Të dashur myslimanë, Lëvizja VETËVENDOSJE! ju uron për fillimin e muajit të Ramazanit.

Agjëruesve u dëshirojmë forcë fizike e lumturi shpirtërore, gjatë këtij muaji kur ata i përkushtohen disiplinës së adhurimit.

Muaji më i shenjtë për besimtarët është koha kur fryma fiton prioritet ndaj trupit, kur besimi fiton betejën përballë mashtrimit, dhe e vërteta lartësohet mbi çdo huti.

Si në çdo kohë të shënuar, muaji i Ramazanit është edhe rast kur shqiptarët i tregojnë botës virtytin e tyre, respektimin e fesë së fqinjëve e bashkëkombasve të vet. Çdo gjest provokues e nxitës për përçarje, nuk e ka vendin mes nesh.

Sivjet agjërimit i shtohet edhe një sprovë tjetër, udhëzimi për të ruajtur distancën shoqërore. Pra heqjes dorë nga ushqimi i shtohet edhe heqja dorë prej shoqërimit me miq e të dashur jashtë familjes së ngushtë. Megjithatë, ne e dimë se besimtarët gjatë Ramazanit marrin energji e forcë shpirtërore, prandaj ata do t’i përballojnë me lehtësi këto sprova.

Urojmë që gjatë këtij muaji të mbretërojë harmonia e paqja, brenda familjeve e brenda shoqërisë, dhe shpresojmë që politika të marrë shembull nga besimtarët e nga populli i mirë që kemi, dhe të tregohet e përgjegjshme e mos ta vërë në rrezik vendin.