Seanca për ngritjen e çmimeve – Ministri Murati: Alternativa e propozuar nuk ka asnjë kalkulim se sa i kushton shtetit dhe sa përfitojnë qytetarët
LDK ka propozuar debatin për ngritjen e çmimeve. Alternativa e propozuar prej saj nuk ka asnjë kalkulim se sa i kushton shtetit dhe sa përfitojnë qytetarët.
Qeveria ka marrë vendime për 365 milionë euro dhe ka listuar të gjitha përfitimet që i kanë pasur qytetarët duke filluar nga parandalimi i shtrenjtimit të rrymës për 80% të familjeve, mbështetja me nga 100 euro për pothuajse të gjitha familjet, dyfishimi i asistencës sociale, mbështetja e lehonave, fëmijëve, etj.. Pra, ka listuar të gjitha, secilën familje ku ka përfitu dhe sa i ka kushtuar buxhetit. LDK nuk e ka bërë një gjë të tillë.
LDK thotë të ulet TVSH për produktet bazë nga 18% në 8%. Për një familje me të ardhura 400-450 euro, shpenzimi i 100 eurove në shportë, ky propozim sjell 10 euro përfitim në muaj.
LDK thotë të ulet TVSH për naftën. Për një familje mesatare që shpenzon 50 litra karburant në muaj, ky propozim sjell 6.5 euro përfitim në muaj.
D.m.th., 10 euro nga zbritja e TVSH-së për produktet bazë dhe 6.5 euro nga zbritja e TVSH-së apo taksave të tjera për naftën, do të sjellnin përfitim 16.5 euro në muaj për qytetarët.
LDK ka propozuar që kjo politikë të zgjas 3 muaj, që i bie 3 x 16.5 bëjnë 49.5 euro. As 50 euro.
Kjo është politika që propozon LDK.
Ne i kemi dhënë 100 euro për studentë, pensionerë, të punësuar.
Mesatarisht kanë përfituar 200 euro për familje. Në mesatare pra. Do të thotë edhe po të zgjatej politika e LDK-së në 6 muaj, 12 muaj, prapë do të ishte më pak sesa që ne kemi dhënë.
