Kryetari i Lëvizjes VETËVENDOSJE!, Albin Kurti bashkë me deputeten dhe anëtaren e Kryesisë, Fitore Pacolli, sot takuan përfaqësuesit e organizatës joqeveritare Sustainability Leadership Kosova znj. Indira Kartallozi, drejtore ekzekutive, e cila jeton dhe vepron në Britani të Madhe, dhe znj. Rina Fetahaj, menaxhere.

Në takim u diskutua për zhvillimin dhe mundësinë e fuqizimit të sektorit privat dhe bizneseve sociale në Kosovë dhe për qëndrueshmërinë e tyre karshi sfidave dhe problemeve aktuale. Znj. Kartallozi e informoi Kryetarin Kurti për përvojat e saj dhe trendet botërore që kanë influencuar zhvillimet e bizneseve me misione sociale dhe qëndrueshmërinë e tyre ekonomike në një kohë kur ndryshimet klimatike determinojnë politikat e tyre të funksionimit.

Kryetari Kurti e falenderoi znj. Kartallozi për vizitën e saj si dhe përkushtimin e saj për të ndihmuar ne zhvillimin e reformave biznesore në Kosovë në përpuethshmëri me trendet e reja ekonomike si: ekonima qarkore, gjithëpërfshirese dhe regjenreative. Kurti i informoi se ndërlidhja e zhvillimit ekonomik me çështjet sociale dhe mjedisore janë tejet të rëndësishme dhe të domosdoshme për progresin në vend. Ai shtoi se Lëvizja VETËVENDOSJE! do të jetë e hapur për bashkëpunim dhe shkëmbim të përvojave në të ardhmen. 

Kryetari i Lëvizjes VETËVENDOSJE!, Albin Kurti bashkë me nënkryetarin, Besnik Bislimi dje u takuan virtualisht me ekipin e Fondit Monetar Ndërkombëtar (FMN), të kryesuar nga z. Gabriel Di Bella dhe znj. Stephanie Eble. Takimi është pjesë e takimeve të rregullta të misionit të FMN-së.

Në takim u shkëmbyen informata mbi zhvillimet e deritanishme me menaxhimin e pandemisë në Kosovë si dhe implikimet e saj si për ekonominë e vendit ashtu edhe për shëndetin e financave publike ne Kosovë. Z. Kurti e njoftoi misionin e FMN-së me qëndrimet e Lëvizjes VETËVENDOSJE! për disa momente me rëndësi të ndërlidhura me mënyrën se si po menaxhohet ekonomia dhe shëndetësia e vendit në kohën e pandemisë. U fol edhe për problemet që sipas Lëvizjes sonë përcjellin pakon e rimëkëmbjes ekonomike të përgatitur nga Qeveria jolegjitime, të cilat edhe po e pamundësojnë kalimin e saj në kuvend. Sidomos u veçuan parregullsitë e shumta që e shoqërojnë trajtimin që i bën qeveria jolegjitime trustit pensional të vendit si dhe të hyrave të grumbulluara nga procesi i privatizimit.

Në konferencën e sotme për media, ish-ministrja e drejtësisë, Ablulena Haxhiu dhe deputetja Saranda Bogujevci folën për pikën 12 të zotimeve të Hotit në Uashington, ku tekstualisht barazohen të pagjeturit me të zhvendosurit. Për Haxhiun dhe Bogujevcin në vend se të bëhen zotime që nuk përkojnë me realitetin e asaj që ka ngjarë këtu, qeveria e Kosovës duhet t’i bëjë kërkesa specifike Serbisë që lidhen me të pagjeturit.

Albulena Haxhiu tha se kërkesat për të pagjeturit janë kërkesa që duhet të plotësohen pa kushte, para çfarëdo teme tjetër. “Serbia e ka obligim ndaj Kosovës. Serbia e ka obligim ndërkombëtar që  të  jep informacione për personat e zhdukur, që  i ka marrë  me  dhunë. Serbia duhet t’i kthejë  ata, pa asnjë kusht, pas asnjë barazim.”

Për Haxhiun përveç se është e padrejtë të barazohen të pagjeturit me të zhvendosurit, Kosova asnjëherë  nuk ka injoruar ose refuzuar kthimin e qytetarëve që  kanë  jetuar në  Kosovë  për shkak të  etnisë. “Gjithë  këto vite s’ka pasur asnjë  rast që  është  rrezikuar ose nuk është  lejuar të  jetojë  në  Kosovë. Po të  kishim bërë  diçka të  tillë, kjo do të  evidentohej në  raporte të  shumta ndërkombëtare që  bëhen për Kosovën, por jo për këtë  s’ka pasur kritika asnjëherë  për Kosovën”, tha ajo.

Deputetja Saranda Bogujevci ritheksoi se çështja e të pagjeturve nuk është një çështje që mund të negociohet me Serbinë, por çështje për të cilën shteti i Kosovës duhet të ketë kërkesa specifike për shtetin e Serbisë.

Bogujevci përmendi të drejtën për të ditur, që nënkupton dije për atë se çfarë ka ndodhur me personin e zhdukur dhe kush e ka kryer krimin. “Kjo nuk përmendet fare, as atëherë kur flitet për të pagjeturit. Kemi rastin e Ukshin Hotit për të cilin nuk dimë asgjë, rastin e civilëve të vrarë dhe të zhdukur, të zonjës Ferdonije, dhe rastet tjera si ai i Fehmi Aganit, Bajram Kelmendit e shumë të tjerëve.”  

Ajo foli edhe për nevojën e dokumentimit dhe digjitalizimit të të dhënave. Për rëndësinë e aplikimit të testimit ADN në identifikimin e kufomave, dhe për ngritjen e stafit në komisionit qeveritarë për të pagjeturit, në mënyrë që të shtohet e lehtësohet puna e tyre.

Bogujevci kujtoi rezolutën e kaluar në Kuvendin e Kosovës ku njëra pikë ka të bëjë me shkëmbimin e të dhënave. Ajo tha se duhet t’i bëhet presion ndërkombëtarë Serbisë që ta nënshkruaj një marrëveshje të tillë edhe me ne.

Në fund të fjalës së saj, ajo ndau shqetësimin me përgjigjen e zv. kryeministrit Selmanaj ndaj kërkesës që deputetët e Lëvizjes VETËVENDOSJE! nga komisioni për të drejta të njeriut, ku ai refuzoi të raportojë duke thënë se tema e të pagjeturve është konsumuar dhe ezauruar.  

“Një përgjigje e tillë, një refuzim duke u shërbyer me fjalë si e konsumuar dhe ezauruar, tregon se sa të rëndësishme e kanë këta çështjen e të pagjeturve”, tha ajo

Këtë përvjetor të protestës së 1 tetorit 1997, një delegacion i Lëvizjes VETËVENDOSJE! në përbërje me anëtarë të kryesisë, deputetë dhe aktivistë, bënë homazhe te profesori i ndjerë, akademiku, Ejup Statovci. Profesori Statovci si rektor i Universitetit të Prishtinës qëndroi në ballë të protestave që kërkonin lirimin e pakusht të objekteve dhe hapësirave të okupuara universitare. Vendosmëria e treguar nga ai, kolegët e tij akademikë, dhe prej mijëra studentëve tjerë që po ndiqnin mësimet dhe rrugën e tyre i dhanë krenari e dinjitet popullit për t’u çliruar nga një regjim kriminal e shovinist por edhe shpresë për ditë më të mira lirie. Prej profesor Statovcit mësuam se edhe dija ka nevojë për çlirim por edhe çlirim ka nevojë për dije.

Sot, Lëvizja VETËVENDOSJE! organizoi një konferencë për media ku dy përfaqësuesit e saj në Komisionin Qendror Zgjedhor (KQZ), Sami Kurteshi dhe Alim Rama, folën për shkeljet e bëra gjatë procesit të përzgjedhjes së Kryeshefit Ekzekutiv të Sekretariatit të KQZ-së. Për asye e qëllime politike, udhëzimi administrativ që ka të bëjë me caktimin e panelit që bënë përzgjedhjen dhe propozimin e të përzgjedhurit për këtë pozitë është ndryshuar pasi është shpallur konkursi, kandidatët kanë dorëzuar dokumentet dhe konkursi është mbyllur. Kjo përbën një shkelje ligjore ngase është thyer parimi ligjor i sigurisë juridike. Nuk mund të ndryshohen rregullat pasi të fillojë loja. Partitë e koalicionit të kësaj qeverisje të paligjshme së bashku me PDK-në u bënë bashkë për ta vënë të preferuarin e tyre në krye të këtij institucioni dhe kjo cenon jo vetëm institucionin në fjalë, por edhe proceset zgjedhore në të ardhmen, theksuan Kurteshi e Rama në këtë konferencë.

—

Sami Kurteshi shpjegoi se procesi i përzgjedhjes së Kryeshefit Ekzekutiv të Sekretariatit të KQZ-së ka filluar në qershor, por për shkak të pandemisë është zvarritur me arsye. Ai tha se në procesin e përzgjedhjes, pas shpalljes së konkursit dhe pas dorëzimit të dokumenteve nga kandidatët, e më pas edhe mbylljes së konkursit nga KQZ, për arsye politike është ndryshuar udhëzimi administrativ që ka të bëjë pikërisht me caktimin e panelit që bënë propozimin e të përzgjedhurit për këtë pozitë.

“Këtu kemi hapur një shkelje ligjore sepse është thyer parimi ligjor i sigurisë juridike, askund nuk ndryshohen rregullat e lojës pas fillimit të saj. Por duket se sot në Kosovë, nëpër të gjitha institucionet publike, ky koalicion qeverisës së bashku me një pjesë të ‘opozitës’ po provon t’i zaptojë të gjitha pozitat shtetërore. Të gjithë po bëhen bashkë për ta ndarë kulaçin”, tha Kurteshi.

Përfaqësuesi tjetër i Lëvizjes në KQZ, Alim Rama, foli për kronologjinë e shkeljeve që kanë ndodhur gjatë këtij procesi.

“Shkelja e parë ka qenë ndryshimi i udhëzimit administrativ. Kjo nuk u bë thjeshtë sa për ta siguruar kandidatin e tyre. Nëse e shikojmë rolin e Kryeshefit Ekzekutiv të Sekretariatit të KQZ-së, shohim se ky rol bartë përgjegjësinë kryesore për organizimin e zgjedhjeve. Nëse të duhet dikush e patjetër edhe jashtëligjshëm synon ta vësh në këtë pozicion atëherë kjo normalisht që ngritë shqetësimin  për manipulimin e zgjedhjeve”, tha Rama.

Ai tha procesi ka qenë i rregullt deri me datë 12 gusht kur brenda KQZ-së nuk ka pasur dakordësi për atë se çfarë përbërje duhet të ketë paneli. “Ka ekzistuar rregulli, ku në përbërjen prej pesë anëtarëve të panelit, dy janë përfaqësues të pozitës, dy prej opozitës dhe një nga minoritetet. Kjo nuk u ka pëlqyer disa anëtarëve pasi e kanë parë që me atë përbërje nuk mund ta shtyjnë përpara përzgjedhjen e kandidatit të tyre.”

Rama listoi edhe shkeljet tjera që kanë të bëjnë me vlerësimin e kandidatëve. Kandidati i koalicionit qeverisës është votuar njëherë për të parë se ku qëndron me vota, e më pas kur është parë që nuk qëndron mirë, në fazën e intervistimit është vlerësuar me më shumë pikë për ta krijuar distancën mes tij dhe kandidatëve të tjerë.

Shkeljet tjera lidhen me afatet kohore, ku shkelja më e rëndë është ajo e përzgjedhjes së Kryeshefit Ekzekutiv të SKQZ-së pa përfunduar afati i ankesave nga kandidatët tjerë që morën pjesë në konkursin e shpallur. Pra, kryeshefi ende pa përfunduar afati ligjor për ankesa ka filluar punën.

“E kanë ftuar zyrtarin ligjor të SKQZ-së, i cili është në pushim mjekësor nga data 14 shtator, dhe vazhdon të jetë, për ta thënë se nuk është bërë asnjë shkelje dhe se mund të procedojnë tutje me emërimin e Kryeshefit Ekzekutiv të SKQZ-së. Për të njëjtin rast, ky zyrtar ligjor pati thënë të kundërtën, pra që duhet pritur shqyrtimin e të gjitha ankesave, përfshirë edhe ato që janë nëpër gjykata”, tha Rama.

Në fund, Rama tha se dakordimi i partive të koalicionit qeverisës dhe PDK-së që ta shtyjnë qoftë edhe jashtëligjshëm kandidatin e tyre në krye të një detyre kaq të rëndësishme që merret me organizimin e zgjedhjeve, është tendencë e hapur t’i manipuluar zgjedhjet e lira dhe demokratike në të ardhmen.

Lëvizja VETËVENDOSJE! mbajti sot mbledhjen e XLI të organit të saj më të lartë, Këshillit të Përgjithshëm, ku u diskutuan shumë çështje politike dhe organizative.

Këshilli i Përgjithshëm, diskutoi mbi situatën politike në vend, për procesin e zgjedhjeve të brendshme të përgjithshme që ka filluar tashmë, si dhe trajtoi propozimet për reformë organizative e statutore.

Në pjesën e parë të mbledhjes së Këshillit të Përgjithshëm, anëtarëve të Këshillit ju drejtua Kryetari i Lëvizjes VETËVENDOSJE!, Albin Kurti.

Në fjalën e tij hyrëse, Kryetari Albin Kurti vlerësoi lart dhe si të rëndësishëm procesin e zgjedhjeve të brendshme që ka filluar nëpër qendrat e Lëvizjes VETËVENDOSJE!, ku nëpër fshatrat e lagjet e Kosovës po votohen strukturat e reja të Lëvizjes. Kjo po dëshmon edhe se mbajtja e zgjedhjeve në Kosovë është e mundshme po aq sa është edhe e nevojshme.

Lidhur me situatën politike, Kryetari Kurti, ndër të tjera theksoi se ajo është e konfiguruar në formën e një rreziku të trefishtë. Rreziku i parë është pandemia, me rikthimet e saj të furishme, me efektin e saj rrënues për ekonominë dhe për shëndetin. Rreziku i dytë, është procesi i zotimeve me Serbinë, ku Avdullah Koti po shpejton të nënshkruajë gjithçka, të hapë çdo temë, duke e degraduar pozitën ndërkombëtare të Kosovës dhe statusin e vendit tonë, si shtet i pavarur e sovran dhe rreziku i tretë që ka të bëjë me Gjykatën Speciale.

Siç kemi thënë publikisht në Parlament, po të jetë në qeveri VETËVENDOSJE!, ne do t´i mbronim luftëtarët e UÇK-së. Por Thaçi, bashkë me LDK-në e rrëzoi qeverinë tonë të mirë sepse ishte qeveri e mirë. Kush po i mbron tash ushtarët e UÇK-së? Është për të ardhur keq se si askush nga qeveria e nga presidenca, pra nga institucionet tona, nuk po e çel gojën. Edhe një herë po vërtetohet se, ata që janë korruptuar, e që janë shantazhuar, nuk mund ta mbrojnë e as nuk mund ta përfaqësojnë luftën.

Në pjesën tjetër, Këshilli i Përgjithshëm diskutoi edhe për organizimin e zgjedhjeve të brendshme të nisura javë më parë. Ky proces i rëndësishëm organizativ në një kohë kur është dyfishuar mbështetja qytetare për Lëvizjen VETËVENDOSJE! do të na fuqizojë edhe më shumë nëpër pika dhe qendra. Këshilli miratoi vendimin që autorizon ndërmarrjen e operacioneve të nevojshme zgjedhore për të mundësuar zgjedhje gjithëpërfshirëse, të drejtpërdrejta, të lira e të ndershme.

Po ashtu në këtë mbledhje u prezantuan propozimet e Grupit për reformë organizative që adresojnë ndryshime e plotësime të rëndësishme e të nevojshme organizative, të cilat do ta fuqizojnë edhe më shumë Organizatën.

Pas përfundimit të diskutimeve të vlefshme për çështje organizative, Këshilli i Përgjithshëm vazhdoi diskutimin për situatën politike në vend e për domosdoshmërinë e zgjedhjeve parlamentare si zgjidhja e vetme e gjendjes së rëndë në të cilën e kanë katandisur vendin si në planin e brendshëm, ashtu edhe në rrafshin e subjektivitetit ndërkombëtar të Kosovës.

Sot, nënkryetari i LV-së dhe ish-ministri i Financave dhe Transfereve, Besnik Bislimi së bashku me ish ministrin e Punëve të Jashtme dhe Diasporës, njëherit anëtarin e kryesisë së Lëvizjes, Glauk Konjufca, pritën në takim asamblistin nga Medvegja, z. Muharrem Salihu.

Në këtë takim u fol për problemet me të cilat ballafaqohen banorët e Medvegjës, e që janë si të natyrës ekonomike ashtu edhe politike. Serbia ka ç’regjistruar një pjesë të madhe të qytetarëve shqiptarë të kësaj komune me qëllim të qartë për ta deformuar zyrtarisht strukturën demografike të kësaj komune shqiptare. Ajo po ashtu po synon t’i tjetërsojë pronat tokësore që janë mbi 50% në pronësi të shqiptarëve, dhe përmes implementimit të planeve urbanistike po pamundëson aktivitetet ekonomike dhe kulturore të shqiptarëve.

Me z. Salihu diskutuam mbi të gjitha këto dhe ndamë bindjen që Republika e Kosovës duhet të punojë edhe më shumë jo vetëm në dëgjimin e problemeve të shqiptarëve në atë komunë, por edhe në ngritjen e tyre në nivel ndërkombëtar. Gjithashtu u pajtuam që për të filluar një gjallërim ekonomik në atë pjesë, pikë kalimi në Mutivodë duhet të shndërrohet në pikë kufitare gjë që do t’i ndihmonte ndjeshëm prodhuesit në Medvegjë të cilët ende shfrytëzojnë rrugë të largëta për komunikim tregtarë me Republikën e Kosovës.

Kryetari i Lëvizjes VETËVENDOSJE!, Albin Kurti, priti sot në takim drejtorin e selisë së fondacionit Friedrich-Ebert (FES) në Kosovë, z. René Schlee.

Kryetari Kurti e falenderoi drejtorin Schlee për angazhimin rreth anëtarësimit të Lëvizjes sonë në Aleancën Progresive dhe për mbështetjen gjatë vizitës së fundit në Berlin.

Në takim u diskutua mbi pesë shtyllat e programit tonë të qeverisjes alternative dhe ndihmën të cilën mund të na e ofrojë FES-i. Përmirësimi i gjendjes socio-ekonomike, edukimi dual dhe punësimi i të rinjëve e i grave, si dhe rikthimi i trurit nga mërgata jonë, do të jenë në fokus të programit e planit tonë dhe prioritete të qeverisjes sonë të ardhshme e të mirë.

Këto 100 ditë qeverisje janë përcjellë nga vendime të dëmshme për interesat shtetërore të Kosovës, paaftësi për të qeverisur në interes të qytetarëve dhe koncesione të shumta për Serbinë. Asnjëherë më parë në një kohë kaq të shkurtër nuk i janë shkaktuar kaq shumë dëme e pasoja vendit. Pikërisht për këtë, Nënkryetarja e Kuvendit, znj. Arbërie Nagavci, sot ka kërkuar që të thirret Avdullah Hoti për raportim në Kuvend.

Që në ditët e para, kjo qeveri jolegjitime mori vendim për heqjen e reciprocitetit me Serbinë, në kohën kur Serbia kishte filluar të pranonte dokumentet me mbishkrimin ‘Republika e Kosovës’.

Në planin e brendshëm, ajo dështoi për të menaxhuar situatën me pandeminë COVID-19. Nga pothuajse zero të infektuar në ditët kur mori detyrën e shndërroi vendin në një vatër të infeksionit në Evropë. Nga shembulli i menaxhimit të vlerësuar në nivel global, e nxori Kosovën në krye të listave të vendeve me gjendjen më të rëndë me COVID-19, e numrin më të madh të vdekjeve në botë.

Paaftësi dhe mungesë efikasiteti dëshmoi edhe në planin social dhe ekonomik. Me deklarata kontradiktore për pako të rimëkëmbjes prej 1.2 miliard eurosh, ajo dështoi të ekzekutojë për një kohë të gjatë edhe masat nga Pakoja Fiskale Emergjente të nisura nga Qeveria Kurti. Në drejtim të mbrojtjes së jetës së qytetarëve dhe shëndetit publik, kjo qeveri braktisi qytetarët e infektuar me COVID-19 duke hequr dorë nga përgjegjësia e shtetit për t’i testuar pa pagesë. Qytetarët, përkundër përkeqësimit të gjendjes ekonomike për shkak të pandemisë, u detyruan të testohen në laboratorët privatë me çmime astronomike.

Më tej, në planin ndërkombëtar kjo qeveri filloi me pezullimin antikushtetues të së drejtës së Republikës së Kosovës për t’u anëtarësuar në organizata ndërkombëtare. Kjo u bë sipas interesit dhe kërkesës së Serbisë. Për të vazhduar edhe më tutje shkaktimin e dëmeve për Republikën nga zotimet e njëanshme në takimin e 4 shtatorit për të ndarë shfrytëzimin e liqenit të Ujmanit, pronë e Kosovës, pranimin e marrëveshjes së Novi Sadit, të ashtuquajtur minishengen, devijimin e infrastrukturës hekurudhore, e deri tek qëndrimet se do të zbatohet marrëveshja antikushtetuese për themelimin e Asociacionit të Komunave me shumicë serbe.E varur nga Lista Serbe, ajo lejoi organizimin e zgjedhjeve të Serbisë në Kosovë të cilat u mbajtën duke e konsideruar Kosovën pjesë të Serbisë; filloi rikthimin e kapjes së ndërmarrjeve dhe kompanive publike; ndërpreu procesin për vënien në binarë të ligjshmërisë dhe të integritetit në shërbimin e jashtëm dhe diplomaci; manifestoi mungesë strategjie dhe plani për fillimin e vitit të ri shkollor.

Po ashtu, gjatë këtyre 100 ditëve kjo qeveri ndërmori veprime të dëmshme për të penguar procesin e vetingut në sistemin e drejtësisë të nisur nga Qeveria Kurti. Masat dhe veprimet për ndërtimin e shtetit ligjor, luftimin e korrupsionit dhe luftimin e ndërhyrjeve politike në administratën publike dhe sistemin e drejtësisë ishin vlerësuar lartë edhe nga Departamenti i Shtetit në raportin e vitit 2020.

Pa program të qartë dhe pa vizion, kjo qeveri e futi në kaos shtetin e Kosovës në planin e brendshëm dhe riktheu mendësinë keqqeverisëse të cilën e kishin ndëshkuar qytetarët e Kosovës në zgjedhjet e fundit. Ajo vazhdon të rrezikojë përditë interesat shtetërore, qoftë duke vënë në dyshim sovranitetin dhe integritetin në planin e jashtëm, qoftë duke cenuar karakterin unitar të shtetit përmes planeve për themelimin e “Zajdenicës”.

Sot, Kryetari i Lëvizjes VETËVENDOSJE!, Albin Kurti, priti në takim ambasadoren suedeze, znj. Karin Hernmarck Ahliny.

Ambasadorja znj. Hernmarck Ahliny e uroi kryetarin Kurti për anëtarësimin e Lëvizjes VETËVENDOSJE! në Aleancën Progresive, duke i dëshiruar angazhim të suksesshëm përbrenda kësaj aleance. Kryetari Kurti e falënderoi për urimin. Ai tha se ky anëtarësim i VETËVENDOSJE!-s është tejet i rëndësishëm edhe për faktin që shumë shtete që nuk e kanë njohur Republikën e Kosovës kanë votuar për anëtarësimin tonë. Kjo tregon se ka hapësirë bashkëpunimi politik e ekonomik, dhe përmes lobimit të suksesshmëm mund të ketë përmirësime të qëndrimeve të atyre shteteve që ende nuk e kanë njohur vendin tonë.

Në këtë takim miqësor, kryetari Kurti e njoftoi ambasadoren znj. Hernmarck Ahliny edhe me platformën e Qeverisjes Alternative të Lëvizjes që parasheh rrugëdalje nga problemet e shumëfishta me të cilat ballafaqohet vendi, duke u koncentruar rreth zhvillimit ekonomik që krijon vende të reja pune e drejtësisë si sociale ashtu edhe asaj gjyqësore në Kosovë. Ai po ashtu e njoftoi për ndryshimet që parashihen të bëhen në statutin e Lëvizjes e që mundësojnë krijimin e organizatës së grave dhe asaj të të rinjëve të VETËVENDOSJE!-s. Tutje, kryetari Kurti foli edhe për procesin e brendshëm zgjedhor e demokratik të organizatës që filloi dje me datë 20 shtator, e që do ta përkthejë anëtarësinë e shtuar, sidomos përgjatë viteve të fundit, në një strukturë edhe më të plotë, edhe më të përgatitur për t’u rikthyer në qeverisje e për t’u përballur me problemet socio-ekonomike dhe betejat politike në vend.

Dje dëgjuam presidentin e ShBA-ve të flasë në një tubim elektoral për “ndalje të vrasjeve masive mes Kosovës dhe Serbisë”, që paskan bërë krime të tilla kundër njëra-tjetrës, “për shekuj me radhë”.

Besimi se lufta e Kosovës e ka themelin te urrejtjet e lashta etnike, e te mospërputhja esenciale mes popullit serb e shqiptar, është besim i gabueshëm, i cili injoron rolin kryesor të Milosheviqit dhe regjimit të tij në shkaktimin e luftës. Po ashtu, ky besim anashkalon faktin se lufta nuk u urdhërua e nuk u organizua “prej qytetarëve”, por prej ushtrive e policive, me hierarki e përgjegjësi të qartë komanduese. Këtë temë e shtjellon historiani Noel Malcolm, “Kosova – Një histori e shkurtër”, i cili tash e dy dekada është bërë lektyrë për ushtarakët e KFOR-it, pra edhe ata amerikanë, të stacionuar në Kosovë, dhe mendojmë se duhet të lexohet edhe prej diplomatëve e këshilltarëve të presidentit që merren me çështjen e Kosovës e atë të Serbisë. Nëse lufta në Kosovë do të kishte qenë e karakterit etnik, pra dallimi etnik na paska shkaktuar konfliktin, atëherë kurrë nuk do të intervenonte NATO dhe Milosheviqi nuk do të mund të konsiderohej përgjegjës prej vetë ShBA-ve, NATO-s, OKB-së, e vendeve kryesore demokratike të botës. E vërteta është që prapa krimeve e masakrave qëndronte një aparat shtetëror gjenocidal (i cili më herët kishte sulmuar në Slloveni, Kroaci dhe Bosnje e Hercegovinë), kurse në anën tjetër populli shqiptar i pambrojtur në Kosovë, që u vetëmbrojt. NATO nuk mund të qëndronte duarkryq teksa Srebrenica po përsëritej në Kosovë.

Kjo deklaratë vjen në një kohë kur Serbia ka ushtrinë më të armatosur dhe buxhetin më të madh ushtarak në rajonin e Ballkanit Perëndimor, dhe blen armë prej Perëndimit, por ç’është më e keqja, vazhdimisht blen prej Rusisë, e së fundi u bë vendi i parë evropian që blen sisteme armatimi prej Kinës. Ndërsa Kosova, e cila ka partner të vetëm gjeopolitik perëndimin, ShBA e NATO, ka një ushtri minimale, nuk ka as armatim të rëndë e as buxhet të mjaftueshëm. Si mund ta rrezikojë Kosova e varfër dhe e çarmatosur Serbinë? Është Serbia ajo që ka pretendime në Kosovë, dhe armatimi i saj ofensiv nuk ka për synim vendet e largëta të botës, por pikërisht vendet fqinje e në radhë të parë Kosovën.

Me këtë qasje rehabilituese të kriminelëve të luftës, nuk po vendoset paqja mes Kosovës e Serbisë, por po zgjatet konflikti i ngrirë. Paqja vendoset kur dënohen e çarmatosen fajtorët e kur ShBA mbështet drejtësinë ndërkombëtare dhe pavarësinë e Kosovës, siç ka bërë gjithnjë. Paqja vendoset kur Serbia e njeh Kosovën e pavarur dhe ballafaqohet me të kaluarën e saj. Jo kur rehabilitohen ish bashkëpunëtorët e Milosheviqit që bënë agresion e kryen gjenocid.

————————————————————————-

Yesterday we heard the President of the United States speak at an election campaign rally about “stopping mass killings between Kosova and Serbia,” who supposedly have been committing such crimes against each other “for hundreds of years.”

The claim that the Kosova war has its basis in ancient ethnic hatred, and in a fundamental enmity between the Serbian and Albanian peoples, is mistaken, as it ignores the central role of Milosevic and his regime in bringing about that war. Furthermore, this claim ignores the fact that the war was not ordered or organized “by the people,” but by armies and police, with a clear hierarchy and command responsibility. This topic is expounded clearly by the historian Noel Malcolm in his “Kosovo: A Short History,” which for two decades has been required reading for KFOR soldiers — including American soldiers — stationed in Kosova. We believe it should also be read by the President’s diplomats and advisors dealing with issues related to Kosova and Serbia. If the Kosova war had been of an ethnic character, if ethnic differences supposedly had been the cause of the conflict, then NATO would never have intervened, and Milosevic would never have been considered culpable by the United States, NATO, the UN, and the major democratic countries of the world. The truth is that behind the crimes and the massacres lay a genocidal state apparatus, which had previously attacked Slovenia, Croatia, and Bosnia and Hercegovina. And on the other side was the unprotected Kosova Albanian people, who had no choice but to fight in their own defense. And NATO could not stand idly by while the horrors of Srebrenica were being reenacted all over Kosova.

The President’s statement comes at a time when Serbia has the most well-armed military and the biggest military budget in the Western Balkans. Some of these weapons it has purchased from the West; but more troubling is that it continuously purchases weapons from Russia as well, and recently became the first European country to purchase weapons systems from China. Kosova, on the other hand, whose only geopolitical partners are in the West, including the United States and NATO, has a small army and does not possess heavy weaponry; nor does it have a sufficient budget. How can a poor, unarmed Kosova pose a danger to Serbia? After all, it has always been Serbia that has laid claim to Kosova, not the other way around. Serbia’s offensive weapons do not have as their target faraway lands, but rather its neighbors, with Kosova being first and foremost in its sights.

A rehabilitative attitude toward war criminals will not bring peace between Kosova and Serbia; it can only prolong our frozen conflict. Peace will come when the guilty are punished and disarmed, and when the United States supports international justice and Kosova’s independence, as it has always done. Peace will come when Serbia recognizes the independence of Kosova, and when it confronts its own past — not with the rehabilitation of Milosevic’s collaborators, guilty as they are of committing aggression and genocide.

Ashtu siç e parasheh statuti ynë e siç e kërkon demokracia e brendshme, Lëvizja VETËVENDOSJE! ka shpallur zgjedhjet e brendshme të përgjithshme. Nga 20 shtatori, secili anëtar i Lëvizjes, dhe kurdo që është anëtarësuar, do të ketë të drejtë për të votuar e për t’u kandiduar.

Zgjedhjet do të jenë të drejtpërdrejta, të lira e demokratike. Në fund të këtij procesi do të kemi struktura edhe më të fuqishme ashtu siç e kemi edhe mbështetjen e jashtëzakonshme të qytetarëve.

Në 30 qendra të Lëvizjes në Kosovë e 13 qendra në mërgatë, anëtarët e Lëvizjes do të kenë mundësi që përmes parimit “një anëtar, një votë” të zgjedhin kryesitë e kryetarët e pikave nëpër lagje e fshatra, të propozojnë kandidatët që vlerësojnë më së shumti apo edhe të vetpropozohen.

Të gjithë anëtarët do të kontaktohen për të marrë pjesë në zgjedhje, kurse ju që mbështetni Lëvizjen, por nuk jeni anëtarësuar ende, vizitoni zyret e Lëvizjes VETËVENDOSJE në komunën tuaj dhe anëtarësohuni që të bëheni pjesë e këtij procesi demokratik.

Lëvizja fton të gjithë anëtarët që të bashkohen në këtë proces zgjedhor.

Bashkë në organizim – bashkë në drejtim!

Pafund herë Hashim Thaçi deklarohej se në takim e radhës në Washington se do ta heqim Serbinë qafe njëherë e mirë. Se, “Marrëveshja Finale” është gati dhe se njohja e pavarësisë së Kosovës nga Serbia e ulësja në OKB është duke na pritur. Do të jetë e dhimbshme thoshte asokohe, por do të jetë finale për të dyja palët. Njësoj, kohëve të fundit edhe vartësi i tij, Avdullah Hoti, shprehej i bindur e i palëkundur në njohjen reciproke.

Me 4 shtator risi ishte vetëm vendi ku u nënshkruan zotime. Padyshim, edhe që delegacioni i Kosovës ia mundësoi Vuçiqit të duket i moderuar e pro-amerikan duke e futur në “Dhomën Ovale”.

Por çfarë ndodhi atë ditë? Kosova vazhdoi të jetë më shumë temë e diskutimit sesa palë në dialog. Një mori e pikave të zotimeve ishin të nënshkruara shumë kohë më herët e disa të tjera duken vështirë të implementuara. Aty, delegacioni i Kosovës hoqi dorë nga shtetësia e Kosovës dhe po bëhet përpjekje titanike që ta ndajnë ekonominë nga politika. Thua se këto nuk janë pikërisht e njëjta gjë. Problemi i Kosovës me Serbinë është problem politik sepse është edhe problem ekonomik. Madje, problem ekonomik është pikërisht sepse është problem tërësisht politik.

Në konferencën e sotme, ish-zëvendësministri i Infrastrukturës, z. Avni Zogiani, dekonstruktoi zotimet e kësaj date në një pikë shumë komplekse. “Në dokumentin për palën kosovare” – thotë z. Zogiani- “thuhet se autostrada do lidhë Prishtinën e Beogradin, kurse në dokumentin për palën serbe, thuhet se kjo autostradë lidh Prishtinën me Nishin. Këto dy versione kanë një dallim të madh mes vete, sepse duhet qartësuar nëse kjo lidhje multimodale, në këtë rast hekurudhë e autostradë, ka apo jo takim me korridorin Orient-East-Mediterranean. Nuk duhet të harrojmë që Serbia për t’u bërë atraktive për Orient/East-Med Corridor duhet që ajo të ofrojë garanci që lidhja e saj e nxjerrë këtë korridor në Durrës dhe në Mal të Zi.”

Kësisoj, pra, çfarë ka bërë delegacioni nga Kosova është që vendin tonë e ka kthyer në tranzit të këtij kalimi. Vlera e vetme për këtë do të ishte nëse Kosova dhe Shqipëria pas saj dalin/kyçen në Orient/East-Med, e kjo varet nga Serbia, e cila deri tani thotë ju lejoj deri në Nish.

Dje morëm lajmin që pas Internacionalës Socialiste, tashmë edhe Aleanca Progresive e ka pranuar Lëvizjen VETËVENDOSJE! si pjesë të sajen. Kjo Aleancë është bashkim i subjekteve, më të mëdha botërore, të socialdemokratëve, socialistëve dhe progresistëve.

Vlerat e saja janë bashkëpunimi për Liri, Drejtësi e Solidaritet; që ta bëjmë shekullin XXI një shekull të progresit demokratik, shoqëror e ekologjik; përveç progresit shoqëror, Aleanca Progresive zotohet që edhe ta mbrojë këtë progres kundër kundërshtarëve autoritarë dhe reaksionarë të cilët në mënyrë agresive vënë në dyshim vlerat tona të përbashkëta. Gjithashtu, të kundërshtojë populizmin e djathtë që ndjek një politikë ndarjeje, nxit urrejtje dhe frikë e promovon margjinalizimin dhe izolimin.

Në konferencën e sotme, kryetari, z. Albin Kurti, bashkë me sekretarin për Marrdhënie me Jashtë, z. Kreshnik Ahmeti e kumtuan këtë arritje të madhe për subjektin tonë, por edhe për të gjithë vendin. Aleanca Progresive, me të gjitha vlerat e saja ka parë te Lëvizja jonë fuqinë organizative e intelektuale për të kontribuar e për ta përmisuar vendin.

Në fjalën e tij, z. Ahmeti, bëri të ditur që: “Në mbledhjen e djeshme, Bordi i Aleancës Progresive, i përbërë nga afër 100 anëtarë që përfaqësojnë subjekte politike e organizata partnere, ka votuar unanimisht për pranimin e Lëvizjes VETËVENDOSJE! në këtë platformë ndërkombëtare.” E, në këtë organizatë ka edhe shumë subjekte të cilat vijnë nga vendet ku nuk e kanë njohur pavarësinë e Republikës së Kosovës. Kësisoj, kjo platformë është shumë e vlefshme e mundësi e madhë që ne të lobojmë për njohje të reja e të krijojmë lidhje diplomatike me këto vende.

Por, Kosova është në gjendje të rëndë. Prandaj edhe angazhimi ynë nuk ndalet. Si në qeveri, po ashtu edhe në opozitë, paradoksalisht, si subjekti më i madh, anëtarësimet në organizata të tilla na mundësojnë që të marrim të gjithë përvojen e vendeve të zhvilluara. Në fjalën e tij, kryetari Kurti theksoi edhe që: “Ne duam të krijojmë vende të mira pune dhe të luftojmë papunësinë, për të siguruar shpërndarjen e barabartë të të ardhurave ose rishpërndarjen e pasurisë, e ta garantojmë barazinë gjinore. Demokracia është çelësi për liri dhe dinjitet. Ideja jonë për një shoqëri të lirë, të hapur, gjithëpërfshirëse dhe të përbashkët është një ide e fuqishme.”

Puna jonë po vazhdon. Rikthimi në qeverinë e mirë përveç që është i pashmangshëm, është edhe më se i domosdoshëm. Kurse, ne jemi të përkushtuar ndaj kohezionit shoqëror dhe drejtësisë sociale. Progresin e interpretojmë si solidaritet i të fortit me të dobëtin dhe mbrojtjen e ndërsjelltë ndaj rreziqeve kryesore në jetë. Së bashku do të krijojmë punë të denjë dhe të drejta për punëtorët sepse jemi të vendosur në luftën kundër varfërisë, shfrytëzimit, krimit e keqpërdorimeve.

Sot, Lëvizja VETËVENDOSJE! mbajti një konferencë për media, ku deputeti Hajrulla Çeku foli për zotimet e delegacionit të z. Hoti në Uashington në lidhje me kishat ortodokse në Kosovë.

Deputeti Harjulla Çeku theksoi faktin se garancitë për mbrojtjen e kishave dhe manastireve ortodokse në Kosovë janë të përfshira në të paktën gjashtë ligje përbrenda kushtetutës së Kosovës, dhe se hapja e kësaj teme nga delegacioni ynë në Uashington është pranim që ekzistojnë probleme që ende duhet zgjidhur në këtë aspekt duke nxitur nevojën që Kosova duhet të jap edhe më shumë në këtë drejtim.

“Një nga detajet e dëmshme të zotimeve për këtë çështje në Uashington është zotimi i Hotit për zbatimin e vendimeve gjyqësore dhe kushtetuese, pasi që Kosova e ka të sanksionuar qartë se si i zbaton vendimet e Gjykatës Kushtetuese. Ne mendojmë që nuk ka pasur asnjë nevojë që për çështje të natyrës kushtetuese të trajtuara nga Gjykata Kushtetuese të ketë diskutime ndërkombëtare politike, e aq më pak përballë Serbisë. Kishat ortodokse në Kosovë gëzojnë të drejta të avancuara mbi territorin e pronës së tyre, të cilat janë të kodifikuara në Kushtetutën dhe ligjet e vendit. Kjo e bën Kosovën një nga vendet me sistemin më të avancuar për garantimin e këtyre të drejtave”.

Çeku tha se nuk guxojmë t’i harrojmë krimet e Serbisë, por as rolin e Kishës Ortodokse Serbe në luftën e Kosovës.

Kisha ishte e përfshirë drejtpërdrejtë, madje klerikët e saj i kanë bekuar ushtarët e paramilitarët serbë që janë nisur për të kryer masakra në Kosovë. Nuk guxojmë të harrojmë as shkatërrimin e trashëgimisë kulturore, kryesisht asaj islame, gjatë luftës së Kosovës. Serbia asnjëherë nuk ka kërkuar falje për këto krime kundër njerëzimit, e as që bëhet fjalë per dëmshpërblim. Kisha Ortodokse Serbe nuk është distancuar asnjëherë nga këto veprime, as nuk ka kërkuar falje, e për fat të keq, jo rrallë vazhdon me retorikë raciste ndaj shqiptarëve.”

Ai përmendi faktin që Kisha Ortodokse i gëzon të gjitha të drejtat dhe kërkon respektim të Kushtetutës ndërkohë që nuk e njeh atë e as shtetin e Kosovës. Foli për pengesat e vazhdueshme që i shtron Kisha Ortodokse Serbe për autoritetet tona të trashëgimisë kulturore.

“Kisha pengon edhe qasjen e qytetarëve, pengon edhe projektet për të mirën e komunitetit. Kisha Ortodokse Serbe nuk e njeh shtetin e Kosovës, edhe pse të gjitha garancitë kushtetuese, ligjore dhe institucionale që i gëzon sot burojnë nga Plani i Ahtisaarit. Pra të drejta që do të duhej t’i gëzonin duke e pranuar shtetin e Kosovës. Për fat të keq, sot Kisha Ortodokse Serbe kërkon zbatim të njëanshëm të Kushtetutës, d.m.th. këtë e pret vetëm nga institucionet e Kosovës, ndërsa ajo vet nuk e njeh as Kushtetutën as shtetin. Prandaj, edhe në rrafshin negociator, pyetja që shtrojmë ne është pse duhet të rëndohet edhe më tej kjo çështje. Çka ka mbetur pa i dhënë Kishës Ortodokse Serbe, dhe pse duhet të ngritet kjo çështje sërish në nivele kaq të larta diplomatike ndërkombëtare. A është ky paralajmërim se po hapet Plani i Ahtisaarit dhe se do të hapet çështja e eksterritorialitetit sërish me kërkesa edhe me të avancuara nga ana e Serbisë”, tha Çeku.

Z. Hoti nuk po na tregon se cila ka qenë përgjigja që e kanë dhënë në takime dhe cilat do të jetë përgjigjet në takimet e radhës, sepse qartësisht kjo temë do të jetë aty, tashmë në negociatat në Bruksel. Duke pranuar tema të këtilla, madje duke i përfshirë ato në dokumente e zotime, delegacioni ynë ka pranuar që paska probleme që duhet të zgjidhen lidhur me pronën dhe garancitë për kishat dhe manastiret ortodokse.”

Në fund të fjalës së tij, deputeti Çeku foli për angazhimin e brendshëm dhe të jashtëm të Kosovës sa i përket kësaj teme.

“Në negociata me Serbinë ne duhet të kërkojmë që artefaktet e koleksionit të grabitur arkeologjik dhe etnologjik, pjesë e fondit publik muzeor të Kosovës, të kthehen në Kosovë. Konventat ndërkombëtare janë shumë të qarta dhe rigoroze, prandaj pasuria kulturore duhet t’i kthehet vendit të origjinës. Gjithashtu, në vend se të pranojmë kërkesa të pakuptimta në raport me kishat ortodokse, ne duhet të angazhohemi për anëtarësim në UNESCO dhe organizatat e tjera të specializuara të trashëgimisë kulturore. Në dimensionin e brendshëm, ne duhet të angazhohemi për fuqizimin e dialogut të brendshëm me klerin ortodoks në Kosovë për mbrojtjen dhe menaxhimin efektiv të kishave ortodokse, që gëzojnë statusin e asetit të mbrojtur të trashëgimisë kulturore. E gjithë kjo duhet të funksionojë brenda sistemit kushtetues dhe institucional të Kosovës”, tha Çeku për fund.

1. Kuvendi i Republikës së Kosovës nuk e ka autorizuar dhe nuk i ka dhënë leje Avdullah Hotit që të bëj zotime të tilla të njëanshme lidhur me marrëdhëniet e Kosovës me Serbinë. Kuvendi i Kosovës nuk mbështet zotimet e tij të njëanshme që kanë të bëjnë me pikat për normalizimin ekonomik në mes të Kosovës dhe Serbisë, të nënshkruara më 4 shtator 2020 në Washington DC.

2. Kuvendi i Republikës së Kosovës nuk mbështet kurrfarë bisedime a dialogu që rikthejnë çështjen e Asociacionit të Komunave me shumicë serbe në Kosovë si temë. Asnjë zyrtar i Republikës së Kosovës nuk ka kompetenca apo autorizime dhe nuk i lejohet që të bisedojë për këtë çështje.

3. Ujmani si liqen artificial, është pronë dhe aset tërësisht i Republikës së Kosovës, i ndërtuar me fonde të Kosovës dhe menaxhohet nga Kosova. Si i tillë Ujmani dhe asnjë aset a pronë tjetër e Republikës së Kosovës kudo që ndodhet ajo, nuk mund të negociohet.

4. Republika e Kosovës nuk merr pjesë në asnjë nismë apo aranzhim apo marrëveshje, përfshirë dhe atë të bërë në Novi Sad në vitin 2019, që synon treg të përbashkët me disa nga vendet e Ballkanit perëndimor, duke qenë se Serbia nuk e njeh Republikën e Kosovës dhe ka si synim zgjerimin e ndikimit në politikën e brendshme të disa prej shteteve të këtij rajoni.

Sot, Zyra e Presidentit ka lëshuar një komunikatë për media ku e ka cilësuar si të rrezikshme dhe të dëmshme idenë e diskutimit për ”Zajednicën” nga Avdullah Hoti në Bruksel. Në këtë komunikatë kërkohet që Kuvendi ta ndalojë kryeministrin që të negociojë për çështje të brendshme, përmes një rezolute, anipse një rezolutë e tillë është votuar nga Kuvendi në mars të këtij viti.

Nëse ”Zajednica” paraqet rrezik për Republikën e Kosovës, gjë që është krejt e vërtetë, atëherë presidenti Thaçi duhet të bëjë së paku tre gjëra: të distancohet dhe marrë përgjegjësi për marrëveshjen e prillit 2013, që është themeli i ”Zajednicës” e që e nënshkroi si kryeministër; të marrë përgjegjësi për ”Zajednicën” e gushtit 2015 të nënshkruar nga kryeministër Isa Mustafa i shoqëruar nga vet Hashim Thaçi si zëvendëskryeministër dhe ministër i Punëve të Jashtme dhe garantonte se ajo ishte në përputhje me Kushtetutën ndërkohë që më vonë doli se ajo e shkelë atë në së paku 23 nene të saj; dhe, të japë përgjegjësi për nënshkrimin e tij në letrën ku FSK-së i ndalohet kalimi në veri të vendit.

Ky reagim i presidentit sot, nuk është asgjë tjetër pos pafytyrësi dhe përpjekje që të simulojë opozitarizmin. Pra, ai po shtiret, po e luan rolin, vetëm sa për të mbetur edhe pak në skenën politike, dhe për ta faktorizuar veten ndërkombëtarisht. A i ka numëruar Thaçi sa rezoluta të tilla ka pasur, e sa janë shkelur nga vetë personi që është president? Ai vetë, në cilësinë e kryeministrit bashkë me Daçiqin hodhën themelet e ”Zajednicës”, që më pas e ndalëm me protesta mbarëqytetare.

Kjo kundërshti mes Thaçit e Hotit është kundërshti e rreme e dy anëve të së njëjtës medalje. Është kundërshti e ndarjes direkte të Kosovës me atë të bosnjëzimit për t’u ndarë më vonë. Dallimi i tyre është vetëm kohor. Ata që thonë se ”Zajednica” është obligim në fakt janë duke negociuar ndarjen. Ndërsa kinse-kundërshtarët e tyre, opozita e simuluar, të cilët ka kohë që kërkojnë ndarje, sot thërrasin kundër “Zajednicës” që e krijuan vetë. Njëjtë si hajni kur thërret “kapeni hajnin”.

”Zajednica” cenon rëndë rendin kushtetues dhe unitaritetin e shtetit. Ajo është e dëmshme dhe rrjedhimisht e papranueshme, dhe nuk mund të zbatohet në Republikën e Kosovës e aq më pak të sillet nga një qeverisje e paligjshme. Por Thaçi është baba i “Zajednicës”, e jo kundërshtar i saj. Si themelues i kahmotshëm, atij vetëm i ka mbetur merak pse nuk është ai implementuesi, por kryeministri i tij kukull.

Qytetarët e Republikës së Kosovës, opinioni mbarëshqiptar, Lëvizja VETËVENDOSJE! dhe studiues të fushave të ndryshme kanë qenë në mënyrë konsekuente kundër marrëveshjeve që kanë rrudhur territorin dhe cenuar sovranitetin e vendit. Ne kemi kundërshtuar ”Zajednicën” Thaçi-Daçiq 2013 dhe atë Mustafa-Thaçi – Vuçiq- Daçiq 2015 sepse janë kundër rendit kushtetues dhe Republikës. Gatishmëria e kryeministrit të paligjshëm për ta ringjallur projektin famëkeq të Serbisë do të kundërshtohet siç janë kundërshtuar përpjekjet e padronëve të tij e që janë pikërisht këta nënshkrues.

Qeveria e paligjshme, përmes zotimeve të Hotit në Uashington, hoqi dorë nga anëtarësimi në organizata të rëndësishme ndërkombëtare si në Këshillin e Evropës, Asociacioni Evropian për Sigurimin e Cilësisë në Arsimin e Lartë (ENQA), në Organizatën Botërore të Shëndetësisë (OBSH), në UNESCO, Interpol, Europol, në Kartën e Adriatikut e madje edhe nga NATO. Kjo është në kundërshtim me deklaratën e pavarësisë, përbën shkelje të nenit 17 të Kushtetutës së Republikës së Kosovës dhe është rast i pashembullt në marrëdhëniet ndërkombëtare, potencuan deputetja Fitore Pacollidhe ish zv. ministri i Mbrojtjes, Enver Dugolli, në konferencën e sotme për media që u mbajt në zyrën e Lëvizjes VETËVENDOSJE!.

Deputetja Fitore Pacolli kujtoi që procesi i zgjerimit të legjitimitetit ndërkombëtar dhe përforcimit të shtetësisë së Kosovës përmes anëtarësimit në organizata ndërkombëtare ka degraduar në vazhdimësi. Ajo tha se zotimi i fundit i Hotit në Uashington është një fusnotë e dytë.

“Kjo pikë e zotimeve është tani një fusnotë e dytë edhe më e dëmshme se e para. E para reduktoi anëtarësimin e Kosovës në organizata ndërkombëtare nga shteti sovran e me të drejta të barabarta me shtetet tjera në anëtarësim të Kosovës me fusnotë. E dyta pamundëson anëtarësimin si dhe bllokon avancimin e shtetit të Kosovës në shumë dimensione duke filluar nga çështjet e sigurisë dhe mbrojtjes, drejtësisë penale e civile, financiare, të mjedisit, energjisë, arsimit e të shëndetësisë deri tek çështjet infrastrukturore dhe rrugore, hekurudhore dhe ajrore”, theksoi ajo.

Zotimi i Hotit për të hequr dorë nga anëtarësimi në organizata ndërkombëtare, sipas Pacollit, rrezikon ta vejë në pikëpyetje statusin e Kosovës në organizatat ku tashmë është anëtarësuar si dhe të pamundësojë avancimin dhe fuqizimin e rolit të shtetit të Kosovës në këto organizata.

Enver Dugolli vuri në dukje hipokrizinë e radhës të kësaj qeverie të paligjshme, e cila në mbledhjen e saj të fundit morri vendim për formimin e një grupi të nivelit të lartë ndërinstitucional për avancimin e rrugës integruese të Kosovës drejt NATO-s. Dugolli tha se pas zotimit në Uashington për të hequr dorë nga anëtarësimet në organizata ndërkombëtare të gjithë e kanë parë që kjo qeveri e paligjshme nuk është e interesuar ta avancojë ose anëtarësoj[ Kosovën në organizma ndërkombëtarë, e aq më pak në NATO.

Sipas Dugollit me zotimin e Hotit për ta pezulluar procesin e anëtarësimit është dëmtuar rrugëtimi i Kosovës drejt Aleancës Veri-Atlantike (NATO). 
“Është dëmtuar pjesëmarrja jonë në iniciativën e Kartës së Adriatikut, apo siç njihet edhe si A5, në të cilën me përkrahjen e madhe të Shqipërisë, Kroacisë dhe Shteteve të Bashkuara të Amerikës, Kosova mori statusin e vëzhguesit që nga viti 2014. Tani, kur edhe pritej avancimi i statusit të Kosovës në shtet anëtar të kësaj iniciative, pa pritur Hoti nënshkroi zotimin për mos aplikim. Dhe tani, pa fije turpi, Hoti mundohet të na hedh hi syve për gjoja interesimin e tij të madh për avancimin e Kosovës dhe integrimin e saj në NATO. Dëmtoi gjithashtu edhe pozicionin e Kosovës në iniciativën e RACVIAC-ut ku Kosova ka një status specifik i cili me ndihmën e miqve do mund të shfrytëzohej  për anëtarësim të plotë. Prandaj, edhe këtu kemi një ngrirje e cila fillimisht u tha se do jetë një vjeçare.”

“Puna më e mirë dhe më e frytshme që do duhej të ndodhte, është largimi sa më i shpejtë i kësaj qeverie e cila me veprimet e veta të dëmshme jo që po na ofron me NATO-n, por është duke na larguar gjithnjë e më shumë. Prioritet i yni do duhej të ishte avancimi dhe jo bllokimi, investimi në kapacitete dhe jo keqpërdorimi e zhvatja. Serioziteti ndaj NATO-s tregohet jo duke bllokuar veten por duke kërkuar ndihmë dhe përkrahje në mekanizmat para anëtarësim siç është PfP (Partneritet për Paqe), e deri te mbështetja për anëtarësimin e plotë në iniciativat rajonale të sigurisë”, përfundoi Dugolli. 

Mbrëmë, pas mesnate morëm lajmin e trishtë për ndarjen fizike të artistit të dashur, veprimtarit të çështjes kombëtare të orëve të rënda për vendin dhe deputetit përfaqësues në Kuvend, personifikim i njeriut punëtor, të dashur e të dinjitetshëm, Adem Mikullovci.

I angazhuar, i vendosur e në ballë të mbrojtjes të së drejtës për shtet e Republikë, Ademi do të ndodhej aty ku luhej fati i popullit dhe i Kosovës. I vetëdijshëm për momentin historik para të cilit gjendej Kosova, si delegat i atëhershëm i Kuvendit të Kosovës, më 2 korrik të vitit 1990 do të ishte bashkë me delegatët e tjerë që miratuan publikisht para Kuvendit të Kosovës deklaratën kushtetuese me të cilën Kosova shpallet njësi e pavarur dhe e barabartë si pararendëse e Republikës së parë të Kosovës.

Si artist, do të afirmonte lart artin shqiptar në skenë e në televizion, do të mbante gjallë shpirtin dhe frymën kulturore të shqiptarëve të Kosovës në kohët e rënda të viteve 90-ta të dëbuar nga teatri, nga televizioni e kinemaja.

Si pjesë e plejadës së aktorëve të ish-Teatrit Popullor Krahinor i Kosovës tash Teatrit Kombëtar i Kosovës, Adem Mikullovci ka pasur një karrierë me 45 role kryesore dhe 70 role në teatrore. Ai spikati në rolet më të dalluara në shfaqjet: “Duke pritur Godonë”,”Po shkoj për gjah”, “Njeriu që pa vdekjen me sy”, “Dashuria”, “Hotel Kashta”, “Fundi i botës”, “Miza në vesh”, “Erveheja” e të tjera. Mikullovci gjithashtu ishte regjisor i disa shfaqjeve në teatër, si: “Pas vdekjës”(Çajupi), “Mosha e bardhë”(D.Agolli), “Dan Shejtani”, “Engjulli i stacionit”, monodrama “Bihorasit”(dramatizim i veprës së autorit Q.Sijariq), “Ti mos u përziej”, etj. Pas largimit nga institucionet kulturore si pjesë e fushatës së regjimit të Milosheviqit, ai vazhdoi kontributin e tij të çmuar artistik me produksione televizive.

Pas çlirimit, si për të vendosur gjërat në vendin e tyre, Ademi ju rikthye krijimtarisë artistike me vrull edhe më të lartë. Krahas krijimtarisë artistike ai nuk pushoi së qenuri deri në çastet e fundit të jetës së tij një qytetar i angazhuar për të mirën e përbashkët. Si deputet i Kuvendit të Kosovës në legjislaturën e gjashtë, ai dha një kontribut të rëndësishëm.

Vdekja e Adem Mikullovcit është humbje e madhe jo vetëm për familjarët e miqtë, por edhe një humbje e pazëvendësueshme për komunitetin artistik, artin në përgjithësi dhe skenën ku vihej drejtësia përballë padrejtësisë, ndershmëria në vend të pandershmërisë, liria kundër okupimit dhe atdhedashuria përballë dorëzimit.

Lëvizja VETËVENDOSJE! ju shprehë ngushëllime të sinqerta familjes, miqve dhe të afërmve të Adem Mikullovcit, artistëve, të gjithë aktivistëve të Lëvizjes VETËVENDOSJE! dhe të gjithë qytetarëve të Republikës. Vepra dhe shembulli i tij do të na mbajnë përgjithnjë pranë tij e në rrugën e tij, kurse atë përgjithmonë në mesin e zemrat tona.

Sot, një delegacion i prirë nga Kryetari i Lëvizjes VETËVENDOSJE!, Albin Kurti, së bashku me anëtarë të kryesisë, deputetët të grupit parlamentar dhe aktivistë të Lëvizjes bënë homazhe në Teatrit Kombëtar në nderim të figurës së tij.

Kryetari i Lëvizjes VETËVENDOSJE!, z. Albin Kurti, ish ministri i Punëve të Jashtme dhe Diasporës, z. Glauk Konjufca, dhe asistentja ekzekutive e kryetarit, znj. Valë Gjonbalaj, sot gjatë ditës pritën në takim Përfaqësuesin Special të Norvegjisë për Ballkan, z. Arne Sannes Bjørnstad, dhe ambasadorin e Norvegjisë në Kosovë, z. Jens Erik Grøndahl.

Biseda përgjatë takimit përfshiu shumë tema. U diskutua mbi situatën tejet të rënduar me COVID-19 nga qershori e sëkëndejmi, dhe rrezikun e përkeqësimit me ardhjen e stinës së vjeshtës dhe dimrit. Bashkëpunimi ndërmjet dy vendeve është shprehur edhe në ndihmat e fundit me 20 respiratorë nga Norvegjia. Ndër çështjet e trajtuara ishte edhe situata gjeopolitike në Ballkan e më gjerë, dialogu me Serbinë dhe katër lëndët e adresuara nga VETËVENDOSJE! në Gjykatën Kushtetuese për të cilat po priten vendimet, si dhe përgatitjet që po bën Lëvizja për zgjedhjet e reja.

Në fund të takimit, Kryetari Kurti falenderoi Përfaqësuesin Special të Norvegjisë për Ballkan, z. Bjørnstad, dhe ambasadorin Grøndahl për përkrahjen e vazhdueshme dhe të parreshtuar të Norvegjisë ndaj Kosovës dhe u zotua për fuqizimin e bashkëpunimit mes dy vendeve.

Para fillimit të vitit të ri shkollor, Lëvizja VETËVENDOSJE! ka ftuar ministrin e Arsimit dhe Shkencës për të raportuar në Komisionin për Arsim, Shkencë, Teknologji, Inovacion, Kulturë, Rini dhe Sport, dhe po ashtu ka bërë kërkesë për interpelancë me ministrin në fjalë për këtë çështje. Kurse sot, në ambientet e jashtme të Kuvendit të Kosovës, Lëvizja VETËVENDSOSJE! organizoi edhe një konferencë për media ku deputeti dhe anëtari i Lëvizjes në komisionin për arsim, Fitim Uka foli për qasjen joserioze të kësaj qeverie karshi fillimit të procesit arsimor.

Uka tha se kjo qeveri e paligjshme nuk e ka prioritet arsimin andaj edhe s’ka se si të ketë plan të mirëfilltë për fillimin e procesit arsimor. Ai përmendi angazhimin e sinqertë të prindërve, mësimdhënësve, drejtorëve të shkollave për fillimin e procesit mësimor duke kujtuar edhe shqetësimet që ata kanë me gjithë këtë paqartësi që ka lindë për shkak të keqqeverisjes së paligjshme.

“Sinjali i parë dhe më i rëndësishmi që kjo qeverisje nuk e ka fare prioritet arsimin dhe nuk është serioze në këtë drejtim është shkurtimi i buxhetit për arsim (në kohë të pandemisë kur do të duhej të investohej edhe më shumë në fushën e arsimit dhe të mundësohej një proces mësimor normal) për 12.5 milionë euro”, tha Uka, duke kujtuar që arsyetimi i dhënë për këtë ishte se gjithçka ishte në rregull dhe mësimi do të filloj me datë 1 shtator, që nuk ndodhi sipas tij.

“Nuk e kemi të qartë se kur do të fillojë mësimi për klasat e niveleve 7, 8, 9, 10, 11, 12. Nuk e kemi të qartë nëse këto klasa do të fillojnë me skenarin A-B të kombinuar apo ashtu siç thotë edhe ky vendim me një skenar të tretë të cilin shkollat mund ta vendosin vetë, në dakordim me Drejtoritë Komunale të Arsimit. Prandaj, pyetja e natyrshme që shtrohet është ku ishin deri më sot këta që nuk ia dolën t’i identifikojnë të gjitha shkollat dhe potencialet e tyre për të filluar mësimin, dhe si është e mundshme që edhe sot një javë para fillimit të mësimit për këto klasa nuk e kemi të qartë se si do të jetë skenari?!”,

“Krahas kësaj papërgjegjësie totale të këtij ministri të arsimit kemi parë një angazhim të jashtëzakonshëm të stafit të shkollave duke filluar nga menaxherët, drejtorët e deri tek mësimdhënësit, nxënësit e prindërit, për të nisur një vit të ri shkollor. Por me të drejtë sot, shumë mësimdhënës ngrisin shqetësimet e tyre jo vetëm për shëndetin e tyre por edhe të nxënësve, sepse kjo qeverisje iu premtoi që do të marrë parasysh të gjitha ato raste që kanë sëmundje kronike dhe do t’i lirojë nga procesi i mësimdhënies. Por ja që sot as që diskutohet për to.”

Uka po ashtu foli edhe për mungesën e kushteve dhe mjeteve për ndjekjen e mësimit ‘online’, si dhe faktin që shumë mësimdhënës janë deklaruar që nuk kanë kompetencën e duhur për të aplikuar mësimin virutal. Ai vuri në dukje edhe paraqitjen e rrejshme e të rrezikshme kundër të gjitha rekomandimeve të IKSHP-së, të z. Hoti në përurimin e shkollave të reja sot, kur përplot objekte shkollore nuk gëzojnë as kushtet bazike për t’i plotësuar rekomandimet e IKSHPK-së.

Deputeti Uka theksoi që në këtë pikë ku është Kosova, duhet të ndjeken mësimet e shteteve të tjera që kanë filluar procesin mësimor. Kjo edhe mund të jetë e pamundshme me këtë qeveri të paligjshme që interesohet vetëm për kompromise e koncesione me Serbinë. Andaj deputeti Uka apeloi te nxënësit, mësimdhënësit, prindërit që të kujdesen, ruajnë dhe ta kenë në fokus shëndetin e tyre.