Tubimi në Shtërpcë-Cep më Cep 118

Shtërpca me VETËVENDOSJE! Cep më Cep 118

Tubimet e Lëvizjes VETËVENDOSJE! vazhdojnë me përkrahje të madhe nga qytetarët Cep më Cep të vendit. Këtë herë, Shtërpca u bë qendra e një entuziazmi, ku qytetarët u mblodhën për ta shprehur mbështetjen e tyre për Kryeministrin Albin Kurtin.

Kryetari ynë i qendrës në Shtërpcë, Shpejtim Arifi, në hapjen e fjalës së tij, komunikoi një mesazh të rëndësishëm për komunitetin serb që jeton në Kosovë, duke kujtuar se Lëvizja VETËVENDOSJE! nuk është kundër serbëve, por kundër Listës Serbe, e cila në vahzdimësi vepron për të minuar shtetësinë e Kosovës me udhëzime nga Beogradi.

Ministrja Arbërie Nagavci tha se përkrahja e madhe dhe emocionet që po përjetohen kudo në Kosovë, përfshirë Shtërpcën, janë dëshmi e qartë e punës dhe parimeve të Qeverisë Kurti 2.

Kryeministri Albin Kurti falënderoi qytetarët e Shtërpcës për mbështetjen e tyre të vazhdueshme, duke garantuar se Lëvizja VETËVENDOSJE! nuk do t’i lërë kurrë vetëm. Ai premtoi më shumë zhvillim, mirëqenie dhe drejtësi, duke theksuar se qeveria nuk do të zmbrapset përballë kriminelëve dhe grupeve kriminale, të cilët do të përgjigjen para ligjit.

“Qytetarët serbë, si këtu në Shtërpcë ashtu edhe në veri të Kosovës, po e rrisin besimin në qeverinë tonë sepse po kuptojnë se vetëm kjo qeveri i mbron nga bandat kriminale,” theksoi kryeministri Kurti.

Ai shtoi se tubimi u mbajt në një restorant për shkak të gjendjes së keqe të Shtëpisë së Kulturës në Shtërpcë. Kryeministri premtoi se Qeveria, në bashkëpunim me qeverisjen lokale, do të investojë për ta rikthyer këtë institucion në një hapësirë dinjitoze për aktivitete kulturore.

Në Brezovicë, ai kujtoi, që do të investohen rreth 500 milionë euro për përmirësimin e kushteve të turizmit, duke e kthyer këtë zonë në një destinacion të zhvilluar dhe atraktiv.

Në mbyllje, qytetarët treguan vendosmërinë e tyre për të forcuar këtë energji që po dominon Cep më Cep për fitoren tonë të madhe me numrin 118.