Si në vitin e kaluar, edhe sivjet fëmijët janë pajisur dhe do të pajisen me tekste shkollore. Dallimi i vetëm në këtë mes qëndron se ky proces po bëhet pa ndërmjetësim të grupeve të interesit, e pikërisht këtu është halli i vërtetë i opozitës.

Deputetët e Grupit Parlamentar të Lëvizjes VETËVENDOSJE!, Arjeta Fejza dhe Armend Muja mbajtën sot një konferencë për media ku folën për subvencionimin e teksteve shkollore nga Qeveria e Kosovës.

Deputetja Arjeta Fejza tha se arsyet pse qeveria ka ndërmarrë një vendim të tillë qëndron në faktin se ndër vite procesi i furnizimit me tekste shkollore është përcjellë me probleme dhe vështirësi, gjetje këto jo vetëm të adresuara publikisht por tashmë edhe në komisionin hetimor për tekste shkollore.

“Keqplanifikim, vonim i furnizimit, abuzim me çmime të larta, stoqe të grumbulluara me libra nëpër bodrumet e shkollave janë disa nga problemet që e kanë shoqëruar këtë proces, prandaj ky vendim ka ardhur si rezultat i nevojës për të shmangur abuzimet, keq menaxhimet, mungesën e planifikimeve të qëndrueshme”, tha deputetja Arjeta Fejza.

Ndërsa deputeti Armend Muja tha se ekziston një insistim i vazhdueshëm nga opozita që të gënjejë me shifrat e shpenzimeve për tekstet shkollore.

“Në rast se të dhënat merren zyrtarisht nga thesari, dhe thuhet se në vitin 2023 janë shpenzuar 5.7 milionë euro për tekstet shkollore, cili është insistimi që vazhdimisht të thuhet se po shpenzohen 11 milionë apo 20 milionë. Të dhënat nga thesari i shtetit e që janë të dhëna zyrtare, thonë se janë shpenzuar 5.7 milionë euro për tekste që krahas vitit 2017 është shifra më e ulët që është shpenzuar ndonjëherë në Republikën e Kosovës”, tha deputeti Armend Muja.

Kronologjia e rastit të Astrit Deharit

Zvarritja për 7 vjet, 6 muaj e 17 ditë në prokurori!

Sulmi mbi Kuvendin dhe arrestimi i aktivistëve të LVV

• Më 4 gusht 2016, ndodh sulmi me predhë në ndërtesën e Kuvendit.
• Ky ishte inskenimi i sulmit të armatosur mbi ndërtesën e Kuvendit të Kosovës, duke fshehur autorët e vërtetë dhe fajësimi i LVV, me qëllime të caktuara politike.
• Prej datës 5 gusht 2016 deri më 25 gusht, sipas policisë së Kosovës janë hetuar 4 persona krejtësisht të tjerë.
• Më 29 gusht 2016 arrestohet Astrit Dehari bashkë me 5 aktiviste/ë të LVV (Adea Batusha, Astrit Dehari, Atdhe Arifi, Frashër Krasniqi, Egzon Haliti dhe Petrit Ademi) për këtë sulm.
• Ky arrestim ndodhi për të parandaluar dhe penguar protestën e opozitës më 1 shtator 2016, para parlamentit të Kosovës kundër demarkacionit.
• Me urdhër politik nga maja e shtetit të involvuar ishin AKI, Policia, prokuroria dhe gjykata, prokurori Abdurrahim Islami para pensionimit kërkon arrestimin e aktivistëve, ndërsa urdhrin e lëshon gjykatësi Vehbi Kashtanjeva, po ashtu pak para pensionimit.
• Pak kohë pas arrestimit prokurori A. Islami dhe gjykatësi V. Kashtanjeva pensionohen. Sot punojnë si avokatë në Ferizaj.

Vrasja e Astritit

• Më 5 nëntor 2016 vdes aktivisti Astrit Dehari në Qendrën e Paraburgimit në Prizren.
• Shpejtësia e deklarimeve të zyrtarëve, deklarime kontradiktore nga Prokuroria e Shtetit, Shërbimi Korrektues, Policia e Kosovës dhe, në fund nga vetë Ministrja e Drejtësisë, kishin për qëllim fshehjen e rastit dhe hutimin e publikut.
• Rol negativ, dezinformues kishin disa media në rastin Dehari, me spekulime, dezinformata, shpifje etj, sidomos nxjerrja e incizimeve të manipuluara nga Expressi dhe Klan TV, pa autorizim. RTK mbulonte në atë kohë propagandën kundër LVV dhe arsyetonte arrestimin.
• Rasti i hetimit të vdekjes së Astrit Deharit iu ngarkua prokurorit Metush Biraj, i cili ishte vetëm vegël e krimit të organizuar në prokurori që duhej të zbatonte urdhrat politikë nga lartë. Sot i pensionuar punon si avokat në Prizren.
• Pas vetëm 13 ditëve, ende pa filluar hetimet, Kryeprokurori i Prizrenit Sylë Hoxha deklaron rrejshëm  për vetëvrasje. Kyçja e jashtëligjshme e Kryeprokurorit S. Hoxha në rastin Dehari. Prokurori i rastit, Metush Biraj, i cili faktikisht veç nënshkrimit të dokumenteve, formalisht përjashtohet nga rasti.
• Veç 3 vjet më vonë, S. Hoxha, për shërbime të veçanta ndaj klikës vrastare, kundër LVV, është ngritur në prokuror special. Prokuror special një vrasës!
• Pas pensionimit, për merita të veçanta Sylë Hoxha shpërblehet nga LDK me kandidaturë për deputet. Pas dështimit të kandidaturës për deputet, sot punon si avokat në Prizren.
• 20 dhjetor 2016 – Ministrja e Drejtësisë, Dhurata Hoxha, i ka dërguar letër kryeprokurorit të shtetit Aleksandër Lumezi, përmes së cilës ajo kërkon të kryhen hetime për keqpërdorim të detyrës zyrtare inicion ndjekje ndërkombëtare ndaj avokatit Tomë Gashi dhe ndaj ekspertit të mjekësisë ligjore Besim Ymaj dhe patologut Besim Latifaj, të cilët kanë marrë pjesë në obduksionin e trupit të aktivistit të Vetëvendosjes, Astrit Dehari.
• Sot, pas zbatimit të urdhrave të shefave, është pensionuar nga partia e vet PDK dhe është zhdukur nga skena publike.
• 7 muaj më vonë, më 3 prill 2017, vdekja e dyshimtë në burgun e Lipjanit e dëshmitarit Naser Makolli.
• Në ndërkohë, një tjetër bashkëvuajtës është zhdukur pas lirimit misterioz nga burgu, kurse bashkëvuajtësi i fundit është falur nga Presidenti i Kosovës.

Kërkesa për hetime ndërkombëtare

• Pas kërkesës së familjes dhe avokatit të familjes, më 24 Janar 2018 në media lansohet informata se: „Zyrtarë për media të Prokurorisë kanë konfirmuar për KTV-në se Prokuroria është duke i përgatitur të gjitha dokumentet e nevojshme për t’i dërguar për super ekspertizë në shtetin e Zvicrës, ashtu siç ka kërkuar familja Dehari.”
• Për këtë nuk janë informuar as familja dhe as Avokati i familjes në lidhje me këto veprime të prokurorisë.
• As Familja dhe as Avokati nuk kanë kërkuar super/ekspertizë, apo auditim të dokumenteve të mbledhura të prokurorisë dhe institucioneve tjera në Zvicër. Familja ka kërkuar hetim të plotë të pavarur të rastit të Astritit, në Kosovë dhe atë përfshirë zhvarrosjen e trupit të Astritit. Kjo ishte/është kërkesa e Familjes.

Gjykimi, dënimi dhe lirimi përfundimtar i aktivistëve

• Më 19 Nëntor 2017, vetëm 2 ditë para mbajtjes së raundit të dytë të zgjedhjeve komunale, GJTHP në Prishtinë, dënon aktivistët e LVV me mbi 21 vjet dënim me burg, pa asnjë provë materiale që do të mund të përdorej si dëshmi kundër aktivistëve tanë.
• Në Mars 2018, me vendimin e Gjykatës së Apelit rast kthehet në rigjykim! Pas mbi 2 vjet heshtje totale, në GJTHP në Prishtinë rifillon rigjykimi i rastit të aktivistëve të LVV në liruar në Mars 2018 nga gjykata e Apelit.
• Pas dështimit total të pushtetit për rastin « terrorist » të sulmit të Kuvendit, pushtetmbajtësit e kriminalizuar, kryesisht të PDK, të ndihmuar edhe nga ata të LDK, shpikën rastin tjetër „terrorist“, të ashtuquajtur „Syri i Popullit“, me përpjekjen për shpalljen e LVV si organizatë terroriste, tani me akuza të drejtpërdrejta kundër Albin Kurtit dhe Glauk Konjufcës, me dëshmitarë kyç Hashim Thaçi dhe Kadri Veseli dhe eksponentë tjerë nga PDK-SHIK-u kriminal.
• Një fakt është qartësuar tanimë: gjithçka vërteton pafajësinë e aktivistëve të LVV. Këtë e ka dëshmuar edhe rigjykimi i rastit më 15 shkurt 2023 i GJTHP me aktgjykimin lirues, dhe përfundimisht me aktgjykimin fuqiplotë e ka vërtetuar Gjykata e Apelit më 31 tetor 2023.
• Pra, Astrit Dehari dhe aktivistët e LVV janë arrestuar e burgosur krejtësisht dhe plotësisht të pafajshëm. Astrit Dehari i pafajshëm vritet në Qendrën e Paraburgimit në Prizren pa u marrë asnjëherë në pyetje zyrtarisht nga gjykata për 78 ditë.
• Joligjërisht dhe joformalisht, Astrit Dehari është marrë në pyetje disa dhjetëra herë nga policia hetuese, natën, me urdhrin e prokurorisë dhe të gjykatës, pa e regjistruar këtë krim në mënyrë ligjore.

Prokuroria Speciale dhe rasti Dehari

• Pas vonesave disamujore, diku rreth mesit të verës 2019, Prokuroria e Kosovës i dërgon dokumentet dhe dëshmitë e dëmtuara, jokomplete, madje edhe me zarfe të zbrazët, të përgatitura në mënyrë krejtësisht joprofesionale, në Institutin e Lozanës për ekspertizë.
• Për shkak të dështimeve dhe zvarritjeve të motivuara politikisht dhe me qëllime kriminale nga Prokuroria e Prizrenit në procedurën e hetimore, më 30 tetor 2019, Kryeprokurori i shtetit e kalon rastin në Prokurorinë Speciale të Kosovës, në kompetencë të prokurorit speciale Afrim Shefkiu.
• Më 21 Tetor 2020, avokati i familjes njoftohet nga prokurori special Afrim Shefkiu se me datën 9 Tetor 2020 është kryer Rekonstruimi i vendit dhe i ngjarjes në Qendrën e Paraburgimit në Prizren pa pjesëmarrjen e avokatit të familjes dhe pa praninë e ekspertëve zviceranë nga Lozana. Kjo është shprehje e qartë e përpjekjes për të manipuluar me provat dhe dëshmitë.
• Prokurori i rastit Afrim Shefkiu kurrë nuk ka kërkuar hetim ndërkombëtar dhe të pavarur për të vërtetuar vrasjen e Astrit Deharit. Për më keq, ky prokuror nuk ka nxjerr kurrë̈ asnjë vendim për hetimin e vrasjes së Astrit Deharit, për hetimin e vrasësve-shtytesve në vrasje dhe për hetimin penal të atyre që deri më tani e kanë fshehur këtë rast.
• Ky prokuror, në vend që të kryej punën e tij zyrtare pas ardhjes së ekspertizës shtesë nga Zvicra me të cilin u konstatua manipulimi i provave, kishte filluar një luftë mediale kundër vetë rastit që duhej ta zgjidhte. Puna kryesore që bëri për hetime është, që përshkak të një postimi në Facebook të Ministres së Drejtësisë znj. Albulena Haxhiu, kishte kërkuar nga Policia e Kosovës që ajo të merrej në pyetje si dëshmitare për të ofruar informata se kush e vrau Astrit Deharin, duke e harruar punën e vet.
• Deri në ditën e sotme, rasti Dehari zvarritet vetëm në prokurori me përpjekje për manipulim tani 7 vjet, 6 muaj e 17 ditë, nga to 3 vjet, 9 muaj e 12 ditë në sirtarin e prokurorit special Afrim Shefkiu, i cili pensionohet pas 2 ditësh.
• Strategjia e prokurorisë së shtetit të Kosovës është e qartë: zvarritje e qëllimshme e rastit, bartje e rastit në kompetencë të prokurorëve parapensionistë, që dorëzojnë stafetën e krimit tek prokurori i ardhshëm parapensionistë, për zvarritje deri në harresë dhe deri në absurd.

Dita VI:

SHQIPËRIA qan HOMERËT, është titulli i librit me poezi për Arbënor e Astrit Deharin, që u promovua sot në ambientet e Bibliotekës Kombëtare të Kosovës.

Ky libër me poezi të shkruara për Arbënor e Astrit Deharin ka disa autorë, që janë përmbledhur e redaktuar nga Rushit Ramabaja dhe Nebih Bunjaku, për t’u botuar nga Shtëpia Botuese dhe Shtypshkronja Lena Graphic.

Ngjarjen e moderoi aktorja Vlora Merovci, e cila bashkë me aktorin Afrim Muçaj, dhe aktivisten e Lëvizjes, regjisoren e teatrit, Shkurtë Aliu, nën tingujt e violinçelos së Gresa Broqit, i lexuan disa prej poezive për të pranishmit në këtë promovim.

Autorët e kësaj përmbledhje me poezi, Rushit Ramabaja dhe Nebih Bunjaku e mbajtën nga një fjalë prezantuese për punën që kanë bërë. Pas tyre, një fjalë rasti e mbajti edhe babai i Arbënorit dhe Astritit, shkrimtari, deputeti, Avni Dehari.

Të pranishëm ishin përplotë aktivistë, shokë dhe shoqe të Arbënorit dhe Astritit, familjarë, anëtarë të kryesisë nga Lëvizja, deputetë, ministra, zëvendësministra, nga qeveria e Kosovës.

Arbënor e Astrit Dehari janë dy vëllezërit tanë, dy aktivistët tanë, dy heronjtë që me dijen dhe guximin e tyre shënojnë luftën e popullit tonë për drejtësi, barazi dhe të vërtetën.

I përjetshëm do të jetë kujtimi dhe nderimi për Arbënor dhe Astrit Deharin.

Dita V:

Tubim me gra dhe vajza në Podujevë

Dita e pestë e Javës së Lëvizjes, Dita e GVV-s, filloi me tubim në qytetin e Podujevës. Një tubim madhështor që tregon përkrahjen dhe besimin e madh të grave dhe vajzave që kanë për Lëvizjen VETËVENDOSJE! dhe për Qeverinë. Asnjë qeveri nuk ka bërë as përafërsisht sa Qeveria jonë për gratë!

Gratë në Lëvizje janë shembulli më i ndritur i përkushtimit dhe vendosmërisë për ta ndryshuar shoqërinë. Vështirësive dhe sfidave që përjetuan gratë e përfshira në politikë për dekada me radhë, ato ia kundërvunë një model frymëzues të angazhimit dhe pjesëmarrjes aktive në zhvillimin e vendit. Duke sfiduar stereotipet dhe paragjykimet, ato me guxim shtruan rrugën kah drejtësia dhe barazia. Duke mos u ndalur së angazhuari ato na drejtuan kah fitoret tona duke na bërë subjektin politik më të madh që qeverisë me vendin. Gratë e Lëvizjes janë frymëzim për të gjithë shoqërinë.

Dita IV:

Dita e Rinisë për VETËVENDOSJE!

Ujmani është një pasuri kombëtare dhe ka një rëndësi të veçantë për qytetarët e Kosovës. Ky liqe i bukur dhe i pasur ka qenë i vështirë për t’u vizituar në të kaluarën për shkak të situatës së paqëndrueshme dhe pranisë së bandave kriminale nga shteti fqinj, të cilët kishin ndërtuar vilat e tyre luksoze në atë zonë. Me qeverisjen e tanishme dhe luftimin e suksesshëm të këtyre bandave, tash është bërë e mundur që qytetarët e Kosovës të vizitojnë lirshëm liqenin.

Sot, Rinia për VETËVENDOSJE! qendra e Vushtrrisë, Mitrovicës dhe Besianës, bashkë me ministra e deputetë organizuan një vizitë të përbashkët në Liqenin e Ujmanit. Kjo vizitë u realizua në kuadër të ditës së RVV brenda Javës së Lëvizjes. Të rinjtë morën pjesë në aktivitete të ndryshme gjatë ditës, duke shijuar bukuritë natyrore të liqenit dhe duke treguar përkushtimin e tyre për ruajtjen e resurseve natyrore.

Ne e kuptojmë se resurset tona natyrore nuk i përkasin vetëm një brezi, por janë një trashëgimi e përbashkët që është bartur nga gjenerata në gjeneratë. Është përgjegjësia e jonë të kujdesemi për to në mënyrë që edhe brezat e ardhshëm të mund t’i gëzojnë dhe të zhvillohen përmes tyre.

Dita II:

Tubim me gra dhe vajza në Gjakovë

Në ditën e dytë të Javës së Lëvizjes, ditën e anëtarësimeve të reja në Lëvizjen VETËVENDOSJE!, sonte në një pritje madhështore në qytetin e Gjakovës u mbajt tubim me gra dhe vajza aktiviste e mbështetëse të Lëvizjes.

Në këtë tubim të pranishme ishin kryetarja e GVV-së, njëherazi ministre e Drejtësisë, Albulena Haxhiu, ministrja e Arsimit, Arbërie Nagavci, nënkryetarja e Lëvizjes, Mrika Limani Myrtaj, kryetari i qendrës së Lëvizjes në Gjakovë, deputeti, Agon Batusha, deputetë, deputete dhe aktiviste tjera të LV-së, ndërsa përmes një video adresimi i përshëndeti të pranishmit edhe kryeministri, Albin Kurti.

Për më shumë se tri vite qeverisje u dëshmua që mbështetjen ndaj vajzave dhe grave e kemi të pa rezervë duke aplikuar masa që në veçanti shënjestrojnë punësimin e grave. Duke punësuar 5 mijë gra vetëm dy vitet e para të mandatit, duke ndarë bursa STEM për vajza dhe gra, duke përkrahur gratë ndërmarrëse dhe ato që merren me prodhim në bujqësi, duke mbështetur nënat lehona dhe ndarë shtesa për fëmijë.

Në përmbyllje të këtij takimi, iu uruam mirëseardhje edhe anëtarësimeve të reja duke ofruar mbështetje të vazhdueshme për to. Lëvizja është adresa e angazhimit të secilës grua.

Dita II:

10 vjet pa më të dashurin shok, aktivistin tonë të pazëvendësueshëm, Arbënor Dehari

Arbënor Dehari vazhdon të jetë figurë qendrore dhe orientuese në angazhimin dhe ecjen tonë politike.

Java e Lëvizjes në krye të saj e ka Arbënor Deharin jo vetëm si kujtim dhe nderim për një aktivist të jashtëzakonshëm por edhe si tregues, si frymëzim për brezat e ardhshëm.

Arbënor Dehari na kujton se konceptet e vetëvendosjes, lirisë, barazisë, drejtësisë dhe solidaritetit nuk janë thjeshtë ideale të dëshiruara apo fjalë të thjeshta, por edhe detyrime për të cilat njeriu zotohet, angazhohet dhe punon përgjatë jetës së tij.

Me angazhimin e tij të palëkundur, me guximin e tij të pashoq, me pasionin dhe përkushtimin e tij, Arbënor Dehari, ishte aktivisti që më së shumti anëtarësonte njerëz në Lëvizjen VETËVENDOSJE!. Në këtë kuptim, ditën e dytë të javës tradicionale të Lëvizjes për këtë vit, përveç si ditë ku e nderojmë kujtimin për Arbënorin, e kemi caktuar të jetë edhe ditë e anëtarësimeve të reja në Lëvizjen tonë.

Kujtimi për Arbënorin do të jetë përherë i gjallë mes nesh, i mbushur me aktivitete, i theksuar nga mësimi se idealizmi dhe veprimi i guximshëm janë forcat që ndërtojnë një të ardhme për të gjithë.

Përjetësisht në zemrat dhe mendjet tona do të jesh Arbënor Dehari!

Dita I:

Tribunë: 146 vjetori i Lidhjes Shqiptare të Prizrenit

Dita e parë e Javës së Lëvizjes nisi me shënimin e 146 vjetorit të Lidhjes Shqiptare të Prizrenit.

Lidhja Shqiptare e Prizrenit përfaqëson një moment kulmor në historinë e kombit shqiptar, duke shënuar fillimin e përpjekjeve të organizuara për mbrojtjen e territoreve shqiptare nga ndarja dhe pushtimi prej fuqive të huaja. Lidhja synoi t’i bashkonte shqiptarët nën një identitet të përbashkët kombëtar dhe të siguronte të drejtat e tyre në një kohë kur ekzistenca e tyre ishte e kërcënuar. Rëndësia e Lidhjes qëndron jo vetëm në arritjet e saj të drejtpërdrejta, por edhe në trashëgiminë e saj të qëndrueshme, duke ndikuar në lëvizjet e mëvonshme për pavarësinë dhe formimin e vetëdijes kombëtare shqiptare, duke mbetur një simbol i përpjekjeve për liri dhe drejtësi.

Këtë 146 vjetor të Lidhjes Shqiptare të Prizrenit, në Sheshin e Lidhjes, u mbajt një Tribunë ku për ngjarjen e rëndësishme të Lidhjes folën Nënkryetari i Lëvizjes, njëherazi Kryetari i Kuvendit, Glauk Konjufca, Nënkryetarja e Lëvizjes, Mrika Limani-Myrtaj, dhe historiani Durim Abdullahu.

Mosha nga rënia e dëshmorit Ali Ajeti është për 10 vjet më e madhe se mosha e lirisë sonë që e gëzojmë edhe si rezultat i veprës dhe rënies së Ali Ajetit. Kjo sepse për lirinë e Kosovës, populli i saj ka nisur të paguaj shumë herët, tha Kryeministri, Albin Kurti, në Akademinë Përkujtimore që u mbajt sot në 35 vjetorin e rënies së Ali Ajetit.

Fjala e plotë e Kryeministrit, Albin Kurti:

E nderuara familja Ajeti,

E dashura nëna Vahide,

I nderuari Isa Ajeti,

E nderuara zëvendëskryeministre, Emilija Rexhepi,

Të nderuar ministra e zëvendësministra,

Drejtues e përfaqësues të institucioneve,

I nderuari Kryetar i Komunës së Podujevës, Shpejtim Bulliqi,

Të nderuar deputetë të Kuvendit të Republikës,

I nderuari z. Rilind Gërvalla nga Radio Televizioni i Kosovës,

Të dashura motra dhe vëllezër,

Të nderuar të pranishëm,

Zonja dhe zotërinj,

Gjatë tërë gjysmës së parë të këtij viti, si edhe tani kur jemi vetëm dy javë para 25-vjetorit të çlirimit të Kosovës, i kemi përkujtuar me nderime të gjithë dëshmorët e lirisë së atdheut tonë, kudo e kurdo. Duke i kujtuar dëshmorët për çdo ditë, sikur dhe sot që po e kujtojmë dëshmorin Ali Ajeti, dallojnë moshat e ndryshme të qenies së dëshmorit pasi që atyre u merr fund jeta fizike gjithnjë më të mëdha këto se mosha e lirisë që na e kanë sjellë ata.

Teksa sot bëhen 35 vjet nga rënia e dëshmorit Ali Ajeti, duhen edhe dy javë që të bëhen 25 vjet nga ardhja e lirisë për Kosovën. Pra në këtë rast, mosha nga rënia e dëshmorit Ali Ajeti është për 10 vjet më e madhe se mosha e lirisë sonë që e gëzojmë, që e jetojmë edhe si rezultat i veprës dhe rënies së Ali Ajetit. Kjo sepse për lirinë e Kosovës, populli i saj ka nisur të paguaj shumë herët, që para se të fillonte lufta çlirimtare, meqë rezistenca dhe betejat për lirinë e Kosovës, janë vite dhe dekada më të hershme se lufta 1998 e ’99 kur ato kulmuan.

Vërtetë lufta në Kosovë shpërtheu në fillim të vitit 1998 dhe përfundoi në mes të vitit 1999 me epilog çlirimin e Kosovës, por preludi i kësaj lufte, shtrihet pas në kohë të paktën një dekadë mbrapa, në vitin 1989. Ky është një vit kur u bën kapërcime të mëdha në ish-Jugosllavi, ku ne ishim të shtypur, pas të cilave fati politik i asaj Federate ku shqiptarët ishin të përfshirë pa u përfillur vullneti i tyre politik, mori kaheje të pakthyeshme.

Ishte ky viti kur përfundimisht Jugosllavia e AVNOJ-it u bë Jugosllavi e Millosheviqit. Më 1 mars të vitit 1989, Serbia pati shpallur gjendje të jashtëzakonshme në Kosovë, që në atë kohë ishte ende krahinë autonome në kuadër të Jugosllavisë. Disa ditë më pas, më 18 mars 1989, Serbia i miratoi disa ndryshime kushtetuese me të cilat i dha vetes arbitrarisht kompetenca shtesë mbi Kosovën, kurse pas pesë ditësh, më 23 mars 1989, regjimi terrorist i Serbisë, ia suprimoi autonominë Kosovës. Katër ditë më pas, më 27 mars 1989, disa djem nga treva e Llapit, kryen një aksion të armatosur duke e vrarë një polic e duke e plagosur një tjetër. Ata i takonin një grupi që njihej si “Çeta e Llapit”, e i cili drejtohej ushtarakisht nga Ali Ajeti, kurse politikisht nga Sabri Kiçmari.

Mes dhjetëra organizatash ilegale të formuara dhe të shpërbëra në Llap që në vitet e ’50-ta, Çeta e Llapit ishte organizata e parë në Kosovë që kishte karakter ushtarak, pra të një rezistence të armatosur. Çeta e Llapit ishte trashëgimtare e një grupi edhe më të hershëm i quajtur “Grupi ilegal i Llapit”, i formuar që më 10 korrik të vitit 1981 në Podujevë, nga Ali Ajeti, Avdi Gjata dhe Hamit Hamiti.

Por ndërkohë, shumë nga anëtarët e këtij grupi ishin arrestuar dhe burgosur politikisht, shpërndarë anë e mbanë kazamateve të ish-Jugosllavisë, sikur se edhe vet Ali Ajeti, që pas gjashtë muajsh në hetuesi, më 18 qershor 1984, u dënua me pesë vjet burgim. Në po të njëjtin proces gjyqësor politik me Aliun, ishin dënuar edhe Bajram Ajeti, Sherif Konjufca, Avdi Gjata, Ismet Begolli, Musa Jupolli, Sabri R. Hamiti, Mustafë Xhemajli, Bajrush Behrami, Kadri Llugalliu dhe Shaban Mulolli. I lindur më 10 gusht 1957, Ali Ajeti i mbushi 27 vjet sa ishte në burg, teksa vuajti në burgun e Prishtinës, në burgun e Mitrovicës, të Gjurakocit, të Dubravës dhe në burgun e hetuesisë në Pejë, gjersa kur u lirua nga burgu, tashmë ishte bërë 31 vjeçar. Por të qenit i lirë nga burgu, nuk i ofronte liri as Ali Ajetit, as shokëve të tij dhe as popullit të Kosovës së okupuar, andaj pas lirimit nga burgu, Aliu iu rikthye angazhimit për lirinë e popullit dhe çlirimin e vendit të tij.

Kjo vazhdoi për disa muaj deri më 30 maj të vitit 1989, kur në Kosovë erdhi një delegacion i Paralamentit Evropian, i prirë nga Hulian Grimaldos, e i përbërë prej këtyre anëtarëve: Giorgio Rosseti, Emilio Espedes, Frode Kristoffersen dhe Lisilot Siebel Emmerling. Ata erdhën në Kosovë për ta parë gjendjen e shqiptarëve, që ishin të shtypur politikisht, të dërrmuar ekonomikisht dhe të diskriminuar ç‘njerëzisht nga regjimi i Serbisë. Në agjendën e delegacionit të Parlamentit Evropian ishte paraparë atëbotë që në ora 13:00, anëtarët e tij ta vizitonin qytetin e Podujevës. Pikërisht në atë kohë Ali Ajeti me shokët e Çetës së Llapit, organizuan një demonstratë masive në Podujevë me parullat: “Kosova Republikë”, “Vetëvendosje”, “Liri, barazi, demokraci”, “Parlament mos lejo apartheid” etj.

Policia e Serbisë reagoi dhunshëm ndaj demonstruesve që mbanin flamuj kombëtarë dhe pankarta në duar, kurse Aliu që ishte edhe i armatosur, rezistoi me armë, derisa u vra. Atë ditë të martë, më 30 maj 1989, Ali Ajeti ra dëshmor duke e përmbyllur jetën e tij të guximshme me rënie heroike. Vet delegacioni i Paralamentit Evropian u deklarua i zhgënjyer që nuk iu mundësua t’i takonte të burgosurit, intelektualët dhe punëtorët, teksa konstatonte edhe vrasjen e Ali Ajetit. Do të duheshin edhe dhjetë vjet të tjera gjatë të cilave shumë nga shokët e Ali Ajetit do të bënin gjithashtu luftë çlirimtare, beteja të njëpasnjëshme, e madje edhe do të binin edhe dëshmorë por si ai, që Kosova të çlirohet e mandej edhe të bëhet Republikë, siç guxuan ta ëndërronin, ta dëshironin, siç e kërkuan dhe siç vepruan dhe vdiqën për të, Aliu, shokët e tij të Çetës së Llapit dhe patriotë të tjerë. Me gjithë qenien i përkushtuar për Kosovë, tërë jetën kushtuar lirisë së Kosovës.

Lavdi veprës së dëshmorit Ali Ajeti dhe të gjithë dëshmorëve të kombit!

25 vite më parë, nën organizimin shtetëror të Serbisë, në hapësirat e burgut të Dubravës u vranë 116 të burgosur politikë shqiptarë dhe u plagosën mbi 300 të tjerë. Nga data 19 maj, deri më 24 maj, të burgosurit shqiptarë që ishin sjellë aty nga të gjitha burgjet e Kosovës, po përjetonin ditët më të rënda të tyre duke u përballur me një forcë që ishte mposhtur tashmë dhe që po hakmerrej mbi ta duke i masakruar. Në ato ditë plot me tortura, dhunime e vrasje pati të burgosur që arritën të shpëtonin dhe të arratiseshin përmes siç shpjegojnë edhe vetë ata, përpjekjeve gati mbinjerëzore.

Sot, në shënimin e 25 vjetorit të kësaj masakre, një delegacion i Lëvizjes VETËVENDOSJE! i prirë nga Kryetari, njëherazi Kryeministri, Albin Kurti, bashkë me ministra dhe zv. ministra, deputetë dhe aktivistë të Lëvizjes, bënë homazhe te pllaka përkujtimore e kësaj masakre në Dubravë.

Kryeministri Kurti në fjalën e tij tha se emrat e të burgosurve të vrarë në Masakrën e Dubravës ngrehin dëshminë dhe akuzën e fortë ndaj krimeve të Serbisë në Kosovë.

“Secili prej të burgosurve shqiptarë që ishin këtu në burgun e Dubravës në ato ditë të majit të vitit 1999, është dëshmitar i historisë dhe dëshmitar i të vërtetës të Kosovës. E kjo e vërtetë në vetvete është aktakuzë para drejtësisë dhe historisë, ndaj shtetit të Serbisë, për përgjegjësitë që ka për të kaluarën e saj kriminale në Kosovë. Të 116 të vrarët që u janë skalitur emrat këtu në këtë memorial, janë e vërteta dhe akuza më e fuqishme për masakrën e Dubravës. I zhdukuri në këtë masakër, që është politikani dhe ideologu politik i çështjes sonë kombëtare Profesor Ukshin Hoti, është e vërteta e shkruar dhe e jetuar e fatit politik të shqiptarëve nën Serbi. Është e vërteta e mijëra të zhdukurve me dhunë nga Serbia, prej të cilëve 1597 janë ende të pagjetur. 185 të burgosur të plagosur nga 771 të mbijetuar gjithsej, janë e vërteta mes njerëzish të gjallë që ishin dëshmitarë të masakrës së Dubravës, e vërteta që ende flet dhe dëshmon, sikurse këtu sot”, tha ai.

Lavdi të rënëve të masakrës së Dubravës dhe të gjithë të rënëve në rrugën e gjatë e të vështirë të Kosovës për liri!

“Prizreni po e forcon lidhjen me VETËVENDOSJE!-n, dhe kryeqyteti i kulturës e i historisë shumë shpejt do i kthehet punës së mbarë progresiste dhe lidhjes me mirëqeverisjen demokratike”, tha Kryeministri, njëherazi Kryetari i Lëvizjes, Albin Kurti, në takimin e mbajtur dje me qindra anëtarë të rinj që i janë bashkuar Lëvizjes VETËVENDOSJE! në Prizren.

Rruga Prizren-Tetovë, hekurudha që do e lidhë Prizrenin me Gjakovën dhe Shkodrën janë dy prej projekteve në infrastrukturë që kemi filluar e që do të kontribuojnë si në lidhjen e shqiptarëve ashtu edhe në zhvillimin ekonomik të Prizrenit, tha Kryeministri, i cili kujtoi spitalin e këtij qyteti dhe Universitetin “Ukshin Hoti” që në këto tre vite janë transformuar.

Në Prizren kishim një shkëputje të shkurtër por po kthehemi dhe këtë e dëshmon anëtarësimi i lartë dhe i vazhdueshëm i qytetarëve në subjektin tonë. Prizreni frymon me Lëvizjen për këtë jemi garantues secili prej nesh dhe të gjithë ne së bashku, tha Kryeministri Kurti.

Kryeministri, Albin Kurti, filloi ditën duke bërë homazhe në Gllobar, Verboc dhe Shtuticë, në përkujtim të shqiptarëve të vrarë nga këto fshatra dhe zonat përreth, nga forcat policore e ushtarake të Serbisë më 30 prill 1999. Pas kësaj, ai vazhdoi për në Skenderaj, te Kompleksi Memorial në Marinë, në nderim të rënies heroike të komandantit Ilaz Kodra.

“Para 25 vjetëve janë vrarë 276 shqiptarë, që dëshironin të jetonin të lirë në tokën e tyre stërgjyshore dhe gjaku i tyre është sot dritë e lirisë, është rrënjë e Republikës sonë, për çfarë ne u përkulemi përjetësisht dhe shprehim mirënjohjen tonë për këto familje të dëshmorëve që po qëndrojnë gjithnjë të fortë”, tha kryeministri Kurti.

Pas homazheve në Gllobar, ku nderoi nëntë të vrarët e atij fshati, dhe nderimeve për 60 të vrarët në Verboc, Kryeministri vendosi buqetë me lule edhe në fshatin Shtuticë. Aty, kryeministri Kurti nderoi 76 shqiptarët e vrarë gjatë luftës, ndër ta 32 të vrarë në masakrën e vitit 1999. Në mesin e tyre, dy janë ende të pagjetur.

Duke vlerësuar flijimet kaq të mëdha të popullit në fshatrat Shtuticë, Gllobar, Verboc, Baks, e mbarë Kosovës, ai tha se Kosova jonë demokratike me progres të gjithanshëm që po e forcon sundimin e ligjit, sovranitetin, integritetin territorial, por gjithashtu edhe drejtësinë dhe ekonominë, është dëshmia që ia ka vlejtur sakrifica edhe për çlirim edhe për përparim.

Pas homazheve në këto fshatra, Kryeministri vazhdoi për në Skenderaj, te Kompleksi Memorial në Marinë, ku vendosi lule të freskëta për 42 dëshmorët e Brigadës 114 “Fehmi Lladrovci” në krye me komandantin Ilaz Kodra, të cilët ranë në luftime të ashpra duke mbrojtur civilët në Shtuticë, Verboc, Baks, Gllobar, e fshatra përreth.

Lavdi të gjithë dëshmorëve dhe martirëve të vendit tonë!

Sot, në Ditën Kombëtare të Personave të Zhdukur me Dhunë nga Serbia në luftën e fundit, një delegacion i Lëvizjes VETËVENDOSJE! bëri homazhe te pllaka përkujtimore e të pagjeturve pranë Kuvendit të Kosovës, për të vazhduar te Parku Memorial “Të Zhdukurit me Dhunë nga Serbia” në oborrin e Bibliotekës Kombëtare, dhe më pas në Kompleksin Memorial në Mejë të Gjakovës.

Kujtojmë që, të mërkurën që e lamë pas me datë 24 prill, me kërkesë të grupit të asamblistëve të Lëvizjes VETËVENDOSJE!, në Kuvendin e Komunës së Prishtinës u hodh sërish në votim propozimi ynë për emërtimin e parkut në oborrin e Bibliotekës Kombëtare si Parku Memorial: Të Zhdukurit me Dhunë nga Serbia. Me 44 vota PËR, ky propozim kaloi.

Pas homazheve të bëra sot në këtë park, delegacioni ynë vendosi shirita të bardhë nëpër pemët e mbjellura përreth tij, në përkujtim të personave të zhdukur që të gjithëve na mungojnë.

27 Prilli, është dita kur ne përkujtojmë masakrën e Mejës ku u vranë 377 civilë shqiptarë të Kosovës nga policia dhe ushtria serbe. Në këtë ditë, 25 vjet më parë, burra e djem u nxorën nga kolonat e refugjatëve në një pikë kontrolli në Mejë dhe familjet e tyre u urdhëruan që të vazhdojnë udhën për në Shqipëri. Burrat dhe djemtë e ndarë nga kolona, pastaj u ekzekutuan pranë rrugës. Masakra konsiderohet si më e madhja gjatë luftës në Kosovë në vitet 1998-1999. Vetëm një pjesë e kufomave janë gjetur, pjesa tjetër janë vënë në kamionë dhe janë transportuar në Serbi ku janë varrosur në varreza masive ose janë djegur për të zhdukur gjurmët.

Kryeministri, Albin Kurti, në fjalën që mbajti sot në Mejë kujtoi që ndonëse lufta ka përfunduar në qershor të 1999, lufta për luftën e Kosovës nuk ka përfunduar asnjëherë dhe ajo vazhdon edhe sot.

“Për adresimin e krimeve të kryera gjatë luftës, kemi zhvilluar bazën ligjore, dhe kemi rritur kapacitetet e institucioneve për adresim efikas të tyre. Kemi ndarë mjete për fuqizimin e Prokurorisë Speciale dhe pozita të reja në Këshillin Prokurorial të Kosovës dhe Këshillin Gjyqësor të Kosovës. Kemi mundësuar gjykimin në mungesë të kriminelëve të luftës. Madje që në vitin 2019. Dhe gjatë këtij mandati kemi bërë ndryshimet e nevojshme ligjore që kriminelët serbë të luftës të përballen me drejtësi, sepse këto krime veçse nuk falen, as nuk vjetrohen kurrë”, tha ai.

“Në dhjetor të vitit të kaluar Prokuroria Speciale e Republikës së Kosovës ka ngritur aktakuzë ndaj 53 personave të dyshuar për masakrën e Mejës dhe fshatrave të regjionit Reka e Keqe, të Gjakovës. Me strukturën e re të miratuar në Policinë e vendit tonë, nga sektori e kemi ngritur Drejtorinë e Hetimit të Krimeve të Luftës me 41 hetues, pra kemi rritur më shumë se 100 për qind numrin e hetuesve. Për të dokumentuar me saktësi të gjitha krimet, kemi funksionalizuar Institutin e Krimeve të Kryera gjatë Luftës në Kosovë. E tani kemi një adresë pra për të dërguar të gjitha dëshmitë.”

“Ashtu siç e kemi fituar luftën më 1999, me përpjekjet e paepura të popullit tonë, me betejat e lavdishme të Ushtrisë Çlirimtare të Kosovës, me gjakun e dëshmorëve dhe martirëve të kombit, dhe me mbështetjen e aleatëve tanë, ashtu do ta fitojmë edhe luftën për luftën e Kosovës, me të vërtetën historike, me drejtësi për krimet e kryera gjatë luftës, të gjithë ne bashkë, shteti dhe populli i Kosovës, me miq dhe aleatë si dhe me vlerat tona të përbashkëta demokratike e perëndimore”, tha Kryeministri Kurti.

Lavdi dëshmorëve e martirëve! Lavdi Mejës!

Sonte, në Kastriot Organizata Gratë për VETËVENDOSJE! ka mbajtur takim me gra e vajza të kësaj komune. Në këtë tubim përplot me entuziazëm të pranishme ishin kryetarja e GVV-së njëherazi ministre e Drejtësisë Albulena Haxhiu, Ministrja e Ekonomisë Artane Rizvanolli, kryetarja e GVV-së në Kastriot Fjolla Nasufi, kryetari i Qendrës atje njëherazi deputeti Halil Thaçi dhe deputetë e aktivistë të tjerë të LV-së.

Në këtë tubim u fol për qeverisjen e Lëvizjes që ka adresuar shumë probleme e ka marrë veprime që kanë ndikuar direkt në jetën dhe mirëqenien e grave. Shumë gra e vajza në këto tre vite që Qeverisë Kurti e kanë ndjerë dorën e shtetit për herë të parë. Nënat lehona përmes shtesave për to e fëmijë, subvencionet e politikat mbështetëse në punësim, grantet në biznes, bursat STEM për studente janë vetëm disa prej politikave të qeverisjes që drejtohet nga Lëvizja VETËVENDOSJE! që kanë pasur në qendër mbështetjen për gratë dhe vajzat.

Tubime si ky në Kastriot janë dëshmi e qartë se Lëvizja është adresa e angazhimit të secilës grua dhe vendi ku politikat emancipuese gjejnë zbatim.

Kryeministri, Albin Kurti, bashkë me ministrin e Mbrojtjes, Ejup Maqedonci, ministrin e Kulturës, Hajrulla Çeku, zëvendësministra, deputetë dhe aktivistë të Lëvizjes VETËVENDOSJE! bënë sot homazhe në Drenas në kujtim të martirëve të Poklekut dhe Çikatovës së Vjetër.

25 vjet më parë, në Poklek dhe Çikatovë të Vjetër të Drenasit forcat serbe kryen gjenocid duke masakruar 77 civil shqiptarë. 53 anëtarë të familjes Muqolli, Elshani, Caraku e Hoxha në Poklek, kurse 24 civil të tjerë në Çikatovë të Vjetër. Nga foshnja gjashtë muajshe deri te plaku 75 vjeçar, në mënyrë çnjerëzore, me bomba dhe plumba, 77 shqiptarë të paarmatosur u vranë, u djegën, u varrosën, e më pas u zhvarrosën për t’i zhdukur nëpër varreza masive nëpër Serbi. Ky ishte monstruiziteti i Serbisë kriminale në Kosovë në luftën e fundit, që synonte shfarosjen e popullit shqiptarë.

Vrasja dhe djegja e kufomave janë dëshmi jo vetëm për shfarosje të jetërave por edhe të qenies. Masakra e Poklekut është dëshmi e gjallë e gjenocidit të Serbisë dhe autorët e saj duhet të dënohen. Këtë vit bëhen 5 vjet qëkur në Kuvendin e Kosovës ka kaluar ligji që mundëson ndjekjen e kriminelëve të luftës dhe dënimin e tyre në mungesë, prokuroria duhet të veprojë. Duhet drejtësi për viktimat dhe dënim shtetëror e ndërkombëtar për ekzekutuesit dhe urdhërdhënësit e këtyre krimeve.

Kryeministri Kurti tha se autoritetet serbe jo që vetëm nuk janë penduar për atë që ka ndodhur para 25 vjetëve, por duket qartë se kanë edhe një lloj dëshire për të vazhduar krimet e dikurshme të Millosheviqit.

Delegacioni u ndal edhe te Shtëpia Muze në Poklek që paraqet dëshmitë e kësaj masakre nga shteti Serb.

Nderimet më të larta ndaj atyre që sakrifikuan dhe dhanë jetën e tyre për lirinë tonë.

Sot, në Republikën tonë, u organizuan homazhe për të kujtuar dhe nderuar 45 civilë shqiptarë në Sllovi të Lipjanit dhe 23 të tjerë në Lagjen e Boshnjakëve në Mitrovicë, të cilët u masakruan para 25 vitesh nga forcave serbe gjatë luftës në Kosovë.

Kryeministri, Albin Kurti, bashkë me Kryetarin e Kuvendit, Glauk Konjufca, anëtarë të kabinetit qeverisës, deputetë, dhe aktivistë të Lëvizjes VETËVENDOSJE! kanë bërë homazhe në Kompleksin Memorial të varrezave në fshatin Sllovi të Lipjanit, ndërsa, ministri i Punëve të Brendshme, Xhelal Sveçla, me ministrin e Pushtetit Lokal, Elbert Krasniqin kanë bërë homazhe në Lagjen e Boshnjakëve në Mitrovicë.

Në Sllovi, Kryetari Konjufca, tha se këto ditë janë ditë të dhimbjes por edhe të krenarisë për arsye se gjaku i dëshmorëve dhe martirëve qëndron në themelet e lirisë dhe të shtetit tonë.

“Sot bëra homazhe për nder të martirëve të Sllovisë, duke iu përkulur me respektin më të lartë sakrificës sublime. Dhimbja është shumë e madhe kur e dimë se sa shumë dha populli ynë për lirinë që e gëzojmë sot. Martirët tanë janë dëshmia e së drejtës sonë, e obligimit për drejtësi, të cilën nuk do reshtim kurrë së kërkuari. Ata janë thirrja ndaj ndërgjegjes sonë individuale dhe kolektive se duhet të bëjmë vazhdimisht më shumë për Kosovën”, ka shkruar ai.

Në Mitrovicë, ministri Sveçla, tha se përkulemi para sakrificës së të rënëve dhe angazhohemi çdo ditë për zbardhjen e krimeve të Serbisë dhe sjelljen e kriminelëve para drejtësisë.

“25 vite më parë, forcat serbe grumbulluan rreth 80 shqiptarë në shtëpinë e Mustafë Sahitit në Lagjen e Boshnjakëve ku i keqtrajtuan, torturuan e masakruan 23 prej tyre. I përulemi sakrificës së të rënëve për lirinë që e gëzojmë ndërsa si institucione të Republikës së Kosovës po angazhohemi çdo ditë në zbardhjen e krimeve që Serbia kreu në Kosovë dhe sjelljen e kriminelëve para drejtësisë”, ka thënë ministri Sveçla.

Sot në mbledhjen LIV të organit tonë më të rëndësishëm, Këshillit të Përgjithshëm, që njëherit shënon mbledhjen e parë për vitin 2024, u prezantuan arritjet e qeverisjes tonë përgjatë tre viteve të fundit dhe u fol për sfidat që i kemi përpara në muajt në vazhdim që janë edhe muaj para zgjedhjeve që do të mbahen në Republikën tonë.

Ministrja e Drejtësisë, Albulena Haxhiu, ministri i Punëve të Brendshme, Xhelal Sveçla, ministri i Mbrojtjes, Ejup Maqedonci, raportuan për punën e tri dikastereve që drejtojnë. Organizatat GVV, RVV, Sekretariati i Përgjithshëm dhe Sekretariati për Marrëdhënie Ndërkombëtare prezantuan raportet vjetore, si dhe u bë ndarja e certifikatave për pjesëmarrësit në Nivelin Politiko-Organizativ të Shkollës Politike.

Mbledhja e Këshillit u hap me një fjalë hyrëse të Kryetarit, njëherazi Kryeministrit, Albin Kurti, i cili foli për të arriturat dhe sukseset të qeverisë që ai drejton, për progresin e gjithmbarshëm ekonomik dhe demokratik të Republikës tonë, dhe për sfidat që na presin në vitin e fundit të këtij mandati qeverisës.

Demokracia dhe transparenca e subjektit tonë politik është e lidhur ngushtë me demokracinë dhe transparencën në qeveri dhe kjo tashmë është dëshmuar në këto tri vite qeverisje, tha Kurti në fillim të fjalës së tij.

“Në tri vite qeverisje jemi ngritur për 22 vende në lirinë e medias, 21 vende në luftën kundër korrupsionit, 16 vende në demokracinë liberale dhe 13 vende në demokracinë elektorale. Në liritë globale, të drejtat politike dhe liritë civile jemi ngritur për 6 vende dhe për dy vite (2021-2022) renditemi të parët në rajon në indeksin e sundimit të ligjit. Pra ka një lidhje të drejtpërdrejtë mes demokracisë së brendshme, qeverisjes demokratike, dhe avancimit të demokracisë në shtet e shoqëri. Prandaj këto arritje janë meritë e përbashkët. Dhe këtë duhet ta theksojmë vazhdimisht sepse kjo e bën dallimin”, tha ai.

Në rajon ka rënie të demokracisë kurse në Kosovë rritje dhe avancim të saj, por kjo nuk duhet marrë si e garantuar, nëse duam që ajo të vazhdojë duhet të luftojmë për të. Demokracia, liritë dhe të drejtat siç është dëshmuar sjellin rritje ekonomike, sociale dhe kulturore.

“Ukrainasit po japin jetë për të mbrojtur demokracinë dhe të drejtën për të jetuar të lirë. Kudo në rajon demokracia është në rënie kurse në Kosovë ajo po rritet dhe avancohet…Demokracia, rritja e lirive dhe të drejtave sjellin mundësi për rritje ekonomike, sociale dhe kulturore dhe çojnë në zhvillim të qëndrueshëm e afatgjatë. Pikërisht kjo është dëshmuar në këto tri vite qeverisje ku: Rritja ekonomike qëndron mesatarisht në 6.2% me 4% rritje vitin e kaluar; Janë dyfishuar eksportet dhe investimet e huaja direkte dhe raporti mes eksportit dhe importit ka rënë nga 1:9 në 1:6; Të hyrat tatimore janë rritur për 60% dhe kemi 420 mijë vende aktive të punës që është përmirësim për 20% krahasuar me vitin 2021; Vitin e kaluar u ekzekutuan 555 milionë euro në investime kapitale, që përbënë shifrën më të lartë ndonjëherë, ndërkaq që kemi borxhin publik më të ulët në Evropë”, tha Kurti, duke theksuar se këtë zhvillim e kemi shpërndarë në biznese dhe mundësi për qytetarë.”

Kemi hyrë në javën e 30-të, prej kur kryekrimineli Milan Radoiçiq, i sanksionuar nga Shtetet e Bashkuara të Amerikës dhe Mbretëria e Bashkuar ende nuk ka aktakuzë nga Prokuroria e Shtetit tonë për sulmin terrorist që na e varu rreshterin, heroin, Afrim Bunjaku.

“Në veri të vendit është ulur ilegaliteti, dhe është shtuar ligjshmëria dhe siguria. Janë mbyllur 27 rrugë ilegale, dhe janë shkatërruar 9 laboratore droge atje, 6 të kriptovalutave dhe 4 depo të armatimit. Janë sekuestruar alarme e kamera të strukturave ilegale, dhe armatim e asete në vlerë rreth 15 milionë euro. Për të rritur sigurinë janë ngritur 9 stacione policore për mbikëqyrjen dhe kontrollin e kufirit. Këtu, më duhet të sjellë ndërmend që sot po hymë në javën e 30 prej kur kryekrimineli Milan Radoiçiq, i sanksionuar nga Shtetet e Bashkuara të Amerikës dhe Mbretëria e Bashkuar ende nuk ka aktakuzë nga Prokuroria e Shtetit tonë për sulmin terrorist që na e varu rreshterin, heroin, Afrim Bunjaku. Sulm për të cilin ai pranoi publikisht pjesëmarrjen dhe autorësinë. Edhe java e tretë po të ishte pa aktakuzë do të duhej të problematizohej se lërë më java e 30-të”, tha Kurti, duke potencuar që pas 24 vjetëve komunat në veri të vendit i janë kthyer normalitetit dhe janë vu në shërbim të qytetarëve.

“Progresit i nevojitet drejtësia. Drejtësisë i nevojitet progresi. Qeveria progresin, gjyqësori drejtësinë”, Kryeministri, Albin Kurti.

Në pranverën e 25-të të pasluftës po shënojmë përvjetorë të masakrave, kemi themeluar Institutin e krimeve të kryera gjatë luftës në Kosovë, më herët (2019) kemi mundësuar gjykimin në mungesë të kriminelëve të luftës, gjatë këtij mandati kemi bërë ndryshimet tjera të nevojshme që kriminelët serbë të përballen me drejtësi. Është koha që sistemi ynë i drejtësisë me urgjencë t’i adresojë këto raste, tha ai.

Avancimi dhe progresi brenda vendit është përcjellë me përmirësimin e imazhit dhe forcimin e sovranitetit jashtë.

“Koha kur qytetarët e Kosovës ishin më të izoluarit në Evropë mori fund në janar të këtij viti me liberalizimin e vizave që solli lirinë e lëvizjes dhe forcimin e pasaportës. Nga 1 janari pasaportën e Republikës së Kosovës e njeh edhe Spanja. E liria e lëvizjes vetëm sa shtoi dashurinë për vendlindjen pasi tani kemi më shumë qytetarë që kthehen sesa që shkojnë. Mbase, në fund të vizitave, qytetarët po kthehen me bashkë-familjarët tanë nga mërgata dhe po sjellin edhe vizitorë të huaj për të shijuar bukuritë e Kosovës. Në maj të vitit 2022 i dhamë fund edhe një periudhë tjetër të izolimit duke aplikuar në Këshill të Evropës, ku pasi kemi kaluar shumë pengesa kemi ardhë në fund të rrugëtimit për anëtarësim të plotë.”

Betejën e radhës e të fundit për këtë proces do ta kemi deri në mesin e muajit maj, kur mbahet ministeriali i Këshillit të Evropës i cili duhet ta ftoj Kosovën që të bëhet anëtarja e 47 e organizatës më të madhe dhe më të vjetër evropiane, tha Kryeministri Kurti duke përmendur një sërë anëtarësimesh në organizata ndërkombëtare si avancimin e statusit të Kosovës në NATO, anëtarësimin në 7 organizata si Partneritetin për Qeverisje të Hapur (OGP), Komisionin Ndërkombëtar për Personat e Zhdukur (ICMP), Shoqatën Evropiane të Kartës Rinore (EYC) e Institutin Ndërkombëtar të Studimeve Administrative (IIAS).

Kryeministri, Albin Kurti, i bëri thirrje mërgatës të marr pjesë në zgjedhjet evropiane të 9 qershorit duke përkrahur qendrën e majtë, socialdemokratët, sepse vetëm ata janë të besueshëm karshi ekstremizmave dhe fashizmave në rritje. Ai po ashtu theksoi rëndësinë për regjistrim online të diasporës brenda procesit të regjistrimit të përgjithshëm që ka filluar në Kosovë.

“Regjistrimi i popullsisë është një instrument kyç që shërben për të kuptuar nevojat dhe gjendjen edhe të pjesëtarëve të diasporës sonë. Kosova për herë të parë ka filluar regjistrimin online të diasporës, në vetëm dy ditë sa është hapur platforma janë regjistruar afër 17 mijë qytetarë. Është koha që të gjithë ne të mobilizohemi për të informuar mërgatën për këtë proces jetik.

Përmes të dhënave statistikore, do të mund të planifikojmë politika dhe shërbime më efikase për të gjithë bashkatdhetarët tanë. Andaj, kërkoj nga secili prej jush që së bashku të angazhohemi për të ndarë këtë informacion të rëndësishëm për regjistrimin online përmes platformës ediaspora.rks-gov.net. Regjistrohuni ju dhe familjet tuaja nga çdo cep i botës.”

Për fund, Kryeministri Kurti, foli për zgjedhjet që po afrojnë. Ai tha se këto tri vite në qeverisje na kanë shtuar vullnetin për të arritur edhe më shumë.

“Sfidat që kemi përpara janë të shumta ndërkaq rreziqet që na kërcënojnë janë të mëdha, por e madhe është edhe forca jonë dhe e gjerë është mbështetja e qytetarëve tanë të cilët janë të bashkuar më shumë se kurrë për punën tonë të drejtë. Prandaj edhe nuk ka arsye pse të mos i arrijmë synimet tona. Mbështetja e madhe qytetare është burim i pashtershëm shprese dhe energjie për mua si Kryeministër. Është motori që më shtynë mua dhe qeverisë drejt ndërtimit të shtetit që duam dhe meritojmë. Orët e ditës e ditët e javës mundohem t’i shtoj e zgjas për t’ua kthyer me punë besimin dhe mbështetjen e dhënë ndaj qeverisë”, tha Kryeministri Kurti.

Sot, në shënim të Ditës Memoriale të të Mbijetuarve të Dhunës Seksuale gjatë Luftës së Fundit në Kosovë, Kryeministri, Albin Kurti, së bashku me znj. Vasfije Krasniqi Goodman dhe znj. Shyrete Tahiri Sulimani, me Kryetaren e Komisionit Qeveritar për Njohjen dhe Verifikimin e Statutit të Personave të Dhunuar gjatë Luftës Çlirimtare të Kosovë, znj. Leonora Selmani, zv. Kryeministrin Bislimi dhe zv. Kryeministren Donika Gërvalla, ministra e zëvendësministra, deputetë dhe aktivistë të Lëvizjes VETËVENDOSJE! bëri nderime te memoriali “Heroinat”, në Prishtinë.

Kryeministri Kurti tha se viktimat dhe të mbijetuarat e dhunës seksuale gjatë luftës së fundit në Kosovë, gra e vajza, por edhe djem e burra, kanë paguar një çmim të lartë fizik, psikik, emocional për shtetin e për lirinë tonë.

Teksa shprehu zotimin se institucionet e shtetit janë në krye të detyrës për ta mbrojtur këtë kategori, njëkohësisht bëri thirrje edhe tek qytetarët për mbështetjen e tyre, pasi që 25 vite stigmatizimi ndaj tyre nuk ka munguar.

Së bashku me znj.Vasfije Krasniqi Goodman dhe znj.Shyrete Tahiri Sulimani, Kryeministri bëri thirrje për më shumë mbështetje shoqërore e angazhim për drejtësi.

“Vasfija e Shyretja janë shembuj për mbarë shoqërinë edhe kombin tonë, të thyerjes së heshtjes për një krim monstruoz, i cili ishte armë e luftës, në kuadër të projektit gjenocidal të Serbisë kundër popullit shqiptar të Kosovës’’, u shpreh ai.

‘’Janë mbi 20 mijë gra e vajza, burra e djem, të cilët janë përdhunuar gjatë luftës dhe është pjesë e gjenocidit që kemi përjetuar nga Serbia’’ u shpreh ai, teksa shprehu përulje e mirënjohje për qendresën, ndaj Marte Tunaj dhe të gjitha viktimave të dhunës seksuale që nuk rrojnë më.

Në 25-vjetorin e masakrës së Rezallës, një delegacion i Lëvizjes VETËVENDOSJE! i prirë nga Nënkryetari i Lëvizjes, njëherazi Kryetari i Kuvendit, Glauk Konjufca, Kryetarja e GVV-së, ministrja e Drejtësisë, Albulena Haxhiu, ministri i Brendshëm, Xhelal Sveçla, ministri i Mbrojtjes, Ejup Maqedonci, deputeti, Gani Krasniqi, Sekretari Organizativ i Lëvizjes, Alim Rama, dhe aktivistë nga qendrat tona, bënë sot homazhe te kompleksi memorial i varrezave në Rezallë të Skenderajt, në kujtim dhe nderim të martirëve të rënë.

Me 5 prill të vitit 1999, në Rezallë të Skenderajt policia dhe ushtria okupatore serbe ekzekutoi 98 shqiptarë civil të paarmatosur, duke zhdukur më pas me dhunë 44 trupa të tyre.

Kryetari i Kuvendit, Glauk Konjufca, theksoi se krimi në Rezallë është një shembull i përpjekjeve të vazhdueshme të shtetit të Serbisë për të kryer spastrim etnik ndaj popullsisë shqiptare. Ai tha se Serbia nuk ka ndryshuar sepse kurrë nuk është përballur me krimet e veta.

“Serbisë i kanë ndryshuar rrethanat, por jo mendësia. Pa e ndryshuar mendësinë dhe pa u përballur me krimet e veta, përballë nesh ajo do të përbëjë gjithnjë shtetin e zhytur në krimin e përbindshëm dhe kërcënim të vazhdueshëm. Ne kemi dëshmorë e martirë të cilëve u përkulemi, ndërsa Serbia kriminelë lufte që i mbron. Rezalla është pjesë e dhimbjes sonë të madhe, ku martirët lanë dëshminë e sakrificës si çmim të lirisë. Për ta ne do të vijojmë të kërkojmë drejtësi. Rezalla nuk ishte episod i izoluar apo rast përjashtimor, por ndodhi në vazhdën e fushatës së krimeve kundër njerëzimit, gjenocidit, masakrave të njëpasnjëshme dhe spastrimit etnik, që ishin mekanizma dhe mjete të shtetit të Serbisë, si strukturë e kalkulimit dhe gjenerimit të vrasjes në masë.”

Kryeministri, Albin Kurti, duke kujtuar këtë masakër, u bëri thirrje partnerëve ndërkombëtar të kërkojnë nga Serbia zbardhjen e fatit të të vrarëve në këtë masakër që janë zhdukur më pas me dhunë. Ai ripërsëriti kërkesën që drejtësia vendore pa vonesë të veprojë që urdhërdhënësit dhe ekzekutorët të gjykohen e dënohen.

“Andaj, sot e gjithnjë u bëj thirrje partnerëve ndërkombëtarë që nga Serbia, si përgjegjëse për vrasjen dhe zhdukjen e të dashurve tonë, të kërkojnë zbardhjen e plotë të fatit të tyre dhe drejtësi për viktimat dhe familjet. Drejtësia vendore duhet pa vonesë dhe me ngulm të veprojë, që përgjegjësit, urdhërdhënësit dhe ekzekutorët, të gjykohen e të dënohen.”

“E vërteta e krimeve të Serbisë në Kosovë nuk mund të mbulohet nga dheu i varrezave masive. Nuk mund të lejojmë harresën të mbulojë mizoritë që ndodhën në luftë. Duke nderuar të kaluarën, me drejtësi për viktimat, angazhohemi për të ardhmen e Republikës sonë. Për Kosovën e pavarur, ku brezat e rinj rriten të lirë e të sigurt. Duke mësuar nga e kaluara, ecim përpara me shpresë dhe vendosmëri”, ka shkruar Kryeministri Kurti.

I përjetshëm qoftë kujtimi i martirëve të kombit nga Rezalla!

25 vjet më parë, në mëngjesin e 28 marsit 1999, forcat serbe rrethuan fshatin Izbicë të Skenderajt dhe filluan sulmin ndaj popullsisë civile duke masakruar 147 shqiptarë. Pas krimit mizor trupat u varrosën n Izbicë, për t’u zhvarrosur më pas nga të njëjtat forca serbe që më pas i morën trupat e pajetë dhe i shpërndanë në vende të ndryshme nëpër Kosovë dhe Serbi. Në Izbicë ka varre bosh, gjashtë persona ende rezultojnë të zhdukur.

Për ta kujtuar këtë ngjarje, këtë krim të Serbisë që sot mbushi 25 vjet, Kryeministri, Albin Kurti, bashkë me bacën Rifat Jashari, nderuan të vrarët e kësaj masakre duke vendosur lule të freskëta te varrezat e tyre në fshatin Izbicë të Skenderajt.

Pranë Memorialit, Kryeministri Kurti tha se plagët e kësaj masakre nuk mund të mbyllen përderisa kriminelët nuk janë në burg. Gjaku i tyre ndodhet në themelet e lirisë dhe të shtetit tonë, tha ai.

“Nuk u kursyen as gratë, as fëmijët e as pleqtë. Në fakt këta edhe qëllimisht u synuan e u qëlluan, sepse Serbia me operacionin “Patkoi” synonte shfarosjen e shqiptarëve dhe zbatimin e projektit të saj gjenocidal kundër nesh”, u shpreh ai. Me keqardhje, tha ai, për gjithë këtë masakër, ku janë vrarë 147 shqiptarë, vetëm një person është arrestuar.

“Prokuroria e Shtetit e ka mundësinë për të përndjekur, e sistemi i drejtësisë në përgjithësi, edhe për të gjykuar në mungesë. Besoj që është e padrejtë, e padurueshme, që për masakrën e Izbicës është arrestuar vetëm një person, meqenëse kanë të drejtë të gjykojnë në mungesë”, tha kryeministri.

Ai përsëriti se Prokuroria e Shtetit e ka mbështetjen e plotë, të parezervë e të pa kursim të Qeverisë së Republikës, që kriminelët e luftës që na i vranë gratë, fëmijët e pleqtë të cilët e donin tokën dhe lirinë e vetë, të jenë prapa grilave, në mënyrë që të kemi drejtësi dhe dalëngadalë të na mbyllen plagët.

Të pranishëm në homazhet në Izbicë ishin edhe ministrja e Arsimit, Shkencës, Teknologjisë dhe Inovacionit, Arbërie Nagavci, zëvendësministri i Punëve të brendshme, Bardhyl Dobra dhe zëvendësministri për Komunitete dhe Kthim, Mevlud Sinani.

25 vjet më parë, 28 mars 1999, në Podujevë, 21 anëtarë të familjeve Bogujevci, Duriqi dhe Llugaliu, prej të cilëve 7 fëmijë nga mosha 2 deri në 15 vjeç, dhe 7 gra, u pushkatuan nga njësiti policor serb “Shkorpionët”. Në këtë masakër, 16 anëtarë të familjes ju vranë kurse me 16 plumba në trup, Saranda Bogujevci, bashkë me katër kushërirë të saj mbijetuan.

Për të bërë homazhe e për të vendosur lule të freskëta te varrezat e anëtarëve të vrarë të familjeve Bogujevci, Duriqi dhe Llugaliu, ishte sot Kryeministri, Albin Kurti, bashkë me zv. Kryeministrin, Besnik Bislimi, Kryetarin e Podujevës, Shpejtim Bulliqi, Shefen e Grupit Parlamentar, Mimoza Kusari-Lila, dhe me ministra të kabinetit, deputetë, asamblistë dhe aktivistë të Lëvizjes.

Kryeministri, Albin Kurti, i bëri thirrje prokurorisë së shtetit që të bëjë më shumë lidhur me arrestimin e kryerësve të masakrës ndaj familjeve Bogujevci, Duriqi dhe Llugaliu në Podujevë.

“Ne edhe një herë i bëjmë thirrje prokurorisë së shtetit që të bëjë më shumë në mënyrë që këta vrasës mizor të familjeve Bogujevci, Duriqi e Llugaliu të ndodhen prapa grilave sepse ka pasur shumë më tepër ekzekutorë dhe urdhërdhënës të kësaj ekspedite kriminale gjenocidale se sa që janë përballur në procesin e drejtësisë, ku siç dihet në Serbi nuk ka pasur drejtësi për këto familje.”

Kryeministri Kurti tha se dëshmorët na e përkujtojnë se sa i lartë ishte çmimi i shtetit dhe lirisë që e gëzojmë sot dhe se si rrënjët e shtetit dhe të lirisë janë te gjaku i martirëve dhe i dëshmorëve.

Ai po ashtu kujtoi se në këtë masakër janë vrarë shtatë gra e shtatë fëmijë, por që përkundër një procesi gjyqësor në Serbi nuk ka pasur drejtësi të mjaftueshme.

“Fëmijët kanë qenë prej 2 vjeç deri në 15 vjeç dhe me këtë rast është mbajtur një proces gjyqësor në Serbi, ku janë dënuar disa pjesëtarë të njësitit famëkeq “Shkorpion”, të cilët kanë kryer vrasje edhe në gjenocidin e Srebrenicës dhe ata të dënuar maksimalisht me 20 vjet pa u penduar, kur i kanë mbajtur 2/3 e dënimit janë liruar. Kryesori i tyre Sasha Svjetan është arrestuar në dhjetorin e vitit 2022 në Athinë, si kreu i një karteli të drogës atje. Kjo tregon se si kriminelët e luftës dhe krimi i organizuar në paqe janë të ndërlidhura ngushtë me njëra-tjetrën. Por ne kemi nevojë për drejtësi institucionale në Kosovë dhe rajon”, ka thënë ai.