Raporti i BE-së për Kosovën edhe për vitin 2019 theksoi se korrupsioni në Kosovë është i përhapur gjithandej dhe paraqet nivel shqetësues. Kosova vazhdon të jetë ekonomia më e varfër edhe në raport me vendet e rajonit. Sa i përket integrimit evropian, ky raport tregon se mungon vullneti politik për ecjen përpara me politikat dhe reformat integruese.

Këto problematika dhe zgjidhja për të nxjerrë vendin nga këto probleme që kanë ngulfatur drejtësinë e zhvillimin, barazinë e mirëqenien u prezentuan sot nga deputetja e Lëvizjes, Fitore Pacolli dhe anëtari i Komitetit për politika financiare dhe tregtare, Edison Jakurti.

Madhësia e qeverisë, numri i madh i ministrave dhe zëvendësministrave ka ndikuar negativisht në kredibilitetin dhe efikasitetin e punës së qeverisë. Administrata vazhdon të përdoret si pronë private për interesa të militantëve partiakë e familjarëve, pa marrë parasysh përgatitjen profesionale. Raporti e konsideron tejet shqetësuese ndikimin politik në rekrutimin e pozitave të larta të shërbimit civil dhe rekrutimet pa merita.

Raporti kritikon sistemin e drejtësisë kur potencon se deri më sot ka vetëm 51 raste të regjistruara. Vetëm 38 aktakuza, 27 raste të lidhura me korrupsion dhe 11 të lidhura me krimin e organizuar. Vetëm në 9 raste ka patur një vendim përfundimtar, 5 kanë përfunduar me një vendim (pjesërisht) fajtor, ëqë do të thotë vetëm 9 individë të dënuar për korrupsion. Ndërkaq konfiskimi i pasurisë ka rënë nga 700.000 euro sa ishte në vitin 2017 në vetëm 49.394 euro për vitin 2018.

Po ashtu Raporti thekson edhe shkeljet e të drejtave të njeriut me theks të veçantë dëbimin e 6 shtetasve turq dhe kërcënimet ndaj gazetarëve çka paraqet kërcënim për lirinë e shprehjes në Kosovë.

Zbatimi i Ligjit për barazi gjinore ka mbetur prapa dhe Kosova ende nuk ka miratuar Programin për Barazi Gjinore. Gratë vazhdojnë të mbesin jashtë përfshirjes së barabartë në vendim-marrje. Kosova ka pasur rritje reale ekonomike prej 3.9%, por në të njëjtën kohë në raport theksohet se Kosova ka nivelin më të ulët në rajon të bruto produktit vendor për kokë banori. 1 qytetar i Kosovës ka mesatarisht pak më shumë se ¼ e mesatares së të ardhurave të një qytetari të BE-së dhe pak më pak se ¾ e mesatares së të ardhurave të një qytetari të rajonit. Kjo rritje vjen vetëm për shkak të remitancave të mërgatës e cila në vitin 2018 ishin mbi 800 milionë.

Ndërkaq sa i përket ekonomisë përbrenda vendit Kosova ka edhe mungesë të prodhimit edhe mungesë të punësimit, teksa normat e interesit të bankave vazhdojnë të rriten.

Deficiti tregtar në mallra për vitin 2018 ishte për gati 5 pikë përqindje më i lartë se në 2017-ën, duke arritur afër 3 miliardë euro. Pra, dallimi mes importeve dhe eksporteve në mallra është përafërsisht sa 43% e bruto produktit vendor/ekonomisë tonë. Rritja e çmimeve të produkteve ushqimore, kryesisht të importuara, ishte një ndër arsyet kryesore për inflacionin e 2018-ës. E investimet e huaja direkte në vitin 2018 ishin për 16% apo rreth 42 milionë euro më pak se në vitin 2017.

Sa i përket papunësisë, rreth 12 mijë persona më pak të punësuar në krahasim me 2017-ën. Kosova ka nivelin e bruto produktit vendor për kokë banori më të ultin në rajon, Qeveria nuk ka as strategji as koherencë për subvencionimin e ndërmarrjeve publike.

Nga kjo gjendje që të gjithë qytetarët e ndjejnë dhe e jetojnë, por të cilën e përshkruan edhe raporti mund të dilet me një qeveri të re dhe progresiste, që lufton krimin e korrupsioni e çkap shtetin. Qeverisja e re duhet të bëjë ndryshim paradigmatik të ekonomisë, ku: ndalet e hetohet privatizimi, ku Fondi Sovran koordinon ndërmarrjet publike, Banka Zhvillimore financon projekte kapitale me synim punësimin, Banka Qendrore riorganizon dhe rregullon sektorin financiar, ristrukturohen skemat tatimore, ristrukturohen programet për mbrojtje sociale, rimëkëmbet Trepça, rimendohet energjia dhe ruhet ambienti.

Mediat po vijojnë përditë me publikimin e skandaleve nga “Afera Spitali” ku janë përfshirë zyrtarë të lartë të institucioneve të Kosovës. Ky është një nga skandalet më të mëdhenj në sistemin e shëndetësisë dhe i përfshin zyrtarët më të lartë dhe klientët e tyre të afërt.

Përfaqësues të Lëvizjes VETËVENDOSJE!, që nga viti 2014 e deri sot, në vijimësi, jemi angazhuar dhe kemi qenë kundër ndërtimit dhe funksionalizimit të spitalit privat brenda hapesirës së QKUK-së.

Nga të dhënat mbi këtë rast ne patëm konkluduar se spitali privat i përgjithshëm ishte dhe ende është i kundërligjshëm, i panevojshëm me qenë aty, dhe si i tillë pengon punën në shërbimin publik, pra në Qendrën Klinike Universitare (QKUK). Ky rast prej fillimit dallohej qartë se përmbante elementë të korrupsionit. Ndaj për këtë ne e kemi denoncuar pa reshtur.

Në mesin e skandaleve lidhur me këtë rast Ministri Ismaili në konferencën e para dy ditëve, u mundua që ta shfajësojë PDK-në dhe ta zhvendosë fajin diku tjetër, duke fshehur vendimin kryesor të marrë nga ish-Kryeministri Hashim Thaçi në mbledhjen e 70-të qeverisë, me numër 08/70, më 25 qershor 2009, vendim që i hapi rrugën ndërtimit, ndryshimeve ligjore dhe funksionalizmit të spitalit privat brenda hapësirës së QKUK-së.

Pak kohë pas konferencës për media të Ministrit të Shëndetësisë, përmes një portali të afërm me pushtetin, krahas fjalës së ministrit u publikuan vendimet dhe mes tyre një vendim i falsifikuar që përmban numrin e njëjtë të protokollit, të njëjtën datë të lëshimit, që thirret në të njëjten mbledhje të Qeverisë por që ka përmbajtje krejt të kundërt – pra jo të lejimit por të “respektimit të vendimeve të mëparshme të qeverisë” që ndalonin ndërtimin e spitalit privat brenda hapësirës së QKUK-së.

Në këto kushte ish-Kryeministri Hashim Thaçi duhet të dëshmojë se cili nga këto vendime për spitalin privat është i saktë dhe cili është i falsifikuar. Ndërsa Kryeministri i Republikës së Kosovës Ramush Haradinaj, meqenëse e ka edhe obligim ligjor, duhet të bëjë publik transkriptin dhe vendimin e mbledhjes së Qeverisë së Kosovës të mbajtur më datën 25.06.2009. Po ashtu, ta publikojë vendimin në fjalë meqë nga faqja zyrtare e Kryeministrit është eleminuar ky dokument.

Prokuroria e shtetit duhet të hapë në mënyrë urgjente hetimet rreth këtyre vendimeve të ish-Kryeministrit të Kosovës z. Hashim Thaçi dhe të mos zmbrapset nga hetimet rreth skandalit të fajdeve dhe videoincizimeve ku permenden disa zyrtarë të PDK-së duke përfshirë edhe kryetarin e Kuvendit të Republikës së Kosovës z. Kadri Veseli.

Ministri i Shëndetësisë Uran Ismajli ka përgjegjësinë e plotë që spitalin privat, qartazi produkt të krimit të organizuar, ta largojë nga mjediset e QKUK-së. Kjo duhet pasuar edhe me ngritjen e kallzimit penal për të gjithë që të janë përfshirë, dhe thellimin e hetimit edhe për të gjithë ata që kanë marrë pjesë në këtë aferë, pavarësisht nëse kanë pasur poste zyrtare apo jo. Këtu duhet përfshirë edhe kryeministri i atëhershëm z. Thaçi, si një nga protagonistët, të cilin çuditërisht ministri harroi ta përmend në arsyetimin e tij.

Ministri i Shëndetësisë, por edhe Kryetari i Komunës, kanë tani përgjegjësi ligjore të marrin vendime kundrejt kësaj padrejtësie që i është bërë publikut, QKUK-së dhe shëndetësisë në Kosovës. Çdo vazhdim më tej është në dëm të pronës publike të qytetarëve të komunës së Prishtinës, pa llogaritur këtu edhe të gjitha dëmet e tjera që janë të lidhura me këtë aferë. Mosveprimi edhe më tej i tyre në këtë rast është në fakt lëndë për prokurorinë.

Ne e dimë saktë se ky vullnet nuk ka ekzistuar, dhe arsyeja e vetme për të cilën është aktualizuar ky problem nga Ministri i Shëndetësisë, ka qëllimin për ta mbuluar disi aferën e fundit me videot e dala në publik për kryetarin e PDK-së Kadri Veselin, ku një grup personash pretendojnë se i kanë dhënë atij dhe bashkëpartiakëve të tij rryshfet.

Të gjitha këto argumentime dhe dokumentet lidhur me këtë rast u paraqitën në konferencën e Lëvizjes VETËVENDOSJE! nga drejtuesi i Komitetit për Shëndetësi prof. Jusuf Ulaj, dhe anëtari i Komitetit e Kryetari i Qendrës së Prishtinës, Dr. Arben Vitia.

Në ditën në vijim do të vazhdojmë me adresimin e kësaj çështje tepër të rëndësishme.

Sot, asambleistët e Lëvizjes në Kuvendin Komunal të Prishtinës, Leonora Shabani-Bajraktari e Mirsad Vitia deponuan në zyret e Komunës kërkesën për zëvendësim të asambleistëve Visare Gorani e Uran Ismaili, për shkak të mungesave të tyre për më shumë se tre muaj në mbledhjet e K.K. Prishtinë.

Me këtë rast, asambleisti Mirsad Vitia u deklarua:

Më 28 mars 2019, në mbledhjen e 3-të të Kuvendit Komunal të Prishtinës, grupi jonë i Lëvizjes VETEVENDOSJE! kemi ngritur shqetësimin tonë lidhur me mungesat e vazhdueshme të asambleistëve nga rradhët e PSD-së, znj.Visare Gorani dhe PDK-së, z.Uran Ismajli, njëherit edhe Ministër i Shëndetësisë. Fatkeqësisht, deri tani nuk kemi parë asnjë hap konkret nga kryesuesi i KK-Prishtinë, z. Agim Kuleta, sa i përket kësaj cështjeje.

Sot Kuvendi miratoi nismën ligjore të propozuar nga Lëvizja VETËVENDOSJE! në Kuvendin e Republikës së Kosovës për dënimin në mungesë të kriminelëve që kanë kryer krime në Kosovë gjatë regjimit të Millosheviqit.

Në vend se Ministri i Drejtësisë, të dilte në mbështetje të saj, edhe sot hasëm në kundërshtime të pajustifikuara nga ai dhe nga Qeveria. Kjo edhe e vonoi për shumë muaj miratimin e kësaj nisme të domosdoshme.

Drejtuesi i Grupit Parlamentar të Lëvizjes, Glauk Konjufca mbajti disa takime me aktivistë dhe me bashkatdhetarë të tjerë, organizuar nga Qendrat e Lëvizjes në Gjermani e Suedi.

Diskutimet u organizuan në një atmosferë të ngrohtë e mikpritëse nga bashkatdhetarët, me të cilët Glauk Konjufca diskutoi për situatën politike në vend, me theks të veçantë në çështjen e negociatave dhe rrezikun që i kanoset Republikës së Kosovës nga dyshja Thaçi-Vuçiq dhe shkatërrimin e institucioneve e ndërmarrjeve publike nga qeverisja e PANhajnisë.

Edhe Raporti për Kosovën po vlerëson dhe po vërteton se PANQeveria ka sjellë rritje të praktikave korruptive, dhe karakterizohet nga paaftësia e skajshme qeverisëse, gati në secilën fushë.

Ky dokument i rëndësishëm i publikuar nga Komisioni Evropian, edhe sivjet e përsëriti atë që secili qytetar tashmë e pohon për institucionet e Kosovës, e veçanërisht për Qeverinë dhe sistemin gjyqësor e prokurorial.

Shumë pak ose aspak përparim, vërejtje të shumta për mungesën e plotë të luftës kundër krimit të organizuar dhe korrupsionit, paaftësinë për të eleminuar punësimet abuzive, mungesën e rritjes së vendeve të punës si dhe aspak përparim në çështjet e zhvillimit ekonomik.

Po ashtu, nuk është shënuar asnjë përparim në fushën e arsimit dhe të kulturës, e as në infrastrukturë e veçanërisht në atë energjetike.

Raporti thotë se Kosova ka shënuar shumë pak progres në implementimin e reformave evropiane, e për më keq, PANQeveria ka ndërmarrë veprime dhe masa të pamenduara dhe të paplanifikuara, në kundërshtim me linjën e reformave evropiane. Këtë vit Raporti shënon se në Kosovë ka patur edhe një rast të rëndë të shkeljes së të drejtave të njeriut, që është ai i deportimit të paligjshëm të 6 shtetasve turq.

Raporti i Komisionit Evropian adreson një nga problemet e mëdha të PANQeverisë duke theksuar se: “Madhësia e qeverisë, numri i madh i ministrave dhe zëvendësministrave ka ndikuar negativisht në kredibilitetin dhe efikasitetin e qeverisë. …Ndikimi politik në rekrutimin e pozitave të larta të shërbimit civil dhe rekrutimet jo të bazuara në merita mbeten çështje shqetësuese serioze. Politikat ad-hoc të ndërmarra nga Qeveria e në shumë raste të ndikuara nga interesa të veçanta janë një pengesë për politika gjithëpërfshirëse dhe të bazuara.”

Gjyqësori mbetet ende nën ndikimin e ndërhyrjeve politike dhe administrata e drejtësisë mbetet e ngadalshme dhe joefikase. Kosovës i mungon një strategji gjithëpërfshirëse për reformat e sektorit të drejtësisë dhe një mekanizëm i duhur për koordinimin ndërinstitucional. Nuk ka koordinim të mjaftueshëm të donatorëve nga autoritetet e Kosovës. Kjo çon në mungesë efikasiteti, në mosmarrëveshje dhe dublikim të përpjekjeve.

Sa i përket luftimit të korrupsionit dhe krimit të organizuar Komisioni Evropian ka vlerësuar se ka shumë pak progres në konfiskimin përfundimtar të pasurive dhe janë bërë shumë pak hetime financiare dhe dënime përfundimtare. Nga 51 raste të korrupsionit me profil të lartë vetëm 38 kanë aktakuzë e vetëm 9 raste kanë vendim përfundimtar, ku vetëm 5 raste janë finalizuar me vendim ku zyrtarët e përfshirë kanë rezultuar pjesërisht fajtor. Këto të dhëna afirmojnë shqetësimin e gjithmbarshëm se këto procese gjyqësore po përfundojnë duke i pastruar nga përgjegjësia zyrtarët e lartë të përfshirë në korrupsion. Kjo bëhet edhe më shqetësuese kur merret parasysh gjetja e raportit se konfiskimet e pasurisë së paligjshme përfundimtare kanë rënë ndjeshëm.

Nuk mund të presim edhe raportin e vitit 2020 të cilit ia dimë përmbajtjen paraprakisht falë vendimeve e veprimeve të PANQeverisë. Na duhet të ecim para me kordinimin në Kuvend e shoqëri për ta larguar koalicionin e PANHajnisë duke ia prerë degët që i ka shtrirë prej ndërmarrjeve publike e prokurorisë e deri tek shërbimin diplomatik e sistemi i drejtësisë.

Kundër krimit të organizuar dhe kontrabandës, Policia e Kosovës sot ka ndërmarrë një aksion të gjerë, përfshirë këtu pjesën veriore të vendit tonë.

Kjo dëshmon se policia jonë ka mundësi, aftësi dhe kapacitete për të luftuar krimin, por përgjithësisht mungojnë urdhërat zyrtarë nga prokuroria dhe vullneti politik nga krerët institucionalë.

Komunat në veri të Ibrit janë në Republikën e Kosovës sikurse të gjitha komunat e tjera. Sa më pak që zyrtarët e Serbisë flasin për çështjet e Kosovës aq më shumë paqe dhe siguri për të gjithë do të kemi.

Ditën e djeshme është njoftuar se bordi i Trepçës ka zgjedhur Kryeshefin ekzekutiv Basri Ibrahimin dhe Sekretarin korporativ Afrim Haxhiun. Secili prej këtyre i njohur për lidhje me koniukturën e pushtetit që ka kapur shtetin, pra me krerët e PDK-së e ShIK-ut.

Basri Ibrahimi është aktualisht Kryeinspektor i Inspektoriatit të punës, i njohur për lidhjet e tij me Elmi Reçicën, por pa asnjë përvojë as në industri as në drejtimin e ndonjë ndërmarrjeje të madhe dhe me plot dështime në institucionin që drejton. Ibrahimi u zgjodh aty për ta zbatuar planin që e kanë tash sa kohë për ta zaptuar plotësisht Trepçën dhe për ta dërguar drejt falimentimit si përligje e kërkesave për privatizim të pjesëve të saj. Afrim Haxhiu, i afërmi i deputetit Bekim Haxhiu, sekretar në Këshillin e Sigurisë së Kosovës, ish punonjës në AKI, po ashtu pa asnjë përvojë në drejtimin e ndonjë ndërrmarje të tillë u zgjodh për të njëjtat arsye. E gjitha kjo në kohën kur gjendja financiare në Trepçë është tejet e rëndë.

Asamblistja e Lëvizjes VETËVENDOSJE! në Skenderaj, Vjollca Ramadani në mbledhjen e Komitetit për Mbrojtje dhe Shpëtim i ka drejtuar disa pyetje përfaqësuesit të policisë në lidhje me aksidentin e një veture zyrtare, mirëpo zyrtari i policisë nuk është lejuar të shpejgohet nga nënkryetari i Skenderajt dhe zyrtar i PDK-së, Nuredin Lushtaku.

Të njëjtat pyetje asamblistja jonë i ka parashtruar në mbledhjen e Kuvendit Komunal ndaj kryetarit të Komunës për të marrë përgjigje. Përveç përgjigjeve të kryetarit, sot asamblistja e Lëvizjes u përballë edhe me kërcënimet dhe fyerjet e nënkryetarit të Komunës që vjen nga PDK, Nuredin Lushtaku të cilat i keni parë përmes videoinçizimeve. Të njëjtat kërcënime Lushtaku i ka përdorur edhe në mbledhje të komitetit duke u munduar të mbyll zërin e opozitës dhe duke tentuar të mohoj çdo mendim kritik përbrenda komunës në stilin e një gangsteri.

Sot, kryetari i Lëvizjes, Albin Kurti bashkë me nënkryetarin Besnik Bislimi, sekretaren organizative Vlora Haxhimehmedi, deputeten Albulena Haxhiu, anëtarët e kryesisë Arben Vitia e Ajet Potera dhe drejtoreshën e drejtorisë për Mirëqenie Sociale në Mitrovicë Nazane Kërveshi shtroi një iftar për kreun e Bashkësisë Islame të Kosovës, myftiun Naim Tërnava dhe bashkëpunëtorët e tij ndër ta sekretari i BIK-ut Ahmet Sadriu e zyrtarë të tjerë të kësaj bashkësie.

Në atmosferën miqësore të iftarit u diskutua për bekimin e madh që është bashkëpunimi mes traditave, kulturave e feve të ndryshme tek shqiptarët. Mesazhi i ramazanit, ai i vetëpërmbajtjes, i të qëndruarit bashkë me komunitetin, në solidaritet e në punë, në gëzime e sfida. Kryetari Kurti e myftiu Tërnava, uruan një Ramazan e agjërim të mbarë në këto ditë mbetura.

Në videon që doli në media, në emër të Kadri Veselit kërkohet para e paligjshme, si haraç a si fajde, nga anëtarë organizatash kriminale. E reagimi i kryetarit të Kuvendit ishte, për të thënë të paktën, frikacak: ai tha se po të vërtetohet se është pjesë e këtij rasti kriminal do të japë dorëheqje.

Gjithë Kosova e gjithë bota e di se po të vërtetohet që Veseli është pjesë e rastit kriminal, nuk shkon në dorëheqje por drejt e në burg. Dorëheqja është akt moral, që bëhet për t’i hapur rrugë hetimeve. Pra, kur emrin ta përmendin si kërcënim për fajde, duhet të jetë dorëheqja para hetimeve, e jo hetimet para dorëheqjes.

Të dashur miq dhe mbështetës të Lëvizjes VETËVENDOSJE! që jetoni në vendet e Bashkimit Evropian dhe që keni të drejtë votimi në ato vende.

Prej datës 23 deri në 26 maj në të gjitha vendet e Bashkimit Evropian do të mbahen zgjedhjet për Parlamentin Evropian. Në këto zgjedhje, Lëvizja VETËVENDOSJE! bën thirrje të mbështeten ata dhjetëra kandidatë me origjinë shqiptare të cilët janë në listat e partive social-demokrate, të majta e progresive. Rritja e së djathtës ksenofobe e raciste, nxitja e frikës dhe e urrejtjes ndaj emigrantëve, këndvështrimi mbi kulturën e fenë si terrene të përplasjes e të luftës, janë fenomene që duhet të na shqetësojnë. Po ashtu, është shumë shqetësuese edhe indiferenca ndaj problemeve të mëdha ekonomike e strukturore që i shkaktoi neoliberalizmi.

Andaj shpresojmë që në sesionin e ardhshëm të Parlamentit Evropian të shohim sa më shumë shqiptarë që ngrenë aty çështje me rëndësi për kontinentin e për kombin tonë, duke filluar që nga trajtimi i barabartë i shqiptarëve si individë e si shtete, avancimi demokratik e dekolonizues i të drejtës sonë për Bashkim Kombëtar, lufta kundër papunësisë, ruajtja e mjedisit, e deri te ndihma e bashkëpunimi evropian, i nevojshme për një zhvillim më të shpejtë ekonomik e demokratik në vendet tona.

Mbrëmë, në kuadër të fushatës zgjedhore, Lëvizja VETËVENDOSJE! mbajti tubim në fshatin Çabër të Komunës së Zubin Potokut dhe Lagjen e Boshnjakëve të Mitrovicës së Veriut. Kandidatët për kryetarë nga këto dy komuna, Liridona Kahrimani dhe Erden Atiq të shoqëruar edhe nga Kryetari i Lëvizjes Albin Kurti, deputetët, Rexhep Selimi e Xhelal Sveçla e nga Kryetari dhe Nënkryetari i Komunës së Mitrovicës, Agim Bahtiri e Faruk Mujka, shpalosën para qytetarëve të kësaj ane prioritetet për këtë zonë.

Korrupsioni mirëmbahet nga prokuroria dhe gjyqësori për sa kohë nuk ka asnjë profil të lartë të dënuar përfundimisht.

Lëvizja VETËVENDOSJE! organizoi në ambientet e Kuvendit të Kosovës tryezë mbi korrupsionin e profilit të lartë. Në tryezën e moderuar nga deputetja e Lëvizjes Albulena Haxhiu parashtrimet hapëse i mbajtën Betim Musliu nga Instituti i Kosovës për Drejtësi, Berat Thaqi nga Instituti GAP dhe Taulant Kryeziu nga Instituti EPIK. Në diskutim morën pjesë shumë deputetë të opozitës dhe organizata joqeveritare.

Korrupsioni dhe krimi i organizuar është kthyer në problemin kryesor në Kosovë në kushtet kur nuk qeveriset me një  projekt zhvillimor. Projektet e mëdha publike përdoren jo për zhvillim, por për të zhvatur paratë e tyre. Me gjithë skandalet e shumta, akoma nuk kemi asnjë dënim përfundimtar për rastet e korrupsionit të profilit të lartë.

Akt-akuzat që ngrihen përgjithësisht bazohen në axhenda partiake apo në grupe të tjera të interesit brenda policisë dhe gjykatave. Shumica janë ngritur për shkelje administrative dhe jo për korrupsion. Dosjet e tyre kanë gjysmë-prova dhe gjysmë-të-vërteta. Aktakuzat e shumta të prokurorisë speciale që rrëzohen që në seancën fillestare tregojnë se ato ngrihen qëllimisht për të dështuar.

Rrëzimi i akt-akuzës së prokurorit Blakaj për listat e rreme të veteranëve dhe fakti se kryeprokurori i Kosovës ka ardhur në detyrë falë aferës Pronto tregojnë se puna e prokurorisë sabotohet nga brenda. Madje, kryeprokurori Lumezi ka shkuar edhe më tutje duke e centralizuar prokurorinë deri në pikën sa çdo procedim për korrupsion në nivele të larta duhet paraprakisht të miratohet prej tij.

Për të ndërhyrë në këtë situatë në tryezë dolën rekomandimet e mëposhtme:

• Për të ndryshuar gjendjen e drejtësisë është i domosdoshëm ndryshimi politik i qeverisë;
• Kërkohet vetting në gjyqësor dhe në prokurori;
• Kryeprokurori duhet të jetë politik që të mbajë përgjegjësi për mosveprim;
• Nevojitet ligji antimafia;
• Duhet themeluar një prokurori speciale për krimin e organizuar dhe korrupsionin;
• Buxheti duhet proceduar në Kuvend 3 muaj më herët që të rritet transparenca;
• Prokurorët e gjyqtarët duhen mbrojtur për çështje kur u rrezikohet jeta dhe jo të kërcënohen nga instancat shtetërore;
• Duhen rritur kapacitetet financiare dhe njerëzore për hetimin dhe gjykimin e korrupsionit në nivele të larta.

Lëvizja do ta vazhdojë përpjekjen për të ngritur një front të përbashkët kundër korrupsionit dhe krimit të organizuar me të gjithë ekspertizën e nevojshme dhe me të gjithë forcën politike për t’i dalë ballë atij.

Sot, në zyrat qendrore të Lëvizjes VETËVENDOSJE! në Prishtinë, ish Sekretari për Marrëdhënie me Jashtë, Boiken Abazi, bashkë me Sekretarin e ri për Marrëdhënie me Jashtë, Kreshnik Ahmeti, pritën në takim drejtorin për Ballkanin Perëndimor të Fondacionit Westminster për Demokraci (WFD), Emil Atanasovski, menaxherin e projekteve për Ballkanin Perëndimor të WFD, Rob van Leeuwen dhe përfaqësuesin e WFD në Kosovë, Fitim Mulollin.

Në këtë takim u diskutua për problemet kryesore me të cilat po përballet aktualisht Kosova. Përfaqësuesit e Lëvizjes prezantuan analizën e tyre mbi degradimin e insitucioneve shtetërore në Kosovë dhe nivelin e lartë të korrupsionit. Më tej ata shpjeguan edhe qëndrimet e Lëvizjes në lidhje me dialogun asimetrik dhe jodemokratik të udhëhequr nga Hashim Thaçi dhe Aleksandër Vuçiq, si dhe për alternativën e Lëvizjes VETËVENDOSJE! në raport me këtë dialog. Aty u diskutua edhe për gjendjen e rëndë ekonomike në vend, veçanërisht tek moshat e reja. Gjithashtu, përfaqësuesit e WFD u njoftuan edhe me aktivitetet e fundit të Lëvizjes VETËVENDOSJE!, në kundërshtim të korrupsionit të qeverisë aktuale, nëpërmjet fushatës Kundër “PANhajnisë”.

Përfaqësuesit e WFD prezantuan projektet e tyre, të cilat janë duke i realizuar në shtetet e Ballkanit Perëndimor. Palët e vlerësuan bashkëpunimin e deritanishëm mes WFD dhe Lëvizjes VETËVENDOSJE! dhe u pajtuan për vazhdimin dhe zgjerimin e bashkëpunimit në të ardhmen.

Mbrëmë, në Selinë e Lëvizjes VETËVENDOSJE!, Kryetari Albin Kurti dhe Nënkryetari Besnik Bislimi bashkë me deputetet, Fitore Pacolli dhe Saranda Bogujevci, pritën në takim delegacionin e Lutjeve të Mëngjesit nga Shtetet e Bashkuara të Amerikës. Në këtë delegacion të shoqëruar nga z. Ahmet Shala dhe z. Visar Azemi ishte kongresmeni z. Randy Hultgren së bashku me z. Michael Stoltzfus, z. Todd Hendricks, z. Kent Ford. Gjithashtu të panishëm ishin edhe përfaqësuesit e orgaizatës “Kosovo Hope”, z. John Walden dhe z. Berat Gegaj.

Sot, Kryetari i Lëvizjes VETËVENDOSJE!, Albin Kurti, së bashku me deputetin Valon Ramadani, pritën udhëheqësit e Sindikatës së RTK-së, z.Fadil Hoxha, kryetar, znj.Albana Murseli, nënkryetare dhe z.Visar Duli e z.Veton Rugova, anëtarë.

U bisedua lidhur me gjendjen e rëndë në RTK, programin televiziv dhe situatën e punëtorëve aty, si dhe problemet që veç po shtohen çdo ditë.

Bashkarisht u konstatua nevoja që të mbahet një seancë e veçantë në Kuvendin e Kosovës për RTK-në, për ta rritur cilësinë e këtij institucioni të rëndësishëm dhe transmetuesi publik. Në këtë seancë do të propozohej edhe një komision hetimor parlamentar, me theks të veçantë mbi paligjshmërinë pas shpalljes arbitrare të drejtorit pa vota të plota të bordit drejtues.

Sot, vizituam vendin ku paradite për shkak të rrëshqitjeve të dheut është rrezikuar jeta e një numri të qytetarëve të kësaj pjese, dhe nxënësve të cilët vijojnë mësimin në shkollën Naim Frashëri. Rrëshqitja e dheut ka ardhur si pasojë e punimeve që po zhvillohen në këtë objekt. Komuna e Prishtinës u mundua që fajin ta hedhë te shpërthimi I një gypi të ujësjellësit. Kjo u demantua nga KRU-Prishtina të cilët pas analizës së marrë nga tereni konstatuan se, po citoj, “ekzekutimi I punëve në gropën ndërtimore të objektit poshtë rrugicës, është bërë në mënyrë joprofesionale, jashtë standardeve për ndërtim dhe mbrojtje të gropës ndërtimore”.

Në kohën kur Telekomit të Kosovës i kërcënohen se edhe një javë kohë i ka mbetur për t’ia paguar borxhin që buron nga një kontratë e kriminalizuar Zmobile, Lëvizja VETËVENDOSJE!, përmes drejtuesit të Grupit Parlamentar të saj, z. Glauk Konjufcës njoftoi për dy nisma emergjente për ta ndalur krimin që ka gjunjëzuar gjyqësorin, prokurorinë dhe Qeverinë.

E para ka të bëjë me thirrjen e një seance të jashtëzakonshme në kuvend, dhe e dyta ka të bëjë me një nismë ligjore, së cilës nëse ia ngushtojmë kuptimin siç tha Konjufca në konferencë për media, i bie që t’i ndalohet veprimtaria kompanisë Z-Mobile.

Deri te keto nisma, sipas Konjufcës ka ardhur për shkak se kompania private “Devolli” e ka kapur qeverinë, dhe bashkë me të po qëndron mbi kuvendin e Kosovës dhe mbi institucionet e drejtësisë në vend.

Kontrata me Zmobile është produkt i krimit të organizuar dhe implikimet prej saj për Telekomin nuk duhet të njihen si obligime për Tekomin. Të gjitha pjesëtarët dhe mbështetësit e kësaj kontrate nga të gjitha qeveritë duhet të nxirren para drejtësisë.

Prej 12 korrikut të vitit 2018, në Kuvendin e Kosovës është në fuqi një rezolutë e cila është votuar nga shumica e deputetëve të kuvendit të Kosovës. Ajo rezolutë në pikën e 7-të të saj thotë: “Qeveria e Kosovës si aksionari kryesor duhet të tërhiqet nga marrëveshja abuzive e ish-drejtorit të Telekomit me kompaninë Z-Mobile.” Kjo rezolutë sipas Konjufcës është shpërfillur që disa muaj nga qeveria e Kosovës dhe nuk po zbatohet.

Arsyeja se përse kjo rezolutë nuk po zbatohet sipas tij ka të bëjë me faktin se qeveria është plotësisht e gatshme që përmes ministrit Valdrin Lluka t’ia vazhdojë kompanisë “Z-Mobile” kontratën me Telekomin e Kosovës.

“Kjo nuk po zbatohet ngase këta janë të gatshëm që edhe për 10 vite të tjera ta zgjasin kontratën me atë kompani. Dhe kërcënimi i kompanisë “Devolli” po bëhet pikërisht me këtë qëllim, pra si shantazh ndaj qeverisë së Kosovës për vazhdimin e kontratës edhe për 10 vite të tjera. Mos të harrojmë se rezoluta që është momentalisht në fuqi, pika e saj 12 thotë kështu: Kuvendi i Republikës së Kosovës fton Prokurorinë e Kosovës që të vendosë në prioritet hetimin e kontratës me Dardafon (më tej Z-mobile).” tha Konjufca, duke përmendur edhe çështjen e arbritrazhit dhe gjykatës ndërkombëtare.

Siç dihet kompania në fjalë është ankuar në arbitrazh dhe e ka fituar rastin. Por edhe kjo e ka anën e vet kriminale, ngase ne si Lëvizje VETËVENDOSJE! besojmë se krejt kjo çfarë ka i ndodhur Kosovës ka të bëjë me krim të organizuar mes kompanisë “Devolli” dhe Bordit të Telekomit të Kosovës.

“Bordi është udhëhequr nga Rexhë Gjonbalaj – njërit prej drejtuesve kryesor të PDK-së në qytetin e Pejës. Dhe mënyra se si është bërë mbrojtja lë për të dëshiruar ngase është bërë përmes një institucioni krejt fantom i cili i ka marrë Kosovës gati gjysëm million euro për kinse mbrotjejn e telekomit. Në rastin e AXOS-it, kur kishim një angazhim më serioz asokohe, e fituam rastin, kurse në këtë rast duket se qëllimi ka qenë që rasti të humbet, dhe 32 milionë euro të merren nga taksapaguesit”

Ne e dimë që Telekomi nuk ka mundësi për këto para, dhe që kjo do të thotë bankrotim. Kjo është bashkëpjesëmarrje në krim për bankrotimin e Kosovës. Kjo nënkupton që punëtorëve të telekomit u rrezikohet puna.

Konjufca tutje tha se këta i kanë kapur edhe instucionet e drejtësisë, ngase në Gjykatën Themelore të Prishtinës ka mundur të ndodhë një apelim ndaj masës së arbitrazhit që së paku kjo gjobë të mos shkonte drejtpërdrejt me përmbarim, por kjo nuk është bërë.

Për fund, duke folur në emër të Lëvizjes, Konjufca tha se mbështesim peticionin e punëtorëve dhe kërkesën e tyre për ndërprerjen e kontratës me “Z-Mobile” dhe se do të angazhohemi si Lëvizje përmes dy iniciativave në Kuvend, një seance të jashtëzakonshme dhe një ligji që ndalon operimin e operatorëve virtualë si “Z-mobile”, ta ndalim këtë krim të organizuar mes qeverisë dhe kompanisë që është ulur këmbëkryq në të dhe po tenton zhvatjen e taksapaguesve.