Vendimi i djeshëm i gjykatës për lirimin e Azem Sylës është veprimi i rradhës që tregon nivelin shqetësues të kapjes që i është bërë organeve të drejtësisë nga klani Pronto.

Përderisa në vazhdimësi po publikohen përgjime që flasin për përfshirje në krim të organizuar e keqpërdorim të detyrës zyrtare edhe nga shumë bashkëpartiakë të Azem Sylës, organet e drejtësisë kanë mbyllur sytë kundruall tyre, dhe morën vendimin skandaloz për lirimin e këtij të fundit.

Në anën tjetër, të njëjtat organe të drejtësisë kanë shqiptuar masa të arrestit shtëpiak ndaj deputetëve të Lëvizjes VETËVENDOSJE!, vetëm pse këta të fundit penguan klanin Pronto në misionin e tyre kryesor – faljen e tokave të Kosovës dhe copëtimin e saj. Sot poashtu, Policia e Kosovës intervenoi brutalisht për të penguar aktivistët e VETËVENDOSJE!-s që të vendosin një pano prej letre para shtëpisë së Kadri Veselit. Me ç’rast arrestuan aktivistin Imer Fejza, ndërsa lënduan ish-luftëtarin e UÇK-së, Musa Ajeti.

Nuk ka më asnjë dilemë që i gjithë sistemi shtetëror, duke përfshirë policinë, prokurorinë dhe gjykatat, është vënë në shërbim të klanit pronto dhe shtypjes së kujtdo që mendon ndryshe dhe kundërshton politikisht këtë klan.

Lëvizja VETËVENDOSJE! ju bënë thirrje të gjithë qytetarëve të Kosovës që të marrin pjesë sa më masivisht në protestën e 1 shtatorit, ku do t’i tregohet në mënyrë të vendosur këtij klani kriminal që qytetarët nuk do të dorëzohen para tyre.

Në fundin e gushtit të vitit të kaluar, Isa Mustafa e Hashim Thaçi, Kosovës ia kurdisën Kosovës dy dëme shumë të mëdha; marrëveshjen për themelimin e “Zajednicës” dhe atë për demarkacionin me Malin e Zi, që parasheh humbje të territorit të Kosovës. Qeveria kishte në plan që t’i bënte fakt të kryer këto marrëveshje deri në dhjetor të vitit të shkuar por ato as sot nuk janë realizuar. Ato janë të parealizueshme.

Sot një vit, Kosovës i kanosej themelimi i Zajednicës. Por një vit më vonë, pamundësimi i themelimit të saj është dëshmuar si triumf i organizimit dhe vendosmërisë qytetare. Nënshkrimit të Isa Mustafës iu kundërvunë 205 mijë nënshkrime të qytetarëve të Republikës. Të gjithë ata, nënshkruan edhe kundër marrëveshjes për demarkacionin me Malin e Zi, të nëshkruar në Vjenë nga Hashim Thaçi. Dhjetëra protesta e qindra arrestime bënë që qeveria të dorëzohet. Atë që Mustafa dhe Thaçi e kishin parashikuar si fat për Kosovën, qytetarët e saj e ndalën sepse e cilësuan si fatkeqësi për vendin dhe të ardhmen e secilit. Ato që planifikonte t’i realizonte për dy – tre muaj, Qeveria nuk arriti t’i përfundojë as për 12 muaj.

Pavarësisht se nënshkruesit duan ta kthejnë e ta ngjallin këtë projekt, “Zajednica” është projekt i vdekur falë kundërshtimit qytetar. E njëjta do të ndodhë edhe me marrëveshjen për demarkacionin. Më 1 shtator përgjigjia për demarkacion jepet në shesh. Aty tregohet vullneti dhe fitorja do të jetë e qytetarëve.

Me tentimin e për ta lidhur VETËVENDOSJE!-n me sulmin e mbrëmshëm në RTK, menaxhmenti i këtij televizioni e konfirmoi përfundimisht që RTK-në e kanë shndërruar në propagandues klasik të Qeverisë. Lëvizja VETËVENDOSJE! ka shumë kohë që i bënë thirrje RTK-së të mos i shërbejë Thaçit, Veselit dhe Mustafës si altoparlant agjitacioni. Kapja e RTK-së është dëshmuar përmes uzurpimit të pozitave drejtuese nga militantët partiakë; është dëshmuar nga përgjimet dhe po dëshmohet vazhdimisht nga politikat redaktoriale të këtij mediumi.

Qeveria dhe klani Pronto nuk gjeti fajtorët për asnjërin prej sulmeve që kanë ndodhur kohët e fundit. RTK-ja në vend që të kërkojë përgjegjësi nga kjo qeveri dhe klani pronto, për dështimin e sistemit të sigurisë në vend dhe për mosgjetjen e fajtorëve, e sulmoi Lëvizjen VETËVENDOSJE!.

Lëvizja VETËVENDOSJE! nuk pajtohet me sulmin e mbrëmshëm ndaj RTK-së, jo sepse RTK-ja e sotme simbolizon fjalën e lirë, por sepse nuk mendojmë që sulmet e tilla me bomba ndihmojnë ndonjë kauzë të drejtë në Kosovë. Çlirimi i shtetit tonë nga klani pronto që ka uzurpuar çdo institucion publik, do të ndodh vetëm përmes protestave masive paqësore nëpër sheshet e Prishtinës.

Nga përgjimet e kemi kuptuar përfundimisht se si kokat e krimit në Kosovë, duke e shtënë në dorë sistemin e drejtësisë, kanë liruar nga ndjekja penale gjithë klanin e tyre kriminal. Në anën tjetër, duke instrumentalizuar po këtë sistem drejtësie, vazhdimisht kanë ndjekur politikisht dhe burgosur kundërshtarët politikë.

Në të njëjtën logjikë, ky klan kriminal, përmes menaxhmentit të RTK-së, e ka shndërruar këtë medium në propagandues mbrojtës të aferave të tyre. Në anën tjetër RTK po përdoret nga PDK e LDK për të etiketuar, shpifur, e sulmuar mediatikisht kundërshtarët politikë të pushtetit.

Dorëheqja e Adem Grabovcit është pranim i fajësisë për krim të organizuar, korrupsion dhe kapje të shtetit. Adem Grabovci fillimisht u orvat të shpëtonte nga presioni publik duke fyer inteligjencën e qytetarëve duke dhënë arsyetime absurde që gjoja qenka angazhuar për të rritur punësimin në Kosovë, por i përballur me zemërimin e publikut, u detyrua që më në fund të pranojë fajet e tij ndaj Republikës dhe institucioneve të Kosovës.

Sidoqoftë, dorëheqja e tij vetëm nga drejtimi i Grupit Parlamentar të PDK-së është e pamjaftueshme. Ai duhet të heq dorë edhe nga pozita e deputetit, nënkryetarit të PDK-së si dhe nga çdo funksion tjetër politik e publik. Në anën tjetër, ai duhet urgjentisht të ndiqet penalisht dhe të mbajë përgjegjësi ligjore për veprimet e tij të pista.

Dorëheqja e tij nuk mjafton, ngase – siç e pranon edhe vetë ai – Adem Grabovci ishte vetëm ekzekutues që urdhrat i merrte vazhdimisht nga Hashim Thaçi dhe Kadri Veseli. Populli i Kosovës nuk mjaftohet me dorëheqjen e një ekzekutuesi përderisa kokat e krimit që e udhëhiqnin atë janë ende në krye të shtetit tonë.

Lëvizja VETËVENDOSJE! kërkon urgjentisht dorëheqjen e Hashim Thaçit dhe Kadri Veselit si dhe arrestimin e tyre të menjëhershëm.

Sot me datë 13 gusht 2016, Lëvizja VETËVENDOSJE! mbajti konferencë për media në lidhje me kapjen e shtetit dhe kriminalizimin e institucioneve. Anëtarët e Kryesisë së VETËVENDOSJE!-s, Shpend Ahmeti dhe Sami Kurteshi thanë se sistemi jonë politik është i kapur fund e krye dhe ftuan qytetarët që të bashkëngjiten në veprimin për ndaljen e kësaj të keqeje dhe kthimin e dinjitetit qytetar.

Në fjalën e tij, Shpend Ahmeti tregoi se si VETËVENDOSJE! gjithnjë ka shprehur shqetësimin e saj për kapjen e shtetit, kriminalizimin e institucioneve dhe përzierjen e pushteteve.

“Sa herë që të flasim ne si Lëvizje për kapjen e shtetit dhe kriminalizimin e institucioneve, vazhdimisht marrim përgjigje nga pushteti se ne nuk i respektojmë institucionet. Por në fakt, jemi ne ata që po përpiqemi t’i shpëtojmë ato, pikërisht nga ky klan njerëzish”, tha Ahmeti në fillim të fjalës së tij.

Më tej Ahmeti përmendi disa raste nga përgjimet e fundit të publikuara nga ‘Insajderi’, të cilat tregojnë më së miri kapjen e shtetit.

“Në qoftë se në një universitet vendoset një njeri që nuk e di pse është vendosur, nëse në një bord zgjedhet dikush që nuk ka lidhje me funksionimin e atij bordi, atëherë duhet ta kuptoni se këto janë arsyet bazike pse Kosova është kështu siç është sot”, tha ndër të tjera Shpend Ahmeti.

Ahmeti poashtu tregoi se edhe me punën në Komunë të Prishtinës kanë vërejtur këtë kapje të institucioneve të drejtësisë, duke treguar rastin e padisë për ndërmarrjen “Pastrimi”, rast ky që u fitua në Gjykatë Themelore dy herë, por u refuzua nga Gjykata e Apelit, ku tashmë është e dokumentuar se janë instaluar njerëz të pushtetit.

Në fund të fjalës së tij Ahmeti tha se sot e kësaj dite nuk kemi asnjë reagim nga ambasadorët, veçanërisht nga ambasadorët e Kuintit, që në vazhdimësi flasin për ruajtjen e demokracisë, për stopimin e korrupsionit dhe drejtësinë si dhe për heshtjen e LDK’së, e cila po frikësohet të jap deklarata rreth përgjimeve për shkak të dosjeve të Isa Mustafës në prokurori.

Në anën tjetër, Sami Kurteshi e quajti sistemin e drejtësisë të kapur e të kalbur.

“Numri i lëndëve nëpër gjykata nuk po shkon duke u zvogëluar, por duke u rritë. Sepse shumë lëndë nuk procedohen fare. Këtu kemi një sistem të kalbur”, tha në fillim të fjalës së tij, Kurteshi.

Ai e quajti lojë fjalësh deklarimin e vazhdueshëm se si në Kosovë ka ndarje të qartë mes pushteteve, pasi që janë qeveritarët që po kontrollojnë edhe legjislativin, edhe gjyqësorin.

Tutje, Kurteshi tha se njerëzit në vendin tonë përveç se po e humbin besimin dhe shpresën për drejtësinë institucionale, kanë filluar ta humbin besimin dhe shpresën edhe në drejtësinë shoqërore, gjë që Kurteshi e quajti tragjike për Kosovën.

“Sa herë që e kemi kritikuar apo akuzuar këtë sistem, na kanë thënë vazhdimisht ‘drejtohuni në Prokurori’, por kjo ishte një ftesë cinike sepse po shihet se kush është sot në krye të këtyre institucioneve të drejtësisë”, deklaroi Kurteshi.

Në fund të konferencës, Kurteshi ritheksoi se gjyqësori është në gjendjen më të rëndë, dhe për këtë konstatoi se zgjidhja për këtë vjen nga veprimi i ndërgjegjshëm politik. Dhe për këtë, Kurteshi tha se VETËVENDOSJE! është ajo që në vazhdimësi ka luftuar për ndërgjegjësimin e politikës, si dhe fare në fund, ai bëri ftesë për secilin qytetar që t’i bashkëngjitet veprimit për kthimin e dinjitetit njerëzor.

Lëvizja VETËVENDOSJE!
13 gusht, 2016

Dënimi me 30 ditë arrest shtëpiak për deputetin Driton Çaushi dhe Shefin e Grupit Parlamentar të Lëvizjes VETËVENDOSJE! Glauk Konjufca, është veprim në vazhdën e aktivitetit autoritar të Qeverisë së Kosovës.

Si e tillë, kjo masë e caktuar ndaj deputetëve Çaushi e Konjufca është e padrejtë dhe e papranueshme, teksa në anën tjetër është tregues i panikut që e ka kapluar Qeverinë, e cila nuk po arrinë ta shtyejë përpara faljen e tokës së Kosovës.

Mbajtja në arrest shtëpiak e deputetëve që mbrojtën integritetin dhe sovranitetin e Republikës dhe lënia në liri e kriminelëve që me vite shkatërruan e po shkatërrojnë shtetin tonë, është pasqyra më e mirë e funksionimit të organeve të drejtësisë në Kosovë.

Këta pushtetarë që janë demaskuar me zë e figurë, që me çdo kusht duan t’i avancojnë përpara projektet e tyre antishtetrore e kriminale, me asnjë kusht nuk do të tolerohen që ta copëtojnë Republikën, herë duke falur territor e herë duke instaluar organizime sipas planeve shoviniste të Serbisë.

Prandaj, këtyre kriminelëve që janë instaluar në krye të shtetit me metoda kriminale, siç i është bërë me dije edhe më herët, iu përseritet prapë se burgosja dhe maltretimi nuk e ndalë dot përpjekjen për mbrojtje të Republikës. Rezistenca ndaj këtij pushteti do të jetë veç me e fuqishme dhe e pathyeshme.

Në një situatë ku krimet e pushtetarëve po faktohen për çdo ditë me incizime, prokuroria dhe policia – që asnjë veprim nuk e morën ndaj kriminelëve – po veprojnë me shpejtësi të jashtëzakonshme për të arrestuar kundërshtarët e këtij krimi.

Sa më pak argumente e fakte që i mbesin kësaj Qeverie, aq më agresive, autoritare e policore bëhet ajo. Isa Mustafa, Hashim Thaçi e Kadri Veseli, i kanë vënë të gjitha institucionet e Kosovës në funksion të realizimit të tradhtisë së tyre ndaj Republikës dhe kombit tonë.

Nuk ka dhunë e polici që do të mund t’ia bëj të pranueshme popullit të Kosovës faljen e mbi 8000 hektarëve të territorit të tij. Demarkacioni nuk do të kalojë edhe nëse mbushen burgjet me qytetarë e aktivistë opozitarë. Sa më herët që e kuptojnë këtë drejtuesit kriminalë të shtetit tonë, aq më pak pasoja do të vuaj Kosova.

Deputetët e Lëvizjes VETËVENDOSJE! vazhdojnë të arrestohen me urdhra politikë. Policia e Kosovës ka arrestuar sot në Kuvend, deputetin Driton Çaushi për shkak të aksionit të tij politik për ta ndalur procedimin e marrëveshjes për demarkacionin me Malin e Zi.

Këto urdhra të përndjekjes politike për VETËVENDOSJE!-n po zbatohen në kohën e lulëzimit të krimit dhe korrupsionit nga Qeveria. Organet e Drejtësisë kanë shumë punë për të bërë. Ata do të duhej të hetonin vetë Komisionin e Murat Mehës që e ka propozuar këtë marrëveshje, aferën ‘Pronto’, ‘dosjen e shefave’, skandalin e pasaportave e shumë skandale të tjera.

Ne kërkojmë lirimin e menjëhershëm të deputetit Driton Çaushi. Poashtu, e paralajmërojmë qeverinë kuislinge që nuk mund të vazhdojë me kalimin e kësaj marrëveshjeje. Kosova nuk ka tokë për të falur, kurse verpimet e tyre nuk mund të na ndalin e as frikësojnë në mbrojtjen e territorit dhe sovranitetit të Republikës.

LDK-ja që e humbi çdo argument për demarkacionin, nën panikun që do ta humbë edhe Qeverinë, ka filluar të dal nga kontrolli me akuza e shpifje.

LDK-ja që për 15 vite ka qeverisur me krim të organizuar e korrupsion, njësoj si “shefat e shefave” që i ka në koalicion, po e akuzon për korrupsion qeverisjen aktuale e cila e kanë çrrënjosur përfundimisht krimin dhe korrupsionin e kësaj partie nga Komuna e Prishtinës. Ajo madje po shpifë në mënyrën më të paskrupullt për nënkryetarin e Prishtinës, z. Dardan Sejdiu.

LDK-ja ka kërkuar që Dardan Sejdiu të largojë kriminelët nga Komuna e Prishtinës, por ka harruar me qëllim që me të marrë qeverisjen, nga Komuna e Prishtinës janë larguar kriminelët që për 15 vite i kanë dhunuar e zhvatur qytetarët e Prishtinës dhe kjo komunë është shndërruar në institucionin gati të vetëm shtetëror ku kriminelë e matrapazë si ata që po e qeverisin vendin, nuk mund të kenë asnjëherë vend. LDK-ja qëllimisht ka harruar që i pari i saj, Isa Mustafa, sot e asaj dite i ka mbi 70 dosje në Prokurori, për krim e korrupsion në kryeqytet.

LDK-ja flet për “asfalt korruptiv (!)” por harron që vetëm për 3 vite në Prishtinë është punuar e ndërtuar dhjetëra herë më shumë, me sasi e cilësi, se sa për 15 vite të qeverisjes së saj kriminale.

LDK-ja shpreson që duke kërcënuar me “përgjegjësi ligjore” aktivistët opozitar që e kundërshtojnë qeverinë kriminale, do t’i frikësojë qytetarët. Por ajo po harron që është një përgjegjësi pakrahasimisht më e madhe që do ta mbajë ky subjekt: përgjegjësinë historike për shkatërrimin ekonomik, politik e social që po ia bën Republikës sonë.

Lëvizja VETËVENDOSJE!
4 gusht 2016
Prishtinë

Një delegacion i Lëvizjes VETËVENDOSJE! bëri homazhe pranë lapidarit të Heroit Enver Zymberi, policit të vrarë nga strukturat kriminale ilegale të Serbisë në veri të Kosovës me 26 korrik të vitit 2011, në krye të detyrës, në përpjekjen për ta shtrirë sovranitetin në gjithë territorin e vendit.

Shembulli i Enver Zymberit ishte dhe mbetet inkurajues jo vetëm për brezin tonë, por edhe për gjithë brezat e ardhshëm, që synojnë krijimin e atdheut të lirë e sovran. Akti i tij heroik ka bërë që emri i tij të shkruhet në pllakën ku shkruhen emrat e gjithë atyre shqiptarëve që u flijuan për Kosovën me liri, pavarësi e sovranitet të plotë, për Kosovën ku gjithë qytetarët janë të barabartë.

Për fat të keq, ndonëse kanë kaluar pesë vite nga vrasja e heroit Zymberi, vrasësit e tij ende nuk dihen dhe jetojnë në liri, teksa qeveritarët e Kosovës kanë vazhduar negociatat me Serbinë, duke pranuar koncesione e projekte të dëmshme si “Zajednica”.

Gjyqi i realizuar nga EULEX me të dyshuarit për këtë krim të Serbisë doli të jetë një dështim dhe zhgënjim.

Lëvizja VETËVENDOSJE! shpreh gjithmonë respektin dhe nderimin e thellë për punën, veprën dhe vetëmohimin e Enver Zymberit, duke theksuar përherë që emri i heronjve dhe dëshmorëve tanë nuk duhet të harrohet asnjëherë, ashtu sikurse që gjaku i tyre nuk humbet kurrë.

26 korrik 2016
Lëvizja VETЁVENDOSJE!

Sot u mbajt mbledhja e III-të zgjedhore e Këshillit të Përgjithshëm të Lëvizjes VETËVENDOSJE! Kjo mbledhje ishte njëkohësisht edhe përmbyllje e procesit të brendshëm zgjedhor në Lëvizje.

Përgjatë këtyre tre muajve sa zgjati procesi zgjedhor kemi vërtetuar se demokracia e brendshme që sjellë rritje e zgjerim, është mënyra më e mirë për të forcuar strukturat e bashkuar njerëzit. Janë zgjedhur strukturat në mbi 300 Pika nëpër lagje e fshatra anekënd Kosovës që do ta bartin fjalën e Lëvizjes në popull, e porositë e qytetarëve në Lëvizje. Nga gjithsej 26 Qendra të Lëvizjes, 5 kryetare janë gra. Nga ky proces, Lëvizjes i janë bashkuar mbi 4000 anëtarë të rinj, ndërsa 2000 aktivistë janë ngarkuar me detyra konkrete të nivele të ndryshme organizative. Kjo është forca lëvizëse e VETVËVENDOSJE-s në popull drejt ndryshimeve të pashmangshme që na presin. Ky proces zgjedhor ka rritur e forcuar kapacitetet organizative të Lëvizjes që janë kushti dhe mundësia për t’i realizuar qëllimet tona programore.

Me këtë organizim të ri, Lëvizja është e gatshme që t’i zhvillojë edhe më e fuqishme betejat e saj. Marrëveshja për demarkacionin me Malin e Zi nuk duhet të kalojë dhe strukturat e reja të organizatës sonë janë syçelë dhe të gatshme që të mos e lejojnë ratifikimin e kësaj marrëveshjeje të dëmshme.

Struktura udhëheqëse e Lëvizjes, e zgjedhur në këtë mbledhje:

Nënkryetar i Parë: Dardan Sejdiu

Nënkryetare e Dytë: Fatmire Mullhaxha Kollçaku

Sekretar Organizativ: Dardan Molliqaj

Sekretar për Marrëdhënie me Jashtë: Boiken Abazi

Koordinatore për Komitete: Dejona Mihali

Kryesues i Këshillit të Përgjithshëm: Hydajet Hyseni

Zv. Kryesues i Këshillit të Përgjithshëm: Faruk Mujka

Anëtarë të tjerë të Kryesisë:

Albin Kurti

Shpend Ahmeti

Glauk Konjufca

Aida Dërguti

Elvis Hoxha

Dukagjin Gorani

Xhelal Sfeçla

Albulena Haxhiu

Donika Kadaj Bujupi

Ylli Hoxha

Zgjim Hyseni

Sami Kurteshi

Liburn Aliu

Nazlie Bala

Belgzim Kamberi

Rexhep Selimi

24 korrik 2016
Lëvizja VETËVENDOSJE!

Lëvizja VETËVENDOSJE! dhe aktivistët e saj dëshirojnë t’i shprehin ngushëllime familjarëve të viktimave të aktit të dhunshëm e kriminal që ndodhi dje në Mynih. Mes atyre që humbën jetën ishin edhe tre me origjinë shqiptare, e kjo e materializon dhimbjen tonë në një mënyrë edhe më tragjike.

I bashkohemi shpresës mbarënjerëzore që ky lloj i dhunës që po e shoqëron njerëzimin në dy dekadat e fundit, të ndalet.

Pasiguria e frika që janë synim i terrorit, mposhten vetëm përmes një solidariteti të hapur, jopërjashtues, që nuk i diskriminon njerëzit mbi baza origjine e identiteti, e që nuk është indiferent ndaj problemeve të vogla a të mëdha të njeriut, të cilin ideologji të caktuara e kanë lënë të vetmuar.

Pra as braktisje me indiferencë në vetmi, as grumbullim identitar përjashtues. Zgjidhjen ne e shohim tek shtrirja e dorës së solidaritetit, dialogimit, bashkëpunimit, dhe pranimit të njerëzimit si një e tërë mozaikale që nuk qëndron nëse ia heq qoftë edhe njërën pjesë.

23 korrik 2016
Lëvizja VETËVENDOSJE!

Qeveria e Republikës së Kosovës paska reaguar sot kundër aksionit politik të organizuar nga Lëvizja VETËVENDOSJE!, gjegjësisht hedhjes së ngjyrës në veturën e Ministrit të Brendshëm, Skender Hyseni. Është mjaft indikative që edhe reagimi i Policisë së Kosovës është në harmoni të plotë me atë të Qeverisë.

Të dyjat thonë që aksioni ynë ka rrezikuar jetën e njerëzve, por po ashtu thonë se VETËVENDOSJE! me aksionet e saj e paska dëmtuar procesin eurointegrues të Kosovës, apo anëtarësimin e saj në UNESCO. Nëse ka një faktor të brendshëm që ka ndaluar proceset integruese, atëherë janë pjesëtarët e kësaj Qeverie të zhytur në krim e korrupsion. Kurse, sa për UNESCO-n, partnerët e koalicionit të Rashkës shkaktarin e këtij dështimi e kanë bërë president.

Reagimet zyrtare nuk na e shpjeguan dot se si rrezikohet jeta e njeriut nga ngjyra në veturë, apo në cilat raste aksionet tona kanë rrezikuar jetën e njerëzve.
Gjithashtu, Qeveria e Kosovës nuk e tha asnjë fjalë për deportimet e aktivistëve, që përbëjnë suspendim të rendit demokratik drejt vendosjes së diktaturës. Këtë shpjegim ia ka lënë për detyrë policisë. Të gjithë e dimë që deportimit kanë për bazë urdhrat politikë, dhe jo ligjet. Por fakti që për këtë punë po flet Policia, tregon edhe një herë për nivelin e kapjes së shtetit.

Aktivistja jonë nga Tirana, Dejona Mihali, është ndaluar në kufi përmes një urdhri të pastër arbitrar nga Ministria e Brenshme. Asnjë shpjegim, asnjë procedure ligjore dhe asnjë nga kriteret ligjore për të huajt nuk është argumentuar.

Qeveria e Kosovës, duhet ta dijë që qytetarët e Kosovës nuk do të pajtohen kurrë me diktaturën. Sa më shumë që ajo do ta rrisë shtypjen, aq më të vendosur do ta marrë përgjigjen.

Sot, më 18 korrik 2016, rreth orës 07:30 është ndaluar të hyjë në Kosovë Dejona Mihali, Koordinatore e Komiteteve dhe anëtare e kryesisë të Lëvizjes VETËVENDOSJE!

Dejona Mihali është mbajtur për disa orë në kufi, dhe më pas është kthyer në Shqipëri, pasi i është komunikuar një urdhër për ndalim të hyrjes në territorin e Kosovës, pa afat.

Policia kufitare i ka marrë direktivat drejtpërdrejt nga Ministria e Brendshme, dhe komunikimi është kryer në prani të Dejona Mihalit. Është për t’u vënë në dukje se urdhri për ndalimin e hyrjes në territorin e Kosovës është lëshuar në shkurt, por prej asaj kohe e deri sot Dejona Mihali nuk është vënë kurrë në dijeni për ekzistencën e këtij urdhri, as zyrtarisht e as në ndonjë mënyrë tjetër.

Ky vendim arbitrar është marrë pa u bazuar në asnjë ngjarje faktike, në asnjë ligj dhe pa asnjë vendim gjyqësor. Ky arbitraritet i pushtetit të Thaçit, Mustafës dhe i Veselit po e bën Kosovën një vend pa të drejta demokratike e civile, po e shpërfaq si një tirani despotësh të vegjël, që të vetmin funksion e kanë servilizmin ndaj ndërkombëtarëve, Serbisë e mafias.

Ndalimi i Dejona Mihalit i shtohet deportimit të Boiken Abazit dhe Arbër Zaimit, si një fushatë sistematike që qeveria e Kosovës e ka ndërmarrë ndaj veprimtarëve të Lëvizjes që janë nga Shqipëria. Reagimet e zbehta të qeverisë së Shqipërisë na bëjnë të pandehim se kjo fushatë kriminale e arbitrare është e koordinuar mes dy qeverive.

Në vizionin e despotëve bashkimi kombëtar është bashkim i forcave të regresit, i mafias, i dallaverexhinjve, i dhunës, i krimit e i servilizmit. Në vizionin tonë bashkimi kombëtar është bashkim i popullit, i prodhuesve, i qytetarëve të ndërgjegjshëm, i kulturës, i dinjitetit e mbi të gjitha bashkim kombëtar i idealit.

Ai kufi që ndan Kosovën prej Shqipërisë ka qenë armik i idealistëve e i dëshmorëve që na e prunë lirinë, ai kufi është dhe armiku jonë. Ai kufi ka qenë i ashpër ndaj atyre që e deshën këtë vend, ai kufi është sot i ashpër ndaj nesh. Atë kufi që i ndan shqiptarët padrejtësisht e mbrojtën me gjak ushtarët e Titos e të Rankoviçit, e të njëjtët e mbrojnë dhe sot.

Kërkojmë heqjen e menjëhershme të urdhrit të ndalimit për Dejona Mihalin dhe ndalje të persekutimit të aktivistëve të Lëvizjes VETËVENDOSJE! nga Republika e Shqipërisë, përndryshe kjo qeveri do të mbajë një vulë të madhe turpi, e do ta paguajë rëndë përballë historisë.

Mërgatës shqiptare nga Kosova, s’po u ndahen zhvatjet. Përpos shumë investimeve individuale të shkuara dëm nën trysninë e adminisratës së korruptuar nga sundimtarët e Kosovës, si gjithnjë, në prag të pushimeve verore, zyrtarët sundimtarë, nuk harrojnë, që nën emrin e «polisave të sigurimit», të vazhdojnë grabitjet e tyre për mërgimtarët ende pa hyrë brenda kufirit të Kosovës.

Kësaj radhe, rolin e përkrahësit zyrtar të institucioneve të Kosovës e mori vetë kryeparlamentari Kadri Veseli.

Përmes mashtrimit të ri, me qëllimin gjithnjë të vjetër, Kadri Veseli, priti para dy ditësh në konsultë Kryetarin e Këshillit të Byrosë Kosovare të Sigurimeve, Rrahim Pacollin që së bashku me Gani Thaçin, përbëjnë dyshen grabitqare të mërgimtarëve në pikat kufitare të Kosovës.

Publiciteti dhe vetë forma e paraqitjes para opinionit publik, na bëjnë të dyshojmë, se zgjidhja e problemit të Kartonit të Gjelbër do të shtyhet deri në pakufi me vetë përkrahjen e Veselit dhe drejtuesve kryesorë të këtij rrjeti.

Për këtë, aktivistët e Lëvizjes Vetëvendosje në Zvicër, ngrenë zërin dhe denoncojnë publikisht metodën grabitçare ndaj mërgatës.

Deri më tani, nga llogaritë e thjeshta del se nga kjo dyshe, nën kontrollin dhe për egon e tyre të pangopur, janë grumbulluar mbi 120 millionë euro. Në mungesë të transparencës dhe llogaridhënes, para institucioneve, as para opinionit të Kosovës, dyshojmë se pjesa dërmuese e kësaj shume, është përdorur në kundërshtim të çdo rregulli dhe ligji të një shteti të drejtë.

Ngritja e zërit dhe denoncimi para prokurorit të shtetit të bëhet urgjent dhe pa mëdyshje. Dyshja, Rrahim Pacolli dhe Gani Thaçi, të bëhen objekt i hetimit dhe të dërgimohn para gjykatës.

Kjo detyrë, pa hezitim, i takon dhe duhet ta marrë përsipër Prokurori i Republikës së Kosovës Aleksandër Lumezi.

Në të kundërt, me mosgatishmërinë e z. Lumezi, për t’u ballafaquar me këtë fenomen të ”zhvatjes” “ligjore”, rezervojmë të drejtën, që të ngrisim padi penale, pranë organeve të drejtësisë zvicerane. Këtë të drejtë na e mundëson hapësira juridike në kuadër të legjislacionit legal zviceran.

Lëvizja VETËVENDOSJE!
Qendra në Zvicër

Deputeti i VETËVENDOSJE!-s, z. Albin Kurti, sot mori pjesë në shënimin e 21 vjetorit të masakrave dhe gjenocidit në Srebrenicë, ku për pak ditë ushtria dhe vullnetarët serbë patën vrarë së paku 8.327 boshnjakë.

Z.Kurti është ftuar nga Lëvizja e Nënave të Enklavave të Srebrenicës dhe Zhepës, përkatësisht nga kryetarja znj. Munira Subashiq, si dhe nga kryetari i Shoqatës së Viktimave dhe Dëshmitarëve të Gjenocidit, z. Murat Tahiroviq. Sivjet, organizatorët boshnjakë i kanë shpallur të padëshirueshëm në Srebrenicë qeveritarët nga Serbia.

Në Potoçari të Srebrenicës janë varrosur deri më tani 6.377 viktima dhe aty sot u varrosën edhe 121 të tjerë. Z.Kurti mori pjesë në ceremoninë mortore, vizitoi shoqatat e familjarëve dhe bëri nderime te monumenti pranë varrezave e vendosi lule të freskëta në kujtim të të vrarëve. Ai shprehu solidaritetin e tij me të afërmit e viktimave dhe popullin boshnjak.

21 vite më parë në Bosnjë e Hercegovinë ndodhi krimi më monstruoz që ka parë Evropa pas Holokaustit. Në Srebrenicë u vranë e u masakruan mbi 8 mijë njerëz të pafajshëm. As pas 21 vitesh Serbia nuk e ka pranuar fajin për gjenocidin që ka kryer si shtet. Republika Srpska, ky projekt i krijuar nga gjenocidi edhe sot është kërcënim për viktima të reja. Kështu ndodh kur marrëveshjet e paqes bazohen në raporte forcash, dhe jo në vendosje të drejtësisë.

Projekti shovinist serb që ka shkaktuar luftërat në ish Jugosllavi është ende aty. Ai po vazhdon të tolerohet në emër të interesave gjeopolitike e ruajtjes së stabilitetit. Por, historia ka treguar se rreziqet më të mëdha për paqen janë konservizimi i padrejtësisë e formave të ndryshme të diskriminimit.

Aktivistët e Lëvizjes VETËVENDOSJE! zhvilluan një aksion simbolik në lidhje me marrëveshjen e dëmshme të demarkacionit me Malin e Zi. Në këtë aksion që u krye afër banesës ku jeton presidenti Hashim Thaçi, aktivistja Teutë Rrusta tha se Thaçi nuk mund ta falë tokën e Kosovës, madje ai duhet ta kthejë pasurinë e vjedhur bashkë me vëllezërit e tij.

“Sot kemi ardhur në një pikë që nuk kemi pse i diskutojmë faktet që dëshmojnë humbjen e një pjese të territorit të Kosovës nga marrëveshja për demarkacion. Ajo çfarë duhet vënë në pah vazhdimisht është lidhja në mes të fatit të Hashim Thaçit në politikë përmes faljes së territorit”, tha Rrusta.

Hashim Thaçi ka shumë prona, pasuri e rrjet të organizuar për këtë gjë. Në ndërkohë që ai fal tokë të Kosovës që të bëhet president, dhe nuk e pranon gabimin në mënyrë që të vazhdojë të jetë president. Ndërkohë, atij i duhet të mbetet president që të mos jetë prapa grilave.

“Thaçi e përdor pozitën e Presidentit për t’u arratisur nga burgu”, shtoi ajo.

Qeveria Mustafa, nga dy kushtet kryesore për liberalizim përmend vetëm njërin, atë të demarkacionit, por kushti tjetër nga BE-ja është luftimi i korrupsioni dhe krimit të organizuar.

Nuk do të lejojmë, në asnjë mënyrë dhe për asnjë çmim që të ratifikohet kjo marrëveshje. Ne do ta përdorim tërë kapacitetin tonë mendor e organizativ për ta penguar një gjë të tillë.

9 korrik 2016
Lëvizja VETËVENDOSJE!

Lëvizja VETËVENDOSJE! u ftua të marrë pjesë në Këshillin e Internacionales Socialiste që u mbajt në Selinë e Organizatës së Kombeve të Bashkuara (OKB) në Gjenevë, Zvicër, në datat 1-2 korrik, 2016. Boiken Abazi, Sekretar për Marrëdhënie me Jashtë, e përfaqësoi Lëvizjen në këtë mbledhje të Këshillit të Internacionales.

Në këtë Këshill morën pjesë delegatë nga mbi 90 parti socialdemokrate nga e gjithë bota. Disa prej delegatëve të partive nga Evropa në këtë Këshill përfshinë Partinë Socialiste të Francës, Partinë Socialiste të Belgjikës, Partinë Socialdemokrate të Finlandës, Partinë Socialdemokrate të Hungarisë, Partinë Socialdemokrate Austriake, Partinë Popullore Republikane të Turqisë, Partinë Socialiste të Spanjës, e shumë parti të tjera nga Amerika Latine, Afrika dhe Azia.

Këshilli ia nisi me një minutë heshtje në nderim të viktimave të sulmit terrorist që ndodhi para pak ditësh në aeroportin e Stambollit në Turqi. Më tej Këshilli u përqendrua në tre tema kryesore: përforcimi i reagimit politik dhe humanitar ndaj sulmeve terroriste dhe konflikteve të armatosura, mbrojtjen dhe mbështetjen e përpjekjeve për demokraci në vende të ndryshme të botës, si dhe përpjekjen për të ndërtuar një model ekonomik që e sfidon dhe e mund pabarazinë ekonomike mes shteteve dhe brenda secilit shtet.

Gjatë Këshillit, Sekretari Abazi pati mundësinë të takohet me dhjetëra delegatë të partive pjesëmarrëse për të prezantuar situatën ekonomiko-politike në Kosovë si dhe programin e VETËVENDOSJE!-s. Më tej, Lëvizja u ftua për të marrë pjesë edhe ne Kongresin e Internacionales Socialiste që do të mbahet në fund të këtij viti.

2 korrik 2016
Lëvizja VETËVENDOSJE!

Nga portalet mësuam që Policia e Malit të Zi e paska hequr tabelën “Mirësevini në Republikën e Kosovës” (në tri gjuhë) dhe flamurin kombëtar shqiptar të cilat i vendosëm dje te Varri i Nuses, pra te pika kufitare midis Republikës së Kosovës dhe Malit të Zi. Ne e dënojmë aktin e policisë malazeze që shkel territorin e shtetit të Kosovës dhe ndërhyn tinëzisht për të vjedhur tabela mirëseardhjeje dhe flamuj të shtetit tjetër.

Pesë deputetë të Kuvendit të Kosovës nga Lëvizja VETËVENDOSJE! qëndruan dje mbi një orë në këtë pikë kufitare. Policia e Malit të Zi, sipas banorëve atje, shfaqet andej pari çdo 15 minuta, mirëpo ajo nuk erdhi fare të hënën. Të martën e paskan vjedhur shenjimin e drejtë të kufirit që bëmë.

Varri i Nuses ndodhet 29 km larg Pejës dhe 18 km larg Rozhajës, si dhe 8 km larg nga pika e kontrollit të policisë së Kosovës e 2 km nga ajo e Malit të Zi. Policia e Kosovës (PK), por edhe Forca e Sigurisë së Kosovës (FSK), duhet të shkojnë te Varri Nuses sepse janë të thirrur dhe paguhen për ta mbrojtur kufirin e territorit tonë. Deputetët tanë do ta vendosin sërish tabelën e flamurin atje, por ata nuk janë policë që t’i ruajnë ato 24 orë në ditë e 7 ditë në javë. PK dhe FSK duhet ta bëjnë këtë. Ato nuk është e thënë që ta presin qeverisjen e VETËVENDOSJE!-s për këtë gjë.

Ndërkohë, ne nuk lejojmë ratifikimin në Kuvend të marrëveshjes private të Thaçit me Malin e Zi për demarkacionin e kufirit i cili na i humbet mbi 8.200 hektarë. I ashtuquajturi President Thaçi duhet të përgjigjet për krimin dhe tradhtinë e bërë.

Historia jonë kombëtare njeh disa raste kur politikanë të caktuar, për interesa personale, u kanë shitur shteteve fqinje pjesë të territorit tonë. Përkundër përpjekjes së Hashim Thaçit dhe qeverisë së Isa Mustafës për t’ia shitur Malit të Zi edhe mbi 8000 hektarë të Kosovës, ne nuk do të lejojmë që kjo histori të na përsëritet.

Pika kufitare me Malin e Zi, për qytetarët e Republikës së Kosovës, është në Kullën e Zhlepit dhe tek Maja e Çakorrit. Nuk do të pranojmë në asnjë mënyrë që për interesa personale të një grupi kriminal në pushtet, të zvogëlohet territori i Kosovës.

I bëjmë thirrje edhe njëherë Qeverisë së Kosovës që të mos e provokojë situatën më tutje duke e sjellë në Kuvend atë marrëveshje tradhtie.