Deponimi i kallëzimit penal nga Lëvizja VETËVTNDOSJE! në Prizren me 8 gusht të vitit 2012 ndaj Drejtorisë Komunale të Arsimit për keqpërdorim të mjeteve financiare kushtuar ‘Javës së Remzi Ademajt’, tashmë ka marr formën e dënimit me burg efektiv për zyrtarët e përfshirë në rast. Gjithashtu lajmi i fundit për ngritjen e aktakuzës ndaj zyrtarëve të Drejtorisë së Inspektoratit pas denoncimit të asamblesitëve tanë në Kuvendin Komunal të Prizrenit për uzurpimin të paligjshëm të pronës publike dhe keqpërdorimin e detyrës dhe autoritetin zyrtar paraqet lajm të mirë dhe veprim të duhur të organeve të drejtësisë me qëllim të konsolidimin e shtetit ligjor dhe luftimin e korrupsionit dhe kriminalitetit të pushtetarëve brenda institucioneve të vendit.

Pas rasteve të fundit konsiderojmë se qeverisja e PDK-se në Prizren nuk ka legjitimitet të vazhdojë mandatit qoftë edhe për një ditë. Dorëheqja e Kryetarit të Komunës dhe estabilishmentit të tij janë e vetmja rrugë për ta nxjerr Komunën e Prizrenit nga gjendja e jashtëzakonshme në të cilën ndodhet.

Kurse ne si Lëvizje VETËVENDOSJE! zotohemi se edhe në të ardhmen do të jemi të pakompromistë përballë krimit të organizuar, korrupsionit dhe keqqeverisjes në të gjitha nivelet e pushtetit dhe se përpjekjet tona për drejtësi dhe zhvillim nuk do të ndalen asnjëherë deri në bërjen e plotë të shtetit!

Lëvizja VETËVENDOSJE! në Prizren

Një delegacion i Lëvizjes me në krye nënkryetaren Fatmire Kollçaku, vizituan Komunën e Preshevës ku zhvilluan takime me drejtuesit e kësaj komune dhe vizituan maternitetin jashtëspitalor.

Lëvizja VETËVENDOSJE! vazhdimisht ka bërë thirrje që Qeveritë e Kosovës dhe Shqipërisë të përfshihen në mbrojtjen e të drejtave të shqiptarëve që jetojnë në Preshevë, Medvegjë e Bujanoc.

Çdo marrëdhënie me Serbinë do të duhej të kushtëzohej nga Kosova dhe Shqipëria me ndaljen e menjëhershme të shtypjes së shqiptarëve në këtë pjesë dhe me garantimin e të gjitha të drejtave për ta.

Shefi i grupit parlamentar të Lëvizjes VETËVENDOSJE!, Glauk Konjufca së bashku me deputeten Shqipe Pantina dhe anëtarët e Kryesisë Ylli Hoxha dhe Marigonë Drevinja takuan sot deputetin nga radhët e SPD-së në Bungestag, Josip Juratoviç.

Në takim u diskutua rreth çështjeve ekonomike të Kosovës. Përgjatë 17 viteve të pasluftës nuk është rindërtuar potenciali industrial në Kosovë. Përkundrazi, nëpërmjet privatizimit të egër dhe pa planifikim vetëm sa kanë mbetur mijëra të papunë. Në Kosovë duhet të ndërtohen strategji të reja ekonomike dhe duhet të hulumtohet potenciali prodhues i Kosovës.

Të nderuar qytetarë, deputete dhe deputetë,Javën e kaluar ndodhi një tragjedi, një vajzë 3 vjeçare duke lozur në një rrugicë ku banonte vdiq nën murrin e një shtëpie e cila ishte nën mbrojtje të shtetit. Atë ditë, po ashtu u lënduan 2 persona.
Kaluan më shumë një javë nga tragjedia dhe asnjë reagim nga institucionet përgjegjëse. Reagimi I vetëm institucional ishte vendosja e gypave të kanalizimit rreth objekteve të trashëgimisë kulturore në Prizren. Nuk ka as inicim të ndonjë rasti ndaj zyrtarëve (në prokurori), nuk ka kërkesë për përgjegjësi e as deklaratë nga kryeministri, ministra apo personi i cili veten e quan “president”.
Qeveritarët e Prizrenit këtë ngjarje u munduan të paraqesin si fatkeqësi.
Po, fatkeqësia e Xhaneta Gashit ishte që ajo jeton ne Komunën e Prizrenit ku një kryetar I dënuar qe tre vjet vazhdon të mban postin e tij. Ku shumë drejtorë komunale janë nën hetime por gjykimet e tyre vazhdojnë në pafundësi. Prizreni ku njerëzit vriten nga gangsterë ngase prokuroria nuk bën punën e saj. Prizreni ku fajdeja bën biznes.
Pastaj si mund të jetë fatkeqësi kur një vajzë jep shpirt nën rrënojat e një shtëpie që është nën mbrojtje të shtetit?
A mund të jetë fatkeqësi kur ekzistojnë fonde për mirëmbajtjen e këtyre shtëpive dhe kur kemi institucione që duhet të mirëmbajnë ato?
A mund të quhet fatkeqësi kur organet kompetente e neglizhojnë punën e tyre dhe si pasojë e kësaj shkaktojnë vdekje? Ligjet përcaktojnë qartë përgjegjësitë e Komunës së Prizrenit dhe të ministrive sipas ligjit ato duhet të mbrojnë qendrën historike të Prizrenit dhe të ofrojnë siguri për qytetarëve.
Nëse mjeku neglizhon punën dhe pacienti vdes, mjeku shkon në burg. Nëse shoferi i veturës neglizhon vozitjen dhe e vret këmbësor ai futet në burg. Por në Kosovë nëse një zyrtar nuk e bën punën e tij dhe si pasojë njerëzit vdesin kjo nuk konsiderohet si krim.
Në vitet e kaluara shumë organizata joqeveritare dhe opozita në Prizren kanë kërkuar që institucionet të ndalin degradimin e qendrës historike dhe të ndajë fonde emergjente për të ndërhyrje dhe riparime tek objektet e rrezikuara nga shembja. Degradim kjo që u bë me neglizhence, por edhe me djegie dhe rrënim, për ti hapur vend bizneseve të lidhura me pushtetarët e Prizrenit. Kështu nuk do të anëtarësohemi KURRË në UNESCO.
Qendra historike e Prizrenit është pasuria më e madhe kulturore e Kosovës prandaj duhet të ndahen fonde emergjente për mbrojtje. Duhet të ndahen minimum 10 milion euro për riparim dhe mirëmbajtje të qendrës historike.
Po ashtu duhet të krijohet komisioni hetimor për të shikuar se ku çalon implementimi i ligjeve në Prizren dhe pse ka ardhur deri te kjo gjendje. Pra një komision parlamentar për hetimin e degradimit të Qendrës Historike të Prizrenit. Ftoj të gjithë deputetë që e duan Prizrenin të përkrahin formimin e këtij komisioni duke vënë nënshkrimet e tyre.
Nëse lejojmë shkatërrimin e trashëgimisë kulturore të Prizrenit kot e kemi anëtarësimin në UNESCO! Ju faleminderit!

Në këtë fotografi shihen bashkë Kryeprokurori Aleksandër Lumezi, deputeti i ShIK-ut, Elmi Reçica, dhe kryeinspektori i Inspektoriatit të Punës, Basri Ibrahimi. Nuk mund të ketë kështu luftim të krimit e korrupsionit, por vetëm zgjerim të rrethit të bashkëpunëtorëve në krim e korrupsion. Të tre këta nuk kanë problem me marrje të vizave Schenghen, por për shkak të kësaj sorte njerëzish Kosovës i mohohet liberalizimi i vizave.

Ju lutem shpërndajeni sa më shumë këtë foto!

Misioni i EULEX-it erdhi në Kosovë me premtimet për luftim të krimit dhe korrupsionit si dhe forcim të sistemit vendor të drejtësisë. Asnjëra nga këto dy premtime nuk u realizua ngase qëllimi i vërtetë i EULEX-it asnjëherë nuk ka qenë drejtësia në Kosovë. Kjo trupë që nga fillimi ka pasur për qëllim menaxhimin e krizave dhe ruajtjen e stabilitetit. E ruajtja dhe stabilizimi i situatës për realitetin kosovar nënkupton stabilizim të krimit e korrupsionit që rrënjët i ka në majën e piramidës shtetërore. Si rezultat i kësaj paradigme, EULEX-i u përfshi edhe vetë në menaxhimin e politikës ditore, duke ndërtuar raste sipas porosive dhe interesave të partive në pushtet. Kjo e bëri EULEX-in pjesë të organizimit kriminal të pushtetit në Kosovë.

Institucionet e Kosovës kanë nevojë për EULEX-in sepse autoriteti ekzekutiv i tij u shërben atyre si alibi për mungesën e përgjegjësisë, kurse EULEX-i e do Kosovën pafundësisht me krim e korrupsion sepse kështu ndërtohet justifikimi për t’ia zgjatur vetes jetën.

EULEX-it nuk duhet t’i zgjatet jeta sepse prania e tij nuk mund të jetë e dobishme në asnjë rrethanë. Kosova duhet të pushojë se trajtuari nga BE si çështje e sigurisë në kuadër të menaxhimit të krizave. Nga kjo paradigmë duhet kaluar tek nevoja për drejtësi, zhvillim e mirëqenie. E drejtësia nuk vjen asnjëherë nga jashtë dhe vetë EULEX-i është dëshmi për këtë.

Tash e një vit, në fshatin Korishë të Komunës së Prizrenit, shembjet e dheut janë duke rrezikuar qytetarët e këtij fshati. Për këtë çështje, banorët e këtij fshati nuk lanë derë pa trokitur si në institucionet komunale ashtu edhe në ato qendrore, si dhe kanë organizuar peticionin të cilin do ta dorëzojnë në organet kompetente të Komunës së Prizrenit.

Asambleisti i VETËVENDOSJE!-s në Prizren, Arbër Rexhaj, tha se në pjesën e sipërme te fshatit Korishë javëve të fundit dheu ka përbirë disa objekte, ndërsa ka prekur edhe shtëpitë. “Prona dhe sidomos jeta e qytetarëve është në rrezik. Nëse nuk intervenohet brenda një jave, Korisha rrezikon ta pësojë njëjtë si Restelica, madje edhe më keq. Drejtoria e Emergjencës duhet të reagojë menjëherë dukë bërë evakuimin e dy lagjeve të këtij fshati, ashtu që t’i parandalojmë dëmet në njerëz nga një katastrofe të mundshme”, tha ndër të tjera Rexhaj, duke shtuar se Drejtoria e Emergjencave po mundohet me një ekskavator ta sanojë gjendjen, por një gjë e tillë është e pamundur.

Drita Millaku, asambleiste e Lëvizjes në Prizren, i bëri apel Komunës dhe drejtorive përkatëse që të intervenojnë sa më shpejt në këtë fshat. “Shpëtimi i jetës dhe pronës së qytetarëve është obligim për të gjithë ne, prandaj kërkojmë ndihmën e të gjithëve ashtu që të rritet presioni publik ndaj institucioneve gjegjëse. Nëse nuk intervenohet menjëherë, përgjegjëse për gjendjen atje do të jenë institucionet”, theksoi Millaku.

Lëvizja VETËVENDOSJE! kërkon nga Komuna e Prizrenit që urgjentisht t’i qaset këtij problemi me seriozitetin më të madh, sepse çdo vonesë mund të jetë fatale për shumë banorë të Korishës.

Qendra e Lëvizjes VETËVENDOSJE! në Deçan kundërshton vendimin e Gjykatës Kushtetuese lidhur me pronat e ndara për manastirin e Deçanit dhe njëherit përkrahë deklaratën e përbashkët kundërshtuese të miratuar me datë 25 maj 2016 në Kuvendin Komunal të Deçanit ku të gjitha subjektet politike bashkarish me Lidhjen e Historianëve nënshkruan zotimin për t’i dalë kundër këtij vendimi.

Ky vendim i Gjykatës Kushtetuese është i papranueshëm ngase përveç se shpronëson punëtorët e ndërmarrjeve “Iliria” dhe “Apiko” duke iu referuar legjislacionit të vitit 1997 ku këto prona në mënyrë të dhunshme nën kushte okupimi u bartën në pronësi të Manastirit të Deçanit, legjitimon edhe politikat fashiste, kolonizuese e gjenocidale të Serbisë ndaj Kosovës e shqiptarëve.

Është e habitshme se si institucione të larta si Gjykata Kushtetuese marrim një vendim për të legjitimuar vendimet e një regjimi që u cilësua si regjim kriminal e gjenocidal nga e gjithë bota në atë kohë.

Më pak e habitshme është përkrahja që Hashim Thaçi i bën këtij vendimi duke qenë se për këtë të fundit jemi mësuar që më shumë se një mungesë ndjeshmërie të shohim një gatishmëri të hapur për të japë territore në pushtete lokale brenda e jashtë vendit.

Ne si Qendër e Lëvizjes VETËVENDOSJE! në Deçan do ta përkrahim dhe do të jemi pjesë e çdo organizimi lokal dhe qendrorë që vihet në kundërshtim të këtij vendimi absurd të Gjykatës Kushtetuese.

Gratë duhet të angazhohen politikisht per ta ndryshuar raportin e pabarazisë në shoqëri. Lëvizja VETËVENDOSJE! i fton ato që të bëhen pjesë e procesit zgjedhor të brendshëm i cili po ndodhë në Lëvizje. Këto u thanë gjatë tubimit me gra.

“Sot e kemi thirrur këtë takim sepse i kemi shpallë zgjedhjet e brendshme. Kjo është mundësi e mirë për demokratizimi i shoqërisë. Sa më shumë gra që angazhohen, mundësitë për një shoqëri më të barabartë, janë më të mëdha”, tha nënkryetarja e Lëvizjes VETËVENDOSJE!, Fatmire Kollçaku.

Ajo shtoi se vetëm një subjekt politik që i promovon politikat barazimtare përbdlrenda subjektit mund të flasë edhe për barazinë në shoqëri.

“Çdo grua sot është e mbingarkuar. Pavarësisht nësë është e punësuar ose jo, ajo është e angazhuar në shtëpi ose jashtë saj. Gruas duhet t’i hiqet barra e rëndë e punëve të shumta dhe kjo bëhet duke bërë politika publike”, shtoi nënkryetarja Kollçaku.

Ne nuk kemi dilema se a duhet të jetë gruaja e pranishme aty ku merren vendime të rëndësishme. Të gjitha vendimet politike e ndikojnë atë, ndaj ajo duhet të jetë pjesë e vendimmarrjes.

Kurse nënkryetarja e Kuvendit të Kosovës, Aida Dërguti foli mbi historikun e angazhimit të grave e vajzave në Lëvizje. Ajo përmendi edhe emra të përveçëm të aktivisteve shembull.

“Teuta dhe Marigona, dy emra grash të shquara në histori, rastisi të jenë bashkohanike dhe u bënë shoqe në Lëvizjen VETËVENDOSJE!. Ato iu bashkuan Lëvizjes, në kohën kur në tërë Kosovën kishim disa dhjetëra aktivistë. Aktivistët si Marigona dhe Teuta, u bënë boshti i Lëvizjes dhe shembulli më i mirë për aktivistët që erdhën më tej”.

Dërguti përmendi edhe aktivistet Alexanda Channer dhe Dejona Mihali të cilat kanë ardhur në Prishtinë duke lënë punët dhe angazhimet e mëparshme për t’u përqendruar me tërë kapacitetin e tyre në Lëvizje.

Për të arritur barazinë në vendimmarrje, pikënisja është angazhimi e kontributi i përbashkët.

Edhe Sekretarja e Gruas Aktiviste, Nazlie Bala i ka ftuar gratë që të jenë pjesë e procesit zgjedhor të Lëvizjes VETËVENDOSJE!

“Gratë dhe vajzat janë pjesë e barabartë e politikës. Të votosh është një lejekalim për sferën publike. Ne duhet të luftojmë e punojmë më shumë për barazi”, tha Bala. Ajo theksoi më tej, se kjo punë nuk i takon vetëm një grupi të shoqërisë.

“Po nuk patëm përfshirje të madhe të grave e vajzave, nuk mund të bëjmë ndryshime në shoqëri. Lëvizja VETËVENDOSJE! është e vendosur për ndryshime të mëdha dhe kjo është e mundur vetëm me angazhimin e madh të grave e vajzave.

71 vite më parë, më 9 Maj 1945, në kontinentin e Evropës përfundoi lufta më e përgjakshme që kishte parë njerëzimi ndonjë herë – lufta kundër nazifashizmit. Kjo datë shënon triumfin e rezistencës popullore kundër makinerisë vrasëse; të emancipimit kundër errësirës ideologjike të nazifashizmit; të popujve kundër perandorisë; të barazisë kundër shfrytëzimit.

5 vite më pas, po më 9 Maj 1950, u lidh marrëveshja e parë midis Gjermanisë Perëndimore dhe Francës për bashkimin e industrive të çelikut dhe thëngjillit, për të vazhduar pastaj me marrëveshje tjera ekonomike, dhe krahas kësaj zgjerimin e shteteve nënshkruese. Bashkimi Evropian që njohim sot kështu kishte filluar, ndaj 9 Maji është sot dita e Evropës.

Projekti i Evropës së bashkuar kishte parakusht barazinë midis popujve, dhe lirinë e tyre për t’u bashkuar vullnetarisht në projektin e përbashkët. Prandaj, 9 Maji 1950 s’do të ishte i mundur pa 9 Majin e vitit 1945, ditën e fitorës kundër fashizmit.

Paqja e qëndrueshme në Evropë, sot të bashkuar por historikisht në luftë, ka në themel dy shtylla të forta: barazinë mes shteteve dhe qytetarëve të atyre shteteve; paprekshmërinë e kufijve të këtyre shteteve. Vetëm duke e njohur njëri tjetrin në mënyrë reciproke dhe si të barabartë, dhe vetëm duke ia njohur kufijtë shtetëror si të pacenueshëm, u bë i mundur projekti për bashkëpunim reciprok mes shteteve në të mirë të të gjithëve.

Bashkimi Evropian natyrisht se ka evoluar politikisht, ekonomikisht e në aspektin social. Por BE nuk do të ishte e njëjtë nëse do të devijonte nga parimet bazë që themelojnë vlerat politike të saj. Këto vlera nuk duhet të jenë të zbatuara dhe të zbatueshme vetëm brenda BE-së, por edhe të promovohen jashtë saj.

Është thellësisht antievropiane që sot t’i kërkohet Kosovës ndarje e brendshme në vija etnike, pabarazi të qytetarëve sipas përkatësisë kombëtare, të dyja këto që rrjedhin nga ‘Zajednica’. Është në kundërshtim flagrant me 9 Majin 1945 ky paqëtim, përmes koncesioneve, i politikës shoveniste të qeverisë në Beograd.

Siç është në kundërshtim flagrant me parimet bazë të Evropës së bashkuar të insistohet që Republika e Kosovës ta zbatojë Marrëveshjen për demarkacionin me Malin e Zi dhe kështu të heq dorë nga mbi 8200 hektarë të territorit të vet.

Projekti evropian u bë model për shtetet jashtë tij, pikërisht sepse ishte sinonim i lirisë dhe të drejtave, barazisë e solidaritetit, zhvillimit e jetës së mirë. Janë këto vlerat evropiane që duhet afirmuar përkundër erërave të këqija që sot po i fryjnë ksenofobisë, përjashtimit e ndarjeve.

9 maj 2016
Lëvizja VETËVENDOSJE!

Lëvizja VETËVENDOSJE! përshëndet protestën që do të mbahet të hënën më 9 maj në Shkup. Kjo protestë është shprehje e përbashkët e organizimeve të ndryshme qytetare shqiptare në Maqedoni, dhe adreson problematikat shqetësuese që ka krijuar pabarazia etnike të cilën tash e shumë vjet e përjetojnë shqiptarët në Maqedoni.

Është për t’u vlerësuar fakti se kjo protestë po mbështetet nga të gjitha subjektet opozitare shqiptare, si dhe nga grupe të ndryshme të interesit qytetar e shoqëror të shqiptarëve në Maqedoni, të cilat më në fund kanë gjetur fjalën e përbashkët për t’u organizuar.

Lëvizja VETËVENDOSJE! përkrah secilin organizim të përbashkët të shqiptarëve në Maqedoni që i kundërvihet politikave diskriminuese që kanë prodhuar qeverisjet e deritanishme të Gruevskit dhe aleatëve të vet.

Formula mbi të cilën është krijuar Maqedonia është një formulë delikate. Ky shtet nuk mund të ketë stabilitet, në kurriz të shqiptarëve. Ndaj e vetmja mënyrë që Maqedonia të mbijetojë, është pranimi i shqiptarëve si popull tërësisht i barabartë, si për sa i takon të drejtave qytetare, ashtu edhe sa i takon të drejtave kombëtare. Është e vërtetë e mirënjohur se shqiptarët jetojnë në trojet e tyre historike, ku nuk janë minoritet e as imigrantë, ndaj dhe nuk mund t’i nënshtrohen diskriminimit maqedonocentrik. Shqiptarëve duhet t’u lejohet të kenë institucionet e tyre, në secilin sektor e segment, në secilën fushë të shtetformimit, të politikbërjes, të krijimit kulturor dhe të prodhimit ekonomik.

Shpresojmë që bashkimi i shqiptarëve në protestën e datës 9 maj, të çelë një perspektivë të re, emancipuese për shqiptarët e Maqedonisë. Një perspektivë që duhet t’i japë fund pabarazisë.

Ne besojmë se privimi i deritashëm i qytetarëve të Kosovës nga lëvizja e lirë brenda zonës Schengen ka qenë i padrejtë. Qytetarët nuk duhet ta paguajnë çmimin e krimit të organizuar e korrupsionit të politikanëve në pushtet me të cilët eksponentë të ndryshëm ndërkombëtarë (përfshirë ata të BE-së) kanë punuar ngushtë.

Ne e përshëndesim rekomandimin për liberalizimin e vizave të qytetarëve të Kosovës. Mirëpo, ne duhet të këmbëngulim që trajtimi i vendeve të ndryshme të Ballkanit të bëhet i njëjtë për të gjithë, dhe jo të përdoren kute të ndryshme varësisht nga ndikimi e interesat.

Kërkesa që Republikës së Kosovës ta ratifikojë Marrëveshjen për demarkacionin e kufirit me Malin e Zi para se çështja e liberalizimit të shkojë tek Parlamenti Evropian, është e padrejtë, kur merret parasysh sa e dëmshme është marrëveshja aktuale me Malin e Zi. Një kërkesë të tillë nuk e ka pasur Mali i Zi kur i janë hequr vizat qytetarëve të atij vendi e as vendet tjera. Republika e Kosovës nuk e ka të demarkuar as kufirin me Serbinë. Por kjo nuk është vënë si kërkesë. Nëse kufijtë e demarkuar qartë janë kërkesë e zakonshme atëherë është dashur që të kërkohet demarkimi i të gjithë kufijve ndërkombëtar të Kosovës. Nëse jo atëherë as ky me Malin e Zi nuk duhet të jetë si kërkesë shtesë.

Lëvizja VETËVENDOSJE! beson në parimet e vlerat si demokracia, liria e barazia, që themelet e tyre i kanë në kontinentin e vjetër.

Lëvizjes VETËVENDOSJE! iu bashkuan anëtarë të kryesisë dhe forumit rinor, në krye me ish-kryetarin e NISMËS në Ferizaj, Valon Ramadanin. Këtë e bëri të ditur në një konferencë Koordinatori i Qendrës së Lëvizjes VETËVENDOSJE! në Ferizaj, Emrush Xhemaili, bashkë me Kryetarin e Lëvizjes VETËVENDOSJE!, Visar Ymeri.

Ramadani, tash aktivist i Lëvizjes, tregoi se si bindjet e tij politike nuk kanë ndërruar për shkak se ka ndërruar subjektin politik ku bën pjesë, por pikërisht ato bindje kanë mbetur të njëjta, krahas ndryshimit që ka pësuar NISMA për Kosovën.

Kryetari Visar Ymeri iu falenderua aktivistëve për punën dhe rezistencën e këtyre 7 muajve të fundit. Fjalën e tij e përmbylli duke thënë se si pasojë e qeverisjes së keqe që mbretëron në Kosovë, në mënyrë të pashmangshme vjen rritja e hovshme e Lëvizjes VETËVENDOSJE!.

Lëvizja VETËVENDOSJE! po rritet sepse populli po zgjohet për ta rritur kundërshtimin ndaj qeverisjes së keqe.

Policia zvicerane arrestoi ushtarin e Ushtrisë Çlirimtare të Kosovës, Albert S., për ta ekstraduar në Serbi. Kjo u bë me kërkesë të Serbisë, shtet ky që ka bërë krime sistematike me gjithë aparatin shtetëror nëpër gjithë Ballkanin.

Tendenca për ta barazuar gjenocidin serb në Kosovë me luftën tonë çlirimtare, është e padrejtë dhe e papranueshme. E për këtë, fajin më të madh e kanë qeveritë e pasluftës në Kosovë, të cilët punuan më ngulm për ta maskuar Serbinë përballë Evropës, se kinse ajo ka ndryshuar dhe me të mund të flasim për fqinjësi të mirë. Serbia ishte dhe vazhdon të mbetet armike ndaj Kosovës. Nuk ka vend për negociata pa kërkuar falje për krimet e kryera në Kosovë; pa i kthyer të pagjeturit; pa i paguar dëmet e luftës; pa i kthyer artefaktet , fondin pensional, dhe origjinalet e librave kadastral; pa i dorëzuar kriminelët e luftës; pa e njohur Republikën e Kosovës.

Populli i Kosovës përmes Ushtrisë Çlirimtare të Kosovës ka bërë luftë të drejtë, të domosdoshme, çlirimtare. Kosova sot është shpallur shtet i pavarur dhe sovran. Për çdo shkelje eventuale, individuale, gjykimi duhet të bëhet në Kosovë, në vendin ku janë zhvilluar luftimet.

Prandaj, ekstradimi i ushtarëve të UÇK-së në Serbi është i padrejtë e i papranueshëm. “Drejtësia” e shtetit të Serbisë, secilin nga ne e nxjerrë fajtor. Sepse luftuam për liri e bashkim e kombëtar, duke ia përmbysur kështu rendin kushtetues atij shteti fashist, dhe duke ia pamundësuar planet për shfarosjen e popullit shqiptar.

Lëvizja VETËVENDOSJE!
1 maj 2016

Sot Komiteti për Shëndetësi mbajti një konferencë për media lidhur me një problem të rëndë në sektorin e shëndetësisë i cili prek të gjithë popullatën e Kosovës.

Në konferencë foli doktor Mirsad Shkreta i cili solli në vëmendje se qytetarët në Kosovë po bien pre e një zinxhiri të gjatë e të komplikuar që po pengon pajisjen e qytetarëve me sigurim shëndetësor publik.

Shkreta tha se “në mars kemi mbajtur një konferencë në lidhje me mosimplementimin e Sistemit informativ Shëndetësor dhe keqpërdorimet financiare për një pjesë të projektit siç është kontrata e nënshkruar nga Ymer Shahini, (i afërmi i Enver Hoxhajt) në emër të kompanisë “PRINTEC”. Po ashtu kemi shprehur shqetësimin rreth dëmit financiar (keqpërdorimit të parasë publike) dhe dëmit në sistemin shëndetësor.

Ne kemi pritur këto javë reagimin nga Ministria e Shëndetësisë apo organe të tjera shtetërore të cilat kanë detyrimin ligjor të përgjigjen. Si ndodhi pra që një projekt jetik për shëndetin e qytetarëve për të cilin janë dhënë mbi 7 milionë euro (nga donatorë dhe qeveria) nga 2009 deri me 2015 kur dhe duhet të fillonte nga puna nuk ka dhënë asnjë efekt tek përmirësimi i marrëdhënies me pacientët në Kosovë. Ministria po hesht. Prokuroria po ashtu. Teksa jetët e pacientëve po vihen në rrezik për çdo ditë.

Tash në vend të hetimeve e përgjigjeve lidhur me këtë përgjegjësi të madhe ndaj qytetarëve kemi fillimin e një kontrate të re në Ministrinë e Shëndetësisë me mbi 9 milionë euro ku përfshihet edhe Studimi i fizibilitetit për Sistemin informativ shëndetësor me një shumë prej 250 mijë euro. Pra do të presim e do të paguhet sërish deri në 2018 nëse gjithçka shkon mirë që të funksionalizohet Sistemi informativ e që më pastaj të fillojnë Sigurimet Shëndetësore.

Duhet të kemi parasysh se sistemi nuk nënkupton vetëm hardware dhe software por edhe modulet e caktuara që janë licencimi i mjekëve, edukimi i vazhdueshëm, regjistri i barnave, udhërrëfyesit, klinik, etj. Por për këto nuk ka tenderë. Këto bëhen me vendime politike e profesionale të qeverisjes si dhe me guximin për t’i prerë fijet e krimit të organizuar në sektorin e shëndetësisë.

Në vend të këtyre ne kemi para vetes një qeveri që përbëhet nga individë të cilët direkt dhe indirekt janë pjesë e kësaj skeme korruptive.

Në ndërkohë nga Ministria e Shëndetësisë ka tentativa për të filluar me mbledhjen e primit nga pagat e qytetarëve të Kosovës për Fondin e Sigurimeve. Ne paralajmërojnë qytetarët që pas vjedhjes disa vjeçare lidhur me infrastrukturën e Sistemit Informativ po përgatitet edhe vjedhja e radhës në emër të sigurimeve shëndetësore.

Ligji për Sigurimet Shëndetësore kërkon që paraprakisht të sigurohen shërbimet, çmimorja, pajisja me kartela e 75% të të punësuarve dhe 75% e kategorive që lirohen nga pagesa për sigurim shëndetësor. Asnjë nga këto nuk mund të bëhet pa e pasur të kompletuar Sistemin informativ Shëndetësor. E për ta pasur Sistemin informativ, duhet së pari të mos vidhen e keqpërdoren tenderët për këtë infrastrukturë, të licensohet i gjithë personeli shëndetësor në Kosovë, të hartohet e zyrtarizohen protokollet për trajtimin dhe për barnat. Asnjë nga këto nuk është bërë dhe as nuk është në plan për t’u bërë.

Ne ftojmë dhe njëherë prokurorinë të hetojë. Ne jemi të bindur se kjo nuk është vetëm një skemë korruptive e tenderëve por është një përpjekje për ta penguar rimëkëmbjen e shëndetësisë. Vetëm kështu pa regjistra e pa sistem monitorimi kushdo e kurdo përfiton miliona euro nga buxheti i shtetit dhe donacionet të cilat kurrë përgjatë gjithë këtyre viteve nuk kanë mbërritur tek pacientët.

19 prill 2016
Lëvizja VETËVENDOSJE!

Lëvizja VETËVENDOSJE! shpreh shqetësimin e saj për një raportim tendencioz në dokumentarin “Shtabi i Milionerëve” (pjesa e dytë), të prodhuar nga Gazeta Express.

Në atë dokumentar thuhet që Lëvizja VETËVENDOSJE! financohet nga bizneset e familjes Selimi dhe përmendet si “argument” fakti që një kompani me emrin DRINI gjoja ka financuar Lëvizjen VETËVENDOSJE!.

Pohimet në këtë dokumentar janë shpifje dhe denoncimi ynë ndaj këtij reportazhi bazohet në dy të vërteta:

1. Kompania DRINI nuk është kompani e familjes Selimi,

2. Kjo kompani ka bërë donacion për VETËVENDOSJE!-n, një herë të vetme, në vitin 2012, në vlerë prej 100 euro dhe nga ky fakt nuk mund të pohohet që kjo kompani “ka financuar Lëvizjen VETËVENDOSJE!”. Lëvizja VETËVENDOSJE! është subjekt që vazhdimisht bënë thirrje për donacione nga qytetarët e Republikës. Edhe ky donacion ka ardhur në këtë formë, përmes llogarisë bankare.

Përfolja e VETËVENDOSJE!-s në dokumentarin në fjalë është jashtëzakonisht tendencioze dhe qëllimkeqe. Lëvizja VETËVENDOSJE! është subjekti më transparent sa i përket financimit të saj dhe shpenzimit të mjeteve të veta. Këtë e pohojnë edhe organizatat e shoqërisë civile që merren me monitorimin e financave të subjekteve politike.

Kërkojmë nga Gazeta Express që të tërheq një lajm të tillë dhe të jap sqarim e kërkojë falje për këtë përfolje të padrejtë të Lëvizjes VETËVENDOSJE!. Në të kundërtën, ne nuk do të kemi tjetër zgjidhje përveçse t’u drejtohemi organeve gjyqësore.

18 prill 2016
Lëvizja VETËVENDOSJE!

Historia e ngecjes dhe dështimeve po përsëritet në Kosovë. Në pushtet janë ata që për interesat personale po shesin e falin çdo gjë publike. Po e privatizojnë ekonominë, po rrudhin territorin dhe po reduktojnë sovranitetin shtetëror. Në burgje e procese gjyqësore i kemi ata që po kërkojnë që Republika e Kosovës të jetë vërtetë dhe të funksionojë si Republikë e vërtetë sovrane dhe demokratike. Rrënimi politik, ekonomik dhe social i Republikës së Kosovës po vazhdon të thellohet. Paralajmërimet për ringjallje të “Zajednicës” dhe zbatim të demarkacionit po shpeshtohen.

Qeveria shpërblen Serbinë, kastën profitere sunduese, familjet e kryeministrit e ministrave, vëllezërit e presidentit dhe militantët partiakë. Ndërkaq, papunësia po rritet, rinia po e braktisë Kosovën dhe rezistenca opozitare po përndiqet me polici e gjyqe.

Kryeministri, zyrtarët e tij dhe djemtë e tij po i trashin lidhjet biznesore me Mishkoviqin dhe biznesmenët tjerë nga Serbia, po i hapin rrugë shovenizmit dhe revanshizmit serbomadh, që na vjen në Kosovë në formën e politikanëve që futen këtu dhe promovojnë hapur idenë se “Kosova është djep i Serbisë”, kurse në anën tjetër, po deporton dhe ua ndalon hyrjen në Kosovë aktivistëve nga Shqipëria të cilët me përkushtim, ndershmëri, vendosmëri e sakrificë po e mbrojnë Republikën tonë.

Përballë kësaj situate të rëndë dhe në keqësim të mëtejshëm, bashkimi gjithëpopullor është i domosdoshëm. Gjithë forcat progresive të shoqërisë duhet të mblidhen e bashkohen, sepse vetëm bashkimi do t’i jap fund të keqes.

Këshilli i Përgjithshëm i Lëvizjes VETËVENDOSJE!, i mbledhur më 17 prill 2016, nxjerr përfundimet e mëposhtme:

1. Këshilli i Përgjithshëm i Lëvizjes VETËVENDOSJE! mbështet fuqishëm përpjekjen e Kryesisë së Lëvizjes për të forcuar bashkimin e opozitës dhe shoqërisë civile në rezistencën e pakompromis ndaj kësaj qeverie dhe projekteve të saj të dëmshme për Kosovën. Këshilli i Përgjithshëm kërkon vazhdimin edhe më intenziv të përpjekjes për të krijuar një Alternativë të bashkuar e cila do të përfshinte VETËVENDOSJE!-n, AAK-në, NISMA-n dhe personat e organizatat e interesuara të shoqërisë civile që nuk pajtohen me këtë gjendje. Kjo do të kthente shpresën që në Kosovë qeverisja ndryshe është e mundshme dhe do të ndikonte fuqishëm në mobilizimin e qytetarëve për ta rrëzuar qeverinë aktuale.

2. Këshilli i Përgjithshëm i Lëvizjes VETËVENDOSJE! mirëpret dhe vlerëson edhe iniciativën e ditëve të fundit, për një koalicion progresist ku do të përfshiheshin subjektet dhe individët që mbështesin koneptet socialdemokrate dhe liberale në politikë dhe qëllimi i së cilës Alternativë do të ishte: demokracia shoqerore, përballë shtetit autoritar; integrimi i vërtetë i serbëve përballë ndarjes etnike dhe shtrirjes së kontrollit të Serbisë në Kosovë; ekonomia e zhvilluar që bazohet tek prodhimi përballë privatizimit abuziv të ekonomisë; çlirimi i institucioneve dhe ndërmarrjeve publike përballë kapjes së shtetit nga koalicioni PDK-LDK-Srpska; drejtësia shoqërore përballë padrejtësisë shtetërore dhe diskriminimit; etj. Një koalicion i tillë paravajtës, do të sillte frymë emancipuese në Kosovë.

Si pasojë e gjendjes së rëndë të krijuar dhe në funksion të zgjidhjes, normalizimit dhe konsolidimit të përgjithshëm kombëtar e shoqëror, protestat janë të domosdoshme dhe të pashmangshme. Qytetarët nuk do të durojnë pafundësisht këtë gjendje dhe rrjedhimisht do të organizohen e mobilizohen. Lëvizja VETËVENDOSJE! si subjekti që ka organizuar më së shumti protesta në Kosovën e pasluftës, e mirëpret çdo protestë që organizohet në Kosovë. Por, gjendja në Kosovë nuk do të përmirësohet pa rrëzimin e kësaj qeverie. E largimi i saj nuk do të bëhet asnjëherë përmes koketimit me partitë në pushtet, por përmes rezistencës qytetare të vendosur e të pakompromis.

Prandaj, Këshilli i Përgjithshëm i Lëvizjes VETËVENDOSJE! nxjerr përfundimet që para se të vendoset e diskutohet në lidhje me pjesëmarrjen e VETËVENDOSJE!-s në protestën e paralajmëruar nga Aleanca për Ardhmërinë e Kosovës është e rëndësishme që:

1. Të krijohet Alternativa e bashkuar, e cila përveç që do të ofronte alternativë të qartë kundër regjimit që po e kundërshtojmë, do të forconte jashtëzakonisht shumë kampin e rezistencës dhe do të prodhonte protesta masive e të fuqishme. Bashkimi i opozitës me individë e organizata të shoqërisë civile do të ngjallte shpresë tek qytetarët dhe do t’i nxirrte ata në rrugë me entuziazëm e vendosmëri për ta rrëzuar qeverinë.

2. Me koketime dhe flirtime eventuale me partitë e pushtetit nuk do ketë sukses kauza opozitare dhe nuk do të ndalet e keqja në Kosovë nëpërmjet bisedimeve të fshehta me shkaktarët e krizës. Ky pushtet ka arritur në përmasat e një regjimi autoritar dhe si i tillë ai duhet të dorëhiqet apo të hiqet. Duhet të sqarohen flirtimet me partitë në pushtet para se të vazhdojmë me veprimin e përbashkët opozitar, që do të manifestohej me protesta.

Sot, kur Kosova po rrezikohet nga brenda e nga jashtë, bashkimi i kundërshtarëve të kësaj qeverie është i domosdoshëm. Lëvizja VETËVENDOSJE! është e gatshme që të angazhohet pa kursim dhe me vetëmohim e sakrificë, për ta mundësuar dhe funksionalizuar këtë bashkim. U bëjmë thirrje për angazhim e mobilizim, të gjithë shqiptarëve që e kuptojnë dhe nuk duan ta durojnë tradhëtinë që po u bëhet kundër kombit e vlerave të tij, kundër Republikës dhe idealeve tona. Vetëm përmes bashkimit do të mund t’i realizojmë edhe synimet që duken të pamundshme.

Këshilli i Përgjithshëm i Lëvizjes VETËVENDOSJE!
17 prill 2016, Prishtinë

Lëvizja VETËVENDOSJE! mbajti sot konferencë për media ku u fol për nënshtrimin e Qeverisë së Republikës së Kosovës karshi mbajtjes së zgjedhjeve të Serbisë në Kosovë. Këto zgjedhje përveç që nuk po ndalohen nga Qeveria e Kosovës, Ministrat e Isa Mustafës po kontribuojnë në to dhe po marrin pjesë në tubimet e organizuara nga Vuçiqi e Daçiqi në Kosovë. Nuk ka dyshim që zgjedhjet e Serbisë në Kosovë janë në kundërshtim të plotë me Kushtetutën e Republikës së Kosovës. Ato janë në përputhje vetëm me Kushtetutën e Serbisë. Tash shtrohet pyetja – cila është përgjegjësia e Qeverisë së Republikës së Kosovës: mbrojtja e Kushtetutës sonë, apo mbrojtja e Kushtetutës së Serbisë?

“Me mosveprimin e tyre, me tolerimin e zgjedhjeve të Serbisë në Kosovë dhe me pajtueshmërinë që këto zgjedhje të zhvillohen nga shteti serb brenda territorit të shtetit tonë, Qeveria e Kosovës është vënë në funksion të Kushtetutës serbe dhe në shkelje të Kushtetutës së Republikës së Kosovës. Qeveria e Kosovës, përballë dështimit për t’i ndaluar zgjedhjet e Serbisë në Kosovë, po mundohet t’i paraqesë këto zgjedhje si zgjedhje normale demokratike të një shteti fqinj. Zgjedhjet e Serbisë që janë paralajmëruar të mbahen më 24 prill, nuk janë thjesht zgjedhje të një shteti fqinj, shtetasit e te cilit votojnë në ambasadën e shtetit përkatës, por janë zgjedhje që po organizohen nga Komisioni Qendror i Zgjedhjeve i Serbisë në Kosovë”, tha drejtuesi i Grupit parlamentar të Lëvizjes VETËVENDOSJE!, Glauk Konjufca, duke shtuar se kjo është shkelje e rëndë dhe e drejtpërdrejtë e sovranitetit shtetëror, pavarësisë, shtetësisë dhe integritetit të paprekshëm të sistemit zgjedhor.

Ai më tej tha se pakica serbe i është lënë totalisht në përgjegjësi institucioneve të Serbisë, me ç’rast zyrtarët e Serbisë lirshëm hyjnë në Kosovë dhe zhvillojnë fushata zgjedhore duke e lidhur popullatën serbe me premtimet e tyre vazhdueshme për kthimin e Kosovës nën Serbi. “Serbisë i është lënë shkollimi i serbëve, informimi, shëndeti dhe pagat, zgjedhjet, pra praktikisht çdo sferë e jetës sociale, politike, ekonomike dhe kulturore. Kësaj po i korrespondon përpjekja që të krijohet edhe një autonomi territoriale serbe përmes Asociacionit të Komunave më shumicë serbe. Dhe kështu të pamundësohet çfarëdo funksionimi unitar i shtetit të Kosovës në të ardhmen”, theksoi Konjufca.

Lëvizja VETËVENDOSJE! kundërshton fuqishëm mbajtjen e zgjedhjeve të Serbisë në Kosovë. Nëse Qeveria ka dështuar t’i kryejë funksionet dhe t’i ushtrojë përgjegjësitë e saj shtetërore dhe kushtetuese, ne ftojmë Policinë e Kosovës që ta zbatojë ligjin. Kjo do të thotë që çdo person dhe politikan që vjen nga Serbia për këto aktivitete të kundërligjshme të ndalohet, arrestohet ose dëbohet; të ndalohet veprimtaria e paligjshme e shfrytëzimit të objekteve publike të Republikës së Kosovës për mbajtjen e zgjedhjeve të Serbisë; si dhe të konfiskohet çdo material zgjedhor i Komisionit Qendror të Zgjedhjeve të Serbisë.

14 prill 2016
Lëvizja VETËVENDOSJE!

Opozita e Bashkuar që me krijimin e komisionit të ri për demarkacionin me Malin e Zi ka shprehur skepticizmin dhe kundërshtimin e saj, për shkak se ky komision nuk përmbante asnjë ekspert vendor dhe në anën tjetër, kishte përcaktuar që metodën e punës ta kishte të njëjtë me atë të komisionit paraprak. Një komision që nuk përmbanë ekspertë vendorë dhe që ka metodë të njëjtë me komisionin e kaluar, nuk kishte se si të sillte rezultate të ndryshme nga ai.

Opozita e Bashkuar vlerëson se të gjeturat e këtij ekipi ndërkombëtarë, për vlerësimin e punës së Komisionit Shtetëror të Kosovës për demarkacionin e kufirit me Malin e zi, janë vlerësime që janë bërë për nevojat e Presidentes dhe si të tilla nuk mund të kënë reflektim në domosdoshmërinë e korrigjimit të kufirit me Malin e zi.

Kufijtë e Kosovës mund t’i caktojë vetëm një Komision kredibil shtetëror i Kosovës, i cili mund të ketë edhe ekspertë ndërkombëtarë, që do të shfrytëzojë dokumenta valide, metodologji adapte të punës dhe të dhëna shkencore, por kurrsesi një grup prej tre personave prej të cilëve vetëm njëri është ekspert i fushës kurse dy të tjerët janë diplomatë.

Kufiri i Kosovës me Malin e zi është në Çakorr dhe në Kullë të Zhlepit, dhe pavarësisht vlerësimit të tre ekspertëve ndërkombëtar, demarkacioni i kufirit me Malin e zi, nuk është i pranueshëm për opozitën dhe qytetarët dhe do të kundërshohet pa kompromis. Mbi 205 mijë qytetarë kanë nënshkruar kundër këtij demarkacioni dhe vullneti i tyre nuk është marrë parasysh as nga presidentja e as nga ky ekip.

Argumentet e paraqitura nga ky ekip ndërkombëtar se demarkacioni me Malin e zi është një proces legal e ku nuk ka pasur shpërputhje ndërmjet dy komsioneve shtetërore, nuk qëndron, sepse edhe në një proces legal, e ku nuk ka as shpërputhje, mund të bëhën zgjidhje jolegale, sic ka ndodhur me rastin e Kosovës me Malin e Zi.

Kosova nuk ka territore për të falur dhe tërësinë e saj territoriale do ta mbrojmë pavarësisht vendimeve të tilla.

Policia e Kosovës, sapo arrestoi aktivistin e VETËVENDOSJE!-s, Arbër Zaimi, vetëm për shkak sa ka shtetësi të Republikës së Shqipërisë.

Siç po duket, Qeveria e Kosovës është e vendosur që të largojë nga Kosova secilin qytetar të Republikës së Shqipërisë, dhe po aq e vendosur që të lehtësojë intervenimet e ndryshme, legale dhe ilegale të Serbisë. Isa Mustafa në njërën anë e ka hapur Kosovën ekonomikisht dhe politikisht ndaj armikut tonë shekullor, Serbisë, kurse në anën tjetër përherë e më shumë po shfaqë tendenca armiqësore ndaj Republikës së Shqipërisë.

Kjo përshtatet plotësisht me politikat e Kryeministrit për të kthyer ndikimin e Serbisë brenda Kosovës.

Kjo qeveri që arreston opozitën, kërcënon gazetarët, deporton nga Kosova qytetarët e Republikës së Shqipërisë, është e papranueshme për qytetarët e Republikës sonë. Më 26 mars, masivisht do të dëshmojmë vullnetin tonë për ndërrimin e këtyre politikave që po e shkatërrojnë lirinë dhe demokracinë në Kosovë.

Ne i bëjmë thirrje shtetit shqiptar që të përfshihet në këto skandale dhe të ndikojë që Qeveria e Kosovës të mos ndërmarrë veprime të tilla jodemokratike dhe absurde.

Dje, në Prishtinë, në rrugën ‘Fehmi Agani’, në afërsi të selisë së VETËVENDOSJE!-s, është kidnapuar dhe dëbuar nga Kosova, Boiken Abazi, anëtar i kryesisë dhe Sekretar për Marrëdhënie me Jashtë në Lëvizjen VETËVENDOSJE!. Boikeni këtë funksion e ka tash një vit, ndërkaq nga viti 2011 deri në vitin 2015 ai ka qenë koordinator i sekretariateve të Lëvizjes sonë. Boiken Abazi nuk ka qenë një qytetar privat i Shqipërisë në Kosovë. Ai ka qenë i ftuar nga Lëvizja jonë në Kosovë.

“Kidnapimi dhe dëbimi i Boikenit është krim i këtij regjimi të korruptuar ndaj Republikës së Kosovës dhe kombit shqiptar. Për këtë kidnapim dhe dëbim ne e mbajmë përgjegjës Kryeministrin e Kosovës, Isa Mustafa, dhe ministrin e tij të brendshëm, Skënder Hyseni dhe Drejtorin e Drejtorisë për Migrim dhe të Huaj, Valon Krasniqi, nga profili i të cilit në Facebook duket qartë se është militant i PDK-së. Këto janë taktika të shtetit policor kundër opozitës tonë demokratike, këto janë metoda fashiste kundër lëvizjes sonë social-demokrate, këto janë tendenca anti-shqiptare kundër frymës sonë kombëtare”, theksoi deputeti Albin Kurti në konferencën e sotme për media. Kurti më tej tregoi se në momentin kur ka kuptuar se policë me rroba civile e kanë kidnapuar Boikenin pa i treguar as urdhërarrest e madje asnjë dokument të vetëm, ky e ka thirrur ambasadorin e Republikës së Shqipërisë në Kosovë, z.Qemal Minxhozi dhe Sekretarin e Parë të Ambasadës, z.Bruno Rexhaj. “U thashë të ndërhyjnë menjëherë dhe të shkojnë te policia sepse siguria e Boikenit është rrezikuar, kurse nëse ata që e morën janë policë, atëherë mund ta çojnë në burg ose mund ta dëbojnë jashtë Kosovës. Nuk e di a kanë shkuar, porse disi m’u duk se ata nuk besonin që mund të ndodhin gjëra të këtilla”, u shpreh Kurti.

Nënkryetarja e Kuvendit të Republikës së Kosovës, Aida Dërguti, tha se ajo bashkë me Boiken Abazin, më 3 shkurt janë kthyer nga Tirana në Prishtinë, pas homazheve për nderë të akademikut Kristo Frashëri. “Në orët e pasdites jemi kthyer në Prishtinë, përmes pikës kufitare të Morinës, me ç’rast kemi paraqitur dokumente tek zyrtarët e policisë dhe gjithçka ka qenë në rregull. Pse Policia e Kosovës nuk e ka regjistruar Boikenin kur është kthyer në Kosovë nga Tirana, ky nuk është faji i Boikenit por i policisë. Në arsyetimin e policisë thuhet se prania e Boikenit “paraqet kërcënim për rendin dhe sigurinë shtetërore të Republikës së Kosovës”. Si bëhet që kjo nuk thuhet për Vuçiqin, Dikoviqin, Daçiqin e Gjuriqin por thuhet për Boiken Abazin?! Për më tepër, Boikeni nuk është kontaktuar kurrë as me shkrim, as me gojë e as me telefon nga policia për t’u paraqitur në polici për shkeljet e aluduara. Pra, nuk ka patur as fletëthirrje më herët edhe pse aktiviteti i Boikenit është publik dhe ai nuk është fshehur asnjëherë. Boikenit i është mohuar e drejta për avokat, në kundërshtim me të gjitha normat ndërkombëtare. Boikenit i është mohuar e drejta për të njoftuar Ambasadën e Republikës së Shqipërisë edhe pse këtë gjë e ka kërkuar nga Policia”, tha ndër të tjera Dërguti.

Nga vendimi mësojmë se Boikeni qenka shpallur i rrezikshëm dhe mandej policia e lë të lirë në zonën neutrale të kufirit Kosovë – Shqipëri dhe nuk i ka lajmëruar autoritet kufitare të Republikës së Shqipërisë. Boikeni ka ecur vetëm dhe i pashoqëruar drejt kufirit të Republikës së Shqipërisë. Ky deportim i Boikenit nga policia e Kosovës është edhe skandal diplomatik. Ai pason ndaljen e qytetarëve nga Tirana më 9 janar dhe me 17 shkurt 2016, kur ata nuk u lejuan ta kalojnë kufirin dhe të na bashkohen në protestat më të mëdha në Kosovën e pasluftës. Ne kërkojmë ndërhyrjen e Kryeministrit Edi Rama e të Ministrit të Jashtëm Ditmir Bushati. Pavarësia e Kosovës duhet t’i tregohet e dëshmohet Serbisë dhe jo Shqipërisë. Kufiri midis Kosovës e Shqipërisë është kufi i Jugosllavisë e i Serbisë.

17 mars 2016
Lëvizja VETËVENDOSJE!