Anëtari i Kryesisë Sami Kurteshi dhe aktivisti Getoar Mjeku, në cilësinë e përfaqësuesit ligjor, dorëzuan me 24 dhjetor padi ndaj vendimit të ZRRE-së për shtimin e kapaciteteve me tarifa nxitëse për sistemet solare fotovoltaike.

Me 14 janar u njoftuam nga Gjykata Themelore me Aktvendimin ku aprovohet kërkesa jonë për pezullimin e këtij vendimi deri sa kjo çështje të shqyrtohet nga Gjykata.

Me rastin e 21 vjetorit të masakrës së Reçakut, ku u vranë 45 civilë shqiptarë dhe 11 ushtarë të UÇK-së të cilët po i mbronin kufomat që të mos rrëmbeheshin nga forcat serbe, një delegacion i Lëvizjes VETËVENDOSJE! i prirë nga Kryetari Albin Kurti mëngjesin e sotëm bëri homazhe te kompleksi memorial në Reçak, me ç’ rast Kryetari Kurti mbajti edhe një fjalë rasti ku tha se masakra e tronditi dhe e tmerroi Kosovën por edhe e ndërgjegjësoi dhe alarmoi botën demokratike dhe diplomacinë ndërkombëtare çfarë ishte vendimtare që NATO-ja ta bombardonte Jugosllavinë e Millosheviqit.

Sot, Kryetari Albin Kurti së bashku me Nënkryetarin e Lëvizjes Besnik Bislimin priti në takim ambasadorin e mirënjohur, mikun e Kosovës, z. William Walker.

Në prag të përvjetorit të 21-të të masakrës së Reçakut, u diskutua për rëndësinë e historisë në politikë, për përpjekjet nga Serbia për të mohuar krimet dhe për domosdoshmërinë e drejtësisë dhe zhdëmtimi për viktimat.

Në këtë takim miqësor u diskutua edhe për situatën aktuale politike në vend, me theks të veçantë formimin e institucioneve të reja të Republikës së Kosovës.

Sot u mbajt mbledhja e parë me Qendrat e Lëvizjes VETËVENDOSJE! për vitin 2020, ku mori pjesë edhe Kryetari Albin Kurti. Përveç çështjeve të rëndësishme organizative u diskutua edhe situata politike.

Më poshtë e gjeni fjalën e plotë të Kryetarit Kurti:

Të nderuar kryetarë dhe përfaqësues të Qendrave të Lëvizjes VETËVENDOSJE! në Kosovë dhe jashtë saj

Po e nis duke adresuar menjëherë elefantin në dhomë. Ka shumë çështje të ndryshme politike në aktualitetin tonë, por ato janë veçse orenditë e vjetra të dhomës.

Pyetjen kryesore që keni në mendje, atë se kur do të krijohet qeveria e re, nuk ka fytyrë që nuk e thotë dhe nuk ka qëndrim që arrin ta fshehë.

Shpresa e madhe e fitores dhe entuziazmi i tretë pas çlirimit dhe shpalljes së pavarësisë nuk po rezulton ende me një qeveri të re. Prandaj e kuptoj që ndjeheni të frustruar.

E vërteta është se ne nuk po presim.

Në frymën e fushatës për zgjedhjet e 6 tetorit ku VETËVENDOSJE! kishte premtuar se nuk do të ketë një koalicion me partitë e PAN-it dhe duke u bazuar në fushatën e LDK-së ku ata kërkonin koalicion vetëm me VETËVENDOSJE!-n, unë kam filluar menjëherë jetësimin e këtyre premtimeve zgjedhore.
Ne kemi filluar kontaktet, komunikimin dhe takimet me 7 tetor me LDK-në, vetëm disa orë pas shpalljes së rezultatit të zgjedhjeve preliminare, pa u vonuar dhe pa hezituar që shpresën dhe fitoren e madhe ta kthejmë sa më parë në qeverisje, por ajo që dukej lehtë e arritshme doli të jetë e mundimshme.

Siç ju tashmë e dini:

• Në përputhje me rezultatin zgjedhor, ne ofruam gjysmën e programit qeverisës dhe gjysmën e qeverisë duke kërkuar që të ecim më hapa të shpejtë drejt jetësimit të qeverisë.

• Kemi qenë të hapur për publikun si kurrë më parë. Negociatat për koalicionin qeverisës i kemi mbajtur në ambiente publike sikurse zyrat e partive dhe në institucionin më të lartë të republikës, në parlament.

• Mediat, e përmes tyre qytetarët, e kanë ditur kur ne shkojmë në takim, ku mbahet takimi dhe kur dalim nga takimi. Natyrisht ajo çka nuk kemi mundur të ofrojmë është transmetim direkt të negociatave për koalicionin, kjo pasi do të ishte kundër-produktive.

• Kemi ofruar transparencë të veprimeve tona për qytetarët për secilin veprim që kemi ndërmarrë. Çdo përpjekje e çdo lëvizje është ndarë me qytetarët.

• Kam theksuar që takimet nuk mund të jenë lajm, se vetëm rezultatet janë lajm. Se për pyetjet e vjetra nuk mund të kem përgjigje të reja, përderisa nuk ka marrëveshje.

• Kam publikuar emrat e ministrave tanë, të ministrave nga radhët e VETËVENDOSJE!-s që publiku ta dijë e t’i njohë paraprakisht.
Si rezultat i kësaj transparence, sot çdo qytetar e din se ku jemi dhe çfarë po ndodhë, prandaj edhe nuk kam shumë sekrete për të treguar sepse kërkesat tona i kemi bërë publike dhe kemi trajtuar kërkesat e partnerit në negociata me konfidencialitetin e duhur e të kërkuar.

Duhet t’i ruajmë nervat. Të punojmë e të angazhohemi, por me durim. Këto bisedime nuk janë të lehta. Edhe më të rënda na presin bisedimet në të ardhmen si qeveri me faktorë të ndryshëm.

Sigurisht që kemi mundur e është dashur të arrijmë marrëveshje deri më tash. Pasnesër bëhen 100 ditë prej zgjedhjeve të 6 tetorit. Mirëpo, prej këtyre 98 ditëve, për përbërjen e qeverisë ne kemi biseduar vetëm pas certifikimit të rezultateve. 52 ditë ne i kemi humbur, duke pritur a po ia kalojnë pragun një partie ndonëse e kemi ditur që kjo nuk luan fare rol në renditjen e subjekteve tona, se kjo nuk mund ta ndryshojë fitoren e Lëvizjes VETËVENDOSJE!. Së fundmi, unë jam ekspozuar dy herë në mënyrë të rrezikshme: me 26 dhjetor jam ekspozuar para dy milionë qytetarëve dhe gjithë deputetëve të Kuvendit, pa pasur marrëveshje me LDK-në; dhe, mandej në takimin te Presidenti sërish u detyrova të shkoj pa marrëveshje me LDK-në, por së paku kisha gjysmën e kabinetit tim të bërë publik.

Mirëpo, unë e di se ajo që ju jeni të interesuar sot është të dini se ku ndodhemi tash dhe çfarë na pret në ditët në vazhdim.

Në takimin e mbajtur të mërkuren, të dyja palët kemi bërë nga një propozim. Pra, kishte lëvizje. Të enjten, ne si Lëvizje VETËVENDOSJE! kemi bërë edhe dy propozime të reja. Për propozimin tonë të fundit na është thënë që do të trajtojnë në organet e tyre, meqenëse ky propozim ishte risi. Derisa nuk mund të flas se cila është përmbajtja e tij dhe çfarë do të bëjmë ne, pasi që kjo është pjesë e negociatave, unë mund të flas për atë se çka nuk do të bëjmë.

Ajo që ne nuk do të bëjmë është të kthehemi në kohë dhe të pretendojmë sikur asgjë nuk ka ndodhur.

Gjërat kanë ndodhur, takimet dhe përpjekjet tona kanë ndodhur, ofertat tona kanë ndodhur, afatet kushtetuese kanë ndodhur, seanca konstituive e Kuvendit ka ndodhur. Pra, nuk mund të shtiremi se këto ngjarje e këto afate nuk kanë ndodhur e nuk i ka parë i gjithë populli.

Prandaj tash duhet të fokusohemi në të tashmen dhe çka mund të ndodhë, sepse çka duhet të bëjmë.

Është e vërtetë se jemi afruar, dhe po u afruam edhe pak, do të bëjmë marrëveshje. Vullnet e interes kemi, por garancion nuk mund të jap sepse nuk varet nga unë. Jam i gatshëm të takohemi përditë, edhe të mbyllemi në ndonjë vend derisa të merremi vesh, por këtë mund ta them për veten, jo për palën tjetër.
Është e mundshme që përveç popullit të fitojnë të dyja palët, të dy subjektet tona, Lëvizja VETËVENDOSJE! dhe Lidhja Demokratike e Kosovës. Përveç qytetarëve, edhe të gjithë faktorët ndërkombëtarë e preferojnë koalicionin LVV-LDK.

Ajo që unë dua ta ritheksoj është se qytetarët me 6 tetor kanë votuar për ndryshim, jo për vazhdimësi dhe përsëritje, por për ndryshim.
Ajo që ne duhet të themi, e që nuk po e themi sa duhet, është se ne duhet të bëjmë të qartë se për çka qëndrojmë. Jo vetëm si liderë e si udhëheqës por edhe si qytetarë duhet ta bëjmë të qartë se ne nuk mund të kthehemi prapa, se ne nuk mund të bëjmë kompromis me të ardhmen dhe se asnjëherë nuk lodhemi e nuk do të lodhemi duke mbrojtur qëndrimet dhe parimet tona.

Ndryshimi me 6 tetor nuk ishte thjesht një fitore e një subjekti politik.

Të nesërmen me 7 tetor, qytetarët nuk thoshin se ka fituar Albini apo se ka fituar VETËVENDOSJE!-a, ata thoshin se më në fund fituam ne, pra fituam NE.

Ne, qytetarët e thjeshtë, pa biznese të mëdha, pa dajë të fortë, pa oligarkë mbrapa, pa media private, pa kontroll të shtetit e pa para të pista.

Ne, qytetarët të cilët kemi dijen dhe guximin, dinjitetin dhe integritetin, idealet dhe vetëbesimin por nuk fitonim dot në një shtet të kapur.

Gjyqtarët, prokurorët e policia mbeten ende të kapur nga politika, e politikanët ende të lidhur me krimin e korrupsionin. Vetëm tre ditë më parë, u shpall i zhdukur shoku i dhomës i Astrit Deharit duke na u rikujtuar se çfarë sistemi të drejtësisë kemi. Kurse, vetëm një javë më parë ju bë një shpërlarje speciale Klanit Pronto në gjykatë.

Punësimet e familjarëve në administratën e shtetit pa dije e pa dinjitet, duke përfshirë edhe sistemin tonë diplomatik nuk kanë pushuar, kurdisja e vjedhja nga tenderët e nga paraja publike nuk ka mbaruar.

Pra, le të mos harrojmë se në çfarë momenti ndodhemi. Ky është moment historik dhe definues i cili do të përcaktojë se çfarë republike dhe çfarë të ardhme do të ndërtojmë jo vetëm për veten por edhe për fëmijët tanë e brezat që vijnë pas nesh.

Fitorja e Lëvizjes VETËVENDOSJE! me 6 tetor është fitorja e qytetarëve ndaj shtetit të kapur.
Por ne nuk e marrim fitoren me 6 tetor si të mirëqenë dhe të garantuar. Në VETËVENDOSJE!, më shumë se cilindo subjekt tjetër, e kuptojmë se sa e vështirë është rruga drejt fitores dhe drejt ndryshimit.

Prandaj lodhjen nga pritja dhe frustrimin nga vonesat le t’i kthejmë në kërkesa, jo për marrëveshje të shpejtë dhe me çdo kusht, por për marrëveshjen e drejtë që na duhet për të bërë ndryshimin që duam.

Do të bëjmë shumëçka që të arrijmë marrëveshje. Por, gjithnjë përbrenda kornizave të kushtetutës dhe ligjit, të demokracisë dhe të rendit republikan, të vullnetit të popullit të shprehur në zgjedhjet e 6 tetorit 2019.

Ju falemnderit.

Një delegacion i Lëvizjes VETËVENDOSJE! i prirë nga Kryetari Kurti bën homazhe te varrezat e dëshmorëve në Gjilan me rastin e përvjetorit të vrasjes së dy dëshmorëve të kombit, Rexhep Mala dhe Nuhi Berisha si dhe vizituan kazermën e FSK-së që mban emrin e këtyre dy heronjve.

Po ashtu, Kyetari Kurti së bashku me deputetë të Kuvendit të Kosovës dhe zyrtarë e aktivistë të Qendrës sonë në Gjilan bën vizitë edhe te familjet Mala e Berisha.

Lavdi jetës dhe veprës së dëshmorëve të kombit

Sot u mbajt mbledhja e Kryesisë së Lëvizjes VETËVENDOSJE!. Në respektim të plotë të Kushtetutës së Republikës së Kosovës, Nenit 84 pika 14 dhe Aktgjykimit të Gjykatës Kushtetuese KO 103/14, subjekti ynë do të bëjë propozimin për mandatarin për Kryeministër. Këtë propozim do t’ia dërgojmë me shkresë zyrtare Presidentit të Republikës në ditët në vijim.

Pas pranimit të shkresës sonë zyrtare, në respekt të Kushtetutës, Nenit 95 pika 1, dhe Aktgjykimit të Gjykatës Kushtetuese presim që Presidenti t’ia drejtojë Dekretin me propozimin tonë Kuvendit të Republikës së Kosovës.

Ndërkohë kanë rifilluar bisedimet me drejtuesit e Lidhjes Demokratike të Kosovës për marrëveshjen për koalicionin e ardhshëm qeverisës.

8 janar 2020
Lëvizja VETËVENDOSJE!

Lëvizja VETËVENDOSJE! po e përcjell me shqetësim arrestimin e Nezir Mehmetajt nga autoritetet serbe, në kufirin Serbi-Kosovë kur Neziri po kthehej në vendin e vet. Nezir Mehmetaj kishte qenë në Serbi për të shoqëruar nënën e tij në spital në Nish, e veç kur po kthehej bashkë me nënën, e arrestuan.

Nezir Mehmetaj jeton e punon prej shumë vitesh në Zvicër, e është qytetar i Kosovës.

Arrestimi i Nezir Mehmetajt tregon se Serbia vazhdon qëndrimin agresiv ndaj Kosovës, sa herë që ka mundësi. E kjo sjellje duhet të na bëjë të reflektojmë për dy gabime tonat, së pari që përmes pjesëmarrjes në marrëdhënie joreciproke e josimetrike me Serbinë, ne si Kosovë kemi kontribuar në normalizimin e imazhit të një vendi anormal, e së dyti, për gjendjen e mjerueshme të shëndetësisë në vendin tonë, ku edhe 20 vite pas lufte njerëzit detyrohen të shkojnë për vizita të specializuara në Beograd e Nish, duke marrë përsipër rreziqet e një vendi që zyrtarisht i diskriminon shqiptarët e Kosovës.

Lëvizja VETËVENDOSJE! u bën thirrje institucioneve të Kosovës të angazhohen maksimalisht për lirimin e Nezir Mehmetajt. Ne solidarizohemi plotësisht me shqetësimin dhe tronditjen e familjarëve të tij, nga kjo sjellje hakmarrëse nga ana e shtetit që dikur na mbante të pushtuar e që na përndoqi me metoda gjenocidale. Qeveria e re duhet krijuar sa më shpejt edhe për ta ndryshuar këtë raport asimetrik dhe këtë pasivitet diplomatik, që po i lë qytetarët tanë nën kërcënim të vazhdueshëm.

Sot Gjykata Themelore në Prishtinë shpalli një aktgjykimin lirues për rastin më flagrant e më të mediatizuar kriminal e korruptiv në Kosovën e pasluftës, të njohur si ”Afera Pronto”. Ky rast përfshinte elementë të rëndësishëm të partive në pushtet, si dhe zyrtarë me pozita të larta në ekzekutiv, ndërmarrje publike, e prokurori. Vendimi i sotëm është skandaloz. Dëshmi se gjykatat janë kapur nga ekzekutivi, dhe ekzekutivi është kapur nga një rrjet korruptiv i ngjashëm me mafian.

Vendimi i sotëm i Gjykatës është goditje e drejtpërdrejtë ndaj nevojës së qytetarëve për drejtësi e për institucione ligjore të paanshme. Për më keq dhe si për ironi arsyetimi i Gjykatës ishte se nuk kishte prova të mjaftueshme çka çoi në lirimin e protagonistëve të “Aferës Pronto”, mirëpo vetëm bisedat telefonike të publikuara, emrat e atyre që flasin, dhe temat e bisedave, janë dëshmi të pakontestueshme e prova të qarta se krimi e klientela po qeveris, dhe janë aty përbrenda institucioneve të drejtësisë.

Aty ku padrejtësia shpallet publikisht, nevoja për ndryshim është më e madhe se kurrë. Aty ku krimi sundon i pashqetësuar, zemrat e viktimave të padrejtësisë vlojnë. Lirimi i këtyre personave është dëshmia më e lartë se institucionet tona janë të kapura dhe është nevojë urgjente që të çlirohen. Lëvizja VETËVENDOSJE! e ka prioritet të saj luftën kundër kapjes së shtetit, gjë që do të zbatohet e do të jetë angazhim kryesor gjatë qeverisjes Kurti. Çlirimi i shtetit dhe institucioneve, dënimi i fajtorëve të pushtetshëm, do të sjellin në Kosovë drejtësi, zhvillim ekonomik, barazi e besim tek shteti e tek e ardhmja.

Raste të tilla shumë të rënda për vendin dhe shoqërinë po tregojnë ngutjen e kapësve të shtetit për t’i mbyllur çështjet me gjykatat para se të krijohen institucionet e reja. Por njëkohësisht këto raste gjykime skandaloze bëjnë edhe më e ngutshme konstituimin e qeverisë në mënyrë që shteti i së drejtës të fillojë së funksionuari dhe gjyqësori të çkapet, e jo të mbetët vetëm legjitimues i kriminelëve të cilët po vazhdon t’i certifikojë me vulën e pafajësisë si njerëzit më të ndershëm.

Viti që po shkon pati gëzimet e trishtimet e veta. E përjetuam të gjithë dhimbjen për viktimat e tërmetit në Shqipëri, e menjëherë u organizuam për të ndihmuar me çka patëm mundësi. Rreth 400 tonë ndihma janë dërguar në vendet e prekura nga tërmeti dhe në kampet e strehimit. Shumë prej të pastrehëve i ndihmuam të strehohen në shtëpitë tona e ato të qytetarëve vullnetmirë. Për t’u përmendur është dhe Komuna e Prizrenit, e cila nën drejtimin e aktivistit Mytaher Haskuka, së bashku me shumë aktivistë të tjerë, vuri në dispozicion një kamp me kushte optimale për strehimin e qindra të prekurve nga tërmeti.

E momenti më sfidues i vitit, për ne si aktivistë, ishin zgjedhjet e përgjithshme të 6 tetorit dhe fushata që u parapriu. Një fushatë e karakterizuar nga kontributi i madh vullnetar dhe aktivizmi, një fushatë me të cilën e çuam mesazhin dhe programin tonë në secilën lagje e fshat, duke fituar përkundër parashikimeve të sondazheve, shpenzimeve të milionave, cinizmit e sulmeve të porositura mediale, dhe blerjes së votave e influencës korruptive të forcave të vjetra. Ishte puna e të gjithëve ne, bashkuar me nevojën urgjente të popullit për ndryshim, që e prodhoi rezultatin e shkëlqyer të 6 tetorit, ku Lëvizja VETËVENDOSJE! fitoi me mbi 15.000 vota diferencë nga subjekti i dytë, duke i dhënë njeriut më të votuar në Kosovë, aktivistit Albin Kurti, mandatin për të krijuar qeverinë e ndryshimit e të zhvillimit.

Në vitin e ardhshëm zotohemi se modestia dhe puna pa mburrje e pa zhurmë do të jetë synimi ynë, kudo e sido që të ketë nevojë Lëvizja, shoqëria e kombi ynë.

Urojmë që ky vit t’u sjellë shëndet të sëmurëve, mirëqenie atyre që janë në situatë të vështirë ekonomike, afërsi atyre që kanë pritur me mall të shohin të dashurit e tyre që janë në mërgim, si dhe drejtësi, punë, dashuri e gëzim për të gjithë njerëzit.

Gëzuar Vitin e Ri 2020

Sot zhvilloi punimet Mbledhja XXXIX e Këshillit të Përgjithshëm të Lëvizjes VETËVENDOSJE!

Siç është tradita, kryesuesi i Këshillit, Hydajet Hyseni ftoi që të mbajë fjalën hapëse kryetari i Lëvizjes, Albin Kurti. Ai shpjegoi se si viti që po mbyllet ka qenë vit i humbur, nga këndvështrimi i interesave shtetërorë të Kosovës. Një qeverisje e paaftë dhe e kapur, ka shënuar dobësim e regres si në politikën e jashtme ashtu edhe në sferat e brendshme të zhvillimit ekonomik, drejtësisë, arsimit e shëndetësisë.

Por nga aspekti i perspektivës, viti i shkuar ishte i rëndësishëm, sepse edhe një herë Lëvizja VETËVENDOSJE! shënoi rritje elektorale, duke dalë sërish e para e duke fituar të drejtën për të themeluar qeverinë. Albin Kurti theksoi edhe një herë vendosmërinë dhe përkushtimin e Lëvizjes për ta përmbushur mandatin që votuesit na e dhanë, duke parë si partner të vetëm për koalicion Lidhjen Demokratike të Kosovës.

Këshilli i Përgjithshëm përshëndeti dy aktivistët, Glauk Konjufcën dhe Arbërie Nagavcin, të cilët u zgjodhën nga Kuvendi i Kosovës si kryetari e nënkryetarja e organit më të lartë të Republikës. Më pas vijuan diskutimet e debatet mbi situatën politike, sfidat e brendshme e ato rajonale, si dhe u shtjelluan nevoja për përforcime strukturore të Lëvizjes, për të fuqizuar pjesëmarrjen e grave, të rinjve e mërgatës

Pasi u sinjalizuam nga mediat për një kërcënim brutal drejtuar kryetarit të Lëvizjes, Albin Kurtit, përfaqësuesi i zyrës ligjore të Lëvizjes, Berat Ganiqi, dorëzoi një kallëzim penal në stacionin policor “Qendër”, në Prishtinë.

Ne nuk e dimë nëse ai kërcënim ka qenë i porositur, gjakftohtë, apo i nxitur nga kultura e urrejtjes ndaj Lëvizjes, e cila është kultivuar për vite me radhë nga subjektet e pushtetit, që janë pasuruar paligjshëm duke varfëruar Kosovën. Këto gjëra duhet t’i zbulojë policia e prokuroria.

Megjithatë, rasti ka rrethana rënduese, për shkak se kërcënuesi është pjesë e listës së kandidatëve për Kuvendin e Republikës, nga një parti e koalicionit PAN, të shquar për keqqeverisje e kapje të shtetit. Përveç subjektit të vet partiak, nga postimet e tij publike në rrjete sociale kuptohet se kërcënuesi është edhe adhurues i madh i presidentit të Republikës.

Shpesh e shohim fenomenin e përzierjes së elementëve me prirje të dhunshme e kriminale me elitat politike, ligjvënëse e ekzekutive. Pikërisht këtë fenomen synon ta luftojë Lëvizja VETËVENDOSJE! Populli i Kosovës nuk dëshiron që kriminelët të jenë në pozita pushteti.

I vlerësojmë faktorët publikë e politikë, si edhe qytetarët që distancohen dhe dënojnë pa ekuivok dhe pa relativizim këtë sjellje të papranueshme. Presim nga policia e prokuroria të veprojnë sipas ligjit.

Kosova e ka vetëm një rrugë përpara, atë të ligjit e të zhvillimit, në luftë pa kompromis kundër krimit, pabarazisë dhe injorancës.

Mbrëmë, Lëvizja VETËVENDOSJE! organizoi një koktej me gazetarë, redaktorë e përfaqësues mediash.

Së bashku me Sekretariatin për Media dhe Komunikimin ishin edhe Kryetari i Lëvizjes Albin Kurti, Kryetari dhe Nënkryetarja e Kuvendit të Kosovës, Glauk Konjufca dhe Arbërie Ngavaci e deputetë e zyrtarë të tjerë nga Lëvizja.

Lëvizja VETËVENDOSJE! ka organizuar shumë aktivitete, shumë konferenca, shumë paraqitje televizive e intervista të shkruara nëpër mediat tona dhe ato të huaja. Një pjesë të mesazhit e kemi përçuar tek qytetarët përmes tyre dhe jemi informuar nga to jashtëzakonisht shumë.

Duke iu uruar edhe një vit të mbarë, me shumë punë dhe duke u angazhuar së bashku në fuqizimin e fjalës së lirë, urojmë vitin 2020 me sa më shumë lajme të mira.

Në kohën rekord prej 60 minutash, qysh në mbledhjen e parë të deputetëve të rinj, u konstituua Kuvendi i Republikës së Kosovës, për legjislaturën e shtatë. Pa vonesa e pa lojëra.

Seanca u hap nën drejtimin e deputetit më të moshuar të Kuvendit, Jahja Kokës, me ndihmën e deputetes më të re në moshë, Fjolla Ujkanit. Të dy nga radhët e Lëvizjes VETËVENDOSJE! Përfaqësimi i të gjitha moshave, gjinive, profesioneve e prejardhjeve, së bashku në Lëvizjen VETËVENDOSJE! gjeti simbolikë shembullore te Jahja Koka e Fjolla Ujkani. Nën drejtimin e prof. Koka u vijua sipas procedurave me betimin e deputetëve dhe zgjedhjen e kryesisë.

Betimi i deputetëve të Lëvizjes VETËVENDOSJE! si përherë u bë para ligjit e popullit të Kosovës, si edhe para flamurit tonë kombëtar, i cili gjithnjë na prin kah e mbara.

Pas betimit, subjekti fitues, Lëvizja VETËVENDOSJE! përmes kryetarit të saj Albin Kurtit, propozoi kandidatin për kryetar të Kuvendit, Glauk Konjufcën. Kjo pozitë, sipas vendimit të Gjykatës Kushtetuese të vitit 2014, i takon subjektit fitues. Dhe Glauk Konjufca, nga Lëvizja VETËVENDOSJE! u votua me 75 vota në krye të Kuvendit të Republikës. Me këtë rast Lëvizja dëshiron t’i urojë anëtarët e simpatizantët e saj, por edhe popullin e Kosovës. Në krye të legjislativit tashmë qëndron një njeri i ditur, i pakorruptuar, me integritet të lartë moral e kombëtar.

Më pas u propozuan nga grupet parlamentare edhe nënkryetarët e Kuvendit, ku nga radhët e Lëvizjes kryetari Kurti propozoi deputeten Arbërie Nagavcin. Edhe ky propozim u votua.

I urojmë aktivistët Glauk Konjufca e Arbërie Nagavci për pozitën e re, ku jemi të sigurt se do të na përfaqësojnë ndershëm e mirë, me kulturë e zbatim të ligjit, duke respektuar qytetarët, mediat, opozitën dhe gjithë deputetët, ndryshe nga ç’ka ndodhur më parë.

Pavarësisht dëshirës dhe përpjekjeve tona, erdhëm në këtë seancë pa koalicion. Ne kemi kërkuar marrëveshje të drejtë e shpërndarje proporcionale të përgjegjësive, por pala tjetër po këmbëngul që ose të marrin më shumë se ç’u takon, ose asgjë. Të dyja këto mundësi janë zhgënjyese. Shumë më lehtë e shpejt janë lidhur në të shkuarën marrëveshje që i kanë sjellë dëm Kosovës, por e paskan shumë të vështirë të lidhin marrëveshje me subjektin e vetëm të pakorruptuar, që ka vullnet e plan të luftojë varfërinë e korrupsionin.

Situata po ndryshon, me kalimin e kohës dhe afateve kushtetuese, megjithatë Lëvizja VETËVENDOSJE! vazhdimisht do të kërkojë bashkëpunim në të mirë të Kosovës.

Urime edhe një herë deputetëve për fillimin e Legjislaturës VII. Qoftë kjo legjislatura që e prodhon ndryshimin, sepse qytetarët kanë votuar për ndryshim rrënjësor, s’kanë kohë për të humbur e durim për të pritur.

Të dashur aktivistë, anëtarë e simpatizantë të Lëvizjes të besimit të krishterë, sot Lëvizja feston me ju. Ua urojmë festën gjithë bashkëkombasve tanë të këtij besimi, kudo që ata punojnë e jetojnë. Por ua urojmë edhe gjithë miqve të shqiptarëve e njerëzve të mirë të këtij besimi kudo në botë. Secila festë fetare përveç mesazhit të saj specifik, te ne shqiptarët zbukurohet edhe nga zakoni ynë, për ta ndarë gëzimin me njëri-tjetrin, pavarësisht fesë së cilës i takojmë. Ashtu siç ndajmë gëzimet, i ndajmë edhe vështirësitë e hidhërimet. Shembulli i fundit ishte tërmeti shkatërrues në Durrës e rrethina, ku shqiptarët treguan edhe një herë dashurinë e tyre për njëri-tjetrin, me vepra e jo veç me fjalë. Së bashku në festa gëzimi është më i madh, së bashku kundër pengesave, ato kalohen më lehtë. Prandaj le të kujdesemi për bashkësitë ku jemi pjesë, për kombin e shtetin, shoqërinë e familjen, qytetin, fshatin e lagjen. Urime të gjithëve, lumturi e gëzime na sjelltë kjo festë.

Gëzuar Krishtlindjen nga Lëvizja VETËVENDOS

Anëtari i Kryesisë Sami Kurteshi dhe aktivisti Getoar Mjeku, në cilësinë e përfaqësuesit ligjor, dorëzuan në Gjykatën themelore padi ndaj vendimit të ZRRE-së për shtimin e kapaciteteve me tarifa nxitëse për sistemet solare fotovoltaike, me ç’rast kanë kërkuar pezullimin e këtij vendimi deri sa kjo çështje të shqyrtohet nga Gjykata.

Lëvizja VETËVENDOSJE!, Komiteti për Energjitikë, Grupi parlamentar, kanë reaguar e sqaruar disa herë lidhur me dëmet që janë duke u bërë interesit publik nga këto skema.

Kujt po i jipen favore dhe liçenca për burimet e ripërtëritshme të energjisë? https://www.vetevendosje.org/kujt-po-i-jipen-favore-dhe-licenca-per-burimet-e-riperteritshme-te-energjise/

Më 27 nëntor 2019, teksa në Kosovë ishte shpallur ditë zie për viktimat e tërmetit në rajonin e Durrësit, Bordi i Zyrës së Rregullatorit të Energjisë pasi që e shtoi në mënyrë të paparalajmëruar, gati klandestine, si pikë të rendit të ditës, mori vendim për një skemë të re mbështetëse me tarifa nxitëse, duke u garantuar disa prodhuesve të para­caktuar të energjisë së ripër­të­rishme blerjen e energjisë me çmim shumë më të lartë se vlera e tregut. Ky vendim nuk përmban arsyetim.

Të njëjtin vendim e pati marrë edhe në 2016 me një çmim edhe më të lartë se tash, 136.4 euro për MWh që u paguhet për 10 vite dhe mbi 50% të tyre një grupi financiar, Devollit. Por nuk u mjaftoi kjo, e përsëritën duke e zgjeruar në 20 MW dhe me tarifën nxitëse 85.5 euro për MWh, për 12 vite, tash mbi 60% të njëjtit grup financiar.

Këto skema të tarifave nxitëse i kanë tre detyrime për shtetin dhe qytetarët, energjinë elektrike të prodhuar duhet t’u blihet 100%, kohëzgjatja 12 vjeçare e këtyre pagesave, me çmimin prej 85.5 euro për MWh. Energjia elektrike e prodhuar nga KEK kushton rreth 28 euro për MWh, dhe mesatarja e çmimit të energjisë në Kosovë shkon rreth 36 euro për MWh përfshirë importin dhe të gjithë burimet e ripërtëritshme. Kjo shtesë që buron nga këto skema nxitëse për­fun­dimisht paguhet nga faturat e energjisë elektrikë të kon­suma­to­rëve. Pra nga të gjithë ne.

Kosova e ka shlyer detyrimin për kuotën e 25% për të gjitha burimet e ripërtëritshme, të vendosur nga Traktati për Energjinë më 2006. Nuk ka aktualisht asnjë ligj që e lejon cilëndo institucion të vjelë nga faturat e qytetarëve para të tjera për t’ia dhënë cilësdo kompanie private, pavarësisht a është për panele fotovoltaike, e me erë apo minihidrocentrale.

Kushtetuta mbron barazinë para ligjit, pronën, konku­rre­ncën dhe kon­su­matorin.

Marrëveshjet ndërkombëtare të ratifikuara de­ty­rojnë Ko­so­vën të zba­tojnë legjislacionin e BE-së për energjinë, kon­kurrencën dhe ndihmën shte­të­rore. Normat e BE-së parashohin që përfituesit e ndih­mës për ener­gjinë të për­zgjedhen me metoda të tregut të lirë (an­kand ose ofer­time kon­ku­rrue­se) dhe që ndihma të më­nja­nohet nga viti 2020.

Vendimi i marrë nga ZRRE me 27 nëntor duke caktuar tarifa nxitëse nuk ka bazë ligjore dhe përbën shkelje të rëndë të ligjeve në fuqi, cenon shtetin e së drejtës dhe përligj haraçin që qytetarët janë shtrënguar t’ua paguajnë monopolistëve oligarkik.

24 dhjetor 2019
Lëvizja VETËVENDOSJE!

Sot, Kryetari Kurti, së bashku me nënkryetaren Fatmire Mulhaxha Kollçaku, Kryetarin e Komunës së Prizrenit Mytaher Haskuka, anëtarët e kryesisë Arbërie Nagavci e Xhelal Sveçla dhe anëtarin e Grupit Parlamentar të Lëvizjes nga IRDK Elbert Krasniqin, priti në takim përfaqësuesit e komuniteteve joshumicë në Kuvendin e Kosovës, z. Rasim Demir nga Koalicioni Vakat, znj. Emilija Rexhepi nga NDS, znj. Duda Balje, z. Fikrim Damka dhe znj. Fidan Zholta nga KDTP, z. Veton Berisha nga PLE, z. Albert Kinolli nga PREBK, z. Etem Arifi nga PAI dhe z. Adem Hoxha nga JGP.

Në këtë takim, të parin e këtij lloji me këtë përbërje, Kryetari Kurti i njoftoi deputetët e ardhshëm nga komunitetet joshumicë mbi bisedimet e deritashme për arritjen e koalicionit qeverisës LVV-LDK, posaçërisht për zotimin për komunitetet joshumicë në Republikën e Kosovës.

Kryeministri në ardhje i siguroi përfaqësuesit e këtyre komuniteteve për vullnetin e qeverisë së tij, që, në plotni t’i përmbushë pritjet e qytetarëve të vendit tonë për ndryshimin aq shumë të nevojshëm drejt shtetndërtimit e sundimit të ligjit, zhvillimit e krijimit të vendeve të reja të punës për të gjithë dhe pa bërë dallime. Deri te kjo, ai tha se arrihet vetëm duke bashkëpunuar dhe bashkërenduar hapat dhe në atë drejtim jemi.

Me këtë rast, Kryetari Kurti mori mbështetjen e të gjithë përfaqësuesve për tejkalimin e problemeve me të cilat qytetarët por edhe komunitetet ballafaqohen, si dhe për realizimin e projekteve të cilat do të përmirësonin cilësinë e jetesës për gjithë qytetarët e Republikës e në veçanti të atyre që kanë më së shumti nevojë.

Pjesëmarrësit u dakorduan që takimet të vazhdohen dhe të shpeshtohen me qëllim të përmbylljes së punëve drejt qeverisë së re dhe përgatitjes për punët e mëdha e të mira të qeverisë sonë të përbashkët.

Lëvizja VETËVENDOSJE! mbajti të premtën një tryezë me titullin DIALOGU SHOQËROR “Bashkë me gratë për zhvillimin”, ku folës kryesor për të bashkëbiseduar me gratë aktiviste dhe përfaqësuese të organizatave dhe institucioneve vendore mbi situatën e përgjithshme të grave në Kosovë ishte kryetari i Lëvizjes VETËVENDOSJE!, kryeministri i ardhshëm Albin Kurti.

Tryezën e hapi aktivistja, udhëheqësja e Sekretariatit për Gruan Aktiviste në VETËVENDOSJE!, Nazlie Balaj, e cila theksoi rëndësinë e dialogut shoqëror për çështjen e grave në Kosovë duke shprehur njëherit bindjen se gjendja e grave në Republikën e Kosovës lë për të dëshiruar, por edhe hapësira për veprim dhe ndërtim të politikave që përmirësojnë pozitën dhe situatën e tyre në shoqëri.

Kryetari, Albin Kurti, në fjalën e tij përmendi të arriturat dhe tha se me qeverinë e re nuk do ketë më pengesa drejt synimit të barazisë dhe shtrimit të kërkesave për atë që na duhet.

Ai theksoi se pas 6 tetorit është garantuar pjesëmarrja e grave në qeveri e në pozita të larta me 30%, do të ketë ministre dhe zëvendësministre, por edhe punë që ky standard të përmirësohet në drejtim të 50%, ashtu siç edhe është shoqëria jonë. Deri te kjo, sipas tij, arrihet përmes politikave emancipuese nga lart që garantojnë ndryshimin poshtë dhe përmes organizimit dhe aktiviteteve nga poshtë për të jehuar sa më lartë e më gjerë.

“Duhet vepruar në secilin aspekt, nga arsimi i lehtësuar e pa pagesë te punësimi pa diskriminim, nga realizimi i të drejtës për trashëgimi e në pronë deri te lehtësimet në shërbimet shëndetësore publike”, tha Kurti i cili theksoi se në shtetin e ri zhvillimor nuk mund të ketë as drejtësi e as zhvillim pa barazi gjinore.

“Nëse ka pasur në të kaluarën pushtete që i kanë penguar organizimet dhe aktivitetet e atyre që janë të dominuar, në këtë rast gratë në përgjithësi e posaçërisht disa shtresa ose kategori të tyre, tash do të ngjajë e kundërta. Tek unë do ta keni njeriun i cili interesohet që t’iu ndihmoj të organizoheni sa më shumë. Sa më shumë solidaritet gjinor, sepse në burra mund të llogarisni, por jo edhe tepër. Gruaja duhet ta ndihmojë gruan. Duhet të ketë aktivitete dhe organizime në të cilat solidariteti gjinor është vepër. Unë besoj që edhe me kuotat që duhet të jenë aty, edhe me ligjet që janë e që do t’i bëjmë edhe më të mira, e fitojmë substancën e domosdoshme. Pra, organizim dhe aktivitete, solidaritet gjinor, e për këtë qëllim natyrisht që unë kam disa ide por me siguri ju keni edhe më shumë që t’i realizojmë bashkë në mandatin tonë”. potencoi ai.

Gratë pjesëmarrëse në këtë tryezë, aktiviste dhe përfaqësuese, prezantuan shqetësimet e tyre rreth situatës së grave në vend të cilat kalojnë nga papunësia e grave deri te shpërfillja e institucioneve të drejtësisë ndaj tyre, nga amvisëria që nuk njihet deri te gratë të cilave veçanërisht në vendet rurale nuk iu ofrohen shërbimet adekuate shëndetësore, nga gratë që përjetojnë dhunën sistematike deri te ato rrezikohen të mbesin jashtë strehimoreve për shkak të mungesës së fondeve publike.

Të pandashme janë vuajtjet dhe dhimbjet tona për këto çështje, andaj edhe bashkëveprimi duhet të jetë i bashkërenduar si në fuqizimin dhe kundërshtimin e pabarazisë ashtu edhe në solidaritet, ishte qëndrimi i përbashkët i shumë folësve të kësaj tryeze.

Pabarazitë, padrejtësitë e paragjykimet do t’i luftojmë së bashku dhe bashkarisht do të fitojmë, tha për fund kryeministri i ardhshëm Albin Kurti, i cili u zotua se tek ai dhe qeveria e re, gratë do ta gjejnë mbështetjen për organizim, aktivitet dhe fuqizim në të ardhmen.