Kryetari i Lëvizjes VETËVENDOSJE!, Albin Kurti, së bashku me nënkryetarin Besnik Bislimi, sot priti në takim Ambasadorin e ShBA-së në Kosovë, z. Philip S. Kosnett, shoqëruar nga këshilltarja politike, znj. Jessica Long dhe shefja e Sektorit Ekonomik në ambasadën e SHBA-së në Prishtinë, znj. Lori Michaelson.

Në këtë takim, z. Kosnett shprehu interesimin e tij për ecurinë e bisedimeve rreth formimit të qeverisë së re, duke uruar që institucionet e Republikës së Kosovës të themelohen sa më parë, në mënyrë që edhe puna për një shtet të së drejtës që lufton korrupsionin dhe zhvillon ekonominë t’i sjellë rezultatet e para. Shefja e Sektorit Ekonomik në këtë ambasadë, znj. Michaelson, vuri theksin te rëndësia e zhvillimit ekonomik në vend duke shprehë interesimin dhe mbështetjen e ambasadës për projektet e qeverisë së ardhshme në këtë drejtim.

Kryetari Kurti e njoftoi ambasadorin z. Kosnett me ecurinë pozitive të takimeve me Lidhjen Demokratike dhe shprehu bindjen se shumë shpejt do të formohet qeveria e re. Prioritet, tha ai, do t’i kushtohet sundimit të ligjit dhe luftimit të krimit të organizuar e korrupsionit të lartë institucional, në mënyrë që t’i hapet kështu rrugë edhe progresit socio-ekonomik. Përpos luftës ndaj korrupsionit, me z. Kosnett dhe znj. Michaelson u ndanë edhe idetë tona për zhvillimin ekonomik të bazuar në politika mbështetëse për bizneset e vogla dhe të mesme në përgjithësi, në prodhimin vendor, dhe në arsimin e lidhur me ekonominë. Bindja jonë është se zhvillimi ekonomik i integron edhe qytetarët me bindje e besime të ndryshme brenda Republikës por edhe shtetet mes vete.

Kryetari Kurti, së bashku me anëtaren e Kryesisë së Lëvizjes, znj. Arbërie Nagavci priti sot në takim Koordinatoren për Zhvillim nga zyra e OKB-së në Prishtinë, znj. Ulrika Richardson, dhe Udhëheqësin e Zyrës së saj, z. Lorik Pustina.

Znj. Richardson e uroi Kryetarin Kurti për mbarëvajtjen dhe rezultatin e procesit zgjedhor dhe shprehu dëshirën që sa më parë të formohen institucionet e reja në mënyrë që t’i hapet rrugë bashkëpunimit dhe projekteve të përbashkëta zhvillimore. Ajo e njoftoi Kryetarin Kurti se prioritet i UNKT-së është partneriteti me Kuvendin dhe Qeverinë e Kosovës, bashkëpunimi për programet e shtyrjes së Objektivave të Zhvillimit të Qëndrueshëm (SDG) në Kosovë, si dhe mbështetja e projekteve zhvillimore të qeverisë së re në të ardhmen.

Kryetari Kurti e falënderoi znj. Richardson për urimin dhe vizitën, duke shprehur bindjen se shumë shpejtë do të formohen institucionet e reja dhe do të vendosen marrëdhëniet e bashkëpunimit. Z. Kurti e njoftoi znj. Richardson me prioritetet e qeverisë së re, për një shtetndërtim demokratik me sundim të ligjit ku luftohet korrupsioni i lartë institucional dhe ku çështje primare është si krijimi i vendeve të reja të punës ashtu edhe zbutja e pabarazive shoqërore përmes politikave sociale. Rëndësi e veçantë, theksoi ai, do t’i kushtohet barazisë gjinore nëpërmjet edukimit, punësimit dhe ofrimit të mundësive të barabarta për gratë.

Në fund të takimit, palët u dakorduan ta vazhdojnë komunikimin dhe bashkëpunimin në të ardhmen.

Pas marrjes së raportit nga Instituti Mjekësor në Zvicër për rastin e Astrit Deharit, Lëvizja VETËVENDOSJE! organizoi një konferencë për shtyp ku parashtroi kërkesat e saj në lidhje me hetimin e rastit.

Anëtari i Kryesisë së Lëvizjes, z. Sami Kurteshi, duke folur për kronologjinë e rastit, tha se inskenimi i sulmit me predhë në ndërtesën e Kuvendit të Republikës u bë sa për ta fajësuar Lëvizjen VETËVENDOSJE!, të cilën asokohe pushteti e kishte halë në sy dhe për arsye të caktuara politike e luftonte me të gjitha mjetet që kishte.

Ai theksoi se raporti i ekspertëve nga Shqipëria dhe Mbretëria e Bashkuar kanë nxjerrë përfundimin e njëjtë sikur raporti i Mjekësisë Ligjore në Llozanë tani, që nuk ka qenë vetëvrasje por vrasje, duke denoncuar elementet e pushtetit, sidomos në media, që provuan ta shtrembërojnë e mbysin këtë të vërtetë përmes dezinformatave.

Anëtarja e Kryesisë së Lëvizjes, znj. Albulena Haxhiu, në fjalën e saj lexoi kërkesat e Lëvizjes VETËVENDOSJE! rreth hetimit të rastit.

1. Prokuroria e Prizrenit të mos merret me hetimin e ri për vrasjen e Astritit.

2. E njëjta prokurori nuk mundet të sigurojë e as ndërtojë besueshmërinë mbi hetimin e këtij rasti. Pra, e njëjta prokurori nuk mund të sjellë hetime objektive mbi rastin e Astrit Deharit.

3. Ne kërkojmë nga Prokuroria Speciale që të merr në trajtim hetimin rastit të aktivistit tonë Astrit Dehari dhe që asnjë zyrtar që ka qenë i përfshirë në këtë proces, të mos jetë i përfshirë më në hetime, por të thirren si të dyshuar e dëshmitarë.

4. Mosnisja e hetimeve të brendshme e bën përgjegjës të drejtpërdrejt kryeprokurorin e shtetit dhe i njëjti nuk mund të heq dorë aq lehtë nga përgjegjësia.

5. Përgjegjësit dhe drejtuesit e institucioneve, qoftë në shërbim korrektues, gjegjësisht në drejtorin e burgut të Prizrenit, qoftë në polici, prokurori e gjykata, duhet të shkarkohen.

Një pushtet abuziv ka penguar drejtësinë për Astritin. Hetimi i plotë dhe vendosja e drejtësisë ligjore për këtë ngjarje do të jetë prioritet i yni qeveritar. Asnjëherë ngjarje e krime të tilla nuk do të përsëriten me qeverinë tonë. Ne do të punojmë pa ndalë deri sa të vihet në vend drejtësia për Astritin.

Astrit Dehari është vrarë për shkak se ka qenë aktivist i Lëvizjes VETËVENDOSJE!

Këtë e ka thënë edhe raporti i ekspertëve të mjekësisë ligjore nga Shqipëria e Mbretëria e Bashkuar, këtë e thotë tani edhe raporti i ekspertëve të Qendrës Universitare Romande për Mjekësi Ligjore (CURML) në Lozanë të Zvicrës, këtë e ka thënë vetë trupi i Astrit Deharit.

Prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit. Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje?

Znj. Xhemile Dehari, znj. Arta Boshtraj Dehari dhe z. Avni Dehari së bashku me avokatin z. Tomë Gashi kërkojnë që hetimet të fillojnë sa më parë. Ata falënderuan të gjithë ata që ndihmuan për informim të drejtë mbi rastin, dhe ata që mbajtën besimin e drejtë se kjo është vrasje tërësisht politike.

Lëvizja VETËVENDOSJE! poashtu kërkon që hetimet të fillojnë sa më parë, të pavarura, të drejta dhe profesionale. Qytetarët e Republikës së Kosovës, e gjithë shoqëria dhe shqiptarët kudo që ndodhen nuk janë të qetë deri sa të vihet drejtësia për Astritin.

Të shqyrtohen e numërohen fletëvotimet e bashkatdhetarëve

Prej më shumë se 10 ditësh i gjithë opinioni publik është duke ndjekur me vëmendje mosveprimin e Komisionit Qendror Zgjedhor lidhur me trajtimin e fletëvotimeve të ardhura nga Mërgata. Veçanërisht të atyre të cilat për momentin nuk po procedohen me justifikimin se kanë mbërritur pas afatit ndonëse janë dërguar nga bashkëatdhëtarët shumë ditë para datës së zgjedhjeve.

Sot po ashtu pamë pamje aspak normale në numërimin e fletëvotimeve të ardhura në mënyrë të parregullt nga Serbia, të cilat shkaktuan probleme në shëndetin e punëtorëve të Komisionit Qendror Zgjedhor.

Ndërsa priten rezultatet nga analizat dhe hetimet e Policisë së Kosovës, ende pa u kuptuar qartë se çfarë ndodhi, filloi sërish verifikimi i tyre në kushte të jashtëzakonshme.

Është padyshim e patolerueshme që të krijohen të gjitha kushtet, edhe përtej të lejueshmes, për t’u trajtuar zarfet nga Serbia, dhe të mos trajtohen zarfet e ardhura nga bashkatdhetarët tanë.

Lëvizja VETËVENDOSJE! pas ankesës në Panelin Zgjedhor për Ankesa dhe Parashresa dhe përgjigjes së tyre, e dërgoi në Gjykatë Supreme ankesën për trajtimin e zarfeve me fletëvotime të ardhura nga bashkëatdhetarët.

Jemi po ashtu në pritje që të fillojë verifikimi i tyre sa më parë, e dërgimi në Qendrën e Numërimit për t’u vendosur në rezultatin e përgjithshëm si vota të rregullta.

23 tetor 2019

Lëvizja VETËVENDOSJE!

Vendimi i Gjykatës Supreme konfirmoi ankesën e Lëvizjes VETËVENDOSJE!

Sot në ora 16:19 morëm vendimin nga Gjykata Supreme e Republikës së Kosovës ku u konfirmua e drejta e bashkatdhetarëve tanë dhe më në fund u hap rruga për numërimin e pakove me vota të ardhura prej tyre.
Presim që sa më parë Komisioni Qendror i Zgjedhjeve të mblidhet dhe të marrë vendimin për të vijuar me procedurat e verifikimit dhe numërimit të këtyrë fletëvotimeve.
E gjitha kjo mund të ishte evituar nëse prej 12 tetorit KQZ do të kishte lejuar administratën e KQZ-së që t’i numëronte këto fletëvotime.

30 tetor 2019
Lëvizja VETËVENDOSJE!

Në vijim të kordinimit për të arritur në marrëveshjen finale të qeverisjes u takuan grupet punuese të Lëvizjes VETËVENDOSJE! përbërë nga nënkryetari Besnik Bislimi, anëtarët e kryesisë Glauk Konjufca e Albulena Haxhiu dhe Lidhjes Demokratike të Kosovës përbërë nga Avdullah Hoti dhe Lumir Abdixhiku.

Takimi i mbajtur në selinë qendrore të Lëvizjes VETËVENDOSJE! është i dyti në radhë, pas atij të mbajtur më 18 tetor. Ky takim do të pasohet nga takime të tjera gjatë dy javevë të ardhshme. Synimi i takimit është përafrimi programor në çështjet e zhvillimit ekonomik, shtetit të së drejtës dhe rendit, arsimit, shëndetësisë, politikave sociale dhe politikës së jashtme.

Takimi i ardhshëm mbahet të hënën me 28 tetor, në orën 15:00 në zyrën e Lidhjes Demokratike të Kosovës.

23 tetor 2019
Lëvizja VETËVENDOSJE!

Kryetari Albin Kurti, së bashku me anëtarin e Kryesisë së Lëvizjes z. Xhelal Sveçla, takoi sot kandidatin për deputet nga komuniteti rom, kryetarin e PREBK, z. Albert Kinolli.

Në takimin miqësor me z. Kinollin, që përfaqëson komunitetin rom në Kosovë, biseduam për mbarëvajtjen dhe rezultatin e procesit zgjedhor që pritet të çertifikohet këto ditë, për qeverinë e re dhe për mundësitë e bashkëpunimit drejt një shtetndërtimi demokratik që siguron mirëqenie e progres për gjithë qytetarët e Republikës.

Kryetari Kurti e njoftoi z. Kinollin me prioritetet e qeverisë së re, ku, krahas zhvillimit ekonomik për punësim dhe sundimit të ligjit e luftimit të korrupsionit të lartë, të rëndësishëm e sheh si zbatimin e politikave sociale që zbusin pabarazinë ashtu edhe krijimin e një kohezioni shoqërorë që zhvillon dhe integron, gjithnjë duke theksuar të përbashkëtat para dallimeve, edhe pakicat kombëtare që jetojnë në Kosovë.

Në fund të këtij takimi, me z. Kinolli shprehëm dëshirën ta vazhdojmë komunikimin dhe bashkëpunimin e mëtejmë.

Sot, Kryetari Kurti, së bashku me anëtarin e Kryesisë së Lëvizjes, z. Xhelal Sveçla, takoi kandidatët për deputetë nga komuniteti boshnjak, egjiptian dhe ashkali, znj. Emilija Redžepi, znj. Duda Balje, z. Artan Berisha, z. Veton Berisha dhe z. Hetem Arifi.

Me përfaqësuesit e këtyre komuniteteve biseduam për mbarëvajtjen dhe rezultatin e procesit zgjedhor, për planet e qeverisë së re, sfidat dhe mundësitë e bashkëpunimit për shtetndërtim demokratik dhe progres socio-ekonomik.
Kryetari Kurti i njoftoi se prioritet i qeverisë së re do të jetë zhvillimi ekonomik që sjell punësim, luftimi i krimit të organizuar e korrupsionit institucional përmes gjyqësorit të drejtë, dhe politikat sociale që zbusin pabarazinë në shoqëri.

Kurti i siguroi përfaqësuesit e komuniteteve që qeveria e tij do t’i trajtojë të gjithë qytetarët e Republikës në mënyrë të barabartë pavarësisht përkatësisë kombëtare dhe theksoi se përparimi i komuniteteve pakicë bëhet përmes zhvillimit ekonomik dhe se kjo do të jetë prioritet me qeverinë e re. Në përfundim të takimit shprehëm gatishmërinë për ta vijuar dhe zgjeruar komunikimin dhe bashkëpunimin mes nesh.

Gjatë vizitës në Britani të Madhe, kryetari Kurti i shoqëruar nga deputetet Saranda Bogujevci dhe Fitore Pacolli dhe koordinatori i Qendrës së Lëvizjes VETËVENDOSJE!, Agim Morina, mbajti një ligjeratë në Universitetin e Winchesterit të moderuar nga Prof. Seb Bytyçi dhe një tubim me bashkatdhetarë.

Në ligjeratën me temën “Ndërtimi ndërkombëtar i paqes – Rasti i Kosovës” ku ishin të pranishëm studentë, hulumtuesë, ekspertë dhe pjestarë të mërgatës, kryetari Kurti foli për procesin e ndërtimit të paqes në Kosovë pas ndërhyrjes së NATO-s, sfidat nga burokracia ndërkombëtare dhe korrupsioni qeveritar brenda Kosovës dhe ato të agresivitetit të Serbisë prej jashtë, si hapat e që duhet të ndërmerren përmes zhvillimit ekonomik e drejtësisë ligjore për të siguruar paqen afatgjate.

Hapjen e tubimit me bashkatdhetarë e bëri z. Morina i cili falendëroi të gjithë aktivistët dhe përkrahësit e Lëvizjes VETËVENDOSJE! për punën dhe angazhimin që bënë të mundur themelimin dhe funksionimin e Qendrës në Britani të Madhe. Deputetet Saranda Bogujevci dhe Fitore Pacolli u fokusuan tek edukimi dhe përvoja që kanë marrë në Britani të Madhe dhe vendimi i tyre për t’u kthyer në Kosovë dhe angazhuar në Lëvizje për të kontribuar në ndryshimin dhe përparimin e vendit.

Kryetari Kurti theksoi prioritetet dhe zotimet e qeverisë së re si dhe vendimet e para që do të ndërmarr siç është zvogëlimi i qeverisë dhe ndalimi i menjëhershëm i keqpërdorimeve. Kurti falënderoi mërgatën për kontributin e vazhdueshëm para, gjatë dhe pas luftës si dhe organizimin masiv për pjesëmarrje në zgjedhjet e 6 tetorit. Ai tha që për mërgatën do të krijojë mundësinë e votimit në vendet ku jetojnë nëpër Ambasada dhe Konsullata të Republikës së Kosovës, rimëkëmbje të shkollës shqipe për fëmijët e mërgatës si dhe mundësi për investime fitimprurëse në Kosovë.

Pas prezantimeve u bë diskutim i hapur me shumë pyetje, komente e përgjigje.

Sot, nënkryetari i Lëvizjes VETËVENDOSJE!, z. Besnik Bislimi, drejtuesi i Komitetit për Energji, z. Nagip Krasniqi dhe Sekretari për Marrëdhënie me Jashtë, z. Kreshnik Ahmeti pritën në takim një delegacion të nivelit të lartë nga Millennium Challenge Corporation (MÇ), të kryesuar nga drejtorja menaxhuese e MCC për Evropë, Azi, Pacifik dhe Amerikë Latine, znj. Caroline T. Nguyen.

Në këtë takim u diskutua për programet e MCC-së në Kosovë dhe qëllimet që ajo synon t’i arrijë nëpërmjet dy programeve, për të cilat është kualifikuar Republika e Kosovës. Qëllimi përfundimtar i granteve të MCC-së në Kosovë është ulja e varfërisë nëpërmjet zhvillimit ekonomik.

Palët diskutuan vështirësitë të cilat pengojnë arritjen e këtij qëllimi e të cilat duhet të tejkalohen. Vështirësitë e identifikuara janë furnizimi i paqendrueshëm me energji elektrike; mungesa e sundimit të ligjit; shërbimet e dobëta mjedisore dhe pjesëmarrja e ulët e grave në fuqinë punëtore.

Zyrtarët e Lëvizjes VETËVENDOSJE! falenderuan delegacionin nga MCC për vizitën dhe njoftuan ata për prioritetet e Qeverisë së ardhëshme të vendit. Ata diskutuan për masat socio-ekonomike të cilat do t’i ndërmarrë Qeveria Kurti për t’i tejkaluar vështirësitë të cilat po e pamundësojnë zhvillimin e qëndrueshëm ekonomik në Republikën e Kosovës.

Palët u pajtuan që ta vazhdojnë komunikimin dhe bashkëpunimin edhe në të ardhmen, në shërbim të planifikimit dhe investimeve të duhura në sektorë të ndryshëm të ekonomisë, si domosdoshmëri për zhvillimin ekonomik të vendit dhe ngritjen e mirëqenies së qytetarëve të saj.

Dje, Kryetari i Lëvizjes VETËVENDOSJE!, z. Albin Kurti, së bashku me anëtaret e Kryesisë së Lëvizjes, znj. Arbërie Nagavci dhe znj. Fitore Pacolli, mirëpritën Shefen e Zyrës së BE-së në Kosovë, znj. Natalya Apostolova të shoqëruar nga bashkëpunëtorët e saj.

Znj. Apostolova uroi Kryetarin Kurti për rezultatin zgjedhor dhe për mbarëvajtjen e këtij procesi. Ajo tha se me përjashtim të pjesës veriore të vendit, ku u raportua se pati presion ndaj serbëve lokal, gjithçka duket se shkoi në mënyrë të drejtë dhe të rregullt. Tani, është e rëndësishme që pas certifikimit të rezultateve të formohen institucionet dhe qeveria e re sa më parë në mënyrë që t’i hapet rrugë edhe alokomit të fondeve që Bashkimi Evropian i ndan për zhvillimin e projekteve të ndryshme në Kosovë, si në fushën drejtësisë, arsimit, sigurisë dhe mjedisit.

Kryetari Kurti e falënderoi znj. Apostolova për vizitën dhe gjithashtu shprehi shqetësimin me procesin zgjedhor në veri të vendit. Nevojitet adresimi i shkeljeve dhe parregullsive atje si dhe fillimi i dialogut për zhvillim me serbët lokal. Kryetari Kurti përmendi nevojën e një mini-Marshall plani të BE-së për Ballkanin Perëndimor, sidomos për bashkimin dhe zhvillimin e qyteteve të ndara, i cili do të mundësonte progres shoqëror dhe hov drejt integrimeve evropiane. Kurti po ashtu tregoi se e ka mirëpretur vlerësimin dhe renditjen përkatëse të çështjeve të Përfaqësueses së Lartë të Politikës së Jashtme të Bashkimit Evropian, znj. Federica Mogherini dhe të Komisionerit për Zgjerim, z. Johannes Hahn, për zgjedhjet e 6 tetorit, e të cilët theksuan rëndësinë që qeveria e re të fillojë sa më parë me masa që ndikojnë në: 1) zhvillimin ekonomik dhe social, 2) sundimin e ligjit, 3) zbatimin e MSA-së dhe 4) çështjen e dialogut për normalizim të marrëdhënieve me Serbinë.

Në fund të takimit, palët u dakorduan për komunikim të rregullt e bashkëpunim të mëtejmë.

Kryetari i Lëvizjes, z. Albin Kurti, së bashku me anëtarin e Kryesisë, z. Xhelal Sveçla, priti sot në takim Kryetarin e Partisë Egjiptiane (IRDK), z. Elbert Krasniqi, të shoqëruar nga ekipi i tij, z. Xhevdet Neziraj, z. Fazli Stollaj dhe z. Fridon Lala.

Në këtë takim miqësor, biseduam për procesin dhe rezultatin zgjedhor, çertifikimin e rezultateve finale që po e presim për të filluar me formimin e institucioneve të reja, si dhe për rëndësinë e bashkëpunimit drejt një shtetndërtimi demokratik me progres socio-ekonomik për të ardhmen, që nuk diskriminon asnjëri e i jep shansë secilit.

Kryetari Kurti e njoftoi z. Krasniqi që prioritet i qeverisë së re do të jetë zhvillimi ekonomik që punëson dhe integron, të gjithë dhe pa dallime, si dhe sundimi i ligjit, përkatësisht hetimi i krimit të organizuar dhe korrupsionit të lartë institucional.

Me vende pune, drejtësi, dhe politika që trajtojnë pabarazinë në shoqëri, Kurti tha se do të hapen mundësi të reja të komunikimit e bashkëpunimit mes qytetarëve dhe komuniteteve që jetojnë në Kosovë.

Helmimi i punonjësve të operacionit të votimit përmes postës ka shqetësuar familjarët e stafit, por edhe opinionin publik. Autoritetet shtetërore duhet të hetojnë shkaqet e këtij helmimi, ashtu siç duhet të hetojnë pakot e ardhura nga Serbia në mënyrë të organizuar nga shteti i Serbisë.

Këto pako me fletëvotime nuk kanë ardhur përmes postës, ashtu siç e kërkon ligji për zgjedhje, por janë sjellë kundërligjshëm nga zyra ndërlidhëse e Serbisë.

Këto fletëvotime të sjellura kundërligjshëm duhet të refuzohen. Ndërsa shërbimi profesional i KQZ-së duhet ta vazhdojë punën në vlerësimin dhe numërimin e saktë të votave të ardhura nga mërgata.

Pakot me fletëvotime të dërguara nga bashkatdhetarët, e të cilat janë verifikuar dhe vlerësuar, duhet të dërgohen në Qendrën e Numërimit dhe të Rezultateve për t’u numëruar.

Dje, në ambientet e zyres së Lëvizjes VETËVENDOSJE!, kryetari z. Albin Kurti, së bashku me anëtarët e kryesisë së Lëvizjes, znj. Albulena Haxhiu dhe z. Liburn Aliu, priti në takim kryetarin e Partisë për Drejtësi Integrim dhe Unitet, në Shqipëri, z. Shpëtim Idrizi të shoqëruar me përfaqësuesit e kësaj partie, znj. Mesila Doda dhe z. Alket Veliu.

Z. Shpëtim Idrizi uroi kryetarin Kurti për rezultatin zgjedhor dhe për organizimin e fushatës që arriti t’i adresojë me sukses brengat e qytetarëve të Republikës. Ai po ashtu përshëndeti daljen e madhe të qytetarëve në këto zgjedhje gjë që tregon bindjen e qytetarëve se politika është vendi ku arrihen ndryshimet e rëndësishme shoqërore.

Z. Kurti foli për marrëdhëniet e reja në mes të Republikës së Kosovës dhe asaj të Shqipërisë, në kuptimin që 50 marrëveshjet e nënshkruara mes dy shteteve nuk do të mbeten në letër, por do të zbatohen sa më parë. Ne do të angazhohemi që në të ardhmen të kemi komisione të përbashkëta qeveritare sa i përket politikës së jashtme, burimeve natyrore dhe mbrojtjes e sigurisë. E, po ashtu, edhe një regjistër të përbashkët të bizneseve e për një regjistër të përbashkët civil, për sistem unik doganor, për një sistem të integruar elektro-energjetik dhe për një treg të përbashkët.

Fitorja e Lëvizjes i jep kuptim përpjekjeve historike të shqiptarëve për një politikë barazimtare me dinjitet dhe këtë po e ndjejnë shqiptarët kudo që janë.

Sot, Kryetari i Lëvizjes VETËVENDOSJE!, z. Albin Kurti, dhe Sekretari për Marrëdhënie me Jashtë, z. Kreshnik Ahmeti, mirëpritën në takim Ambasadoren e Finlandës në Kosovë, shkëlqesinë e saj, znj. Pia Stjernvall dhe këshilltaren në Ambasadën e Finlandës, znj. Trinka Jusufi.

Znj. Stjernvall uroi kryetarin Kurti për rezultatin e arritur në zgjedhjet e jashtëzakonshme parlamentare dhe vlerësoi me notë pozitive procesin e rregullt zgjedhor, i cili u monitorua edhe nga vëzhguesit e Ambasadës së Finlandës në Kosovë.

Më tutje u diskutua nevoja që Qeveria e ardhshme të realizojë reforma në sektorë të ndryshëm të vendit, me theks të veçantë në sistemin arsimor. Në takim pati pajtueshmëri që përvojat dhe ekspertiza nga sistemi arsimor i Finlandës do ta ndihmonin reformën dhe përmirësimin cilësor të sistemit arsimor të Republikës së Kosovës. Në lidhje me dialogun me Serbinë, Kryetari Kurti përsëriti qëndrimin e Lëvizjes VETËVENDOSJE! që për dialogun më e rëndësishme është përmbajtja, sesa afatet kohore, dhe tri parimet për të shëruar pasojat e qasjes së gabuar paraprake: jo marrëveshje pa dialog; jo dialog me harta; dhe, jo presidentët e shteteve mbi harta.

Në fund, Ambasadorja Stjernvall i dhuroi Kryetarit Kurti dy libra mbi inovacionet shoqërore të Finlandës, si dhuratë për rezultatin zgjedhor dhe si ndihmë për zgjidhjen inovative të problemeve më të cilat përballet vendi.

Sot, Kryetari i Lëvizjes VETËVENDOSJE!, z. Albin Kurti, së bashku me anëtaren e Kryesisë, Fitore Pacolli, ka mirëpritur Përfaqësuesin Special për Ballkanin Perëndimor z. Arne Sannes Bjørnstad nga Ministria e Punëve të Jashtme të Norvegjisë – Departamenti i Evropës Juglindore dhe z. Jens Erik Grøndahl, Ambasadorin Norvegjez në vendin tonë.

Z. Arne Sannes Bjørnstad e uroi kryetarin Kurti për rezultatin zgjedhor dhe për mbarëvajtjen e zgjedhjeve. Përfaqësuesi Special për Ballkanin Perëndimor nga Norvegjia shprehi interesim për zhvillimet politike në Kosovë dhe për dialogun Kosovë – Serbi.

Kryetari Kurti e njoftoi se prioritet e ka forcimin e shtetit në të gjitha fushat, në drejtësi, në ekonomi e në atë sociale. Sa i përket dialogut Kosovë – Serbi, ai tha se duhet të nxjerrim mësimet nga e kaluara në mënyrë që dialogu të jetë i përgatitur mirë, me parime të qarta, dhe kësisoj të jetë solid.

Në fund, bashkarisht shprehëm interesim për kontakte dhe takime të vazhdueshme bashkëpunuese në të ardhmen.

Sot, Lëvizja VETËVENDOSJE! dorëzoi në Gjykatën Supreme ankesën me qëllim lejimin e numërimit të të gjitha pakove me fletëvotime nga bashkatdhetarët tanë si dhe hedhjen poshtë të vendimit të PAZP-së.

Presim që në afat sa më të shpejtë Gjykata Supreme të marrë vendim duke ia mundësuar realizimin e të drejtës për të zgjedhur dhe numërimin e fletëvotimeve të qytetarëve tanë me banim jashtë Kosovës.

Rikujtojmë edhe njëherë se pakot me fletëvotime janë dërguar brenda afateve kohore nga bashkëatdhetarët dhe si të tilla ato duhet të numërohen dhe të bëhen pjesë e rezultatit final të zgjedhjeve në Republikën e Kosovës.

29 tetor 2019,
Lëvizja VETËVENDOSJE!

Lëvizja VETËVENDOSJE! pranoi edhe një mbështetje ndërkombëtare. Në adresën tonë erdhi mbështetja nga Partia Socialiste e Francës.

Mbështetja masive nga organizata, parti, politikanë, akademikë e aktivistë ndërkombëtar, po vërteton se Lëvizja VETËVENDOSJE! po shihet si mundësia e vetme për zhvillim, mirëqenie, drejtësi e integrime ndërkombëtare, jo vetëm nga qytetarët, por edhe nga organizata e subjekte të huaja.

Në vazhdim e gjeni përkthimin e letrës mbështetje të dërguar nga Partia Socialiste e Francës

Letra e perkthyer

———————————————————

Zoti Albin Kurti
Kryetar i Lëvizjes Vetëvendosje!
Republika e Kosovës

Paris, 30 Shtator 2019

I dashur shok,

Me rastin e zgjedhjeve legjislative të parakohshme që po mbahen në vendin tuaj më 6 tetor 2019, ndjej thellësisht se duhet të të shpreh, në emrin tim dhe në emër të Partisë Socialiste, dëshirën time për fitoren e listës së partisë që drejton, Lëvizjes Vetëvendosje!

Sipas analizave tona, ky votim ka ngjallur një pritshmëri të rëndësishme për qeverisje demokratike dhe për vendosjen e shtetit të vërtetë të së drejtës. Që prej zgjedhjeve të parakohshme të qershorit të vitit 2017 dhe lojërave të aleancave, lojëra që e hoqën prej pushtetit ekzekutiv partinë tënde, parti që ishte tashmë më e rëndësishmja, qorrsokakët politikë dhe institucionalë u thelluan në Kosovë. Këto kriza të njëpasnjëshme rrënuan njëherësh perspektivën e ardhshme dhe evropiane të popullsisë rinore të Kosovës, por ndihmuan edhe bllokimin e shanceve për rrugëdalje gjithpërfshirëse dhe realiste në dialogun me Serbinë, dialog i arbitruar prej Bashkimit Evropian.

Sot, ndërhyrjet e tua në organizimin e Internacionales Socialiste, si edhe shkëmbimet e tua me partnerët tanë shoqërorë social-demokratë evropianë dëshmojnë për besimin që të është dhënë përsa u takon vlerave të paqes, progresit, barazisë dhe drejtësisë shoqërore, vlera që i ndajmë mes nesh. Këto marrëdhënie dëshmojnë po ashtu zhvillimin e partisë suaj që lindi prej shoqërisë civile dhe grumbullimit të forcave rezistuese, si lëvizje qytetare që u rrit dhe u poq progresivisht drejt statusit të ofertës politike që përbën tashmë të vetmen alternativë të besueshme në interes të gjithë popullit dhe komuniteteve të tij.

Gjithashtu, me shpresën se shumica e zgjedhësve ta besojnë përgjegjësinë e një pikënisjeje të re për shtetin e ri evropian të Kosovës, po të përsëris mbështetjen time të lartë.

Vëllazërisht,

Olivier Faure
Sekretar i Parë i Partisë Socialiste

Kryetari Albin Kurti dhe anëtarja e Kryesisë së Lëvizjes Fitore Pacolli pritën sot në takim Ambasadorin e Hungarisë, z. Laszlo Markusz.

Gjatë këtij takimi u diskutua për situatën politike në prag të formimit të institucioneve të reja të Republikës së Kosovës, dhe për qeverinë e ardhshme. Z. Markusz e uroi Kryetarin Kurti për mbarëvajtjen dhe rezultatin e zgjedhjeve që e nxori VETËVENDOSJE!-n parti e parë. Ai tha se 6 tetori ishte festë për demokracinë e shtetit të Kosovës.

Kryetari Kurti e falënderoi për urimin dhe e njoftoi ambasadorin me prioritetet e qeverisë së re. Zhvillimi ekonomik që sjell punësim, luftimi i korrupsionit të lartë dhe politikat që zbusin pabarazinë në shoqëri janë tri shtyllat kryesore ku do të koncentrohemi, tha ai. Krahas kësaj, Kurti theksoi rëndësinë e marrëdhënieve të mira bilaterale midis dy vendeve tona.

Për fund, shprehëm gatishmërinë për ta vazhduar komunikimin mes nesh, ambasadori z. Markusz tha se shteti Hungarez është në dispozicion për të bashkëpunuar me qeverinë e re të vendit.

Dje, Kryetari i Lëvizjes VETËVENDOSJE!, z. Albin Kurti, së bashku me përfaqësuesit e Lëvizjes në KQZ, znj. Nazlie Bala dhe z. Adnan Rrustemi, takuan një delegacion nga Misioni i Vëzhguesve të Zgjedhjeve të BE-se në Kosovë, të përfaqësuar nga z. Marian Gabriel, zv. Shef i Misionit, z. Dominic Howell, shef i Zyrës së Analizës Politike dhe znj. Eirini Skouzou, shefe e Zyrës Ligjore të Misionit.

Në këtë takim, u diskutua për mbarëvajtjen e zgjedhjeve, procesin e qetë dhe të rregullt, si dhe për raportin preliminar të vëzhguesve të BE-së, rekomandimet e raportit përfundimtar që do të shërbejnë si bazë e mirë për të përmirësuar infrastrukturën ligjore dhe forcimin e kapaciteteve institucionale.

Ishte vlerësim i përbashkët se dita e zgjedhjeve në përgjithësi ishte e rregullt dhe e qetë, në përjashtim të vendvotimeve në mesin e komunitetit serb të Kosovës, ku partitë që synuan të garojnë nuk ishin në gjendje të zhvillojnë fushata efektive për shkak të frikësimit të kandidatëve, familjeve të tyre dhe votuesve në përgjithësi. Kjo kufizoi ushtrimin e të drejtave themelore demokratike për lirinë e shprehjes, tubimit dhe përfaqësimit, dhe për rrjedhojë, procesi zgjedhor për serbët e Kosovës nuk i përmbushi standardet e zgjedhjeve të lira dhe të ndershme.

Delegacioni i Misionit të Vëzhguesve të BE-së paralajmëroj publikimin e raportit përfundimtar dhe rekomandimet që synojnë forcimin e procesit zgjedhor, rritjen e transparencës, ngritjen e kapaciteteve institucionale për organizimin e zgjedhjeve. Rekomandimet e vëzhguesve të BE-së do të jenë bazë e mirë për përmirësimin e infrastrukturës ligjore të zgjedhjeve në përgjithësi, duke krijuar kushte që edhe në mesin e komunitetit serb të Kosovës të kemi zgjedhje të lira, garë të pacenueshme, e mjedis politik demokratik.