Lëvizja VETËVENDOSJE! uron subjektet politike shqiptare të bashkuara rreth koalicionit të përbashkët dhe të gjithë shqiptarët kudo që janë, për fitoren e rëndësishme të ditës së djeshme në Tuz. Në shpresojmë që vetëqeverisja në komunën e Tuzit do të përmirësojë jetën dhe mirëqenien e të gjithë qytetarëve të Tuzit, duke bërë që shqiptarët të rrisin mundësitë për veten dhe familjet e tyre në trevat e tyre historike, pa pasur nevojë për të kërkuar një jetë më të mirë larg vendlindjes.

Situata e grave në vendin tonë, dallon prej situatës së gjithsecilit grup shoqëror dhe kjo për disa arsye. Së pari, ato nuk janë një shumë numerike lehtësisht e izolueshme, por përbëjnë gjysmën e popullsisë. Së dyti, roli i tyre në shoqërinë tonë është themelor dhe i pazëvendësueshëm. Dhe së treti, me gjithë rëndësinë që kanë për shoqërinë dhe jetën në këtë vend ato janë më të margjinalizuarat në rolet e tyre ekonomike e politike. Sot kemi gra amvise që punojnë e mbajnë një familje prej më shumë se pesë anëtaresh, e që për këtë punën të shumëfishtë, nga shteti fillojnë të kompensohet tek në moshën 65 vjeçare me një shumë simbolike, kjo është e papranueshme. Situata e grave është e dallueshme nga ajo e secilit grupi tjetër shoqëror edhe për një arsye që tek së fundi ka filluar të marrë më shumë vëmendje e që lidhet me dhunën që ushtrohet ndaj tyre. 1496 raste të viktimave të dhunës i kemi vetëm brenda një viti, e këtu sa e sa thirrje të tjera e raste të raportuara – thirrje të humbura që e lënë mbrapa atë shifër. Nga shteti dhe institucionet vendore përveç se nuk kemi ndonjë masë, kemi edhe përpjekje aktive për mbylljen e strehimoreve për gra, nën arsyetimin e disa faturave të energjisë apo ndonjë shërbimi tjetër. Pra, një faturë të pambarimtë për to. Kjo është e palejueshme. Në këtë situatë ku secili ka një peshë të veten, aktivistët dhe aktivistet e Lëvizjes VETËVENDOSJE! vendosën ta përcjellin një kumtim të vjetër, të shkruar nga njëra prej aktivisteve që e shtruan përvojën e parë të barazisë mes një transformimi shoqëror dhe politik – Roza Luksemburgu – që edhe tha “kush nuk lëvizë nuk i ndjenë prangat.” Po nuk lëvizëm bashkarisht, si burra ashtu edhe gra, drejt një situate ku ka më shumë barazi e drejtësi shoqërore, atëherë do ngecim për kohë të gjatë në këtë qetësi të prangave që nuk bëjnë zë – as për faturat që na ngarkohen, e as për borxhet që kemi.

Një delegacion i Lëvizjes VETËVENDOSJE! mori sot pjesë si i ftuar në Samitin e Diasporës të organizuar në Tiranë. Deputetët Liburn Aliu dhe Fitore Pacolli, si dhe anëtarët e Kryesisë Hydajet Hyseni dhe Boiken Abazi, ndoqën sot panele të ndryshme diskutimi në lidhje me të drejtat e bashkatdhetarëve tanë dhe përfshirjen e tyre në vendimmarrjen dhe jetën politike, ekonomike, institucionale e kulturore të atdheut.

Deputeti Liburn Aliu foli në këtë Samit edhe si panelist në diskutimin për të drejtën e votës. Ai theksoi se mbështetja e madhe ekonomike që aktualisht jep mërgata shqiptare është krejtësisht në shpërputhje me të drejtën e mohuar të votës. Në Kosovë, edhe pse ligji ekziston, vetë ligji dhe procedurat e zbatimit të tij krijojnë barriera të shumta që pengojnë përfshirjen e bashkatdhetarëve në zgjedhje. Është e qartë se shembujt e praktikave të mira nuk mungojnë, dhe këto barriera janë pasojë e vullnetit të munguar politik. Deputeti Aliu shpjegoi se edhe nëse realizohet e papenguar e drejta e votës, kjo do të ishte prap e pamjaftueshme. Mërgata do duhej të kishte ulëse të rezervuara në Kuvend, si dhe të gjitha çështjet që prekin mërgatën do duheshin trajtuar përmes strukturave të posaçme të aparatit shtetëror.

Lëvizja VETËVENDOSJE! organizoi konferencë për mediat për të shënuar fillimin e muajit mars si muajin e angazhimeve, përkushtimeve dhe anëtarësive masive të grave në Lëvizje dhe përmes Lëvizjes në shoqërinë tonë. Në konferencë, përkrah Drejtueseve të Sekretariatit të Gruas nga Qendrat e Lëvizjes në Kosovë, foli Drejtuesja e përgjithshme e sekretariatit të Gruas, Nazlie Bala dhe Drejtuesja e Sekretariati të Gruas në Gjilan Arijeta Rexhepi.

Cikël diskutimesh profesionale mbi 10 vitet e decentralizimit në arsimin parauniversitar

Vazhdon angazhimi për trajtimin sistematik të problemeve të arsimit parauniversitar.

Lëvizja VETËVENDOSJE! organizoi tryezën e katërt për arsimin parauniversitar me fokus mësimdhënien, tekstet, mjetet dhe infrastrukturën shkollore. Parashtrimin kryesor të çështjeve të kësaj tryeze e bëri Osman Buleshkaj.

Mësimdhënia në shkollat tona po zhvillohet më shumë spontanisht sesa me strategji dhe synime të qarta. Shumë struktura brenda shkollës si pedagogët dhe psikologët janë lënë në hije dhe struktura të tjera si koordinatorët e ndryshëm duken të jenë të tepërta. Drejtimi i shkollave ka mbetur më së shumti në vullnetin e drejtorëve, mbështetja e të cilëve për mësimdhënësit lë për të dëshiruar. Përgatitja dhe zhvillimi i mësimdhënësve do të duhej të ishin ngushtësisht të lidhur me vlerësimin e mësimdhënies dhe jo të mësimdhënësve. Mirëpo, inspektimi dhe vlerësimi i mësimdhënies është tepër i dobët dhe i paorganizuar mirë.

Sa i përket teksteve, edhe pse kemi një kurrikulë të re për mësim të integruar, ajo nuk është e përcjellur me tekste të reja drejtpërsëdrejti të lidhura me zbatimin e saj. Tekstet aktuale janë përgatitur në bazë të ligjit të vjetër për tekstet, i cili e pengon përgatitjen e teksteve të reja në disa aspekte, por edhe hapësirat e tij ligjore kanë mbetur të pashfrytëzuara. Ndërsa materialeve mësimore nuk trajtohen me të njëjtën procedurë si tekstet, nuk kontrollohen nga MASHT-i dhe Inspektoriati, nuk trajtohen si ndërlidhura me tekstet dhe zëri i mësimdhënësve nuk dëgjohet në përzgjedhjen e tyre. Po ashtu, nuk kemi platforma digjitale dhe tekste të digjitalizuara për shkollat tona.

Infrastruktura shkollore është një tjetër problematikë, e lidhur edhe me lëvizjet e brendshme të popullsisë, të cilat duhen patur parasysh për ndërtimin e objekteve të reja ose për riorganizimin e hapësirave ekzistuese.

Në përfundim të tryezës u nxorrën edhe rekomandimet e mëposhtme:

· Nevojitet një qasje sistemore në trajtimin e problematikave;

· Ligji i ri duhet të saktësojë procedurën e saktë të përgatitjes së një teksti shkollor, të parashohë pilotimin e tekstit dhe përfshirjen e atyre që e përdorin në përzgjedhjen e tij;

· Duhet monitoruar procesi i reformave në zbatim;

· Duhen standardet shtetërore për arsimin;

· Fakulteti i edukimit duhet të jetë i lidhur integralisht me arsimin parauniversitar;

· Ka nevojë të integrohet përmbajtje e kurrikulës së re në përgatitjen e mësuesve;

· Nevojitet monitorim, vlerësim dhe mbështetje shtetërore e procesit arsimor në të gjitha nivelet.

Në përfundim të këtij cikli që pati qëllimin e shqyrtimit profesional të gjendjes një dekadë pas decentralizimit të kompentencave në arsimin parauniversitar dolën një seri konkluzionesh të cilat janë të adresuara apo të anashkaluara nga niveli i lartë institucional.

Angazhimi vijon në seancën plenare ku do të mbahet Debati për Arsimin parauniversitar. Deputetët e Grupit Parlamentar të Lëvizjes VETËVENDOSJE! po përgatisin për secilën nga temat e trajtuara qëndrimet për këtë seancë.

21 vite më parë, në Likoshan dhe Çirez të Drenicës, te vendi i quajtur “Të tre lisat” filloi edhe haptas lufta në mes Ushtrisë Çlirimtare të Kosovës dhe forcave kriminale shtetërore serbe. Për nder të këtij përvejetori, deputetë dhe aktivistë të Lëvizjes, ndër ta deputeti Rexhep Selimi, kryetari i Qendrës së Drenasit Shemsi Elezi, asambleistët. Florentina Elezi e Sokol Bylykbashi, delegati Enver Dugolli etj, kryen sot homazhe tek varrezat e këtyre dëshmorëve e heronjve. Beteja e Likoshanit dhe Çirezit shënon një betejë të rëndëishme të luftës çlirimtare. Humbjet e forcave kriminale serbe ishin aq të mëdha, sa ata u tërhoqën për t’i rrethuar më pas ato fshatra me artilerinë më të rëndë që kishin, me tankse e helikopter. 24 civilë të pafajshëm u vranë nga forcat serbe, prej të cilëve 11 anëtarë vetëm nga famlja Ahmeti. Ky fillim i luftës, me krime monstruoze ndaj civilëve të pafajshëm, sa e tregoi armikun aq edhe i jehoi domosdoshmërisë së luftës çlirimtare ndaj tij. Sa e qepi uniformën e çlirimit në përplotë trupa të djemve e vajzave aq edhe më shumë e vuri në qarkullim atë drejt lirisë. Lavdi e përjetshme për dëshmorët e heronjtë e këtij vendi.

Në Selinë e Lëvizjes VETËVENDOSJE! në Prishtinë u prit një delegacion me përfaqësues të politikës, biznesit, medias dhe shoqërisë civile nga mërgata shqiptare në ShBA, i udhëhequr nga z. Mark Gjonaj, i cili ka qenë përfaqësues i Asamblesë së Shtetit të New York-ut dhe është aktualisht Këshilltar i Komunës së Qytetit të New York-ut. Delegacioni nga mërgata u prit nga Kryetari i Grupit Parlamentar të Lëvizjes, Glauk Konjufca, bashkë me deputetët Liburn Aliu dhe Fitore Pacolli, si dhe Sekretaren Organizative, Vlora Haxhimemedi, dhe Sekretarin për Marrëdhënie me Jashtë, Boiken Abazi.

Në ambientet e Kuvendit, Komiteti për Arsim dhe Shkencë mbajti sot tryezën e tretë të ciklit të tryezave profesisionale.

Temat kryesore lidheshin me arsimin professional dhe orientimin në karrierë, problematikat dhe propozimet për avancimi e këtij sektori arsimor.

Urime Ditëlindja Astrit! Sot të erdhëm me një ritëm të ngadaltë. Padrejtësia po na rëndon, po forcën tënde ende e ndjejmë si dorë në shpinën tonë, kur ecim e shohim rrugicës, lagjes, qytetit – të varfrin, të shtypurin e qytetarin në nevojë.

Me rastin e 83 vjetorit të lindjes së Adem Demaçit, në kujtim e në nderim të atdhetarit e veprimtarit shembull të çështjes kombëtare, të burgosurit politikë, shkrimtarit e humanistit, simbolit të rezistencës, sot deputetë e aktivistë të Lëvizjes VETËVENDOSJE! bënë homazhe pranë varrit të tij. Adem Demaçi lartësoi si askush tjetër virtytet e tiparet e veprimtarit të përhershëm, të pathyer e të palëkundur në të drejtën e popullit të tij, që nuk reshti deri në frymën e fundit së angazhuari për kombin e vendin. Atdhedashuria e Adem Demaçit do të mbetet gjithnjë në zemrat dhe shpirtin tonë, kurse vendosmëria e paepur ndaj kombit dhe atdheut është qartësim i rrugës që duhet ndjekur sot e gjithnjë!

Lëvizja VETËVENDOSJE! mbajti konferencë për media në lidhje me moszbatimin e plotë të  tarifës prej 100% për produktet nga Serbia dhe Bosnja tash kur janë bërë tre muaj nga vendosja e kësaj mase.

Deputeti i Lëvizjes, Salih Zyba foli për lëshimet në zbatimin e këtij vendimi duke bërë që mallrat nga Serbia të jenë shumë prezente në treg dhe për të cilën gjë Qeveria nuk ka shpjegim ndërsa Ministria e Financave nuk është në nivel të përgjegjësisë.

“Presidenti Thaçi, nga partia e të cilit vjen Minisitri i Financave aktual që do të duhej me mekanizmat e tij institucional të luftojë kontrabandën, në mënyrë cinike na thotë se është rritur kontrabanda në veri. Pra, kemi një deklaratë që është denoncim shtetëror apo pranim i kolapsimit shtetëror. Presidenti i një vendi thotë se kontrabanda me Serbinë është rritur. Kjo i bjen që ai pranon se ka pasur gjithmonë dhe kohët e fundit veçse është rritur”, tha Salih Zyba.

Ai po ashtu deklaroi se Presidentit kontrabanda po i pengon pikërisht në kohën kur ai dhe partia nga ai vjen po kërkojnë pezullimin e tarifës 100% ndaj Serbisë. Sepse s’e kemi dëgjuar asnjëherë më parë këtë konkluzion denoncues nga ai. As kur ka qenë kryeministër.

Sipas linjës së përgjegjësive në këtë mes janë përgjegjës Ministria e Financave dhe institucionet në varësi si Doganat dhe Antikontrabanda. Përgjegjëse po ashtu është Ministria e Punëve të Brendshme me Policinë e Kosovës, Departamenti i Krimit Ekonomik dhe Antikontrabanda. Ndërkaq sa i takon tregut të brendshëm në Kosovë brengosës është edhe mosreagimi i Ministrit të Tregtisë. Ka manovra të shumta me flamujt e vendosur që nuk përkojnë me vendet e origjinës siç e kërkon udhëzimi administrativ. Por për këto shkelje ka pak gjoba e konfiskime malli. Nuk ka fushatë për të vetëdijësuar qytetarët për rëndësinë e kujdesit dhe mos konsumit të këtyre produkteve.

Nëse çdo ditë bëhet thirrje për heqjen apo pezullimin e taksës prej Presidentit te kryetari i Kuvendit e te ekipi negociator si mund të presim që zyrtarët që përballen me kontrabandën “me letra” dhe atë totalisht ilegale do t’i qëndrojnë presionit nga grupet financiare e jo rrallë herë dhe kriminale?

Lëvizja VETËVENDOSJE! megjithëse e cilëson si të pamjaftueshme këtë tarifë kërkon zbatimin e plotë të këtij vendimi, ndërkaq në lidhje me kontrabandën dhe keqpërdorimet me produktet të cilat kanë taksën prej 100% ditëve në vijim do të dorëzoj kërkesën për interpelancë në Kuvendin e Republikës së Kosovës.

Lëvizja VETËVENDOSJE! mbajti konferencën për median në Pejë mbi ndërtimin e HEC-eve në Lumbardh. Në konferencë folën nënkryetarja Fatmire Mullhaxha Kollçaku dhe anëtari i Kryesisë në Pejë Taulant Kelmendi.
Komisioni ndërministror për investime strategjike ka riaktualizuar projektin për ndërtimin e HEC-eve në Lumbardh. Një projekt i cili nuk i plotëson kushtet mjedisore dhe është shkatërrues për ambientin tashmë cilësohet si investim strategjik. Ky vendim është marrë në kundërshtim me planin zhvillimor komunal, i cili i ndalon ndërtimet e HEC-eve në zonë, pikërisht nga degradimi që ka ndodhur në komunën e Deçanit nga i njëjti investitor. Më parë, edhe Ministria e Ambientit e ka dekurajuar ndërtimin në këtë zonë.

Vala e Telekomit ka humbur nga kontrata me Z-Mobile 9-11 milionë euro në vit.

Lëvizja VETËVENDOSJE! organizoi konferencë në lidhje me përfundimin e kontratës së Telekomit të Kosovës me Z-Mobile. Në konferencë folën deputeti i Lëvizjes, Liburn Aliu dhe drejtuesi i Komitetit për Komunikime Elektronike dhe Postare, Fatban Bunjaku.

Më 17 janar 2019 është ngritur komision nga Bordi i Telekomit me përshkrimin e punës ‘Negociim i kontratës me Zmobile’. Komisioni duket sikur është formuar për zgjatjen e kësaj kontrate korruptive sesa për ndërprerjen apo rinegociimin e saj në favor të Telekomit.

Fatban Bunjaku u shpreh se, “ky është momenti që pa hezitim Telekomi së paku të shpëtojë të ardhmen e tij nga dëmi i kësaj kontratë, pa harrur që për këtë kontratë duhet të ndodhë një proces gjyqësor i cili duhet të kishte dhe pasoja financiare për Z-mobile. Dëmi i është shkaktuar Valës për përfitim vetanak dhe jo vetëm, edhe për gjunjëzim të Valës me plan për ta blerë vetë në një privatizim të orkestruar. Edhe lëvizja e stafit në pozita të larta në Telekom drejt Z-Mobile, duke i komprementuar interesat e operatorit publik, flet në këtë llogari.”

Cilësia e shërbimit është degraduar së tepërmi dhe resurset e Valës janë mbishfrytëzuar nga Z-Mobile. Vala e Telekomit ka humbur nga kontrata me Z-Mobile 9-11 milionë euro në vit si pasojë e të hyrave të munguara, zhvatjes së abonentëve, shitjen e shërbimeve nën kosto dhe praktikat e tjera “dumping” nga Z-Mobile, ndarja që përllogaritet vetëm nga raportimi i Z-Mobile e jo nga barazimi i të dhënave të dyanshme, si dhe 30 milionë gjobë nga arbitrazhi.

Deputeti Liburn Aliu tregoi përbërjen e komisionit, me anëtarë Trim Musliun, ish drejtor i marketingut, ish ud ekzekutiv, aktualisht nuk dihet qartë pozicioni i tij nw Telekom, Drejtori Financiar Armend Osajn, Drejtori i Zyrës Ligjore Sebaudin Ramaxhiku, zyrtari Arben Shabani, pozicioni i të cilit nuk dihet përpos që është afër menaxhmentit, dhe u.d. Drejtor Teknik Faton Isufi.

Nuk jemi të sigurtë që ky komision ka marrë udhëzimet e duhura nga menaxhmenti për ta mbrojtur interesimin e Telekomit. Kjo kontratë duhet të ishte ndërprerë prej kohësh. Përmbajtja dhe pasojat e kësaj kontrate duhet të ishin tashmë të hetuara e të gjykuara nga organet e drejtësisë.

“I bëjmë thirrje Kryeministrit Haradinaj dhe Ministrit të Zhvillimit Ekonomik, si përfaqësues të aksionarit të vetëm të Telekomit të Kosovës, pra Qeverisë, të japin udhëzimet për bordin e Telekomit, rrjedhimisht për komisionin e ngritur për këtë temë, që ta konkretizojnë ndërprerjën përfundimtare të kësaj kontrate. Pra, mos të lenë hapur asnjë shteg për vijimin e saj”, u shpreh deputeti Aliu.

Kontratës me Z-mobile i ka skaduar afati. Nëse Kryeministri lejon vazhdimin e kësaj kontrate në heshtje, atëherë edhe ai i nënshtrohet dhe bëhet partner në kontratën më korruptive dhe të dëmshme të këtij sektori të rëndësishëm.

Lëvizja VETËVENDOSJE! mbajti konferencë për bllokimin një vjeçar të Komisionit Qendror të Zgjedhjeve nga ana e Hashim Thaçit. Në konferencë folën deputetja e Lëvizjes Albulena Haxhiu dhe anëtari i deritanishëm në KQZ nga Lëvizja Adnan Rustemi.

KQZ-ja është organ i rëndësishëm kushtetues për të garantuar integritetin e zgjedhjeve, por një pakicë qeveritare e politike po përpiqet artificialisht të bëhet shumicë në KQZ. Vetë Presidenti ende nuk po mund të pajtohet me faktin se Lëvizja VETËVENDOSJE!, mori mbështetjen më të madhe në zgjedhjet e qershorit të vitit 2017. Përbërja e KQZ-së, sipas Kushtetutës dhe Ligjit për zgjedhje, duhet të reflektoj rezultatin e zgjedhjeve. Pra, LVV duhet të ketë dy përfaqësues sikurse edhe LAA dhe koalicioni PAN.

Lëvizja VETËVENDOSJE! mbajti sot konferencë për media mbi përkeqësimin e gjendjes së Transmetuesit Publik të Kosovës (RTK) nga menaxhmenti aktual. Në konferencë foli aktivisti i Lëvizjes Avni Zogiani, duke renditur lidhjet politike, nepotike dhe biznesore të menaxhmentit të RTK-së dhe implikimin e këtyre lidhjeve në përkeqësimin e shërbimit.

Marrëdhënia e RTK-së me PDK-në është si ajo mes dy duarve, ku njëra kruan tjetrën dhe anasjelltas. Pikërisht falë shërbimit ndaj PDK-së menaxhmenti i ka shpëtuar ndëshkimit për rastet e shumta të korrupsionit, nepotizmit, klientelizmit dhe keqmenaxhimit. Marrëdhënia me PDK-në dallohet nga mënyra sesi ky transmetues shpërfytyron lajmet mbi veprimtarinë e opozitës dhe prodhon lajme në shërbim të pushtetit.

Transmetuesi ka diku 800 deri në 1,000 punëtorë, por një numër i madh i tyre janë anashkaluar për vite me radhë ngaqë një pjesë e konsiderueshme e programit blihet nga jashtë. Për më tepër, përmbajtja e programacionit karakterizohet nga mediokriteti dhe mungesa e seriozitetit.

Aktivisti Avni Zogiani renditi katër rastet e fundit korruptive që shpërfaqin bashkëpunim problematik të RTK-së me PDK-në:

Së fundmi, një produksion që RTK-së i kushtoi 216,000 euro iu dha motrës së shefit të Grupit Parlamentar të PDK-së, Memli Krasniqit, pa patur konkurrencë mes kërkuesve;
540,000 euro është tenderi i shpallur për marjen me qira të 16 makinave për nevoja të operimit të televizionit dhe të u.d. të drejtorit menaxhues, Mentor Shalës. Një makinë me qira për RTK-në kushton 33,750 euro, pra më shtrenjtë sesa të blihet e re;
Tenderi prej afro gjysmë milioni euro për serverët i është dhënë një kompanie, pronari i të cilës është akuzuar për korrupsion në lidhje me disa tenderë në policinë e Kosovës dhe madje njëra prej kompanive ku ai është i përfshirë e ka të ndaluar të aplikojë për tenderët publik;
Dhënia e hapësirave reklamuese për bizneset private të anëtarëve të menaxhmetit përmes segmenteve të marketingut në kohën e pikut të shikueshmërisë.

RTK ka një mundësi të pafund për të shkelur konkurrencën në fushën e transmetuesëve, pasi ka pasur të hyra direkte nga buxheti publik, marketingu dhe donacionet. Ndërsa, në projektligjin aktual për RTK-në, PDK-ja është më e zëshmja për rikthimin e taksës për RTK-në brenda faturës së rrymës me arsyetimin e ri-vendosjes së RTK-së në financim direkt nga publiku. Praktika ka treguar të kundërtën. Kështu po përgatiten t’i jepen KEDS-it mes 1,3 e 2 milionë euro për komision. Vendosja e RTK-së në varësi të KEDS do të thotë vetëm thellim i varësisë së saj nga PDK dhe nga Hashim Thaçi.

Prandaj, ne insistojmë që me projektligjin e ri Kuvendi të mos përqendrohet vetëm te financimi, por të krijojë një ligj që garanton pavarësinë, paanshmërinë dhe profesionalizmin e këtij transmetuesi. Lëvizja VETËVENDOSJE! nuk është kundër një transmetuesi publik të fortë. Mirëpo, ne kërkojmë një transmetues që i shërben publikut dhe jo një transmetues që përpiqet të krijojë opinion publik të përshtatshëm për interesa të ngushta politike e klanore të forcave në pushtet.

Sot kujtojmë rezistencën heroike të minatorëve të Trepçës, grevën që shënoi fundin e Jugosllavisë dhe fillimin e çlirimit nga Serbia. Pas ngjarjes së studentëve në 81, kjo është ngjarja tjetër e rëndësishme që edhe e shënoi Kosovën në hartën ndërkombëtare, edhe e mobilizoi popullin në rezistencë ndaj agresionit të Serbisë. Ato tetë ditë të grevës, në zgafellën e errët të minierës së Stantërgut, kujtohen si ditë që nxorrën në dritë atë që është më e çmueshme për një popull: besimin se një luftë e përbashkët drejt çlirimit nga një Serbi okupatore, e shoviniste – është i mundshëm, dhe kjo na bënë të jemi krenar në çdo përvjetor. Sot, Trepça ka potencialin që sërish të kontribuojë në nxjerrjen e një të ardhme për shqiptarët dhe gjithë të tjerët që jetojnë në Kosovë, por nuk është se po punohet në atë drejtim. Qeveritarët e kanë lënë këtë ndërmarrje pa investime, e punëtorët me paga e pensione aq të ulëta sa nuk kanë siguri as të punojnë e as të banojnë në ato anë. Kjo duhet të ndryshojë, ndërmarrjes duhet t’i kthehen investimet e punëtorëve, minatorëve dinjiteti, në mënyrë që gjithë qytetarët të përfitojnë një të ardhme më prosperuese në këtë vend.

Qendra në Artanë e Lëvizjes VETËVENDOSJE! përmes Kryetarit të saj Abdyl  Gashi ka parashtruar kallëzim penal ndaj Kryetarit të Komunës së Artanës (Novoberdës), Svetislav Ivanoviq për punësimin e paligjshëm, pa asnjë konkurs publik të bashkëshortes së tij, Vesna Ivanovic, duke e paguar me pagë mujore në shumën prej 555.62 € (bruto).

Lëvizja e akuzon Ivanoviqin për veprën penale të konfliktit të interesit, sipas nenit 424 par.1 të KPRK-së. 

Po ashtu, Qendra e Lëvizjes në Artanë e akuzon bashkëshorten e Kryetarit të Artanës edhe për faktin se pothuajse asnjë ditë deri më tani nuk është paraqitur në vendin e saj të punës, duke lënë të mendohet fakti se i pandehuri Sevtislav Ivanoviq e ka punësuar bashkëshorten e tij vetëm me qëllim të përfitimit të kundërligjshëm të dobisë pasurore për veten e tij.

Qendra në Artanë i bën thirrje Prokurorisë Themelore në Gjilan, që në bazë të autorizimeve ligjore, të fillojë hetimin kundër të pandehurit  Svetislav Ivanovic, ndaj të njëjtit të ngrejë aktakuzë pranë Gjykatës Themelore në Gjilan-Departamenti i Përgjithshëm dhe të kërkojë shpalljen e tij fajtor dhe dënimin e parashikuar nga ligjet përkatëse.

Cikël diskutimesh profesionale mbi 10 vitet e decentralizimit në arsimin parauniversitar

Lëvizja VETËVENDOSJE! vazhdon angazhimin intensiv për trajtimin e problemeve të arsimit parauniversitar.

Në ambientet e Kuvendit, Komiteti për Arsim dhe Shkencë mbajti sot tryezën e dytë të cilklit të tryezave profesisionale. Temat kryesore ishin mbi problematikat e zbatimit të Kurrikulës së re dhe tekstet e materialet mësimore.

Parashtrimin kryesor e mbajti drejtori i Institutit Pedagogjik të Kosovës Selim Mehmeti, ndërsa profesionistët e pranishëm shpalosën kritikat dhe sugjerimet për kurrilën e re shkollore dhe problematikat e lidhura me të.

Reforma kurrikulare ka filluar nga Ministria e Arsimit dhe e Shkencës që prej vitit 2008. Udhëheqja e këtij procesi parashihej të bëhej nga divizioni i kurrikulës në ministri, drejtoria komunale e arsimit dhe drejtoritë e shkollave. Mirëpo, divizioni vuan nga mungesa e stafit, detajimi i përgjegjësive dhe mosimpenjimi në proces, ndërsa drejtoritë komunale dhe ato shkollore i shmangen problematikave të zbatimit të reformës.

Po ashtu, kurrikula e re nuk i përfshin ekspertët e fushës, madje deri në atë pikë sa fakulteti i edukimit ndihet i lënë jashtë këtij procesi. Ekspertët e fushave nuk po ia mbërrijnë që ekspertizat e tyre të futen në kontakt me mësimdhënësit.

Përsa i përket zhvillimit të mësimdhënësve, mungesa e standardeve të lëndëve mësimore, ndryshimi i vazhdueshëm i normativave dhe i kualifikimeve, trajnimet me bazë kompetencat dhe jo ato me qasje të integruara e kanë cënuar së shumti zhvillimin e mësuesve. Nga ana tjetër, trajnimet e mësimdhënësve përgjithësisht janë të varur nga projektet dhe financimet ndërkombëtare dhe politikat tona për kanalizimin e këtyre mbështetjeve mungojnë. Ndërsa për sa i përket teksteve mësimore, ata vuajnë nga mbigarkesa me përmbajtje, kompozimi i dobët dhe gjuha diskriminuese, sidomos ndaj grave.

Në përfundim, u përmblodhën edhe rekomandimet e dala nga tryeza, ku u tha:

Duhet një analizë, strategji dhe vizion për përmbajtjen dhe metodat për të cilat kanë nevojë mësimdhënësit tanë;
Zbatimi i kurrikulës së re duhet avancuar me sugjerimet dhe kritikat për të;
Shkollat duhet të jenë vendi kryesor ku punohet me kurrikulat;
Planifikimi i kurrikulave duhet parë si i vetmi mekanizëm krijues për mësimdhënësit dhe jo si procedurë administrative;
Duhet ngritur një komision për vlerësimin e gjuhës dhe vlerave shoqërore të përdorura në tekstet shkollore;
Duhet mbështetje më e madhe buxhetore për zbatimin e reformës kurrikulare dhe mbikqyrje zbatimit të tij;
Mekanizmat mbështetës si shërbimet dhe aktivat profesionalë kanë nevojë për forcim;
Sistemi ka nevojë për një institucion përgjegjës për orientimin dhe koordinimin e politikave të partnerëve për zhvillimin profesional të mësimdhënësve;
Mënyra e dhënies së trajnimeve është për t’u ndryshuar dhe institucionalizuar;

Lëvizja do ta vazhdojë përpjekjen për cilësinë në arsimin parauniversitar, duke u organizuar me profesionistët e dashamirësit e arsimit.

Në radhë është diskutimi për arsimin profesional dhe këshillimin e karrierës për nxënësit në vendin tonë.

Lëvizja VETËVENDOSJE! mbajti konferencë në lidhje me të drejtat e shkelura të shqiptarëve në Preshevë, Medvegjë dhe Bujanoc, ku foli anëtari i Kryesisë dhe deputeti Rexhep Selimi. Gjendja e shqiptarëve në Kosovën Lindore mbetet e nderë, pa zgjidhje dhe shumë herë e manipuluar nga forcat politike shqiptare.

Të gjithë mekanizmat diplomatikë të Kosovës dhe Shqipërisë janë pezulluar nga revanshi i Thaçit dhe nuk po merren me kritikat zyrtare ndaj Serbisë për kapitujt 23 dhe 24 kushtëzuar nga BE-ja, që kanë të bëjnë me sistemin e drejtësisë, të drejtat e pakicave kombëtare dhe krimet e luftës. Po ashtu, këtu nuk përjashtohet edhe kapitulli 35, që ka të bëjë me Kosovën. Ndërkohë, aktualisht Serbia vepron në mënyrë të organizuar drejt zmbrasjes së heshtur të luginës së Preshevës nga shqiptarët.

Në këtë vit po bëhen 20 vite prej masakrave që shteti serb ka kryer anëkend Kosovës dhe nuk gjendet aktualisht asnjë i dënuar apo i hetuar për krime lufte lidhur me këto masakra. Edhe një që ishte për rastin e krimeve në Podujevë u lirua pa përfunduar dënimin vitin që shkoi nga gjykata. Deputeti Selimi kujtoi edhe vizitën e Ramës në Preshevë para disa vitesh për të vënë në pah faktin se personat që kishin ngritur flamujt kombëtar shqiptar gjatë vizitës ishin arrestuar menjëherë pas largimit të Kryeministrit të Shqipërisë, duke qenë se flamujt kombëtarë shqiptarë janë të ndaluar në këtë rajon. Qasja e Serbisë nuk ka ndryshuar as ndaj krimeve kundra Kosovës as ndaj shtypjes mbi shqiptarët e luginës.  

Deputeti Selimi përsëriti qëndrimin e Lëvizjes për Kosovën Lindore duke thënë se, “nuk duhet të harrojmë se atje ka ndodhur një referendum në vitin 1992 dhe ai referendum do të duhej të respektohej dhe të ishte bazë për të avancuar të drejtat e tyre deri në të drejtën për bashkimin me Kosovën. Po ashtu, ka pasur një deklaratë të udhëheqësve politik shqiptarë të këtyre komunave në vitin 2006 në të njëjtën frymë dhe për të njëjtën gjë si referendumi i vitit 1992. Pra, çfarë duhet të ndodhë? Po, duhet të ndodhë bashkimi i Preshevës, Medvegjës dhe Bujanocit, por me Kosovën e bashkuar. Pra, bashkimi i tyre nuk do të duhej ta kishte çmimin e ndarjes së Kosovës, por një Kosovë e bashkuar do të duhej të ishte mikpritësja e bashkimi edhe të atyre tri komunave shqiptare si rrugë dhe hap i domosdoshëm drejt bashkimit kombëtar”

Ky nuk është momenti që shqiptarët të bëjnë lëshime nga rruga e tyre e drejtë, por ta shfrytëzojnë faktin se e kemi në dorë procesin e integrimit të Serbisë në BE. Kjo mundësi duhet shfrytëzuar për ta kushtëzuar Serbinë dhe për ta ndërkombëtarizuar çështjen e shqiptarëve të Luginës. Integrimi i Serbisë në BE duhet të kushtëzohet të drejtat e shqiptarëve të Luginës dhe jo të manipulohen shqiptarët e asaj ane që Serbia të integrohet.

Cikël diskutimesh profesionale mbi 10 vitet e decentralizimit në arsimin parauniversitar
Lëvizja VETËVENDOSJE! angazhohet intensivisht për trajtimin e problemeve e arsimit parauniversitar. Në dekadën që po lemë pas kanë ndodh shumë ndryshime në këtë nivel të arsimimit, jo patjetër për të mirë.

Drejtuesi i Grupit Parlamentar të LV-së, Glauk Konjufca dhe deputetja Albulena Haxhiu, po qëndrojnë në Strasburg në takimin e gjashtë të përbashkët të KPSA-së, BE-Kosovë.

Temat e këtij takimi do të jenë dialogu me Serbinë, situata sociale dhe ekonomike, transformimi i FSK si dhe liberalizimi i vizave.