Viti 2022 është vit i zgjedhjeve të brendshme në Lëvizjen VETËVENDOSJE!. Procesi që nisi më 15 mars, përmbylli suksesshëm sot, më 25 shtator 2022, fazën e parë të zgjedhjeve për pozicionet drejtuese në LVV, me zgjedhje të drejtpërdrejta të organizuara në mbi 200 vendvotime si dhe online për mërgatën, sipas parimit një anëtar një votë.

Përgjatë javëve në vijim, procesi do të vazhdojë me zgjedhjen e kryesive të qendrave, e do të përfundojë në fund të muajit Tetor me zgjedhjen e kryesisë së LVV në mbledhjen konstituive të Këshillit të Përgjithshëm.

Në këtë proces të gjatë janë strukturuar gjithsej 485 pika në 29 qendra të Lëvizjes VETËVENDOSJE!.

Në këto zgjedhje për herë të parë u votua edhe për strukturat e organizatës Gratë për VETËVENDOSJE! dhe Rinia për VETËVENDOSJE!

Komisioni Zgjedhor i Përgjithshëm konstaton se procesi ka kaluar në mënyrë të rregullt si rezultat i një pune të madhe që është bërë gjithandej nëpër qendrat e Lëvizjes.

Rezultatet paraprake të votimit për kandidatët për nivelin e tretë janë si në vijim:

Për Kryetar të LVV, Albin Kurti:

PËR: 98.60%

KUNDËR: 0.89%

ABSTENIM: 0.51%

Për Kryetare të organizatës Gratë për VETËVENDOSJE!, Albulena Haxhiu:

PËR: 94.55%

KUNDËR: 2.81%

ABSTENIM: 2.64%

Për Kryetar të organizatës Rinia për VETËVENDOSJE!, Behar Jashari:

PËR: 85.55%

KUNDËR: 7.55%

ABSTENIM: 6.80%.

Komisioni Zgjedhor i Përgjithshëm falënderon të gjithë aktivistët e përfshirë në menaxhimin dhe administrimin e zgjedhjeve të brendshme të Lëvizjes VETËVENDOSJE!, për përkushtimin e tyre në mbarëvajtjen e këtij procesi, si dhe falënderojmë të gjithë anëtarët që kanë shprehur sot të lirë vullnetin e tyre mbi të ardhmen e organizatës. I jemi gjithashtu mirënjohës stafit të Komisionit Qendror Zgjedhor të Republikës së Kosovës dhe të Komisioneve Komunale Zgjedhore, për asistencën dhe materialet e votimit të vëna në dispozicion anekënd Kosovës për zhvillimin e procesit të zgjedhjeve të brendshme të Lëvizjes VETËVENDOSJE!.

Komisioni Zgjedhor i Përgjithshëm

Lëvizja VETËVENDOSJE!

“Sot është një ditë shumë e rëndësishme për Lëvizjen VETËVENDOSJE! por edhe për demokracinë në Kosovë sepse po mbahen zgjedhjet e brendshme e demokratike të një subjekti i cili është edhe fitues i zgjedhjeve, dhe natyrisht që janë të rëndësishme për nivelin e demokracisë tonë”, tha kryetari i Kuvendit të Kosovës, si dhe anëtari i kryesisë së Lëvizjes, Glauk Konjufca pas votimit në procesin e zgjedhjeve të brendshme të Lëvizjes.

“Brenda Lëvizjes sot ka një pjesëmarrje shumë të kënaqshme politike, me një gjithëpërfshirje të jashtëzakonshme të të gjitha shtresave dhe niveleve, e sidomos të të rinjve dhe të rejave për poste të rëndësishme brenda partiake dhe lokale”, tha Konjufca.

https://fb.watch/fN1bbtE44M/

Në të gjitha qendrat e Lëvizje VETËVENDOSJE! po mbahet procesi zgjedhor për strukturat e reja të nivelit qëndror, ndërkaq në 26 sosh po mbahet procesi edhe për nivelin e dytë organizativ që përfshin struktrurat e reja drejtuese në nivel të qendrave tona.

Ky proces po mbahet edhe në kryeqytet, në Qendrën tonë të Prishtinës, me ç’rast të drejtën për votim e ka shftrytëzuar edhe kandidati për kryetar të Qendrës së Prishtinës dhe anëtari i Kryesisë së LV-së, Arben Vitia.

Ai ka ftuar anëtarërësinë e Lëvizjes në Prishtinë që marrin pjesë në votim dhe të bëhen pjesë e vendimmarrjes dhe demokracisë së brendshme.

https://fb.watch/fM0dNVcdfS/

Në këto zgjedhje për herë të parë votojmë e vendosim për strukturat e para të organizatës Rinia për VETËVENDOSJE!.

Kandidati për kryetar të organizatës RVV, Behar Jashari, përmes demokracisë së brendshme ka marrë pjesë në procesin e votimit duke ftuar edhe të rinjtë e rejat e Lëvizjes të bëhen pjesë të vendimarrjes për strukurat e reja të kësaj organizate e Lëvizjes në përgjithësi.

Rinia ka qenë përherë shtyllë e rëndësishme në Lëvizjen tonë, ndërkaq tash me organizimin e tyre të veçantë ata do të jenë përveçse frymë e rëndësishme edhe strukturë e organizim ku ngriten, diskutohen e përfaqësohen si rini.

https://fb.watch/fLXHXyY_Fj/

Kryetari i Lëvizjes VETËVENDOSJE! njëherit edhe kryeministri i Republikës, Albin Kurti, pas votimit në procesin e zgjedhjeve të brendshme të Lëvizjes ka ftuar të gjithë anëtarët që ta ushtrojnë të drejtën e tyre për të zgjedhur udhëheqje të mira dhe struktura të reja për 4 vjetët e ardhshme.

“Është ditë e demokracisë në Lëvizjen VETËVENDOSJE! për shkak se i kemi zgjedhjet e brendshme dhe secili anëtarë i subjektit tonë politik mund dhe duhet të dëgjohet. Në qendra të Lëvizjes VETËVENDOSJE! mbahen zgjedhjet për Kryetar të Lëvizjes, për Kryetare të strukturës së re “Gratë për VETËVENDOSJE!”, për strukturën po ashtu të re “Rinia për VETËVENDOSJE!,” por gjithashtu edhe për nivelet e qendrave në 26 sosh’’, tha Kryetari Kurti.

Ai po ashtu theksoi se me këto struktura të reja, ne synojmë që në kuadër të drejtimit tonë progresist ta bëjmë një organizatë edhe më të fuqishme.

https://fb.watch/fLVlpJiPML/

Në kuadër të zgjedhjeve të brendshme në Lëvizjen VETËVENDOSJE! sivjet për herë të parë votojmë edhe për udhëheqjen e organizatës së re ‘’Gratë për VETËVENDOSJE!’’.

‘’Ftoj të gjithë anëtarët që të shfrytezojnë këtë të drejtë dhe të bëhen pjesë e vendimarrjes, për të vendosur jo vetëm për lëvizjen por edhe për vendin përmes votimit të tyre në organizatën politike më të madhe në vend’’, tha kandidatja për kryetare të organizatës Gratë Për VETËVENDOSJE! njëherit ministrja e Drejtësisë Albulena Haxhiu pas procesit të votimit në kuadër të zgjedhjeve në LV.

Ajo ndër të tjera deklaroi se sivjet për herë të parë po themelojmë edhe organizatë atë të rinisë dhe gruas. Përmes organizatës së gruas, do të çojmë në një nivel tjetër betejën tonë për barazi shoqërore e gjinore.

https://fb.watch/fLV2K3AqzB/

Të dashur aktivistë e aktiviste,

Të dashura familje Xheladini, Balaj, Dehari e Koskoviku,

Të nderuar miq e bashkëpunëtorë nga Partia Guxo, Alternativa, Partia e Re Demokratike dhe Iniciativa e Re Demokratike 

E nderuara Emilja 

I nderuar Faton, Agon, Elbert,

Të nderuar delegatë të këshillit të përgjithshëm, deputetë, ministra e kryetarë të komunave

Të nderuar kryetarë të pikave tona nga e gjithë Kosova, dhe ju kandidate e kandidatë në zgjedhjet tona të brendshme

Mirë se keni ardhur në këtë tubim të veçantë të Lëvizjes VETËVENDOSJE! këtu në Prishtinë 

Pas disa muajve, saktësisht nga mesi i Marsit kur filluam procesin e zgjedhjeve të brendshme, jemi këtu së bashku e të bashkuar në përgatitje të rrugëtimit tonë të ardhshëm. 

Besoj se të gjithëve na kujtohet kur katër vite më parë në këtë sallë pas disa përpjekjeve për të na dobësuar e zvogëluar, u nis një projekt reformues për organizatën tonë – projekt që i dha frytet e veta për lëvizjen dhe gjithë Kosovën. 

Sot jemi këtu, të përgatitur dhe të organizuar pas shumë përpjekjesh në të kaluarën – e para shumë betejash të reja që na presin në të ardhmen.  

Ne jemi organizata që synojmë së bashku me gratë e vajzat drejtësinë, më të rinjtë e të rejat  zhvillimin, e me popullin barazinë. 

Ne jemi lëvizja që synojmë progresin jo të grupacionit por të shoqërisë –  triumfin jo të vetjakes por të përbashkëtës.

Ne këmbëngulim për ndryshimet e gjendjes – jo thjesht të pozicioneve. 

Organizimi ynë kurrë s’ka qenë statik – i palëvizshëm. Ai është themeluar, zhvilluar, krijuar e rikrijuar mijëra herë në çdo frazë-aksion, në çdo mendim – veprim, në çdo tubim –  manifestim. 

Para 100 ditësh shënuam 12 qershorin, 17 vjetorin e themelimit të lëvizjes VETËVENDOSJE!

17 vite ide, punë, angazhim, aksion, çdo herë në të mirë të vendit dhe për vendin.

Si kurrë më parë këtë vit të shtatëmbëdhjetë ka nevojë për frymën, vendosmërinë, vullnetin dhe besnikërinë ndaj projektit politik që së bashku kemi krijuar. 

Kryetari dhe tani kryeministri ynë, sot e shpalos kandidaturën e tij dhe platformën për katër vitet e ardhshme të drejtimit të organizatës sonë. Në gjithë këto vite, por jo vetëm, emri i tij çdo herë është lidhur ngushtë me vendosmërinë, punën e palodhshme, zellin, dashurinë dhe drejtësinë për secilin e në veçanti për qytetarët dhe Republikën. I palëkundur, i vendosur dhe me vizion të qartë për mbrojtjen dhe zhvillimin e të drejtave qytetarevë dhe vendit deri në sakrificë.

Ky është drejtuesi ynë të dashur pjesëmarrës – Albin Kurti 

Për herë të parë këtë vit në Lëvizjen tonë po themelohen struktura të reja Gratë për VETËVENDOSJE! dhe Rinia për VETËVENDOSJE! 

Një organizatë progresiste siç duam e siç do të punojmë të jemi i ka në qendër e në strukturë gratë e vajzat,  të rinjtë e të rejat, ngase organizatën nuk e bëjmë të fuqishme pa to. 

Sot paraqiten para nesh këto dy platforma me dy emra që do t’ja shtojnë shpejtësinë e fuqinë organizimit tonë në dy strukturat e reja.

Të dashur aktivistë, këta janë:

Albulena Haxhiu, kandidate për kryetaren e Gruas për VETËVENDOSJE! dhe Behar Jashari kandidat për kryetarin e Rinisë për  VETËVENDOSJE!. 

U urojmë kandidatëve sukses e punë të mbarë në ide e veprim, në zgjerimin e lëvizjes dhe fuqizimit të organizimit. 

Padyshim që janë drejtuesit që i duhen organizimit në këtë rrugëtim të ri drejt të cilit jemi bërë gati të ecim.

Ndaj të dashur anëtarë të dielën, me 25 shtator, prej orës 10:00 ju ftoj të merrni pjesë në votime, secili e secila në qendrat tona të votimit, zyrat, shkollat e pikat në çdo komunë.

 Shfrytëzoj rastin që njësoj t’ju bëjmë thirrje anëtarëve tanë në mërgatë që të votoni online, pasi që vota juaj çdo herë ka qenë votë e progresit dhe që i ka kontribuar ndryshimeve deri sot. 

Ta dëshmojmë demokracinë tonë një anëtarë një votë dhe të gjithë bashkë të bëhemi pjesë e këtij procesi.

Ju falemnderit të nderuar të pranishëm dhe ftoj kandidatët për paraqitjet e tyre para jush. 

Thellësisht mirënjohës e falënderues përherë ndaj anëtarëve dhe aktivistëve të Lëvizjes VETËVENDOSJE!. Dje së bashku me Albulenën dhe Beharin, shpalosëm platformat tona për strukturat e reja, GVV dhe RVV, si dhe atë për rizgjedhjen time kryetar të Lëvizjes sonë të gjerë me drejtim progresist e organizatë të fuqishme:

Të dashur aktivistë,

Të dashur Behar dhe Albulenë,

E nderuara familje Dehari, Xheladini, Balaj,

Të nderuar deputetë të Kuvendit dhe ministra e zëvendësministra të qeverisë,

Zëvendëskryeministre Rexhepi,

Bashkëkryetar i Partisë Guxo, Faton Peci,

I nderuari Agon Dobruna nga Alternativa për Kosovë,

Zonja dhe zotërinj,

Të nderuar të pranishëm,

Siç dihet, kjo është hera e parë që unë vij për të kërkuar besimin tuaj për t’u rizgjedhur në krye të organizatës sonë duke qenë njëkohësisht Kryeministër i shtetit tonë.

Në tetor të vitit 2019 dolëm të parët për herë të parë. Në shkurt të vitit 2021 u bëmë shumicë për herë të parë. E këtë të premte bëhen një vit e gjysmë që jemi në drejtimin e Republikës sonë. Periudha nga fitorja plebishitare e 14 shkurtit e deri më sot ka qenë e mbushur me sfida por edhe me suksese. Ne të Lëvizjes VETËVENDOSJE!, duke qenë aktivistë në lëvizje të vazhdueshme që nga themelimi i organizatës sonë, i njihnim mirëfilli hallet e shoqërisë e të popullit tonë. Por, siç e dini, përgjatë kësaj periudhe u desh të përballemi edhe me sfida që pakkush mund t’i parashikonte. Në këtë mes veçohen pandemia COVID-19 dhe agresioni ushtarak rus mbi Ukrainën që shkaktoi krizë energjetike e ekonomike pa harruar edhe ndryshimet evidente klimatike. Të dyja kanë prodhuar pasoja të rënda si për shëndetin publik ashtu edhe për ekonominë e vendit tonë. Fati ka dashur që të dyja këto të koincidojnë me bërjen tonë organizata më e madhe politike në vend dhe me marrjen e drejtimit të shtetit nga ana jonë. Sigurisht, këto nuk janë sfida vetëm të vendit tonë—ato janë globale. Sidoqoftë, ne jemi përgjegjës vetëm për vendin tonë. Duke qenë shtet i ri e shoqëri jo edhe gjithaq e zhvilluar, ne goditemi nga pasojat e këtyre krizave globale shumë më tepër se ç’mund të preken shoqëritë e shtetet më të zhvilluara të kontinentit tonë. Duke qenë një organizatë e ngjizur në aksion të drejtpërdrejtë, unë besoj se ne jemi më të duhurit për të qenë në udhëheqje të vendit në këto kohë kritike. Detyra jonë është që t’ia dëshmojmë popullit që duke na besuar neve, ai ka bërë zgjidhjen më të mirë të mundshme.

Ashtu siç dje ishte kushti i fitores sonë të paparë zgjedhore, organizata jonë politike është sot kushti i suksesit tonë në qeverisje. Pa organizatën, qeverisja jonë e humbet kontaktin me popullin, kontakt që është jetik për të pasur një qeverisje të popullit, nga populli, e për popullin. Prandaj është kaq e rëndësishme që të mos e lëmë pas dore organizatën e Lëvizjes. Duke u kujdesur për mbarëvajtjen e punëve të saj, ne sigurohemi që besimi plebishitar që na u dha më 14 shkurt të vitit të kaluar të mbetet vetëm delegim i vullnetit popullor e kurrsesi tëhuajësim i tij. Organizata është hallka që garanton besnikërinë tonë si përfaqësues të popullit.

Sot kërkoj votëbesimin tuaj edhe për katër vite të tjera në krye të Lëvizjes VETËVENDOSJE! në prag të zgjedhjeve të së dielës së 25 shtatorit. Platforma ime programore për periudhën 2022-2026 është e mbështetur në këto pika themelore: (1) Rritja e numrit të anëtarëve të moshave të reja; (2) Rritja e anëtarësisë së vajzave dhe grave; (3) Krijimi i kohezionit midis brezave, grupeve shoqërore, e botëkuptimore; (4) Forcimi i shkollës politike dhe dimensionit ekzekutiv të saj; (5) Promovimi i organizimit sindikal në sektorin privat; (6) Përgatitja e burimeve njerëzore dhe programore për Zgjedhjet lokale 2025; (7) Përgatitja e Platformës politike për mandatin e dytë të Qeverisjes; (8)Rritja e rrjetit të Qendrave të Lëvizjes VETËVENDOSJE! në mërgatë; (9) Angazhimi i studentëve dhe profesionistëve në organizatën politike të Lëvizjes; (10) Bashkëpunimi ndërkombëtar dhe ai jashtë shtetit e brenda kombit tonë. Le t’i marrim me radhë.

1. Rritja e numrit të anëtarëve të moshave të reja

Ne jemi një shoqëri e popullsi të re. Të dhënat demografike dëshmojnë se mosha mesatare në vendin tonë është 31 vjeç. Organizata jonë duhet ta pasqyrojë këtë fakt. Çdo vit rreth 25 mijë të rinj të vendit tonë mbushin 18 vjet, që është mosha kur ata bëhen qytetarë aktivë me të drejtë vote. Si organizatë, ne duhet të jemi aktivisht në komunikim me moshat e reja. Socializimi më i rëndësishëm politik fillon gjatë shkollës së mesme. Pa i folur rinisë së vendit tonë dhe brengave të tyre, ne nuk mund të mbetemi as forcë udhëheqëse e as forcë e të majtës progresiste. Lëvizja jonë ka qenë tradicionalisht një vatër e edukimit politik të rinisë. Siç dihet, nëpër qendrat tona gjithandej Kosovës, ne kemi ofruar zyrat tona si infrastrukturë edukimi. Aty janë mbledhur të rinjtë e të rejat për të lexuar e diskutuar libra, shikuar e komentuar filma, e kështu me radhë. Këto aktivitete nuk duhet të ndalojnë tani që jemi në pushtet. Si organizatë politike përkundrazi tani posedojmë mjete më të mëdha financiare se kurrnjëherë më parë që të vazhdojmë me këtë mënyrë tonën. Ato duhet t’i përdorim për të pajisur qendrat tona gjithandej vendit tonë me biblioteka të pasura ku të rinjtë mund të huazojnë libra e t’i lexojnë ato. Qendrat tona duhet të organizojnë grupe leximi që takohen rregullisht për të diskutuar një libër të caktuar që është përzgjedhur si leximi i muajit. Qendrat tona duhet t’i pajisim me projektorë cilësorë për të shfaqur filma dokumentarë e artistik që promovojnë mendimin kritik dhe ndërgjegjen qytetare. Shkolla politike që organizojmë rregullisht në kuadër të organizatës sonë nuk duhet, sepse nuk mundet, të zëvendësojë këto aktivitete më të decentralizuara e më gjithëpërfshirëse. Aktivisti politik nuk e zhvillon as punën pa pasion e as kohën e lirë pa shije.

2. Rritja e anëtarësisë së vajzave dhe të grave

Ne jemi një shoqëri me tradita patriarkale. Kjo është një trashëgimi autoritare e kulturës sonë që duhet çmontuar. Siç theksonte Ukshin Hoti, patriarkalizmi është formë e pajustifikueshme autoriteti si mbi gruan ashtu dhe mbi të riun. Kjo është shumë me rëndësi të mbahet parasysh. Patriarkalizmi shtyp gratë, por ai gjithashtu helmon rininë si të vajzave ashtu edhe të djemve. Neve si socialdemokratë na takon që të prijmë në betejën për emancipimin e shoqërisë nga çdo lloj i shtypjes. Në këtë drejtim, duhet të vazhdojmë përpjekjet për të krijuar një organizatë mirëseardhëse për vajzat dhe gratë. Si edhe në sfera të tjera, edhe këtu duhet të prijmë përmes shembullit. Strukturat e Lëvizjes në të gjitha nivelet duhet të jenë vende ku vajzat dhe gratë ndjehen të sigurta për të dhënë kontributin e tyre. Shumë potencial i shoqërisë sonë mbetet i bllokuar për shkak të shtypjes patriarkale. Ne duhet të bëjmë çmos që këtë potencial ta çlirojmë. Jetojmë në kohëra të vështira, kur kemi simpati pa empati dhe empati pa solidaritet. Kjo betejë nuk fitohet vetëm. Gratë kanë nevojë në radhë të parë për njëra-tjetrën për të zgjeruar horizontet mendore të ngushtuara nga ideologjia patriarkale që kanë përthithur kaq gjatë. Në këtë drejtim, mbase do ishte një ide e duhur që gratë të organizonin grupe për ngritje të vetëdijes brenda organizatës sonë. Ato mund të nisnin në organizatën tonë e prej këtu të zgjeroheshin më tej në gjithë shoqërinë. Këso lloj grupesh u patën vërtetuar mjaft të suksesshme përgjatë valës së dytë feministe në Shtetet e Bashkuara të Amerikës (1960-1980). Ndonëse gratë janë ato që duhet të prijnë në këto punë, atyre u duhet solidariteti i djemve dhe i burrave të cilët e kuptojnë se nuk ka burrë të lirë pa pasur grua të lirë. Organizata jonë ka nevojë për gratë si eksperte, mendimtare dhe aktiviste që kanë shumë për të na mësuar e për të kontribuar.

Në drejtim të krijimit të një ambienti mirëseardhës dhe të sigurtë për gratë, organizata jonë duhet të kujdeset për përfaqësim të barabartë të grave në të gjitha nivelet drejtuese. Gjithashtu, duhet të sigurohemi që gratë më të shtypura në shoqërinë tonë, ato të shtresës së mesme të ulët dhe të ulët, të jenë më të përfaqësuara seç kanë qenë deri më tani. Gruaja e varfër është dyfish e shtypur: si grua dhe si klasë ekonomike.

3. Krijimi i kohezionit midis brezave, grupeve shoqërore, e botëkuptimore

Ndonëse bëjmë pjesë në grupet e shteteve e shoqërive relativisht të vogla, jemi mjaftueshëm të mëdhenj për të qenë një shoqëri ku ekziston një shumëllojshmëri besimesh fetare, trashëgimish etnike e kombëtare, grupesh shoqërore, e botëkuptimesh fetare apo laike mbi botën dhe natyrën njerëzore. Si socialdemokratë duhet të vëmë theksin te solidariteti qytetar, jo thjesht te toleranca ndër-njerëzore. Dallimet janë aty dhe ato mund të pasurojnë debatin tonë shoqëror dhe politik, por ato kurrsesi nuk duhet parë si barriera natyrore që u dashka shndërruar në mure të patejkalueshme shoqërore midis nesh. Sigurisht, shteti duhet të jetë i paanshëm, pra as të favorizojë as të pengojë grupet shoqërore të organizuara në bazë të botëkuptimeve të ndryshme fetare apo laike. Kjo është tejet e rëndësishme për ruajtjen e paqes shoqërore. Por jashtë kornizës formale shtetërore, si mendimtarë dhe aktivistë socialdemokratë ne duhet të promovojmë bashkëpunimin qytetar mes njerëzish të feve, etnive, klasave, e botëkuptimeve të ndryshme. Tjetri nuk duhet parë si kufiri i lirisë time por si kushti i mundësisë së lirisë time. Natyrisht, ne jemi një parti socialdemokrate. Si të tillë nuk mund të jemi ideologjikisht gjithëpërfshirës. Por ajo që mund dhe duhet të bëjmë është të rrisim llojllojshmërinë socioekonomike e botëkuptimore të qytetarëve me pikëpamje politike të majta që aderojnë në organizatën tonë. Duke bërë kështu, ne ofrojmë organizatën tonë si shembull të kohezionit shoqëror që na duhet gjithandej shoqërisë tonë. Social-demokratët nuk janë njerëz të njëjtë dhe aq më pak janë të njëjta prejardhjet e tyre.

Në këtë mes, një sfidë e shoqërive moderne është edhe marrëdhënia mes brezave të ndryshëm. Në shoqërinë tradicionale, para revolucionit industrial, kohezioni mes brezave ishte gjë e natyrshme. Brezi më i vjetër ia kalonte brezit të ri dijen jetike për punimin e tokës dhe bashkë me të edhe doket e zakonet e tjera përcjellëse. Marrëdhënia pra karakterizohej nga respekti i të rinjve për njohurit e më të moshuarit. Kjo lloj marrëdhënie përmbyset me lindjen e shoqërive të industrializuara urbane, ku shkalla e ndryshimeve teknologjike bëhet aq e shpejtë sa nuk pret as ndërrimin e një gjenerate (përafërsisht 30 vite duhen për t’u ndërruar gjeneratat). Në këto kushte, bota e më të moshuarve dikujt i ngjanë se s’mund të ofrojë më dije të vyeshme praktike, thuajse dijet e tyre dalin jashtë përdorimi shumë shpejt dhe kjo mandej e intensifikon konfliktin mes brezave. Veç këtij fakti, duke qenë ne një shoqëri me shumicë dërrmuese të përbërë nga rinia, duhet të jemi posaçërisht të kujdesshëm jo vetëm në mbrojtjen dhe promovimin e interesave të më të moshuarve, por për hir të kohezionit mes brezave duhet edhe të gjejmë mënyra për të angazhuar përvojën e këtyre të fundit në dobi të shoqërisë ashtu që të rinjtë tanë të shohin se sa shumë ka për t’u mësuar prej më të moshuarve, përkundër paragjykimeve të epokës teknologjike në të cilën po jetojmë.

4. Forcimi i shkollës politike dhe dimensionit ekzekutiv brenda saj

Shkolla politike është vendi ku formojmë aktivistin tonë për të marrë përgjegjësitë që i takojnë. Kurrikula që kemi në zbatim tani përbëhet nga tri nivele të ndryshme siç e dini të gjithë: niveli politiko-organizativ, niveli ekzekutiv dhe niveli teorik. Niveli politiko-organizativ shënjestron aktivistët e rinj që sapo i janë bashkuar Lëvizjes, dhe ndodhë në Qendrën përkatëse. Ai synon t’i pajisë ata me njohuri elementare mbi historikun e Lëvizjes VETËVENDOSJE! dhe qëndrimet e saj politike mbi temat më të rëndësishme për shoqërinë tonë. Niveli ekzekutiv ofrohet për bartësit e pozitave udhëheqëse në nivel të qendrave, përfshirë këtu asamblistët dhe drejtorët komunal dhe ka për synim t’i pajisë ata me njohuri për programin tonë dhe për administratën publike, sidomos në nivel komunal. Së fundi, niveli teorik, niveli më i avancuar, ka për synim përgatitjen teorike të aktivistëve tanë në fushat e shkencave sociale dhe të atyre humane, ashtu që ata dhe ato të jenë jo vetëm zbatues të programit tonë por edhe kontribuues në rimendimin e riformulimin e tij për të ardhmen.

Të gjitha nivelet kanë rëndësinë e tyre në formimin dhe emancipimin e aktivistit tonë. Synimi ynë në katër vitet e ardhshme duhet të jetë pasurimi i vazhdueshëm i kurrikulës të gjitha niveleve me material të ri dhe ligjërues të rinj. (Bibliotekat që duhet të ndërtojmë nëpër qendrat e Lëvizjes do të ishin në funksion edhe të mbështetjes së misionit të shkollës sonë politike.) Ndonëse synimi ynë duhet të jetë forcimi i gjithmbarshëm i shkollës, mendoj që vëmendja jonë duhet të përqendrohet sidomos te forcimi i nivelit ekzekutiv. Në këtë nivel formohet udhëheqësia e qendrave tona, të cilat janë në kontakt të drejtpërdrejtë me qytetarin dhe hallet e tij të përditshme.

Rregullisht duhet të organizohen debate gjysëmformale në Lëvizje ku ndonjëri bën një prezantim për një temë dhe mandej të tjerët diskutojnë hapur për të. Kafet, çaji dhe uji janë falas. Komitetet Profesionale dhe Shkolla Politike përfshihen në këtë. Shkolla politike edhe edukon përveçse arsimon. Idealet e përbashkëta tashmë nënkuptojnë moralin e idealistëve. Siç e thotë një autor, Alfred Adler-i, “I gjithë qëllimi i edukatës është të mbjellë në qenien shpirtërore të njerëzve kurajon dhe ndjenjën kolektive.”

Tash, ne e dimë se jo pak aktivistë tonë janë si nxënësit a studentët që dëgjojnë në klasë por nuk mësojnë aq shumë në shtëpi dhe përgjithësisht shkruajnë pak. Shkrimi e mundëson thellimin, strukturimin dhe sistematizimin e të menduarit. Nuk ka organizim politik pa mendim, ide, botëkuptim dhe ligjërim të organizuar, pra pa tekst.

Përveç social-demokracisë, fryma e përgjithshme e shkollës sonë politike duhet të jetë edhe kombëtariste. VETËVENDOSJE! duhet ta afirmojë Rilindjen Kombëtare, të gjysmës së dytë të shekullit XIX dhe gjysmës së parë të shekullit XX. Ta riaktualizojë si frymë të përgjithshme dhe si shumësi tekstesh të rilindasve tanë, le të themi nga Sami Frashëri te Fan Noli.

Nga shkolla politike duhet dekonstruktuar tezat që qarkullojnë si thashetheme mediale në lidhje me qëllimin dhe karakterin e Lëvizjes sonë. Për shembull, teza të tipit “Lëvizja VETËVENDOSJE! është islamiste”, “Lëvizja VETËVENDOSJE! është populiste”, apo “Lëvizja VETËVENDOSJE! është kundër shtetit të Kosovës sepse është për bashkim kombëtar”. Këto dhe të tjera thashetheme duhet dekonstruktuar me kujdes e pastaj duhet përcjellë te qytetarët nëpër tubime me ta.

5. Promovimi i organizimit sindikal te punëtoria e sektorit privat

Në vendin e punës njeriu duhet ta ngrisë veten dhe shoqërinë. Të krijojë marrëdhënie solidare dhe të dinjitetshme me punëtorët e tjerë dhe jo konkurrencë deri në luftë për mbijetesë. Të jetë njeri punëtor, por edhe të jetë njeri duke qenë punëtor. Të mos i merren frytet e punës dhe as raportet njerëzore me të tjerët. Nuk mund të jenë rezultatet, frytet dhe meritat të pronarit e menaxherit, kurse kostoja e jetës si banimi, shkollimi, arsimimi e shëndetësia, përgjegjësi e vetë punëtorit. Në punë punëtori edhe merr pjesë në betejën për të drejtat e punëtorëve, e për drejtësi, barazi e për liri, e këtë për gjithë shoqërinë. Vendi i punës nuk duhet të varet nga vullneti a dëshira e menaxherit, profiti i pronarit apo fluktuimet në treg. Punëtori duhet të paguhet sa më shumë për punën që bën, e jo fare pak vetëm aq sa të vie edhe nesër në punë. Punëtori nuk është as mall e as hamall.

Në këtë frymë si Qeveri e kemi përpiluar një koncept-dokument për fondin sovran që ndër të tjera inspirohet nga modeli gjerman i bashkë-qeverisjes për firmat që do të jenë asete publike. Sipas këtij modeli, punëtoria merr pjesë në qeverisje të firmës krahas menaxhmentit. Ky model do të ndihmojë në demokratizimin e ekonomisë tonë, duke ofruar një model vetëqeverisës menaxhimi si një kundërpeshë e rëndësishme ndaj modelit hierarkik të korporatës private apo asaj shtetërore.

Si Lëvizje duhet të bëjmë më shumë në promovimin e sindikalizmit në radhët e punëtorëve të sektorit privat, aty ku shtypja është më brutale. Aktivistë tanë të talentuar duhet të angazhohen në përhapjen e ungjillit sindikalist te punëtoria e sektorit privat. Pa demokraci nëpër vendet e punës është tejet e vështirë të mirëmbahet demokracia në nivel të institucioneve formale të shtetit. Mbështetja e emancipimit të punëtorisë së sektorit privat është një mision që si socialdemokratë na takon ta mbështesim. Arritjet më të mëdha në favor të punëtorisë janë shënuar atëherë kur në qeverisje ka qenë një administratë miqësore socialdemokrate kurse në rrugë duke bërë kërkesa klasa punëtore—për shembull, kujtojmë kohën këtu të New Deal-it gjatë administratë së FDR-it gjatë administratës në ShBA.

6. Përgatitja e burimeve njerëzore dhe programore për zgjedhjet lokale 2025

Ndonëse performanca e organizatës sonë në zgjedhje komunale ka shkuar duke u përmirësuar me kalimin e kohës, ajo ende lë shumë për të dëshiruar. Shkaqet për këtë janë të shumta e të ndryshme. Sidoqoftë, përqendrimi ynë duhet të jetë në përforcimin e atyre faktorëve që janë nën kontrollin tonë. Në këtë mes, përgatitja e burimeve njerëzore dhe përpilimi i programeve që u flasin konkretisht problematikave të secilës komunë ku garojmë janë dy gjërat më të rëndësishme që janë në dorën tonë për t’u përmirësuar. Zgjedhjet komunale të 2025 janë më afër sesa që mund të mendojmë. Andaj përgatitjet e mirëfillta për to duhet të fillojnë që tani. Hulumtimi i problemeve komunale dhe rekrutimi i burimeve njerëzore të përshtatshme janë procese që marrin shumë kohë. Në të kaluarën shumë shpesh e kemi lënë kryerjen e këtyre detyrave për momentet e fundit, por siç thotë populli natën e Bajramit nuk mahet kurbani. Tash të gjitha partitë që kërkojnë ta ruajnë gjendjen ose ta kthejnë atë para shkurtit të vitit të kaluar natyrisht që do të bashkohen kundër nesh, le t’i quajmë ato parti të gjendjes, e ne jemi lëvizja e situatës.

Shumë shpejt duhet që për secilën komunë të themelojmë task forca të veçanta që do të kenë për mision hulumtimin e problemeve komunale dhe përpilimin e zgjidhjeve për to. Nëpër komuna, VETËVENDOSJE! duhet të bëjë edhe punë vullnetare, publike e sociale, për qytetarët pa dallim. Asisoj, me vepra konkrete lidhemi me popullsinë më shumë, i mobilizojmë ata për diçka shumë të prekshme (psh. pastrimi i lagjes) dhe e fitojmë mbështetjen e tyre që e përdorim sërish për ata. Kryetarët e komunave që udhëheqim dhe asamblistët tanë komunalë gjithandej komunave të Kosovës duhet të jenë bërthama e këtyre veprimtarive. Edhe aty ku jemi opozitë komunale asamblistët tanë duhet të jenë sa më aktivë në debatet që zhvillohen në asamble por edhe në komunikim të përditshëm me qytetarin e komunës. Konferencat e rregullta për media ku asamblistët tanë komunalë i informojnë qytetarët për qëndrimet dhe politikat e Lëvizjes për komunën e tyre janë të domosdoshme. Fytyrat dhe zëri i atyre që na përfaqësojnë në kuvendet komunale duhet të jenë shumë mirë të njohura për qytetarin, e jo që ai të njoftohet me to gjatë fushatës zgjedhore.

Nuk ka organizatë pa planifikim ditor, javor, mujor, stinor, vjetor, trevjeçar dhe pa planifikim konkret në të gjitha nivelet. Planifikimi kërkon imagjinatë të përcaktimit të objektivave, të përzgjedhjes së hapave dhe të përfytyrimit të arritjeve. Planifikimi është faktor mobilizues kryesorë i organizatës sonë.

7. Përgatitja e Platformës politike për mandatin e dytë të Qeverisë

Nga Manifesti te Programi Politik, nga Programi Politik te Alternativa Qeverisëse dhe së fundmi nga Alternativa Qeverisëse te Programi Qeveritar, ky është rrugëtimi konceptual i Lëvizjes VETËVENDOSJE! i cili njëmend ka ndryshuar për shkak se është zgjeruar dhe është thelluar. Demokracia në institucione e në shoqëri, sovraniteti në shtet dhe territor, prodhimi e punësimi në ekonomi, drejtësia e ligji për barazi, kontributi e përkujdesja për mirëqenie, u patën radhitur në 20 kapitujt e Alternativës sonë Qeverisëse para gati një dekade, e që tash janë të përfshira në programin tonë qeveritar. Nga idetë te kritika, nga kritika te qëndrimet dhe nga qëndrimet te zgjidhjet programore.

Në alternativën me të cilën i fituam zgjedhjet kishim elaboruar gjerë e gjatë, shtetin republikan dhe sundimin e të drejtës, politikat fiskale dhe mbrojtjen sociale, sistemin pensional dhe sigurimet shëndetësore, punësimin dhe investimet, arsimin dhe shkencën, industrinë dhe bujqësinë, sektorin privat dhe ndërmarrjet e biznesit, mbrojtjen e vendit dhe sigurinë për qytetarët, politikën e jashtme dhe reciprocitetin, integrimin evropian dhe mërgatën, pushtetin lokal dhe planifikimin hapësinor, kulturën dhe trashëgiminë kulturore, edukimin dhe sportin. E këto i bëmë sepse se ne e shohim shtetin si Republikë dhe ne e duam shtetin si Republikë. Republika na mundëson që të jemi qytetarë me të drejta, punëtorë me mirëqenie, njerëz të arsimuar dhe banorë të shëndetshëm. Republika e Kosovës e shpallur më 2 korrik 1990 ishte Republika e Parë e Kosovës si republikë-për-rezistencë. Pavarësia e Kosovës e shpallur më 17 shkurt 2008 ishte Republika e Dytë e Kosovës që shpesh doli të jetë Republikë për shitje. Ne kemi nevojë për Republikën e Tretë të Kosovës që ta shpëtojmë Republikën si të tillë dhe ta avancojmë atë. Pra, për Republikën e Tretë si Republikë për drejtësi e bashkim, për demokraci e zhvillim, për barazi e mirëqenie. Kjo nënkupton reforma aq të thella sa që reforma transformuese, pra transformim të institucioneve të sistemit. Një punë që tashmë e kemi filluar por që duhet ta vazhdojmë fuqishëm edhe në mandatin e dytë qeverisës.

Platforma politike për mandatin e dytë qeverisës do të jetë më precize sepse e informuar nga mësimet dhe përvojat që kemi nxjerrë e do të vazhdojmë të nxjerrim përgjatë këtij mandati qeverisës.

Jemi zotuar që Shteti i së Drejtës, në konceptimin tonë, bën aktualizimin e vetëvendosjes, prej kushtetimit modern të shtetit tonë, ku burim sovraniteti duhet të jetë populli dhe vetëm ai, si në gjithë shtetet demokratike. Shteti i së drejtës duhet të jetë republikan dhe Republika duhet të jetë vlera më e lartë politike. Ajo simbolizon të përbashkëtën, terrenin e vetëm ku garantohet liria e përgjegjësia e individuales.

Shteti i Zhvillimit Ekonomik nuk ngelet spektator i tregut të lirë por angazhohet si faktor e aktor duke orientuar dhe nxitur ndërmarrje e sipërmarrje ekonomike që i sjellin vlerë të shtuar financiare dhe materiale vendit tonë. Prodhimi bujqësor, industrial e zejtar duhen ndihmuar e përkrahur nga qeveria që të rriten eksportet, të zëvendësojnë e zvogëlojnë importet, të rrisin punësimin e qytetarëve e gjithashtu edhe akumulimin e kapitalit.

Shteti i Mirëqenies Shoqërore është universal, pra, të gjithë ata që kanë të ardhura duhet të paguajnë taksa dhe të përfitojnë të gjithë ata që kanë nevojë; dhe, është edhe solidar, pra kontributi i gjithsecilit do të jetë në progresion me të ardhurat që përfiton d.m.th. ata që fitojnë më shumë, kontribuojnë më shumë për të mirën e përgjithshme.

Përderisa kujdesi shëndetësor dhe arsimimi varen kaq shumë nga të ardhurat dhe klasa shoqërore nuk mund të bëhet fjalë as për drejtësi e as për mundësi të barabarta. Shpatullat e fuqishme duhet të bartin më shumë peshë sesa shpatullat e dobëta. Mirëpo, paraprakisht, e gjithë ekonomia dhe shoqëria duhet të futet brenda ligjit e të formalizohet.

Zgjidhjen, Lëvizja jonë si ngahera e sheh në lëvizje të përbashkët politike e shoqërore të të gjithë qytetarëve drejt bashkimit organik të aspektit të së drejtës, të zhvillimit dhe atij social të shtetit. E kemi thënë qartë e saktë, e duhet ta përsërisim përherë, se Shteti i së Drejtës, Shteti Zhvillimor dhe Shteti Social janë të lidhura në jetë e në shoqëri, prandaj ne i paraqesim ato të bashkëlidhura në vizione dhe për institucione. P.sh. respektimi i ligjit për kohëzgjatjen e orarit të punës e rrit punësimin dhe rrjedhimisht mirëqenien. Kur njerëzit nuk punojnë më nga 10 a 12 orë në vend se të punojnë 8 orë, duhen punësuar më shumë punëtorë të rinj. Kësisoj, Shteti i së Drejtës dhe ai Social shfaqen bashkë. Ose, luftimi i evazionit fiskal rrit bazën tatimore e investimet serioze dhe kur kësaj i shtohet tatimi progresiv mundësohet shumëfishimi i mjeteve buxhetore që i dedikohen gjyqësisë dhe prokurorisë. Kësisoj, Shteti i së Drejtës dhe Shteti Zhvillimor shfaqen po ashtu bashkë. Ose, zvogëlimi i tatimit në të ardhura për punëtorët që inkuadrohen në sindikata dhe e paguajnë anëtarësinë aty, jo vetëm që e rrit organizimin e tyre dhe e zvogëlon shfrytëzimin, por edhe i nxit punëdhënësit për vizion më afatgjatë që stabilizon rritjen e ndërmarrjes dhe përfitimin e biznesit. Kështu, Shteti Zhvillimor dhe ai Social shfaqen bashkë.

Të nderuar të pranishëm,

Nuk ka demokraci pa Republikë dhe nuk ka demokraci pa socialdemokraci. Sepse në Republikë populli është burim i sovranitetit (për dallim prej monarkisë ku është mbreti) dhe popullsia është, në shumicën e saj dërrmuese, ose e varfër ose e klasës së mesme. Socialdemokracia angazhohet që të bëhet zhvendosja e balancit të fuqisë nga kapitali te puna.

Ky shtet i shumicës është i vetmi që mund të garantojë të drejtat e pakicave në kuptimin modern dhe evropian të fjalës. Çdo shtet i pakicës, qofshin ata politikanë shqiptarë që u bënë multimilionerë, qofshin ata burokratë ndërkombëtarë me fuqi ekzekutive e imunitet prej ligjit, qofshin ata përfaqësues të pakicave kombëtare me të drejtë vetoje bllokuese, pra çdo shtet i pakicës është pengesë për demokracinë dhe funksionimin si në drejtësi, po ashtu edhe në ekonomi e shoqëri. Ne këtë e kemi jetuar e përjetuar gjatë historikut të Lëvizjes tonë andaj e kemi mësimin e duhur, përvojën adekuate, që mos të na ngjajnë në të ardhmen zhvillime e dukuri të tilla.

Lëvizja VETËVENDOSJE! duhet ta formulojë një platformë të re për mandatin e dytë qeverisës, ndonëse si frymë dhe orientim ideopolitik ajo duhet të jetë trashëgimtare e alternativës qeverisëse që na solli fitoren. Për të arritur te kjo platformë, na duhet një punë e madhe ekipore që kërkon bashkëpunimin e të gjithë neve, që nga aktivisti i pikës e deri tek anëtarë të Lëvizjes që janë bartës funksionesh qeveritare. Aktivisti i pikës na informon se cili në fakt ka qenë ndikimi praktik i politikave tona qeveritare në jetën e përditshme të qytetarit, ndërkohë që bartësi i funksioneve qeveritare na informon në detaje për mundësitë dhe kufizimet e kapacitetit tonë shtetëror që duhen pasur parasysh për të ardhur me një platformë sa më efektive dhe të zbatueshme.

8. Rritja e rrjetit të Qendrave të Lëvizjes VETËVENDOSJE! në mërgatë

Organizimi do të jetë me i përshtatshëm e edhe më produktiv me rregulloren e re të Lëvizjes VETEVENDOSJE! për Mërgatën. Qendrat tona do të kenë tashmë mundësinë për t’u organizuar në bazë të specifikave dhe të rrethanave të shtetit ku jetojnë bashkatdhetarët dhe secila Qendër do të përcaktojë qëllimet dhe synimet e saja. Kjo është një ndryshim i madh në mënyrën e organizimit tonë. Kështu do të bëhemi më praktikë me këtë mënyrën e re në organizim e më efikase në angazhim.

Rritja e shtrirja e Lëvizjes në mërgatë do të shërbejë si rrjetëzim i aktivistëve e strukturave për t’i identifikuar e organizuar kudo profesionistët që jetojnë në mërgatë, organizatat studentore, kulturore, për të rritur ndikimin politik në organet politike në shtetet ku jetojnë dhe në ato vendore, për të vendosur kontakte me institucione të rëndësishme në shtetet përkatëse e për të krijuar lidhje të shumta e të reja me ato shqiptare.

Si një organ i ri këshillues, Rrjeti i Qendrave në Mërgatë do të funksionalizohet duke krijuar kështu edhe një hapësire të re komunikimi midis qendrash për të shkëmbyer idetë e njohuritë, shkathtësitë e përvojat e tyre. Në organizatë perspektivat e këshillat e këtij organi do të trajtohen e do të çmohen përherë.

Rrjetëzimi i aktivistëve e anëtarëve nga njëra anë dhe nga ana tjetër përmes tyre i bashkatdhetarëve, profesionalistëve, shoqatave, institucioneve politike e jo vetëm, do të mirëmbajnë një komunikim të domosdoshëm e shumë të rëndësishëm midis nesh.

9. Angazhimi i studentëve dhe profesionistëve në organizatën politike të Lëvizjes

Pa studentët, protestat dhe organizimet, fushatat dhe entuziasmi i përgjithshëm i Lëvizjes nuk do të kishin qenë as për së afërmi të njëjtat. Ndërsa pa Lëvizjen, angazhimi dhe aktivizmi studentor do të kishte qenë i fragmentuar, e energjia e tyre po ashtu. Kemi nevojë ta mendojmë Lëvizjen si një vend ku ushtrohet një mënyrë tjetër e të studiuarit që i sprovon efektet e dijes në shoqëri. Universiteti është si një arkivë e stabilizuar dijeje universale, ndërsa Lëvizja vendi ku munden të mësojnë sesa i domosdoshëm është ky arkiv universal për vendin tonë. Lëvizja duhet të krijojë vendin ku studentët t’i rrinë besnikë dijes që marrin edhe jashtë universiteteve. Zyrat e Lëvizjes duhet të jenë vende studimi të problematikave shoqërore, lokale dhe qendrore; vende që ndërtojnë arkivën e tyre të diskutimeve dhe të analizave. Kemi nevojë për analiza, kritika dhe propozime të studiuara. Studimi i problematikave dhe ideve shpërfaq seriozitetin tonë në trajtimin e tyre. Pa studim, mbetemi abstraktë dhe të vagullt. Kush më mirë sesa studentët mundet ta përcjellë këtë punë studimore. Të studiuarit bashkë me të tjerët e ndërlidh dijen me politikën, universitetin me shoqërinë; ndërlidh prejardhjet, klasat, gjinitë, besimet dhe identitetet. Nëse në universitet të studiuarit ngelet individual dhe hierarkik, në Lëvizje duhet të jetë kolektiv dhe barazitar.

Pa profesionistët kritika e Lëvizjes do të vazhdonte të ishte e saktë, por abstrakte. Me profesionistët, mendimi i Lëvizjes është konkretizuar dhe imtësuar edhe më shumë. Pa Lëvizjen, analiza e profesionistëve do të kishte mbetur e izoluar, pa efekte konkrete shoqërore. Ka shumë profesionistë të mirë të shqetësuar për gjendjen e profesioneve, qyteteve dhe vendit të tyre që kanë kuptuar se nuk mund t’i zgjidhin ato pa e zgjidhur probleme më strukturore të shoqërisë sonë. Profesioni është vokacion, dije e aplikuar dhe etikë profesionale që kontribuon vetëm në një fushë të shoqërisë. Lëvizja duhet të jetë vendi ku ata mund ta ushtrojnë dijen profesionale dhe transformimin e mbarë shoqërisë. Kosovës dhe ne si aktivistë të Lëvizjes na duhet një organizatë ndërstudimore, ndërdisiplinore, dhe ndërprofesionale për t’i rrokur në kompleksitetin e tyre problemet shoqërore. Pa një qasje të tillë të hapur, do të mbetemi duke administruar dhe jo duke transformuar; do të përfundojmë në angazhime të befta, të pjesshme dhe arbitrare, pra në kinse angazhim. Shpesh, urgjenca e kalimit në zgjidhje dhe veprim, shpërfaq më shumë një dëshirë për ta hequr qafe problemin sesa brengosjen për trajtimin e tij. Duhet të kemi guxim të bashkëjetojmë me problemin deri sa ta zgjidhim atë.

Neve na duhet jo vetëm ta organizojmë lëvizjen sipas studimeve dhe profesioneve, por të shkojmë edhe më tutje, duke e organizuar sipas ndërthurjes së tyre. Vetë politika është vendi ku studimet, profesionet dhe problematikat shoqërore ndërthuren me njëra-tjetrën, bëhen pjesë e një të përbashkëte, trajtohen si pjesë e shoqërisë pa të cilën asnjëra prej tyre nuk do të kuptohej në plotninë e saj. Shkolla Politike, Forumet e Lëvizjes, Sekretariatet, Qendrat anembanë dhe Komitetet profesionale duhet të vazhdojnë traditën e organizimit të diskutimeve, ligjëratave, seminareve dhe punishteve në të cilat programi i Lëvizjes dhe problematikat shoqërore studiohen shtruar dhe plotësisht e seriozisht. Të gjitha degët studimore dhe profesionale do të konsiderohen si njëlloj të vlefshme. Vetëm barazia në dije dhe punë e zhvillon mbarë shoqërinë. Me studentë dhe profesionistë, me organizata, qendra dhe institute, Lëvizja mund të organizojë projekte të thella studimore dhe fushata të gjera tematike. Lëvizja duhet të angazhojë sidomos vajzat studente, sidomos të familjeve të varfra dhe periferike; të afrojë profesionistët e skajuar dhe inovativ; bashkë me studentët dhe profesionistët e mërgatës dhe trojeve që janë të banuara me shqiptarë. Studentët dhe profesionistët e freskojnë, zhvillojnë dhe thellojnë diskutimin e brendshëm, mendimin dhe praktikën e Lëvizjes. Në instancë të fundit, duke i afruar në Lëvizje, dëshmojmë se e kemi kuptuar potencialin emancipues dhe transformues të studimit, të profesionit dhe të politikës.

10. Bashkëpunimi ndërkombëtar dhe ai jashtë shtetit e brenda kombit

Shqiptarët në rajon jetojnë në trojet e tyre, dhe nuk janë pjesë e ndonjë diaspore të vjetër apo të re. Si pasojë, ata nuk mund të jenë subjekt i një organizimi të ngjashëm me atë të Qendrave të Lëvizjes në mërgatë, mirëpo nuk mund të organizohen as njësoj si organizimi i Lëvizjes sonë në Kosovë.

Lëvizja ka simpatizantë e mbështetës në trojet shqiptare në Ballkan që mund të vijnë nga parti e shoqata të ndryshme, dhe jemi të interesuar t’ju ndihmojmë atyre në organizimin tonë atje, në nivel përfaqësues, për të organizuar kontributin vullnetar të mbështetësve tanë, për t’i dhënë zë qëndrimeve të tyre e tonave, dhe për të mbështetur çështje e procese sipas programit tonë politik. Organizimi i mbështetësve tanë në vendet ku ata jetojnë nuk duhet konsideruar si ndërhyrje, por si një organizim vendor, autonom, i disa qytetarëve të atij shteti, të cilët mbështesin në aspektin ideor VETËVENDOSJE!-n dhe zbatojnë ligjet në fuqi.

Sa i përket marrëdhënieve me partitë, shoqatat e organizimet e ndryshme shoqërore të trojeve të banuara me shqiptarë, Lëvizja VETËVENDOSJE! ka për synim kultivimin e marrëdhënieve të mira, të hapura e transparente me të gjitha ato, si dhe nxitjes së bashkëpunimit për proceset e për çështjet ku pajtohemi e kemi qëndrime të përbashkëta.

Natyrisht, ne preferojmë marrëdhëniet me partitë e shoqatat, apo individët brenda tyre të cilët nuk i njohim si të korruptuar, si të përfshirë në privatizime zhvatëse e shkatërrim të pasurive kombëtare. Por formalisht, ne do të respektojmë mandatin dhe pozitën e gjithkujt, që rrjedh prej votës së publikut apo të anëtarësisë.

Bashkëpunimi ynë me partitë, shoqatat dhe organizimet e tjera shqiptare do të jetë multidimensional, në tre rrafshe të gjera:

• I pari është rrafshi kombëtar: për forcimin e faktorit shqiptar në Ballkan, në aspektet e sigurisë, prodhimit, demografisë, shëndetit publik, arsimit e kulturës, drejt një afrimi me shqiptarët teksa afrohemi me Evropën.

• Dy, është rrafshi i socialdemokracisë: në forcimin e të drejtave njerëzore do të bashkëpunojmë, mirëqenies publike, mbrojtjes sociale, rritjes ekonomike, kapacitetit për ballafaqim me kriza, etj.

• Dhe në rrafshin e drejtësisë: për luftimin e korrupsionit të nivelit të lartë ndërkombëtar e kombëtar, luftimin e sistemit ekonomik oligarkik, luftimin e krimit të organizuar dhe të mafias, e forcimin e shtetit të drejtë.

Për të arritur këto bashkëpunime, Lëvizja do të angazhojë strukturat e saj organizative të zgjedhura e të emëruara, forumet e saj rinore e gjinore, si edhe grupin parlamentar. Ndërsa fryma politike e bashkëpunimit me shqiptarët në troje do të çohet përpara edhe nga qeveria qendrore e qeverisjet lokale, kudo ku drejton Lëvizja jonë.

Sfidat me të cilat përballemi në Republikën e Kosovës e dimë që nuk janë as të izoluara e as të veçanta. Ndryshimet klimatike, pabarazia e manifestuar në forma të ndryshme, kriza energjetike, inflacioni i lartë e të tjera sfida përballohen vetëm në bashkëpunim e solidaritet me subjektet e tjera ndërkombëtare, me të cilat ndajmë vlerat e njëjta socialdemokrate.

Prandaj, thellimi i marrëdhënieve aktuale me partitë simotra e partnerët ndërkombëtare, krijimi i marrëdhënieve të reja dhe përfshirja në rrjetet ekzistuese ndërkombëtare, janë të një rëndësie tejet të madhe për VETËVENDOSJE!-n.

Në vitet e fundit kemi pasur përparim të dukshëm në këtë rrafsh. Pas anëtarësimit në Internacionalen Socialiste, në vitin 2020 Lëvizja VETËVENDOSJE! u bë anëtare edhe në Aleancën Progresiste, organizatë që përbëhet nga mbi 100 parti politike socialdemokrate nga e gjitha bota dhe mbi 20 organizata partnere. Tani, duhet të synojmë anëtarësimin në Partinë e Socialistëve Evropian, me ç’rast Lëvizja jonë hapë pothuajse të gjitha dyert ndërkombëtare sa i përket lëvizjeve e partive socialdemokrate në Evropë dhe në botë.

Synimi i kësaj përpjekje është ndërkombëtarizimi i kauzës sonë kombëtare dhe bashkëpunimi me subjektet socialdemokrate të rajonit dhe Evropës, për t’i rezistuar tendencave autokratike të cilat kanë zënë vend në një numër shtetesh në kontinentin tonë. Këto ndërveprime ndihmojnë edhe në ngritjen e kuadrove të Lëvizjes sonë, duke i ekspozuar ata ndaj përvojave dhe praktikave të partive simotra dhe të partnerëve ndërkombëtar.

Krijimi dhe mirëmbajtja e këtyre marrëdhënieve kërkon një organizim e strukturim të duhur brenda organizatës sonë. Për këtë arsye Këshilli i Përgjithshëm i Lëvizjes VETËVENDOSJE! ka bërë ndryshimet statutore për ta zbërthyer Sekretariatin për Marrëdhënie me Jashtë në dy sekretariate të veçanta e të ndara: I pari është dhe i dyti është Sekretariati për Zhvillim të Bashkëpunimeve. Sekretariati i parë, pra ai për Marrëdhënie Ndërkombëtare do të kujdeset për të gjitha marrëdhëniet ndërkombëtare të Lëvizjes tonë, ndërkaq ky i dyti për Zhvillim të Bashkëpunimeve do të kujdeset për zhvillimin dhe mirëmbajtjen e marrëdhënieve me palët e treta brenda Republikës së Kosovës.

Me përfundimin dhe miratimin e Rregulloreve përkatëse për të dyja këto sekretariate dhe angazhimin e kuadrove të nevojshme në to, do të dinamizohet edhe më tutje prania e Lëvizjes VETËVENDOSJE! në arenën ndërkombëtare.

Të dashur aktivistë,

Të nderuar të pranishëm,

Zonja dhe zotërinj,

Të nderuar të pranishëm,

Kush flet pa e dëgjuar rininë, gabon. Kush flet pa i dëgjuar gratë, gabon. Kush flet pa i dëgjuar pleqtë, gabon. Kush flet pa i dëgjuar edhe qytetarët edhe fshatarët, po ashtu gabon. E kush flet duke i dëgjuar rininë, gratë e pleqtë, fshatin e qytetin, është zëri i shumicës, është zëri i të gjithëve që duhet ta dëgjojnë të gjithë. Është ky zëri i drejtë që nuk gabon, zëri i Lëvizjes, zëri i vetes suaj, zëri i vendimit tuaj, zëri i vetëvendosjes.

Më lejoni të falënderoj të gjithë dhe secilin prej anëtarëve e aktivistëve të Lëvizjes VETËVENDOSJE! për mbështetjen e pa kursyer gjatë gjithë këtyre viteve, dhe aktualisht që jemi këtu bashkë.

Më lejoni ta falënderoj kryesinë e Lëvizjes, nënkryetarët, Besnikun e Fatmiren, sekretaren Vloren, sekretaren për marrëdhënie me jashtë Mevlyden, kryetarin e Këshillit të Përgjithshëm Hydajetin, kryetarin e Kuvendit të Republikës Glaukun, dhe mbi të gjitha le ta falënderojmë së bashku atë aktivistin tonë të palodhshëm që nuk ia dimë as emrin e as mbiemrin. Pra, atë aktivistin që nuk ia dimë as emrin e as mbiemrin e të cilit ia dëgjojmë zërin dhe ia shohim fytyrën kur na duhet më së shumti dhe i cili mandej mungon kur vije puna të pozitat e te funksionet.

Është ai aktivist që është kushti i mundësisë tonë si Lëvizje, dhe e të qenit tonë bashkë do të thotë të jemi bashkë me atë aktivist, dhe ashtu bashkë të ecim përpara se sfidat janë të mëdha por asnjëra prej tyre e tillë që se tejkalojmë bashkë, kur jemi bashkë.

Le të angazhohemi pra bashkë me gratë për drejtësi, me rininë për zhvillim e me popullin për barazi. E kështu pra, VETËVENDOSJE! do të thotë Lëvizje e gjerë, struktura të reja, drejtim progresist dhe organizatë e fuqishme.

Ju faleminderit shumë!

Urime të gjithëve zgjedhjet e Lëvizjes VETËVENDOSJE!, këtë të diel të 25 shtatorit. Na priftë e mbara.

I nderuar Kryetar,

Të nderuar anëtarë të Kryesisë, Ministra, Deputetë

Të nderuar bashkëaktivistë,

E nderuar famijle Balaj, Xheladini, Dehari dhe Koskoviku,

Mirë se po takohemi dhe mirë se e gjejmë njëri tjetrin.

Rrugëtimi i grave në LV për barazi sociale ka një historik të gjatë dhe i jep kuptim më të thellë përpjekjes sonë për t’i parë kauzat e barazisë të bëhen realitet në shoqërinë tonë.

Vet themelimi i GVV (Gratë për VETËVENDOSJE!) është paramenduar si vazhdimësi e kësaj përpjekjeje të gjatë për të krijuar hapësirat e nevojshme që gratë dhe vajzat të jenë të përfaqësuara në të gjitha strukturat e Lëvizjes, e kauzat e tyre të bashkërendohen me veprime të qarta edhe në mandatet qeverisëse.

Mirëpo, ne sot nuk jemi të kënaqura vetëm me përfaqësimin si të tillë, por duhet të mbartim edhe krenari kur e kujtojmë nga kah ka ardhur ky përfaqësim – e ai është tejkalimi historik i kuotës edhe si përqindje, por edhe si mjet.

Ky rezultat është puna e mundi i grave dhe vajzave të LV ndër vite.

Është rezultat i atyre aktivisteve që kanë shkruar me sprej, kanë folur me megafon, kanë organizuar lagjen, konviktin, studentët, kanë shkruar komunikatën, kanë mbajtur qëndrim politik, i kanë drejtuar institucionet, janë arrestuar e burgosur disa herë, kanë denoncuar shovenizmin, kanë denoncuar aferat, i kanë kërkuar politikat barazimtare, i kanë kërkuar çerdhet, sigurinë e drejtësinë.

Aktivistet i kanë sjellë LV mendimin dhe aksionin.

Gruaja në LV e ka prodhuar ngjarjen politike dhe si e tillë ka qenë dhe është faktor i patejkalueshëm në vendimmarrje. 

Andaj na duhet feminizmi i VETËVENDOSJE! – s, një feminizëm social demokrat e progresiv, që nuk e sheh pushtetin si mjet për të shtypur, por si platformë për të çuar më tutje politikat e barazisë, me ndjeshmëri ndaj hierarkisë së klasave ekonomike në bashkëdyzim me ato gjinore.

Pra, nuk është vetëm një feminizëm për përfaqësim sipërfaqësor, por feminizëm për luftë të barazisë e drejtësisë – për instrumentalizim të pushtetit si vegël çlirimtare për të gjithë ato shtresa të shtypura e drobitura nga pushtetet e kaluara.

Përpjeka e grave për të drejta të barabarta përmban zjarrin dhe vrullin e LV.

Është thirrja jonë me shumë zëra, të fuqishëm dhe që mund të dridhen por që nuk ndalen.

Të nderuar të pranishëm,

Ne kemi trashëguar një histori përpjekjesh të grave të Kosovës: gratë në ilegale, gratë e Pajtimit të Gjaqeve, aktivistet e viteve të 90-a, gratë në UÇK-së, Gratë e Krushës, Thirrjet e Nënave, mbrojtëset e grave të dhunuara dhe aktivistet që e denoncojnë shtypjen e shfrytëzimin çdo ditë.

Nuk ka pajtim me dhunën. Për asnjërën nga ne. 

Për këto dhe nga këto është menduar GVV-ja, si strukturë gjithëpërfshirëse e cila do të veprojë t’i shtyjë përpara kauzat feministe që nga niveli i Pikës deri te ekzekutivi.

Prandaj, edhe kandidaturën time për të parën e GVV-së nuk e shoh të ndarë nga historia e aktivistes së Qendrës e të Pikës.

Puna e tyre në terren për mobilizim, organizim e artikulim e nxorën Lëvizjen të parën.

Në zgjedhjet e fundit mbi 50 përqind e votave për Lëvizjen erdhën nga gratë. Ky vrull i grave drejt LV, është padyshim përpjekje e aktivisteve dhe anëtareve tona.

Fitorja jonë së pari ju takon vajzave dhe grave.

Aktivistja politike e përbën pjesën qendrore të VETËVENDOSJES!, sepse ajo vazhdimisht i ka kujtuar edhe shoqërisë edhe organizatës sonë nevojën për liri e barazi EDHE gjinore.

GVV-ja si organizatë brenda Lëvizjes VETËVENDOSJE!, ka ardhur si ndërhyrje e gjendjes aspak të kënaqshme.

Si LV nuk mund të flasim për ide të reja shoqërore pa e denoncuar patriarkatin si mendësi dhe sistemin si forcë shfrytëzuese të grave.

Këtë e kemi bërë sistematikisht. Këtë po përpiqemi ta bëjmë çdo ditë në qeveri. Këtë do ta bëjmë të organizuara në front të përbashkët si gra aktiviste.

Platforma ime si kryetare e GVV e parasheh punën konkrete të bazuar në tri shtylla kryesore:

E para është Emancipimi gjinor, ku përpos që e ndjekim vijën e deritashme të luftës kundër shfrytëzimit gjinor dhe klasor, ne i ndërtojmë organizmat përbrenda Lëvizjes të cilat kanë për synim ngritjen e vetëdijes feministe dhe mbështetjen e veprimit feminist jo të kufizuar vetëm në shpërfaqje teorike.

Kjo do të arrihet konkretisht përmes krijimit të hapësirës për edukim feminist (në formë të shkollave verore feministe të cilat i organizojmë në bashkërendim me Sekretariatin e Gruas Aktiviste dhe Sekretariatit për Emancipim Politik); të insistohet në përpjesëtim të barabartë të pjesëmarrjes së grave në të gjitha organet e LV-së; të implementohet motërzimi si princip i bashkëpunimit; të implementohet parimi i gjinorizimit në të gjitha programet, statutet, projektligjet dhe dokumentet e tjera me relevancë, duke u bashkërenduar me qeverinë.

Shtylla e dytë është puna për rritjen e PJESËMARRJE-s së AKTIVISTEVE në organizatë duke i zhvilluar parimet e ekuitetit gjinor (paanësisë dhe barazisë) me konsideratë të veçantë rrethanat vështirësuese për pjesëmarrje të grave në sferën publike si pasojë e kontekstit patriarkal.

Kështu, me drejtueset e GVV-së nëpër Qendra, të cilat synojmë të jenë të punësuara me orar të plotë në Qendra, ne do të hartojmë politika të qarta që e rrisin numrin e grave në LV, dhe të ofrojmë këtë mundësi edhe për ato gra që brenda kontekstit të tyre socio-ekonomik kanë qenë të shtypura e nuk kanë pasë qasje të lehtë për t’u kyçur në sferën publike.

Pjesëmarrja e aktivisteve gra do të mundësojë që të kemi ndikim edhe në hartimin e programit qeverisës me politika mbështetëse për vajzat dhe gratë.

Sipas statistikave të brendshme, anëtarësia jonë përbëhet përafërsisht 25% janë vajza dhe gra dhe 75% djem e burra.

Sipas kësaj mbështetja e madhe e vajzave dhe grave për VETËVENDOSJE!-n, nuk reflektohet në anëtarësinë tonë.

Kjo gjendje mund të ndryshojë nëse ne punojmë për të krijuar një ambient të sigurt të veprimit politik për gratë.

Koncepti i krijimit të ambientit të sigurt për veprim politik më hap shteg për të prezantuar shtyllën e tretë, gjegjësisht adresimi sjelljes dhe gjuhës seksiste. Nëse si shtyllë të parë e kemi vendosur emancipimin gjinor, nuk do të thotë se do të presim si spektatore derisa para syve tanë të ushtrohet gjuha e sjellja seksiste e mizogjene, sepse konsiderojmë që për këtë duhet të ketë sanskionim social meritor.

Ne do të punojmë që asnjë rast i seksizmit mos të mbetet i pavërejtshëm e i pandëshkuar.

Teoria nuk na duhet pa praktiken, e as politika feministe nuk artikulohet pa i adresuar përjetimet mizogjene e seksiste të grave, pra politika është personale, e personalja është politike.

Përmes GVV-së, synojmë të themelojmë hapësira ku gratë dhe vajzat do të mund të denoncojnë padrejtësitë e kësaj natyre në mënyrë të lirshme, të cilat pastaj do t’i dërgohen komisionit disiplinor. Nuk e pranojmë më gjuhën fyese, linçuese, përjashtuese e moralizimin e patriarkatit, dhe e luftojmë çdo gjuhë e sjellje që shkon kundër parimeve të barazisë sociale e gjinore.

Të nderuar të pranishëm,

Këto dhe shumë punë të tjera jam e bindur që do të arrihen me punën e vajzave dhe grave të LV por edhe shumë vajzave dhe grave që do të na bashkohen.

Ajo çfarë duhet është që të jemi bashkë, për njëra tjetrën dhe për vajzat e gratë e këtij vendi.

Me besën e votës suaj, zotohem që do të luftoj për këto parime pa kursim.

Ju faleminderit shumë!

Të dashur anëtarë e aktivistë, shoqe e shokë,
Të nderuar të pranishëm,
I nderuar kryetar i Lëvizjes VETËVENDOSJE!, Albin Kurti,

Organizimet politike të rinisë janë emri nën të cilin janë nënshkruar lëvizjet më të thella politike. Qofshin ato studentore a jo këto organizime janë shquar për guximin dhe vrullin transformues. Të tilla ka pasur fatin t’i ketë dhe Kosova. E gjithë lëvizja e shekullit 20 pati në bërthamë të rinjtë e të reja, studentët e Kosovës.

Në fakt dhe themelimi e krijimi i lëvizjes tonë është po ashtu e lidhur me këtë fill. Rininë. Rëndësinë e organizimit politik të rinisë për shoqërinë dhe shtetin, më së miri këtë dekadë e dimë ne në Lëvizje. Për dallim nga partitë e ish-pushtetit, Lëvizja VETËVENDOSJE! që nga themelimi e padyshim edhe sot në qeverisje, e ka dëshmuar se për të rinia është zona ku përqendrohet rëndesa e ngjarjeve. Lëvizja VETËVENDOSJE! asnjëherë nuk e ka parë rininë si pjesë të ndarë të saj; në aksione e në protesta, në diskutime e lexime, në vendimmarrje e përfaqësim, rinia ka qenë gjithnjë pjesë integrale tejet e rëndësishme e Lëvizjes. Por sot po fillojmë një organizim të ri krah për krah me lëvizjen ashtu që t’i japim shpejtësinë dhe intensitetin e kërkuar organizimit politik të të rinjve dhe rejave. Përveç mbështetjes së jashtëzakonshme elektorale që ka Lëvizja nga grupmoshat e reja, edhe një pjesë e madhe e anëtarësisë së saj i përket moshave 16-29 vjeç. Gati 20.000 të rinj e të reja janë të anëtarësuar në Lëvizje, pra rreth 30% e të gjithë anëtarësisë. Prandaj, Rinia për VETËVENDOSJE! është strukturë e domosdoshme.

E për udhëheqjen e kësaj strukture, po prezantoj pikat e platformës sime:

1. Rritja dhe shtrirja e RVV-së
2. Emancipimi politik dhe përgaditja profesionale e aktivistëve
3. Aktivitetet dhe puna vullnetare
4. Socializimi, arti, muzika e sporti
5. Anëtarësimi në organizatat ndërkombëtare të orientimit socialdemokrat

Rritja dhe shtrirja e RVV-së

Lëvizja shtrihet në mbi 1.100 vendbanime gjithandej Kosovës, e RVV ka delegatë nga thuajse 500 të tilla. Brenda angazhimit 4 vjeçar ne do të punojnë që të jemi të shtrirë në 1000 vendbanime. Ne jemi lëvizje e si të tillë përpjekjet tona do t’i fillojmë nga largësitë. Aty ku vajzat e djemtë kanë më së shumti nevojë për t’u organizuar politikisht. Aty ku lëvizja duhet të jetë prezent në lagjet e fshatrat sado larg qofshin nga dritat e qyteteve.

Krahas shtrirjes gjeografike, tejet i rëndësishëm është diversiteti brenda strukturës. Rreth 5.100, apo më pak se 30% e anëtarësisë në moshat 16-29 vjeç janë vajza. Inkuadrimi i plotë i tyre në vendimmarrje e aktivitet është i domosdoshëm. Gjurmët patriarkale në mjediset tona janë ende të forta. E Lëvizja VETËVENDOSJE! ka qenë dhe mbetet shembull i çeljes së shtigjeve të reja progresistë. Duhet bërë maksimumi që në vazhdimësi vajzave të reja t’ua garantojmë një ambient të përshtatshëm për aktivizëm. Këtë planifikojmë ta bëjmë e për ta mbërritur do të jemi të pakompromistë.

Kur jemi te diversiteti, të rinjtë e vendit tonë nuk janë vetëm shqiptarë për nga kombësia. 20% e popullatës në Kosovë i përkasin moshës 15-24 vjeç; jo të gjithë janë shqiptarë, ama të gjithë janë të rinj e të reja. Pabarazia e padrejtësitë e prekin dikë më shumë e ne duhet të jemi bashkë, në Lëvizje, për t’i luftuar ato. Për përfshirje më të madhe të të rinjve nga minoritetet, do të sigurohemi që të bashkërendojmë punët me Sekretariatin e Përgjithshëm, institucionet shtetërore përkatëse dhe organizatat joqeveritare.

Nxënësit e shkollave të mesme, posaçërisht maturantët, janë kyç në organizimin rinor. Për këtë arsye, do të synojmë sa më shumë inkuadrim të maturantëve në aktivitete politike e kulturore, përmes shtrirjes në të gjithë vendin. Këto grupe, në koordinim me Qendrat, do të synojnë zgjerimin e RVV-së në dhe për grupmoshën 16-19 vjeç.

Emancipimi politik dhe përgatitja profesionale e aktivistëve

Ne, të rinjtë, nuk bën të mos angazhohemi aktivisht në shoqëri. Gjimnazistë, studentë të cilësdo fushë, të rinj të punësuar e të papunë, të të gjitha shtresave, na duhet të angazhohemi bashkërisht. E ardhmja medoemos, por edhe e tashmja na takon neve. Për të duhet të angazhohemi e të përgatitemi mirëfilli.

Shkolla politike e Lëvizjes ofron shumë më tepër se vetëm njohuri mbi teoritë politike. Aty afirmohet mendimi kritik e afiniteti për lexim e studim. Neve na duhet që ta shfrytëzojmë mundësinë që e kemi, të mësojmë nga njerëz kompetentë për temat e nevojshme, në mënyrën e duhur. Kështu që, do të synojmë të inkuadrojmë sa më shumë të rinj e të reja në Shkollën politike, veçanërisht në Nivelin politiko-organizativ. Derisa Lëvizja siguron biblioteka e libra në të gjitha Qendrat, ne duhet të ftojmë shoqet e shokët tanë të na bashkohen në klube të leximit, filozofisë, filmit e debatit. Edhe shoqërohemi, edhe mësojmë e zhvillohemi.

Përveç kësaj, neve na duhet aftësim edhe në paraqitje e në çështje teknike. Besoj se është ide e mirë që të trajnohemi në të ashtuquajturat ‘soft skills’, në përdorim të plotë e të saktë të teknologjisë kompjuterike bashkëkohore, t’u ofrojmë të rinjve trajnime për shkathtësitë themelore që i kërkon punësimi.

Të rinjtë e të rejat e fushave specifike duhet t’i ndërlidhim me komitetet e nënkomitetet e Lëvizjes. Për të mundësuar më pas praktikën e përvojën kudo në institucione, sipërmarrje e veprimtari krijuese a ekonomike. Në këtë mënyrë, ne kemi mundësinë të praktikojmë profesionin tonë, si dhe t’i shërbejmë organizatës, për ta ndryshuar e përparuar vendin.

Aktivitetet dhe puna vullnetare

Manifestin e Lëvizjes, programin politik, Alternativën Qeverisëse, prioritetet tona dhe programin qeveritar do ta prezantojmë përmes aktiviteteve mirë të menduara dhe organizuara. Aktivizmi është forma më e drejtpërdrejtë e kontributit që duhet të organizohemi ta japim. Aty në fakt janë mësimet e përvojat më të çmuara. Në fillim duket sikur u ndihmon popullit gjatë aktiviteteve e më pas mëson se si ata të kanë transformuar në një aktivist të mirëfilltë politik. Nuk ka aktivizëm pa pikëtakimet me popullin e vendit tënd.

Përveç aktiviteteve në ditët e shënuara, Rinia për VETËVENDOSJE! do të jetë shembulli i kontributit në komunitet. Ne do të kontribuojmë në ngritjen e vetëdijes kolektive për çështje të rëndësishme për të cilat Lëvizja gjithnjë ka qenë e zëshme. Nga fushatat vetëdijësuese për konsumimin e prodhimeve vendore e deri te pastrimi i lagjeve tona dhe mbrojtja e mjedisit tek parandalimi i dhunës tek vajzat RVV do të kërkojë më shumë punë vullnetare nga rinia. Lëvizja ka qenë gjithmonë model për aktivizmin vullnetar, e ne duhet ta thellojmë e pasurojmë atë.

Socializimi, arti, muzika e sporti

Ne kemi pasione e ëndrra të mëdha. Arti, muzika e sporti janë shumë të rëndësishme për jetën tonë. Pushtetet e kaluara na kanë mbytur me vulgaritetin dhe mediokritetin. I patën shuar mundësitë e kinemasë, teatrit e skenës artistike. Derisa Qeveria jonë tash po punon intensivisht që ta çrrënjosë dëmin që është bërë në këtë drejtim.

E kemi mundësinë e jashtëzakonshme t’i kthehemi sporteve, arteve dhe trashëgimisë kulturore. RVV do të jetë shembulli ekselent i organizimit rreth artit e sportit.

Anëtarësimi në organizatat ndërkombëtare të orientimit socialdemokrat

Në koordinim me Sekretariatin për Marrëdhënie me Jashtë do të synojmë që të bëhemi pjesë e organizatave ndërkombëtare të orientimit socialdemokrat siç janë YES – Young European Socialists, ku bëjnë pjesë forume rinor të majta nga të gjitha shtetet e Evropës. Ne do ta zgjerojmë e provojmë komunikimin e bashkëpunimin me organizatat simotra në Evropë dhe më gjerë. Kjo është dhe detyra jonë si organizim politik i rinisë. Në këtë mënyrë, do të kemi mundësinë që përveç mësimeve që i marrim, edhe të shkëmbejmë përvojat dhe të marrim pjesë në një kauzë edhe më të gjerë: atë të barazisë, solidaritetit dhe lirisë së gjithmbarshme.

Angazhim i madh do të strukturohet nga RVV për shtrirjen e organizimit tonë dhe bashkëpunimit me të rinjtë në mërgatë. Prej organizatave studentore deri tek anëtarësimet direkte në RVV nga kudo që janë bashkëmoshatarët tanë.

Të nderuar të pranishëm,

Rinia për VETËVENDOSJE! ende në fillet e saj është organizimi më i madh i rinisë në vend dhe më gjerë. Përgjegjësia është po aq e madhe sa potenciali. RVV vjen para së gjithash si nevojë e organizimit të brendshëm, po edhe si domosdoshmëri politike. Me formimin e kësaj strukture, rinisë po i kushtohet vëmendje e veçantë.

Ne, të rinjtë, kemi brenga e shqetësime dhe jo rrallë ndihemi të pasigurt për të ardhmen tonë. Ne kemi shoqe e shokë që meritojnë jetë më të mirë. Për të duhet të angazhohemi bashkërisht, të gjithë. Duhet të besojmë në fuqinë që e kemi për të bërë ndryshime drejt një shoqërie më të barabartë e më të drejtë. Vrullin ëndërrimtar le ta përdorim për të vënë në lëvizje veten dhe shoqërinë.

Ju falemnderit!

Platforma për Kryetar të LVV nga Albin Kurti, Platforma e Gruas për LVV nga Albulena Haxhiu dhe e Rinisë për LVV, nga Behar Jashari u prezantuan sot para anëtarëve dhe aktivistëve tanë.

Në sallën e mbushur me qindra aktivistë dhe anëtarë tanë, për herë të parë duke qenë njëherazi Kryeministër i Republikës së Kosovës, Albin Kurti prezantoi platformën e tij programore për mandatin e ri 4 vjeçar në krye të Lëvizjes VETËVENDOSJE!, organizatës politike më të madhe në vend.

Po ashtu në këtë tubim u bë shpalosja e platformave programore për organizatën Gratë për VETËVENDOSJE! nga kandidatja Albulena Haxhiu, dhe Rinia për VETËVENDOSJE! nga kandidati Behar Jashari.

Në tubim folën kandidati për kryetar të Qendrës së Prishtinës, Arben Vitia dhe kryetari i Kuvendit njëherazi anëtari i Kryesisë së LVV-së, Glauk Konjufca.

Në tetor të vitit 2019 dolëm të parët për herë të parë. Në shkurt të vitit 2021 u bëmë shumicë për herë të parë. E këtë të premte bëhen një vit e gjysmë që jemi në drejtimin e Republikës sonë. Periudha nga fitorja plebishitare e 14 shkurtit e deri më sot ka qenë e mbushur me sfida por edhe me suksese. Pandemia dhe agresioni ushtarak rus mbi Ukrainën që shkaktoi krizë energjetike dhe ekonomike ka goditur edhe Kosovën, por besoj se jemi më të duhurit për të udhëhequr në këtë kohë krize dhe këtë duhet t’ia dëshmojmë popullit që na ka besuar, tha Kurti në hapje të fjalës së tij, para prezantimit të platformës programore.

Planifikimi në organizatë me rritjen e anëtarësisë së grave, të rinjve dhe mërgatës nga njëra anë, dhe përgatitjen për zgjedhjet lokale dhe mandatin e dytë qeverisës nga ana tjetër, janë faktorë kyç në rritjen dhe zhvillimin e organizatës tonë, tha Kurti.

Platforma 10 pikëshe që u prezantua në detaje nga kryetari Kurti, ka këtë renditje:

(1) Rritja e numrit të anëtarëve të moshave të reja;

(2) Rritja e anëtarësisë së vajzave dhe grave;

(3) Krijimi i kohezionit midis brezave, grupeve shoqërore, e botëkuptimore;

(4) Forcimi i shkollës politike dhe dimensionit ekzekutiv të saj;

(5) Promovimi i organizimit sindikal në sektorin privat;

(6) Përgatitja e burimeve njerëzore dhe programore për Zgjedhjet lokale 2025;

(7) Përgatitja e Platformës politike për mandatin e dytë të Qeverisjes;

(8) Rritja e rrjetit të Qendrave të Lëvizjes VETËVENDOSJE! në mërgatë;

(9) Angazhimi i studentëve dhe profesionistëve në organizatën politike të Lëvizjes;

10) Bashkëpunimi ndërkombëtar dhe ai jashtë shtetit e brenda kombit tonë.

Si mendimtarë dhe aktivistë socialdemokratë ne duhet të promovojmë bashkëpunimin qytetar mes njerëzish të feve, etnive, klasave, e botëkuptimeve të ndryshme. Ideologjikisht nuk mund të jemi gjithëpërfshirës por ajo që mund të bëjmë është ta rrisim llojllojshmërinë socioekonomike e botëkuptimore të qytetarëve me pikëpamje politike të majta që aderojnë tek ne. Duke bërë kështu ne ofrojmë organizatën tonë si shembull të kohezionit shoqëror që na duhet gjithandej shoqërisë tonë, theksoi Kurti në prezantimin e platformës programore (2022-2026) që do të votohet këtë të diele me 26 shtator.

Me propozim të Kryeministrit, Albin Kurti, sot në mbledhjen e qeverisë u miratua formimi i Komisioni Ekzekutiv për Shëndetësi. Ky Komision që do të drejtohet nga vetë ai, sot pasdite mbanë mbledhjen e parë.

Komisioni Ekzekutiv për Shëndetësi ka këto përgjegjësi: e para të bëjë analizën dhe ndarjen bashkëpunimit publiko privat. Reformimin e SHSKUK-së përmes fuqizimit të QKUK-së dhe spitaleve rajonale, zhvillimin e sektorit publik të shëndetësisë, themelimin e spitalit rajonal të Prishtinës”.

“Në të gjitha deklarimet e mia në lidhje me krimet e luftës kam potencuar që krimet e kryera dhe dëmet e shkaktuara duhen adresuar sepse ato janë parakusht për paqe të qëndrueshme, stabilitet afatgjatë, e zhvillim të mëtutjeshëm të shoqërisë. Një shoqëri që nuk harron sepse e institucionalizon kujtesën, dhe që mbi supet e përgjegjësisë institucionale gjen drejtësinë si parakusht për pajtimin dhe jetesën e dinjitetshme e të përbashkët. Instituti për krimet e kryera gjatë luftës në Kosovë do të themelohet në kuadër të zyrës së Kryeministrit. Dokumentimi i krimeve të kryera gjatë luftës do të jetë në fokus të veprimit të zyrës së Kryeministrit. Vetëm me respektimin e duhur të së kaluarës mund të kemi një të ardhme të ndritur”, tha Kryeministri Albin Kurti, në fjalën e tij, para miratimit në qeveri të projektligjit për dokumentimin e krimeve të kryera gjatë luftës së fundit në Kosovë. 

Ministrja e Drejtësisë Albulena Haxhiu në gusht të këtij viti ka kërkuar hetim nga Inspektorati i Ministrisë së Drejtësisë në lidhje me rastin e aktivistit Astrit Dehari.

Pas dorëzimit të këtij raporti ajo në konferencë për media ka listuar gjetjet e Inspektoratit me ç’rast vërehen shkelje të shumta në gjithë procesin.

“Mbi bazën e këtij raporti konstatohen veprime kontradiktore, të paqarta dhe lë dyshime të mëdha për manipulime të provave dhe deklaratave të akterëve të përfshirë në rast, prandaj thërrasim prokurorinë që të ndërmarrin masa adekuate dhe cilësore për zbardhjen e së vërtetës në rastin Dehari”, tha ministrja Haxhiu.

Ajo në fund tha se ky raport me gjitha shkresat përcjellëse do të dërgohet tek Kryeprokurori i Shtetit, në organet përgjegjëse që kanë autorizime për shqiptimin e masave ndaj akterëve të përfshirë në rast dhe se ajo është e gatshme të ofrojë mbështetjen për institucionet që ky rast të zbardhet

“Për herë të parë që nga paslufta, pas krijimit të njësitit për patrullim ujor, Policia e Kosovës sot filloi me patrullimin e rregullt të vijës kufitare mes Republikës së Kosovës dhe Serbisë, si dhe gjithë hapësirës së Liqenit të Ujmanit. Tashmë, kontrolli i kufirit shtetëror është më i plotë. Përgëzoj Policinë e Kosovës për suksesin e radhës”, tha ministri Brendshëm Xhelal Sveçla.

Sot, Kryeministri, njëherazi Kryetari i Lëvizjes VETËVENDOSJE!, Albin Kurti, mori pjesë në Kuvendin e parë zgjedhor të partisë Guxo. Duke i uruar për procesin e suksesshëm zgjedhor dhe për standardin e lartë demokratik brenda kësaj partie, Kryeministri Kurti kujtoi që ashtu siç kemi fituar bashkë me 14 shkurt edhe po punojmë bashkë për ta zhvilluar vendin përmes punësimit e për t’ia kthyer dinjitetin qytetarëve përmes drejtësisë.

Më poshtë gjeni fjalën e plotë të Kryeministrit, Albin Kurti, mbajtur në Kuvendin e parë zgjedhor të partisë Guxo.

E nderuar zëvendëskryeministre, znj. Donika Gërvalla Schwarz,

I nderuar ministër z. Faton Peci,

Të nderuar deputetë të Kuvendit të Republikës,

Të nderuar delegatë e anëtarë të partisë Guxo,

Mirë se po ju gjej në këtë Kuvend të parë qendror zgjedhor të partisë suaj.

U uroj për zgjedhjet e suksesshme nëpër degë, ku zgjodhët udhëheqësit e delegatët e rretheve. Në këtë ditë, krahas organizimit të procesit zgjedhor, duhet festuar edhe standardin e lartë të arritur brenda partisë, që i kontribuon demokracisë sonë të re.

Asaj demokracie që duhet t’i shërbejë qytetarit, dhe të mirës sonë të përgjithshme. Krahas vëmendjes për struktura e organizim, po aq vëmendje po i ipet edhe qytetarisë aktive e qeverisjes. Me angazhimin në vlera të përbashkëta e parime universale, dhe me ndershmëri e respektim të njëri-tjetrit.

Jam i lumtur që sot shoh shumë gra dhe vajza, të rinj e të reja, që do ta shpijnë përpara barazinë dhe zhvillimin në shtetin tonë. E, që do të ecin bashkë drejt idealit për barazi gjinore, pa të cilën nuk kemi as barazi shoqërore.

“Gjërat e pamundura nuk ndodhin kurrë vetëm”, e thotë nobelisti portugez Saramago. Të qenurit bashkë na e solli edhe fitoren e 14 shkurtit. Të prirur për ta zhvilluar vendin përmes punësimit, dhe kthimin e dinjitetit të qytetarëve përmes drejtësisë.

Prioritet kryesor në drejtësi mbetet vettingu i sistemit të drejtësisë dhe këtë do ta bëjmë bashkë me Kuvendin. Në 1/3 e mandatit së bashku kemi kaluar mbi 150 ligje në qeveri e më pas në Kuvend. Vetëm në gjysmën e parë të këtij viti janë miratuar 87 ligje.

Kemi vazhduar luftën kundër krimit të organizuar dhe korrupsionit. Mbi 700 operacione policore kundër krimeve ekonomike dhe korrupsionit, mbi 2000 persona të arrestuar, prej të cilëve afër 300 janë zyrtarë publik; 65 grupe kriminale të shkatërruara e 1,5 ton narkotikë të konfiskuar. Andaj, duhet të vazhdojmë këtë punë kaq të mirë bashkë.

Vitin e kaluar e kemi mbyllur me 10,53% rritje ekonomike kurse në tremujorin e parë të këtij viti kemi rritje ekonomike prej 4,9% pasi që të hiqet inflacioni.

Kemi ngritur mirëqenien sociale me një sërë masash të Pakos së Ringjalljes Ekonomike. E këtë të shtunë prezantuam edhe pakon prej 150 milionëve për përballje me inflacionin, nga e cila do të përfitojnë 300 mijë familje dhe rreth 600 mijë qytetarë.

Kjo është pakoja e dytë për qytetarë në 6 muajt e fundit, paralelisht me: rritjen prej 30% të asistencës sociale për 25 mijë familje, rritjen prej 11% të pensioneve bazike, 33% të pensioneve të personave me aftësi të kufizuara, shtesat për mbi 170 mijë fëmijë, shtesat për lehona për mbi 20 mijë nëna të reja, e subvencionimin e faturave të energjisë elektrike. Kemi miratuar në lexim të parë ligjin për rritjen e pagës minimale nga 130 përkatësisht 170 euro, në 264 euro, për herë të parë në 11 vite.

Për vetëm një vit e gjysmë më këto pako, kemi ndarë gjithsej rreth 750 milionë euro, 4% të bruto produktit vendor vjet, e 5% të bruto produktit vendor sivjet. Pra, kjo është qeverisja e përbashkët e qytetarëve të Republikës, e për nga subjektet politike, e subjektit që unë përfaqësojë dhe e partisë Guxo.

Bashkërisht po zbatojmë reforma në bujqësi, me qëllim ngritjen e prodhimit, cilësisë dhe sigurisë së ushqimit, si dhe ringjalljen e fshatit. Arsimin përveçse e kemi bërë falas, e kemi ngritur buxhetin për të për mbi 12% me qëllim të rritjes së cilësisë.

Kemi zgjeruar lidhjet e Republikës sonë me botën dhe kemi kthyer Kosovën në integrimet euro-atlantike dhe ndërkombëtare.

Me lejoni ta falënderoj përzemërsisht zëvendëskryeministren dhe ministren e punëve të jashtme, znj. Gërvalla Schwarz, për përpjekjet e përbashkëta të deritanishme dhe për të arriturat e pamohueshme. Gjithashtu e falënderoj edhe ministrin e bujqësisë, z. Faton Peci, zëvendësministrat, deputetët e Kuvendit, asambleistët e Kuvendeve komunale e anëtarët e partisë Guxo, për secilën punë të mirë që po e bëjmë bashkë për qytetarin, e po punojmë pa kursim, pa rezervë e pa pushim.

U përgëzoj të gjithëve për angazhimin me dije e me integritet, me punë dhe përkushtim, për partinë që përfaqëson po këto vlera.

U dëshiroj punë të suksesshme të Kuvendit zgjedhor. Me guxim jeni ngritur, me guxim po vazhdoni, me guxim do të fitoni.

Ju priftë e mbara!

Kryeministri Albin Kurti së bashku me ministren e Drejtësisë Albulena Haxhiu kanë dorëzuar dosjen e dokumenteve për vetting në Kuvendin e Kosovës.

Në takim me Kryeparlamentarin Konjufca, Kryeminstri Kurti theksoi se reforma në drejtësi, me theks vettingu në sistemin e drejtësisë, janë prioritet i Qeverisë dhe shtetit.

Versioni i dorëzuar i draftit të amendamenteve kushtetuese, është në përputhje të plotë me rekomandimet e dalura nga Opinioni i Komisionit të Venecias, ndërsa në pako është përfshirë edhe një plan i ideuar për ndryshimet ligjore që duhet të realizohen bashkë, pas miratimit të ndryshimeve kushtetuese ose paralelisht me to.

Vettingu është procesi për të cilin jemi zotuar para qytetarëve dhe mekanizmi i vetëm që do të mundësojë rikthimin e besimit të qytetarëve në drejtësi.

Të dashur qytetarë të Republikës së Kosovës,
Të nderuar gazetarë,

Si Qeveri e Republikës, që nga fillimi i mandatit e në vazhdimësi, kemi mbështetur qytetarët përmes masave të ndryshme të Pakos së Ringjalljes Ekonomike.

Vitin 2021 e mbyllëm me shpërndarjen e mbi 300 milionë eurove, kurse vitin 2022 e filluam me një sërë masash mbështetëse në vlerë prej 200 milionë euro. Të gjitha këto për të mbështetur familjet më në nevojë, punëtorët e sektorit publik e privat, pensionistët, bizneset e amvisëritë.

Në mbledhjen e fundit të Qeverisë ndamë 40 milionë euro, nga 100 milionë të zotuara, për të subvencionuar faturat e energjisë elektrike për qytetarët, ashtu që çmimi i energjisë elektrike për ta të jetë i përballueshëm.

Punësimin e përkrahëm vazhdimisht e pa dallim. Filluam zbatimin e skemës “Qeveria për Familjet”, për punësimin e atyre që nuk kanë asnjë anëtar të familjes të punësuar. Po ashtu nisëm masën për nxënie të shkathtësive dhe punësim të qëndrueshëm të personave me aftësi të kufizuara.

Rreth 250 mijë punëtorë të sektorit privat i mbështetëm me shtesën prej 100 euro, e për 100 mijë prej tyre dorëzuam në Kuvendin e Republikës projektligjin që mundëson rritjen e pagës minimale, për mbi 50%, përkatësisht për mbi 100% për ata të moshës nën 35 vjeç. Shumën e njëhershme prej 100 euro në muajin prill e ndamë edhe për 75 mijë zyrtarët e sektorit publik.

Bizneset i përkrahëm jo vetëm përmes fuqisë punëtore, por edhe përmes subvencionimit të kredive për zgjerimin e kapaciteteve prodhuese e përpunuese të tyre, ku përmes Masës 2.1, mundësuam investime në vlerë prej 100 milionë euro.

Në linjë me programin tonë qeveritar, shpërndarjen e shtesave për lehona dhe shtesave për fëmijë po e realizojmë për çdo muaj, për rreth 20 mijë lehona e për reth 170 mijë fëmijë.

Asistencën sociale e rritëm për 30% dhe e dyfishuam atë për 3 muaj, për nëntor, dhjetor dhe për prill. Mundësuam edhe shpërndarjen e rreth 40 mijë pakove ushqimore për familjet më në nevojë.

Rritjen e pensionit për 11% për disa kategori, e për 33% për disa skema të tjera, e bëmë të përhershme, dhe përkrahjen e përforcuam me nga 100 euro shtesë në muajt nëntor dhe prill.

Si Qeveri mbetemi të përkushtuar për t’ju dalë në krah qytetarëve, sa herë që kjo është e nevojshme, si dhe për të marrë veprime shtesë për rritjen e mirëqenies së tyre. Andaj në linjë me këtë synim tonin, sot po prezantojmë një Pako të re, që ka për qëllim mbështetjen e qytetarëve për t’u përballur me krizën inflacionare.

Nisur nga gjendja e rënduar me energjinë, sot më shumë se kurrë, është e domosdoshme të kursejmë. Andaj do të subvencionojmë të gjithë ata që kursejnë energjinë elektrike. Për aq sa kursehet në raport me të njëjtin muaj të vitit paraprak, ne do të subvencionojmë dyfish faturën.

Do të procedojmë në Qeveri, e pastaj në Kuvendin e Republikës për miratim, Projektligjin për Punë Publike, i cili parasheh kompensimin për inflacion për materialet ndërtimore dhe punët përcjellëse për kontratat ekzistuese të punës. Kjo me qëllim të përshpejtimit të dinamikës së implementimit të projekteve kapitale.

Për pensionistët do të ndajmë shumën e njëhershme prej 100 euro, kurse familjet në asistencë sociale do t’i mbështesim duke dyfishuar shumën e asistencës për një muaj.

Punësimin e punëtorët i kemi prioritet, i kemi përkrahur e do të vazhdojmë kësisoj. Për zyrtarët publikë do të ndajmë shtesën prej 50 euro duke filluar nga muaji shtator, kurse për punëtorët në ndërmarrjet publike do të ndajmë shumën e njëhershme prej 100 euro.

Jemi të vetëdijshëm që inflacioni ka ndikuar që jeta të vështirësohet për të gjithë, pa dallim, mirëpo kjo gjendje është edhe më e rënduar në sektorin privat. Të gjithë e dini shumë mirë, se nga të gjithë të punësuarit në Kosovë, 80% janë të punësuar në sektorin privat, ndërkaq 1/5 janë të punësuar përafërsisht në sektorin publik. Prandaj do të mbështesim secilin biznes që i rritë pagat e punëtorëve, duke subvencionuar 50% të rritjes së pagës për punëtor, maksimumi 100 euro, për 3 muajt e parë.

E përkrahjen tonë do ta zgjerojmë edhe për studentët e Republikës, për të cilët do të ndajmë shumën e njëhershme prej 100 euro në muajin nëntor, kur viti i ri akademik është duke u zhvilluar.

Pra, të dashur qytetarë, të nderuar gazetarë, në muajt në vijim do të ndajmë rreth 150 milionë euro për Pakon për Përballjen me Inflacion, ku përmes masës për subvencionimin e atyre që kursejnë energjinë do të përfitojnë të gjitha familjet, rreth 300 mijë sosh, kurse nga pagesat direkte do të përfitojnë rreth 600 mijë qytetarë.

Në pranverë e kishim Pakon e Ringjalljes ekonomike, tash në vjeshtë e kemi Pakon për Përballjen me Inflacion

Tani në lidhje me kriteret e këtyre masave dhe mënyrën e përfitimit prej tyre ia kaloj fjalën Ministrit tonë të Financave, Punës dhe Transfereve, z.Hekuran Muratit.

Pyetjet dhe përgjigjet:

Pyetja I: Kryeministër, me 5 shtator MPJ i ka dhënë  leje kryeministres së Serbisë Ana Brnabiq, me ardh në Kosovë. Para 1 shtatorit vetë Brnabiq ka deklaruar që ka me pas tension në veri të vendit për shkak të targave. Qysh e shihni vizitën e saj me 5 shtator kur e kemi pa që në të kalumën MPJ e ka anuluar kërkesat për vizitë në Kosovë, pikërisht për shkak të nxitjeve të ndryshme të tensionit. Edhe sa i përket targave, ku jemi me marrëveshjen meqë me 1 tetor kalon edhe afati për letrat ngjitëse. Tjetra është  pas kërkesës së kryeministres Brnabiq për të ardh në Kosovës, krerët e luginës ju kanë kërkuar juve dhe si kryeministër me shku atje.  A keni me shku në Preshevë?

Kryeministri: së pari, jemi pas 1 shtatorit dhe është parë se gjithçka po shkon sic kemi thënë ne më herët. Ose do të ketë dokumente hyrëse dalëse edhe në anën e kufirit të Kosovës  dhe atë të Serbisë ose në asnjërën prej tyre. Doli asnjërën prej këtyre.  Reciprociteti në vend për neve është në rregull dhe edhe Brnabiq le të hyjë në Kosovë me letërnjoftimin e autoriteteve të lëshuara në Beograd dhe le ta shohin se  gjithçka po funksionon si në një shtet demokratik i cili është edhe më demokratik se Serbia  gjithsesi e madje edhe më i pavarur se Serbia. Sa i përket targave ne do të bëjmë më të mirën e mundshme sa i përket aspektit  diplomatik e politik mirëpo unë edhe njëherë i ftoj të gjithë qytetarët e komunitetit  serb në Kosovë që kanë aso targash km, pr  e të tjera që t’i konvertojnë sa më parë sepse i kanë këto dy muaj për t’i përfituar deri në 5 mijë euro duke mos paguar tvsh akcizë dhe takse doganore. Afati është 31  tetori siç e kemi deklaruar tashmë dhe besoj që sa më parë që e bëjnë këtë, aq më mirë është jo vetëm për shtetin tonë dhe ligjshmërinë, por edhe ata vetë. Pra ata përfitojnë me këtë, nuk humbin,  dhe le të mos harrojmë që bëhet fjalë për disa mijëra vetura sepse një pjesë e madhe e serbve të Kosovës tashmë i kanë targat RKS,  ashtu siç i kanë edhe letërnjoftimet e Kosovës. Pra janë diku mbi 135 mijë letërnjoftime të Republikës së Kosovës që i kanë qytetarët e nacionalitetit serbë. Vetëm disa mijëra nuk kanë letërnjoftim dhe disa mijëra vetura nuk i kanë targat RKS, pra po flasim për një pakicë e cila nuk ka pse mban peng të tjerët. Ndërkaq agjenda jonë qeveritare qysh më herët e ka paraparë një vizitë në Luginë të Preshevës në Preshevë, Medvegjë dhe Bujanoc dhe zyrtarët e qeverisë do të shkojnë të hënën. Përshtypja ime është që kur e kanë kuptuar që do të shkojnë ministra të qeverisë sime në  Preshevë, Medvegjë e Bujanoc, kanë kërkuar edhe ata që të vijnë vet. Pra ne bëjmë planin tonë, agjendën tonë qeveritare. Unë do të shkoj një ditë por  nuk është  shkuara jonë të hënën reagim përkundrazi kur ata e kanë kuptuar që ne do të shkojmë Preshevë, Medvegjë e Bujanoc e kanë bërë kërkesën që edhe Bërnabiq të vijë ne veri të Mitrovicës  në Zvecan e Leposaviq.

Pyetja II: kryeministër kur do të uleni në dialog me sindikatat për kapërcimin e situatës së krijuar si shkak i grevës?

Kryeministri: ne jemi me mësimdhënësit por mësimdhënësit duhet të jenë me nxënësit. Nuk bën të ndahen mësimdhënësit nga nxënësit. Shkolla është shteti. Ta bojkotosh shkollën do të thotë ta bojkotosh shtetin.  Ne kemi bërë shumë luftë e përpjekje për shkollë që tash ta bojkotojmë atë më greva ekstremiste. Andaj unë besoj që duhet të fillojë një orë më parë mësimi nëpër shkolla dhe ju bëj thirrje të gjithë mësimdhënësve që të hënën të jenë në shkollë dhe aty t’u japin mësim të vegjëlve tanë. Pra jemi për mësimdhënësit, por jemi për nxënësit.  E mësimdhënësi është për nxënësit. Edhe shteti edhe arsimtari duhet të jenë në funksion të fëmijëve. Unë kam takuar disa herë kryetarin e  Bashkimit të Sindikatave të Pavarura të Kosovës z Atdhe Hykollin me bashkëpunëtorë ndërkaq ministrat e mi kanë takuar degët sindikale  të BSPK-së, nëse duam shtet, duhet të ketë rregullsi dhe  rregulli e thotë këtë gjë, kur nuk dua ta kapërcej kryetarin e BSPK-së e të takoj sindikalistë të veçantë të degëve sepse ashtu nuk ka rregullsi, ashtu ka ndodhur në të kaluarën kur liderët e degëve sindikale kanë krijuar lidhje direkte me ministra, politikanë, me kryeministra, me presidentë dhe në këtë mënyrë e kanë prishur rregullsinë. Unë jam social demokrat, unë jam për sindikata, unë jam për sindikata  të fuqishme edhe në sektorin privat jo vetëm publik sepse sindikatat i mbrojnë punëtorët  kolektivisht, shtesë edhe prej ligjit që përgjithësisht të mbrohen individualisht, organizimi sindikal është tejet i rëndësishëm për  të drejtat e punëtorëve  mirëpo kërkesat absurde, irracionale që në fakt më shumë janë dëshira arbitrare se sa mundësi reale, nuk  mund të ecim përpara.

Në përputhje me buxhetin e shtetit, me strukturën ekonomike, me krizën nëpër të cilën ne kalojmë ne do t’i marrim masat tona. Dhe tash ju e patë që pakos së ringjalljes ekonomike që i afrohet 600 milionë euro në vitin e kaluar dhe në këtë vit ne po ia shtojmë edhe 150 milionë euro në këtë vjeshtë. Pakoja e ringjalljes e pranverës po pasohet me pakon e përballjes me inflacionin në këtë vjeshtë. Ne duhet t’i ndihmojmë secilit qytetar, nuk mund t’i ndihmojmë vetëm një grupi prandaj edhe takimet që i zhvillojmë i zhvillojmë  qysh i kanë njerëzit funksionet edhe pozitat  e tyre. Kjo është arsyeja pse unë edhe pardje e kam takuar kryetarin e BSPK-së Atdhe Hykollin sepse ai është kryetari e unë jam kryeministri. Kështu e do edhe rendi edhe logjika. Andaj unë do të vazhdoj komunikimin me BSPK-në. Nuk mungon komunikimi, nuk mungon dialogu social, mungon racionalieti i kërkesave dhe unë kam hall për këto kërkesa që bëhen në mënyrë delirante sepse këto e zhvlerësojnë vetë sindikatën e unë nuk besoj që mund të kemi shtet demokratik pa sindikata të fuqishme por imazhi i sindikatave, fuqia e tyre negociatore, serioziteti i tyre, të gjitha këto bijnë nëpërmjet dëshirave delirante në vend se të kërkesave racionale.

Pyetja III: Më herët folët për vizitën e Ana Brnabic në Kosovë. Më thoni sa i përket kësaj marrëveshjeje verbale të 1 shtatorit sepse ka shumē paqartësi, kjo sa i përket vlefshmërisë së letërnjoftimeve të lëshuara për shembull nga departamenti policor të  Mitrovicës, Prishtinës, me siguri keni përcjellur edhe rrjetet sociale, por edhe mediat. A është një letërnjoftim i lëshuar nga Departamenti policor i Mitrovicës valid, pra a mund të hynë në Kosovë  qytetarët nëpër të gjitha kalimet kufitare me letërnjoftim të lëshuar nga Mitrovica, Ferizaj, Prishtina etj. 

Kryeministri: Republika e Kosovës nuk e njeh Serbinë dhe shumë vendime që i merr Serbia janë kryekëput ilegale për neve. Vendimet, dokumentet që  i lëshon Serbia ne e dimë që janë në bazë të një kushtetute e cila është agresive ndaj Kosovës.  Për ne, për hir të Lëvizjes së lirë e duke zbatuar reciprocitetin, mosnjohjen e Republikës së Kosovës nga Serbia i përgjigjemi me mosnjohje të Serbisë nga ana e Republikës së Kosovës dhe përderisa kalojnë dokumentet tona të identifikimit në anën tjetër të kufinit kemi lejuar edhe ato dokumente  të vijnë në anën tjetër pra në territorin e Republikës së  Kosovës. Ne po vendosim reciprocitet për hir të qytetarëve po për neve Serbia nuk është shtet që njihet dhe në përgjithësi ne kemi problem me vendimet e atij shteti.  Veçse kemi vendosur reciprocitetin dhe do të vazhdojmë me reciprocitet të mëtutjeshëm, gradual drejt reciprocitetit të plotë që është edhe fryma e dialogut në Bruksel por edhe është karakter i marrëveshjes që duhet ta ketë njohjen reciproke në qendër.

Pyetja IV: A do t’iu vlejnë letërnjoftimet të gjithë qytetarëve që duan të hyjnë Kosovë?

Kryeministri: unë jam përgjigjur. Ata kanë hyrë më herët. Ata po hyjnë edhe tash. Autoriteti i cili i lëshon ato dokumente është Serbia.  Ne Serbinë nuk e pranojmë si shtet të pavarur  e si Republikë qysh nuk na pranojnë as ata neve. Pra aktualisht kemi mosnjohje reciproke. Me duam njohje reciproke.

Pyetja V: z. Kryeministër ju thatë që nuk do ta kapërceni BSPK-në, dhe të takoheni me kryetarin e SBASHK-ut. Me gjithë këtë qëndrim a keni ndonjë zgjidhje tjetër për të ofruar në mënyrë që të ndalet greva e mësimdhënësve dhe të fillojë mësimi edhe a konsideroni që ndarja e shtesave prej 50 eurosh në muaj mundet me ndal grevën aktualisht. Edhe më falni nëse nuk e kam dëgjuar por, sa do të zgjasë kjo masa për shtesat prej 50 eurosh për zyrtarët publikë? Faleminderit.

Kryeministri: Nëse kryetari i BSPK-së, Atdhe Hykolli thotë unë nuk jam më kryetar, po është kryetar dikush tjetër unë e takoj kryetarin, po si kryeministër i vendit unë takoj kryetarin e BSPK-së, kjo është e para. Ai është zgjedhur në një kongres të BSPK-së në të cilin më patën ftuar në fillim edhe mua bashkë me shumë krerë sindikal nga Evropa e Shtetet e Bashkuara të Amerikës. Pra, unë e kam për detyrë dhe bindje që ta takoj kryetarin e BSPK-së. Sa i përket grevës, greva është instrument legjitim sindikal por në të njëjtën kohë është hapi i fundit, jo i parë. Kanë ndërmarrë në fillim një akt ekstrem nga pikëpamja sindikale. Dhe 50 euro të cilët ne do t’i japim si shtesë të gjithë të punëtorëve në sektorin publik, duke filluar nga muaji shtator do të vlejnë për muajt në vijim të këtij viti fiskal. Pastaj, viti 2023 është vit tjetër fiskal. Por, kjo nuk ka të bëjë me ligjin mbi pagat, projektligjin të cilin do ta sjellim edhe në Kuvend, pasi që diskutimeve paraprake, do t’i kemi edhe konsultimet publike dhe më pastaj në Qeveri e në Kuvend të Republikës. Por, kjo është për t’u përballur me inflacionin, nuk ka të bëjë me ligjin e pagave. Pra, ne 50 euro nuk i japim derisa të vjen ligji i pagave, s’ka të bëjë kjo me ligjin e pagave, po për t’u përballur me inflacionin. Sepse kërkesa absurde për 100 euro, e që praktikisht është 20 % rritje e pagave në mënyrë të tërthortë në arsim, kërkesa 100 euro është rritje 20 %, deri tek projektligji mbi pagat në fakt është bërë që të krijohet përshtypja se kur të vjen projektligji do të kemi edhe më shumë se kaq. Mirëpo në një Kosovë në të cilën testet e PISA-s po na i nxjerrin ¾ e fëmijëve si analfabetë funksionalë ta shantazhosh qeverinë, ta kërcënosh qeverinë me rrënim të shtetit, se shkolla është shteti, është papërgjegjësi absolute. Është papërgjegjësi absolute. Pra, ne nuk shantazhohemi. Por ka disa muaj që Ministria e Financave, Punës dhe Transfereve, është duke studiuar e analizuar deri te kjo që e prezantuam sot, Pakoja për Përballjen e Inflacionit si vazhdimësi e Pakos së Ringjalljes Ekonomike, e cila vazhdon sepse edhe lehonat edhe fëmijët vazhdojnë t’i marrin shtesat, e të tjera, e të tjera.

Pra, ne po përballemi me inflacionin me këto masat e kësaj pakos së re. Dhe, ky është qëllimi ynë i drejtë përkundrejt një greve nga e cila s’fiton askush, aty janë të gjithë humbës. Pra, të krijosh ditë pa punë për mësimdhënësit, dhe ditë pa mësim për fëmijët, është përgjegjësi tejet e madhe. Nuk është vetëm përgjegjësi politike e shoqërore është historike, sepse pikërisht duke nxjerrë analfabet funksional, e duke menduar veç për paga, po na përfundojnë njerëzit veç për asistencë sociale, kjo reflektohet automatikisht në zhvillim ekonomik mandej.

Kur ti nuk nxjerr kuadro të mira arsimore atëherë prodhon ose njerëz për asistencë sociale ose punëtorë krahu në Gjermani. Ne duhet ta rregullojmë sistemin arsimor. Po ju po e shihni se çka po ndodhë, veç kërkesë për pare, për ta bankrotu shtetin, për ta shkatërru shtetin. Është papërgjegjësi totale. Prandaj, unë i thërrasë racionalitetit të njerëzve, të jenë të përgjegjshëm për fëmijët dhe t’japin mësim dhe gjithashtu ju bëjë thirrje komunave të Kosovës që të pushojnë me sjelljen destruktive e me bojkotin karshi Ministrisë së Financave, Punës dhe Transfereve. Jo gjithçka është vendim qeveritar, realiteti që kemi nuk është thjeshtë vendim qeveritar është edhe zbatim ligjor. Ministri i Financave ka obligime ligjore, ky duhet të kujdeset që kush s’punon s’paguhet. Rrënohet sistemi nëse ne paguajmë njerëz që s’punojnë. E tash bojkoti që të mos dorëzohen listat tek Ministria e Financave nuk është thjeshtë politikë anti qeveritare, po është anti shtetërore, kjo është me i shpallë luftë shtetit. Bojkoti që  një pjesë jo e vogël  e komunave ja bëjnë Ministrisë së Financave do të thotë t’i shpallësh luftë shtetit. E përkundër kësaj ne jemi racionalë. Pra, në njërën anë keni situatën në të cilën instrumentalizohen sindikalistët me kurs antiqeveritar e në anën tjetër kemi sjellje antishtetërore të disa komunave. Nuk është e padrejtë thjeshtë ndaj qeverisë po ndaj popullit, se ne në shërbim të tyre jemi. Andaj është e domosdoshme që të fillojë bashkëpunimi dhe të tejkalohen këto greva meqenëse nuk ndërtohet shteti me shantazhe dhe e keni një qeveri që nuk shantazhohet.

Pyetja VI: Kryeministër a pritet të ketë takim me Vuçiqin dhe nëse do të bisedoni së shpejti me serbët lokalë. Ndërkohë më intereson nëse do të ishte reciprocitet i nivelit të njëjtë vizita juaj në Luginë e jo e vartësve tu?

Kryeministri: Unë ua shpjegova më herët që ne  e kemi nisur të parën vizitën. Pra, ne në agjendë qeveritare kemi vënë dy anëtarë të kabinetit tonë që të shkojnë në Luginë të Preshevës të hënën e 5 Shtatorit, dhe është siguruar edhe agjenda shtetërore, edhe takimet edhe aktivitetet atje. Kësaj Serbia i është përgjigjur me vizitën e Bërnabiqit. Tash nuk mund ta ndryshoj unë agjendën shtetërore se kjo do të ishte varësi ndaj Serbisë. Nuk mund ta bëjmë shtetin të varur ndaj Serbisë ku ata e përcaktojnë agjendën tonë. Ata janë duke ju përgjigjur agjendës tonë, pse ata nuk e kanë qu zëvendëskryeministrin a ministrin po e kanë qu kryeministren kjo është çështje e tyre. Po ndryshimi i agjendës tonë shtetërore nuk do të ishte reciprocitet do të ishte varësi nga agjenda e Serbisë. Prandaj edhe nuk e bëjmë këtë gjë. Ndërkaq, sa i përket takimeve në Bruksel nuk e dimë se kur do të ftohen ato, por ajo çka dihet sigurt është që Republika e Kosovës, qeveria jonë ka gatishmëri dhe interes për marrëveshje ligjërisht të obligueshme për normalizim të plotë të marrëdhënieve me njohje reciproke në qendër dhe për këtë unë kam prezantuar kornizën e përgjithshme, pala tjetër ka thënë që nuk është e interesuar për këtë dhe tash i takon ndërmjetësve që ta sqarojnë këtë gjë. Kur të vije ftesa me agjendë padyshim që do ta ndaj me ju. Me serbët lokalë unë takohem rregullisht shumica dërmuese e atyre takimeve nuk i bëj publike, sepse nuk është e leverdishme, e kam shpjeguar edhe këtu shumë herë. Ju e dini që kur isha herën e parë kryeministër bëra një këshilltar politik nga Ranillugu, Aleksandër Stankoviq, dha dorëheqje pas dy orëve sepse i bënë trysni kërcënuese strukturat ilegale, kjo është arsyeja ose edhe dikush nga Beogradi, kjo është arsyeja pse nuk është e leverdishme që ky dialog doemos të zhvillohet me tupan apo para kamerave.

Pyetje VII: Pyetja e parë është a mund të na tregoni emrat e kabinetit tuaj të cilët do të vizitojnë apo do të shkojnë në Serbi, këtë të hënë. E dyta është thatë që nuk e tejkaloni BSPK-në, për të takuar z.Jashari. Sot Osmani e takon z.Jashari a po gabon znj.Osmani. Gjithashtu kemi pasur edhe një deklaratë dje të anëtarit të Lëvizjes Vetëvendosje në Tiranë, Elvis Hoxha, ku tha se greva e mësimdhënësve po udhëheqet nga një anëtar i një partie serbe dhe përdori edhe termin kosovarist. A do të merrni masa dhe si i cilësoni këto deklarata të z. Hoxha?

Kryeministri: Nuk është e përshtatshme unë të flas nga këtu, kush çka thotë e komenton, s’mund t’ua bëj analizën analistëve, s’mund t’ua bëj komentet komentuesve më vjen keq dhe as nuk jam këtu në cilësinë e kryetarit të Lëvizjes Vetëvendosje!, por të kryeministrit të Republikës së Kosovës. Njerëzit caktojnë agjendat e tyre dhe ata e vlerësojnë se çka është më së miri, besoni nuk e di tash për shkak të numrit të madh të takimeve që kam sot, as cila është saktë agjenda ime deri në mbrëmje vonë, lëre më e të tjerëve. Por ajo çka mund të them është që ne shumë më herët kemi pas dy anëtarë të kabinetit tonë që shkojnë në Preshevë, Medvegjë dhe Bujanoc, në një vizitë edhe besoj që është bërë publike ajo, është konfirmuar me media kjo gjë, është konfirmuar sot, nëse nuk gaboj do të jenë Zëvendëskryeministri Bislimi dhe ministrja e Arsimit, Shkencës, Teknologjisë dhe Inovacionit, Arbërie Nagavci, ndonëse nuk jam qind për qind i sigurt sepse kjo është një çështje që e kemi iniciuar shumë më herët e më pastaj nuk e di se çfarë takimesh kanë aranzhuar, por e di që do të jenë dy anëtarë të kabinetit tonë, me gjasë Zëvendëskryeministri dhe ministrja e Arsimit. Unë ju përgjigja, po shikoni unë ju tregova agjendën time deri në fund të ditës nuk e di saktësisht, se kam takime nga 10 – 15 minuta, shumë takime a po kuptoni. As nuk mund të flas për agjendën time siç ju thash e jo të të tjerëve. Faleminderit shumë.

Sot në Gjilan, Kryetari i Komunës, Alban Hyseni, së bashku me Kryetarin e Kamenicës, Kadri Rahimaj, Kryetarin e Podujevës, Shpejtim Bulliqi, dhe Kryetarin e Shtimes, Qemajl Aliu, bënë thirrje që nesër prindërit t’i dërgojnë fëmijët e tyre në shkolla dhe mësimdhënësit ta fillojnë procesin mësimor.

Pas punës së bërë për Ligjin e Pagave në afat rekord nga qeveria, duhen dërguar komentet nga sindikatat e jo të vazhdohet me greva. Greva në arsim në këtë kohë është lojë e rëndë politike që luhet mbi fëmijët dhe të ardhmen e tyre.

Qeveria ka nxjerrë Pakon Mbështetëse për përballimin e inflacionit, gjithsecili institucion është angazhuar që kjo hyrje në vjeshtë para një dimri të rëndë që na pret të përballohet sa më lehtë. Andaj, edhe institucionet shkollore duhet ta bëjnë pjesën e tyre dhe ta kthejnë normalitetin nëpër shkolla, thanë kryetarët e komunave.

Lëvizja VETËVENDOSJE! po futet në fazën e fundit në kuadër të zgjedhjeve të brendshme. Afati për kandidim për nivelin e dytë dhe tretë organizativ është mbyllur me 23 gusht, ndërkohë sipas kalendarit zgjedhor fushata për nivelin e tretë organizativ është hapur dje, më 1 shtator 2022.

Në nivelin e tretë organizativ zgjedhjet përfshijnë zgjedhjet për:

– Kryetar/e të Lëvizjes VETËVENDOSJE!

– Kryetare të GVV.

– Kryetar/e të RVV.

Fushata e brendshme zgjedhore për nivelin e tretë përfundon me 23 shtator 2022.

Në anën tjetër, ditët në vijim Komisioni Zgjedhor i Përgjithshëm (KZP) do të njoftojë edhe me afatet për fushatën e brendshme zgjedhore për nivelin e dytë organizativ që përfshin qendrat e LV-së.

Lëvizja VETËVENDOSJE! i uron sukses të gjithë kandidatëve!