Javën e Lëvizjes e fillojmë nesër me Ditën e Lidhjes. Këtë 142 vjetor, te Platoja e Lidhjes së Prizrenit, duke filluar nga ora 19:00, Glauk Konjufca dhe historianja Mrika Limani Myrtaj do të mbajnë një bashkëbisedim për rëndësinë historike dhe politike të Lidhjes së Prizrenit. Ndërsa, në ora 21:00 do të bëhet ndezja e flakadanëve në kalanë e qytetit, pa marshim kësaj radhe. Ju ftojmë të merrni pjesë.

Në 21 vjetorin e çlirimit dhe 15 vjetorin e themelimit të Lëvizjes do të mblidhemi së bashku në Prishtinë, në Sheshin “Skënderbeu”, në orën 17:00, gjithnjë në përputhje me rekomandimet duke ruajtur distancën fizike.

Shihemi të premten në Prishtinë.

Sot, Kryetari Albin Kurti vizitoi disa prej pikave ku po nënshkruhet peticioni në Prishtinë. Së bashku me disa aktivistë, ai fillimisht vizitoi pikën në lagjen Kodra e Trimave, ku përherë numri i nënshkruesve është i madh, për të vazhduar në Tauk Bahçen e freskët ku takoi disa qytetarët që po e nënshkruanin peticionin, e më pas edhe në lagjen Mati, te rrethi i qytetit dhe sheshi qendror.

Nënshkrimi i peticionit po vazhdon nëpër të gjitha qytetet. Mbrëmë kaloi numrin 150 mijë, dhe besojmë se këtë javë do ta kaloj numrin 200 mijë. Qytetarët janë të bindur se e vetmja mënyrë për ta rikthyer një qeverisje legjitime në vend është përmes zgjedhjeve të lira që duhet të organizohen sa më parë.

Ditëve në vijim, Kryetari Kurti do t’i vizitojë edhe qytetet tjera ku po nënshkruhet peticioni.

Sot, një grup i deputetëve të Lëvizjes VETËVENDOSJE! ka proceduar nismën ligjore për ndryshimin dhe plotësimin e Ligjit për Zgjedhje të Përgjithshme, përmes të cilit iu mundësohet bashkatdhetarëve që të përmbushin të drejtën e tyre kushtetuese për të votuar në ambasada dhe konsullata të Republikës së Kosovës.

Mërgata përbën më shumë se 1/3 e popullsisë së tërësishme në Kosovë. Roli dhe kontributi i bashkatdhetarëve ka qenë dhe vazhdon të jetë shumë i rëndësishëm në jetën ekonomike dhe sociale e politike në Kosovë. Rreth 700 milionë euro në vit, vijnë nga mërgata. Fatkeqësisht dhe jo për fajin e saj, roli politik i mërgatës është reduktuar shumë kur bëhet fjalë përfshirjen e tyre në vendimmarrje.

Megjithëse, formalisht mundësia e pjesëmarrjes në zgjedhje ju njihej, praktikisht atyre ju është pamundësuar përmes burokracisë e pengesave teknike e administrative. Mospërputhja e numrit të madh të bashkatdhetarëve, kontributit politik, kombëtar dhe ekonomik të tyre dhe përfshirjes në zgjedhje, duhet të marrë fund, duke ju ofruar mundësi që të votojnë aty ku jetojnë, në ambasada dhe konsullata të Republikës së Kosovës.

Me projektligjin e propozuar nga deputetët e Lëvizjes VETËVENDOSJE! votuesit nga mërgata do ta kenë mundësinë që të realizojnë të drejtën e tyre kushtetuese që të votojnë në ambasadat dhe konsullatat e Republikës së Kosovës në vendet ku jetojnë.

Kosova ka nevojë për zgjedhje të reja sepse vetëm përmes tyre mund të ketë legjitimitet qeverisja e re. Për të dalë nga kjo krizë, si hap të parë po mbledhim nënshkrimet për peticionin që ka vetëm këtë kërkesë: zgjedhje të reja.

Jo qeveri pa zgjedhje e për vjedhje. Jo qeveri për ndarje e copëtim. Por zgjedhje, demokraci e zhvillim.

https://www.duamzgjedhje.org/

Sot u bënë një javë prej kur filluam mbledhjen e nënshkrimeve në peticionin online për të vazhduar të nesërmen edhe atë fizik gjithandej nëpër Republikën e Kosovës. Kërkesa është një: “Duam Zgjedhje!”, ndërkaq përgjigja qytetare është e jashtëzakonshme në mbështetje të kësaj kërkese të drejtë dhe legjitime përkundër atyre që pasi tradhtuan vullnetin e shprehur me 6 tetor vazhduan edhe ta vjedhin atë. Me vullnet të vjedhur nuk do të mund as të qeverisin e as të përvjedhin ndonjë marrëveshje të dëmshme për vendin.

Deri sot janë mbledhur 150 mijë nënshkrime dhe peticioni ende po vazhdon. Ditëve në vijim do të fillojmë mbledhjen e nënshkrimeve edhe në çdo fshat e lagje për të lehtësuar procesin e nëshkrimit të peticionit për të gjithë qytetarët që duan ta plotësojnë atë.

#duamzgjedhje

Qeveria Hoti, në të cilën nuk bën pjesë asnjë udhëheqës politik, por e sponsorizuar në prapaskenë prej Aleksandar Vuçiqit e Hashim Thaçit dhe e mbështetur qyqarisht prej Isa Mustafës, Kadri Veselit, Ramush Haradinajt e Fatmir Limajt, shfuqizoi sot reciprocitetin.

Tash e tutje Kosova e sunduar nga klika e mësipërme dhe nga qeveria kukull, ka hequr dorë prej emrit të saj “Republika e Kosovës”, dhe ka pranuar si të vlefshme dokumentacionet ku e quajnë “Kosovo i Metohija”. Ky skandal vetëdhunues u përshëndet menjëherë nga Vuçiqi. Veseli e të tjerët iu nënshtruan Hotit, shërbëtorit të radhës të çiftit Vuçiq-Thaçi. Arsyeja pse u përshëndet: sepse siç kishte deklaruar vetë Vuçiqi, reciprociteti po i kushtonte Serbisë miliona euro në ditë, para të cilat mbeteshin në Kosovë dhe ndihmonin biznesin tonë vendor.

Edhe pse Vuçiqi në bisedë me kancelaren Merkel ishte deklaruar i gatshëm ta vazhdonte dialogun edhe me reciprocitet, gjë e cila do të duhej të kapitalizohej menjëherë nga çdo politikan shqiptar, pushtetarët e vjetër e hoqën reciprocitetin. Edhe pse kamionat e ardhur nga Serbia nisën të respektonin rregullat e reciprocitetit dhe të përdornin dokumenta me emërtimin zyrtar “Republika e Kosovës”, humbësit e zgjedhjeve e hoqën reciprocitetin.

Kosova për ta është si një pasuri e gjetur, të cilën mund ta shpenzojnë e ta bëjnë rrush e kumbulla, për qejfet e tyre të pangopshme, apo për të paguar avokatët që i mbrojnë prej të shkuarës së errët. Ata nuk e shohin Kosovën as si toka e trashëguar gjysh-stërgjyshi, vaditur me gjakun, djersën e lotët e paraardhësve tanë, e as si hapësirën jetike ku do t’u mundësohet frymëmarrja fëmijëve, nipave e stërnipave tanë. Klika e udhëheqësve të LDK, PDK, AAK, Nisma-s dhe tarafeve të tyre, nuk njohin detyrë historike. Ata i ofrojnë si të ardhme njerëzve mërgimin, e si të tashme shkatërrimin e sovranitetit, dinjitetit, reciprocitetit, drejtësisë dhe zhvillimit.

Por pakënaqësia e mospajtimi qytetar me këto vendime e me këtë qeveri, janë më të larta se kurrë. Thaçi mund të planifikojë që me një qeveri marionetash të bëhet president i fortë si Vuçiqi, por autokrati ynë, ndryshe nga autokrati serb, nuk gëzon asnjë grimë legjitimiteti demokratik. Thaçi dhe partitë e tij nuk i fitojnë zgjedhjet, populli u ka dalë kundër. Asnjë marrëveshje e asnjë vendim nuk do të mund të vihet në zbatim në këtë krizë legjitimiteti demokratik e politik, sepse shumica dërrmuese mbështet Vetëvendosjen, për reciprocitet e kundër copëtimit të vendit. Ata e hoqën reciprocitetin për të lidhur marrëveshjen e ligë, por kudo në botë, atyre që mendojnë se mund të merren vesh e të sundojnë pa popull, u del shpejt afati.

Truprojat e presidentit përçarës kanë goditur dhe e kanë rrahur deri në gjakosje aktivistin Veron Hasani vetëm pse ky i fundit ka guxuar të ngrejë zërin gjatë kohës kur Hashim Thaçi po mbante konferencë për media në shesh. Aktivisti Veron Hasani ka thirrur “o hajn!”, duke besuar se në Kosovë ende funksionon demokracia dhe liria e fjalës. Por kështu nuk mendon Thaçi dhe truprojat e tij.

Nga pamjet e videos bashkangjitur, xhiruar nga mediat, shihet qartë sjellja çnjerëzore dhe brutale e këtyre truprojave ndaj një qytetari që nuk ka bërë asgjë, përveçse ka folur. Me të mbaruar punë me qytetarin, truprojat i janë kthyer gazetarit, i cili po ashtu është sulmuar që t’i merret videoja. Mbulimi i gjurmëve, karakteristikë e bashkëpunëtorëve të këtij presidenti.

Një regjim që nuk e duron të vërtetën, kritikën, dhe drejtësinë mund të sillet vetëm në këtë mënyrë.
Lëvizja VETËVENDOSJE! aktivistët dhe asnjë qytetar nuk ua ka frikën shkelmave të fundit të Pronto-Presidentit që ka humbur toruan. Së bashku me qytetarët ne do ta ndalim atë, dhe gjithë abuzuesit.

Ne kërkojmë lirimin e menjëhershëm të Veronit, si dhe kërkojmë nga organet e rendit arrestimin e këtyre personave të cilët godasin qytetarët vetëm pse flasin lirshëm në sheshet e Republikës. Ftojmë edhe organizatat që merren me monitorimin e të drejtave njerëzore e politike, me demokracinë e lirinë e fjalës, të reagojnë kundër kësaj arrogance diktatoriale që po tenton të imponohet nga ana e Thaçit në Kosovë.

Qytetarët janë të bindur se cili është lloji i qeverisjes që i duhet vendit. Me 6 tetor ata i dhanë fund mendësisë 20 vjeçare te qeverisjes me korrupsion, krim e cenuese të sovranitetit, ndërkohë gjatë kësaj kohe jemi dëshmitarë së në Kosovë ka shpresë dhe se mund të qeveriset me duar të pastra. Ndryshimi që ka ndodhur nuk mund të kthehet mbrapa, ndërkaq zgjedhjet janë zgjidhja e vetme përpara.

Përmes peticionit që kemi filluar dje gjithandej Republikës janë mbledhur mbi 25 mijë nënshkrime fizike. Interesimi i jashtëzakonshëm qytetar na jep vullnet edhe më shumë që të vazhdojmë punën për të cilën jemi zotuar dhe rrugën përpara që kemi nisur.

Ne do t’i rrëzojmë abuzuesit nga pushteti, sado të ndihen të fortë e arrogantë sot.

Lëvizja VETËVENDOSJE! (LVV) ka mbajtur sot një mbledhje të përbashkët të Kryesisë me Grupin e saj Parlamentar. Aty u diskutua situata politike në Kosovë, sidomos zhvillimet e fundit.

U kritikua ashpër Aktgjykimi i fundit i Gjykatës Kushtetuese që e vulosi këtë Gjykatë si të kapur, madje edhe më fort se shteti ynë në përgjithësi. Përjashtimi edhe i zgjedhjeve edhe i fituesit është i pashembullt dhe e bën këtë Aktgjykim të padrejtë e të papranueshëm.

U vlerësua mbështetja e madhe e qytetarëve, puna e mirë e Qeverisë në detyrë, dhe organizimi nga aktivistët i peticionit “Duam Zgjedhje!”. Duket qartë se ky peticion do t’i thyejë të gjitha rekordet duke u bërë peticioni më i madh në Kosovën e pasluftës.

U kundërshtua tentimi për qeveri të re pa zgjedhje të reja nga regjimi i vjetër. Kjo qeveri do të ishte qeveri e presidentit. Ajo nuk do të ngërthente as 1/3 e mbështetjes qytetare elektorale dhe do të varej komplet nga Lista Serbe. Asisoj, negociatat brenda-qeveritare të saj do të bëheshin negociata ndër-shtetërore me Serbinë.

Protestat po bëhen të pashmangshme. Megjithatë, LVV nuk do të organizojë protestë nesër. Për neve qeveria nuk është qëllim, por mjet për shtetin dhe shërbim për qytetarin. Natyrisht, nuk duam të dekurajojmë protesta të tjera të paralajmëruara nga grupe të ndryshme të qytetarëve.

Me pikëllim morëm lajmin për vdekjen e dy punëtorëve, inxhinierit, Haki Arifit dhe xehetarit, Idriz Gërbeshi nga shembja e dheut në horizontin e katërt të minierës së Artanës.

Lëvizja VETËVENDOSJE! shpreh ngushëllimet e sinqerta për familjet e dy punëtorëve. Vdekja në vendin e punës na ka shqetësuar përherë dhe përherë kemi reaguar. Kryeministri dhe kryetari i Lëvizjes, Albin Kurti, i ka vizituar dhe i ka ngushëlluar minatorët dhe familjet e tyre. Qeveria ka ndarë edhe një shumë parash në ndihmë të familjeve, e bursa për fëmijët e tyre. Për punëtorët duhet të ketë kushte më të mira të punës, e sidomos siguri sa më të lartë në vendet ku ata punojnë. Do ta vazhdojmë përpjekjen në këtë drejtim derisa ngjarje si kjo sot të mos ndodhin më. Bashkëndjejmë me familjet e dy punëtorëve nga Artana.

Marrë parasysh rëndësinë dhe ndikimin e madh për rendin kushtetues dhe demokracinë në vendin tonë, domosdoshmërinë për pasqyruar gjithë procesin e shqyrtimit dhe të vendosjes nga ana e Gjykatës Kushtetuese për dekretin antikushtetues të presidentit, sot Kryetari i Grupit Parlamentar i Lëvizjes VETËVEDOSJE! Z. Rexhep Selimi ka kërkuar nga Gjykata që në përputhje me përgjegjësinë për të qenë e hapur dhe transparente për publikun, e veçanërisht për palët, që në afat sa më të shpejtë dhe në format autentik të na ofrojë të gjitha dokumentet, duke përfshirë edhe procesverbalet dhe transkriptet që pasqyrojnë procesin e shqyrtimit dhe të marrjes së vendimit nga ana e Gjykatës Kushtetuese për rastin KO72/20.

Dekreti antikushtetues i Presidentit nuk mund të justifikohet përmes Kushtetutës së Republikës së Kosovës, ashtu sikurse aktgjykimi i Gjykatës Kushtetuese është vënë mbi Kushtetutën për ta arsyetuar Presidentin. Andaj si palë në këtë rast, kërkojmë të njihemi me dokumentet që dëshmojnë se mbi çfarë baze është argumentuar ajo që nuk mund të argumentohej në dritën e Kushtetutës së Republikës së Kosovës.

Sot mbi 5 mijë pjesëmarrës, një pjesë e vogël e qytetarëve që mbështesin ndryshimin, treguan se protesta është e mundshme të organizohet edhe në këtë kohë, duke respektuar masat e rekomanduara nga Institucionet e Shëndetësisë dhe në bashkëpunim me Policinë e Kosovës. Pjesëmarrja masive, e organizuar në formën e një performance, dëshmoi edhe njëherë se vullneti i shumicës së qytetarëve është që kriza politike të zgjidhet pa e shkelur kushtetutën, dhe e vetmja mënyrë për këtë është që të organizohen zgjedhjet sa më parë.

Asnjë zhvillim politik nuk mund të jetë i shëndetshëm nëse shmang mundësinë e protestës qytetare. Në vendin tonë, edhe pse shumë ish-pushtetarë nga e kaluara do ta dëshironin mungesën e saj, prova e sotshme na dha edhe përvojën edhe dijen se mund të organizohemi në numër edhe më të madh nëse është nevoja, gjithmonë duke respektuar masat e Institucioneve të Shëndetësisë.

Nuk na mungon vullneti për ta mbrojtur rendin demokratik. Nuk na mungon vendosmëria për të refuzuar nënshtrimin ndaj regjimit të vjetër. Janë këto provat e fundit për llojin e rendit dhe shoqërisë që e aspirojmë. Duam zgjedhje sa më parë!

Lëvizja VETËVENDOSJE! uron të gjithë besimtarët myslimanë dhe shqiptarët kudo që ndodhen, për festën e Fitër Bajramit.

Pas mësimeve që na jep muaji i shenjtë i Ramazanit për dëlirësi e solidaritet, qëndrueshmëri e vetëpërmbajtje ndaj sprovave të përditshme, sot besimtarët myslimanë festojnë Fitër Bajramin.

Si përherë, festa e Fitër Bajramit shënon fundin e rrugëtimit njëmujor të prirë nga mishërimi me gjendjen e përditshme të tjetrit, me shtimin e ndjeshmërisë për nevojtarët e të varfërit dhe domosdoshmërinë për t’iu ardhur në ndihmë.

Skamja dhe begatia janë dy anë të së njëjtës medalje, të cilat i përbashkon porosia që kjo festë përçon, shtrirja e dorës së solidaritetit dhe ngritja e kësaj shtrese drejt mirëqenies së përbashkët dhe për gjithë.

Sivjet, Fitër Bajramin do ta festojmë më ndryshe se herët tjera. Përballja me pandeminë kudo në botë e ka bërë të pazakontë jetën. Por edhe kjo përmbajtje për hir të mirëqenies kolektive kuptimëson akoma më shumë këtë festë dhe lartëson edhe më shumë çdo besimtar.

Gëzuar Fitër Bajramin të gjithë qytetarëve të Kosovës të besimit islam, duke iu dëshiruar festë të qetë e mbarësi, duke shpresuar që Bajrami i ardhshëm të na gjejë në rrethana tjera festimi, shumë më të mira për vendin e qytetarët, të zakonshme për festën e Bajramit.

Votimi në një kohë pandemie nuk ndryshon edhe aq prej atij pa të. Përveç kujdesit të shtuar, gjithçka tjetër është e ngjashme.

Aktivistët e Lëvizjes VETËVENDOSJE!, të frymëzuar nga forma e organizimit të zgjedhjeve në Korenë e Jugut, të mbajtura me 15 prill 2020, kanë inskenuar një proces të ngjashëm zgjedhor.

Hapat janë shumë të thjeshtë se si do të duhet të votohet, madje janë vetëm dy të tillë:

1. Votuesit duhet të kenë maska dhe të qëndrojnë 1.5 metra larg njëri-tjetrit gjatë kohës së pritjes në radhë,

2. Votuesve do të u matet temperatura në hyrje të klasës:

2.1. Nëse temperaturën e ka deri në 37.5 gradë celsius, votuesi mund të votoj në atë klasë me procedura sikur nga e kaluara vetëm me disa masa shtesë të sigurisë,

2.2. Nëse temperaturën e ka më shumë se 37.5 gradë celsius, atëherë votuesi do të ndahet në një klasë tjetër ku i gjithë stafi i KQZ-së do të jetë i pajisur me veshje kundër pandemisë COVID-19. Pas votimit ai/ajo shoqërohet për t’i bërë analizat.

Këtu e 28 vite më parë po mbaheshin zgjedhjet e para në Kosovën e okupuar. Ndonëse nën shtetrrethim nga Serbia e pa institucione, populli i Kosovës arriti t’i organizoj zgjedhjet e para në vend. Tani mundësitë janë edhe më të mëdha dhe se zgjedhjet janë e vetmja zgjidhje.

21 vite më parë, në hapësirat e burgut të Dubravës, nën organizimin shtetëror të Serbisë, u vranë 160 të burgosur politikë shqiptarë dhe u plagosën mbi 300 të tjerë, në njërën prej masakrave më të tmerrshme të luftës së fundit. Nga data 19 maj, deri më 24 maj, të burgosurit shqiptarë që ishin sjellë aty nga të gjitha burgjet e Kosovës, dhe po përjetonin ditët më të rënda të tyre duke u përballur me një forcë që ishte mposhtur tashmë dhe që po hakmerrej mbi ta duke i masakruar. Në ato ditë plot me tortura, dhunime e vrasje pati të burgosur që arritën të shpëtonin dhe të arratiseshin përmes, siç shpjegojnë edhe vetë ata, përpjekjeve gati mbinjerëzore.

Sot, kur shënohet 21 vjetori i kësaj masakre kujtojmë që përmes fakteve dhe dëshmive të ndryshme është bërë një kallëzim penal nga shoqata e të burgosurve politik të Kosovës, por asgjë më tepër nga qeveritë e kaluara. Qeveria e tanishme, ka ndërmarrë nismën për themelimin e Institutit për Hulumtimin e krimeve të kryera gjatë luftës në Kosovë, me qëllim që të bëjë një adresim serioz e profesional të këtyre krimeve. 21 vite pas, ndonëse shumë vonë, krimet e luftës duhet t’i trajtojmë seriozisht. Vënia e drejtësisë për këtë masakër, si dhe për masakrat tjera të kryera nga shteti serb në Kosovë duhet të ndodhë dhe pa asnjë vonesë të mëtutjeme.

Sot, Kryeministri Kurti së bashku me Ministren e Ekonomisë, Rozeta Hajdari dhe Ministrin e Financave, Besnik Bislimi, vizituan Trepçën, ku takuan Bordin e Përkohshëm dhe Ushtruesin e Detyrës së Kryeshefit të kësaj Ndërmarrje për t’i njoftuar për dy nismat e qeverisë që kanë të bëjnë me injeksionin financiar, subvencionimin prej 3.5 milionë euro nga qeveria për pagat e punëtoreve dhe obligimet e kësaj ndërmarrje, dhe për iniciativën e rihapjes së Terminalit Doganor në Trepçë.

“Qëllimi i këtij takimi ishte që në njërën anë t’i njoftojmë që Qeveria në Detyrë e Republikës së Kosovës tashmë ka ndarë një subvencion prej mbi 3.5 milionë euro për Trepçën, në mënyrë që Trepça të mund t’i paguaj edhe obligimet por edhe pagat e punëtorëve të saj. Në anën tjetër, po i bëjmë përgatitjet në mënyrë që terminali doganor i cili ka qenë këtu në Trepçë nga viti 2002 deri në vitin 2013 të kthehet, dhe asisoj të siguroj të hyra për Trepçën. Padrejtësisht Trepçës i është marrë Terminali Doganor në vitin 2013 dhe ne duam që kjo të korrigjohet.”

“Ne bashkëndjejmë me Kryeshefin, me udhëheqjen e Trepçës, me inxhinierët e punëtorët e saj, meqenëse në bursën ndërkombëtare kanë rënë çmimet e metaleve, për shkak të pandemisë COVID-19. Sido që të jetë prodhimi në Trepçë ka një ngritje të lehtë dhe ne dëshirojmë që në të ardhmen edhe të shtohet prodhimi por edhe të shtohet produktiviteti. Prandaj do të na duhet të hulumtojmë për teknologji të reja në mënyrë që të hapen edhe horizonte të reja dhe ky produktivitet i Trepçës të na nxjerrë nga Trepça si një barrë sociale tek një kapacitet zhvillimor çfarë e njohim prej ngaherë. Pra, t’ia kthejmë Trepçës si krenari kombëtare shkëlqimin ekonomik edhe zhvillimor ashtu që të mos varet Trepça nga qeveria por e gjithë Kosova të varet nga Trepça e cila do të përparoj duke e rritur edhe prodhimin edhe produktivitetin”, tha Kryeministri Kurti.

Edhe sot po vazhdojnë të mbahen të burgosur disa nga protestuesit që kundërshtuan rrënimin e Teatrit Kombëtar nga Qeveria dhe Bashkia në Tiranë, mes tyre dhe Drejtori Ekzekutiv i Qendrës së Lëvizjes VETËVENDOSJE! në Shqipëri Boiken Abazi.

Boiken Abazi përveç kontributit të tij si aktivist i rëndësishëm për Lëvizjen VETËVENDOSJE! shquhet edhe si qytetar i kulturuar e intelektual i angazhuar. Ndalimi i tij shpresojmë të mos jetë hakmarrje e ndonjë idhnaku që mban inat për prishjen e pazareve me Vuçiqin. Vuçiqi mund të jetë mik individual i dikujt, por ai nuk mund të jetë kurrë mik i shqiptarëve, për shkak të historisë e politikës që ai përfaqëson.

Ndërtesa e Teatrit ishte vlerë e dashur për qytetarët, shkatërrimi i saj ishte barbari e paqytetëruar. Protestuesit ishin paqësorë, prishja e Teatrit ishte brutale. Ata po mbahen pa arsyetim dhe me urdhër të prerë politik. Përgjegjësit politikë atje duket qartazi se po dëshirojnë ta bllokojnë shprehjen qytetare në formë proteste dhe pjesëmarrjen publike me argumente në kundërshtimin e rrënimit të Teatrit Kombëtar. Mirëpo çdo përpjekje për ta ndaluar protestën qytetare me burgosje është e dëshmuar që vetëm e rrit protestën dhe rezistencën.

Kërkojmë nga organet e drejtësisë së Republikës së Shqipërisë që të ruajnë integritetin duke mos e vijuar më tej këtë burgim politik të protestuesve si dhe të nisin hetimet për rrënuesit e Teatrit Kombëtar dhe ata që ushtruan dhunë mbi protestuesit, për shkelësit e vërtetë të Kushtetutës të ligjeve në fuqi, e të procedurave demokratike dhe transparencës, sa i përket vendimmarrjes.

Duket sikur demokracia mezi po mbahet në Shqipëri. Por demokracia është aftësia e qytetarëve për t’i befasuar pushtetarët, e nuk është spektakli i propagandës së pushtetit, që ua ledhaton mjekrat atyre. Ata që kanë besuar se pushteti i tyre është i pakufishëm, dhe se mund të shkelin e të përjashtojnë grupet shoqërore duke i etiketuar si pakica, përfundojnë të zhgënjyer. Duhet liruar Boiken Abazi, duhen liruar protestuesit dhe të mbahen përgjegjës rrënuesit, që të mos rrënohet e gjitha.

Prishtinë, 20 maj, 2020
Lëvizja VETËVENDOSJE!

Kryeministri Kurti, së bashku me Kryetarin e Komunës së Prizrenit, Mytaher Haskuka dhe ambasadorin gjerman, Christian Heldt, sot bënë hapjen e Parkut të Inovacionit dhe Trajnimeve në Prizren.

Nga sot, të gjitha bizneset mund të aplikojnë për hapësirën 40 hektarëshe që ka infrastrukturë të gatshme, nëpërmjet faqes itp-prizren.com/ . Ky park do të jetë në shërbim të zhvillimit ekonomik dhe zgjerimit të perspektivës për të rinjtë ndërmarrës.

Në këtë hapësirë do të vendoset edhe Qendra e Ndërmarrësisë dhe Inovacionit, si dhe Muzeu Oldtimer dhe Muzeu i Artit Modern, që do të hapen nga Komuna e Prizrenit.

Në 21 vjetorin e rrëmbimit të Ukshin Hotit, teoricienit dhe aktivistit më të shkëlqyer politik të çështjes kombëtare, Ministri i Punëve të Jashtme, Glauk Konjufca, së bashku me deputetët Salih Zyba, Arbër Rexhaj dhe aktivistë të tjerë vizituan sot shtëpinë muze të Ukshin Hotit për të rikujtuar si veprën e sakrificën e tij për liri, ashtu edhe nevojën për drejtësi dhe zbardhje të fatit të tij e të shumë të rrëmbyerve të tjerëve që sot na mungojnë.

Profesori Ukshin Hoti, ose baca Ukë, ndërtoi bazën teorike të filozofisë politike të shqiptarëve dhe bashkoi njerëzit e thjeshtë drejtë një detyre aspak të lehtë për çlirim, barazi e pavarësi kombëtare.

Presidenti edhe njëherë sot gjatë konferencës për media tha një mori të pavërtetash dhe nxiti sërish përçarje. Këto të pavërteta të formuluara kësilloj janë padyshim të qëllimshme dhe marrë parasysh institucionin që përfaqëson janë edhe të papranueshme.

Për tre të pavërtetat më të fundit ne po konsiderojmë që t’i drejtohemi organeve të drejtësisë, sepse gjithë sa Presidenti tha është shpifje, fyen rëndë integritetin tonë politik, por edhe njerëzor dhe nxit përçarje e mosdurim.

Të tre këto deklarime që Presidenti tha janë larg të vërtetës ngase as nuk ka pasur vendime selektive mbi baza politike në Qendrën e Studentëve për karantim, as nuk ka pasur sinjale nga organet kompetente për rrezik ndaj deputetit Pacolli dhe nuk ka asnjë dëshmi të bazuar që dikush të marrë guximin të thotë që kemi të bëjmë me ‘shtyrje në vetëvrasje’. Përpjekja e Presidentit për të manipuluar politikisht vdekjen tragjike të një të riut tonë, pa i pritur as rezultatet e hetimeve zyrtare, është e patolerueshme në një shoqëri të civilizuar. I ndjeri dhe familja e tij nuk meritojnë një trajtim të tillë nga askush, lëre më nga një zyrtar i lartë shtetëror që, sipas Kushtetutës, do të duhej të përfaqësonte unitetin e popullit.

Akuza të tilla janë të rënda, dhe për to duhet marrë përgjegjësi. Është tej mase e trishtueshme të shihet se si Presidenti mundohet të përdorë dhimbjen dhe fatkeqësinë e dikujt tjetër, për të hedhur baltë mbi institucionet e vendit.

Presidenti, është duke mbuluar me turp postin që e mban, duke zvetënuar integritetin moral e shtetëror të figurës së Presidentit duke u kthyer në një zëdhënës të insinuatave të fabrikuara nga vet ai dhe rrjeti i ndikimit të tij ilegal. Ndjehet e dëshmohet se qytetarët në shumicë janë të distancuar nga një frymë e tillë përçarëse dhe jorrallë edhe në mungesë të humanitetit.