“Aktivistët e Lëvizjes VETËVENDOSJE! vazhdojnë të persekutohen nga policia e Kosovës. Nuk mund të jetë ndryshe përderisa kryeministri i vendit i ka quajtur ata kriminelë, banditë, fashistë, kmerë të kuq e çka jo të tjetër. Kjo nuk ka ndodhur as në kohën famëkeqe të Rrahman Morinës. Nuk ka më shefa policie e ministër të brendshëm – në raport me Lëvizjen tonë, kryeministri ua mori kompetencat këtyre. Për çkado që u ndodh aktivistëve tanë tash e tutje, përgjegjësinë e mban Mustafa i cili e ndërseu policinë kundër nesh me shpifjet më të ndyra. Nuk do t’ia falim: rrugës që është nisur Mustafa, do të vijë dita kur nuk do t’i bëjnë punë as pyjet e Prapashticës për t’u fshehur.”

Pas korrupsionit dhe kriminalitetit 6 vjeçar në Komunën e Prishtinës, pas keqpërdorimeve me pronat në Bërnicë – për të përfituar vetë, pas bashkimit me Thaçin – përkundër të gjitha premtimeve që ua kishte dhënë anëtarësisë së vet, pas nënshkrimit të marrëveshjes më të dëmshme për Republikën e Kosovës prej përfundimit të luftës… kryeministri Mustafa bashkë me djalin e tij Besnik Mustafa, kanë humbur kontrollin duke iu sulur deputetit të Lëvizjes VETËVENDOSJE! z. Albin Kurti, me një gjuhë të paturpshme dhe të ulët. Ky kryeministër e ka humbur toruan dhe po sulmon në mënyrë të tillë çdo kundërshtar të tij.

Lëvizja VETËVENDOSJE! i konsideron të papranueshme vendimet dhe sjelljet e kryeministrit dhe kërkon me ngulm dorëheqjen e tij.

Një kryeministër hajn, me djem hajna që marrin paratë e buxhetit të shtetit; një kryeministër që është në gjendje ta shesë krejt Kosovën veç sa për të mbetur vet në pushtet, nuk i duhet Kosovës. Një kryeministër i tillë duhet të jap urgjent dorëheqje. Dhe nëse nuk e bën këtë, duhet të shkarkohet urgjent nga qytetarët.

Veprimi i sotëm i Policisë së Kosovës tregon qartë se Policia e Kosovës është vënë në shërbim të individëve që kanë krijuar pasuri marramendëse në Kosovë, pra pushtetarëve të Kosovës. Policia e Kosovës e ka ndaluar lirinë e lëvizjes dhe lirinë e shprehjes, përderisa aktivistët tanë ishin nisur në një aksion krejtësisht paqësor.

Përfaqësuesit e Kosovës në Bruksel po i shërbejnë interesave të Serbisë. Marrëveshja e fundit e arritur sot për telekomunikimin tregon se kah po shkon Kosova përmes negociatave dhe marrëveshjeve të arritura në Bruksel. Edhe njëherë Serbia i ka realizuar interesat e saja në Kosovë. Edhe njëherë është cenuar sovraniteti dhe integriteti i Kosovës në aspektin e telekomunikimit. Kjo për shkak se me marrëveshjen e sotme Serbia e ruan të drejtën që të ketë kompani të saj të telekomunikimit në Kosovë, prefiksin e saj në Kosovë, tarifat e njëjta. Praktikisht Kosova shihet si zonë e njëjtë me Serbinë sa i përket telekomunikimit përmes kompanisë së vet, kurse Kosova nuk e merr të drejtën të aplikoj si shtet i pavarur për prefiksin e vetë. Për ne, do të aplikojë Austria.

Në kuadër të marrëveshjeve gjithnjë e më të dëmshme për Kosovën, është edhe kjo e sotmja. Në anën tjetër, Policia e Kosovës për interesa personale të Isa Mustafës i ndëshkon, i sulmon dhe i arreston qytetarët e Republikës.

Dje e patëm edhe skandalin me tenderin që i ka dhënë Isa Mustafa djalit të tij, skandal ky që zuri në vend në shumë media edhe ndërkombëtare. Për çudi, nuk kemi asnjë reagim të ambasadorëve për këtë skandal. Jemi mësuar që ata të reagojnë për çdo gjë, madje edhe të mbushin gropa nëpër Prishtinë, por ambasadorët nuk reaguan për një skandal të tillë. Kjo tregon se ata janë të kënaqur me Isa Mustafën, për shkak se Isa Mustafa po i përmbush apetitet e Serbisë në Kosovë.

I bëjmë thirrje Policisë së Kosovës dhe institucioneve tjera që nëse kjo është përgjigja e tyre ndaj aksioneve tona paqësore e të drejta përmes të cilave i shprehim pakënaqësitë tona lidhur me këtë që po i ndodhë Kosovës, atëherë mendojmë se ky është provokim i situatës edhe ashtu të rënduar nga këto marrëveshje të dëmshme, dhe mund të çojë në eskalim të situatës që VETËVENDOSJE! nuk e dëshiron. Nëse kjo ndodh, përgjegjësinë do ta bartë Kryeministri dhe institucionet tjera përgjegjëse si Policia e Kosovës që vënë në shërbim të këtyre interesave.

25 gusht 2015
Lëvizja VETËVENDOSJE!

Policia e Kosovës, duke cënuar rëndë lirinë e lëvizjes dhe të drejtën e protestës, arrestoi 3 aktivistë të VETËVENDOSJE!-s, si dhe përdori dhunë dhe spray lotësjellës kundër tyre. Aktivistët e Lëvizjes tentuan ta vendosin pranë villës luksoze të Isa Mustafës, një pano me mbishkrimin “Shiti pronat e tua, e jo Kosovën”. Këtë gjë e dinte Policia e Kosovës, por prap nuk reshti së përdoruri dhunën ndaj aktivistëve.

Gjendja në të cilën ka ardhur shteti i Kosovës është bërë e padurueshme. Kjo ngase me vendin tonë po qeverisin ca kusarë të cilët djemve të tyre ua japin tenderat kurse Serbisë territorin e Kosovës. Ata po e marrin buxhetin e popullit të varfër të Kosovës, për t’ia dhënë në formë tenderash djemve dhe vëllezërve të tyre, kurse territorin dhe resurset tona, po ia japin Serbisë përmes Zajednicës. Sot u publikua skandali i dhënies së një tenderi nga kryeministria, djalit të kryeministrit Mustafa. Ndërkohë, po sot, ky i fundit ndodhet në Bruksel ku do të nënshkruajë themelimin e Zajednicës.

Kjo gjendje nuk mund të vazhdojë ngase vetëm dy rrugë janë të mundshme: ose shteti i Kosovës do të dështojë plotësisht dhe do të ndahet në vija etnike, ose qytetarët do të mobilizohen për ta mbrojtur Republikën. Normalisht, që kjo e fundit do të ndodh patjetër.

Formimi i “Zajednicës” e dëmton edhe më rëndë qytetin tashmë e ndarë të Mitrovicës. Dëmet do të vërehen në cenim të territorit, ekonomi e siguri. Ndarja e formalizuar e qytetit në dy komuna me Planin e Ahtisaarit po betonohet me duke ia dhënë Zajednicës komunën e veriut të Mitrovicës.

Territorit të Mitrovicës, pjesës ku kanë qasje shqiptarët i kanë mbetur 350 km2. Ndërkaq në pjesën e Mitrovicës së veriut janë edhe 11 km2 të tjera, të shkëputura nga ndarja etnike. Tutje në veri të Ibrit bëjnë pjesë edhe Zveçani me 122.4 km2; Zubine Potoku 335 km2; Leposaviqi 750 km2; Vetëm pjesa veriore i ka 1218 km2. Me formimin e “Zajadnicës” mbesin jashtë 6 fshatra shqiptare (Kelmend, Boletin, Zhazhë, Bistricë, Cerajë dhe Koshtovë e Vllahisë)

Mitrovica në pjesën veriore dhe perëndimore kufizohet me “Zajednicën”: 8 km në perëndim fillon komuna e Zubin Potokut.

Po ashtu, “Zajednica” drejtpërtësëdrejti ndikon në zhvillimin ekonomik të Mitrovicës edhe ashtu të varfër. Ajo do ta kontrollonte gjysmën e Trepçës, (minierat deri në Leposaviq, rezervat e mëdha të mineraleve si dhe infrastruktura e vjetër e Kombinatit që përfshin shkritoren, rafinerinë, tymtarin, Trepça commerce, Trepça bank dhe drejtorinë). Gjithashtu ka mbi 1200 punëtorë dhe drejtorinë e vet.

“Zajednica” do të kishte kontroll komplet mbi liqenin e Ujmanit dhe hidrocentralin e Ujmanit (19 MW) duke përfshirë edhe hidrosistemin Ibër – Lepenc që furnizohet nga liqeni dhe i cili përdoret për ftohe në Obiliq dhe ujitje të tokave bujqësore. Ajo do të prekte edhe shpërndarjen e energjisë elektrike për Mitrovicën meqë në Zveçan ndodhet trafostacioni i Vallaqit nga ku vjen rryma nga Obiliqi.

“Zajednica” mund ta ketë edhe kontrollin e kufirit dhe të doganave. Impianti për pastrimin e ujërave të zeza planifikohet që të ndërtohet në Zveçan

Me formimin e “Zajednicës” do të kishte shumë pika neurologjike si: Ura e Ibrit, Lagjja e Boshnjakëve, Lagjja e Doktorëve, Kroi i Vitakut, Suhadolli, fshati Vidimriq. Kurse, në shërbime / kompani elektroenergjetike, telekomunikacion, furnizim me ujë ka paqartësi të shumta. “Zajednica” do të ketë të drejtën e planifikimit hapësinore që përfshin edhe rindërtimin e shtëpive dhe kthimin e shqiptarëve të dëbuar.

Nga aspekti i sigurisë pos Policisë së Kosovës që përbëhet kryesisht nga ish – policë të Serbisë akoma funksionon Civilna Zastita dhe po ashtu mbetet e paqartë se si do të funksionojë FSK-ja në veri.

Dëmet që po i shkaktohen Mitrovicës duhet të ndalen. “Zajednica” është e papranueshme. Qendra e Lëvizjes VETËVENDOSJE! në Mitrovicë e kundërshton ashpër “Zajednicën” dhe do ta pengojë atë me tërë kapacitetin e saj dhe iu bën thirrje edhe mitrovicasve që të bashkohen në mbrojtje të Mitrovicës dhe Kosovës nga “Zajednica” e Beogradit.

22 gusht 2015
Lëvizja VETËVENDOSJE! – Qendra Mitrovicë

Lëvizja VËTËVENDOSJE! reagon kundër arrestimit të veteranëve të luftës dhe mbajtjes së tyre padrejtësisht në paraburgim. Ky pushtet pasi e ka dëshmuar moskujdesin për vite të tëra për këtë kategori, po e përdor aparatin shtetëror të dhunës për t’ua mohuar edhe protestën, si mjet demokratik i domosdoshëm përmes të cilit veteranët e luftës po i kërkojnë të drejtat e tyre.

Persekutimi i veteranëve të luftës vjen me një kohë kur padrejtësitë ndaj tyre po rriten në proporcion të drejtë me rritjen e pasurisë së pushtetarëve që shfrytëzuan maksimalisht luftën e tyre për përfitime personale.

Ky pushtet në vend se t’i trajtojë siç duhet veteranët e luftës, i ka varfëruar e përçmuar, po i rrahë, po i arreston, po iu formon edhe “gjykata speciale”, për t’i frikësuar e shtypur edhe më tej, në mënyrë që t’i shuajë kështu zërat e pakënaqur të kësaj kategorie.

Kërkesat e tyre janë të drejta. Kërkojmë lirimin e menjëhershëm të të gjithë veteranëve të arrestuar!

8 gusht 2015
Lëvizja VETËVENDOSJE!

Lëvizja VETËVENDOSJE! reagon kundër arrestimit të aktivistit Kushtrim Dakaj i cili u arrestua me urdhër të EULEX-it, në lidhje me aksionet e mëhershme politike. Ky arrestim konfirmon mungesën e drejtësisë në Kosovë dhe prirjet totalitare të pushtetit në vendin tonë. Përndjekjet ndaj protestuesve nuk po ndalen, ndërkohë që krimi e korrupsioni i pushtetarëve po rritet. Në vend që drejtësia të merrej me këta të fundit, prokuroritë e gjykatat tona janë vënë në shërbim të autokracisë që po tentohet të instalohet në Kosovë, duke arrestuar e përndjekur ata që kritikojnë dhe kundërshtojnë padrejtësinë.

Lëvizja VETËVENDOSJE! kërkon lirimin e menjëhershëm të aktivistit Kushtrim Dakaj dhe ndaljen e përndjekjes së aktivistëve të tjerë të VETËVENDOSJE!-s.

15 korrik 2015
Lëvizja VETËVENDOSJE!

Në vazhdën e takimeve me përfaqësuesit e Legjislativit në ShBA, delegacioni i Lëvizjes VETËVENDOSJE!, i përbërë nga kryetari Visar Ymeri, dhe anëtari i Këshillit të Përgjithshëm Florin Krasniqi, është pritur nga kongresmeni Reid Ribble, anëtar i Komitetit për Marrëdhënie me Jashtë, si dhe kongresmeni Jim McGovern, Bashkëdrejtues i Komitetit për të Drejtat e Njeriut dhe anëtar i Grupit të Çështjeve Shqiptare (“Albanian Caucus”) në Kongresin e SHBA-së. Kryetari Ymeri dhe zoti Krasniqi po ashtu u pritën në zyrën e kongresmenit Paul Cook, që shërben në Komitetin për Marrëdhënie me Jashtë dhe në atë të Forcave të Armataosura në Kongresin e ShBA-ve.

Gjatë këtyre takimve u diskutuan zhvillimet e fundit politike dhe ekonomike në vend. Delegacioni i Lëvizjes VETËVENDOSJE! e vuri theksin te rëndësia e sovranizimit të Republikës së Kosovës në rrafshin politik, ekonomik dhe në gjyqësor, të gjitha këto të dëmtuara nga negociatat me Serbinë, tentim-themelimi i Gjykatës Speciale, dhe keqtrajtimi dhe uzurpimi i vazhdueshëm i burimeve ekonomike të Kosovës për interesa të veçanta. Po ashtu kryetari Ymeri i shtjelloi qëndrimet e Lëvizjes VETËVENDOSJE! karshi procesit shtetndërtues në Kosovë, duke u përqendruar në domosdoshmërinë e ndërtimit të Republikës së barazisë për qytetarët, moslejimin e formalizimit dhe zgjerimit të ndikimit të Serbisë në Kosovë përmes krijimit të “Zajednicës”, funksionalizimin dhe çlirimin nga kapja e sistemit të gjyqësorit për të garantuar barazi para ligjit për të gjithë qytetarët, dhe vendosjen e burimeve minerare dhe strategjike të Kosovës në funksion të mirëqenies së qytetarëve.

Delegacioni i VETËVENDOSJE!-s po ashtu kërkoi nga kongresmenët që ta mbikëqyrin punën e Departmentit të Shtetit në Kosovë që të sigurohen që Republika e Kosovës me sovranitet të plotë, e njohur nga ShBA-të, të jetë baza e partneritetit mes ShBA-ve dhe Republikës së Kosovës.

11 korrik 2015
Lëvizja VETËVENDOSJE!

Vendimi i Kuvendit të Republikës së Kosovës për refuzimin e ndryshimeve kushtetuese për themelimin e Gjykatës Speciale, i datës, 26 qershor 2015 është përfundimtar dhe i pakthyeshëm. Qeveria e Republikës së Kosovës duhet t’i nënshtrohet këtij vendimi.

Çdo tentativë për ta përmbysur këtë vendim të deputetëve të Kuvendit të Republikës të shprehur lirshëm me votë të lirë, gjoja në emër të procedurave, është tendencë për ta përmbysur rendin institucional dhe demokratik në vend.

Gjithashtu, i thërrasim të gjithë akterët të përfshirë në këtë proces, qofshin “për” apo “kundër”, ta respektojnë vendimin e Kuvendit të Republikës së Kosovës.

Visar Ymeri
Lëvizja VETËVENDOSJE!

Ramush Haradinaj
AAK

Fatmir Limaj
NISMA

30 Qershor 2015,
Prishtinë

Sot, rreth orës 08:00 të mëngjesit, Policia e Kosovës ka arrestuar aktivistin e Lëvizjes VETËVENDOSJE!, Lirim Gashi, për, siç i kanë thënë, një akuzë në lidhje me aksionet tona kundër produkteve të Serbisë. Ndërkohë, po sot, Policia e Kosovës i ka kërkuar për t’i arrestuar edhe disa aktivistë të tjerë të Lëvizjes, për të njëjtat aksione.

Qeveria e Kosovës po duket se nuk e ka ndërmend të ndalet në përndjekjen e opozitës gjë kjo e cila flet pikërisht për brishtësinë e qeverisë. Një qeveri që përdor pareshtur policinë, për të shtypur zërat që e kundërshtojnë, është qeveri që ka humbur çdo legjitimitet për të qeverisur me vendin dhe krejt çka i ka mbetur është forca policore. Prej themelimit të kësaj qeverie, përgjigjja që vazhdimisht i është dhënë kërkesave dhe nevojave të drejta të qytetarëve, ka qenë dhuna policore.

Lëvizja VETËVENDOSJE! kërkon me ngulm lirimin e menjëhershëm të aktivistit Lirim Gashi, dhe ndaljen e menjëhershme të përndjekjes që po i bëhet aktivistëve të Lëvizjes VETËVENDOSJE!.

Ne jemi për një shtet unik dhe funksional, ku të gjitha minoritetet janë të sigurta, gëzojnë të drejtat e tyre të pamohueshme dhe kanë mirëqenie të barabartë. Por ajo që po ndodh në Kosovë, dhe që do të kundërshtohet fuqishëm nga Lëvizja VETËVENDOSJE!, është zgjerimi i planeve agresore të Serbisë, në emër të gjoja zgjerimit të të drejtave për minoritetin serb. Serbia, përmes Listës Serbe dhe në marrëveshje me Qeverinë e Kosovës, po synon shndërrimin e Kosovës në një shtet të ndarë, jofunksional dhe të dështuar.

Lëvizja VETËVENDOSJE! reagon fuqishëm kundër shpifjes së fundit ndaj Drejtuesit të Grupit tonë Parlamentar, z. Glauk Konjufca, se gjoja ky i fundit paska shpenzuar më së shumti derivate të paguara nga Kuvendi i Republikës së Kosovës, duke bërë gjoja 6 mijë e 17 kilometra me veturë zyrtare.

Fillimisht Glauk Konjufca nuk ka qenë nënkryetar i Kuvendit gjatë muajit mars, kështuqë nuk mund të ngarkohet për tre muajt e parë të vitit 2015 por vetëm për 2 muaj.

E dyta, gjyma e këtyre kilometrave, janë të bëra gjatë muajit mars, nga nënkryetarja e re e Kuvendit të Kosovës, znj. Aida Dërguti, meqë ajo jeton jashtë Prishtinës (në Vushtrri) dhe është e detyruar të udhëtojë për çdo ditë Vushtrri – Prishtinë – Vushtrri.

E treta, deputeti Konjurca, ka bërë rreth 1400km për 2 vizita zyrtare në Tiranë dhe një në Shkup, si përfaqësues i Kuvendit të Republikës së Kosovës, si dhe jo më shumë se 650km në tërësi, për aktivitetet e tjera zyrtare brenda territorit të Republikës së Kosovës gjatë muajve janar dhe shkurt.

E katërta, matja e shpenzimeve me kilometra është tendencioze ngase kjo nuk flet për shpenzimet e përkthyera në para, të cilat shumë deputetë i kanë më të larta. Lëvizja VETËVENDOSJE! që kur ka hyrë në Kuvendin e Kosovës, është përcaktuar që të zgjedh makinën më ekonomike që e posedon Kuvendi dhe ka refuzuar kategorikisht që të shfrytëzoj çfarëdo makine të shtrenjtë që ka shpenzime të larta. Aktualisht, makina që është shfrytëzuar nga z. Konjufca dhe tash znj. Dërguti, është e tipit SHKODA RAPID (1.6) dhe shpenzon mesatarisht 5l/100km, pra 3 herë më pak se sa gjipat që shfrytëzohen nga deputetët e partive të tjera.

Lajmi i plasuar në media se gjoja Glauk Konjufca është shpenzuesi i dytë më i madh nga deputetët e Kuvendit të Republikës së Kosovës, është i pavërtetë dhe tendencioz duke e keqcituar qëllimisht edhe raportin e fryer dhe po ashtu tendencioz të komisionit përkatës të Kuvendit të Kosovës.

“Shiheni se çfarë sistemi kanë ndërtuar këta monopolizuesit e shtetit: nëse je në VETËVENDOSJE!, je duke shkuar për një tubim me bashkatdhetarë, arrestohesh nga policia e pushtetit pse ke protestuar në prill të vitit 2013 kundër Marrëveshjes me Serbinë, dhe përfundon në Deçan për ta paguar gjobën e komunikacionit.

Kurse nëse je në PDK, ke zhvatur tenderë, ke marrë reket, ke kërcënuar e ke rrahë njerëz, të hapen edhe portat edhe aeroportat, policia nuk të sheh, bëhesh i padukshëm, i kapërcen të gjitha shtetet e BE-së dhe përfundon në Suedi si Xhabir Zharku. Zonja dhe zotërinj, ky është modeli i shtetit të qeversisë së kaluar, të cilën me shumë zell po e vazhdon qeveria aktuale.” – Glauk Konjufca

3 muaj nga protesta gjithëpopullore e 27 janarit, dhe ende asnjë polic nuk u ndjek penalisht për dhunën e shfrenuar që përdorën kundër protestuesve. Zelli i madh i Prokurorisë për të urdhëruar arrestimet e qytetarëve dhe për të nisur procedura penale ndaj tyre, si dhe mungesa absolute e vullnetit për të ndjekur penalisht policët që ushtruan dhunë ndaj protestuesve të 27 janarit, flasin për tendencën e pushtetit që t’i bëjë të dënueshme protestat paqësore, kurse në anën tjetër ta inkurajojë dhunën e Policisë atëherë kur protestat ndodhin. Kjo gjë është tipike për regjimet autoritare, të cilat duke qenë të vetëdijshme se planet dhe veprimet e tyre janë në kundërshtim me interesin publik, i frikësohen shumë pakënaqësisë qytetare dhe bëjnë çmos që ta parandalojnë dhe shtypin atë.

“Shqiptarët në Maqedoni janë politikisht të shtypur, ekonomikisht të shfrytëzuar, kulturalisht të diskriminuar dhe institucionalisht të nënpërfaqësuar. Në anën tjetër, ata nuk po ndjehen të përfaqësuar as nga partitë politike shqiptare që veprojnë në institucionet e sistemit.

Nuk mund të mbijetojnë edhe Gruevski edhe Maqedonia. Prandaj është e domosdoshme që shqiptarët të organizohen në mënyrë paqësore dhe të jenë aktivë. Mirëpo, jo edhe të bëjnë veprime të armatosura të cilat pastaj do të shndërroheshin në pretekst të përsosur për Gruevskin që me një gur ti vrasë dy zogj: edhe opozitën maqedonase por edhe shqiptarët në Maqedoni.” – Albin Kurti

Kohëve të fundit kemi parë edhe eksponentë të pushtetit, konkretisht të PDK-së, që flasin për kapjen që ua ka bërë SHIK-u institucioneve shtetërore. Para disa javësh kemi parë Bajram Rexhepin që deklaroi se ShIK-u e ka kapur PDK-në e përmes PDK-së shtetin, ndërkaq mbrëmë erdhi deklarata nga deputeti Rrustem Mustafa që njëherit ishte edhe komandant i Zonës Operative të Llapit. Edhe deputeti Mustafa e përmendi ShIK-un si organizatë ilegale që ka shtrirë ndikimin e saj në ndërmarrjet publike.

Pas këtyre dy deklaratave do të duhej që Prokuroria e Shtetit të nisë menjëherë hetimet ex-officio për këtë organizatë. Këto deklarata vijnë nga njerëz që kanë pasur pozita të rëndësishme udhëheqëse shtetërore e partiake. Për më tepër, që të dy janë figura të PDK-së, që në fakt është mbulesa politike e kësaj organizate kriminale, andaj edhe mund ta krijojnë bazën e mjaftueshme për nisjen e këtyre hetimeve.

“Organizimi i protestave është e vetmja mënyrë për ta ndaluar keqbërjen e kësaj qeverie. Me protestat kemi krijuar një traditë të re, demokratike, një mënyrë të re e të suksesshme për të mundësuar realizimin e nevojave dhe të kërkesave tona, të qytetarëve të Kosovës. Protestat e janarit sollën sukses të matshëm, e hoqën ministrin fashist. Protestat e prillit kanë për t’i hequr drejtuesit që po abuzojnë me çmimet e energjisë, që abuzojnë me televizionin publik, dhe që e kanë kapur gjyqësinë e shtetin.

Hashim Thaçi dhe Isa Mustafa në javën e fundit kanë lëshuar deklaratat më të forta në jetën e tyre. Këta dy persona që nuk guxuan kurrë të flasin fjalë të forta as përballë mafisë dhe uzurpatorëve të pronës publike, as përballë Serbisë në negociata, as përballë çfarëdo kërkesë të cilitdo ndërkombëtar, tash flasin me kwrcwnim dhe frikwsim kundër qytetarëve të tyre që protestojnë. Prandaj këta në të vërtetë nuk janë burra shteti, por burrecë pushteti.

Demokracia jeton në radhë të parë në sheshe në mes të popullit, e jo thjesht në objekte institucionesh. Këta po duan ta ngujojnë demokracinë brenda zyrave të tyre, ku kryejnë aferat milionëshe që zhvatin qytetarët e varfërojnë Kosovën. Këta po duan t’ia bëjnë varrin demokracisë. Por ky popull nuk është dorëzuar përballë asnjë shtypësi e përballë asnjë diktature. Nuk do të dorëzohemi as përballë këtij pushteti mini despotësh.

Ne nuk jemi kundër anëtarëve të PDK-së e të LDK-së. Ata janë qytetarë si të gjithë ne, me meritat dhe problemet e tyre. Por ne nuk do të tolerojmë që elita e PDK e LDK ta kapë shtetin, për të ndërtuar në Kosovë një pushtet autoritar, kleptokratik e mashtrues. Shik-at dhe agjentët e tyre, nuk do të lejohen më të frikësojnë, shantazhojnë, të vjedhin e të kërcënojnë. Ne kemi për t’i hetuar ata, dhe kemi për t’i gjykuar, sipas ligjit demokratik dhe republikan. Me hetimin e ShIK-ut do të nisë çlirimi i shtetit nga zaptimi.

Ne nuk jemi kundër pronës private dhe kapitalit privat. Por asnjë kompani private nuk mund të abuzojë me nevojat tona jetike duke përfituar nga korrupsioni i pushtetarëve tanë. Privatizimi i ndërmarrjeve, sikur ky i KEDS-it na e solli papunësinë e mjerimin. Shtëpitë që i ka pllakosur varfëria, tash po i pllakos edhe terri. Ne nuk mund të lejojmë në shekullin XXI që terri të rikthehet në shtëpitë e Kosovës. Çmimi i energjisë duhet të jetë i përballueshëm për të gjithë, e jo luks për disa. Dhe këtë nuk e ofron dot një kompani private, aq më pak një kompani që ka kryer një proces korruptiv privatizimi.

Ne nuk jemi kundër fuqizimit të institucioneve të Kosovës, por institucionet nuk mund të forcohen kur përdoren për pasurim privat. E vetmja mënyrë që të forcohen institucionet, është që ato të jenë vërtet demokratike, përfaqësuese, politike, profesionale. Të zhduket prej tyre lokalizmi, nepotizmi, klanizimi dhe klientelizmi. Me nepotizëm nuk ka institucione. Me hajna nuk ka shtet! Me PDK e LDK nuk ka shtet!

Nuk ka zhvillim e përparim pa punësim. Nuk ka Kosovë të fortë pa punësim. Nuk ka drejtësi pa punësim. Nuk ka shoqëri pa punësim. Nuk ka shtetformim pa punësim. Sot ne kërkojmë ndryshimin e politikave qeveritare, shkëputjen prej shtetit të papërgjegjshëm, ndaljen e korrupsionit, dhe fillimin e politikave me synim kryesor punësimin. Protestat tona nuk do të ndalen, për sa kohë Kosova të vazhdojë të jetë një shtet krejtësisht tregtar, dhe me papunësinë më të lartë në kontinent. Me këtë politikë ekonomike qeveria po na tregon se ekspertët e saj janë thjesht injorantë, keqbërës, që nuk kanë asnjë ndjeshmëri për të papunët e për të varfërit në Kosovë.

Drejtues të EULEX po e pranojnë sot atë që ne kemi thënë dje, që misionet ndërkombëtare në Kosovë kanë bërë një eksperiment. Sot po e pranojnw atë që ne kishim parashikuar: që ky eksperiment është i padrejtë dhe i dështuar. Kosova nuk mund të zhvillohet me eksperimente e pabarazi. Ne nuk mund të sovranizohemi me Asociacione të Serbisë brenda. E të pazhvilluar e pa sovranitet nuk mund të jemi të pavarur. Ne duhet t’i japim fund këtij eksperimenti, për të krijuar një shtet të qëndrueshëm e funksional, një drejtësi të ndershme, një politikë demokratike e republikë të qytetarëve. Dhe që nga ky shesh të bashkuar këmbëngulim: nuk pranojmë ndarje të territorit përmes Asociacionit, nuk pranojmë ndarje të institucioneve përmes kompetencave ekzekutive për Asocioacionin, nuk pranojmë varfërim të buxhetit të qytetarëve përmes fondit për Asociacionin, nuk pranojmë polici e gjyqësi të veçantë për Asociacionin.

Kryeministri në hije, Hashim Thaçi para disa ditësh tha se në demokraci pushteti merret me votë. Por ai nuk tha se në Kosovën e tij vota blihet me pare, e paret vidhen me dhunë e me korrupsion prej këtij populli. Kjo lloj demokracie nuk është asgjë tjetër përveçse feudalizmit. Dhe ne nuk mund të pajtohemi me feudalizmin. Ne jetojmë në shekullin XXI, kemi kërkesa si të popujve të tjerë, kemi misionin, forcën dhe vullnetin për t’i realizuar këto kërkesa. Nuk do të ndalemi me protestat dhe organizimet tona, derisa të mbërrijmë që ta bëjmë Kosovën të barabartë me fqinjët e saj. Nuk do të ndalemi pa e realizuar ëndrrën e atyre që dhanë gjakun për Kosovën, bashkimin kombëtar, zhvillimin ekonomik, barazinë dhe demokracinë.

Sot ne gjendemi përballë dy alternativave: ose protestën, ose mjerimin; ose protestën, ose terrin; ose protestën ose ShIK-un; ose protestën, ose papunësinë; ose protestën ose Klanin Pronto; ose protestën ose vjedhjen; ose protestën ose indiferencën; ose protestën ose rrenat; ose protestën ose padrejtësinë; ose protestën ose ndarjen. Ne zgjedhim protestën, sepse ne duam punën, duam bashkimin kombëtar, duam drejtësinë, duam mirëqenien, duam barazinë, duam të vërtetën!”

Në protestën e sotshme të subjekteve opozitare, morrën pjesë mbi 20 mijë protestues. Policia e Kosovës në vazhdën e gënjeshtrave që kanë filluar 2-3 ditë më herët, sot vlerësoi se në protestë ishin rreth 2500 protestues. Njësoj, sikur që kishin thënë “ne kemi informacione të sakta se subjektet opozitare do të jenë të dhunshme”, tash po thojnë se në protestë paskan marrë pjesë dhjetëfish më pak njerëz, se sa që janë në realitet.

Atë çka Policia e Kosovës nuk arriti ta bëjë përmes kërcënimeve, po mundohet ta bëjë përmes shpifjeve dhe shifrave absurde: pra zvogëlimin e pjesëmarrjes në protestë.

Por, duke falenderuar mediat që sot e përcollën drejtpërdrejt protestën, i gjithë populli i Kosovës mund vërejë se sa njerëz ishin në protestë dhe se sa absurde janë deklaratat e policisë së kapur, e cila tash po shërben edhe si makinë propagande.

“Për këtë zaptim të shtetit nuk po flasim vetëm ne si subjekte opozitare, por të gjithë qytetarët e Kosovës, madje edhe vetë Kryeministri, i cili përveç se nuk po bën asgjë për ta hequr këtë zaptim, është vendosur si mburoje e këtij zaptimi. Kur vetë Qeveria e zapton shtetin dhe nuk lejon që shteti të funksionojë në bazë të interesave të qytetarëve, atëherë është obligim i qytetarëve që të angazhohen politikisht për ta çliruar shtetin nga zaptimi.”

Dostat klientelist dhe mafioz të Hashim Thaçit nëpërmjet Hajredin Kuçit kanë mundur t’i ikin drejtësisë ende dhe sot, si Ramadan Muja, Xhabir Zharku, Djemtë e Adem Grabovcit, paraburgimi dhe skandali me Sami Lushtakun, leja për t’u futur në burg dëshmitari në rastin Tolaj. Ndërsa me manovra e ndikime kanë dalë të pafajshëm pas stërzgjatje së proceseve të gjitha për vepra penale për vjedhje të parave publike dhe pronave ose për vepra të dobëta, Nexhat Demaku, Bajram Mulaku, Begzad Sinani, Nexhmedin Arifi,Salim Jenuzi të gjitha kryetarë komunash nga PDK. E ndërsa rasti që ende sot vazhdon hetimet e që prej kohësh u zvarrit dhe u bënë përpjekjet maksimale të heshtet është ai i 1.2 milionë eurove të pasaportave ku përgjegjësi kryesor Bajram Rexhepi është vetëm dëshmitar e jo i pandehur.