Zhvillim pa diskriminim – zgjidh nr. 60
Mbrëmë, në kuadër të fushatës zgjedhore, Lëvizja VETËVENDOSJE! mbajti tubim në fshatin Çabër të Komunës së Zubin Potokut dhe Lagjen e Boshnjakëve të Mitrovicës së Veriut. Kandidatët për kryetarë nga këto dy komuna, Liridona Kahrimani dhe Erden Atiq të shoqëruar edhe nga Kryetari i Lëvizjes Albin Kurti, deputetët, Rexhep Selimi e Xhelal Sveçla e nga Kryetari dhe Nënkryetari i Komunës së Mitrovicës, Agim Bahtiri e Faruk Mujka, shpalosën para qytetarëve të kësaj ane prioritetet për këtë zonë.
Disa prej zotimeve të Lëvizjes për fshatin Çabër të cilat do të zbatohet nga qeverisja e Liridona Kahrimanit janë: Funksionalizimi i shkollës së fshatit. Poashtu, programi i shujtave duhet siguruar për të gjithë nxënësit e klasave 1-5 në të gjitha shkollat e komunës. Do të sigurohen vizitat sistematike shëndetësore për fëmijët e të gjitha shkollave. Ndërkohë në infrastrukturë do të bëhet lidhja e rrugëve rurale me qendra. Rritja e subvencioneve në bujqësi, në biznesin e vogël dhe në sport. Funksionalizimi i plotë i QMF për të gjitha qytetarët. Hapja dhe transparenca e komunës, e mbledhjeve dhe vendimeve të saj, me qytetarët. Rikthimi i përdorimit të ligjshëm të dokumentave me vulë e logo të Rep. së Kosovës.
Ndërkaq, zotimet e Erden Atiqit për Mitrovicën e Veriut janë: Zbatimi i programit mësimor të Republikës së Kosovës në Çdo shkollë, sigurimi i shujtave për nxënësit në shkollat fillore. Tutje, do të dyfishohet programi i bursave për në Universitetin e Prishtinës. Do të bëhet organizimi i vizitave të rregullta shëndetësore për të gjithë nxënësit. Mbështetja për rindërtimin e shtëpive dhe kthimin e banorëve në pronat e tyre dhe riorganizimi e funksionalizimi i plotë i transportit urban publik veçanërisht qendër – zonë periferike. Ndërkaq në fushën e shëndetësisë do të bëhet funksionalizimi me kohë të plotë i Ambulancës dhe do të pajisjen me barna e laboratorë funksionalë. Hapja dhe publikimi i vendimeve të Komunës për qytetarët. Transformimi i shërbimeve të administratës për qytetarët, me dokumentacion të Republikës së Kosovës. Rigjenerimi i rrjetit të ujësjellësit dhe rregullimi i sistemit të kanalizimit. Hapja e programit intensiv për subvencionimin e pagës dhe planifikimi i programit të subvencioneve për bizneset e vogla prodhuese. Ndryshimi, vendosja e ligjshmërisë dhe cilësisë në konkurset për punësimet në Komunën e Mitrovicës së Veriut. Kordinimi me Komunën e Mitrovicës së jugut dhe nivelin qendror për të jetësuar peticionin e qytetarëve për bashkimin e dy komunave në një.
