Një shtet i pavarur është një shtet me drejtësi funksionale. Ndërsa atij shteti ku gjykatat janë të varura prej sundimtarëve, i duhet ende punë për t’u bërë i pavarur.

Kërkojmë drejtësi për rastin gjyqësor ndaj Sadri Ramabajës, mu tash, gjatë festimit të dhjetëvjetorit të pavarësisë së Kosovës, që t’ia përkujtojmë institucioneve dhe qytetarëve se puna dhe mundi për vetëvendosje dhe shtetndërtim të Kosovës ende s’ka përfunduar.

Sot, 10 vite pas shpalljes së pavarësisë ende kemi të burgosur politikë. Ata janë të rinj të pafajshëm, të burgosur dhe të vrarë, në burgje të Kosovës, për bindjet e tyre politike. Po ata janë edhe intelektualë e veprimtarë të kahmotshëm, si Sadri Ramabaja, i cili ka punuar për Kosovën që nga vitet e ‘80-ta. Sadri Ramabaja po mbahet në paraburgim prej gati pesë muajsh, nuk po nxirret para gjyqit që të ballafaqohet me drejtësinë. Paraburgimi i tij po zgjatet duke zëvendësuar dënimin, pikërisht sepse kundër tij nuk ka prova, por vetëm akuza të trilluara, pa bazë substanciale në të vërtetën. Mbyllja e Sadri Ramabajës në paraburgim duhet të marrë fund. Ai ishte asambleist i Kuvendit Komunal të Prishtinës dhe është ligjërues fakulteti. Burgimi i padrejtë e ndan nga ligjëratat dhe studentët e tij.

Sadri Ramabaja që në fillimet e veprimtarisë së tij ka shkruar gjithnjë duke pasur për qëllim atdhedashurinë. Puna e tij reflekton angazhim të pastër për Kosovën dhe çështjen shqiptare. Për të njëjtat bindje që u arrestua dekada më parë nga regjimi serb, e me të njëjtat akuza të rrejshme, ai po mbahet i arrestuar edhe sot, por këtë herë nga shteti për të cilin ai veproi gjithë jetën.

Duhet të ndalen arrestimet dhe mbajtjet e padrejta nëpër burgje të Kosovës, arrestime me prapavijë politike. Nuk duhen përsëritur veprimet e regjimeve të mëhershme, por duhen mbrojtur interesat e qytetarit, e të lartësohen mundi dhe veprimtaria e gjeneratës së Ukshin Hotit.

Lëvizja VETËVENDOSJE!
Prishtinë, 18 shkurt 2018

Sot pasdite, delegacioni i Lëvizjes VETËVENDOSJE! i përbërë nga Kryetari, Albin Kurti, dhe Deputetja, Arbërie Nagavci, u takuan me delegacionin austriak të përbërë nga Deputeti në Parlamentin Evropian z. Lukas Mandel, Deputetja znj. Carmen Jeitler Cincelli, ish zëvendëskryeministri i Republikës së Austrisë z. Erhard Busek, Ambasadori i Austrisë në Kosovë, z. Gernot Pfandler, dhe Ambasadori i Kosovës në Austri, z. Sami Ukelli.

Në këtë takim u diskutua për zhvillimet e fundit politike, ekonomike e sociale në vend si dhe për të arriturat që ka shënuar Republika e Kosovës brenda këtij 10 vjeçari. Po ashtu, u përmendën edhe ngecjet dhe hapat që duhet të ndërmarrë Kosova në të ardhmen për t’u forcuar si shtet, me ekonomi të zhvilluar prodhuese, gjykata të pavarura efikase, administratë transparente profesionale, drejtësi sociale inkluzive dhe integrime të përshpejtuara euro-atlantike.

Vëmendje e veçantë iu kushtua bashkëpunimit mes Kosovës dhe Austrisë në realizimin e interesave të përbashkëta si dhe thellimit të bashkëpunimit, si atij bilateral po ashtu edhe nëpërmjet Bashkimit Evropian.

Delegacioni i Lëvizjes VETËVENDOSJE! falendëroi delegacionin austriak për ndihmën që shteti austriak i ka dhënë Kosovës e shqiptarëve si historikisht ashtu edhe në kohërat e reja para dhe pas shpalljes së pavarësisë.

Sot, pasi që Presidenti i Kosovës, Hashim Thaçi, njoftoi opinionin publik lidhur me deklaratën e përbashkët të nënshkruar nga ai dhe Presidenti i Malit të Zi, Filip Vujanoviq, lidhur me marrëveshjen për demarkacionin me Malin e Zi, Lëvizja VETËVENDOSJE! mbajti mbledhje të jashtëzakonshme të kryesisë së saj.

Për Lëvizjen VETËVENDOSJE! kjo deklaratë e Thaçit me homologun e tij malazez është e papranueshme sepse e padrejtë dhe mashtruese.

1. Teksti i kësaj deklarate nuk është dashur të nënshkruhet pa njoftimin, dijeninë dhe diskutimin në institucionet e Kosovës. Shteti i pavarur i Kosovës është Republikë Parlamentare.
2. Kjo deklaratë rikonfirmon marrëveshjen e 26 gushtit 2015 nënshkruar në Vjenë. Janë 205 mijë nënshkrime në Peticionin qytetar të vjeshtës së vitit 2015 në kundërshtim të kësaj marrëveshjeje. Po ashtu, demonstratat më të mëdha në Kosovën e pasluftës janë mbajtur kundër kësaj marrëveshje më 9 janar dhe 17 shkurt 2016, duke dëshmuar vullnetin popullor.
3. Rezultatet e Komisionit Shtetëror për Shënjimin dhe Mirëmbajtjen e Kufirit Shtetëror, drejtuar nga prof. Shpejtim Bulliqi janë shpërfillur tërësisht nga kjo Deklaratë. Komisioni Bulliqi theksonte, midis të tjerash, se Marrëveshja e nënshkruar në 26 gusht 2015, për Demarkacionin e Kufirit në mes të Kosovës dhe të Malit të Zi nuk është marrëveshje për shënjimin e kufirit, por është marrëveshje për përcaktimin e kufirit, përkatësisht për ndryshimin e tij në një kufi të ri, jashtë çdo kompetence.
4. Pas ratifikimit, në këtë deklaratë, thuhet se do të formohet një Trup i Përbashkët Punues për shënjimin e vijës kufitare. Kësisoj, pranohet që demarkacioni nuk ka qenë i tillë (shënjim kufiri) por delimitim (kufi i ri) i cili do të ketë nevojë për shënjim të ri.
5. Thuhet se Trupi i Përbashkët Punues “do të identifikojë dhe adresojë mosmarrëveshjet potenciale”. Pra, do të ketë identifikim e adresim të mosmarrëveshjeve pa garanci për zgjidhje të tyre.
6. Thuhet se Trupi i Përbashkët Punues “do të rishiqojë dhe korrektojë sektorët në drejtim të Çakorrit dhe Kullës së Zhlepit”. Pra, pranohet që Çakorri dhe Kulla e Zhlepit nuk do të jenë pika kufitare dhe po ashtu nuk përmendet pellgu i lumit Bjelluha.
7. Deklarata është e ndryshme në gjuhën shqipe dhe atë angleze. Psh. në versionin shqip mungon pika 6 e cila duke nënvizuar arsyet objektive që kanë pamundësuar nënshkrimin e deritanishëm të marrëveshjes i legjitimon të gjitha veprimet e ndërmarra nga Lëvizja VETËVENDOSJE!, AAK dhe NISMA për Kosovën në kundërshtimin e kësaj marrëveshjeje.

Deklarata Thaçi – Vujanoviq është mashtrim. Lëvizja VETËVENDOSJE! dëshiron dhe synon marrëveshje të drejtë dhe të vërtetë me Malin e Zi. Ne angazhohemi për marrëdhënie sa më të mira me Malin e Zi me të cilin ndajmë përkushtimin për integrimin në BE dhe NATO.

Kuvendi i Republikës së Kosovës duhet urgjentisht të formojë Komisionin hetimor parlamentar ku do të shqyrtohet çështja e demarkacionit me Malin e Zi. Lëvizja VETËVENDOSJE! qysh sot fillon me mbledhjen e nënshkrimeve për këtë inciativë.

Lëvizja VETËVENDOSJE! ka mbajtur konferencën për media me rastin e 10 vjetorit të Pavarësisë së Kosovës me ç’rast deputeti i Parlamentit Rexhep Selimi foli për të arriturat dhe stagnimet e shtetit të Kosovës përgjatë këtyre 10 vjetve.

Selimi tha se Kosova këtë 10 vjetor po e feston me njohjen e rreth 115 vende të cilat kanë ardhur kryesisht në 2 vitet e para pas shpalljes së Pavrësisë. “Në këtë 10 vjetor kemi rreth 15 vende të cilat e kanë njohur Republikën e Kosovës, nuk po them rastësisht rreth 115 për shkak se jo rrallë herë është munduar ose është spekuluar me këta numra, sido që të jëtë kjo është një ndër arritjet e Republikës së Kosovës në këtë 10 vjecar” tha z.Selimi

“Në mungesë të arritjeve të tjera, si arritje kryesore duhet t’i përmendim medaljet e arta të Majlinda Kelmendit”, u shpreh ndër të tjera deputeti Selimi.

Po çfarë Kosova nuk bëri ose çfarë bëri gabim këto 10 vite është një listë më e gjatë sesa ajo e arritjeve.

Kosova në vend të përparimeve pati shumë stagnime. Ngecja e parë filloi atëherë kur pas shpalljes së Pavarësisë së Kosovës u rihapen negociatat me Serbinë dhe meqenëse Kosova ishte shpallur shtet i pavarur, sovran dhe demokratik këto negociata e kanë kontestuar pavarësinë. Si pasojë e bisedimeve me Serbinë janë arritur shumë marrëveshje dhe kësisoj, kemi ndarjen e Kosovës në baza etnike, ndarjen e Mitrovicës edhe zyrtarisht në Komunat veri dhe jug, kemi pasur edhe ndarjen e Policisë së Kosovës në baza etnike, kemi pasur pastaj një rënia drastike të dinamikes së njohjeve të Pavarësisë së Kosovës e të gjitha këto i solli rifillimi i negociatave me Serbinë.

Paralisht me këtë, jatë këtyre viteve ka ndodhur edhe një keqqeverisje, e cila ka shkaktuar korrupsion edhe krim të organizuar në Kosovë, pastaj kemi një rritje të papunësisë në shkallë alarmante, kemi shumë marrëveshje të dëmshme për Kosovën, siç janë marrëveshja për “Zajednicën” dhe marrëveshja për demarkacionin me Malin e Zi të cilat janë shumë të dëmshme për shtetin tonë.

Në fushën e dëmeve që i janë shkaktuar Kosovës gjatë këtyre 10 viteve gjithsesi është edhe Gjykata Speciale kundër UÇK-së, ndërsa në rrugën e integrimeve europiane Kosova ka stagnuar dhe nuk ka arritur të bëjë as hapin e vetëm drejt këtyre integrimeve.

Kosova dështoi edhe në antarësimin në UNESCO edhe në INTERPOL e mbi të gjitha kemi dështuar ta bëjmë ushtrinë e Kosovës edhe pas 10 vjetëve shtet jemi pa garantuesin e sovranitetit, ushtrinë e saj. Gjithashtu, mbesim vendi më i izoluar në Europë.

Pra pas gjithë këtyre stagnimeve për gjatë këtyre 10 viteve qytetarët e Kosovës nuk kanë se çfarë të festojnë dhe me cka të krenohen pos me dështimet dhe keq qeverisjen e vendit.

Në mbrëmjen e datës 13 shkurt, pasi ra terri, me urdhër të kryeministrit të Kosovës, Ramush Haradinajt, u angazhuan forca të shumta policore dhe njësi speciale për të hequr flamurin kombëtar shqiptar, i cili është ngritur me leje të rregullt nga Komuna e Prishtinës.

Arsyeja pse dhanë urdhër të hiqet flamuri kombëtar shqiptar i ngritur me leje, është që të ngrihet flamuri zyrtar i Kosovës, tek i cili nuk gjen as historinë tonë në përmbajtje dhe as demokracinë plebishitare në aprovim. Nuk zëvendësohet flamuri i kuq me shkabën e zezë dykrenare në mes me flamurin që për kritere dizajni kishte përjashtimin e të kuqes dhe të zezës.

Flamuri zyrtar i ka vendet e veta ku ngrihet siç parashikohet në ligj, po ashtu i ka vendet ku sipas protokollit ngrihet në raste festash. Por në asnjë ligj apo rregullore nuk parashikohet që të ngrihet flamuri zyrtar te rrethi “Idriz Seferi”, në hyrje të Prishtinës, as në përditshmëri e as në raste festash.

Ky aksion i ndërmarrë natën, ka si qëllim ndërtimin e të ashtuquajturit identitet kosovar në kurriz të identitetit tonë kombëtar shqiptar. Pikërisht për këtë arsye u ndërmor në terr, e me prezencë të lartë policore. Por në Kosovë secili që është përpjekur të ulë flamurin shqiptar për të ngritur flamuj të tjerë, ka dështuar. Ne shqiptarët jemi shumicë absolute në Kosovë, dhe nuk do të vonojë koha kur do të arrijmë të vendosim vetë për veten tonë, gjithnjë duke i respektuar të drejtat e komuniteteve të ndryshme e minoriteteve që jetojnë mes nesh e me ne.

Heqja e flamurit kuqezi është e turpshme, edhe pse faqet e atyre që japin e zbatojnë urdhra të tillë ka kohë që nuk skuqen. Është e turpshme, sepse flamuri kombëtar nuk e konteston pavarësinë e as sovranitetin e Kosovës. Te rrethi në Prishtinë Kosova ka sovranitet, nuk ka nevojë për aksione policore e në terr në atë vend. Po të ishte se shqetësohen për shtrirjen e sovranitetit të Kosovës qeveritarët, atëherë do të kërkonin ngritjen e flamurit në veri të Kosovës apo në enklavat që i kanë krijuar vetë, përmes decentralizimit etnik. Flamuri i Serbisë jo vetëm që po valon në Leposaviq, por edhe 5 km. larg rrethit të Prishtinës, në Graçanicë. Dhe jo thjesht në një hapësire publike, si rrethi, por në shtizën zyrtare të institucioneve komunale. Pavarësia e Kosovës kontestohet vetëm atje ku ngrihet e valon flamuri i Serbisë, i një vendi që pasi na mbajti afër një shekull nën pushtim mizor e shtypës, pasi na vrau e na preu me qëllim spastrimi, ende sot nuk na e njeh pavarësinë e nuk kërkon falje për krimet e bëra.

Ne e dimë se loja me flamujt po bëhet për të mbuluar dështimet katastrofale të kësaj qeverie e të qeverive paraardhëse, të cilat e kanë varfëruar Kosovën, ia kanë shkatërruar industritë përmes privatizimeve të egra, ia kanë vjedhur pasuritë nëntokësore përmes koncesioneve kriminale, ia kanë asgjësuar prodhimin vendor e bujqësinë përmes korporatave që importojnë nga Serbia. Janë këto qeveri që me korrupsionin e tyre e kanë izoluar Kosovën dhe na e kanë nxjerrë faqen e zezë në gjithë Evropën, ku mediat shkruajnë se ne qeverisemi nga kriminelë. Janë këta qeveritarë që e kanë çarmatosur UÇK-në e na kanë lënë pa ushtri, e kanë shitur idealin kombëtar e duan të na shkatërrojnë identitetin e historinë, gjithçka për të siguruar pushtetin e tyre. Asnjë lojë me flamur, natën apo ditën, nuk mund t’i mbulojë turpet e tyre.

Është krejt e gabueshme të tregohet fuqia e shtetësisë së Kosovës kundër flamurit kombëtar. Pavarësia erdhi si rezultat i sakrificës shekullore me flamurin kombëtar kundër shtetit serb.

E dënojmë heqjen e flamurit kombëtar shqiptar dhe përpjekjen për ta fshirë shqiptarizmën nga faqja e Kosovës. Kërkojmë nga ata që e hoqën, ta kthejnë sa më shpejt flamurin kombëtar aty ku ishte më përpara. Mbetemi të përkushtuar e të angazhuar që popullit tonë sa më shpejt t’ia sigurojmë mundësinë që të vendosë vetë, demokratikisht, për shtetin e vet, që nga simbolet, flamuri e himni, e deri tek e drejta për t’u bashkuar me Shqipërinë.

Delegacioni i Lëvizjes VETËVENDOSJE!, i përbërë nga Kryetari, Albin Kurti, Nënkryetarja, Fatmire Mulhaxha-Kollçaku, Kryetari i Grupit Parlamentar, Glauk Konjufca dhe Deputetja, Arbërie Nagavci, u takuan sot me Presidentin e Republikës së Sllovenisë, Borut Pahor, i cili ishte i shoqëruar nga Sekretari shtetëror në Ministrinë e Punëve të Jashtme, Iztok Mirošič, Ambasadori i Sllovenisë në Kosovë, Bojan Bertoncelj, Shefja e Kabinetit të Presidentit, Alja Brglez, si dhe këshilltarët, Ernest Petrič dhe Špela Vovk.

Në këtë takim miqësor u bisedua për situatën politike dhe ekonomike në Kosovë, të arriturat e shtetit të ri të Kosovës në vigjile të 10 vjetorit të shpalljes së pavarësisë, si dhe fushat në të cilat Kosova ka nevojë të koncentrojë përpjekjet për zhvillim.

Theks i veçantë ju dha edhe gjendjes e raporteve në rajonin e Ballkanit perëndimor, si dhe bashkëpunimit të ndërsjellë politik e ekonomik dhe integrimit të rajonit në struktura euro-atlantike. Marrëdhëniet në mes të Kosovës dhe Sllovenisë u cilësuan si shumë të mira dhe nga të dy palët u shpreh besimi se këto marrëdhënie mund e duhet të avansohen edhe më shumë.

Para delegatëve të Këshillit, kryetari i Lëvizjes Albin Kurti, mbajti fjalën hyrëse. Në këtë mbledhje Sekretariati për Financa raportoi për të hyrat dhe shpenzimet e Lëvizjes përgjatë tre mujorit të kaluar. Poashtu ushtruesi i detyrës së Sekretarit Organizativ, Ismajl Kurteshi, bëri një raportim lidhur me gjendjen organizative në Sekretaritat të Përgjithshëm dhe në Qendrat e Lëvizjes duke treguar kështu për hapat e ndërmarrë dhe ndryshimet e bëra në përgjithësi.

Këshilli i Përgjithshëm poashtu mori vendim për praninimin e dorëheqjeve nga Kryesia e Lëvizjes, dhe bëri plotësimin me 5 anëtarë të rinj që u votuan sot në mesin e 13 propozimeve për kandidatë.

Pesë anetarët e rinj, prej të cilëve 3 gra e 2 burra, të Kryesisë së Lëvizjes VETËVENDOSJE!, të zgjedhur përmes votimit të fshehtë , me shumicë votash në mesin e 13 propozimeve janë:

Mytaher Haskuka
Fitore Pacolli
Arben Vitia
Vlora Haxhimehmedi
Tinka Kurti

Lëvizja VETËVENDOSJE!, përshëndet votimin e rekomandimeve nga ana e Kuvendit të Republikës së Kosovës për aktivistët që padrejtësisht po mbahen në burg dhe janë dënuar me mbi 21 vjet padrejtësisht e politikisht, pa asnjë fakt dhe vetëm në bazë të indicieve dhe paragjykimeve e insinuatave.

Kërkesa për debat parlamentar, debati dhe votimi i rekomandimeve, janë në përputhje të plotë me Rregulloren e Punës së Kuvendit e po ashtu me praktikat parlamentare. Ne kërkojmë nga Ministria e Drejtësisë, që të respektojë vullnetin e Kuvendit të Republikës së Kosovës pra të mos ndërhyjë në punën e Kuvendit por t’i kryejë me përgjegjësi detyrat që ia ngarkon ligji dhe Kushtetuta.

Ne e thërrasim Këshillin Gjyqësor të Kosovës që me seriozitet e përkushtim të kryejë mandatin e tij kushtetues. I njëjti në vend të reagimeve të pabaza, do të duhej të mos lejonte degradimin e sistemit të drejtësisë, si pasojë e së cilit, aktivistëve politik u montohen raste kriminale.

Sipas Kushtetutës dhe legjislacionit në fuqi, Këshilli Gjyqësor e ka për detyrë të kujdeset që palëve në procedurë të mos u shkilen të drejtat dhe duhet të kujdeset që gjyqtarët të veprojnë në përputhje me legjislacionin në fuqi dhe jo të dënojnë qytetarët e Republikës së Kosovës për shkak të bindjeve të tyre politike. Aktgjykimi i cili i shpallë aktivistët tanë terroristë, duhet të jetë alarmi i fundit për zgjim të këtij institucioni.

KGJK të angazhohet për ngritjen profesionale të gjyqtarëve, për pavarësimin e gjyqësori nga kapja totale nga politika, për pastrimin e gjyqësorit nga elementët e kriminalizuar brenda gjyqësorit dhe rritjen e përgjegjësisë në gjyqësor si dhe respektimin e kushtetutës dhe të ligjeve ne fuqi.

Ndërsa MD të respektojë vendimet e Kuvendit, të zbatojë Kushtetutën dhe ligjet në fuqi, si dhe të angazhohet sipas detyrimit kushtetues për krijimin e klimës për një shtet të mirëfilltë të së drejtës ligjore, si dhe për ligjshmërinë në Republikën e Kosovës.

Ne do të angazhohemi, ditëve në vijim, që rekomandimet e Kuvendit të jetësohen.

Në vijim gjeni rekomandimet e miratuara sot në Kuvendin e Republikës së Kosovës

1.Për rastin e sulmit në ndërtesën e Kuvendit të Republikës së Kosovës më 4 Gusht 2016, të kërkohet dhe të mundësohet një hetim i plotë, i pavarur ndërkombëtar i tërë rastit, nga ndonjëri nga vendet perëndimore të BE, përfshirë vendet neutrale të Evropës Perëndimore dhe Zvicrën, përjashtuar rastin e Astrit Deharit që do të hetohet veçmas.

2. Të hetohen dhe të gjenden përgjegjësit në hierarkinë e lartë të Policisë së Kosovës, të involvuar për inskenimin e sulmit në ndërtesën e Kuvendit më 4 gusht 2016 dhe për përndjekjen kriminale të aktivistëve të Lëvizjes VETËVENDOSJE! për këtë rast.

3. Të hetohen dhe të merren në përgjegjësi ligjore të gjithë personat përgjegjës në hierarkinë shtetërore, për përndjekjen e aktivistëve të Lëvizjes VETËVENDOSJE!.

Strategjia e Komisionit Evropian e titulluar “Një perspektivë e besueshme zgjerimi për rritjen e angazhimit të BE-së me Ballkanin Perëndimor” shërben për të kuptuar rrugën që po cakton BE-ja për integrimin evropian për secilin prej gjashtë shteve të Ballkanit Perëndimor. Strategjia është dokument i rëndësishëm pasi që perspektiva për anëtarësimin e vendeve të Ballkanit Perëndimor, e cila është trajtuar që në vitin 2000, dhe është përforcuar në vitin 2003 në Samitin e Selanikut, po rikthehet sërish në vëmendjen e BE-së.

Lëvizja VETËVENDOSJE! e ka analizuar me kujdes këtë strategji e cila ka një qasje më të përgjithshme për rajonin, pasi pritet që raporti vlerësues për secilin prej gjashtë shteteve të bëhet në prill të këtij viti. Duke qenë se qasja e kësaj strategjie është rajonale, ia vlen që të vlerësohet së pari nga ky këndvështrim, duke patur në mendje avancimin e interesave tona shtetërore dhe kombëtare.

Në shkurt të vitit 2011, në prag të fillimit të dialogut me Serbinë qeveria e Kosovës, për të arsyetuar këtë dialog të dëmshëm për vendin pati deklaruar se rruga drejt integrimit evropian është përmes këtij dialogu. Tani pas shtatë viteve u kuptua se përmes dialogut pa kushte, përveç koncesioneve të dëmshme nuk pati hapa pozitivë për Kosovën drejt integrimit evropian. Përmes dialogut Kosova ia hapi rrugën Serbisë drejt integrimit në Bashkimin Evropian, ndërsa neve na u shtua fusnota e u hoq fjala Republikë, duke mos pasur kështu rrugë nëpër të cilën do të ecnim në cilësinë e shtetit.

Shumë zyrtarë të Republikës së Kosovës e paraqesin nënshkrimin e Marrëveshjes së Stabilizim Asociimit si përparim në rrugën e integrimit. Por duhet thënë qartë që sado që është për t’u vlerësuar ajo marrëveshje, edhe vende që nuk gjenden në kontinent apo që nuk duan të hyjnë në BE kanë tashmë marrëveshje të tilla.

Te strategjia në të cilën përmendet normalizimi i marrëdhënieve të Kosovës me Serbinë theksohet se “Kosova do të përfitoj nga një marrëveshje definitive për normalizimin e marrëdhënieve me Serbinë”, por nuk thuhet se çka do të përfitojmë. Nuk përmendet mundësia e anëtarësimit madje as mundësia për të aplikuar për statusin kandidat, edhe nëse arrihet marrëveshja. Por, në rastin e Serbisë, si kusht për integrim përmendet tre herë normalizimi i marrëdhënieve me Kosovën, dhe atë me hapa konkretë që duhet të ndjekë.

Sërish në asnjë rast nuk shpjegohet çfarë nënkupton fjala “normalizim” marrëdhëniesh me Serbinë, dhe kërkohet vazhdim i dialogut pa asnjë objektiv të shprehur qartë lidhur me njohjen e pavarësisë që Serbia duhet të bëjë ndaj Republikës së Kosovës. Ndërkohë që ndaj Serbisë nuk vendoset ky kusht, ndaj Kosovës shtohet kushti i Gjykatës Speciale, një Gjykatë e paprecedentë në këto dy shekuj, që e kthen përmbys konceptin e drejtësisë. Kosova pra përmendet edhe dy herë të tjera, por për obligimet që ka në raport me Dhomat e specializuara (Gjykata Speciale).

Lëvizja VETËVENDOSJE! vlerëson se kjo strategji në një aspekt flet për një bashkëpunim më të ngushtë dhe unifikim të shumë sektorëve mes gjashtë shteteve të Ballkanit. Por në aspektin tjetër, strategjia i vendos këto shtete në një konkurrencë të pabarabartë me njëri-tjetrin, e cila i mbyll sytë para problemeve që ka shkaktuar e vazhdon të shkaktojë Serbia në rajon. Në strategji flitet për avancimin e përbashkët të të gjithë rajonit në procese si ai i Berlinit, në një bashkëpunim të gjithë rajonit sa i përket energjisë dhe transportit, në funksionalizimin e një Zone Rajonale Ekonomike, në forcimin e Këshillit për Bashkëpunim Rajonal, në një bashkëpunim rajonal në çështjet e migracionit, sigurisë, luftës kundër terrorizmit, etj. Të gjitha këto janë elemente që në pamje të parë të bëjnë të mendosh se Komisioni Evropian ka për synim integrimin në bllok të të gjashtë shteteve në BE. Por, duke lexuar strategjinë dhe duke ndjekur deklaratat e zyrtarëve të lartë të BE-së, bëhet e qartë për të gjithë se gjashtë shtetet e rajonit janë ndarë në 4 kategori.

Në kategorinë e parë BE-ja ka vendosur Serbinë dhe Malin e Zi, dhe për këto dy shtete Komisioni tregon se është i gatshëm të nisë të hapë dyert për anëtarësim të plotë që në vitin 2025.

Në kategorinë e dytë Komisioni ka vendosur Republikën e Shqipërisë dhe Ish Republikën Jugosllave të Maqedonisë. Për këto dy shtete nuk ka data orientuese për anëtarësim të plotë, por mund të ketë rekomandim këtë vit për të qenë shtete kandidate.

Në kategorinë e tretë, strategjia ka vendosur Bosnje Hercegovinën, për të cilën jo vetëm nuk ka data orientuese për anëtarësim të plotë, por nuk i është dhënë as datë orientuese për të qenë shtet kandidat.

Në kategorinë e katërt dhe të fundit, BE-ja ka vendosur Kosovën, duke përdorur fusnotën që vazhdon ta trajtojë me ambiguitet shpalljen e pavarësisë tonë. Sa i takon Kosovës, strategjia e Komisionit jo vetëm që nuk jep orientim për datë anëtarësimi, apo për të qenë vend kandidat për anëtarësim, por nuk jep as edhe një sinjal që diçka e tillë do të jetë e mundshme pa tejkaluar pengesat që Komisioni i quan pa të drejtë si “objektive”.

Pra në dy kategoritë e fundit që ka krijuar kjo strategji e Komisionit, janë vendosur dy shtetet që kanë pësuar e vazhdojnë të pësojnë padrejtësitë më të mëdha në rajon nga Serbia, përmes pengesave të Serbisë që nuk janë aspak objektive, por që janë plan konkret politik dhe ekonomik destabilizues i Serbisë për shtetet e rajonit. Sakaq, gjithnjë sipas kësaj strategjie, duket se Komisioni vlerëson se ky shtet destabilizues – Serbia – i prin integrimit evropian në Ballkan.

Kjo qasje e BE-së ndaj Ballkanit Perëndimor është një sinjal shumë i qartë për Kosovën dhe shqiptarët në përgjithësi. Ne duhet të ideojmë dhe strukturojmë një politikë të brendshme e rajonale, të Kosovës e të Shqipërisë, për të vendosur peshën që kemi dhe për të realizuar qëllimet ku duam të jemi, në Ballkanin Perëndimor e drejt BE-së.

Lëvizja VETËVENDOSJE! ka theksuar dhe më herët se duhet sa më parë të fillojë dialogu me të gjitha pakicat kombëtare në Kosovë, që do të jetë edhe dialog me serbët e Kosovës, dialog i hapur, demokratik dhe shoqëror, prej poshtë-lart, për zhvillim. Dialogu 2011-2017 me Serbinë ishte dialog i mbyllur e diplomatik, prej lart-poshtë, pa transparencë dhe pa llogaridhënie. Përmes këtij dialogu të gjithë do të shihen si qytetarë të Republikës, në profesionet që i kanë e shtresat shoqërore që u përkasin. Kështu ndërtohet besimi dhe largohet frika e cila është mbjellë për të ndarë e përçarë. Pakicat kombëtare duhet t’i gëzojnë të gjitha të drejtat e tyre sipas standardeve të vendeve anëtare të Bashkimit Evropian. Por, shumica e problemeve në Republikën tonë janë ekonomike e sociale. Drejt BE-së përparojmë duke ndërtuar vlerat në shtetin tonë. Konsolidimi i brendshëm është edhe i duhur edhe i domosdoshëm. Qeveritarët e Kosovës duhet të pushojnë së kërkuari udhën drejt Brukselit nëpërmjet Vuçiqit e Beogradit.

Shtetndërtimi demokratik, zhvillimi ekonomik për punësim, drejtësia ligjore dhe sociale e përbëjnë Republikën dhe e bëjnë atë evropiane.

Është e vërtetë që strategjia e BE-së njeh më në fund zyrtarisht kapjen e shtetit që ka ndodhur në rajon e veçanërisht në Kosovë. Duke treguar kështu për atë që e kemi quajtur regjim autoritar të instaluar në Kosovë. Më tej strategjia prek edhe kapjen e sistemit të drejtësisë dhe të mediave, si dhe krimin e organizuar e korrupsionin, dhe dobësimin e interesave publike përmes kapjes nga interesat private, që janë krijuar sigurisht përmes lidhjes së pushtetit politik më atë ekonomik oligarkik.

Ndërsa sa i përket ekonomisë, mund të thuhet se kjo strategji e sheh rajonin në përgjithësi, e shqiptarët dhe Kosovën në veçanti, më shumë si treg konsumi prej 18 milionë konsumatorësh, sesa si ekonomi prodhuese. Bilanci negativ tregtar i rajonit me BE-në bëhet ekstrem tek rasti i Kosovës, aty raporti bëhet 12 (importe) me 1 (eksporte). Një bilanc kaq negativ tregtar jo vetëm që e shkatërron potencialin e ekonomisë prodhuese vendase, por edhe e thellon këtë problem nëse nuk parashihen masa mbrojtëse për prodhimin vendas të Kosovës, duke rritur kështu edhe më tëj papunësinë tek të gjitha shtresat e shoqërisë. Për më shumë, nënteksti i kësaj strategjie në lidhje me vazhdimin e proceseve të privatizimit, nuk merr aspak parasysh nevojën për hetimin dhe marrjen e masave ndaj privatizimeve abuzive që tashmë kanë ndodhur në Kosovë e në gjithë rajonin. Por, në sektorë të tjerë, ia vlen të përmendet se rritja e asistencës financiare që nënkupton kjo strategji për shëndetësinë, arsimin dhe mbrojtjen sociale, duhet konsideruar me optimizëm dhe duhet vlerësuar në bazë të zbërthimit të kësaj asistence për Kosovën dhe shtetet e tjera të rajonit sipas nevojave prioritare të secilit shtet.

Për fund, ia vlen gjithashtu të përmendet se propozimi për përfshirjen e shteteve të Ballkanit Perëndimor në komitetet teknike dhe grupet e punës së Komisionit Evropian është një hap pozitiv për gjithë rajonin.

7 shkurt 2018,
Lëvizja VETEVENDOSJE!

Në selinë qendrore të Lëvizjes VETËVENDOSJE! në Prishtinë, sot, kryetari i VETËVENDOSJE!-s, Albin Kurti, së bashku me kryetarin e Grupit Parlamentar, Glauk Konjufca, pritën në takim ambasadorin e Mbretërisë së Bashkuar në Kosovë, Ruairi O’Connell.

Në takim u diskutua për situatën e përgjithshme në vend me theks të veçantë për zhvillimet e fundit politike e institucionale. Kurti e Konjufca e njoftuan ambasadorin O’Connell me qëndrimet dhe idetë e Lëvizjes VETËVENDOSJE! për daljen nga kriza në të cilën ndodhet Kosova. Vëmendje e veçantë iu kushtua nevojës për reformën në drejtësi si parakusht për luftimin e suksesshëm të korrupsionit dhe krimit.

Të dy palët potencuan rëndësinë e marrëdhënieve sa më të mira e bashkëpunimit sa më të ngushtë mes Republikës së Kosovës dhe Mbretërisë së Bashkuar si dhe për kontakte e takime të vazhdueshme në të ardhmen.

Sot, në Prishtinë, kryetari i Lëvizjes VETËVENDOSJE!, Albin Kurti, dhe kryetari i Grupit Parlamentar të Lëvizjes VETËVENDOSJE!, Glauk Konjufca, takuan shefen e Zyres së BE-së në Kosovë, znj. Nataliya Apostolova.

Në këtë takim u diskutua për zhvillimet politike në institucionet e Kosovës, për gjendjen socio-ekonomike në vend dhe për sfidat e shtetndërtimit dhe integrimit. Kurti dhe Konjufca shprehën qëndrimet e VETËVENDOSJE!-s për shtet të së drejtës dhe vizion ekonomik të përqendruar në punësim. Të dy palët u pajtuan për rëndësinë e reformave për integrimin e Kosovës në BE gjë që do të rriste si rregullsinë dhe ligjëshmërinë, po ashtu edhe bashkëpunimin ekonomik e shoqëror.

Lëvizja VETËVENDOSJE! nëpërmjet një konference ka ripërsëritur qëndrimin e saj për demarkacionin si dhe ka mbështetur Raportin e hartuar nga Komisioni i ri qeveritar i drejtuar nga Shpejtim Bulliqi. Në këtë konferencë në të cilën folën deputetët Ali Lajçi dhe Arbërie Nagavci, po ashtu u kërkua që personat e përfshirë në marrëveshjen e 26 gushtit 2015, të hetohen nga Prokuroria.

Duke qenë se raporti i hartuar nga Komisioni që udhëhiqet nga z. Bulliqi ka nxjerrë konkluzionin që thotë: “Si rezultat i të gjitha këtyre të gjeturave në punën e ish – Komisionit për Shënjimin dhe Mirëmbajtjen e Kufirit Shtetëror, Komisioni ynë konstaton se: vija kufitare në Marrëveshjen për Kufirin Shtetëror ndërmjet Republikës së Kosovës dhe Malit të Zi (Vjenë, 26 gusht 2015), nuk është në përputhje me vijën administrative kufitare të ish – Krahinës Socialiste Autonome të Kosovës “, marrëveshja e pretenduar për shënimin e vijës kufitare nuk duhej të vinte fare në Kuvend.

Ajo marrëveshje, përmbajtja e saj, personat e përfshirë në atë komision, si dhe përfaqësuesit politikë, pra nënshkruesit e asaj marrëveshjeje me 26 gusht 2016 në Vjenë aktualisht duhet të ishin para një procesi gjyqësor për cenimin e tërësisë territoriale të Republikës së Kosovës. Në këto kushte ne i bëjmë thirrje prokurorit të Përgjithshëm të Republikës së Kosovës që të nisë sa më parë hetimet për këtë rast tejet të rëndë dhe të paprecedentë.

Po ashtu i bëjmë thirrje Kryesisë së Kuvendit, anëtarëve të saj, veçanërisht atyre që vijnë nga ish – qeveria që jashtëligjshëm në të kaluar e kanë mbështetur marrëveshjen e 2015 të mos përfshihen më tej në këtë rast flagrant të cenimit territorial te Kosovës.

Komisioni Qeveritar i drejtuar nga prof. Shpejtim Bulliqi ka dhënë material të mjaftueshëm për të vërtetuar shqetësimet e dyshimet e bazuara të qytetarëve anekënd Kosovës përgjatë vitit 2015-2016 si dhe deputeteve që e kundërshtuan atëbotë.

Po ashtu, është e pakuptueshme se si një kryeministër edhe pas konkluzioneve të këtij raporti e sjell ne Kuvend në vend se ta dorëzojë në Prokurori këtë raport dhe të gjeturat e tij.

Ne dhe njëherë përsërisim, ne jemi për shënimin e vijës kufitare me Malin e Zi, shtet mik i Kosovës, por nuk jemi për të cenuar asnjë centimetër te territorit të vendit tonë.

Shënimet e sakta janë, vlerësimi i saktë po ashtu nga ekspertet ekziston, qeveria duhet të kryejë detyrën dhe te fillojë bisedimet me Malin e Zi për ta korrigjuar atë çfarë ka ndodhur.

Lëvizja VETËVENDOSJE! ka mbajtur një konferencë në lidhje me vendimin e paligjshëm për ngritjen e pagave. Në këtë konferencë, deputetja Albulena Haxhiu rikujtoi se më 20 dhjetor të vitit që sapo lamë pas, në mbledhjen e Qeverisë, me anë të një vendimi sa të kundërligjshëm, kryeministri dhe ministrat ia rritën pagat vetes afër 100 përqind. Ndërkohë kjo Qeveri rriti pagat me vetëm 4 përqind për të punësuarit dhe refuzoi propozimin e Këshilli Ekonomik social që paga minimale nga 170 euro, të ngrihet në 250 euro.

Vendimin e paligjshëm për ngritjen e pagave, një ditë pas, e kemi dërguar në Agjencinë Kundër Korrupsionit, pasi që kabineti qeveritar nuk kishte shmangur konfliktin e interesit siç e parasheh ligji për parandalimin e konfliktit të interesit, madje duke votuar për t’i sjellë vetes përfitime kishin konsumuar vepër penale të konfliktit të interesit.

Agjencia Kundër Korrupsionit, të premten e kaluar kishte dhënë opinionin e tij se vendimi në fjalë është i kundërligjshëm dhe ne i bëjmë thirrje këtij institucioni të procedojë kallëzimet penale sa më parë.

Po ashtu, vendimin në fjalë e kemi dërguar edhe në Gjykatën Kushtetuese.

Ky vendim përpos që është vepër penale, është edhe kundërkushtetues pasi që ka ndërhyrë në kompetencat e Kuvendit. I vetmi autoritet legjitim për të ngritur pagat është Kuvendi, përmes ligjit për buxhetin dhe ligjin për pagat.

Por po ashtu ky vendim është kundërkushtetues sepse është në shpërputhje me gjendjen sociale dhe ekonomike.

Po ashtu, të hënën në mbledhjen e kryesisë së Kuvendit, si pikë e rendit të ditës është interpelanca e thirrur nga grupi ynë parlamentar lidhur me vendimin për rritjen e pagave të zyrtarëve të lartë dhe çështjet që lidhen me pagën minimale dhe lartësinë e pagesës për skemën sociale.

Ne presim që sa më parë kryesia e kuvendit ta caktojë seancën ku mbahet interpelanca e kërkuar nga ne. Shumëkush sot në Kosovë pret prej institucioneve që të adresojë problemet e tyre të paadresuara prej të paktën dy dekadave.

Qeveria nuk kishte plan të qartë kur propozoi buxhetin për vitin 2018 sa i takon shtresave me nevoja më të mëdha. Ndaj vendimet ad hoc dhe për interes të vetëm një shtrese zyrtarësh tregojnë për improvizime larg shumë nga ndonjë program zhvillimor.

Vendimi i kundërligjshëm i Qeverisë Haradinaj, nuk do të duhej të pezullohej por të shfuqizohej. Deklarimet e Haradinajt se nga ky vendim do të preken gjyqtarët e prokurorët, nuk është i sinqertë. Buxheti për vitin 2018 është miratuar në dhjetor të vitit të kaluar shtrohet pyetja se nëse qeveria Haradinaj paska qenë e interesuar të rrisë pagat e prokurorëve dhe gjyqtarëve atëherë pse këtë rritje nuk e paraqiti në mënyrë krejt të ligjshme nëpërmjet ligjit për buxhetin i cili kaloi pak ditë para se të votohej ky vendim në Qeveri?

Sa i përket kësaj çështje, ne nuk e kundërshtojmë rritjen e pagave për gjyqtarët dhe prokurorët. Aktualisht paga e prokurorit është 1000 euro ndërsa paga e gjyqtarit 1200 kjo shkon duke u ngritur për Apelin dhe Supremen dhe Prokurorinë speciale. Ata që kanë nevojë për ngritjen e pagave janë stafi civil i institucioneve të drejtësisë të cilët kanë paga nën 400 euro.

Sipas informacioneve që i kemi, në kohën kur është marrë ky vendim i kundërligjshëm, qeveria Haradinaj nuk ka qenë në dijeni që me automatizëm do të ngrihen pagat e prokurorëve dhe gjyqtarëve. Këtë pohim timin e mbështes duke ia shtuar këtu deklaratat skandaloze të kryeministrit Haradinaj kur u pyet për rritjen e pagës, të njëjtën e arsyetoi me nevojën e blerjes së këmishave dhe kollareve dhe tha që një kryeministër që se ka pagën e lartë do të detyrohet të korruptohet, në atë kohë s’foli për prokurorët dhe gjyqtarët!

Çka mendon kjo qeveri për mjekët që paguhen rreth 600 euro, për mësuesit, për inxhinierët, për punëtorët kudo në sistemin publik të cilët as kanë vetura zyrtare, as beneficionet e zyrtarëve të lartë e as sigurim shëndetësor.

Kjo qeveri e nisi punën me caktimin e një numri tepër të lartë të ministrave. E vijoi duke caktuar një numër rekord zëvendësmsministrash dhe e mbështeti këtë politikë krejtësisht të gabuar me vendimin për rritjen e pagave pikërisht të këtij numri të madh zyrtarësh.

Sot në mëngjes, Ambasadori i Zvicrës, z. Jean-Hubert Lebet, vizitoi Lëvizjen VETËVENDOSJE!. Ai u prit nga Kryetari i Lëvizjes VETËVENDOSJE!, z. Albin Kurti, nënkryetarja e VETËVENDOSJE!-s, znj. Fatmire Mulhaxha-Kollçaku, dhe deputetja e Kuvendit të Republikës, znj. Fitore Pacolli.

Në takim u bisedua për situatën e përgjithshme në vend me theks të veçantë për zhvillimet e fundit politike. Po ashtu u diskutua edhe për rëndësinë e bashkëpunimit mes Kosovës dhe Zvicrës si dhe mundësitë për ta thelluar e zgjeruar këtë bashkëpunim në interes të ndërsjelltë. Kryetari Albin Kurti e njoftoi ambasadorin Lebet me qëndrimet, sfidat dhe vizionin e Lëvizjes VETËVENDOSJE!.

Në fund të këtij takimi të dyja palët u dakorduan për vazhdimin e komunikimit dhe të takimeve të rregullta.

Grupi Parlamentar i Lëvzjes VETËVENDOSJE!, në ambientet e Kuvendit të Republikës kanë mbajtur një tryezë me temën “Dhomat e specializuara” dhe raporti me institucionet e Republikës së Kosovës”.

Kryetarja e Komisionit për Legjislacion, deputetja Albulena Haxhiu tregoi argumentet në kundërshtim të Gjykatës Speciale qysh më 26 gusht 2015, kur kjo çështje ishte në Kuvend për herë të parë. “Argumentet tona kanë qenë të natyrës juridike dhe politike. Kemi konsideruar që Gjykata Speciale krijonte një sistem paralel, i tërë stafi i saj ishin përfaqësues ndërkombëtar, poashtu ku institucion ishte politik pasi qëllimi i tij ishte paraqitja e një pasqyre të shtrembëruar për luftën çlirimtare të Kosovës. Ne kemi propozuar një gjykatë vendore e cila do të trajtonte të gjitha krimet e kryera përgjatë luftës në Kosovë. Përkundër këtyre argumenteve, Gjykata Speciale dhe Dhomat e Specializuara kishin kaluar në votimin e dytë pas një muaji në Kuvend.

Ndërkaq nismën e fundit për shfuqizimin e Dhomave të Specializuara e quajti joserioze, prandaj edhe nuk e kemi mbështetur projektligjin e tillë.

Drejtuesi i Grupit parlamentar të Lëvizjes, Glauk Konjufca, foli për origjinën e kësaj gjykate. Ai përmendi të gjitha fazat nëpër të cilat kaloi krijimi i saj. Iniciativa për themelimin e një gjykate që merret me krimet e luftës i ka fillet tek libri i Kryeprokurores së Tribunalit të Hagës, Carla del Ponte, “Gjahu: unë dhe kriminët e Luftës” të botuar pak pas shpalljes së pavarësisë së Kosovës. Ndërkaq, në Këshillin e Evropës, nëpërmjet përfaqësuesit të Federatës ruse, Konstandin Kosaqev, në prillin e vitit 2008 kishte kërkuar mocion për këtë. Mocioni i bazuar në pretendimet e Carla del Pontes, i përkrahur edhe nga 17 deputetë të tjerë, quhej: “Trajtimi çnjerëzor i njerëzve dhe trafikimi i paligjshëm i organeve në Kosovë”. Konjufca u shpreh se tentimi për krijimin e kësaj gjykate, është luftë kundër Kosovës sepse është në kuadër të goditjeve të Serbisë dhe Rusisë kundër pavarësië së Kosovës. Tutje, ai rikujtoi se Këshilli i Evropës si përgjigje ndaj këtij mocioni e kishte caktuar një grup i cili duhej të konstatonte nëse janë të vërteta këto pretendime dhe përgjegjës për këtë u caktua senatori Dick Marty. Raporti i tij shndërrohet në rezolutë për asamblenë pasi fitoi me shumicë votash. Më pas, Marty nëpërmjet mediave kishte kërkuar që pretendimet e tij të përcilleshin me një gjykatë.

Konjufca solli në vëmendje bazën ligjore mbi të cilën u ngrit Gjykata Speciale në Kosovë, letërkëmbimin Jahjaga – Ashton dhe marrëveshjen ndërkombëtare të ratifikuar në Kuvendin e Kosovës bazuar në këtë letërkëmbim, si dhe raportin e kryeprokurorit amerikan, Clint Ëilliamson. Ky i fundit, trafikimin e organeve që përbën pretendimin kryesor për Mayrtin dhe Del Ponten e trajton si pertendim të pambështetur. Ndërkaq, fokusi kryesor i Ëilliamsonit është trajtimi çnjerëzor për të cilin ai insiston se ka ndodhur. Pas raportit të Ëilliamsonit, fillon edhe presioni ndërkombëtar për krijimin e një gjykate speciale.

Në debatin e kësaj tryeze u përfshinë shumë prej të pranishmëve. Profesori Azem Hajdari e quajti krijimin e kësaj Gjykate si një të keqe për historinë dhe popullin e Kosovës. Aktivisti i shoqërisë civile, Krenar Shala tha se temat e tilla të mëdha për Kosovën, po na lënë mbrapa për të mos u marrë me çështje të tjera më esenciale për jetën e qytetarëve. Artan Murati, hulumtues i lartë, nga KDI tha se për çështje të kësaj rëndësie do të duhej të kishte koncensus më të gjerë shoqëror dhe vendimet e tilla të mos merreshin pa debate më gjithëpërfshirëse. Ndërkaq, Luljeta Aliu tha se kjo iniciativë është në dëm të imazhit të Kosovës dhe do të duhej të reagonim me kohë.

Drejtuesja e Sekretariatit të Gruas Aktiviste në Lëvizjen VETËVENDOSJE! Nazlie Bala tregoi për përvojën e saj si dëshmitarë në Tribunalin e Hagës dhe tha vlerësimin e saj sa i përket gjykimeve ndërkombëtare. Pavarësisht gjykimeve të zhvilluara, ajo tha se shumë prej kriminelëve vazhdojnë të lëvizin lirshëm sot përderisa vlerësohet se pjesëmarrja direkte dhe indirekte e ushtarëve dhe formacioneve të tjera policore ka qenë 100 mijë. Profesori Mazllum Baraliu ritheksoi se nuk mund të thuhet se po formohet në kuadër të sistemit të drejtësisë në Kosovë se nuk ka asgjë të përshkët me të.

Rreze Hoxha nga Grupi për studime politike dhe juridike tha se shfuqizimi i Dhomave të Specializuara nuk është vetëm problem vendor, por edhe ndërkombëtar. Nga e njëjta organizatë, Albana Merja, theksoi se fokusi te kjo temë për qëllime personale të disa individëve e dëmton imazhin e Kosovës. Ndërkaq, Arton Demhasaj nga ÇOHU! tha se dëmi është shkaktuar me t’u pranuar kjo Gjykatë për themelim. Poashtu, ai theksoi edhe kundërshtimet e ligjit në raport me Kushtetutën.

Kurse, Kryetari i Lëvizjes, Albin Kurti tha se “Gjykata Speciale konsiston në një histori të re politike për Kosovën. Historia politike është parashikim is ë kaluarës. Gjykata Speciale me procedurat dhe në fund vendimet e saj do të parashikojë ndryshe të kaluarën e do ta na shkruajë ndryshe edhe historinë”.

Juristi Getoar Mjeku tha se edhe bizneset ndërkombëtare po ndjehen të pasigurtë të vijnë këtu, për shkak të mungesës së sigurisë juridike. Në emër të Këshillit për mbrojtjen e të Drejtave të ish ushtarëve të UÇK-së, foli Xhevdet Qeriqi i cili tha se kjo është gjykatë e paderjtë, e njëanshme dhe politike dhe nuk i zbardh krimet e Serbisë të kryera në Kosovë. Kurse sindikalisti Tahir Tahiri u shpreh se kjo po bëhet pengesë për zhvillim ekomonik.

Në fund të kësaj tryeze, drejtuesi i Grupit Parlamentar të Lëvizjes VETËVENDOSJE!, Glauk Konjufca paraqiti konkluzionet e kësaj tryeze të cilat Lëvizja VETËVENDOSJE! do t’i ketë parasysh në veprimet e qëndrimet e saj në vijim.

Lëvizja VETËVENDOSJE!

31 janar 2018

Sot në mëngjes, Ambasadori i Republikës së Sllovenisë, z. Bojan Bertoncelj, vizitoi Lëvizjen VETËVENDOSJE!. Ai u prit nga Kryetari i Lëvizjes VETËVENDOSJE!, z. Albin Kurti, nënkryetarja e VETËVENDOSJE!-s, znj. Fatmire Kollçaku-Mulhaxha, dhe deputetja e Kuvendit të Republikës, znj. Fitore Pacolli.

Në fillim të vizitës ambasadori uroi Kryetarin e Lëvizjes VETËVENDOSJE!, z. Albin Kurti, për zgjedhjen e tij në drejtimin e Lëvizjes si dhe shprehu interesim të njoftohet dhe të kuptoj nga afër për strategjinë dhe politikat që do të ndjek gjatë udhëheqjes së tij.

Në takim u diskutua edhe për situatën politike dhe gjendjen socio-ekonomike në vend. Theks i veçantë në takim iu kushtua gjendjes së rëndë ekonomike dhe paligjshmërisë si dhe hapave që duhet të ndërmirren për të stimuluar zhvillimin ekonomik për krijimin e vendeve të punës dhe reformën e sistemit të drejtësisë për sundim të ligjit.

Lëvizja VETËVENDOSJE! nëpërmjet deputetes Albulena Haxhiu dhe deputetëve nënshkrues dorëzoi sot kërkesën për Interpelancë për Kryeministrin Haradinaj, lidhur me vendimin për rritjen e pagave të zyrtarëve të lartë, pagën minimale dhe pagesat e skemës sociale.

Presim nga Kryesia e Kuvendit që sa më parë dhe me prioritet të lartë ta caktojë në rendin e ditës këtë kërkesë tonën për shkak të rëndësi së madhe të kësaj teme dhe shqetësimit po ashtu të madh nga qytetarët e të gjitha grupimeve shoqërore.

Grupi ynë do ta dërgojë po ashtu në Gjykatë Kushtetuese vendimin joligjor dhe të padrejtë të Qeverisë së Republikës së Kosovës për rritjen e pagave të zyrtarë të lartë politikë.

Një delegacion gjerman vizitoi sot Lëvizjen VETËVENDOSJE!. Në mes tyre ishin dhe z.Bernd Karwise, z.Heinz Stoppe, Dr. Roland Griese, z.Wolfang Kruger. Ata u pritën nga Kryetari i Lëvizjes VETËVENDOSJE!, z.Albin Kurti, deputeti z.Sami Kurteshi dhe Kordinatorja e Komiteteve profesionale, znj.Dejona Mihali.

Gjatë takimit i njoftuam pjesëtarët e delegacionit për programin tonë që përfshin tri reformat për shtetin zhvillimor (Fondi Sovran, Agjencia e Zhvillimit, Banka Zhvillimore) që do ta nxirrnin nga kriza Republikën e Kosovës duke rritur punësimin.

Nga ana e tyre delegacioni gjerman i shoqëruar edhe nga profesionistë shqiptarë si z.Blerim Dervari dhe z. Hashim Rexhepi, shprehën interesimin e veçantë për të njohur dhe kuptuar në hollësi hapësirat e bashkëpunimit në sektorët strategjikë dhe gjendjen aktuale të ekonomisë në Kosovë.

Të dy palët u pajtuan se bashkëpunimi në të gjitha nivelet, institucional, universitar e atë të zhvillimit të prodhimit e teknologjisë ishin i shumëpritur e në një masë të madhe dhe i domosdoshëm.

25 janar 2018

Lëvizja VETËVENDOSJE!

Të nderuar gazetarë, ju falemnderit që i jeni përgjigjur pozitivisht kësaj konference për shtyp.

Para një ore, Komisioni Zgjedhor i Përgjithshëm më ka shpallur zyrtarisht kryetar të ri të Lëvizjes VETËVENDOSJE!. Gjatë 24 orëve pas shpalljes së rezultateve nuk ka pasur letërankesa për procesin zgjedhor të së dieles në të cilin u votua sipas parimit një anëtar – një votë. Unë i falenderoj të gjithë votuesit e së dielës, por edhe anëtarësinë e gjerë të Lëvizjes sonë. Do të jem kryetar i të gjithëve, sepse do t’iu shërbej të gjithëve, vullnetit e interesit të përgjithshëm. Është nder dhe përgjegjësi për mua që të jem kryetar i Lëvizjes VETËVENDOSJE!. Siç e kemi thënë ngahera, do të jemi bashkë në organizim dhe bashkë në drejtim.

Në këtë muajin janar të vitit 2018, janë bërë një shekull, pra saktësisht 100 vjet, prej se Presidenti amerikan Woodrow Wilson pat shpalosur programin e tij 14 pikësh me të cilin elaboronte të drejtën për vetëvendosje. Në Konferencën e Paqes në Versaj, pas mbarimit të Luftës së Parë Botërore, pikërisht përmes vetëvendosjes u pat shpëtuar Shqipëria nga copëtimi.

Lëvizja jonë që mban emrin e këtij koncepti liridashës për popujt, në vitin që lamë pas, u bë subjekti i parë politik në vend dhe grupi më i madh parlamentar në Kuvend. Qytetarët e Kosovës kanë shumë halle dhe presin shumë prej nesh. Ne duhet të jemi e do të jemi në nivel të detyrës për qytetarët, si në komunat ku qeverisim ashtu edhe në ato ku jemi në opozitë, si në nivelin lokal, po ashtu edhe në atë qendror, ku ndërrimi i qeverisë dhe qeverisjes, është dëshirë e shumicës së qytetarëve.

Platforma që kam prezantuar nuk hyn në fuqi automatikisht pse unë jam bërë kryetar me të. Kam marrur vërejtje dhe sugjerime të ndryshme nga anëtarët dhe ato duhet të trajtohen hapur dhe thellë në forumet tona. Demokraci do të thotë që cilido mund ta ketë fjalën i pari por asnjëri nuk mund ta ketë atë i fundit. Pas mendimeve e opinioneve, vijnë diskutimet e përballjet, e pas diskutimeve e përballjeve vijnë vendimet me shumicën siç e parasheh atë statuti dhe rregulloret tona.

Unë zotohem se do t’i përmbahem programit dhe statutit të Lëvizjes VETËVENDOSJE!, Alternativës sonë Qeverisëse dhe rregullorëve tona të funksionimit, se do të punoj e angazhohem me dijen e me mendjen, me vullnetin dhe dashurinë që kam për Lëvizjen dhe për Kosovën, sepse kështu kam fituar besimin tuaj dhe për shkak se jam i bindur se jemi më të mirët e më të drejtët nga të gjitha subjektet politike në Kosovë (dhe jo vetëm).

Ju falemnderit.

Ditën e diel, pas numërimit të votave në zgjedhjet e brendshme për kryetar të Lëvizjes VETËVENDOSJE!, Komisioni Zgjedhor i Përgjithshëm (KZP) ka bërë shpalljen e rezultateve paraprake të votimit. Pas shpalljes së rezultateve paraprake, në përputhje me Rregulloren e Zgjedhjeve të Brendshme, KZP-ja ka lënë 24 orë afat në dispozicion për paraqitjen e letërankesave nga anëtarët e Lëvizjes VETËVENDOSJE!. Sipas Rregullores, secili anëtar ka patur të drejtën e votës, ashtu siç ka patur edhe të drejtën për t’u ankuar pranë KZP-së për cilëndo pjesë të procesit zgjedhor. Gjatë afatit në dispozicion për pranimin e ankesave, pranë KZP-së nuk është paraqitur asnjë letërankesë për procesin zgjedhor.

KZP-ja ka konstatuar se procesi ka qenë i rregullt, dhe bazuar mbi rezultatet e bëra publike, shpall zyrtarisht deputetin Albin Kurti kryetar të Lëvizjes VETËVENDOSJE!, duke i uruar punë të mbarë në mandatin e ri.

Prishtinë, 23 janar 2018

Komisioni Zgjedhor i Përgjithshëm
Lëvizja VETËVENDOSJE!

Komisioni Zgjedhor i Përgjithshëm i Lëvizjes VETËVENDOSJE! ka mbajtur konferencë për media për procesin dhe rezultatet e zgjedhjeve të brendshme për kryetar të Lëvizjes VETËVENDOSJE!. Ky proces u zhvillua në të gjitha komunat e Kosovës ku është i shtrirë organizimi i Lëvizjes VETËVENDOSJE!, 29 në total, si dhe në 6 shtete të Evropës ku Lëvizja VETËVENDOSJE ka ngritur Qendrat e saj pranë mërgatës shqiptare.

Kryetari i këtij komisioni, Adnan Rrustemi shpjegoi se rezultatet paraprake të këtyre zgjedhjeve u publikuan mbrëmë pas procesit të numërimit, ku kandidati Albin Kurti ka fituar 98.82% të votave. Si pasojë e traditës tashmë të krijuar në Lëvizjen VETËVENDOSJE!, rezultatet paraprake u shpallën mbrëmë ashtu siç janë prezantuar edhe rezultatet paraprake për kryetar të vitit 2015.

Kjo është hera e tretë që Lëvizja VETËVENDOSJE! mban zgjedhje për kryetar. Zgjedhjet e para janë mbajtur në pranverën e vitit 2011, para se të miratohej Statuti i Lëvizjes VETËVENDOSJE!, dhe para se të shkruhej e miratohej Rregullorja e Zgjedhjeve të Brendshme, me të cilën ne funksionojmë që prej vitit 2012. Votimi për kryetar në vitin 2011 nuk është zhvilluar në një ditë të vetme, por përgjatë një periudhe tre mujore. Gjithashtu në atë kohë nuk kishim vendosur as opsionin “abstenim” në fletëvotime. Për nga lloji i tij, votimi gati tre mujor që ka ndodhur në vititn 2011, është i pakrahasueshëm me zgjedhjet për kryetar të vitit 2015 dhe ato të vitit 2018.

Në vitin 2015 ne mbajtëm për herë të parë zgjedhjet për kryetar sipas Statutit dhe Rregullores së Zgjedhjeve të Brendshme. Për ta lehtësuar menaxhimin e procesit të votimit të vitit 2015, si dhe për të mundësuar një pjesëmarrje më të lartë, Qendrat e Lëvizjes u ndanë në dy grupe, dhe votimi u mbajtë në dy ditë, në datat 21 dhe 22 shkurt 2015: një herë në gjysmat e Qendrave, pastaj në gjysmën tjetër. Në këto zgjedhje për kryetar, për herë të parë morën pjesë edhe Qendrat tona në mërgatë, si dhe ne përfshim për herë të parë në fletëvotim opsionin “abstenim”. Në zgjedhjet e për kryetar të vitit 2015 kanë marrë pjesë në votim 5,350 anëtarë, nga 19,576 anëtarë në total. Pra, përqindja e pjesëmarrjes në këto zgjedhje ka qenë 27.43%.

Zgjedhjet 2018 për kryetar të Lëvizjes VETËVENDOSJE! kanë përmirësime shumë të dukshme në raport me vitin 2015, sa i përket menaxhimit të procesit dhe pjesëmarrjes. Për shkak të fuqizimit të strukturave tona, dhe përvojës së shtuar, i gjithë votimi u mbajt në një ditë brenda dhe jashtë Kosove. Sot që kemi marrë të dhëna më të plota nga terreni, kemi analizuar se numri total i anëtarëve tanë që prej vitit 2015 është rritur me gati në 60 %, ndërkaq numri i anëtarëve që kanë votuar dje në këto zgjedhje është rritur thuajse me 100%. Në procesin e votimit të mbajtur dje, të gjithin në një ditë, kanë marrë pjesë 10,606 anëtarë, nga 31,350 anëtarë në total. Përqindja e pjesëmarrjes në votimin e djeshëm është 33.83%. Këto shifra shënojnë rekorde në pjesëmarrje sa i përket këtij lloj procesi zgjedhor në Lëvizjen VETËVENDOSJE!.

Pa asnjë dyshim, ky është procesi më i mirë i zgjedhjeve të brendshme për kryetar të Lëvizjes VETËVENDOSJE! nga të gjitha proceset e deritanishme. Sigurisht që ka ende nevojë të bëhen përmirësime, por kemi bindjen e thellë se tashmë Lëvizja VETËVENDOSJE! e ka konsoliduar praktikën e zgjedhjeve të brendshme për kryetar, ngjashëm me shumë subjekte të tjera politike demokratike në Perëndim. Për këtë pjesëmarrje të shtuar dhe për menaxhimin e këtij procesi, dëshirojmë të falenderojmë edhe një herë të gjithë aktivistët e Lëvizjes VETËVENDOSJE! të përfshirë në praktikat e demokracisë tonë të brendshme, si dhe stafin e KQZ-së për gjithë asistencën dhe materialet e votimit që na e kanë lehtësuar administrimin e këtij procesi.

Prishtinë, 22 janar 2018
Komisioni Zgjedhor i Përgjithshëm
Lëvizja VETËVENDOSJE!