Lëvizja VETËVENDOSJE! mbajti konferencë për media në lidhje me dështimin e Qeverisë dhe Presidentit për ta anëtarësuar Republikën e Kosovës në Interpol.

Anëtari i Kryesisë, deputeti Xhelal Sveçla foli, për luftën e madhe të Serbisë për të penguar anëtarësimin e Kosovës në Interpol, dhe për aventurën e Presidentit Thaçi për të vrapuar drejt pazareve me Serbinë.

“Hipokrizia qëndron në faktin e takimeve Thaçi-Vuçiq. Hashim Thaçi pavarësisht situatës në terren vazhdon të vrapojë pas pazareve me Serbinë e cila si asnjëherë më parë pas shpalljes së pavarësisë po e lufton shtetësinë dhe subjektivitetin e vendit”, tha Xhelal Sveçla.

Ai po ashtu, theksoi se hapi i parë që dëshmon se palët janë të intersuara për një marrëveshje finale është pushimi i “luftës” në terren. Si është e mundur që shteti i Kosovës të përballet me këso vështirësish në terrren a presidenti Thaçi të shkojë e të takohet pa asnjë kusht për Serbinë. Ky president po anashkalon çdo interes të vendit vetëm që personalisht të shpëtojë. Ai e ka zgjedhur rrugën e tij, por nuk duhet dhe nuk guxon ta marrë edhe Kosovën me vete. Ky njeri është zhvendosur kah pala serbe.

Anëtarja e Kryesisë dhe deputetja Albulena Haxhiu foli për konfuzionin që kanë shkaktuar Presidenti, Kryeministri e Ministri i Punëve të Jashtme me dobësinë e treguar karshi Serbisë ndaj shteteve që tashmë e kanë njohur Republikën e Kosovës.

“Pazaret territoriale të Thaçit me Vuçiqin që kulmuan te takimi me Putinin, kanë shkaktuar konfuzion te shumë shtete që na e kanë njohur pavarësinë. Në këtë vit ka ndodhur një vetëkontestim i shtetësisë dhe pavarësisë sonë nëpërmjet aventurave absurde të presidentit të Kosovës. Gjithnjë e më pak të tjerët po na marrin seriozisht. Sepse, presidenti i vendit nuk po e merr shtetin tonë seriozisht”, tha Albulena Haxhiu.

Haxhiu shtoi se “Thaçi e Pacolli, por edhe Haradinaj, duke u treguar të butë e të dobët karshi Serbisë, karshi Vuçiqit, Daçiqit e Radojçiqit, e kanë dobësuar pozitën tonë si shtet kudo, e kanë stërkequr perceptimin mbi neve. Dobësia e butësia karshi Serbisë nuk interpretohen nga askush si bujari a gjenerozitet yni, por si frikë e si padituri e jona”.

Kuvendi i Republikës dhe Qeveria e Kosovës duhet që menjëherë t’ia marrin mandatin e Thaçit në aventurën e tij personale me Serbinë pa autorizim, pa legjitimitet dhe pa kompentencë, po ashtu Republika e Kosovës duhet menjëherë të vendos reciprocitet të plotë politik, ekonomik dhe tregtar me Serbinë.

Pasojat e dështimit për t’u anëtarësuar në INTERPOL janë më të mëdhatë në një rrafsh tjetër: mijëra kriminelë të luftës në Serbi sot po festojnë. Me iniciativën e Lëvizjes VETËVENDOSJE!, më 25 tetor 2018, pra ende nuk është bërë një muaj, u miratua në parim Projekt-Ligji për gjykimin në mungesë të krimeve të luftës me 61 vota PËR, 19 KUNDËR dhe 7 ABSTENIME. Kjo ishte fitore e jashtëzakonshme për drejtësinë në Kosovë. Mirëpo, tash drejtësia në Kosovë u sulmua nga dështimi në Dubai. Pra, pasojat nuk janë vetëm në fushën e sigurisë por edhe të drejtësisë, jo vetëm për drejtësinë në paqe por edhe për drejtësinë për krimet e luftës.

E vetmja mënyrë si mund ta ndihmojnë ata Kosovën është duke dhënë dorëheqje. Shumica dërrmuese e qytetarëve të vendit tonë, për të mos thënë të gjithë, do të gëzoheshin sonte, sikur në lajmet e mbrëmjes të dëgjonin se Thaçi, Pacolli dhe Haradinaj kanë dhënë dorëheqje.

Në zyrat e Lëvizjes VETËVENDOSJE!, u zhvillua sot një takim nga Kryetari, Albin Kurti, Nënkryetarja, Fatmire Mulhaxha Kollçaku, dhe Sekretari për Marrëdhënie me Jashtë, Boiken Abazi, me Kryetarin e Sindikatës së Pavarur të Sektorit Privat të Kosovës, Jusuf Azemi, dhe Menaxheren e Burimeve Njerëzore të kësaj sindikate, Mimoza Sopaj.

Në këtë takim, Kryetari Kurti theksoi rëndësinë që Lëvizja VETËVENDOSJE! i kushton çështjes të së drejtave të punëtorëve në Kosovë, përfshirë këtu pagat e ulëta dhe të prapambetura, kontratat dhe kushtet e punës, si dhe privatizimet abuzive që kanë lënë të papunë me dhjetra mijëra punëtorë e që kërcënojnë ende me mijëra të tjerë. Si subkjet politik social-demokrat, Lëvizja VETËVENDOSJE! ia ka caktuar vetes detyrë mbrojtjen e të drejtave të punëtorëve dhe përparimin e këtyre të drejtave përmes angazhimit brenda dhe jashtë institucioneve. Shqetësimi i madh i Lëvizjes VETËVENDOSJE! lidhet me vdekjet në vendin e punës, me mungesën e kontratave të punës, ose me mosrepsektimin e tyre, me mungesën e politikave qeveritare për rritjen e prodhimit vendas, dhe për pasojë mungesën e mundësive të punësimit në Kosovë, si dhe me shpërfilljen që institucionet e vendit bëjnë ndaj shkeljes sistematike të të drejtave të punëtorëve. Nënkryetarja Mulhaxha Kollçaku theksoi punën në Kuvendin e Republikës dhe në aktivitetet jashtë Kuvendit, që Lëvizja ka bërë në vazhdimësi për rritjen e pagës minimale në Kosovë.

Kryetari i Sindikatës, Jusuf Azemi, bëri një përmbledhje të gjendjes së rëndë të punëtorëve në sektorin privat në Kosovë, dhe pengesat e mëdha që vendosen për realizimin e të drejtave. Ai theksoi gjthashtu domosdoshmërinë për rritjen e pagës minimale, dhe tregoi se shumica e punëtorëve të sektorit privat janë të punësuar pa kontratë pune dhe nuk u paguhen kontributet pensionale. Për pasojë, shfrytëzimi i tyre dhe shkelja e të drejtave bëhet edhe me i lehtë. Më tej, ai shpjegoi se institucionet e vendit dhe inspektoriati i punës janë në dijeni për këto shkelje të rënda që i bëhën punëtorëve, mirëpo lidhja mes biznesit dhe politikës në Kosovë kontribuon direkt në mirëmbajten e gjendjen aktuale. Z. Azemi ngriti në veçanti edhe çështjen e punëtorëve të Fabrikës së Llamkosit në Vushtrri, dhe shkeljen e të drejtave të tyre. Për më shumë, tregoi për nevojat jo vetëm për organizmin e punëtorëve në vendin e tyre të punës, por edhe për këshillimin juridik që u nevojitet atyre.

Përfaqësuesit e Lëvizjes ofruan bashkëpunimin për të gjitha çështjet e ngritura nga Sindikata. Për më të tepër, ata e njoftuan Sindikatën se Lëvizja planifikon ngritjen e strukturave të brendshme organizative të cilat do të merren edhe më nga afër me problemet dhe shkeljet e të drejtave të punëtorëve, si dhe me organizmin e punëtorëve për të realizuar të drejtat e tyre. Lëvizja VETËVENDOSJE! do të bashkëpunojë me çdo sindikatë që mund të kontribuojë në ngritjen e dinjitetit të punëtorëve dhe në mbrojtjen e të drejtave të tyre.

Prishtinë, 19 nëntor 2018
Lëvizja VETËVENDOSJE!

Albin Kurti me deputetë, zyrtarë e asambleistë të Prizrenit, vizitoi fshatin Mushnikovë

Kryetari i Lëvizjes VETËVENDOSJE!, Albin Kurti, së bashku me deputetët Drita Millaku, Arbër Rexhaj, Kryetarin e Qendrës së Prizrenit dhe Kryesuesin e Kuvendit Komunal, Artan Abrashi, drejtorin për siguri dhe emergjenca, Faruk Dakaj dhe asambleistët Karanfil Haxhillari e Adem Shabanaj, vizitoi fshatin Mushnikovë, ku mbajti tubim me banorët e fshatit.

Tubimin e hapi Artan Abrashi, i cili tha se Komuna e Prizrenit i mban premtimet edhe pas fushatës edhe me vet faktin që vjen në tubime sa herë që banorët e kërkojnë këtë. Ai tregoi se Komuna e Prizrenit tash më e ka siguruar transportin për nxënësit e fshatit, deri sa e adresoi problemin e ndërtimit të hidrocentraleve në Lumbardh, me ç’rast u premtoi banorëve se Komuna e Prizrenit nuk do të japë leje për ndërtimin e tyre, por do të veprojë konform interesit të banorëve.

Sot në mbrëmje në Lëvizjen VETËVENDOSJE! Profesoresha Venera Demukaj paraqiti prezantimin “Ndihma e Jashtme: Mundësitë dhe Kontradiktat”. Pas prezantimi vijoi diskutimi mbi një temë tepër të rëndësishme siç është implikimet e ndihmës së jashtme për një vend, kur filloi ky koncept i ndërveprimit, çfarë ndodhi me vendet që e “pësuan” e apo e “fituan” këtë tip të ndihmës.

Qendra e Lëvizjes në Prishtinë mbajti konferencë për media për të folur në lidhje me degradimin e vazhdueshëm në Komunën e Prishtinës nga qeverisja e Shpend Ahmetit duke lejuar ndërtimin pa leje nëpër disa lokacione në Prishtinë.

Asambleisti i Lëvizjes VETËVENDOSJE! në Komunën e Prishtinës, Arbër Vokrri, foli edhe një herë për ndërtimin pa leje që po ndodhë tek objekti i ‘’Albi Commerce’’, për të cilën Komuna e Prishtinës ende nuk ka dhënë përgjigje.

”Pas akuzës sonë publike shfaqet kryetari i Komunës dhe i bën reklamë pikërisht të njëjtit konsorcium, të njëjtave biznese, që ishte e habitshme për ne. Aty një brend i njohur ndërkombëtar e ka hapur një butik dhe tash kryetari ngarend për t’i bërë një reklamë thuajse fjala është për hapje të ndonjë fabrike që do ta zvogëlonte papunësinë në Prishtinë. Ndërkaq sa i përket lajmit të mirë të ardhjes së brendeve të njohura ai nuk është as i pari as i fundit që vije në Prishtinë’’, tha Arbër Vokrri.

Ai po ashtu theksoi se kjo rrjedhë e ngjarjeve e përforcon dyshimin për mundësinë e një lidhjeje korruptive në këtë mes duke thënë se kanë marrë informacione, që po konfirmohen, se bëhet fjalë qartas për një interes të ngushtë të kryetarit të komunës me Albi Commerce-in(Albi Mall). Nga e gjithë kjo natyrshëm lindë pyetja: a mos kryetari i Komunës është aksionar në këtë biznes, apo mos e ka punësuar ndonjë familjar të afërt aty? Apo mos e ka marrë përsipër marketingun e kompanisë a kompanive në fjalë?

Në anën tjetër deputeti i Lëvizjes dhe ish-drejtori i Urbanizmit në Prishtinë, Liburn Aliu foli për objekte që dikur ishin simbole të ndërtimeve pa leje dhe që ishin ndaluar, ndërkohë që tash aty është rikthyer tash puna në mënyrë intenzive.

‘’ Bëhët fjalë për dy objekte që kanë qene simbole të ndërtimeve pa leje dhe të degradimit të qytetit të Prishtinës. Janë të në qendër të Prishtinës, njëri në rrugën Agim Ramadani dhe tjetri në rrugën e UÇK-së. Njëri nga ta ishte objekti i cili u shëndërrua në pikën kryesore të fushatës së Lëvizjes Vetëvendosje ! në Prishtinë më 2013, kur kishim kandidat Shpendin dhe fituam. U patëm zotuar asokohe për ndalim të ndërtimeve pa leje dhe vendosje të rregullit. Ashtu dhe patëm bërë. Ndalimi i ndërtimeve pa leje ishte pikënisja e ndryshimit në Prishtinë. Ishte fillimi i vështirë i ndryshimit’’, tha Liburn Aliu.

Ai gjithashtu tha se Shpendi e di mirë për presionin që kemi pasë, telefonatat e kërkesat për takime nga shumëkush, madje edhe nga njerëz mjaft eminent të politikës.Duke e marrë parasysh nivelin e presionit që bëhej asokohe për ndërtimet pa leje dhe veçanërisht për këto dy objekte e kuptohet që këtu nuk kemi të bëjmë më thjesht për lejim të ndërtimeve pa leje dhe rikthim te degradimit si në të shkuarën në Prishtinë. Këtu ka diçka më shumë.

Shpendi po qeverisë tani ashtu si u qeveris dikur në Prishtinë dhe ashtu si qeveriset me Kosovën tash e shumë vite. Shpendi për nga qeverisja po i përngjan Ramushit dhe këta të dy bashkë cilitdo kryeminister të Republikës së Kosovës deri tani. E tu përngjash atyre nuk është kaq e thjeshtë, duhet të jesh në gjendje të thyesh më shumë kufij, dhe nuk ndalon me ndërtime pa leje.

Me këtë që po shihet pritet që së shpejti të na shpërthejë diçka edhe më e madhe, andaj Lëvizja VETËVENDOSJE! – Qendra Prishtinë është e intersuar të dijë se a lidhet kjo me kryeministrin Ramush Haradinaj apo me presidentin Thaçi, le të na e thojë Shpend Ahmeti?

Kryetari i Lëvizjes VETËVENDOSJE! Albin Kurti, së bashku me sekretaren organizative, Vlora Haxhimehmedi, deputetin, Liburn Aliu, nënkryetarin e Komunës së Vushtrrisë, Besim Muzaqi dhe gjeneralin në pension, Enver Dugollin, vizitoi Akademinë për Siguri Publike në Vushtrri.

Ata u pritën nga Ismail Smakiqi, drejtor i përgjithshëm i kësaj akademie, i cili në një prezantim të gjerë tregoi se kjo akademi e themeluar në vitin 1999 bën trajnimin e kadetëve për Policinë e Kosovës, Inspektoratit Policor, Agjencisë së Menaxhimit të Emergjencave, Agjencionit Doganor, Shërbimit korrektues dhe Shërbimit Sprovues të Kosovës. Deri në vitin 2017 në këtë akademi, trajnime kanë ndjekur mbi 146 mijë vijues.

Në fund, delegacioni i Lëvizjes VETËVENDOSJE! pati rastin që nga afër të ndjekë një ushtrim të kadetëve të Policisë.

Kryetari i Lëvizjes VETËVENDOSJE!, Albin Kurti, i shoqëruar nga disa nga drejtorët e Komunës së Prizrenit, Levent Kasëmi, drejtor i shërbimeve publike, Refik Shaqiri, drejtor i kadastrit (boshnjak, partia NDS), Visar Shehu, drejtor i shëndetësisë, Islam Thaçi, drejtor i inspeksionit, Krenare Koqi, shefe e kabineti të kryetarit, Artan Abrashi kryesues i asamblesë komunale vizituan fshatin Gërnçar të kësaj komune, fshat ky i banuar me pjesëtarë të komunitetit boshnjak.

Në takim me ta, kryetari Kurti foli mbi situatën e përgjithshme në Kosovë, të cilën e vlerësoi të rëndë për të gjithë qytetarët e vendit. Fajtor për këtë është modeli ekonomik i gabuar, i koncentruar vetëm në tregti e import dhe administratë të fryrë, duke lënë anash prodhimin, duke i privatizuar ndërmarrjet dhe duke i lënë punëtorët pa të drejta.

Komiteti për arsim e kërkim shkencor në Lëvizjen VETËVENDOSJE! organizoi sot në mbrëmje diskutimin mbi sistemin arsimor të Kosovës.

Jusuf Thaçi dhe Artan Dermaku paraqitën studimet e tyre dhe idetë për një platformë për ndryshimin e transformimin e gjendjes në sistemin arsimor në Kosovë.

Pas prezantimeve u diskutua mes të pranishmëve mbi gjendjen në arsim, rëndësinë e tij shoqërore dhe ndërhyrjet e domosdoshme për përmirësimin e kësaj gjendjeje.

Kryetari i Lëvizjes VETËVENDOSJE!, Albin Kurti, së bashku me sekretaren organizative, Vlora Haxhimehmedi, deputeten, Arbërie Nagavci, kryetarin e Qendrës, Agon Batusha, nënkryetarin, Bashkim Rrahmani, asambleistë dhe aktivistë, vizitoi ekspozitën e shoqatës së intelektualëve të Gjakovës “Jakova”, me rastin e 15 vjetorit të themelimit të saj.

Me këtë rast, kryetari i shoqatës Ruzhdi Sefa i njoftoi të pranishmit me historikun e kësaj shoqate dhe aktivitetin e saj gjatë kohës, ndërkaq ish kryetari, Xhevat Koshi, prezentoi veprat e botuara nga kjo shoqatë dhe anëtarët e saj. Ai i dhuroi kryetarit, Kurti librin “Kujtime Jetike” të shkruar nga Akademik, Minir Dushi.

Lëvizja VETËVENDOSJE! mbajti sot konferencë për media për shkatërrimin sistematik që po i bëhet Telekomit të Kosovës duke vazhduar me emërimet e personave politik dhe jokompetent në udhëheqje të këtij institucioni dhe duke mos zbatuar rezolutën e Kuvendit të miratuar më 12 korrik të këtij viti.

Drejtuesi i Komitetit për Komunikime elektronike dhe postare në LV, Fatban Bunjaku, foli për vendosjen e njerëzve politik dhe krejtësisht të papërgatitur në krye të Telekomit të Kosovës siç ishte rasti me Drejtorin e Telekomit, Gent Begollin dhe tash UD i Drejtorit, Trim Musliu.

Sot në mbrëmje u zhvillua debati pas ligjëratës së dhënë nga prof. i shkencave politike në UP, Bekim Baliqi mbi politikën e jashtme dhe imazhin e Republikës së Kosovës në botë. Gjatë diskutimeve u trajtuan veçanërisht temat kryesore që kanë zënë vend në politikën e jashtme të Kosovës dhe ato lidhur me Kosovën. Po ashtu u diskutua edhe për qëndrimet e zyrtarëve të Republikës së Kosovës, si dhe nivelin dhe përgatitjen e shërbimit diplomatik në raport me zhvillimet në politikën ndërkombëtare.

• Lëvizja VETËVENDOSJE! përmes Nënkryetares dhe deputetes Fatmire Mullhaxha Kollçaku, anëtares së Kryesisë dhe deputetes Arbërie Nagavci si dhe antëtares së Kryesisë dhe deputetes Albulena Haxhiu mbajti konferencë për projektligjin e ri për administratën publike.

  Para këtij projektligji, Kryeministri pati vendosur rritjen e pagave për veten e tij, për çka Lëvizja ka dorëzuar kallzim penal dhe është në pritje të trajtimit të tyre. Sot, përmes dispozitave të këtij projektligji të prezantuar, Kryeministri tenton të legjitimojë rritjen e mëparshme të pagave.

  Po ashtu, ky projektligj tregon se qeveria po tenton përsëri të privilegjojë përmes ligjit veten e saj, individë dhe deputetë. Deputetja Albulena Haxhiu tregoi sesi, sipas propozimit të ri, pagat e Presidentit, Kryeministrit dhe deputetëve janë respektivisht 17, 15 dhe 12 herë më të mëdha sesa paga minimale në Kosovë.

  Projektligji privilegjon një pakicë dhe nënvlerëson një shumicë. Ai është propozuar pa debat, arsye dhe shpjegim duke përplasur dhjetra ligje dhe duke mundësuar çorganizimin e administratës publike. Deputetja Haxhiu shpjegoi sesi, sipas kësaj pakete ligjore, Komisioni i Pavarur për Miniera bashkë me Këshillin për Trashëgimi, Autoritetin e Konkurrencës dhe Zyrat e Rregullatorit të Energjisë dhe Ujrave vendosen nën diktatin e Qeverisë.

  Nënkryetarja e Lëvizjes Kollçaku përmendi problematikën e ikjes së mjekëve nga Kosova. Ky fenomen po favorizohet nga qeveria e Kosovës duke mos u dhënë atyre prioritetin dhe mbështetjen e nevojshme. Me amendamentet e Lëvizjes për projektligjin për pagat synohet që mjekëve t’iu jepet dinjiteti i merituar.

  Po ashtu, edhe arsimi nuk e ka mbështetjen e duhur dhe do të duhej të bëhej prioritet kombëtar i qeverisjes. Deputetja Nagavci tregoi sesi punëtorët e arsimit janë të diskriminuar në paga raport me sektorët e tjerë për punë të së njëjtës kategori.

  Përballë këtyre problematikave aktuale në administratën publike dhe përballë rrezikut të përshkallëzimit të tyre përmes projektligjit të ri të Qeverisë, Lëvizja VETËVENDOSJE! ka propozuar amendamentet e mëposhtme:

  • heqjen e nenit që legjitimon vendimin e qeverisë për rritje page;
  • heqjen e shtesave të propozuara për deputetet dhe heqjen e një
  • përqindje të caktuar nga pagat në rastet kur deputetët nuk shkojnë në seanca;
  • heqjen e pagës kalimtare për një vit të parashikuar për zv.ministrat pas largimit nga puna;
  • rritjen e koeficentit për prokurorët dhe gjykatësit e krimeve të rënda, të gjykatave dhe prokurorive themelore dhe për gjyqtarët për kundravajtje;
  • akordimin e koeficentëve në raport me përgjegjësitë që kanë për bashkëpunëtorët profesional që i ndihmojnë prokurorëve dhe gjyqtarëve;
  • shtesa të posaçme për shërbyesit civil në institucionet e drejtësisë;
  • shtesa të posaçme për shërbimin korrektues;
  • rritje të koeficentit dhe të shtesave të posaçme për zjarrfikësit për shkak të rrezikut të madh në punën e tyre.

  Tre ligjet e administratës publike kanë nevojë për shumë punë dhe Lëvizja po e vazhdon analizën, kritikën dhe propozimet e saj kundrejt të tre ligjeve. Në instancë të fundit, amendamentet e Lëvizjes kanë për synim që në Kosovë të ketë paga të barabarta për punë të barabarta dhe paga të dinjitetshme për çdo punë në administratën publike. Ligjet për administratën publike dhe vetë administrata publike duhet të reflektojë këto dy parime përballë shoqërisë tonë.

Pas më shumë se katër vitesh Ministria e Administratës publike dërgoi në Kuvend ndryshimet për paketën e Administratës publike ku përfshihen dhe pagat në këtë sistem.

Kësaj pakete i parapriu vendimi arbitrar, i paligjshëm dhe i padrejtë i Qeverisë Haradinaj për t’ia rritur pagat vetes.

Në thelb edhe pse kjo paketë ligjore ishte parashikuar qe të realizonte një reformë në administratën publike përfundoi duke qenë një mbulesë legjitimuese për rritjen e paligjshme të pagave që i bëri vetes dhe të tijve kryeministri aktual.

Me këtë paketë ligjore do të duhet të kishim edhe diskutimin e gjerë e përmbajtësor mbi modelin e Administratës publike të Kosovës. Por fatkeqësisht kjo mungon. Duhet të kishim edhe standartizimin e agjencive dhe institucioneve të tjera përveç ekzekutivit e legjislativit. Edhe kjo mungon. Në të kundërt kjo paketë sjell pështjellime e paqartësi duke i kthyer nën varësi të qeverisë plot instiucione e agjenci që duhet të jenë të pavarura.

Kjo paketë duhet të paraprihej nga diskutimi e debatimi i plotë mbi profesionet, shkollimin dhe karakteristikat e profesioneve brenda shërbimit publik të Kosovës. Dhe mbi kritere të drejta e të barabarta duhej të përkufizonte ato. Si rrjedhim do të duhet të kishim ligjin dhe klasifikimet për pagat. As kjo nuk ndodhi. Kjo paketë nuk garanton pagë të barabartë për punë të barabartë. Dhe nuk arrin të shquaj profesionet me vështirësi të lartë e kërkësë shkollimi superior.

Reforma në administratë do të duhet të adresonte fillimit shërbyesit e nëpërkëmbur ata që janë në nivelin më të ulët të pagesave dhe të trajtimit. Nuk e kanë bërë, përkundrazi janë kujdesur që zyrtarët publik të lartë edhe ashtu me plot privilegje t’i rehatojnë edhe më tej.

Si pasojë punonjësit shëndetësor, sistemi arsimor parauniversitar e parashkollor në përgjithësi, stafi mbështetës i sistemit të drejtësisë, zjarrëfikësit e plot kategorit të tjera nuk janë adresuar nga qeveria.

Edhe pse ne kemi kritika thelbësore dhe kërkesë për ta nisur ndryshimin që në thelb të kësaj pakete siç janë bërë publike dhe janë adresuar në komisione parlamentare nga përfaqësuesit tanë, duke qenë se mazhoranca ka gjetur votat për ta kaluar në lexim të parë, deputetët tanë në konsultim me profesionistët e punëtorët e sektorit publik kanë adresuar tre fusha bazë, si arsimi, shëndetësia dhe drejtësia. Shtuar këtyre dhe kërkesat për ulje dhe heqje të shtesave për zyrtarët e lartë.

Ne besojmë se Administrata publike është zemreku i shtetit. Ne e duam punonjësin e sektorit publik si përshpejtim i shtetësisë sonë jo si peng i shtetit të kapur.

Republika e Kosovës duhet sa më parë të adresoj në një tjetër mënyrë e platformë llojin e organizimit të admistratës ku paga e Presidentit nuk është 17 herë me e lartë se paga minimale e sanksionuar me ligj në Kosovë. Ku drejtuesit e kabineteve të ministrave paguhen e vlerësohen më shumë se kirurgët e arsimtarët. Ku stafet e ministrave paguhen 10 fish më shumë se edukatorët e çerdheve.

Përveç amandementeve që Lëvizja VETËVENDOSJE! i dorëzoi dje në Kuvend nëpërmjet deputeteve të saj dhe nëpërmjet komisioneve ku bëjnë pjesë gjatë ditëve në vijim do të thërrasë në takim konsultuese e diskutim publik sindikatat e përfaqësuesit e institucioneve që kanë pasur probleme me këtë paketë.

Po ashtu të gjitha shqetësimet e tyre po përpiqemi që t’i bëjmë pjesë të ndryshimeve në grupin punues të Komisionit parlamentar për Administratë publike.

Një delegacion i Lëvizjes VETËVENDOSJE! i kryesuar nga kryetari Albin Kurti, sekretarja organizative Vlora Haxhimehmedi, deputeti Xhelal Sveçla, ish-gjenerali që është pjesë e Lëvizjes Enver Dugolli, deputeti i Lëvizjes dhe ish – koloneli i FSK-së Shemsi Syla, si dhe anëtari i kryesisë e po ashtu ish – koloneli i FSK-së Ajet Potera, kanë vizituar sot Forcën e Sigurië së Kosovës (FSK) me ç’rast janë pritur nga Komandanti i FSK-së Gjenerallejtënant Rrahman Rama, Koloneli Jeton Dreshaj, Kolonelin Agron Bajrami si dhe Drejtori për Politika dhe Plane Faruk Geci.

Sot u mbajt përurimi i librit “Ali Aliu Kelmendi – Ringjallja e Prometeut”, përgatitur dhe hartuar nga veprimtari dhe shkrimtari i mirënjohur Avni Dehari. Në përurim morën pjesë shumë veprimtarë, familjarë të familjes Aliu e po ashtu Dehari dhe dashamirë të fjalës së shkruar e librit.

Falë aftësive stilistike e zotërimit të mirë të gjuhës, kjo vepër, shkruar Avni Dehari merr rëndësi dhe rol të madh letrar e estetik. Prandaj, Ali Aliun, nuk e ka fisnikëruar në këtë libër vetëm vepra e tij, por edhe shkrimi i një autori shumë të zotë. Vepra jetësore e Ali Aliut dhe vepra letrare e Avni Deharit e marrin një formë të plotë në këtë libër.

Në mbrëmjen e 6 nëntorit, në sallën Black-Box të Akademisë së Arteve mbështetës e aktivistë të Lëvizjes VETËVENDOSJE! nga Tirana e nga vende të tjera të Shqipërisë u mblodhën për të përkujtuar shembullin e aktivizmit dhe atdhetarisë, Astrit Deharin, i cili u vra në 5 nëntor 2016 në burgun e Prizrenit, ku mbahej padrejtësisht.

Kjo mbledhje për nder të Astrit Deharit u shndërrua në një odë të vërtetë shqiptare, me pjesëmarrjen e grave e burrave, vajzave e djemve, nga shumë profesione e prejardhje, nga shtresa të ndryshme shoqërore, të gjithë bashkë në ërkujtim të një idealisti, i cili përditë e më shumë e forcon dritën e idealit për të cilin dha jetën!