Xheladini dhe Mon Balaj e më pas Enver Zymberi dhe Afrim Bunjaku janë dëshmorë të përpjekjes tonë për ta kompletuar pavarësinë, shtetin tonë, deri sa të jemi në mesin e shteteve të barabartë të gjithë botës.

“Pas vitit 1999 kemi pas dëshmor siç janë Arbër Xheladini dhe Mon Balaj, këta janë dëshmorë të përpjekjes së vazhdueshme të popullit të Kosovës që shteti me qenë i barabarte dhe ne me qenë qytetarë të një shteti të dinjitetshëm. Kjo është arsyeja pse ranë Moni dhe Arbeni por pastaj me rënien e Enver Zymberit dhe të Afrim Bunjakut tash së fundi po tregohet se përpjekja po vazhdon edhe pas pavarësisë për popullin tonë edhe pas vitit 2008 sepse është një përpjekje për shtetin tonë për të qenë i kompletuar me qenë në mesin e shteteve të barabarta të gjithë botës”.

“Prandaj 10 shkurti e ka rëndësinë e vetë kjo është arsyeja pse kemi dalë edhe me familjarë të Arbenit dhe të Monit edhe me aktivistët që ishin me mijëra atë ditë të 10 shkurtit 2007 në këtë shtet për me e shpreh vullnetin tonë që Kosovës i duhet Vetëvendosja si zgjidhje për statusin e vetë e jo kompromiset me Serbinë. Kjo ka qenë qasje dhe mendoj se kjo e ka vlerën e vet edhe sot e kësaj dite. Lavdi Arbenit, Lavdi Monit dhe lavdi të gjithë te rënëve për sovranitetin e Kosovës”, tha Konjufca.

Faleminderit Zonja Presidente,

Të nderuar anëtarë të Këshillit të Sigurimit,

Ekziston një ironi e thellë dhe e pakëndshme – dhe, sinqerisht, një ndjenjë distopike – në përgjigjen ndaj akuzave të rreme për shkelje të të drejtave të njeriut të bëra nga një vend i njohur se ka kryer gjenocidin e fundit të shekullit të 20-të dhe një qeveri që aktualisht është një nga kërcënimet më të mëdha autoritare për paqen dhe sigurinë rajonale.

Vetë ky Këshill i Sigurimit themeloi ICTY-në në vitin 1993 për shkak të “krimeve të tmerrshme” dhe “shkeljeve të rënda” të Konventave të Gjenevës. Qeveria serbe gjatë viteve ’90 urdhëroi, planifikoi dhe kreu vrasje, tortura, gjymtime dhe përdhunime, duke kryer gjenocid në Srebrenicë dhe në Kosovë. Studiueset Juridike Feministe kanë treguar gjerësisht se si përdhunimi është përdorur si mjet lufte. Brutaliteti i asaj që u bë ndryshoi përgjithmonë ligjin ndërkombëtar për të drejtat e njeriut.

Nga ky mjerim, Kosova u ngrit nga lufta si simbol i luftës për dinjitet dhe triumfit të të drejtave të njeriut. Dhe ne nuk u hidhëruam. Ne e kemi ndërtuar veten në një Republikë multikulturore dhe multi-etnike me drejtim përpara, dhe një shtet demokratik në rritje dhe të fortë. Gjashtëmbëdhjetë vjet pas pavarësisë dhe një çerek shekulli pas luftës dhe shkatërrimit, sot ne qëndrojmë të fortë dhe krenarë – një republikë për të gjithë, një shoqëri multietnike e të gjithëve.

Përkushtimi i qeverisë sonë për demokracinë, sundimin e ligjit dhe të drejtat e njeriut ka forcuar ekonominë tonë dhe unitetin e brendshëm. Që nga ndërhyrja e NATO-s, ne jemi angazhuar në mënyrë aktive me aleatë të shumtë ndërkombëtarë për të krijuar institucione demokratike dhe efikase.

Në tre vitet e fundit, ekonomia jonë ka shënuar rritje: me një rritje mesatare prej 6.2%, me dyfishim të investimeve të huaja direkte dhe eksporteve dhe një rritje 2/3 e të ardhurave nga taksat pa ndryshime thelbësore të politikës fiskale. Ne e kemi përcjellë këtë rritje në paketën fiskale më të madhe të rajonit, të njohur nga Banka Botërore, për të ndihmuar drejtpërdrejt qytetarët, familjet dhe bizneset në përballjen me sfidat globale të energjisë dhe kostos së jetesës.

Kosova është një histori suksesi e ndërhyrjes së NATO-s në pranverën e vitit 1999 dhe një mësim frymëzues se si zhvillimi ekonomik dhe përparimi demokratik mund të ecin paralelisht. Ky progres është njohur nga një sërë organizatash ndërkombëtare. Raporti i Freedom House për vitin 2023 e rendit Kosovën në vendin e parë në Ballkanin Perëndimor, të 2-tin në Evropë dhe të tretën në nivel global për avancimet në të drejtat politike dhe liritë civile. Ne u përmirësuam me 22 vende në vetëm dy vjet në Indeksin Botëror të Lirisë së Shtypit të Reporterëve pa Kufij. Në mënyrë të ngjashme, ne kemi kërcyer 21 vende në Indeksin e Perceptimit të Korrupsionit të Transparency International që kur qeveria jonë mori detyrën.

Rritja dhe mirëqenia jonë janë është ndarë me pakicat. Me krenari e kemi dhe njëherazi e zbatojmë një nga kushtetutat me mbrojtjen më të lartë të të drejtave të pakicave që përfshin 20 vende të garantuara në parlament (nga 120) nga të cilat 10 janë për serbët. Për perspektivë e gjithë popullsia e Kosovës është përafërsisht 1.8 milionë banorë dhe komuniteti serb është rreth 4% e saj. Serbët në Kosovë kanë gjithashtu 10 nga 38 komuna, pra mbi 25% të tyre. Jemi siguruar që t’ua ndajmë një pjesë të konsiderueshme të buxhetit tonë dhe jemi siguruar që gjuha serbe të jetë gjuhë zyrtare kudo.

Ne po punojmë në mënyrë aktive, me ndihmën e qeverive ndërkombëtare dhe OJQ-ve ndërkombëtare, për t’i forcuar këto të drejta. Vetëm vitin e kaluar, ministria për Komunitete dhe Kthim – e udhëhequr nga një ministër serb etnik – ndau miliona për 265 grante për OJQ-të, fermerët dhe bizneset e vogla nga komunitetet joshumicë. Shumica e këtyre mjeteve shkuan për serbët e Kosovës. Këtë muaj, ne po lansojmë një iniciativë të re për të mbështetur punësimin për deri në 2,000 banorë të katër komunave veriore. Kjo përpjekje do të lehtësohet nga Zyra jonë e sapokrijuar e Agjencisë së Punësimit në Komunën e Leposaviqit – një komunë me shumicë serbe.

Programi ‘Kosovo Generation Unlimited’ i Ministrisë së Financave ofron praktika me pagesë për të rinjtë, të cilat ndahen edhe për të rinjtë serbë të Kosovës. Programi ynë i Efiçiencës së Energjisë subvencionon pajisjet për ngrohjen e shtëpive me efikasitet energjetik, me 17% të subvencioneve që përfitojnë komunitetet joshumicë, duke përfshirë serbët e Kosovës. Ne kemi ndarë fonde për ndërtimin dhe riparimin e shtëpive në komunitetet serbe dhe kemi dhënë 5.6 milionë euro shtesë për komunat me shumicë serbe këtë vit. Grantet e arsimit për këto komuna janë mbi 20% më të larta për nxënës në krahasim me të tjerat.

Në periudhën 2008–2022, 10 komunat me shumicë serbe gëzonin mesatarisht 62% buxhet më të madh për kokë banori se pjesa tjetër e Kosovës. Ndërsa për vitin 2024, Ministria për Komunitete dhe Kthim ka rritjen më të madhe buxhetore nga të gjitha ministritë – përveç Ministrisë së Kulturës, Rinisë dhe Sporteve, e cila ka investimin për lojërat mesdhetare 2030. Deklaratat për shtyp të Zyrës së Kryeministrit janë në shqip. dhe në gjuhën serbe gjatë gjithë kohës. Gjithashtu, mbledhjet e Qeverisë transmetohen drejtpërdrejt në gjuhën shqipe dhe serbe.

Ideja se Kosova po kryen një fushatë spastrimi etnik, apo persekutim kundër komunitetit serb është një gënjeshtër – e tillë që është hedhur poshtë nga shumë trupa publike. Tetorin e kaluar, Parlamenti Evropian miratoi një rezolutë që u bëri thirrje autoriteteve dhe mediave serbe të përmbahen nga gjuha e urrejtjes kundër kosovarëve dhe nga përhapja e propagandës për ‘spastrimin etnik’ dhe ‘pogromet’ në Kosovë. Vitin e kaluar, Komiteti i Helsinkit për të Drejtat e Njeriut ka detajuar se si qeveria serbe shpërndan qëllimisht frikën për rrezikimin e rrejshëm të serbëve në Kosovë për të radikalizuar shoqërinë dhe për të krijuar një atmosferë toksike në të cilën do të refuzohej një marrëveshje me Kosovën.

Pretendimet e rreme gjithashtu janë hedhur poshtë nga Iniciativa Evropiane e Stabilitetit, një institut kërkimor me bazë në Berlin dhe Vjenë që merrte dokumente drejtpërdrejt nga institucionet zyrtare serbe. Statistikat e tyre zyrtare për sigurimet shtetërore shëndetësore, regjistrimet në shkolla, pensionistët, nataliteti në spitale dëshmojnë se përqindja e serbëve që largohen nga Kosova korrespondon me atë të atyre që largohen nga Serbia. Prandaj, serbët që largohen nga Kosova, ashtu si ata që largohen nga Serbia, e bëjnë këtë për të ndjekur mundësitë në Evropën Perëndimore, jo për të ikur nga ndonjë fushatë fiktive e spastrimit etnik.

Por, le të përqendrohemi këtu pak te trajtimi i Serbisë ndaj popullsisë së saj etnike shqiptare sot: një fushatë spastrimi etnik e kryer në mënyrë administrative. Qeveria serbe ka hequr sistematikisht mbi 4200 shqiptarë etnikë nga Regjistri Civil në Medvegjë dhe mbi 2000 në Bujanoc. Kjo fshirje ka pasoja të prekshme: viktimat humbasin aksesin në kartat e identitetit, pasaportat, shërbimet mjekësore, ndihmën sociale, regjistrimin e automjeteve, transaksionet e pronës, pensionet dhe të drejtat e votës, duke i lënë ato pa shtetësi. Ky shënjestrim diskriminues përbën një metodë shpopullimi ndaj komunitetit shqiptar në Serbi.

Qytetarët shqiptarë etnikë janë larg të qenit objektivi i vetëm i regjimit autoritar të Serbisë. Më 2 janar të këtij viti, redaksia e The Guardian e përshkroi gjendjen e politikës atje si “kapje e shtetit”. Pak orë më parë, Parlamenti Evropian miratoi me shumicë dërrmuese një rezolutë që kërkon hetim për zgjedhjet e mbajtura në dhjetor, duke përmendur rezultate manipuluese, retorikë agresive, abuzim verbal dhe media ruse që angazhohen aktivisht në dezinformim në emër të qeverisë.

Serbia është rreshtuar me Rusinë. Është i vetmi vend evropian, përveç Bjellorusisë, që nuk vendos sanksione pas pushtimit të Ukrainës nga Putin. Dhe vepron si kali i Trojës i Kremlinit në Evropën Juglindore, në një luftë gjeopolitike kundër botës demokratike. Kur isha i burgosur politik në Serbi, në moshën 24 vjeçare, për 2 vjet e 7 muaj, dëgjova një ditë gardianët duke shprehur gëzim dhe eufori me zë të lartë. Ishte 11 shtatori i vitit 2001. Mjerisht, mbizotëron ndjenja e dhunshme, antidemokratike dhe mafia, autoritarizmi dhe glorifikimi i torturës.

Tani po i drejtohem Rregullores së fundit të Bankës Qendrore të Kosovës për Operacionet me Para të gatshme, e cila ka hyrë në fuqi me 1 shkurt. Më lejoni të jem absolutisht i qartë: Rregullorja nuk bën asgjë për të ndaluar apo penguar Qeverinë e Serbisë që të ofrojë mbështetje financiare për serbët e Kosovës. Çdo sugjerim për të kundërtën nuk është gjë tjetër veçse një propagandë e rreme që synon nxitjen e tensioneve etnike. Rregullorja synon thjesht të sigurojë transparencën dhe ligjshmërinë e parave të gatshme të importuara në Kosovë, në përputhje me Kushtetutën tonë dhe politikën monetare të BE-së. Po të njëjtat rregulla vlejnë për të gjitha importet ‘cash’ nga çdo vend, në asnjë monedhë: ato nuk ndalojnë transferin e dinarëve nga Serbia, aq sa ndalojnë transferin e dollarëve nga SHBA, paundëve nga Britania e Madhe, ose për këtë çështje, lekë nga Shqipëria.

Banka Qendrore e Kosovës është e përkushtuar që të bëjë gjithçka që mundet për të siguruar që serbët e Kosovës të jenë në gjendje të vazhdojnë të marrin mbështetje financiare nga Serbia, pandërprerë dhe pa pengesa. Ajo i ka dërguar një letër homologes së saj, Bankës Kombëtare të Serbisë, ku i propozon një marrëveshje për transferimin e mjeteve përmes mjeteve ligjore dhe transparente, në përputhje të plotë me rregulloren e re. Dhe qeveria jonë është plotësisht e përkushtuar për të siguruar një tranzicion të qetë me kohë të mjaftueshme të investuar në arsim dhe informacion në vend që të vendosë dënime për mospërputhje. Ne jemi të përkushtuar që së bashku të identifikojmë dhe promovojmë mjetet më të mira të disponueshme për të siguruar vazhdimësinë e transfereve financiare nga Serbia drejt komunave ose familjeve legale.

Rregullorja e Bankës Qendrore synon të mos dëmtojë asnjë grup të vetëm qytetarësh, por përkundrazi të mbrojë të gjithë qytetarët – të çdo komuniteti etnik – nga kërcënimet e krimit të organizuar, trafikut të armëve dhe pastrimit të parave. Të gjitha këto aktivitete mbështeten në aftësinë e grupeve kriminale për të marrë para të paligjshme të kontrabanduara, kryesisht përtej kufirit tonë me Serbinë. Qytetarët në veri të Kosovës – shumica dërrmuese e të cilëve janë serbë etnikë – kërcënohen çdo ditë nga grupe të tilla.

Qytetarët tanë serbë përballen me frikësimin nga grupet kriminale që diktojnë veprimet e tyre, nga protesta në votim. Mosbindja rezulton me dhunë, djegie makinash dhe kërcënime ndaj anëtarëve të familjes. Kur serbët e Kosovës kërkojnë të takohen me mua, ne nuk mund t’i bëjmë takimet publike sepse u kërcënohet jeta dhe mjetet e jetesës. Kjo duhet të ndalet. Beogradit nuk mund t’i lejohet pafundësisht të financojë kriminelët dhe terroristët e tij në Kosovë me flukse parash të padeklaruara dhe të parregulluara, që rrjedhin lirshëm — dhe ilegalisht — në vendin tonë.

Dhe ky, të nderuar anëtarë të Këshillit të Sigurimit, është burimi i vërtetë i histerisë së Beogradit mbi rregulloren e Bankës Qendrore. Beogradi ka dhënë alarmin jo për shkak të këmbimit të dinarit në euro, por sepse po ndalojmë thasët e mëdhenj me para në kufi. Ata qajnë keq, jo nga shqetësimi për gjendjen e rëndë të qytetarëve serbë të Kosovës, por sepse tubacioni i tyre i përshtatshëm i parave të paligjshme në veri të Kosovës është gati duke u mbyllur. Ky tubim, dhe propaganda e vitrija që i ka paraprirë, nuk është gjë tjetër veçse pjesë e një fushate të pamëshirshme të një regjimi autoritar.

Republika e Kosovës është me fat që gëzon mbështetje të gjerë nga partnerët dhe aleatët e saj ndërkombëtarë në luftën kundër krimit të organizuar dhe korrupsionit. Banka Qendrore dhe rregulloret e saj janë po aq thelbësore për këtë luftë sa policët, prokurorët dhe gjyqtarët.

Në një farë mënyre, nuk jemi të befasuar që Serbia do të krijonte probleme nga një procedurë demokratike. Që nga fundi i luftës, qeveria serbe, e drejtuar nga shumë prej njerëzve që mbanin poste të larta në qeverinë e Millosheviqit – duke përfshirë zotin Vuçiq, Ministri i Informacionit të Millosheviqit, Ministër i Propagandës – ka grumbulluar të gjithë fuqinë dhe imagjinatën e saj për të gjetur mënyra të reja për të terrorizuar Kosovën. Nuk është çudi që Serbia jo vetëm që promovon mohimin e gjenocidit, por edhe e ruan me dhunë këtë mohim. Pasi lideri i opozitës serbe, Nikola Sanduloviç kërkoi falje për krimet e luftës të Serbisë në Kosovë dhe vendosi lule mbi varrin e një viktime shtatëvjeçare, shërbimi sekret serb e arrestoi atë në fillim të këtij janari dhe e rrahu derisa ishte pa ndjenja, duke e lënë të paralizuar. Ndërkohë, gazetari serb i Kosovës, Radomir Dimic, i cili ka banuar në Serbi, ka deklaruar publikisht se planifikon të kthehet në Kosovë për shkak se regjimi autoritar i zotit Vuçiq ua ka bërë jetën të padurueshme gazetarëve. Dhe teksa flasim tani, ai ka ardhur në Kosovë.

Mjerisht, edhe 25 vjet pas luftës, Serbia vazhdon në përpjekjet e saj për të rimarrë Kosovën me dhunë. Një shembull i qartë i kësaj ndodhi më 24 shtator të vitit të kaluar. Rreth 80 trupa paraushtarake, të organizuara dhe të mbështetura nga Serbia, filluan një sulm të paprovokuar ndaj një patrulle të Policisë së Kosovës, me pasojë vdekjen e një rreshteri të policisë, Afrim Bunjaku, dhe plagosjen e dy të tjerëve. Përkundër përpjekjes së terroristëve për të përdorur pelegrinët e pafajshëm serbë si mburojë njerëzore në një manastir që synonte të shfrytëzonte çdo viktimë eventuale për propagandë anti-kosovare, profesionalizmi i forcës sonë policore shmangu viktimat civile.

Më pas, më 27 shtator, Serbia shpalli tre ditë zie, zyrtare, për terroristët e vrarë në operacionin antiterror të Policisë së Kosovës. Dhe e keni vënë re sot, se zoti Vuçiq po kujtonte disa serbë të plagosur apo të lënduar në incidente të ndryshme, por ai nuk përmendi tre serbët e vrarë. Pse nuk i përmendi? Sepse ai e di që ata ishin terroristë të financuar, mbështetur, orkestruar prej tij. Prandaj tre serbët e vrarë nuk u përmendën fare.

Dhe më 29 shtator, Këshilli i Sigurisë Kombëtare i Shtëpisë së Bardhë ngriti vëmendjen e botës për një dislokim “të paprecedentë” të tankeve, trupave dhe artilerisë së rëndë serbe përgjatë kufirit Kosovë-Serbi. Vetëm pas presionit të SHBA-së dhe të tjerëve ndërkombëtarë, Serbia përfundimisht tërhoqi forcat e saj.

Ndërkohë, Policia e Kosovës zbuloi një sërë dokumentesh shqetësuese të lëna pas nga terroristët gjatë tërheqjes së tyre të nxituar për në Serbi. Dokumentet treguan se sulmi i 24 shtatorit kishte qenë pjesë e një plani më të madh për të aneksuar me dhunë veriun e Kosovës, nëpërmjet një sulmi të koordinuar në 37 pozicione të ndryshme. Më pas do të krijohej një korridor për të mundësuar furnizim të vazhdueshëm me armë dhe trupa nga Serbia.

Në muajt në vijim, Serbia ka refuzuar thirrjet ndërkombëtare për ekstradimin e terroristëve në Kosovë, ashtu siç ka refuzuar edhe t’i mbajë ata përgjegjës. Udhëheqësi paraushtarak i sulmit të 24 shtatorit, Milan Radoicic – ish-zëvendëspresidenti i partisë politike të sponsorizuar nga Beogradi në Kosovë, Lista Srpska, i sanksionuar nga SHBA dhe Britania e Madhe – ende endet i lirë në Serbi, ashtu siç vetë Serbia deri më tani i ka shpëtuar sanksioneve ndërkombëtare për rolin e saj në këtë sulm. Radoiçiq ka një urdhër-arresti të pazgjidhur nga Interpoli që është lëshuar dhjetorin e kaluar dhe që Serbia e ka injoruar.

Ky mosndëshkim është edhe i papranueshëm dhe i rrezikshëm. Siç deklaroi Presidenti Biden në tetor të vitit të kaluar, “historia na ka mësuar se kur terroristët nuk paguajnë një çmim për terrorin e tyre, kur diktatorët nuk paguajnë një çmim për agresionin e tyre, ata shkaktojnë më shumë kaos, vdekje dhe shkatërrim, ata vazhdojnë.” Këto janë fjalë të mençura. Serbia duhet të mbajë përgjegjësi për terrorin dhe agresionin e saj. Përndryshe, do të vazhdojë.

Aktet gjithnjë e më alarmante të agresionit dhe terrorizmit të Serbisë e bëjnë gjithnjë e më urgjente përmbushjen e detyrimeve të saj sipas Marrëveshjes Themelore, të arritur mes vendeve tona më 27 shkurt të vitit të kaluar. Marrëveshja u lehtësua nga Bashkimi Evropian dhe pasqyron angazhimin e ripërtërirë të Evropës në zgjidhjen e mosmarrëveshjes kryesore ndërmjet Kosovës dhe Serbisë. Ai është miratuar gjithashtu si ligjërisht i detyrueshëm nga Shtetet e Bashkuara. Detyrimet e Bashkimit Evropian në dialog burojnë nga Rezoluta 64/298 e Asamblesë së Përgjithshme të OKB-së. Rrjedhimisht, më 12 maj të vitit të kaluar, BE-ja e njoftoi Sekretarin e Përgjithshëm se ishte arritur një marrëveshje mes Kosovës. Hapi tjetër logjik do të ishte që BE ta regjistrojë zyrtarisht atë marrëveshje në OKB.

Marrëveshja Themelore vendos një pikë referimi të njohjes de facto, bazuar në Traktatin Themelor të vitit 1972 ndërmjet Gjermanisë Lindore dhe Perëndimore. Teksti i Marrëveshjes thërret shprehimisht Kartën e OKB-së si dritën udhëzuese që rregullon marrëdhëniet midis vendeve tona. Ai u imponon palëve një sërë detyrimesh, duke përfshirë: zhvillimin e marrëdhënieve të fqinjësisë së mirë (siç specifikohet në nenin 1), të angazhohen me njëri-tjetrin në bazë të barazisë sovrane dhe të respektojnë integritetin territorial të njëri-tjetrit (siç specifikohet në nenin 2), të përmbahet nga kërcënimi ose përdorimi i forcës (siç specifikohet në nenin 3), dhe detyrimin e Serbisë për të mos kundërshtuar anëtarësimin e Kosovës në asnjë organizatë ndërkombëtare (siç është specifikuar në nenin 4). Risia kryesore e marrëveshjes është ngritja de facto e marrëdhënieve midis vendeve tona në nivelin e të barabartëve sovranë – përtej njohjes së thjeshtë të dokumenteve, simboleve dhe institucioneve dhe një përmirësimi të vogël të zyrave ndërlidhëse.

Fatkeqësisht, gati një vit pas arritjes së marrëveshjes, Serbia duket se po vuan nga një rast i rëndë i asaj që quhet “pendim i blerësit”. Kryeministrja e saj, znj. Ana Brnabiq i dërgoi një letër BE-së më 13 dhjetor, duke thënë se marrëveshja nuk është ligjërisht e detyrueshme. Serbia refuzon gjithashtu dy obligime kryesore: të mos kundërshtojë anëtarësimin ndërkombëtar të Kosovës dhe të respektojë integritetin e saj territorial. Ky refuzim, veçanërisht ky i fundit, sugjeron një gatishmëri për të mbajtur opsionin e pushtimit të Kosovës.

Në këtë sfond, nënshkrimi i marrëveshjes nuk është thjesht një formalitet; është e vetmja garanci për zbatimin e plotë dhe të pakushtëzuar të saj, sigurinë kombëtare të Kosovës dhe paqen rajonale. Pavarësisht ofertave të mia të përsëritura, z. Vuçiq ka refuzuar të nënshkruajë. E ftoj atë, të pranishëm në këtë takim, të nënshkruajë këtu dhe tani, duke theksuar rolin vendimtar të Kartës së OKB-së në marrëveshjen dhe marrëdhëniet tona. Ky akt simbolik do të tregonte përkushtimin e tij për marrëdhënie paqësore dhe fqinjësore me Kosovën.

Kosova është e njohur kryesisht në mbarë botën për masakrat dhe spastrimin etnik nën regjimin e Millosheviqit, por pak e kuptojnë se ky ishte vetëm kapitulli i fundit në një histori shekullore të krimeve shtetërore kundër shqiptarëve të Kosovës. Duke filluar me Ilija Garashanin në shekullin e 19-të, figurat kryesore serbe hartuan 24 plane për dëbimin ose shfarosjen e shqiptarëve të Kosovës. Historia e popullit tonë përfaqëson një nga betejat më të mëdha, por të panjohura ndërkombëtarisht, antikoloniale të shekullit të njëzetë. Ndërsa gjenocidi në vitet 1990 shënoi një kulm, shtypja jonë filloi shumë më parë dhe rezonon me qytetarë të shumë kombeve.

Duke pranuar historinë e dhimbshme të shtypjes dhe dhunës së duruar nga populli ynë, ne jemi të përkushtuar për të mbrojtur të drejtat e të gjithë individëve. Përvojat tona të kaluara na kanë rrënjosur një dëshirë të thellë për të krijuar një mjedis të sigurt dhe gjithëpërfshirës për të gjithë. Si një komb që ka kapërcyer vështirësi të mëdha, ne aspirojmë të shërbejmë si një fener solidariteti dhe respekti për të drejtat e njeriut.

Faleminderit.

Në Nivelin Teorik, me profesor Gent Carrabregun, u diskutua për historikun e zhvillimit të mendimit konservator pas Revolucionit Francez dhe u vu theksi mbi transformimet që kjo rrymë i përjetoi varësisht kontekstit kohor e gjeografik deri më sot.

Ndërkaq me anëtarin e kryesisë, Arbër Zaimin u bisedua për zhvillimin e sistemit ekonomik të tregut të lirë pas Revolucionit Industrial dhe rrjedhën e lëvizjeve që vunë në pah kontradiktat dhe të metat e këtij sistemi.

Në Nivelin Politiko Organizativ, në Prishtinë e Prizren, u ligjërua mbi çështjen e mërgatës nga zëvendësministrja Liza Gashi, ndërsa në Ferizaj e Gjilan u ligjërua mbi çështjen e luftës nga ministri Ejup Maqedonci.

Zëvendësministrja Liza Gashi foli për rëndësinë historike të mërgatës në jetën shoqërore e politike për Kosovën. Ajo paraqiti historikun e valëve të emigrimit nga Kosova, të popullit shqiptar prej viteve 1960 deri në aktualitet. Po ashtu u prezantua dhe ndikimin që procesi i emigrimit ka pasur dhe ka për vendin. Së bashku me aktivistët, diskutuan për nismat e qeverisë, Ministrisë së Punëve të Jashtme dhe Diasporës dhe reformat e sfidat.

Ministri Ejup Maqedonci, edhe në Ferizaj e Gjilan ligjëroi për natyrën e luftës dhe bëri një trajtesë të ngjarjeve e analizë të natyrës së luftës.

Diskutimit mbi çështjen e luftës e të sigurisë iu bashkangjitën edhe zëvendësministri Shemsi Syla dhe aktivistë të tjerë nga Gjilani.

Shkolla Politike

Lëvizja VETËVENDOSJE!

Deputetja dhe anëtarja e kryesisë së Lëvizjes VETËVENDOSJE!, Fitore Pacolli dhe anëtarja e Sekretariatit për Marrëdhënie Ndërkombëtare, Anila Vrajolli janë duke qëndruar në Lyon të Francës si pjesëmarrëse në Kongresin e partive të gjelbra evropiane, që për qëllim kanë përgatitjen për zgjedhjet e BE-së. Në këtë kongres u shpalos programi politik i partive të gjelbra për zgjedhjet në BE.

Gjatë këtij kongresi ato zhvilluan takime të ndryshme me, deputetë e ministra nga Evropa, përfshirë këtu ministrin e Spanjës për kulturë, z. Ernest Urtasun, Thomas Waitz, kryetarin dhe deputetin evropian të Partisë së Gjelbër, deputeten evropiane Monica Vana, ministrin e Irlandës për mjedis, klimë dhe komunikim, z. Eamon Ryan dhe lideren opozitare nga Bjellorusia, znj. Sviatlana Tsikhanouskaya.

Mbledhja me Qendrat filloi me kujtim për natën e 3 dhe 4 shkurtit të vitit 2000, masakrës dhe dëbimit të shqiptarëve nga pjesa veriore e Republikës tonë. Megjithëse ende mungon vendosja e drejtësisë për këtë krim të kryer ndaj popullatës civile shqiptare, qeverisja e re po vazhdon të bëjë punë për kthimin e ligjshmërisë dhe kthimin e shqiptarëve nëpër tokat dhe shtëpitë e tyre në atë pjesë. Dy organizatat kriminale “Mbrojtja Civile” dhe “Brigada e Veriut” janë shpallë organizata terroriste, mbi 7 stacione të reja policore janë ndërtuar, dhe po vazhdojmë të ndajmë mjete financiare për ndërtimin e shtëpive në veri.

Në këtë mbledhje ku i pranishëm ishte Kryetari i Lëvizjes, njëherazi Kryeministri, Albin Kurti, Sekretari Organizativ, Alim Rama, Kryetarja e GVV-së, njëherazi ministrja e Drejtësisë, Albulena Haxhiu, Koordinatori i RVV-së, Libron Kelmendi, Koordinatori për Qendra, Valon Hoti dhe përfaqësues të Qendrave të Lëvizjes VETËVENDOSJE!, siç është zakon, puna filloi me një diskutim mbi situatën politike në vend për të vazhduar për situatën nëpër qendra, qytete, dhe çështje tona organizative.

Në vijën e përgjithshme të zhvillimeve politike u theksua fillimi i mbarë i këtij viti me përplotë zhvillime të rëndësishme për Republikën tonë si: Liberalizimi i vizave, njohja e pasaportës së RKS-së nga Spanja, heqja e vizave nga Emiratet e Bashkuara Arabe, heqja e vizave nga Izraeli, Lëvizja e lirë me targa RKS pa stikera, blerja e raketave “Javelin” nga ShBA-ja, rikthimi i FSK-së në Defender Europe 2025, subvencionimi i faturave të energjisë elektrike për mbi 40 mijë familje të cenueshme, faturimi i energjisë elektrike në veri, shërbimet e ARBK-së për herë të parë në veri, heqja e dinarit të Serbisë, mbyllja e komunave paralele dhe arritje të tjera. Edhe muaji shkurt ka filluar mbarë dhe mirë me platformën e punësimit për të rinj SUPERPUNA ku tashmë e kemi zgjeruar nga mosha 18-25 vjeç në 18 – 29 vjeç.

Te çështjet organizative u fol për anëtarësimet e reja dhe punën që po bëjnë qendrat tona në burime njerëzore në përgatitjen e tyre për zgjedhjet lokale. Lëvizja VETËVENDOSJE! ashtu siç është alternativa e vetme në nivelin qendror duhet të jetë dhe të shihet si alternative e vetme e drejtë dhe zhvillimore edhe në nivelin lokal dhe për këtë duhet t’ju përvishemi edhe më shumë punëve në ditë dhe javët në vijim, u tha në këtë mbledhje.

Zahir Pajaziti, Hakif Zejnullahu dhe Edmond Hoxha ishin pararendësit e Ushtrisë Çlirimtare të Kosovës. Ata kryen aksione kundër okupatorit serb para se të fillonte lufta duke na dhënë si frymën për çlirim ashtu edhe rrugën drejt lirisë. Në vitin 1997 grupi i tyre u zbulua nga sigurimi serb dhe gjersa të tre ishin duke udhëtuar nga Prishtina për në Vushtrri, forcat serbe kishin zënë pritë për ta në fshatin Pestovë, ku të tre ranë heroikisht duke luftuar.

Në 27 vjetorin e rënies heroike të Zahir Pajazitit, Hakif Zejnullahut dhe Edmond Hoxhës, Kryeministri i vendit, Albin Kurti, bashkë me Kryetarin e Kuvendit, Glauk Konjufca, Nënkryetaren e Kuvendit, Saranda Bogujevci, deputetë, anëtarë të kryesisë së Lëvizjes dhe aktivistë nga qendrat tona, fillimisht bënë homazhe te Kompleksi Memorial në Orllan, për të vazhduar më pas te Shtatorja e Heronjve në Sheshin e Qytetit në Podujevë.

Kryeministri Albin Kurti tha se Zahir Pajaziti, Hakif Zejnullahu dhe Edmond Hoxha i dhanë një hov të jashtëzakonshëm çlirimit të Kosovës.

“Ata ishin lufta para luftës, ata ishin aksionet para betejave, ata ishin kushtrimi për liri të popullit dhe çlirim të vendit, andaj edhe ne sot me shume mall e krenari i kujtojmë për punën, veprën, jetën dhe flijimin e tyre për Kosovën, për mbarë kombin shqiptar. Ata i dhanë një hov të jashtëzakonshëm çlirimit të Kosovës meqenëse në njërën anë ata e shtuan vetëbesimin brenda radhëve të Ushtrisë Çlirimtare të Kosovës e në anën tjetër e shtuan edhe besimin e popullit në Ushtrinë Çlirimtare të Kosovës”, tha kryeministri Kurti.

Kryekuvendari Glauk Konjufca tha se ata të tre, përmes aksioneve të tyre të suksesshme guerile bënë që çdo polic dhe çdo ushtar i Serbisë okupatore në Kosovë të mos ndihej i sigurt. Ai theksoi që Zahiri, Hakifi dhe Edmondi dhanë një kontribut të jashtëzakonshëm në themelimin e Ushtrisë Çlirimtare të Kosovës, lufta e lavdishme e të cilës çoi në çlirimin e Kosovës dhe në shporrjen e Serbisë okupatore nga trojet tona.

I përjetshëm do të jetë kujtimi për këtë treshe që as vdekja s’mund ta ndajë. Lavdi jetës dhe veprës së heronjve tanë, Zahir Pajaziti, Hakif Zejnullahu dhe Edmond Hoxha.

Po vazhdon programi për në dy nivelet e shkollës politike të Lëvizjes.

Këtë javë në nivelin politiko-organizativ u mbajtën ligjëratat mbi historinë dhe teoritë e feminizmit.

Nazlie Bala në Prishtinë e Agnesë Kastrati në Ferizaj, paraqitën disa nga tezat kryesore të feminizmit të majtë. Dallimet ideologjike, ato doktrinore si dhe personazhet kryesore që e kanë emërtuar këtë histori të mëdha të përpjekjes dhe sakrificave të jashtëzakonshme.

Në ligjërata u paraqitën çështja e gruas, historiku mbi lëvizjet feministe në botë, lëvizja në Kosovë, Valët e feminizmit dhe çështjet që lëvizjet feministe patën në qendër të angazhimit mbi situatat politiko-shoqërore që nxitën e formësuan aktivizmin feminist.

Po ashtu ligjërueset paraqitën dhe angazhimin e grave shqiptare si pjesë kruciale e luftës së UÇK-së e veçanërisht e organizatave ilegale që vepruan në Kosovë dhe i paraprinë luftës.

Në Nivelin Teorik, profesor Gent Carrabregu vijoi ligjëratat në kursin e Logjikës formale. U paraqitën përveç koncepteve themelore dhe shembuj e ushtrime të silogjizmave aristotelian.

Ndërsa në kuadër të ligjëratave mbi shkencat politike, profesor Armend Mazreku ligjëroi mbi teoritë e liberalizmit si një nga shkollat e mëdha të mendimit politik e shoqëror. Si dhe mbi filozofët anglezë që e themeluan dhe përfaqësojnë këtë shkollë si Thomas Hobbes e John Locke. I pari paraprirës i liberalizmit dhe i dyti themelues i liberalizimit.

U diskutua gjatë ligjëratës mbi ato që ende sot i kemi të trashëguara në sistemet tona të demokracisë liberale përfaqësuese, kontratën sociale, teoritë e qeverisjes liberale, si dhe konceptet themelore të të drejtave të individuale, atyre pronësore, konceptin e ndarjes së pushteteve.

Shkolla politike e Lëvizjes vijon javën e ardhshme me ligjërata në të dyja nivelet e saj.

Shkolla Politike

Lëvizja VETËVENDOSJE!

Sot, në zyret e Lëvizjes VETËVENDOSJE! Sekretari Organizativ, Alim Rama, së bashku me Sekretarin Për Marrëdhënie Ndërkombëtare, Hajrulla Çeku, dhe anëtaren e këtij sekretariati Anila Vrajolli, mirëpritën një delegacion të partisë LSDM nga Maqedonia e Veriut, të përbërë nga Sekretari i Përgjithshëm, z. Mile Zechevikj, Sekretari Ndërkombëtar, z. Bojan Marichikj dhe Kryetari i Forumit Rinor, z. Marko Mihailoski.

Në këtë takim miqësor u diskutua për zhvillimet politike në dy vendet tona dhe në rajon përgjithësisht. U theksua rëndësia e bashkëpunimit ndërmjet dy subjekteve tona që njëherazi janë edhe anëtare të përbashkëta në platformat e ndryshme socialdemokrate nëpër botë. Bashkë konstatuam nevojën për vazhdimin e rrugës së bashkëpunimit mes dy organizatave sikurse e kemi mes dy forumeve tona rinore.

Takimin e përmbyllëm duke diskutuar ngjarjet e ardhshme në të cilat do të jemi së bashku dhe hapat e tjerë për thellimin e bashkëpunimit gjithnjë nën dritën e socialdemokracisë.

42 vjet nga rënia e tre dëshmorëve të kombit Jusuf e Bardhosh Gërvalla dhe Kadri Zeka.

Një delegacion i prirë nga Presidentja Vjosa Osmani, Zëvendëskryeministrja, Donika Gërvalla, Kryekuvendari Glauk Konjufca, bashkë me kryetarë të komunave nga radhët tona, ministra të kabinetit qeverisës, deputetë, veprimtarë, aktivistë e anëtarë të Lëvizjes VETËVENDOSJE!, bënë homazhe në vendlindjen e vëllezërve Gërvalla në Dubovik te memoriali dhe vizituan shtëpinë muze.

Jusuf e Bardhosh Gërvalla dhe Kadri Zeka si veprimtarë të shquar të çështjes kombëtare u vranë nga shërbimi sekret jugosllav 42 vite më parë në Shtutgart të Gjermanisë. Vrasja e tyre, për të cilën ende nuk është hetuar apo dënuar dikush, kishte për qëllim goditjen e përpjekjes së popullit shqiptar për t’u organizuar e dalë nga robëria. Jusufi, Bardhoshi dhe Kadriu asokohe po bashkonin shqiptarët, organizatat e tyre, dhe po frymëzonin jetën politike e kulturore duke ndërtuar një bazë të shëndoshë për një vetëdije më të lartë shoqërore e politike të shqiptarëve, andaj edhe u vranë nga regjimi jugosllav i dominuar nga Serbia në atë kohë.

Presidentja Osmani tha se vrasja e Jusuf e Bardhosh Gërvallës dhe Kadri Zekës rizgjoi ndjenjën e atdhetarizmit ndër shqiptar.

“17 janari është ditë e humbjeve të mëdha për popullin shqiptar e për Kosovën në veçanti. Në këtë datë, 42 vite më parë, u vranë Jusuf e Bardhosh Gërvalla dhe Kadri Zeka, duke i dhënë kështu një goditje të madhe sakrificës së popullit tonë për liri por njëkohësisht duke e rizgjuar ndjenjën e atdhetarizmit dhe sakrificës së miliona shqiptarëve gjithandej, të cilët me vite më radhë kontribuuan për lirinë e Kosovës”, tha Presidentja Osmani.

Kryetari i Kuvendit, Glauk Konjufca, tha se Jusuf e Bardhosh Gërvalla dhe Kadri Zeka, kishin synim lirinë e Kosovës, teksa ata i quajti pararendës të Ushtrisë Çlirimtare të Kosovës.

“Ata kishin dy qëllime madhore të cilat duhet t’i kujtojmë e të cilat kanë peshë dhe rëndësi shumë të madhe për historinë e Kosovës. E para, ata u përpoqën që t’i bashkonin të gjithë, që t’i bashkonin të gjitha organizatat ilegale të cilat synim e kishin lirinë e popullit shqiptar dhe t’i sillnin në një kornizë të vetme, në një organizatë të vetme. Dhe e dyta që kjo liri të vinte përmes çlirimit, përmes përpjekjes së organizuar dhe të armatosur të popullit të Kosovës. Këto qëllime kanë vazhduar përgjatë gjithë kohës dhe pikërisht për këtë arsye unë do t’i quaja Jusuf Gërvallen e Bardhoshin, e po ashtu edhe Kadri Zekën si pararendësit e Ushtrisë Çlirimtare të Kosovës. Në këtë kuptim ata kanë një peshë të jashtëzakonshme për historinë e Kosovës dhe do të kujtohen e nderohen gjithmonë, u shpreh Konjufca.

Jusufi, Bardhoshi e Kadriu ende vazhdojnë të na frymëzojnë mendjen e të na ngrohin zemrën me krijimtarinë që na e lanë. I përjetshëm do të jetë kujtimi për ta.

25 vjet më parë, me 15 janar 1999, në fshatin Reçak u krye një prej masakrave më të rënda nga lufta e fundit në Kosovë ku 45 shqiptarë civil të paarmatosur u masakruan nga forcat policore, ushtarake dhe paraushtarake serbe. Një ditë pas masakrës, ambasadori i OSBE-së në Kosovë, z. William Walker, e vizitoi vendin ku u krye masakra dhe prej aty krimet serbe u bënë botërisht të njohura duke hapur edhe rrugën për ndërhyrjen e NATO-s. Serbia edhe sot refuzon ta njoh Masakrën e Reçakut dhe e mohon atë. Drejtësia e munguar peshon mbi familjarët e martirëve dhe të gjithë qytetarët e Republikës së Kosovës.

Sot, siç është zakon, Presidentja e Republikës, Vjosa Osmani, Kryeministri, Albin Kurti, dhe Kryekuvendari Glauk Konjufca, bashkë me ministra të kabinetit qeverisës, deputetë të Kuvendit të Kosovës, familjarë të martirëve, veprimtarë, aktivistë e anëtarë të Lëvizjes VETËVENDOSJE! bënë homazhe te Kompleksi Memorial i Masakrës së Reçakut duke kujtuar dhe nderuar martirët dhe dëshmorët e Kosovës.

Presidentja tha se shqiptarët u masakruan duarthatë në mënyrë brutale nga regjimi i Millosheviqit dhe kujtoi e falënderoi ish-ambasadorin William Walker që u bë zë i gjithë shqiptarëve në atë kohë ku siç u shpreh ajo kishim nevojë për mbrojtje ndërkombëtare e nuk kishim zë për ta kërkuar.

Kryeministri Albin Kurti tha se Masakra e Reçakut e bëri të domosdoshëm ndërhyrjen e NATO-s për ta ndalur gjenocidin e Serbisë në Kosovë. Ai kujtoi se William Walker vazhdon të jetë i sulmuar dhe i urryer në Serbi ku ende vazhdon një regjim autoritar me president ish-ministrin e informatave të asaj kohe. Kryeministri Kurti kujtoi edhe 11 ushtarët e UÇK-së që kanë rënë në mbrojtje të trupave të masakruar.

“Masakra e Reçakut këtu e 25 vjet më parë, ku u vranë 45 civilë shqiptarë e tronditi si opinionin publik ndërkombëtar, gjithashtu edhe diplomacinë botërore dhe e bëri të domosdoshëm ndërhyrjen ushtarake të NATO-s për të ndalur gjenocidin e Serbisë në Kosovë. Kur ndodhi masakra e Reçakut, ambasadori William Walker si udhëheqës i misionit të OSBE-së në Kosovë erdhi këtu te fshatarët dhe e foli të vërtetën, tha kjo është masakër dhe krim kundër njerëzimit. E dimë që e vërteta është armiku më i madh i diktatorëve dhe shovinistëve andaj edhe sot e kësaj dite ambasadori William Walker vazhdon të jetë ndërkombëtari më i sulmuar edhe më i urryer në Serbi, ku vazhdon të dominojë një regjim autoritar me ç’rast ish-ministri i informatave të asaj kohe sot është president i Serbisë”.

“Më 15 janar në një dimër jashtëzakonisht të ftohtë pati ndodhur ky krim makabër, ndërkaq varrimi i 45 civilëve ka ndodhur vetëm katër javë më vonë sepse ka pasur luftë të madhe për Kosovën. I kemi edhe 11 ushtarë të UÇK-së që kanë rënë në betejë për mbrojtjen e trupave të masakruar nga Serbia dhe ato katër javë tregojnë se Serbia është përpjekur ta deformojë të vërtetën, ta justifikojë krimin dhe prandaj edhe një herë po e theksoj rëndësinë e të vërtetës të ambasadorit William Walker, të cilit i jemi mirënjohës që në një moment historik për popullin tonë e foli vetëm të vërtetën”, tha Kryeministri Kurti.

Kryekuvendari Glauk Konjufca tha se Masakra e Reçakut i tregoi botës demokratike që të vetëm gjuhë që e njeh Serbia është gjuha e forcës sepse vetëm ajo e ndali atë dhe luftën. Ai theksoi që gjithmonë do të mblidhemi në Reçak për të kujtuar martirët dhe dëshmorët që ranë në përpjekje për të mbrojtur popullatën civile të Reçakut.

Siç është bërë e qartë tanimë, kur nuk kanë lëndë për të dërguar në Gjykatë Kushtetuese, merren me sulme publike dhe shpifje.

Nuk është hera e parë që një zyrtar a përfaqësues i Lëvizjes VETËVENDOSJE! sulmohet me shpifje dhe të pavërteta.

Para disa javësh në një sulm publik të organizuar tre zyrtarë publikë e përfaqësues politikë paraqitën si të vërtetë ndërhyrjen në një vendim të gjykatës komerciale për tenderin e Komunës së Prishtinës për ndërtimin e “Rrugës A ” në Prishtinë. Procesi në fjalë prej kohësh dihej nga çdo i interesuar apo ekspert i fushës se kishte probleme serioze me integritetin e kompanisë fituese. Çështje kjo për të cilën asnjë nga eksponentët në fjalë asnjëherë as u shprehën publikisht as u organizuan për të kërkuar llogari publike.

Kudo në median e shkruar ishte bërë e qartë se kompania fituese e tenderit për “Rrugën A” në Prishtinë ishte në zotërim të personave me dënime penale. Por kjo çuditërisht nuk i preokuponte krerët e Komunës dhe të LDK-së.

E kundërta ndodhi pasi rasti në fjalë u kontestua nga Gjykatën Komerciale dhe punimet u pezulluan. Fajin për këtë pezullim drejtuesit e Komunës dhe LDK ja lënë deputetes së Lëvizjes VETËVENDOSJE!, Fitore Pacolli. Meqë sipas shortit për gjykimin e kësaj lënde drejtuesit e Gjykatës kishin caktuar gjyqtaren, të afërmen e deputetes tonë.

Për insinuatat e këtyre eksponentëve dhe shpifjeve të tyre publike sot deputetja Fitore Pacolli – Dalipi ushtroi Padi në Gjykatën Themelore.

Midis të tjerash ajo deklaroi për mediat se:

Sot e dorëzova padinë për shpifje dhe fyerje dhe kompensim të dëmit kundër Kryetarit të Komunës së Prishtinës z. Përparim Rama, Kryetarit të Lidhjes Demokratike z. Lumir Abdixhiku dhe deputetes Doarsa Kica Xhelili.

Të tre të paditurit me deklaratat e tyre publike lidhur me vendimin e Gjykatës Komerciale për “Rrugën A”, me veprimet e tyre, duke e dënuar fillimisht faktin biologjik të të qenit motra e gjykatëses Vlora Pacolli, kanë shpifur duke më dëmtuar imazhin si personalitet publik. Që të tre kanë konsumuar veprën e shpifjes dhe fyerjes ndaj meje.

Me shpresë se Gjykata Themelore do ta trajtojë këtë me kohë dhe sipas afateve ligjore urojmë që të shërbejë si rast për të vendosur drejtësinë në situata të tilla.

Lëvizja VETËVENDOSJE!

19 dhjetor 2023

Preambulë

1. Gjendja e grave në Kosovë rëndohet nga përjashtimi ekonomik, mentaliteti shoqëror dhe neglizhenca institucionale.
2. Në ndërveprim me njëra tjetrën, këto tri struktura e ndërtojnë një hierarki pushteti ku grave i imponohet pozita e pabarazisë. Gratë dhe vajzat e vuajnë sot mungesën e parave, e punojnë gjithë ditën në punë e në shtëpi. Ato e pësojnë neglizhencën në vend të mbështetjes institucionale, paragjykimin në vend të solidaritetit shoqëror, përjashtimin në vend të përfshirjes. Në vend të pabarazisë dhe paanësisë në emër të barazisë, meritojmë punë dhe pagë, liri të lëvizjes, të fjalës e veprimit, dhe jetesë në shtet miqësor. 

Praktikja

• Gratë nuk janë të papuna. Ato janë të papunësuara. Më keq, janë të papaguara. Të goditura nga keqpagesa, informaliteti i ekonomisë ose papunësia, ato po gjejnë vetë forma të punësimit. Ose të mbijetesës përmes angazhimit të tyre vetjak. Me gjithë punën e madhe që bëjnë në shtëpi, në tregun informal, ose në punë të nënpaguara, mungon qasja e tyre në financa. Ndërkaq, ato që posedojnë mjete e ndajnë luftën e gruas në shtresa ekonomike. Disa kanë dado, disa janë dado. Të gjitha mund ta njohin diskriminimin por të dytat shumë më mirë.
• Shumica e grave nuk mund të bëjnë baraspeshë të mirë mes jetës dhe punës. Ato janë të shantazhuara me njërën ose tjetrën, ani pse u takojnë të dyja. Kujdesi shtëpiak, e kujdesi ndaj anëtarëve të familjes nuk lidhet me gjininë. Pse duhet t’u mbetet vetëm grave?
• Ato vazhdojnë të thyejnë tabu megjithëse tabutë janë goditur kohë më parë. Ato vazhdojnë të flasin, shkruajnë, krijojnë, shprehen artistikisht, zbulojnë, fitojnë çmime  e medalje, por objekftikohen pavarësisht këtyre arritjeve. Nuk mund të jesh e arritur pa e përmbushur edhe standardin estetik të çfarëdolloj që është në modë. Të qenit grua kushtëzohet nga performanca e feminitetit të fabrikuar social.

• Gratë mund t’i kryejnë dhjetëra shkolla profesionale, dhjetëra trajnime të mbrojtjes dhe të mos ndihen akoma të sigurta. Të rrethuara me dhunë verbale, ngacmime seksuale, përdhunime dhe femicidi.
• Të gjitha këto po i çojnë gratë në ngujim e kufizim. Ne jemi për çlirim. Këto janë kërkesa politike. Ndaj asnjërës nuk jemi indiferente.

Veprimtaria

• Ne jemi vetëvendosëse. Për këtë luftojmë dhe jetojmë. Për jetë me dinjitet. Për kënaqësi dhe barazi. Për vete dhe për njëra-tjetrën.
• Ne mund ta kemi të vështirë se struktura shtypëse është e vjetër mijëra vjet. Por, ne sot e kemi lehtë sepse na udhëheq ideali i grave pioniere që çanë rrugën para nesh që të veprojmë për ato që vijnë pas nesh. 
• Sot e kemi vështirë se s’ka vende pune të mjaftueshme. Por, e kemi më lehtë se paraardhëset tona, sepse sot gratë janë edhe të diplomuara edhe të kualifikuara po aq e më shumë se burrat.
• Sot e kemi vështirë se duhet të kërkojmë shtretër në spitale. Mirësjellje e higjiene, trajtim të dinjitetshëm edhe në proceset obstetrike. Por, ne sot synojmë e luftojmë që ta kemi më të lehtë dhe për këtë jemi të pa kompromise për të drejtat tona riprodhuese. 
• E kemi të vështirë se ende nuk pranohet tërësisht të vendosim për trupat tanë. Por ne e kemi të lehtë se insistojmë në zgjedhjet dhe vendimet tona.  
• Ne e kemi të vështirë se ndërveprojmë me dhunues. Por, e kemi të lehtë se të gjitha jemi bashkë.

Deklaratat

1. Koha e dhunës, e përjashtimit, e diskriminimit ka mbaruar. Kush beson në to e pret pluhuri.
2. Ne ende duhet të numërojmë gratë në politikë derisa numërojmë varret e grave të vrara. Andaj, nuk ka vend për vetëkënaqësi, por vetëm për revoltë. Ne jemi në politikë, aktiviste politike. Kundërshtojmë aktivisht çdo akt të kryer padrejtësisht.    
3. Skeptikët na thonë pse nuk po merreni me këtë lloj padrejtësie. Janë burra kryesisht. Të gjitha idetë që na i japin janë të shkaktuara nga bashkëgjinorët e tyre.
4. Nuk duhet të dridhet zëri i grave teksa denoncojnë. Duhet të dridhen kriminelët që mendojnë të dhunojnë.
5. Sot gratë në Kosovë dhe kudo në botë duhet ta zhdukin një problem që ato nuk e kanë shkaktuar. E kanë pësuar historikisht megjithatë. Derisa burrat janë duke vazhduar jetën dhe përparimet e tyre, ne duhet të ndreqim gabimet e tyre. Pabarazia është problem i burrave. Ata janë krijues të kësaj vepre përbindëshi. që burrat kanë bërë e bëjnë përditë.
6. Ata nuk na akuzojnë dot. Rezistencën e bëjmë. Punët i kryejmë. Dijen e kemi. Guximin e treguam. Në luftë nuk dorëzohemi. Ne do të fitojmë.
7. Burrat nuk i kanë siguruar botës një jetë me dinjitet e barazi. Për këtë ne do të luftojmë. Prandaj ne do të fitojmë.

Teorikja

• Socialdemokracia dhe çlirimi i grave janë koncepte që ne jemi të bindura që kanë një lidhje të fortë me njëra–tjetrën. Socialdemokracia nuk mund ta injorojë çështjen gjinore dhe feminizmi nuk mëton se arrihen idealet feministe pa socialdemokraci. Angazhimi ndaras për to është i mangët. Ne i duam të dyja së bashku. Angazhimi që në qendër ka parimet e socialdemokracisë dhe feminizmit, garanton përparim edhe gjinor edhe shoqëror. Ne, si GVV angazhohemi për të dyja në mënyrë rigoroze.  Feminizmin socialdemokrat e shohim si mundësi për arritjen e çlirimit tonë si gra.
• Idetë që ne si Gra për VETËVENDOSJE! shtyjmë përpara janë kundër diskriminimit dhe për barazi e drejtësi. Angazhimi ynë është për vetëvendosjen si koncept për realizim/plotësim të secilës grua si qytetare me të gjitha mundësitë. Feminizmi i ndërthurur/ndërsektorialiteti është qasja jonë. Sepse synimet tona janë për një shoqëri gjithëpërfshirëse. Jemi vigjilente ndaj secilës pabarazi pavarësisht bazës që ka; Kundër pabarazisë klasore, kombëtare, racore, orientimit seksual apo identitetit gjinor. Nuk  mëtojmë emancipimin shoqëror e gjinor vetëm në një sferë të jetës shoqërore qoftë ajo gjinore, kulturore apo edhe ekonomike. Që emancipimi të jetë i plotë duhet eliminuar secila pabarazi, çfarëdo qoftë ajo. Jemi të vetëdijshme që parakusht që të plotësohen nevojat kolektive të grave është ndryshimi i strukturës shoqërore.
• Vizioni ynë është këmbëngulja tek vlerat universale si barazia, lira e drejtësia.  Angazhimi ynë është për zgjidhjen e problematikeve të spektrit lokal. Ne angazhohemi se pari për veten tonë dhe vendin tonë. Gratë shqiptare kanë bërë vazhdimisht përpjekje të dyfishtë për dekolonizim për kombin e për veten si gra. E njohim secilën betejë që veçmas gratë shqiptare kanë fituar përgjatë historisë. Synojmë t’i ruajmë arritjet e fituara e angazhohemi për të fituar beteja të reja.
• Ne kërkojmë VETËVENDOSJE! veçanërisht për gratë. Feminizmi që e përqafon GVV shkon përtej të drejtave ligjore, kushtetuese. Duam përfaqësim në vendimmarrje, por nuk mjaftohemi me të. Edhe demokraci përfaqësuese edhe demokraci të drejtpërdrejtë. Duam paga të barabartë me burrat për punë të njëjtë. Por, jemi të pakënaqura me aq. Duam punë dhe mirëqenie. Luftojmë për të kontrolluar trupin dhe seksualitetin tonë. Kështu i kemi në duart tona, jetët tona. Feminizmi ynë nuk është një pikë që arrihet por është vijë lineare. Ne vijojmë drejt dhe përpara.
• Solidaritetit ka potencial të madh për të na bashkuar si gra. Solidariteti është mjeti kryesor që mund të na bëjë bashkë si gra. Me qëllim të përbashkët që të dekonstruktojmë rolet gjinore që shërbejnë si burim i shtypjes dhe shfrytëzimit. Solidaritetin do ta përdorim si fuqinë tonë për t’i riorganizuar jetët tona e bashkë me to edhe rendin shoqëror.

Sot u mbajt mbledhja e fundit për vitin 2023 e Këshillit të Përgjithshëm të Lëvizjes VETËVENDOSJE!. Në këtë mbledhje u diskutua për situatën politike dhe për çështje organizative, u miratua planifikimi buxhetor për 2024, Manifesti i GVV-së, dhe raportuan ministrat e kabinetit qeveritar për punën e bërë gjatë këtij viti.

Kryetari i Lëvizjes, njëherazi Kryeministri, Albin Kurti, në fjalën e tij hyrëse foli për aspekte përgatitore organizative që na duhen në nivelin lokal për zgjedhje lokale që po afrojnë dhe për të arriturat e qeverisë që ai drejton për këto 2 vjet e 9 muaj.

Derisa qeveritë as brenda një mandati të plotë nuk arrijnë t’i rrisin të hyrat buxhetore për 15% ne e kemi arritur këtë brenda një viti kalendarik janar-nëntor 2023, tha Kryeministri, Albin Kurti.

“Me politikat tona zhvillimore, të hyrat buxhetore gjatë periudhës janar–nëntor 2023 kanë arritur vlerën prej 2.6 miliardë euro, të hyrat buxhetore, 340 milionë euro ose 15% më shumë në krahasim me periudhën e njëjtë të vitit të kaluar. A e kuptoni ne po e tejkalojmë veten për 15%. Në vendet e tjera qeveritë as ëndërr s’e shohin dot ta bëjnë brenda mandatit të tyre 15% më shumë se qeveria paraprake në vendin përkatës. Ne vit pas viti, këtë vit 15% më shumë të hyra se vitin e kaluar. Po i them këto se nuk transmetohen siç e dini ju. Për rrjedhojë, buxheti ynë për vitin 2024, i miratuar këtë javë në Kuvend, ka kapur vlerën prej 3 miliardë e 314 milionë euro, i cili paraqet buxhetin më të lartë që ka pasur Kosova ndonjëherë.  Gjithsej, nga fillimi i mandatit në vitin 2021, buxheti është rritur për 860 milionë euro apo 35%.”

Në 2/3 e mandatit kemi dyfishuar numrin e të rinjve të punësuar.

“Është dyfishuar edhe numri i të rinjve të punësuar, ku në fillim të vitit 2021, në fillim të vitit 2021 ishin 28 mijë e 293 persona të rinj, kurse në fund të korrikut 2023 numri i të rinjve të punësuar ishte 60 mijë e 884. Më shumë se dyfish brenda një mandati. Ma gjeni një qeveri jo në Ballkan po edhe në Evropë që e dyfishon, që më shumë se e dyfishon punësimin e të rinjve brenda një mandati për vetëm 2/3 e mandatit”, tha Kryeministri Kurti. 

Më parë nga qeverisja pasuroheshin individët, tash po pasurohet shteti. Nuk ka shtet në rajon e më gjerë që ka rritur BPV për 40% në 5 vjet, siç ka bërë Republika e Kosovës.

“Nga fillimi i mandatit në vitin 2021 buxheti është rritur për 860 milionë euro apo 35%. 2021 – 2024, për 3 vjet, 35% buxhet shtetëror më shumë. Këta para neve e mbani në mend se nuk keni si të mos e mbani në mend se e kemi përjetuar të gjithë në lëkurën tonë, në mendjet tona, e në kockat tona, pasuroheshin individët dhe tash i ka kapë sikleti pse po pasurohet shteti. Se këta janë mësuar individët me u pasuru nga qeverisja. Me neve nuk ndryshojnë kontot individuale por buxheti shtetëror. Viti i ardhshëm është viti i parë ku do të arrihet shifër dyshifrore miliardëshe e BPV-së, do të kalohen 10 miliardë. Në vitin 2020, që ka qenë vit pandemik, BPV ka qenë 6.78 miliardë që i bie një rritje prej 50% e BPV, ndërkaq krahasuar me vitin para-pandemik ku ishte rreth 7 miliardë i bie 40% rritje e BPV për vetëm 5 vjet. Ma gjeni një vend tjetër, jo veç në rajonin e Ballkanit ku BPV i shtetit rritet 40% për 5 vjet. Pra, me neve pasurohet shteti, pasurohet kombi, jo individët e veçantë, por individët qytetar të shtetit tonë në kuptimin universal të fjalës e jo partikular oligarkik të fjalës, prandaj edhe ekziston ky kundërshtim ndaj këtij progresi sepse ekziston një pakicë që po humbë shumë por ne jemi që shumica të fitoj gjithnjë më shumë. Kjo është qeverisja edhe e mirë edhe e drejtë edhe demokratike e juaja e jona e qytetarëve e Lëvizjes VETËVENDOSJE!”, tha Kurti.

Ata që i denigrojnë subvencionet si harxhime koti të buxhetit nuk i kuptojnë nevojat e fëmijëve dhe të pensionistëve, të nënave e të studentëve, të qytetarëve të vendit tonë dhe as nuk i kanë prioritet ato.

“Qeveria jonë me vendime ka shpërndarë 842 milionë euro drejtpërdrejt te qytetarët dhe te familjet e Kosovës. Në këtë shifër përfshihet pakoja më e madhe mbështetëse në rajon sipas Bankës Botërore për të ndihmuar qytetarët në përballje me inflacionin dhe krizën energjetike, si përqindje të Bruto Produktit Vendor, sipas Bankës Botërore. Pra, këtë vit kemi ndarë gati 3 milionë euro për përmirësimin e kushteve të banimit për komunitetet joshumicë në gjendje të rëndë ekonomike dhe sociale. Dhe këtë muaj, do të shtojmë edhe një subvencionim prej 100 eurosh për secilin fëmijë deri në moshën 16 vjeçare, si dhe për secilin pensionist marrës në Republikën tonë. Në lidhje me këtë, si Lëvizje duhet të jemi shumë të qartë për një gjë: Ata që i denigrojnë këto subvencione si harxhim i kotë i buxhetit të shtetit, nuk i kuptojnë nevojat e fëmijëve dhe pensionistëve, të nënave e të studentëve, të qytetarëve të vendit tonë dhe as që i kanë prioritet ato. Ata që i quajnë shtesat për fëmijë “lëmosha”, nuk e kuptojnë obligimin tonë shoqëror për të lehtësuar sadopak barrën e rritjes së një familjeje, barrë e cila bie disproporcionalisht mbi nënat. Ata as nuk e kanë prioritet pavarësinë financiare të grave, 90 mijë prej të cilave kanë hapur llogari bankare për herë të parë në emrat e vet, vetëm për shkak të këtyre shtesave. Që secili fëmijë dhe secili pensionist të përfitojë 100 euro më shumë gjatë festave të fundvitit, falë rritjes sonë rekorde ekonomike dhe buxhetore, nuk quhet lëmoshë por quhet drejtësi.”

Qeverisjet e kaluara për 17 vjet kanë ndërtuar 4  çerdhe për fëmijë. Ne nga marrja e mandatit 4  çerdhe i kemi përfunduar, 26 janë në proces të punës, 3 në proces të adaptimit, 8 në proces të tenderimit. 850% më shumë çerdhe në 2021-2023 sesa në periudhën 2003-2020.

“Nga viti 2003 deri në përfundim të vitit 2020, pra për 17 vite janë ndërtuar gjithsej 4 çerdhe për fëmijë. Për 17 vjet në Kosovë janë ndërtuar 4 çerdhe, 2003-2020. Nga marrja e mandatit tonë 2021 e deri më sot struktura e çerdheve është si vijon: 4 çerdhe të përfunduara, 26 në proces të punës, 3 adaptime të shkollave në çerdhe në proces të punës dhe 8 çerdhe në proces të tenderimit. Sipas kësaj i bie që 850% më shumë çerdhe janë në proces të ndërtimit ose të ndërtuara në periudhën 2021-2023 sesa në periudhën 2003-2020. A po e kuptoni se cila është kritika që na bëhet. Ata nuk mund të flasin për vete prandaj edhe shpifin për neve”. tha Kryeministri, Albin Kurti. 

Fjala e plotë e Kryetarit, Kryeministrit të Republikës së Kosovës, në mbledhjen LIII të Këshillit të Përgjithshëm të Lëvizjes VETËVENDOSJE!:

E nderuara kryetare e Këshillit të Përgjithshëm të Lëvizjes VETËVENDOSJE!, znj. Arbërie Nagavci,
I nderuari nënkryetar i parë i Lëvizjes VETËVENDOSJE!, Glauk Konjufca, njëherazi edhe kryetar i Kuvendit të Republikës së Kosovës,
E nderuara nënkryetare e dytë e Lëvizjes VETËVENDOSJE!, znj. Mrika Limani Myrtaj,
I nderuari Sekretar Organizativ, Alim Rama,
E nderuara koordinatore e komiteteve profesionale, Dejona Mihali,
Të nderuar delegatë të Këshillit të Përgjithshëm të Lëvizjes VETËVENDOSJE!,
Ministra, deputetë, zëvendësministra, kryetarë e nënkryetarë të komunave, asambleistë komunal, përfaqësues të qendrave tona,
Të dashura aktiviste dhe aktivistë, motra dhe vëllezër, zonja dhe zotërinj,
Të nderuar të pranishëm,

Ju falemnderit dhe ju uroj mirëseardhje në mbledhjen LIII të Këshillit të Përgjithshëm të Lëvizjes sonë të përbashkët. Siç jeni në dijeni, kjo është mbledhja jonë e fundit për vitin 2023, gjë që na jep një rast për të reflektuar mbi të arriturat gjatë këtij viti, si dhe synimet e pritjet për vitin tjetër.

Në qershor Lëvizja VETËVENDOSJE! është bërë 18 vjeçare, ndërkaq mbledhjet e Këshillit të Përgjithshëm, organit më të lartë të subjektit tonë, i mbajmë që nga qershori i vitit 2011, atëherë kur u patëm bërë gjashtë vjeç. Kjo do të thotë, që për 150 muaj i kemi mbajtur 53 mbledhje të KP, apo, më shpesh se n‘çdo tre muaj. Vështirë të gjendet ndonjë subjekt tjetër politik jo vetëm në Ballkan që e ka kaq aktiv forumin kryesor të organizatës.

Por, sot, le të mos ia fillojmë nga Këshilli këtu, për të mos humbur kohë me vetveten, e për të kaluar te qendrat e Lëvizjes tonë, për degët tona. Viti 2024 për të gjitha qendrat tona duhet të jetë vit i përgatitjes dhe i mobilizimit për proceset zgjedhore që i kemi para vetes në vitin 2025, me theks të veçantë në aspektin lokal. Shtabet tona lokale, përcaktimi i kandidaturave për asamble e veçmas atyre për kryetare e kryetarë komunash, duhet të jenë në fokus për vitin që po vjen, e këto kërkojnë trajtim të veçantë e pa vonesë.

Kandidati apo pretendenti për kandidat komune nuk mund të quhet i tillë apo e tillë nëse nuk njeh thelbësisht e hollësisht problemet e shumicës së lokaliteteve që përbëjnë komunën përkatëse. Të njihen detajisht e të flitet me kompetencë për shqetësimet e secilit lokalitet.

Përveç takimit të rregullt me strukturën e Pikës, qendra duhet të planifikojë e realizojë aktivitete që lidhen drejtpërsëdrejti me shqetësimet kryesore të lokalitetit përkatës, që mund të jetë lagje a fshat në një komunë të caktuar. Duhet të jemi afër me qytetarin përmes komunikimit dinamik me të. Shumë nga lajmet e vendimet që merr Qeveria jonë, nuk paraqiten fare ose në rastin më të mirë paraqiten pjesërisht në pjesën dërrmuese të spektrit mediatik në vendin tonë. Ne nuk kemi zgjedhur e as nuk do të zgjedhim metodat e pararendëseve tanë për sponzorizime që, në thelb, janë fasadë. Ne kemi komunikuar në vazhdimësi me qytetarët. Nuk e kemi ndërprerë asnjëherë komunikimin direkt me ta.

Prandaj, të arriturat e Qeverisë, vendimet që merren, duhet paraqitur e shpjeguar për qytetarët nga strukturat e Lëvizjes. Vetëm kështu informacioni është objektiv, i drejtë, dhe i padevijuar. Shumë nga vendimet tona, skemat mbështetëse, masat e ndërmarra nga Qeveria kanë prekur drejtpërsëdrejti qytetarin. Jo edhe shumë dihet e flitet për to, sepse dëshirojnë të minohet sa më shumë merita e institucioneve dhe qeverisjes së mirë dhe demokratike. Qëllimi i dikujt mbase mund të jetë ky, por jo dhe i yni. E qëllimi ynë është informimi i drejtë te qytetari.

Identifikimi i problemeve me të cilat ballafaqohen qytetarët është hapi i parë, mbase dhe më i rëndësishmi, por kurrsesi përfundimtari. Për secilën kritikë që ne bëjmë, në cilëndo komunë, duhet të ekzistojë, si minimum, një alternativë e zgjidhjes. Pra, grumbullim e kategorizim problematikash në bazë të vizitave në terren së pari, e përpunim, analizë, konkluzione e definim zgjidhjesh pas saj. Kështu duhet të funksionojmë, sepse vetëm kështu është e mundur të vijmë në shprehje në mënyrë serioze dhe bindëse.

Duhet filluar një fushatë anëtarësimesh në qendrat tona, meqë ka shumë njerëz që dëshirojnë të bashkohen në Lëvizje, vetëm duhet që ne të shkojmë tek ata dhe të krijojmë hapësirën e nevojshme. Kur qëllimi është i përbashkët, ndërlidhja është lehtësisht e arritshme.

Këtë ndërlidhje e ofron edhe Sekretariati për Emancipim Politik nëpërmjet organizimit të shkollës politike në tri nivelet e saj, kështu duke iu ofruar aktivistëve tanë mundësi që të organizohen rreth forumeve të diskutimit për tema të filozofisë e shkencës politike, historisë e ekonomisë politike përmes nivelit teorik. Po ashtu, është zhvilluar edhe niveli ekzekutiv për asambleistët tanë në komuna të Republikës sonë, ndërkaq muajt e fundit ka nisur niveli organizativo-politik i shkollës politike, i cili mbahet në qendrat tonat ku diskutohet për historikun e Lëvizjes dhe qasjen tonë për tema me relevancë politike kombëtare dhe ndërkombëtare. Sekretariati për Emancipim Politik i është përkushtuar punës me aktivistët tanë në mënyrë që ata të jenë të vetëdijshëm për rëndësinë e aktivizmit për kauzat politike në të cilat ne besojmë. Përveç organizimit me shkollën politike, ata kanë organizuar edhe klubin e librit e shfaqjen e filmave dhe dokumentarëve. Kjo është bërë gjithnjë për të vënë në pah faktin që puna për barazi e drejtësi, shoqëri më të emancipuar, e shtet funksional nuk kryhet pa qenë së pari të vetëdijshëm për politikat që kanë shkaktuar një shtet jofunksional e një shoqëri që nuk pranon mendimin ndryshe.

Demokracia, liria e fjalës e mendimit, syri analitik e kritik për rrethanat tona janë forcë shtytëse për punën që e bëjmë me aktivistët tanë. Kjo punë me aktivistët duhet të vazhdojë edhe në aspektin lokal në krijimin e ambientit më të mirë në lagjet urbane e fshatrat tona.

Për ta arritur këtë, garimi ynë në nivelin lokal, duhet të jetë me ekip, të përgatitur e adekuat, ndarë në fushat e dikasteret që mbulojnë. Ata, në rastin më të keq, duhet të tregojnë që janë diametralisht më kompetentë e të informuar sesa ekuivalenca e tyre në ekzekutivin lokal. Profesionisti ynë për bujqësinë, ta zëmë, duhet ta njohë këtë fushë, minimumi më mirë sesa drejtori aktual i bujqësisë në komunën ku ne nuk jemi duke qeverisur.

Si model për sukseset lokale, nuk kemi përse të shkojmë diku tjetër. I kemi në shtëpinë tonë, i kemi këtu, me neve. Pra i kemi katër kryetarët shembullorë të komunave, pesë kryetarët tanë me Erden Atiqin në Mitrovicën e veriut, gjashtë kryetarët tanë me Lulzim Hetemin në Leposaviq, të cilët janë shembull në qeverisje, janë edhe shembull organizimi për fitoret e arritura në pranverën e vitit 2021. Pra Gjilani, Besiana, Kamenica dhe Shtimja janë komuna të cilat duhet të analizohen e studiohen me kujdes dhe dashamirësi nga të gjithë aktivistët tanë anembanë qendrave të Kosovës. Njohës të mirë të problematikave të qytetarëve, ofrues të mirë të zgjidhjeve të problemeve, besues mjaftueshëm në kauzën që besuan e të pandalshëm në punë, prandaj dhe fitues dje e drejtues të suksesshëm komunash sot. Këtë model të kryetarëve tanë, të komunave në Kosovë duhet ndjekur dhe për këtë duhet punuar tejmase të gjithë aktivistët e VETËVENDOSJE!-s.

Në këtë kuadër, atë të përgatitjeve për nivelin lokal, ne tashmë kemi filluar takimet e para me drejtuesit tanë të qendrave, drejtuesit në qendra të dy strukturave të reja GVV dhe RVV, drejtuesit e grupeve të këshilltarëve komunalë. E përmes bisedave të hapura e produktive dhe projekteve bashkëpunuese edhe me palë të treta siç janë organizata të ndryshme me të cilat bashkëpunojmë si Lëvizje, do të kemi një pasqyrë reale të situatës organizative në qendra, por edhe situatës politike e gjendjes së përgjithshme në secilën komunë. Bashkërisht, do të vendosim më të mirën, për të patur nesër alternativën më të mirë qeverisëse lokale, që e duan dhe iu duhet qytetarëve tanë. Është e domosdoshme që qeverisja që po e karakterizon nivelin qendror të përcillet e degëzohet në komuna, në nivelin lokal. Vetëm kështu, ndryshimi i gjithmbarshëm e progresi shoqëror, do të marrë drejtimin e duhur dhe qytetarët pa pengesa do të marrin trajtimin adekuat të shqetësimeve që hasin në përditshmërinë e tyre.

Gjatë vitit 2023, dy strukturat e reja të Lëvizjes, që porsa përmenda, Gratë për VETËVENDOSJE! dhe Rinia për VETËVENDOSJE! kanë shënuar progres shumë të mirë.

Fatkeqësisht, jetojmë në një kohë kur dhuna ndaj grave dhe vajzave po shfaqet në forma më tmerruese të mundshme. Ndryshimi thelbësor dhe i domosdoshëm i shoqërisë nuk mund të arrihet nga lart-poshtë, por nga poshtë-lart, përmes organizatave të cilat bashkojnë dhe mobilizojnë gratë dhe vajzat aktiviste, sikurse Gratë për VETËVENDOSJE!.

Qeverisja dhe niveli i lartë, në fakt është vetëm infrastrukturë e ndryshimeve që vijnë nga poshtë sepse nga poshtë vjen edhe demokracia edhe e vërteta.

Të dashur aktivistë e aktiviste, por me këtë rast posaçërisht po iu drejtohem aktivistëve që ta kenë parasysh, se në shoqërinë tonë, por jo vetëm, kur gratë kanë sukses, ato janë përpjekur e munduar dyfish në shumë se burrat e shpesh edhe përkundër tyre. Ndërkaq, kur burrat kanë sukses ata zakonisht janë ndihmuar nga gratë. Prandaj, teksa punojmë për të realizuar dhe festojmë të arriturat, le të kemi këtë gjë, të gjithë së bashku, secili prej nesh, parasysh.
Edhe Rinia për VETËVENDOSJE! ka shënuar progres të rëndësishëm në vitin e saj të parë të funksionimit. Energjia dhe përkushtimi i jashtëzakonshëm i anëtarëve të kësaj strukture të re, na ka bindur plotësisht se të rinjtë nuk janë vetëm e ardhmja e Kosovës, por e tashmja e saj.

Një ndër prioritetet e RVV-së ka qenë krijimi i një ambienti të hapur për diskutime të lira dhe ide inovative. Njëkohësisht, ajo i ka dhënë fokus të veçantë procesit të anëtarësimit në Organizatën e Rinisë Socialiste Ndërkombëtare (IUSY) dhe Rininë Evropiane Socialiste (YES). Sivjet ka vendosur dhe konsoliduar kontaktet me të dy organizatat, me shpresë që viti 2024 do të sjellë rezultate konkrete.

Për bindjen time, suksesi më i madh i RVV-së gjatë këtij viti, ka qenë organizimi i Konferencës së Rinisë “ANAMORAVA 2023”. Kjo konferencë ka bashkuar të rinj nga i gjithë vendi për të diskutuar çështje të rëndësishme politike, shoqërore, ekonomike, kulturore, kombëtare. Diskutimet dhe panelet kanë ofruar një platformë për shkëmbimin e ideve dhe krijimin e strategjive inovative për të ardhmen e vendit tonë të përbashkët.

Mes të arriturave më të rëndësishme të Lëvizjes sivjet kanë qenë edhe ato të Sekretariatit për Marrëdhëniet Ndërkombëtare.

Së pari, me datë 19 janar të këtij viti, Lëvizja VETËVENDOSJE! ka formalizuar zyrtarisht bashkëpunimin me social-demokratët e Zvicrës, duke nënshkruar një memorandum bashkëpunimi në Cyrih. Në të njëjtën kohë, janë intensifikuar diskutimet për të formalizuar bashkëpunimin edhe me partinë social demokrate në Austri, si dhe me SPD-në e Gjermanisë.
Në anën tjetër, janë dërguar mbi 30 letra zyrtare apo telegrame drejt social demokratëve anembanë botës.

Ndërkohë, gjatë kësaj periudhe Lëvizja jonë ka qenë pjesëmarrëse në disa organizime jashtë vendit, më se shumti ndonjëherë, e nga të cilat më të rëndësishmet janë:

• Kongresi i Internacionales Socialiste në Madrid,
• 2 vizita në Zvicër,
• Kongresi i 80-të i PS-së në Marsejë të Francës,
• Akademia rajonale “Anti Korrupsion” në Slloveni,
• Pjesëmarrja në Friends of Western Ballkans në Selanik të Greqisë,
• Pjesëmarrja në kampin veror të LSDM në Ohër,
• Takim me SPD në North Rhine-Westphalia të Gjermanisë,
• Konferenca vjetore e Laburistëve në Liverpool të Mbretërisë së Bashkuar,
• Mbledhja për Ballkan nga Internacionalja Socialiste në Tiranë,
• Forumi Socio-Ekologjik në Shkup të Maqedonisë së veriut,
• Kongresi i PES (Party of European Socialists) në Malaga të Spanjës,
• Seminari apo mbledhja e grupit parlamentar të parlamentit Evropian, S&D, me temën “Zgjerimi i BE” në Bruksel,
• Kongresi i PS të Shqipërisë në Tiranë,
• Kongresi i SPD-së së Gjermanisë në Berlin, dhe
• PES – mbledhja para-përgatitore me liderët e BE-së për Këshillin Evropian, në Bruksel.

Në secilën nga këto vizita jashtë vendit, përveç aktiviteteve kryesore janë zhvilluar edhe takime të tjera me social-demokratët nga rajoni dhe më gjerë.
Në këtë rast duhet të falënderojmë posaçërisht aktivistët tanë në mërgatë dhe bashkatdhetarët tanë në përgjithësi, të cilët po luajnë një rol tejet të rëndësishëm për afirmimin e Lëvizjes VETËVENDOSJE! në Evropën Perëndimore e më gjerë. 10% e anëtarësisë tonë janë në mërgatë, dhe ata kanë rol të madh edhe për Lëvizjen tonë, ashtu siç kanë për shtetin e për kombin tonë, dhe që të gjithë, natyrisht i mirëpresim me padurim për këto festa të fundvitit.

Gjatë kësaj periudhe është intensifikuar diskutimi me Internacionalen Socialiste ku edhe kemi parashtruar kërkesën tonë për avancim të statutit tonë.
Më 12 tetor të këtij viti, në mbledhjen e Kryesisë së PES-it, është votuar në parim PËR anëtarësinë e Lëvizjes VETËVENDOSJE!. Vetëm një muaj më vonë, në Kongresin e Përgjithshëm të këtij rrjeti, në Malaga të Spanjës, u votua dhe u miratua anëtarësimi i Lëvizjes.

Sikurse çdo vit, kemi pasur bashkëpunim të ngushtë me organizatat ndërkombëtare të cilat veprojnë në Kosovë, e posaçërisht sikurse FES, NDI dhe IRI. Përmes këtij bashkëpunimi kemi përfituar një numër të konsiderueshëm të punëtorive, akademive dhe organizimeve të tjera.

Në zyrat e Lëvizjes VETËVENDOSJE!, kemi pritur disa delegacione nga jashtë si: delegacioni nga SPD-ja e Gjermanisë, delegacioni i SP-së Zvicrës, grupe gazetarësh nga Amerika, Mbretëria e Bashkuar, Australia dhe Kanadaja të cilët kanë shërbyer për mediat prestigjioze si BBC e New York Times, drejtoren ambasadore të NDI për Kosovë, drejtorin e FES për Kosovë dhe drejtorin rajonal të FES, si dhe drejtorin rajonal për Evropë dhe nënkryetarin e IRI.

Siç e kam përmendur më herët, një ndër detyrat kryesore të çdo anëtari të Lëvizjes sonë është për të komunikuar, në mënyrën më të qartë dhe të drejtpërdrejtë të mundshme, të arriturat e Qeverisë së Lëvizjes VETËVENDOSJE!. Kur flasim për të arriturat e Lëvizjes sonë në vitin 2023, pra nuk mund të lihen anash arritjet e Qeverisë sonë. Me 14 shkurt 2021, Lëvizja VETËVENDOSJE! ka shënuar një fitore historike, të paparë në Kosovën e pasluftës, me dy premtime: drejtësia dhe punësimi. Ose, me fjalë të tjera: avancimi i demokracisë, sundimit të ligjit dhe të drejtave të njeriut në njërën anë, dhe zhvillimi socio-ekonomik që rritjen e shpërndanë për të gjithë qytetarët, në anën tjetër.

Tash, në fund të vitit 2023, pas dy të tretave të mandatit tonë katërvjeçar, sukseset e Qeverisë sonë në këto dy drejtime janë më të dukshme e të pranishme se kurrë më parë.

Për sa i përket drejtësisë: Këtë vit, dogana ka iniciuar 83 kallëzime penale apo 43.1% më shumë sesa në periudhën e njëjtë të vitit paraprak. Pra, ne krahasohemi me veten tonë në vitin që shkoi, ndërkohë që jemi të pakrahasueshëm me qeveritë para nesh. Prej fillimit të mandatit deri tash, 30.6 milionë euro mall janë konfiskuar nga operacionet e Doganës së Kosovës. 34 rrugë ilegale janë mbyllur, prej tyre 26 në veri të vendit. 16 laboratorë të drogës janë shkatërruar, 9 prej tyre po ashtu në veri. Mbi 2.2 tonë substanca narkotike janë konfiskuar dhe mbi 14 milionë euro janë sekuestruar nën dyshimin e keqpërdorimeve dhe shpëlarjes së parave.

Progresi ynë në fushën e drejtësisë është konfirmuar edhe nga vëzhgues të pavarur ndërkombëtarë. Gjatë mandatit tonë, jemi përmirësuar për 20 vende në Indeksin e Luftimit të Korrupsionit të Transparency International dhe 22 vende në Indeksin e Lirisë së Mediave të Reporters Without Borders. Jemi të parët në Ballkanin Perëndimor për Demokraci Elektorale sipas V-Dem Institute, si dhe të parët në Ballkanin Perëndimor, të dytët në Evropë dhe të tretët në botë për përmirësim në të drejtat politike dhe liritë civile sipas Freedom House.

Sivjet kemi shënuar progres të dukshëm edhe në kornizën legjislative për drejtësi. Amendamentet kushtetuese dhe Projektligji për Vetingun në Drejtësi u finalizuan. Janë miratuar Ligji për Byronë Shtetërore për Verifikimin dhe Konfiskimin e Pasurisë së Pajustifikuar dhe Ligji i ri për Prokurorinë Speciale të Kosovës për luftën kundër korrupsionit. Me zbatimin e këtyre ligjeve, lufta jonë kundër korrupsionit, sidomos në sistemin e drejtësisë dhe mes zyrtarëve të lartë politikë, do të kalojë në një nivel edhe më të lartë.

Progresi ynë në fushën e drejtësisë, veçse e ka fuqizuar zhvillimin ekonomik të vendit. Anti korrupsionin e kemi bërë rritje, lirinë e kemi bërë zhvillim. Individët dhe bizneset janë më të gatshëm të paguajnë tatime, kur e dinë se paratë e tyre do të shpenzohen për të mirën e vendit dhe kurrsesi për të mbushur xhepat e politikanëve të korruptuar dhe familjarëve të tyre. Po ashtu, kompani të huaja janë më të gatshme të investojnë në Kosovë, kur e dinë se nuk do të detyrohen të paguajnë ryshfet për të bërë biznes në vendin tonë.

Nuk është për çudi, pra, që ekonomia e Kosovës është më e fortë se kurrë, pavarësisht krizave të shumëfishta, si për bizneset, ashtu edhe për familjet dhe qytetarët e thjeshtë. Qarkullimi i bizneseve gjatë periudhës janar–tetor 2023 ka arritur në vlerën 15.83 miliardë Euro, 6.9% më shumë në krahasim me periudhën e njëjtë të vitit të kaluar. Pra, ne krahasojmë vitin tonë me vitin tonë të kaluar, dhe identifikojmë po ashtu sukses të dukshëm, progres të vazhdueshëm. Vlera e mallrave në eksport për periudhën janar–nëntor 2023 ka qenë 756.9 milionë €, e le ta krahasojmë këtë me vitin 2019, 441 milionë euro më shumë ose 139%! Përqindjet te qeverisja e Lëvizjes VETËVENDOSJE! kanë kuptim veç kur e krahason vitin tonë me vitin tonë, përndryshe si të shkosh me krahasu me diku atje 2019, 2018 e teposhtë, shkon 100 e sa përqind, 200 e sa përqind kjo tregon ku kemi qenë dhe kjo tregon se sa shpejt e shumë po ecim përpara.

Në mandatin tonë deri tash, raporti i eksporteve ndaj importeve është rritur nga 1 me 9 në 1 me 6, vetëm brenda mandatit tonë. Në vendet e tjera të zhvilluara, qeveritë për mandatin e tyre përpiqen, së pari të mos bëhet me keq, preokupim kryesor e kanë mos me u bë më keq, e mandej të kenë përmirësime inkrementale minimale, ndërkohë që shihni shifrat e qeverisjes tonë, më pak se tre vjeçare.

Është dyfishuar edhe numri i të rinjve të punësuar, ku në fillim të vitit 2021 ishin 28,293 persona, të rinj, kurse në fund të korrikut 2023 numri i të rinjve të punësuar ishte 60,884, më shumë se dyfish brenda një mandati. Ma gjeni një qeveri, jo në Ballkan po edhe në Evropë që e dyfishon, që ma shumë se e dyfishon punësimin e të rinjve, brenda një mandati, për vetëm dy të tretat e mandatit.

Mbrëmë, e morëm të gjithë lajmin e mirë se, me votat e deputetëve të mazhorancës, grupit tonë parlamentar, kemi përmbushur edhe një premtim të kamotshëm tonin, duke miratuar Projektligjin për Fondin Sovran. Me themelimin e këtij Fondi, do të kalojmë nga një sistem i privatizimit të aseteve shtetërore, sistem i cili më shumë ka shërbyer interesat e ngushta të individëve të pushtetshëm, në një institucion që punon për interesat e përgjithshme të të gjithë qytetarëve të Kosovës. Fondi Sovran do t’i forcojë ndërmarrjet publike, do të sjellë një cikël të ri investimesh në vend dhe do të shtojë qarkullimin e kapitalit investiv në ekonominë tonë.

Për dy dekada pas luftës, ekonomia e Kosovës, burimet e saj janë shndërruar në plaçkë për zhvatje, me një proces brutal privatizimi të shkapërderdhjes centrifugale. Nga ky proces i dy dekadave centrifugë po kalojmë në fazën centripetale, ku vendi ynë edhe ekonomikisht, jo vetëm historikisht, politikisht, kulturalisht, do të peshoj rëndë, gjithnjë e më rëndë. Pra, nga një tendencë dy dekadëshe centrifugale, Fondi Sovran është thelbi i kalimit në fazën centripetale, ku rritet graviteti i vendit tonë edhe si ekonomi kombëtare. Ne do të jemi shembull për këtë, për të gjithë shqiptarët në Ballkan, do të jemi shembull edhe për shtetet e qeveritë e tjera, jo vetëm në kontinentin tonë. Pra, kalimi nga centrifugalja dy dekadëshe në një ekonomi ku rritet graviteti i saj në shtetin tonë. Fondi Sovran e bënë reversibil procesin e shkapërderdhjes ekonomike që ka ekzistuar në të kaluarën.

Me politikat tona pro-zhvillimore, të hyrat buxhetore gjatë periudhës janar–nëntor 2023 kanë arritur vlerën prej 2.6 miliardë eurosh, 340 milionë Euro ose 15% më shumë në krahasim me periudhën e njëjtë të vitit të kaluar. A e kuptoni, ne po e tejkalojmë veten për 15%. Në vendet e tjera, qeveritë as ëndërr se shohin dot ta bëjnë brenda mandatit të tyre 15% më shumë se qeveria paraprake në vendin përkatës. Ne, year on year, vit pas viti, këtë vit kemi 15% më shumë të hyra sesa vitin e kaluar. Po i them këto sepse, nuk transmetohen, siç e dini ju. Për rrjedhojë, buxheti ynë për vitin 2024, i miratuar këtë javë në Kuvend, ka kapur vlerën prej 3 miliardë e 314 milionë euro, i cili paraqet buxhetin më të lartë që ka pasur Kosova ndonjëherë. Gjithsej, nga fillimi i mandatit në vitin 2021, buxheti është rritur për 860 milionë euro apo 35%. 2021 – 2024, për tri vjet, 35% buxhet shtetëror më shumë!

Këta para neve, e mbani në mend se nuk keni qysh mos me e mbajtë në mend, se e kemi përjetuar të gjithë në lëkurën tonë, në mendjet tona e në kockat tona, pasuroheshin individët dhe tash i ka kapur sikleti pse po pasurohet shteti, se këta janë mësuar individët me u pasuru nga qeverisja. Me neve nuk ndryshojnë kontot individuale por buxheti shtetëror.

Viti i ardhshëm është viti i parë ku do të arrihet shifër dyshifrore, miliardëshe e BPV, do të kalohen 10 miliardë euro. Në vitin 2020 që ka qenë vit pandemik BPV ka qenë 6.78 miliardë, që i bije një rritje prej 50% e BPV, ndërkaq krahasuar me vitin para pandemik, ku ishte rreth 7 miliardë, i bije 40% rritje e BPV për vetëm 5 vjet. Ma gjeni një vend tjetër, jo vetëm në rajonin e Ballkanit, ku BPV i shtetit, rritet 40% për 5 vjet? Pra, me neve pasurohet shteti, pasurohet kombi, jo individët e veçantë, por individët qytetarë të shtetit tonë, në kuptimin universal të fjalës, e jo partikular oligarkik të fjalës. Prandaj edhe ekziston ky kundërshtim ndaj këtij progresi sepse ekziston një pakicë që po humb shumë, por ne jemi që shumica të fitojë gjithnjë e më shumë. Kjo është qeverisja edhe e mirë, edhe e drejtë, edhe demokratike e juaja, e jona, e qytetarëve, e Lëvizjes VETËVENDOSJE!.

Të dashur anëtarë,

Këto janë të arritura, për të cilat ne të gjithë duhet të jemi krenarë, duhet t’i theksojmë e t’i afirmojmë ato. Mirëpo, nuk duhet të harrojmë kurrë, se edhe rritja e të hyrave edhe buxheti në vetvete nuk janë vlera të vetëmjaftueshme. Përkundrazi, janë vetëm mjete për t’u ri-investuar në ekonominë dhe shoqërinë tonë, për të mirën e të gjithëve dhe sidomos për ata të cilët kanë nevojë më së shumti. Në një shtet demokratik, qytetarët kanë të drejtë ta dinë se si po i harxhojmë paratë e tyre. Dhe ne, si Qeveria e tyre, e kemi për detyrë për t’iu treguar atyre.

Së pari, deri më sot, Qeveria jonë, me vendime ka shpërndarë 842 milionë euro drejtpërdrejt te qytetarët dhe te familjet e Kosovës. Në këtë shifër përfshihet pakoja më e madhe mbështetëse në rajon, sipas Bankës Botërore, për të ndihmuar qytetarët në përballje me inflacionin dhe krizën energjetike, si përqindje të Bruto Produktit Vendor. Këtë vit kemi ndarë gati 3 milionë euro për përmirësimin e kushteve të banimit për komunitetet joshumicë në gjendje të rëndë ekonomike dhe sociale. Dhe këtë muaj, do të shtojmë edhe një subvencionim prej 100 eurosh për secilin fëmijë deri në moshën 16 vjeçare, si dhe për secilin pensionist në Republikën e Kosovës.

Në lidhje me këtë, si Lëvizje duhet të jemi shumë të qartë për një gjë: ata që i denigrojnë këto subvencionime si harxhim i kotë i buxhetit të shtetit, nuk i kuptojnë nevojat e fëmijëve e pensionistëve, të nënave e studentëve, të qytetarëve të vendit tonë, dhe as që i kanë prioritet ato. Ata që i quajnë shtesat për fëmijë “lëmosha”, nuk e kuptojnë obligimin tonë shoqëror për të lehtësuar sadopak barrën e rritjes së një familjeje, barrë e cila bie disproporcionalisht mbi nënat. Ata as nuk e kanë prioritet pavarësinë financiare të grave, 90 mijë prej të cilave kanë hapur llogari bankare për herë të parë në emrat e vet, vetëm për shkak të këtyre shtesave. Që secili fëmijë dhe secili pensionist të përfitojë 100 euro më shumë gjatë festave të fundvitit, falë rritjes sonë rekorde ekonomike dhe buxhetore, nuk quhet lëmoshë por quhet drejtësi.

Përveç mbështetjes së familjeve dhe qytetarëve të thjeshtë, Qeveria jonë në vitin 2023 ka vazhduar të mbështesë bizneset e Kosovës. Kemi miratuar Strategjinë për Zhvillim Industrial dhe Mbështetje të Biznesit 2030 dhe kemi arritur marrëveshje për qasje në fondin 4.2 miliardë euro të BE-së për sektorin privat për vitet 2021–2027. Po ashtu, kemi përkrahur biznese përmes miratimit të ligjeve të reja dhe mbështetjes financiare për 418 biznese dhe Fondin Kosovar për Garanci Kreditore.

Njëkohësisht, kemi ofruar subvencionime për bizneset e vendit për të rritur nivelin e punësimit në sektorin privat. Nga masa “Qeveria për Familjet” gjatë periudhës janar–tetor 2023 janë ndërmjetësuar 1,365 punëkërkues. Nga masa “Mbështetja për punësim të grave”, e cila është rihapur në dhjetor 2022, kanë përfituar 522 gra. Dhe përmes skemës Superpuna, janë punësuar 8,496 të rinj (4,311 vajza dhe 4,185 djem) në gjithsej 6,401 biznese.

Edhe në fushën e bujqësisë, mbështetja nuk ka munguar. Gjatë mandatit tonë është rritur deri në 216% përkrahja me subvencione. Dhe sivjet është hartuar dhe miratuar Programi për Pagesa Direkte për vitin 2023, me aplikimin e 32,728 fermerëve, të cilëve pritet t’u shpërndahen 60.6 milionë euro në mbështetje.

Viti 2023 ka qenë vit i infrastrukturës së transportit. Kemi nisur projekte infrastrukturore me Shqipërinë, Maqedoninë e Veriut dhe Malin e Zi, siç janë hekurudha Prishtinë–Durrës, rruga Prizren–Tetovë dhe projektet rrugore që lidhin Kosovën dhe Malin e Zi, Pejë-Rozhajë dhe Deçan-Plavë. Njëkohësisht, kemi vazhduar me ndërtimin dhe asfaltimin e rrugëve brenda Kosovës, siç janë autostrada Gjilan–Prishtinë, rruga Prishtinë–Podujevë, rruga Prishtinë–Mitrovicë dhe rrugë në veri të vendit.

Viti 2023 ka qenë po ashtu vit i madh për kulturën, rininë dhe sportin, një vit në të cilin u rikthye festivali i këngës në RTK; Kosova u shpall nikoqire e Lojërave Mesdhetare 2030, ngjarja më e madhe multi-sportive në historinë e vendit tonë, e ku do të marrin pjesë shtatë komuna të Kosovës me në krye Prishtinën, dhe Durrësi; si dhe vendi ynë u anëtarësua në asociacionin për të rinjtë EYCA, i cili do të sjellë benefite, brenda dhe jashtë Kosovës, për të gjithë të rinjtë tanë deri në moshën 30.

Investime dhe reforma kyçe kemi bërë në tre prej sektorëve që janë dëmtuar më së shumti nga dy dekada të keqqeverisjes e të zhvatjes: energjia, shëndetësia dhe arsimi. Në vitin 2023, kemi ecur përpara në rrugën e gjatë të rehabilitimit të këtyre sektorëve.

Sektori i energjisë nuk mund të rehabilitohet pa investuar në përmirësimin e sistemit ekzistuese të transmetimit, në burime të reja të energjisë, sidomos ato të ripërtëritshme, si dhe në rritjen e efiçiencës energjetike. Gjatë vitit 2023, Qeveria ka shënuar progres në të gjitha këto drejtime. Kemi arritur marrëveshjen prej 61 milionë Euro me Bankën Gjermane KfW për Parkun Solar 100 MW në KEK, si dhe me BERZh për Projektin e Ngrohtores Solare në Prishtinë në vlerë prej 23.2 milionë euro. Pastaj, është aprovuar Projektligji për Ratifikimin e Marrëveshjes së Kredisë me KOSTT dhe KfW për projektin “Zhvillimi i Sektorit të Energjisë, faza VII”, i cili e ka për qëllim përmirësimin e sistemit të transmisionit në Kosovë. Për të parandaluar dhe lehtësuar kriza energjetike në të ardhmen, kemi investuar 30 milionë euro në efiçiencën energjetike, duke përfshirë 10 milionë euro për subvencionimin e qytetarëve për blerjen e pajisjeve shtëpiake dhe të ngrohjes.

Në fushën e shëndetësisë, këtë vit kemi ndërmarrë një hap të rëndësishëm për të ndalur keqpërdorimet në tregun e barnave, duke miratuar Ligjin për çmimin e produkteve medicinale në Kosovë. Ky ligj synon të mbrojë qytetarët nga çmimet e larta të barnave dhe të ofrojë qasje të përballueshme në ilaçe. Kemi përditësuar Listën e Barnave Esenciale me buxhetin e dyfishuar për 60 milionë euro, duke përfshirë 70 produkte të reja dhe rritjen e buxhetit për Kujdesin Shëndetësor. Dhe kemi investuar mbi 5 milionë euro në pajisje dhe autoambulanca, për të përmirësuar infrastrukturën dhe shërbimet shëndetësore, si dhe për të reduktuar listat e pritjes nëpër spitale.

Në fushën e arsimit, në vitin 2023, kemi miratuar Ligjin për Edukimin në Fëmijërinë e Hershme në Kosovë, i cili rregullon edukimin cilësor nga lindja deri në moshën 6-vjeçare, si dhe e bën të obligueshëm atë nga 2024. Kemi vazhduar përmirësimin e infrastrukturës arsimore, me çerdhe të reja, shkolla e salla të edukatës fizike, rinovim dhe furnizim me inventar dhe pajisje të shumta për shkolla dhe salla sportive. Nga viti 2003 deri në përfundim të vitit 2020, pra për 17 vite, janë ndërtuar gjithsej 4 çerdhe për fëmijë. Për 17 vjet në Kosovë janë ndërtuar 4 çerdhe, në periudhën 2003-2020. Nga marrja e mandatit tonë 2021 e deri më sot, struktura e çerdheve është si vijon:

-4 çerdhe të përfunduara,
-26 në proces të punës,
-3 adaptime të shkollave në çerdhe në proces të punës, dhe
-8 çerdhe në proces të tenderimit

Sipas kësaj i bije që 850% më shumë çerdhe janë në proces të ndërtimit ose të ndërtuara në periudhën 2021-2023 sesa në periudhën 2003-2020. A po e kuptoni tash se cila është kritika që na bëhet? Ata nuk mund të flasin për vete, prandaj edhe shpifin për neve.

Mbi të gjitha e kemi rritur numrin e bursave, ne kemi nevojë që sa më shumë qytetarë të studiojnë, të mësojnë, të bëjnë kërkime shkencore, të ngriten profesionalisht e intelektualisht, e sidomos vajzat. Bursat STEM për vajza, për Shkencë, Teknologji, Inxhinieri dhe Matematikë, ja si janë ngritur në mandatin tonë, se më herët nuk mund të krahasohemi. 1365 bursa në vitin 2021, në vitin 2022 për vajzat në STEM, 1383 bursa, dhe, sivjet për vajzat që studiojnë në STEM, 1882 bursa. Para neve, secilin vit, zero. Pra gjithsej në 2021-2023, 4630 bursa vetëm për vajza në Shkencë, Teknologji, Inxhinieri dhe Matematikë, pra për vetëm 3 vjet, e më përpara, për më shumë se 20 vjet, zero!

Ne jemi të përqendruar, me ndihmën e mërgatës tonë, të dijes së tyre dhe përvojës së tyre në lidhjen e tregut të punës me arsimin profesional, dhe kemi shtrirë programin e arsimit dual te 12 profile në 21 shkolla, te 14 komuna, me 920 nxënës. Ashtu që për një diplomë shkolle të ketë një vend pune, e jo të kemi punëtor pa asnjë diplomë e certifikatë, e në anën tjetër aq shumë të diplomuar të papunë. Urëzimi midis tregut të punës dhe arsimimit profesional është jetik për ekonominë dhe për shoqërinë e vendit tonë.

Të nderuar delegatë të Këshillit të Përgjithshëm,

Pas sulmit terrorist e kriminal të 24 shtatorit të sponsoruar dhe të orkestruar nga Serbia dhe rënies së rreshterit të policisë, heroit të Kosovës, Afrim Bunjakut, nuk ka sektor më të rëndësishëm sesa ai i sigurisë, prej kërcënimeve të jashtme si dhe të brendshme. Për këtë arsye, Qeveria jonë sivjet ka investuar gjithsej 200 milionë euro për mbrojtjen e vendit, një shumë që tejkalon 2% të Bruto Produktit Vendor, duke plotësuar kriterin për shtetet anëtare të NATO-s. Forca e Sigurisë së Kosovës, gjatë vitit 2023, ka realizuar 198 trajnime dhe 22 ushtrime fushore, si dhe ka bërë blerje strategjike ushtarake prej 30 milionë euro. Dhe, për të forcuar edhe më tej sigurinë e vendit, kemi rekrutuar 850 policë të rinj, me 500 rekrutë të rinj të paraparë për vitin e ardhshëm 2024, si dhe 629 ushtarë të rinj, me 600 rekrutë të rinj për ushtrinë tonë të paraparë për vitin 2024.

Bashkë me këto investime në sektorin e sigurisë, Kosova në vitin 2023 ka shënuar progres të jashtëzakonshëm në forcimin dhe përmirësimin e statusit dhe pozitës ndërkombëtare të shtetit tonë. Sivjet, ka ecur përpara aplikimi ynë për t’u anëtarësuar në Këshillin e Evropës, ku Komiteti i Ministrave i Këshillit të Evropës ka votuar pro anëtarësimit tonë me 24 prill. Dhe, me 18 prill 2023, pra më pak se një javë para kësaj date, procesi i liberalizimit të vizave për Kosovën përfundoi me sukses: prej 1 janarit të vitit 2024, qytetarët tanë, më në fund, do të gëzojnë lëvizjen e lirë në Bashkimin Evropian. Pra, përveç se ne plotësojmë zotimet e premtimet tona, qeveria jonë është ajo që i plotëson edhe premtimet e zotimet e rrejshme të atyre para neve. Ata flisnin e bërtisnin duke shpifur e u zotuar për gjëra qe nuk realizoheshin asnjëherë, ndërkohë që ne zotohemi dhe i plotësojmë ato tonat, por për të mirën e qytetarëve edhe kur ka pasë ndonjë zotim të mirë të atyre të këqijve, ne gjithashtu e plotësojmë.

Nuk e kemi lënë anash as mërgatën tonë: ambasadorët dhe përfaqësuesit tanë të përditshëm nëpër vendet ku jetojnë. Sivjet kemi vazhduar programin “Citizen Diplomacy Fellowship”, përmes të cilit dhjetëra profesionistë të rinj nga mërgata angazhohen dhe kontribuojnë në institucione vendore. Këtë vit po ashtu është mbajtur edicioni i parë i Forumit Ndërkombëtar “Ulpiana”, në të cilin u shkëmbyen ide inovative të përfshirjes dhe angazhimit të mërgatës, duke dëgjuar edhe praktikat më të mira nga vende të tjera demokratike nëpër botë.

Mbase e arritura më e madhe e Qeverisë në rrafshin ndërkombëtar sivjet, ka qenë Marrëveshja Bazike e datës 27 shkurt ndërmjet Kosovës dhe Serbisë, bashkë me aneksin e zbatimit të datës 18 mars. Në qeveri të kaluara, flitej për ndarjen e Kosovës dhe nënshkruheshin marrëveshje të dëmshme për Kosovën që ishin edhe antikushtetuese e antiligjore, e të cilat Serbia edhe sot e kësaj dite insiston që të zbatohen. Në dialogun në Bruksel, unë nuk kam pasur e nuk kam vështirësi të cilat nuk janë trashëgimi e tyre. Por, me Qeverinë e Lëvizjes VETËVENDOSJE!, ne kemi arritur një marrëveshje të re, e cila flet për integritetin territorial të Kosovës si shtet sovran dhe i barabartë, dhe të cilën Serbia po refuzon ta nënshkruajë dhe mundohet vazhdimisht që t’i ikë, madje këtë javë edhe zyrtarisht e me shkrim siç e pamë nga Brukseli.

Të dashur anëtarë,

Pa u zgjatur më tepër, në fund të vitit 2023, është më se e qartë se kemi shumëçka për të gëzuar dhe për të festuar. Në vitin 2024 sigurisht do të kemi shumë e shumë suksese, të arritura e fitore të tjera e të reja. Por, siç kam theksuar më herët, na pret edhe punë, mund, djersë e angazhim. Le të jemi krenarë për sukseset tona. Por njëkohësisht, të mos e harrojmë kurrë rrugën e vështirë, dhe plot sfida, që kemi kaluar bashkë për të arritur aty ku jemi, si Lëvizje dhe si Qeveri, si aktivistë e si qytetarë, si përfaqësues e si zyrtarë.

Ju falemnderit shumë!

Mbledhja përgatitore e Partisë së Socialistëve Evropianë tek e cila ishte i ftuar sot më 14 dhjetor Kryeministri i Kosovës, njëherazi Kryetari i Lëvizjes VETËVENDOSJE!, Albin Kurti, ishte e një rëndësie të dyfishtë: së pari u përqendrua në përgatitjen e Këshillit Evropian me praninë e kryeministrave, kryetarëve të partive dhe të komisarëve evropianë, dhe së dyti ndodhi gjashtë muaj para zgjedhjeve evropiane që janë caktuar të mbahen me datë 9 qershor 2024.

Për hirë të këtyre dy ngjarjeve kyçe, për të ardhmen e Bashkimit Evropian, temat mes pjesëmarrësve prekën:

(i) gjendjen e rëndë të sigurisë në nivel global për shkak të luftës në Ukrainë, agresionit të Rusisë atje, dhe për shkak të kthimit të luftës në Lindjen e Mesme me pasoja të tmerrshme njerëzore.

(ii) angazhimin pa dilemë për zgjerimin e Bashkimit Evropian dhe për integrimin sa më të shpejtë të vendeve të Ballkanit Perëndimor;

(iii) rreziqet që paraqesin aleancat e së djathtës dhe të djathtës ekstreme nëpër shtete anëtare siç tregon rasti në Itali;

(iv) pengesat që këto aleanca paraqesin në përparimin e çdo reforme siç është rasti i sulmeve kundër qasjes ekonomike dhe fiskale të Bashkimit Evropian;

(v) prirjen e këtyre rrymave të bashkuara konservatore dhe ekstremiste për t’iu kthyer politikave shtrënguese dhe të dëmshme në kohën kur nevojiten më shumë investime për rritje;

(vi) nevojën për të promovuar bashkërisht një narrativë pozitive rreth çështjes së rregullimit të migracionit në shkallën evropiane;

(vii) shpresat e reja për tranzicionin energjetik pas deklaratës finale nga Konferenca Klimatike COP28 edhe duke pasë parasysh se bota mbetet larg angazhimeve të domosdoshme për të kthyer prirjen e ngrohjes globale, ndërsa nevojitet ende një kombinim më i drejtë për amortizimin social të këtij tranzicioni.

Në margjina të kësaj mbledhje, Kryeministri i Republikës së Kosovës, Albin Kurti, pati rastin të bisedojë me Përfaqësuesin e Lartë për Politikën e Jashtme, z. Josep Borrell, me Kryeministrin e Spanjës, z. Pedro Sánchez, me Kryetaren e Grupit të Socialdemokratëve në Parlamentin Evropian, znj. Iratxe García Pérez, me Komisarin Evropian për Punësim dhe për të Drejtat Sociale, z. Nicolas Schmit, por sigurisht edhe me Kryetarin e PES-it, z. Stefan Löfven dhe me Sekretarin e Përgjithshëm, z. Giacomo Filibeck.

Në fjalimin e tij, Kryeministri, Albin Kurti, foli për arritjet e Republikës së Kosovës në luftimin e korrupsionit dhe për rritjen ekonomike në këto 32 muaj sa jemi në qeverisje. Janë dyfishuar eksportet dhe investimet e huaja direkte dhe vitin e ardhshëm Bruto Produkti ynë Vendor do të jetë më i lartë për 40% në krahasim me vitin para pandemisë 2019. Kemi rritur veçanërisht buxhetin për bujqësinë, arsimin shëndetësinë dhe mbrojtjen, dhe jemi përqendruar në programe të gjera sociale në vend të projekteve të mëdhaja publike që në kujtesën e gjithsecilit e kanë lidhur korrupsionin me qeverinë.

Tutje, Kryeministri Kurti rikujtoi masat e padrejta që i janë vënë Republikës së Kosovës dhe bëri thirrje për heqjen e këtyre gjersa theksoi se shteti autoritar fqinj është ai që bart fajin për eskalimin e situatës në pjesën veriore të Kosovës. Barrikadat e paramilitarëve u zëvendësuan me sulme paramilitare, sulme terroriste, lideri i të cilëve është i lirë në Serbi dhe merr pjesë në mitingjet e presidentit të Serbisë. Kryeministri Kurti ripohoi përkushtimin e Kosovës për zbatimin e marrëveshjeve të arritura sivjet por duke kërkuar nënshkrimin e dy palëve si një garanci ligjore për një zbatim pa shkelje. Ai ritheksoi synimin e vendit tonë për integrim në Partneritetin për Paqe të NATO-s dhe në Bashkimin Evropian, duke kërkuar dërgimin e pyetësorit.

Në fund, Kryeministri Kurti, tregoi për mbështetjen e madhe që aktualisht gëzon qeveria e drejtuar nga ai me 56% sipas matjeve të fundit krahas 51% me të cilën kemi fituar në pranverën e 2021. Këtë mbështetje e kemi siguruar duke u mbështetur në tri kategori të mëdha sociale si gratë, të rinjtë dhe diaspora, tha ai. Kryeministri edhe si Kryetar i Lëvizjes VETËVENDOSJE! konfirmoi gatishmërinë e organizatës tonë që përmes mobilizimit të diasporës tonë shqiptare t’i mbështes partitë simotra në zgjedhjet evropiane që do të mbahen në qershor të 2024.