Me shpalosjen e panos me mbishkrimin “Lironi të burgosurit politik” dhe me brohoritje të parullës “Pa drejtësi nuk ka qetësi”, filloi një aktivitet simbolik në afërsi të burgut të Pejës, ku po mbahet padrejtësisht i burgosur aktivisti i Lëvizjes VETËVENDOSJE!, Egzon Haliti. Përmes këtij aksioni, u kërkua lirimi i Egzonit, si dhe i dy aktivistëve të tjerë që po mbahen në burgje të komunave tjera, Atdhe Arifit e Astrit Deharit.

Gjatë këtij aksioni, në fjalimin e saj, deputetja Shqipe Pantina foli për padrejtësinë që po iu bëhet këtyre të rinjve nga një pushtet që ka instrumentalizuar organet e rendit dhe drejtësisë për të luftuar kundërshtarët politikë.

“Egzoni, si dhe Atdheu e Astriti, padrejtësisht po mbahen në paraburgim. Egzoni nuk e ka vendin pas këtij muri. Vendi i tij është këtu në mesin tonë, si dhe në amfiteatër të Universitetit. Egzoni është student, është aktivist politik, si dhe asnjëherë nuk është terrorist. Prandaj ne kërkojmë lirimin e mënjehershëm të tij, si dhe Atdheut e Astritit”, tha deputetja Pantina.

Pantina tha se aty ku po mbahet Egzon Haliti duhet të jenë Adem Grabovci e klani “Pronto”. Aty duhet të jenë Kadri Veseli, Isa Mustafa e Hashim Thaçi, që e kanë katandisur Kosovën në një vend me therra e gjemba.

“Pa drejtësi nuk ka qetësi, dhe drejtësia nuk bëhet me Nuhi Ukën, Sali Mekajn e të ngjashëm. Dhe ne nuk do të ndalemi asnjëherë, derisa Kosovën ta bëjmë vend ku sundon drejtësia e mirëfilltë”, shtoi Pantina.

Egzon Haliti, Atdhe Arifi e Astrit Dehari po mbahen tash e 57 ditë në burg padrejtësisht, pa asnjë provë a fakt të vetëm. Regjimi autoritar përmes taktikave policore që pengon në vazhdimësi aktivitetin e Lëvizjes VETËVENDOSJE!, me montime të ndryshme po ua mohon lirinë këtyre tre aktivistëve, si dhe Frashër Krasniqit, Adea Batushës e Petrit Ademit, që poashtu mbahen në arrest shtëpiak. Ne do të vazhdojmë thirrjet tona për lirinë e tyre dhe për vendosje të drejtësisë, e cila do ta mbajë përgjegjës gjithë këtë organizim kriminal që ka kapur çdo pore të shtetit e shoqërisë sonë.

25 tetor 2016
Lëvizja VETËVENDOSJE!

Policia e Kosovës ndaloi furgonin e Lëvizjes VETËVENDOSJE!, i cili bartte zërimin për aksionin simbolik që do të mbahet në komunën e Pejës. Patrulla e cila ndaloi furgonin, ka përcjellur atë nga Prishtina, ndërsa ndalimin e ka bërë me arsyetimin se kanë urdhër nga lart që të ndalohet automjeti me këto targa.

Siç edhe po shihet, Policia e cila është shndërruar në instrument të klanit “Pronto”, po përgjon dhe po përcjell çdo aktivitet të Lëvizjes VETËVENDOSJE!, ngjashëm siç veprohet nga regjimet autoritare me subjektet opozitare. Në vend që të luftojë strukturat paralele dhe grupacionet e tjera kriminale, kjo polici merr urdhër që të ndjekë automjetet e VETËVENDOSJE!-s.

Lëvizja VETËVENDOSJE! e konsideron këtë akt të papranueshëm dhe kundërshton të gjitha këto taktika policore, që janë karakteristikë e shteteve autoritare. Me këto veprime, asesi nuk do të ndalet angazhimi ynë i përditshëm për çlirimin e shtetit dhe për ndërtimin e një Republike demokratike të qytetarëve.

Lëvizja VETËVENDOSJE! mbajti sot konferencë për shtyp në lidhje me vendimet e fundit të sistemit të drejtësisë. Deputetja Albulena Haxhiu dhe anëtari i Kryesisë, Sami Kurteshi, i quajtën këto vendime skandaloze dhe të padrejta.

Deputetja Haxhiu përmendi fillimisht aktvendimin e Gjykatës Themelore të Prishtinës për mbylljen e seancave ndaj ish kreut të Gjykatës së Apelit, Sali Mekajt, i cili nga afera “Pronto” dëshmohet të jetë njeri i këtij klani brenda drejtësisë.

“Gjykata vendosi që të përjashtojë mediet dhe publikun në seancat gjyqësore edhe përkundër faktit se edhe me Kushtetutën e Republikës, por edhe me Kodin e procedurës penale garantohet transparenca dhe publiciteti i seancave gjyqësore. Duke keqpërdorur Kodin e procedurës penale, ata që kanë keqpërdorur detyrën zyrtare, po fshihen prapa seancave te mbyllura”, tha Haxhiu në lidhje me këtë rast.

Kurse, më pas nga deputetja u përmend rasti i Nuhi Ukës, të cilin Gjykata Themelore e Prizrenit e shpalli të pafajshëm. E për këtë, ajo tha se sistemi i drejtësisë ka marrë rolin e mbrojtësve të krimit.

“Ky sistem është dëshmia më e mirë e përmbysjes së brendshme të këtij sistemi në veçanti, por edhe aparatit shtetëror në përgjithësi si kuptim i shtetit të së drejtës. Kjo përmbysje vjen nga vetë antagonizmi i brendshëm i cili është vënë në shërbim të krimit të organizuar dhe grupeve kriminale që veprojnë në Kosovë dhe janë instrumente të drejtpërdrejta të subjekteve politike në pushtet”, shtoi më tutje Haxhiu.

Haxhiu tha më pas se janë dy përbërës që e përkufizojnë morfologjinë e krimit të kryer dje nga Gjykata Themelore ne Prizren
.
“Përbërësi i parë përfaqëson standardin e dyfishtë të gjyqësisë, me ç’rast kur vije puna te njerëzit e sojit të Nuhi Ukës, Adem Grabovcit, Hashim Thaçit, Kadri Veselit e Isa Mustafës, drejtësia merr petkun e provës së drejtpërdrejt në bazë të pohimit, ndërkaq në rastet e kundërshtarëve politik ai ka tipar interpretues dhe sugjestiv”, deklaroi ajo.

Ndërkaq, më pas tha se përbërësi i dytë përfaqëson një sistem të kurdisur i cili pushon se vepruari nga rasti në rast.

“Kur trajton rastet e Nuhi Ukës, Xhabir Zharkut, Ramadan Mujës, të tjerëve si këta, pushon së vepruari deri sa gjendja juridike dhe faktike nuk kthehet në favor të kriminelëve, ndërsa është tejet aktiv dhe azhur tek përndjekja e aktivistëve të Lëvizjes VETËVENDOSJE!, dhe kujdeset maksimalisht që për veprimet politike, lënda të mos parashkruhet, në rastin konkret tek aksioni politik ndaj EULEX-it në vitin 2009”, theksoi deputetja Albulena Haxhiu.

“Lirimi i Nuhi Ukës dhe shokëve të grupit kriminal në mungesë të provave dhe parashkrimi i veprave të tjera që janë kryer në shërbim të veprës kryesore, është sabotim i dyanshëm. Në njërën anë prokuroria saboton Gjykatën duke bërë ndjekjen penale sa për sy e faqe, dhe në anën tjetër sabotimi i gjykatës ndaj prokurorisë me pasivitet të qëllimshëm të gjykatës për mos të vepruar brenda afateve të arsyeshme e bie procesin gjyqësor në gjendje të parashkrimit të veprave penale për shkak të parashkrimit absolut”, tha ndër të tjera Haxhiu.

E në fjalën e tij, Sami Kurteshi përmendi Nuhi Ukën, Sali Mekajn e Nazmi Mustafin, të cilët kanë pasur pozicione të ndryshme në sistemin e drejtësisë, e për të cilët tha se këta janë vetëm disa shembuj, por s’janë as fillimi e as fundi i sistemit të drejtësisë.
Kurteshi tha se me rastin Uka kemi një dëm që është konstatuar nga vetë gjykata dhe ekspertët e kësaj fushe, mbi 60 milionë euro, dhe konsekuencat qesharake në këto raste janë dëshmia me e mirë për gjendjen e tërësishme të drejtësisë në Kosovë.

Ai tha se ky pushtet ka kapur çdo institucion, fillimisht drejtësinë, e përfshirë edhe institucionet e pavarura, gjë që ka shkaktuar humbjen gati totale të besueshmërisë në drejtësinë institucionale.

“Si pasojë e mëtutjeshme e humbjes së besimit në drejtësinë institucionale, që do të duhej të ishte edhe drejtësi shoqërore, kemi një pasiguri pothuajse totale që për pasojë të rradhës do të kishte tendencën për siguri personale të njerëzve. Dhe kjo tendencë nuk çon askund tjetër, veçse në krijimin e ligjit të fortit”, tha Kurteshi, për të shtuar se në Kosovë drejtësia e të fortit po krijohet duke kriminalizuar institucionet shtetërore.

Dhe për këtë, Kurteshi tha se nuk është fare e rastësishme që institucioni i gjyqësorit ka besimin me të ulët në mesin e institucioneve të Kosovës, sipas shumë hulumtimeve, me ç’rast përmendi një raport të vitit të kaluar, sipas të cilit besimi në gjyqësor është vetëm 17%. E nivel jo shumë më i mirë i besimit është edhe në Prokurori sipas të njëjtave hulumtime, të cilat poashtu e nxjerrin si rrezikun më të madh të brendshëm të Kosovës krimin e organizuar dhe korrupsionin.

“Besimi në drejtësinë institucionale dhe shoqërore ka një rënie lineare të përhershme. Kjo nuk është veç opinion i publikut të brendshëm, por kjo rrjedh edhe nëse i shohim edhe raportet e progresit të BE-së”, deklaroi Kurteshi.

Më tej ai shtoi, se këto raporte për 6 vite rresht konstatojnë se sistemi i drejtësisë është në stadin fillestar dhe se nuk ka as minimalisht progres, duke thënë poashtu se derisa të kemi konstatime të tilla në këto raporte, nuk do të ketë asgjë në lidhje me liberalizimin e vizave.

Si përfundim, u konstatua se qytetari i Republikës së Kosovës e ka për model të drejtësisë, modelin e një sistemi të kapur i cili është në shërbim të mafisë politike dhe të tjerëve që janë të lidhur me ta. Si dhe u tha se qytetarët nuk mund të presin drejtësi pa ndryshimin rrënjësor të sistemit politik. Me këtë sistem politik, drejtësi do te kenë vetëm grupet e krimit të organizuar dhe shërbëtoret e klanit Pronto. Ndërsa qytetarët do të jenë lubrifikanti për mirëmbajtjen e këtij sistemi, i cili mund te jetë çdo gjë përveç ai i drejtësisë.

22 tetor 2016
Lëvizja VETËVENDOSJE!

Lirimi i ish kryetarit të Gjykatës Komunale të Prishtinës, Nuhi Uka, mbi të cilin rëndonin akuza për krim të organizuar me disa të pandehur të tjerë, tregon edhe një herë për gjendjen jashtëzakonisht të keqe të sistemit të drejtësisë në Kosovë. Shpallja e tij si i pafajshëm, duke u liruar nga njëra akuzë teksa të tjerat i ishin vjetëruar, është dëshmia me e mirë që ky sistem është komplet i kriminalizuar dhe udhëhiqet nga kokat e krimit të klanit “Pronto”, në bashkëpunim me misionin nddërkombëtar EULEX, i cili nuk shprehu asnjeherë gatishmëri për të luftuar krimin. E për më keq, EULEX që nuk preku asnjeherë majat e krimit në Kosovë, u korruptua edhe vetë.

Uka akuzohej si drejtues i një grupi të organizuar kriminal, të cilët kishin kryer krime të ndryshme. Ai akuzohej për shkelje ligjore, me qëllim të përfitimit të dobisë pasurore, si dhe për keqpërdorim të ish pronave shoqërore në Çagllavicë e Llapnasellë, bashkë me ish-deputetin e PDK-së Azem Syla. Dhe pikërisht lirimi i tij vjen si pasojë e afërsisë me klanin “Pronto”, që është pasqyrë e qartë e kapjes së shtetit nga krimi i organizuar, të cilët veprojnë lirshëm para EULEX-it, mision ky që premtonte rend, ligj e drejtësi.

Siç u bë e ditur, bashkë me Ukën dhe të tjerë, në këtë proces gjyqësor akuzohej edhe Fehmi Havolli, eksperti i gjeodezisë në Komunën e Prishtinës, akuza ndaj të cilit u hodh poshtë po ashtu për shkak të vjetërsisë së lëndës. Ndryshe, Fatmir Havolli është mik (vëllai i gruas) i Ministrit të Punëve të Brendshme, Skënder Hysenit, Dhe kjo flet qartazi që krerët e ekzekutivit të shtetit e kanë orientuar aktivitetin e tyre vetëm në mbrojtje të kriminelëve, qoftë për shkak të afërsisë familjare, qoftë përkatësisë partiake, apo lidhjeve tjera biznesore.

Në anën tjetër, pa asnjë provë a fakt vazhdojnë të mbahen në burg gjashtë aktivistët e Lëvizjes VETËVENDOSJE!, me raste të montuara për veprime terroriste. Ky pushtet që ka kapur çdo institucion, dhe lufton këdo që synon çlirimin e këtyre institucioneve, çrrënjoset vetëm me angazhimin qytetar. Është pikërisht “drejtësia” e klanit Pronto ajo që ka kushtëzuar humbjen e besimit të qytetarëve në institucionet e drejtësisë, dhe pengesa kryesore për zhvillimin e shtetit, sovranizimin e Republikës dhe mirëqenien e barazinë për qytetarët.

Ky rast shpërfaq edhe dështimin e EULEX-it si mision, për çfarë Lëvizja VETËVENDOSJE! ka paralajmëruar me vendosjen e tij në Kosovë, EULEX, që nuk u mor as me krimet e strukturave të Serbisë përgjatë këtyre 14 viteve të pasluftës në veri të Ibrit, nuk po merret as me krimet e klanit “Pronto”. Madje është shndërruar në bashkëpunëtor të zellshëm të tyre. EULEX nuk solli ligj e drejtësi, por vetëm shkelje të ligjit e padrejtësi.

Lëvizja VETËVENDOSJE! përveç se shpreh shqetësimin e saj dhe kundërshton një vendim të këtillë, kryekëput politik dhe të shkruar nga kriminelët e klanit “Pronto”, për ta pranuar më pas EULEX-i. Drejtësia nuk është e pamundur, zhvillimi e fuqizimi i shtetit nuk janë të pamundura. Por me këtë rrjet të organizuar kriminal me pushtet politik e gjyqësorë ato po na mohohen vazhdimisht. Ndryshimi politik që e çrrënjos krimin është e vetmja rrugë përpara.

Delegacioni i Lëvizjes VETËVENDOSJE!, i përbërë nga Visar Ymeri, Shpend Ahmeti, Albin Kurti dhe Gurjeta Zeka, e ka kryer me sukses vizitën në Bruksel gjatë punimeve të Konferencës së Social Demokratëve të Aleancës Progresive Evropiane. Nga partitë e ndryshme evropiane që morën pjesë në këtë konferencë, delegacioni është takuar me zyrtarë të lartë të Partisë Social Demokrate Gjermane, Partisë Laburiste Britanike, Partisë Social Demokrate Suedeze, Partisë Laburiste Norvegjeze, etj. Më tej takime janë zhvilluar edhe më përfaqësues të lartë të Partisë Eurosocialiste si Giacomo Fillibeck dhe Maria Freitas, dhe me kryetarin e Unionit Ndërkombëtar të Rinisë Socialiste, Howard Lee. Në të gjitha këto takime Lëvizja VETËVENDOSJE! ka synuar forcimin e marrëdhënieve bilaterale me partitë e qendrës së majtë evropiane dhe anëtarësimin e plotë në grupacionet ndërkombëtare partiake të formuara prej tyre, dhe ka gjetur një interes reciprok në këtë drejtim.

Gjatë kësaj vizite u organizua edhe një takim i përbashkët me Zv. Presidenten e Parlamentit Evropian, Znj. Ulrike Lunacek, dhe me Europarlamentaren raportuese për Kosovën, Znj. Tanja Fajon. Në këtë takim u diskutua lidhur me çështjen e liberalizimit të vizave për Republikën e Kosovës si dhe lidhur me zhvillimet e fundit politike. Delegacioni i Lëvizjes VETËVENDOSJE! ka treguar edhe një herë pesë hapat e propozuara nga Visar Ymeri për zgjidhjen e çështjes së demarkacionit si dhe ka diskutuar për zgjedhjet në Kosovë si e vetmja zgjidhje për krizën ekonomiko-politike nëpër të cilën po kalon vendi.

Delgacioni ka vazhduar gjithashtu takimet me përfasues të lartë të qeverisë së Belgjikës (Valoni), si Ministri i Buxhetit André Flahaut. Sakaq, Kryetari i Komunës së Prishtinës, Shpend Ahmeti, me rastin e kësaj vizite shfrytëzoi mundësinë për t’u takuar me Kryetarin e Komunës së Namurit (Kryeqyteti e Valonisë), Maxime Prevot. Komuna e Prishtinës dhe ajo e Namurit kanë nënshkruar më herët një bashkëpunim për binjakëzim dhe, pas shkëmbimeve të para kulturore, së shpejti do të zhvillojnë edhe projektin e parë të restaurimit të trashigimisë kulturore në Prishtinë.

21 tetor 2016
Lëvizja VETËVENDOSJE!

Radio Televizioni i Kosovës vazhdon veprimet diskriminuese sa i përket paraqitjes në emisione televizive të subjektit më të madh opozitar, Lëvizjes VETËVENDOSJE!.

Pas një refuzimi të gjatë për të intervistuar kryetarin Visar Ymeri, RTK sot ia ka pamundësuar pjesëmarrjen në një emision debatues të orës 17:00 përfaqësuesit tonë, Ylli Hoxha, i cili është anëtar i Kryesisë së Lëvizjes VETËVENDOSJE!.Transmetuesi publik RTK ka vendosur që në këtë emision të ftojë vetëm përfaqësuesit nga PDK dhe AAK.

Ky veprim është aq sa i padrejtë, po aq dëshmi se RTK nuk po mund asesi të çlirohet nga ndikimi i pushtetit, më saktë i klanit “Pronto” apo krerëve të krimit në Kosovë. Ky veprim tregon se RTK është e vendosur që të mbetet zëdhënës i klanit “Pronto”, dhe në përputhje me këtë, ky medium po përpiqet ta izolojë Lëvizjen VETËVENDOSJE!.

Mentor Shala dhe krerët e tjerë të transmetuesit publik që e kanë shndërruar në altropalant të pushtetit, duhet ta kenë të qartë se RTK është institucion i qytetarëve të Republikës së Kosovës dhe që paguhet nga taksat e tyre, e jo i Kadri Veselit.

Ne nuk do të lejojmë që RTK të vazhdojë të mbetet si një dikaster qeveritar që propagandon për pushtetin, por do të angazhohemi për çlirimin e këtij institucioni dhe kthimin e tij tek qytetarët.

Kanë nisur sot punimet e Konferencës së Social Demokratëve të Aleancës Progresive Evropiane, ku Lëvizja VETËVENDOSJE! merr pjesë me një delegacion të përbërë nga Visar Ymeri, Shpend Ahmeti dhe Albin Kurti. Në këtë konferencë marrin pjesë partitë kryesore social-demokrate të Evropës, si dhe shumë parti të tjera social demokrate nga e gjithë bota. Në këtë konferencë do të flasin edhe Federica Mogherini (Përfaqësuesja e Lartë e Komisionit Evropian për Marrëdhëniet me Jashtë), Martin Schultz (President i Parlamentit Evropian), Gianni Pittella (President i Grupit Social Demokrat në Parlamentin Evropian), Iain McNicol (Sekretar i Përgjithshëm i Partisë Laburiste Britanike), etj.

Punimet e kësaj konference do të zgjasin dy ditë, dhe ato janë të përqëndruara te “Axhenda e re për paqe dhe drejtësi”. Kjo axhendë synon të ndërtojë politikat e nevojshmë që i bëjnë ballë zhvillimeve si krizës financiare, krizës së refugjatëve dhe gjendjes së emergjencës që është vendosur në shumë shtete për shkak të sulmeve terroriste dhe ekstremizmit fetar. Nëpërmjet kësaj axhende, Aleanca Progresive e Social Demokratëve synon të ndërtojë një rrugë të qëndrueshme demokratike që i bën ballë sfidave të shekullit të XXI përmes politikave që e vendosin njeriun dhe të drejtat e njeriut në qendër, si dhe përmes forcimit të lidhjeve dhe organizatave në nivel ndërkombëtar, kundër autoritarizmit në rritje në shumë shtete të botës.

Para konferencës, delegacioni i Lëvizjes VETËVENDSOJE! u takua me Z. Dirk Van Der Maelen, nga Partia Socialiste Ndryshe e Belgjikes, i cili kryeson Komisionin për Punë të Jashtme në Parlamentin Belg. Me Partinë Socialiste Ndryshe u diskutua për bashkëpunimin ndërpartiak, shkëmbime të ideve dhe bashkëpunimin në avancimin e çështjeve të Kosoves në parlamentin belg si dhe në Këshillin e Evropës, ku Z. Van der Maelen njihet si përkrahës i anëtarësimit të Kosovës.

Paralelisht me këto aktivitete, në Bruksel Lëvizja VETËVENDOSJE! po merr pjesë edhe në punimet që kanë nisur sot të Konferencës Parlamentare të “International Unionin of Socialist Youth” (IUSY) – Unioni Ndërkombëtar i Rinisë Socialiste. Kjo organizatë është e përbërë prej forumeve rinore të partive social demokrate nga e gjithë bota. Gurjeta Zeka, Koordinatore e Sekretariatit për Marrëdhënie me Jashtë, po e përfaqëson Lëvizjen VETËVENDOSJE! në këtë konferencë të forumeve rinore.

17 tetor 2016
Lëvizja VETËVENDOSJE!

Grupi Parlamentar i Lëvizjes VETËVENDOSJE! me mbështetje të Komitetit për Politika financiare e tregtare dhe atij për Mbrojtje sociale, organizuan dëgjimin publik për ndryshimin e Projektligjit lidhur me Fondet pensionale të Republikës së Kosovës.

Në fjalën e tij, Drejtuesi i Komitetit prof. Besnik Bislimi, theksoi joseriozitetin e Qeverisë në trajtimin dhe organizimin e dëgjimeve publike për projektligjin e fondit pensional. “Qeveria e Kosovës nuk e ka organizuar asnjë dëgjim publik për projektligjin e fondeve pensionale dhe as që i ka konsideruar fare, ata që janë pala kryesore në këtë ligj, e që janë kontribuesit e këtij fondi”.

Duke përmendur mangësitë e projektligjit ai u foksua te pikënisja e gabuar për reformimin e ligjit ekzistues, që si pikënisje nuk i ka mangësitë e ligjit, por nevojën e Qeverisë për huamarrje. Nga ky qëllim parashihet që 30% e letrave me vlerë t’i shkojnë Qeverisë.

Nënkryetari i Lëvizjes VETËVENDOSJE!, Dardan Sejdiu në vazhdim nënvizoi se mendësia e qeverive të pasluftës sa i takon fondit pensional dhe sistemit pensional në tërësi është e gabuar. “Ka 15 vite që nuk është trajtuar si duhet ligji për fondet pensionale. Ajo çka kemi parë deri më tani janë disa ndryshime kozmetike. Po ashtu, duhet të dimë se këto fonde nuk janë pronë e Qeverisë, por vetëm e kontributdhënësve”.

Më tutje ai foli edhe për mundësinë e futjes në funksion për të mirën e përgjithshme të këtij fondi, duke kritikuar qëllimin e Qeverisë që këto fonde të përdoren për asfalt dhe shpenzime për paga e mëditje. “Fondet pensionale janë investitori më i madh institucional. Kësisoj fondi pensional mund të përdorej si fond për energji. Vendimet për fondet pensionale nuk duhet të koncentrohen,por shpërndahen. Ato duhet të shkojnë për industri e jo për paga e mëditje”, shtoi ndër të tjera z. Sejdiu.

Dilema kryesore, tha Sejdiu, është se fondet a do të jenë motor shtytës apo barrë për gjeneratat e tjera nga kjo Qeveri.

Drejtuesi i Komitetit për Mbrojtje Sociale dhe deputeti, Faton Topalli u fokusua te ndikimi i këtij projektligji në mirëqenien e pensionistëve dhe qytetarëve në përgjithësi. Ky projkektligj s’ka të bëjë aspak me pensionistët, por me nevojat e Qeverisë, në vend se të ishte i lidhur me masa për zbutjen e varfërisë.

Ndër të tjera, Topalli, dha edhe disa kritika direkte për projektligjin në lidhje me Komisioni për përzgjedhje me ç’rast ai propozoi se në përbërje përveç Ministrisë së Financave e Bankës Qendrore anëtarë duhet të ketë dhe nga opozita e përfaqësuar në Kuvend duke krijuar një mekanizëm kontrolli të mirëfilltë.

Në këtë debat morën pjesë edhe përfaqësues nga organizata që veprojnë në Kosovë. Selatin Kaqaniku, nga organizata ‘Konsumatori’ dhe njëkohësisht pensionist tha se për “borxhet dhe gabimet që i ka bërë dikush nuk duhet që pensionistët të paguajnë pasi që ata nuk janë fajtorë për një gjë të tillë, dhe se për këtë gjë dikush duhet të jep përgjegjësi”.

“Lironi të burgosurit politik” ishte parrulla që u shpalos, afër burgut të Lipjanit ku po mbahet padrejtësisht aktivisti Atdhe Arifi. Aktivistët e Lëvizjes VETËVENDOSJE!, dhe poashtu familjarë të aktivistëve të arrestuar thirrën para këtij burgu gjatë kohës së shëtitjes së burgut, emrin e Atdheut, Astritit dhe Egzonit. Përmes një zërimi të lartë që mund ta dëgjonin edhe të burgosurit që ndodheshin në oborr, mbajtën fjalime edhe deputetja Donika Kadaj dhe Sami Kurteshi.

Kadaj tha se përgjatë dekadave të kaluara të rinjtë arrestoheshin vetëm pse besonin në Republikë dhe se kishin kërkesa të drejta politike.

“Të rinj të tjerë, studentë guximtarë, mendje të lira po mbahen të burgosura. Sot Atdheu, Adea, Frashëri, Petriti, Astriti, e Egzoni po persekutohen përsëri, por kësaj here nga regjimi vendas dhe po vazhdojnë të mbahen në burg dhe arrest shtëpiak në procese komplet të montuara politike”, tha Kadaj.

Klani “Pronto” mobilizoi policinë, prokurorinë dhe gjykatat e veta të emëruara më parë që t’i shërbejnë përulësisht në qëllimin e tyre për ta shtypur opozitën. “Prandaj filluan përndjekjet, bastisjet dhe burgosjet prandaj po vazhdojnë t’i mbajnë në burg të pafajshëm. Ajo shtoi se mendjet dhe vullneti i aktivistëve janë më të fuqishme sesa e tërë armata e prontove dhe vartëseve te tyre.

Sot janë bërë 47 ditë të vuajtura prej 6 aktivistëve. Ky dënim është i padrejtë. Ata po i vuajnë pasojat e shtetit autoritar e të kapur i cili përmes metodave policore ka montuar këtë rast për gjashtë aktivistë të pafajshëm. Ata janë në burg pa asnjë provë e as fakt. Ne do të kërkojmë pareshtur drejtësi deri në çmontimin e këtij rasti dhe vendosjen e drejtësisë për këtë rast. Liri dhe drejtësi do të jenë thirrjet tona të vazhdueshme deri sa të lirohen këta aktivistë që po mbahen padrejtësisht.

15 tetor 2016
Lëvizja VETËVENDOSJE!

Punëtorët e sigurimit në KEK po ballafaqohen ndër vite me padrejtësi të shumta në vendin e punës dhe problemet e tyre i tha në konferencë për media deputeti Faton Topalli.

Të gjithë punëtorët që kanë punuar në sektorin Mbrojtja dhe Siguria në KEK dhe kanë pasur kontrata valide, asnjëherë nuk janë larguar nga puna, por KEK-u nuk konsiderohet më punonjësi i tyre. Me shurjen e këtij sektori përbrenda KEK-ut, punëtorët janë bartur kompanive private të cilat do të kontraktoheshin për sigurimin e objekteve të KEK-ut. Halli i punëtorëve ëshë se nuk kanë kontrata pune as më kompanitë private si WDG, “Besa Security“ dhe së fundi “Security Code“.

KEK-u ka bërë një varg shkeljesh me 270 punëtorë duke manipuluar me statusin e tyre. Numri i tyre është reduktuar ndër vite. Ata sot llogariten vetëm 170 punëtorë nga 270 sa kanë qenë. Poashtu, janë detyruar të punojnë me rroga më të vogla. Shkelja tjetër është kthimi i tyre në punë sipas nevojave të KEK-ut . Në periudha të caktuara kohore, kur KEK-u nuk ka kontrata me kopani private për mbrojtje dhe siguri i trajtonte këta punonjësi si të tij. Ata herë marrin paga prej kompanive private herë prej KEK-ut (në periudhën 2012- 2013).

“Veprime të tilla nga ana e KEK- ut jo vetëm që shkelin të drejtat elementare të punëtorëve por janë edhe të jashtëligjshme. Edhe pse e drejta është në anën e tyre, kjo e drejtë asnjëherë nuk u realizua për këta punëtorë, përkundrazi ajo u mohua edhe nga institucionet që janë të thirrura ta zbatojnë të drejtën siçështë gjykata“, tha Topalli.

Sikur të mos mjaftonin të gjitha këto, njëra prej kompanive private, WDG, u ka mbetur punëtorëve rreth 1 milion euro borxh, duke inkasuar nga punëtorët dhe duke mos i paguar ato në Fondin për Kursimet pensionale.

“Ne e ftojmë Korporatën Energjetike të Kosovës tu njoh statusin e punëtorëve të KEK-ut të gjithë punonjësve të Sektorit të Mbrojtjes dhe Sigurisë. Kërkojmë nga Inspektoriatin e punës që të merret me ankesat e punëtorëve , të kërkoj zbatimin e ligjit të punës dhe ta ndëshkoj KEK-un për shkak të shkeljeve ligjore dhe trajtimin e padinjitetshëm të punëtorëve të tij“, përsëriti kërkesat e punëtorëve Topalli.

Gjykatën Themelore të Prishtinës duhet të veprojë në raport me ligjin dhe të mos sjell vendime të jashtëligjshme si në rastin e Punëtorëve të KEK-ut duke u bërë në të njëjtën kohë vetë shkelëse e ligjit. Këtyre punëtorëve u është bërë padrejtësi dhe kjo duhet të rregullohet.

Sonte, në edicionin qendror të lajmeve, menaxhmenti i RTK vazhdoi të keqpërdorë mediumin publik që paguhet nga qytetarët e Kosovës, për të shpifur kundër Lëvizjes VETËVENDOSJE!.

Në një reagim, përplot me fjalë shpifëse dhe ofenduese ndaj Lëvizjes VETËVENDOSJE!, RTK keqinformoi publikun duke thënë të pavërteta rreth videos së paraqitur nga VETËVENDOSJE! para dy ditësh.

Në atë video, Lëvizja VETËVENDOSJE! ka treguar se si në lajmet qendrore të RTK, lajmet e para në shumicën absolute të rasteve ndahen për pushtetin. Ne askund nuk kemi thënë që RTK nuk ka raportuar fare për opozitën, por që në lajmet e para dhe kryesore, prej datës 20 shtator deri më 4 tetor, as një ditë të vetme lajm kryesor nuk është opozita. Ndërsa nga këto 15 ditë, në 13 ditë, lajmet e para dhe kryesore i janë ndarë pushtetit. Kjo nuk u mohua nga RTK dhe nuk ka se si të mohohet. Prandaj, në mungesë të argumentimit menaxhmenti i RTK-së kishte përgatitur atë kronikë përplot me shpifje.

Sonte menaxhmenti i RTK, për të disatën herë, e rikonfirmoi që ky televizion është shndërruar në mjet propagande për klanin “Pronto” dhe qeverinë e Isa Mustafës.

VIDEO E PLOTË E VETËVENDOSJE!-s:
https://www.facebook.com/vetevendosje/videos/10153722002902000/

Gjashtë aktivistë të Lëvizjes VETËVENDOSJE! që prej 42 ditësh po mbahen padretjësisht në burgje e arreste shtëpiake pa prova e pa argumente nën akuzën për terrorizëm. Të vetmet prova që Policia ka, janë disa fotografi të këtyre aktivistëve derisa ishin duke blerë kifle, duke pirë kafe duke udhëtuar me taksi ose ngjashëm. Pas kësaj, qytetarët e Kosovës nuk mund t’i besojnë Policisë së Kosovës. Përkundrazi, me një qasje të tillë policore, cilido qytetar mund të përfundojë i akuzuar për terrorizëm vetëm pse i bën punët e përditshmërisë së tij.

Për këtë, aktivistët e Lëvizjes VETËVENDOSJE! kanë realizuar sot një aksion simbolik gjatë së cilit kanë shpërndarë njoftime me logo të Policisë të cilat i thërrasin qytetarët të bëjnë kujdes. Drejtor i kësaj policie e cila është e specializuar në montime të rasteve, de facto është Elmi Reçica dhe de jure është Shpend Maxhuni.

Qytetarët duhet ta dinë se cilat janë aktivitet që mund të cilësohen si akte terroriste:

1. Blerja e telefonit te tregtarët ilegalë në shesh

2. Blerja e kifleve dhe shkuarja në Fast Food

3. Udhëtimi me taxi në qytet

4. Nxjerrja e të hollave në bankomat

5. Pirja e kafes nëpër kafenetë e qytetit

6. Blerja e motoçiklestës apo posedimi i saj nga ndonjë familjar i juaji

7. Kritika ndaj RTK-së dhe mos përcjellja e kanali televiziv

Gjashtë aktivistë të Lëvizjes VETËVENDOSJE! po mbahen në burgje të dyshuar për këto veprime.

Ministria e Propagandës, pra RTK-ja, përmes shërbyesit të saj, Xhymret Veliu, ka thënë sot se intervista me kryetarin Visar Ymeri do të bëhet kur RTK e vlerëson. Pra, nuk ka afat. Nuk ka plan. Nuk ka vullnet. Ka refuzim. Nëse deri sot, Veliu ka thënë se po e shqyrtonte realizimin e kësaj interviste, sot në një komunikimin me aktivisten e zyrës së mediave së Lëvizjes VETËVENDOSJE! e ka përdorur futbollin si pretekst për mosrealizimin e intervistës.

Thuajse është normale që një medium ta pezullojë të gjithë transmetimin, sidomos pjesën politike, për hir të të sektoreve të tjera – sportit. Kjo bisedë është realizuar pasi aktivistja Tinka Kurti e ka thirrur autorin e emisionit “Monitor”, Ngadhnjim Kastratin që t’i propozojë intervistimin e z. Ymeri në atë emision. Pas kësaj, Veliu e ka thirrur znj. Kurti për ta dhënë përgjigjen se nuk po e konsideron njëherë ta bëjë këtë intervistë. Në këtë komunikim skandaloz, Veliu e përmend edhe Korenë e Veriut.

Është koha që ky shërbyes i pushtetit ta pranojë se Koreja e Veriut dhe mungesa e demokracisë kudo shoqërohet pikë së pari me mohimin e fjalës për opozitën. Me këtë bashkërendim të aktiviteteve me Qeverinë dhe Policinë, kjo ministri e zellshme e Qeverisë, po tenton ta mohojë fjalën e kryetarit të subjektit më të madh opozitar, pikërisht sepse është e vetëdijshme si ai ka shumë material për të thënë në atë intervistë.

Ne nuk do të ndalemi deri në çlirimin e këtij institucioni. Deri në kthimin e tij, nga ministri e Propagandës në medium publik e në shërbim të qytetarëve ashtu siç është në natyrën e punës së institucionit.

Policia po vazhdon të sillet e ndërsyer ndaj aktivistëve të VETËVENDOSJE!-s.

Ata sot e kanë bastisur shtëpinë e aktivistit Çlirim Gërbeshi. Aktivistët e Lëvizjes VETËVENDOSJE! janë bërë caku i policisë përderisa kriminelët vazhdojnë t’i shtojmë krimet. Derisa policia nuk guxon, as nuk provon ta kontrollojë ekzekutuesin e “Prontos” Adem Grabovcin, katër policë e kanë shqelmuar derën e shtëpisë ku jeton Çlirimi.

Aty ndodhej vetëm një grua me një fëmijë. Asnjëri prej tyre nuk ka bërë asnjë krim, sikur as Çlirimi. Aktivistët e Lëvizjes po ndiqen vetëm pse janë pjesë e Lëvizjes VETËVENDOSJE! Shteti, përmes policisë nuk mund të kthehet kundër opozitës, as kundër qytetarëve.

Por një shtet autoritar siç është Kosova duhet të ndalet në këtë tatëpjetë që ka marrë. Të gjitha këto përndjekje nuk e kanë ndalur asnjëherë përpjekjen e VETËVENDOSJE!. Këto po bëhen arsye shtesë që të vazhdojmë angazhimin tonë për çlirimin e drejtësisë e cila sot është e kapur nga një shtet mafioz si ky i yni.

Grupi Parlamentar me mbështetje të Komitetit për Arsim dhe Kërkim Shkencor në Lëvizjen VETËVENDOSJE!, mbajtën sot debat në Kuvendin e Kosovës me temën “Kurrikula shkollore për nxënësit e komunitetit serb në Kosovë”, ku morën pjesë deputetë, përfaqësues nga organizatat e shoqërisë civile, ekspertë të arsimit e përfaqësues të tjerë.

Në fjalën e tij, deputeti i Lëvizjes VETËVENDOSJE! Ismajl Kurteshi, theksoi që sipas Kushtetutës dhe ligjeve në fuqi, Ministria i Arsimit, Shkencës dhe Teknologjisë është përgjegjëse për çështje të arsimit në tërë Kosovë, por një gjë e tillë nuk respektohet në shkollat me mësim në gjuhën serbe. “Në këto shkolla punohet me kurrikulë serbe, tekstet shkollore shtypen në Serbi dhe në ato tekste nxënësit mësojnë se Kosova është krahinë e Serbisë dhe shqiptarët armiq të Serbisë”, tha midis të tjerash Kurteshi.

Po ashtu ai solli në vëmendje se dhe Komisioni i Pavarur për rishqyrtimin e teksteve nga Serbia ka konkluduar zyrtarisht që në 2010-tën se këto tekste janë në kundërshtim me Kushtetutën e Kosovës, dhe se po ashtu vërehen edhe dallime të shumta në kurrikulë dhe strukturë arsimore. Me ç’rast sqaroi se Kosova punon me sistemin 5+4+3 e Serbia ende me sistemin 4+4+4. Edhe pse nuk këto shpërputhje e shkelje të rënda ende nuk është ndërmarrë asgjë nga Ministria e Arsimit ose të paktën zyrtarisht nuk është komunikuar asgjë.

”Ne kërkojmë nga Qeveria e Kosovës, dhe veçanërisht nga Ministria e Arsimit t’i ndërmerr masat për të cilat është e obliguar me ligj për ta pamundësuar shkeljen e Kushtetutës dhe përhapjen e urrejtjes në mesin e shkollarëve të ri të komunitetit serb, të cilët në këtë situatë janë pa fajin e tyre, dhe kështu kurrë nuk do të integrohen në shoqëri dhe nuk do ta përjetojnë Republikën e Kosovës si të veten” përfundoi fjalën e tij deputeti Ismajl Kurteshi.

Deputeti tjetër, Prof. Mytaher Haskuka në këtë debat ngriti çështjen e arsimit universitar në gjuhën serbe në Kosovë. Ai theksoi se në Kosovë edhe arsimi universitar është bërë sinonim i ndarjes e jo i përbashkimit, duke shtuar se Universiteti i Prishtinës në Mitrovicë figuron si ”Universiteti i Prishtinës në Kosovska Mitrovicë” dhe është themeluar nga Parlamenti i Republikës së Serbisë, e po ashtu financohet nga Republika e Serbisë.

“Për më shumë, ky universitet për dallim nga universitet publike të Kosovës nuk i nënshtrohet fare licensimit nga MASHT-i dhe akreditohet nga Republika e Serbisë”, theksoi Prof. Haskuka.
Ndër të tjera ai tha se formimi i “Zajednicës” do ta legalizonte moszbatimin e ligjit në fuqi dhe do ta përkeqësonte tutjen gjendje, teksa një universitet në Mitrovcë do të mund të ishte flakadani i perspektivës për zhvillimin e rajonit.

Drejtoresha e Arsimit në Komunën e Prishtinës, Arbërie Nagavci, paraqiti normat ligjore në fuqi dhe prezantoi të dhënat e gjendjne për shkollën “Dimitrie Prica” në Bernicë, e cila punon me kurrikulë të Serbisë. Sipas Nagavcit, deri më tani nuk ka pasur ndonjë veprim konkret si inspektim apo inicim të procedurave disiplinore për mosrespektim të kurrikulës apo kërkesë për mësim shtesë në shkollat e minoritetit serbë ku nuk respektohet kurrikulumi. Ministria, tha ajo, ka dështuar krejtësisht në realizimin e detyrimeve dhe zbatimin e ligjshmërisë nga shkollat ku mësojnë serbët në Republikën e Kosovës.

Shqetësime ngriti edhe Prof. Halim Hyseni, i cili kërkoi përgjegjësi për mosrespektimin e Kushtetutës dhe ligjeve të vendit. “Sistemi i arsimit në Serbi është i organizuar për qëllime ekspasioniste. Fëmijët serbë janë viktima, sepse ata edukohen në frymën se si ta urrejnë kombin shqiptar”, theksoi ndër të tjera profesori Halim Hyseni, i cili shprehu shqetësimin për mosveprimin e Qeverisë së Kosovës.

Eksperti i fushës së edukimit, Jusuf Thaçi, kërkoi zbatueshmëri të Kushtetutës dhe ligjeve sa i takon kurrikulave dhe përmbajtjes së teksteve. Si dhe studiuesi Shkëlzen Gashi, i cili kërkoi nga deputetët që t’i kushtojnë fillimisht rëndësi teksteve mësimore të kurrikulës së Kosovës, të cilat i quajti po ashtu skandaloze.

Në këtë debat prezantuan qëndrimet e tyre dhe deputetet Teuta Haxhiu nga AAK dhe Shukrije Bytyçi nga NISMA. Haxhiu tha se shqetësimi për moszbatimin e ligjit është i përbashkët për gjitha partitë, duke shtuar se MASHT ka treguar paaftësi në këtë drejtim, dhe theksoi se kjo e vështirëson integrimin e pakicës serbe. Kurse Shukrije Bytyçi tha se është shqetësuese mungesa e përfaqësuesve të Ministrisë në këtë debat dhe përmendi dështimin e Qeverisë për librat në Luginën e Preshevës.

Në këtë debat morën pjesë edhe përfaqësues nga Lugina e Preshevës, në mesin e të cilëve Xhelal Memeti, zv. Kryetar i Komunës së Preshevës, Ragmi Mustafi nga Kuvendi Komunal i Bujanocit, Ragmi Mustafa, kryetar i PDSH-së në Preshevë dhe profesori i gjuhës shqipe Enkel Rexhepi.

Z. Mustafa, pati kritika për qeveritë e Kosovës që nga paslufta, duke thënë që nuk e kishin parasysh që po udhëheqin shtet. Ai tha se Kosova duhet të kërkojë zbatimin e principit të reciprocitetit nga Serbia, duke problematizuar po ashtu pengimin e teksteve mësimore nga Serbia për shqiptarët e Preshevës, gjë e cila është në kundërshtim me të drejtën ndërkombëtare. Kurse profesor Rexhepi tha se në vazhdimësi serbët e Kosovës kanë qenë të mbiprivilegjuar, ndërsa shqiptarët e Luginës të nënvlerësuar, duke përmendur problemin e teksteve mësimore, çështjen e mosnjohjes së diplomave e probleme të tjera. E përfaqësuesi nga Bujanoci, Ragmi Mustafa, tha se sistemi i arsimit në Kosovë nuk mund të quhet paralel, por ai është ilegal, si dhe problematizoi mospërkrahjen e Kosovës për Preshevën, Medvegjën e Bujanocin. “Çështja jonë është shpërfillë në çdo proces të Luginës, prej Rambujesë e deri në negociatat që mbahen sot”, theksoi Mustafa.

Në fund, Ismajl Kurteshi përmbylli debatin duke prezantuar konkluzionet e mëposhtme:

1.MASHT të mos lejoj përdorimin e teksteve shkollore dhe plan-programeve shkollore të Serbisë nëse paraprakisht nuk është njoftuar ashtu siç parashihet me nenin 12.3 të ligjit nr/03/L-068 për Arsimin në Komunat e Republikës së Kosovës.
2 .Neni 12.4 i ligjit për Arsim në Komuna e obligon MASHT-in ta kundërshtoj përdorimin e plan-programeve dhe teksteve shkollore që janë në kundërshtim me Kushtetutën e Kosovës, në Komisionin e Pavarur të themeluar me të njëjtin ligj. Prandaj MASHT-i është i obliguar të veproj sipas ligjit.
3.Neni 13 i ligjit për Arsim në Komuna e obligon Komisionin e Pavarur ta ndaloj përdorimin e plan-programeve dhe teksteve shkollore që janë në kundërshtim me Kushtetutën e Kosovës. Komisioni i Pavarur është i obliguar të veproj sipas ligjit.
4. Qeveria e Kosovë/MASHT-i duhet të përdor parimin e reciprocitetit me Serbinë në lidhje me plan-programet dhe tekstet shkollore.
5. Me konkluzionet e këtij debati do të njoftohet Komisioni Parlamentar i Kuvendit të Republikës së Kosovës dhe MASHT-i.
6. MASHT ka formësuar një procedurë për verifikimin e vlefshmërisë së diplomave të marra nga universitetet në Serbi por procedurë do të duhej të zbatohej në reciprocitet, pra në masën që Serbia i validon diplomat e universiteteve të Kosovës. Por kjo procedurë nuk duhet të aplikohet për validimin e diplomave të së ashtuquajturës “Universiteti të Prishtinës me seli të përkohshme në Mitrovicë”. Validimi i diplomave të këtij Universiteti paralel (ilegal) të Prishtinës në Mitrovicë paraqet shkelje të rëndë ligjore dhe legalizim i ndarjes etnike të universitetit. Një proces i tillë do të pamundësonte integrimin e këtij institucioni paralel të arsimit në sistemin arsimor të Kosovës në të ardhmen.

Sot, Lëvizja VETËVENDOSJE! mbajti konferencë për media në lidhje me pensionet dhe listat e veteranëve të Luftës Çlirimtare të Kosovës me ç’rast foli deputeti Rexhep Selimi.

Deputeti Selimi theksoi në fillim të kësaj konference se problemet që e kanë karakterizuar këtë çështje zënë fill tek çarmatosja e UÇK-së dhe po kulmojnë me manipulimet me listat e rrjedhimisht me pensionet e ish luftëtarëve. Në mënyrën se si është nisur ndërtimi i listave, paqartësia e ligjit na bën të kuptojmë se ky proces është nisur që në krye të herës për të qenë i dështuar, madje më keq për të diskretituar figurën e ish luftëtarëve tanë.

Ai tha se tash po konstatohet edhe nga vetë pushteti se ka pasur problem me verifikimin e listave të veteranëve, më saktësisht me fryrjen e tyre, gjë të cilën Lëvizja VETËVENDOSJE! e ka paralajmëruar që në kohën e hartimit e miratimit të projektligjit për statusin.

“Dy mangësitë kryesore që ka ky ligj vazhdojnë të jenë mospërcaktimi i kritereve të mirëfillta për statusin e veteranët dhe për shkak se brenda këtij ligji nuk ekziston fare përkufizimi i veteranit të luftës së UÇK-së”, theksoi deputeti Selimi.

“Që nga miratimi i ligjit dhe fillimi i procesit të verifikimit janë vënë në dukje një varg parregullsish, duke filluar nga politizimi i procesit qysh në zanafillën e tij në Kuvend”, shtoi Selimi.

Më pas, ai përmendi edhe politizimin gjatë procesit të verifikimit, që si pasojë solli fryrjen e listave dhe korrupsionin në dhënien e statuseve të rrejshme, shkeljen e procedurave dhe rregullores së Komisionit Shtetëror për verifikimin e Listave të veteranëve dhe shkeljen e protokollit te dhënies së certifikatës së veteranit të UÇK-së.

“Në vend se të korrigjoheshin gabimet, ndodhi dënimi kolektiv që ua dha Kryeministri, duke ndërprerë pagat për të gjithë veteranët, edhe atyre që e meritojnë, edhe manipuluesve”, theksoi Selimi.

Ai po ashtu prezantoi edhe Nenin 13 të Ligjit për veteranët e Luftës së UÇK-së, ligj ky që është shkelur, e për çfarë Selimi ftoi Prokurorinë që të reagojë menjëherë në mbrojtje të ligjit, duke shtuar se për gjitha këto shkelje dhe manipulime, s’ka se si të përjashtohen nga përgjegjësia të gjithë bartësit e këtij procesi.

Selimi bëri përgjegjës Kryeministrin Mustafa, i cili me një arbitraritet të papranueshëm, mori vendim për dënimin kolektiv të të gjithë veteranëve dhe familjarëve të dëshmorëve të cilët u privuan nga pagesat e merituara.

“Nuk e meritojnë veteranët, luftëtarët e vërtetë, që të fyhen e të keqtrajtohen, as nga Kryeministri i sotëm e as nga ai i djeshmi. As nga Isa Mustafa që i dënon të gjithë pa përjashtim e as nga Thaçi, që herë thotë se gjithë Kosova është UÇK e herë thotë se vetë ka qenë larg vijave te frontit”, deklaroi deputeti.

Selimi në fund kërkoi në emrin e Lëvizjes VETËVENDOSJE! dhe të gjithë atyre që e duan UÇK-në të paprekshme, të pastër dhe të mbrojtur, që menjëherë të ndalen manipulimet kundër vlerave të Luftës Çlirimtare.

Zgjidhja për këtë është fillimi i punës për ndryshimin e ligjit dhe pastrimin e listave të veteranëve dhe invalidëve, që këtyre kategorive t’iu mundësohet trajtim i dinjitetshëm.

Kryeredaktori i RTK-së dhe autori i emisionit “DEBAT”, Ridvan Berisha, e pranoi më në fund të vërtetën rreth kapjes së RTK-së dhe mohimit të së drejtës për paraqitje në këtë televizion të subjektit më të madh opozitar në Kosovë.

Është skandaloze që kryeredaktori i mediumit publik, post publik që ka përgjegjësi publike ndaj të gjithë qytetarëve dhe votuesve të të gjitha subjekteve, të vendosë për arsye personale t’ia ndalojë kryetarit të subjektit më të madh opozitar, pjesëmarrjen në emisionin që e drejton.

Së paku tash e dy muaj, VETËVENDOSJE!-s i mohohet e drejta për hapësirë në RTK, ndërkohë që udhëheqësit e subjekteve në pushtet, brenda këtyre dy muajve kanë zhvilluar intervista në këtë medium së paku nga dy herë secili.

Kjo tregon që në fakt vendimet “personale” të kryeredaktorit Ridvan Berisha dhe Xhymret Veliut, njësoj sikur edhe ato të drejtorëve Mentor Shala dhe Mufail Limani, janë vendime të klanit pronto, që ekzekutohen nga shërbyesit e tyre në RTK.

Lëvizja VETËVENDOSJE! fton Këshillin e Pavarur Medial dhe Asocicaionin e Gazetarëve të Kosovës që të reagojnë ndaj këtij diskriminimi që ka bazë politike dhe është i papranueshëm për këdo që beson në lirinë e shprehjes dhe në mediet e lira.

Udhëheqësi i emisionit në RTK 1, Ridvan Berisha në një komunikim me zyrtaren për media në Lëvizjen VETËVENDOSJE!, Tinka Kurti, ka thënë se refuzon ta intervistojë kryetarin Visar Ymeri për shkak të komunikatës së mbrëmshme të Lëvizjes, në të cilën tregohet se kjo intervistë ende nuk është kryer pavarësisht të dakordimit të më shumë së një muaji.

Një vendim i tillë, flet për mendje privatizuese brenda RTK-së, e cila nuk guxon assesi të ndodhë në një medium publik. Z. Berisha po sillet si shërbyes të pushtetit duke e përjashtuar prezantimin e opozitës nga një hapësirë publike e cila i takon.

Arsyetimi se komunikata e Lëvizjes është pengesë për ta realizuar intervistën nuk qëndron. Nuk mundet një medium publik i cili në natyrën e tij të punës e ka fjalën dhe duhet të punojë për lirinë e shprehjes t’i pengojë komunikata e cila është pikërisht e bazuar në këtë liri themelore.

Ndërkohë, Kryeredaktori i RTK1, Xhymret Veliu është shprehur se përzgjedhja e mysafirëve bëhet nga stafi i RTK-së. Atëherë, pse duhet RTK-ja ta përzgjedhë vetëm Kadri Veselin, Hashim Thaçin, e Isa Mustafën? Si po rastisin të jenë vetëm këta mysafirë të ftuar? Kjo është saktësisht kapja e hapësirës për partitë në pushtet dhe përjashtimi i opozitës.

RTK-ja nuk po e interviston kryetarin e Lëvizjes VETËVENDOSJE! Visar Ymeri. Hapësirën e njëjtë që ia kishte dhënë dhe organizuar për Kadri Veselin e Hashim Thaçin, nuk po ia ndan edhe z. Ymeri. Kryeredakotorët në RTK, Ridvan Berisha dhe Xhymret Veliu, as pas një muaji kur e kemi bërë publik refuzimin e tyre ndaj nesh, nuk kanë bërë asnjë përpjekje për të bërë intervistën me z. Ymeri.

Autori i emisionit, Ridvan Berisha, i kontaktuar të martën më 27 shtator, nga aktivistja në zyrën e mediave të Lëvizjes, Tinka Kurti, ka thënë se do ta lajmëronte të nesërmen për mundësinë e intervistës gjatë kësaj jave. Të nesërmen ai e drejton tek kryeredaktori i RTK1, Xhymret Veliu, i cili poashtu thotë se të nesërmën do ta marrë një vendim në lidhje me këtë intervistë të mundshme. Kështu, deri sot, e premte, kur asnjëri prej tyre nuk lajmërohet në thirrjet nga Lëvizja VETËVENDOSJE!.

Ky medium ka muaj të tërë që nuk po gjen hapësirë për kryetarin e subjektit më të madh opozitar, derisa kishte realizuar intervista speciale me kryetarët e subjekteve të pozitës, duke ua mundësuar atyre sulmin ndaj VETËVENDOSJE!-s. Kryetari i PDK-së Kadri Veseli ishte intervistuar më 12 gusht 2016 dhe Kryeministri Isa Mustafa më 19 gusht 2016.

Për ta refuzuar VETËVENDOSJE!-n fillimisht Xhymret Veliu kishte thënë se është në pushime. Tash të njëjtin arsyetim e ka Ridvan Berisha. Çuditërisht, në muajin gusht, për t’i realizuar intervistat e Veselit dhe Mustafës, asnjëri nuk ishte në pushime. Ky menaxhment duhet të shkojë në pushime të përhershme. Ky menaxhment në shërbim të Qeverisë, ka nevojë të shkarkohet që qëllimi i RTK-së – shërbimi i publikut – të mund të realizohet.

Përjashtimi i 95 punëtorëve të KEDS-it nga vendet e punës këtë, si dhe trendi i përjashtimit të punëtorëve nga kjo ndërmarrje është i papranueshëm. Ky largim kolektiv i punëtorëve është jashtëzakonisht i dëmshëm për ekonominë dhe shoqërinë tonë.

Drejtuesi i Komitetit për Mbrojtje Sociale, Faton Topalli dhe Drejtuesi i Komitetit për Energjetikë, Naim Hoxha, në një konferencë për media të Lëvizjes VETËVENDOSJE! kundërshtuan dhe kërkuan përgjegjësi nga qeveria për këto përjashtime nga puna të punëtorëve nga kompania KEDS-i.

“Pa asnjë përgjegjësi morale dhe ligjore ka larguar para dy ditësh 95 punëtorë, 75 të tjerë në maj dhe 160 brenda një viti përmes presioneve e shantazheve. Këto janë pasojat aktuale të privatizimit, por jo të fundit. Diku rreth 332 brenda vitit”, ka thënë deputeti Topalli, duke folur përjashtimet që ka bërë KEDS-i.

Topalli shtoi se këto janë pasoja të privatizimit të dëmshëm, duke përmendur privatizimin e KEDS-it nga kompania turke ‘Limak’, për vetëm 26.3 milionë euro. Ai përmendi edhe punonjësit e papunë të Ferronikelit në Drenas.

Më tej, Topalli paralajmëroi largimin nga puna edhe të një numri të punëtorëve nga Bechtel Enka, duke treguar që së fundi kjo kompani ka sjellë në Kosovë 50 punëtorë nga Rumania, që kanë ardhur për të kryer punë që kryhen nga punëtorët kosovarë.

Topalli kërkoi që Qeveria të ndërmarrë masa për t’iu dalë në mbrojtje punëtorëve të Kosovës, të cilët janë kategoria më e shtypur dhe e diskriminuar në vend.

“Punëmarrësi në Kosovë janë kategoria më diskriminuar në vendin tonë. Ata janë lënë pa mbrojtje ligjore dhe pa asnjë mbrojtje të mirëfilltë. Oraret e gjata të punës, kushtet e vështira në punë, mungesa e sigurimeve shëndetësore, mungesa e kompensimit të rrogave pas fatkeqësive në punë, puna me muaj dhe ndonjëherë me vite pa asnjë ditë pushim, janë vetëm disa nga problemet që i bëjnë punëmarrësit e Kosovës në skllevër të vërtetë, përfundoi drejtuesi i Komitetit për Mbrojtje Sociale, Faton Topalli.

Kurse Naim Hoxha, tha që largimet e punëtorëve nga puna po e rrisin papunësinë dhe po ua pamundësojnë punëtorëve që kryesisht janë mbi 40 vjeçarë të jetuarit me dinjitet.

“Në anën tjetër përjashtimi nga vendet e punës e përjashton dijën dhe përvojën që shoqëria e ka krijuar për një kohë të gjatë në fusha specifike të industrisë së prodhimit, duke kushtëzuar njëkohësisht kualifikim të fuqisë punëtore”, ka thënë Hoxha.

“Ky proces privatizimi e ka shpërfilluar plotësisht faktin që këta janë njerëz, me familje, me përvojë jetësore e profesionale, me histori, të drejta, dinjitet e mundësi. Kështu secili punëtor është i largueshëm. Tërë kjo për ta rritur profitin e KEDS-it duke e ulur koston e punës”, ka shtuar Hoxha.

Në fund u tha se Lëvizja VETËVENDOSJE! do të merret me këtë çështje dhe me çdo padrejtësi ndaj secilit punëtor, duke bërë presion ndaj institucioneve dhe duke mbrojtur ata, e duke qenë me ta në organizimet e tyre.

Ashtu siç paralajmëroi drejtori i njësitit anti-terror të Policisë së Kosovës para dy ditëve në një emision televiziv, Fatos Makolli, 6 aktivistëve të Lëvizjes VETËVENDOSJE! të arrestuar pa kurrfarë provash për sulmin në Kuvend, iu është vazhduar paraburgimi edhe për dy muaj.

Ky vendim përveçse është i papranueshëm dhe skandaloz, është dëshmi se shteti i Kosovës dhe instuticionet e tij ka marrë modelin e shtetit totalitar, ku Policia përzihet në punët e Prokurorisë dhe gjykatave, duke ua imponuar vendimet për të arrestuarit.

Një vendim i tillë, pa u marrë asnjëri nga të arrestuarit asnjëherë në pyetje dhe pa pasur asnjë fakt që tregon lidhjet e sulmit të Kuvendit me aktivistët tanë, është veprim që shpërfaq lidhjen zinxhirore mes klanit Pronto dhe Policisë, Prokurorisë e gjykatave, ku të gjitha së bashku përdorin trasnmetuesin publik RTK-në si zëdhënësin e tyre. Asnjëra nga këto institucione nuk po synon rendin apo drejtësinë, por po garojnë me njëra-tjetrën se kush po i shërben me mirë pushtetit kriminal.

Ashtu siç ndodhi edhe arrestimi i 6 aktivistëve, pas një mori shpifjesh e montimesh të Policisë dhe institucioneve të tjera shtetërore të kapura, në të njëjtën mënyrë erdhi edhe ky vendim, në vazhdën e luftës speciale të pushtetit ndaj Lëvizjes VETËVENDOSJE!.

Ne kërkojmë nga organet e drejtësisë që të heqin dorë nga këto vendime dhe nga shërbimi ndaj grupimeve kriminale, siç është klani Pronto. Dhe i bëjmë me dije pushtetit, se këto veprime nuk do të zbehin në asnjë moment aktivitetin e Lëvizjes sonë kundër këtij regjimi që po ecë hapave të regjimeve totalitare. Mbesim të përkushtuar dhe do të angazhohemi me gjitha kapacitetet tona që të çlirojmë institucionet e kapura nga klani Pronto, në mënyrë që të kemi një shtet të së drejtës, një shtet demokratik dhe ligjor.